|
للمتزوجين والمتزوجات ...هل واجهتك مفاجأه بعد الزواج ؟؟ وماهي ؟؟
بسم الله الرحمن الرحيم
كما هومعروف ان الزوجين قبل الزواج يكون كل منهما شبه غريب عن الأخر .. ان لم يكن غريب بالكليه ... وبالطبع فأن فتره الخطوبه هي اجمل ايام العمر للجميع اللتي لاتنسى ابدا .... ولكن بعد رحيل الأيام الورديه المحمله بأحلى الهدايا وعبارات الحب والشوق الهيام (واللتي من الجميل ان تبقى زمنا طويلا) ... والأستقرار في مركب الزواج استعدادا للرحيل وبدء الحياةالجديده ... هل واجهتك مفاجأه مع بدايه هذه الرحله ؟؟ او هل هيأت نفسك لتلقي مفاجأه من اي نوع ؟؟؟؟ وماهي ؟؟؟؟ ماهي اول مفاجأه ظهرت لك في شريك حياتك ؟؟؟ او .... مااول صدمه صدمت بها ؟؟ او .... مااول ملاحظه لفتت انتباهك وعقبت عليها لشريك حياتك ؟؟؟ او .... مااول طلب او مبادره من ( زوجك ..زوجتك ) توقعته او لم تتوقعه ؟؟؟ هل اعجبك هذاالطلب ام لم يعجبك ؟؟؟؟ صفه او ميزه كنت تأمل او تتوقع وجودها ولم تجدها ؟؟؟؟ صفه او ميزه كنت تأمل عدم وجودها ووجدتها ؟؟؟ كيف تعاملت مع هذه المفاجأه ؟؟؟ هل قبلتها ام استنكرتها ؟؟؟ ام اعلنت عن عزمك او رغبتك او امرك بتغييرها لشريك حياتك ؟؟؟ طبعا من جميع النواحي ( الشكل .. الكلام .. الفكر والقناعات والمبادئ والمهارات والطبائع ... اسلوب التعامل والسلبيات والأيجابيات ) لا ادري هل وصل لكم مااطلبه منكم ام لا ؟؟؟؟ ولكن عندي شوق كبير ولهفه لمعرفه مايحدث في بدايه هذه الحياه من كلا الطرفين ... فأرجوكم لاتبخلوا علي بتجربتكم ... فكلامي ودعوتي لكم لن يكون لها اي معنى او فائده ترجى ان لم تدعموها بتجربتكم .... فهي دعوه لتستفيدوا وتفيدوا غيركم .... وجزاكم الله الف خير مقدما .... |
لا تعليق ...!!!
إذا أعرست أقول لك هههههه لكن بجد موضوع حلو تشكرين عليه |
موضوع حلو
هيا يامتزوجيييييييييييييييييييييييييييين ردوا |
والله يالولو ياحبيبتي هي ماهي مفاجآت ... لأني كنت مهيئة نفسي أتقبل زوجي بما فيه لأني أحبه .. لكن ماأتعبني ولازال هو عناده الشديد رغم مرور السنين ..عدم مرونته لما يقول كلمة مايثنيها أبدا .. أيضا كنت أتمنى أن أجده رومانسي ومع إني أشعر برومانسيته العميقة إلا إنه يخفيها تحت جدار من الثقل والرزانة لأنها هذي شخصيته ...
ومع ذلك أحبه بكل مافيه فدينه وإستقامته تغطي على عيوبه ..... وعلى فكرة موضوعك جدا جميل وأنا من متابعيك إنت وشوبارد الله يوفقكم ويزوجكم بالرجل الصالح عاجلا غير آجل ... |
|
الامر الذي فاجأني في زوجتي السابقة هو انها كانت تتنصت على مكالماتي 00 وفي كل مرة تعد بالتوبة ثم تعود لفعلتها
علماً بأن هذا لم يكن بعد انتهاء الايام الوردية بل خلالها 00 لاننا انفصلنا والايام الوردية بيننا لم تنتهي والحمد لله على ماكان |
أنا تفاجأت إن زوجي الله يحفظه كان يحبني قبل ماياخذني أصلاً من كثر الكلام الي سمعه عني خخخخخ
<< أحلام وحدة مابعد تتزوج حلوة مرة فكرة الموضوع ثبتوه لين نعرس عشان نجي ونسولف لكم عن المفاجآت |
والله سؤالك جدا حلوووو
وأنا أول ماتزوجت تفاجأت بردة فعل زوجي يعني لو أكلمه بصوت هادي أو أطلب طلب عادي أو حتى أسولف كان يصرخ في وجهي يعني مو رقيق أبد إلا دفش بمعنى الكلمه بس ألحين تأقلمت معاه وصار عسل على قلبي هههههههه |
انا حارد على السؤال باتجاة ثاني
مع اني فاهمة السؤال والسبب؟؟؟؟؟؟؟؟؟ لان المفاجاة واجهتني عند الخطبة ولم اتزوج بعد والمفاجاه ان خطيبي هو نفس الشخص الذي كنت اتمناة واحلم بة وافكر طوال حياتي كيف سيكون طلع هو نفس اللي في بالي سبحان الله من جد اتفاجات نفس الموصفات اللي كنت اتمناها دائما احمد الله واتمنى ان يتمم خطبتنا على خير |
طبعا يوجد مفاجات حلوه كثير وفي بعضها مو زينه مرررره
يعني مثلا اكتشفت انها رومنسية لحد مو معقول ولدرجة انها غير قادره ان تعبر عن ما في نفسها طيبه .... حنونه ........ طباخه ماهره ...... نفسها حلو في الاكل لدرجة ان الوالد الله يحفظه ادمن على اكلها سار كل يوم والثاني يجي يطمن على بيت ولده...... عاد انتوا فاهمين اكتشفت ان عندها مواهب مدفونه ويجب عليه كزوج ان استخرجها وصراحة واجهتني مفاجاءه كبيرة وهي ان خيالها واااااااسع جدااااااا ............. وعنيدة ....... يمكن هذا بسبب سنها الصغير 17 الله اعلم............. لكن على العموم الله لايحرمني منها و يسعدها وينتعها بالسلامه |
تفاجأت بل صدمت وبكيت وندمت وتحسرت وانطويت هذا كله علماً بأني لم اختاره ولم اعلم الاقبل زواجي بفتره أنني سوف اتزوج فهيا استعدي وانا مازلت في نعومة اظافري مع الاسف انا لا اذكر الا مفاجأت ومواقف سيئه ولا أرغب ان احكيها ولكن أذكر شي واحد فقط يثير ضحكي عندما اتذكره وهو ثاني يوم من الزواج طلبت منه يردني بيت اهلي ويوم سأل عن السبب قلت له ابي سواك اسناني والمعجون والمعجون (ابي اسوك اسناني) ما رأيكم بهذه الطفلة الساذجه .... يارب قنعني بما انا به وارضني يارب العالمين وارزق اخواتي واخواني يا رب
|
بالنسبه لي انا كانت الصاعقه لي من اول يوم زواج حيث اكتشفت حقيقة اللي اسمه زوجي واكتشفت انه عكس ما وصفوه لي اهلي واهله قالوا انه انسان خلوق ودين ويخاف الله ومن البيت للعمل ولاعنده خرابيط وانه موظف محترم وبعد مادخلنا للغرفه بالفندق باول ليلة زواج دخلت اغير ملابسي وطلعت الا اشوفه حاط الكاس ويشرب كنت وقتها 17 سنه قلت له دامك تبي ماي كان قلتي انا اجيب لك قال لي من قالك ذا ماي ذا خمر عشان احتفل بالزواج تعالي خذي لك واحد معي وكانت كلمته لي مثل الصاعقه بعدين قلت له بس هم قالوا انك ماتشرب وانك تصلي قال وهو يضحك كذبوا عليك قلت له والصلاه مداوم عليها قا اي صلاه اي خرابيط مااعترف بدينكم ولا باسلامكم خليته لكم وانااسمع كلماته مثل الرصاص وعرفت منه انه مفصول عن العمل بسبب سوء السمعه والسلوك وانه اصغر من ابوي بكم سنه بس تخيلوا كل ذا بليلة الزواج واذكر يومها اني دخلت الحمام اعزكم الله وجلست ابكي على حظي العاثر اللي رماني بواحد مثله واتحسب عليه واطلب من الله انه يسامح ابوي على انه رماني هالرميه وهو داري بكل علومه
|
اختي وردهـ
مشكوره والله يرزقك الزوج الصالح ولد مكه مشكور عالمرور والتشجيع بنت طيبة الطيبه والله هذي الأجابه النموذجيه في نظري ...الأستعداد لتقبل شريك الحياه بكل مافيه من مميزات وعيوب هو في حد ذاته نجاح ...بل ان الموضوع يتطور ليتتحول العيوب الى مميزات .... بارك الله فيك ونعم السيده انتِ ... الله يديم المحبه والسعاده عليك .... وجزاك الله الف خير لدعواتك .... مشرفتنا ريم المدينه جزاك الله خير ومشكوره على المرور والتشجيع .. اخي كاره الرياضيات الله يعوض صبرك كل خير يارب ... فعلا التنصت على المكالمات شي يدعو للريبه غير انه عاده سيئه جدا جدا .... وقصدي بالمفاجأه هو اول مفاجأه ومو من الضروري بعد انتهاء الأيام الودريه ....لأنه يكون لها وقع خاص بالنفس ..صح والا لا ؟؟ اختي اخت الشفق بأذن الله تتحول الأحلام لحقيقه ... وان شاء الله يتثبت انا بعد نفسي احكي عن مفاجآت الزواج ... اختي بقايا انسانه مشكوره علىالمشاركه والتشجيع ... وفعلا رده فعل زوجك تفاجئ لكنها اهم شي هذا طبعه واسلوبه وانك تعودتي عليه ... دلوعة السعودية الله يتمم عليك بخير ويديم الفرحه عليك يارب ... ومشكوره على المشاركه ... اخي طبعي كذا ماشاء الله لاقوه الا بالله ...الله يحفظها لك ويديم المحبه بينكم ... ومثل ماقلت خيالها واسع بسبب صغر سنها شي طبيعي .. وبالعكس انا احس انه ميزه راح تظهر بأي مجال اذا كبرت شوي ... مشكور على المشاركه اخي ... لام الحنون احلا طفله والله ...والله يقنعك ويرضيك بما رزقك اياه ..ومافي انسان يختار .. كل انسان ياخذ اللي كتبه الله له ... والحمد لله على كل حال وجزاك الله خير اختي منبع الأحزان لاحول ولاقوه الا بالله ... لحول ولاقوه الا بالله ... والله مدري ايش اقول اختي منبع الأحزان ... لكن كل انسان مبتلى وكل شي بتقدير وتدبير من الله عزوجل وله الحكمه سبحانه وتعالى بكل مايجري من امور ... الله يصبرك ويساعدك ويعوضك كل خير ويهدي لك زوجك يارب |
ماشا ءالله عليج موضووووووووووعج خطييييييييير مرررررررة
الحين دوري اتكلم عن زوجي:o اتفاجأت و انصدمت وانفتحت عيوني على اوسعها :eek: لما شفته يصيح بدموع غزيرة على قدمي المكسورة... والله ما اتغشمر لكن صدق صدق صدق الريال منهبل فيني:23: اللي اتفاجأت منه إنه يحبني بشكل فظيع:d ادعولي لاني دايما ادعيلكم |
هلاوالله بالدكتوره وطفا
ماشاءالله لاقوه الابالله ... الف مبروك مره ثانيه على الزواج ...والله يديم المحبه بينكم طول العمر ويخليكم لبعض ... صدق احلى مفاجأه ... |
موضوع حلو وشيق
اما زوجي انبهرت فيه الله يحفظه لكن اللي استغربت منه أنه بعد أول خلاف لنا بعد تقريبا شهر بكى وايد استغربت لكن بعدين عرفت طبيعتة حساس وما يحب ايزعلنييي فدييييييييت روحه تعرفوا سرررررررررررررحت في هذيج الايام ما قدرت اتذكر الا ابتسامته ونظراته:o |
انا اصدمت في زوجي السابق ، في اشياء كثيرة
وما تنقال المهم من الاشياء اللي ممكن تنقال ، اني اكتشفت انه ما يصلي!!! ، في البداية لا حظت وسكت ، بس عشان اتأكد ، وبعد ما تأكدت ، صرت المح له انه وقت الصلاة ، واذا طلب مني شئ ، اقولة الحين وقت صلاة ، فيما تصلي اكون خلصت لك اللي طلبته. وكأنه تحسن ، وبدأ يستحي !!! ، لأنه كان يراقبني وانا اصلي ، ويقولي انت تطولين في الصلاة. وهو الحين راح في حال سبيله الله يعوضني ان شاء الله |
اكتشفت غرقي بالرومانسيه الخياليه ........... التي لااتمس واقع الزواج باي حال ,,ابــــــــــــــــددداا اكتشفت اني في وادي,,,,,,,,,,,,,, وزوجي بوادي والى الان ونحن نحاول في فهم بعض ,,,,,, هو يراني انسانه متسرعه في احكامي ,,, وانا ارا انه متمسك في رايه لااخر نفس اكتشفت انه لايعرف كيف يقنعني او يفسر لي ,,,, سبب رفضه لاى طلب او موضوع اناقشه فيه كذلك لايعرف ان يقول كلام الحب والغزل .... ولكن يعرف فعلهما )( وهذا المهم)( ********** بعد مرور هذا العمر مع بعض تغلبنا على اصعب الازمات التي عصفت بنا كيف لا ,,,,, ونحن نحب بعض قبل الزواج ,,,, واصبح لدينا الاولاد والبنات ,, ؟؟؟ تمنياتي لك يا أ خت لولو بالسعاده والهنا واحب ان اشكرك على هذا الموضع الذي ارجوا ان نكون قد وفقنا بسرد بعض ما مر علينا من اكتشافات في حياتنا الزوجيه التي اتمنى ان تفيدكم اختك // اي مشاعر |
ameeratalandlus
الله يديم عليك الأيام الحلوه .. بس والله شي يصم انك تشوفين رجل يبكي قدامك خصوصا زوج .. ماعمري شفت رجل يبكي ... الله يخليه لك ويطول لك بعمره ... ومشكوره على مشاركتك .. اختي @@ the swan @@ الله يصبرك ويعوضك كل خير ... فعلا الصلاه شي عظيم ومافيه تساهل ... اسألالله العلي القدير ان يعوضك احسن منه ... ومشكوره على مشاركتك ... اختي (لي مشاعر ) شاكره لك مداخلتك المميزه فعلا ... اهم شي ان اللأنسان يتنازل بالحياه الزجيه ويصبر ويضحي كثير ويتقبل شريك حياته بكل مافيه .. صح والا انا غلطانه ؟؟؟. والرومانسيه الزايده ماهي عيب .. والشخص اللي مايتقبل الرومانسيه ولا يعترف بها ايضا ماهو عيب بعنىالكلمه .. كلها طبائع تتكون في الأنسان من التربيه واسلوب العيش ... والشاطر هو اللي كيف يتكيف ويكيف نفسه مع وضعه الجديد ونصفه الأخر ... اسعدتين مشاكرتك ونفعتني كثير .. والصراحه تفاجأت ببعض مفاجأتكم لأني كنت متوقعه تقولون لي اشيااااء ثانيه راح بالي لها بعيييييييد مافياي اح منكم ذكرها ... الحمد لله طمنتوني :d |
انا المفاجأه كانت انه زوجتتتتييي كانت تحبنيييي بجنون حبتني حيييييييل كأني في الافلام الهنديه
لكن المشكله ان انا كنت عادي وما حبيتها حيل ما ادري ليش الخلاصه انه بعد سنتين انفصلنا لان شخصياتنا مختلفه ولان الانجاب تاخر بسببي انا الزوج والعجييب ان بعد الانفصال صار في تحسن كبير من ناحيتي الصحيه وتحسفت على الايام الي زعلتها فيها وعاهدت نفسي انه اذا رجعت لي وما اظن او تزوجت غيرها اني احسن معاملتي اكثر والله المستعان |
** السلام عليكم ورحمه الله وبركاته **
ماهي اول مفاجأه ظهرت لك في شريك حياتك ؟؟؟ او ...
الخيانه مااول صدمه صدمت بها ؟؟ او .... الخيانه صفه او ميزه كنت تأمل او تتوقع وجودها ولم تجدها ؟؟؟؟ الصدق صفه او ميزه كنت تأمل عدم وجودها ووجدتها ؟؟؟ الكذب الحمدلله على كل حال .. الله المستعان : ) |
أول مفاجأة صدمت بها أني اكتشفت ان زوجي يدخن وانا ماكنت ادري المشكلة انه في بداية زواجي سألني عن رأيي في من يدخن وطبعا وبينت له اني ضد هذا الشيئ تماما بعدها سالته هل يدخن قال لي ابدا ما ادخن بس اني اشرب شيشه وبعد فترة بسيطة من الزواج ترك الشيشة وانا فرحانه جدا من انه تركها ومره سالته عن الدخان وقلت ان احد اخواني قالي انه شافك تدخن وانكر بشده وصدقت كلامه وبعد ست سنوات زواج تخيلوا المدة كيف طويلة اكتشفت انه فعلا يدخن من قبل الزواج وانا اللي كنت غبيةطول هذي الفترة مدري من كثر حبي له اعماني عن الحقيقة والاأنا ساذجة بزيادة عن اللازم وانا الان احاول معاه ان يترك التدخين وادعوا لي الله يوفقني
|
ماذكر شي غير اني نمت قبل انهاء المهمه جلست ساعتين نائم وحصلتها مبسوطه جالسه بصالون الغرفه نمت من الارهاق والشغل لاني حددت موعد الزواج والترتيب قبل زواجي بعشر ايام ومع ذلك ماكنت مزين شي ابد والعشر ايام هذه يمكن مانمت فيها 20ساعه .......
وغير ذلك ماني فاكر الا انها كانت تنحرج تاكل قدامي ودائماً اكشفها بالمطبخ |
المفاجأة اللي فعلا تفاجأت فيها او بالاصح المفاجعة هي الخـــيانــــــــه ومااشدها من مفاجعه
دعواااتكم لي بان الله يصلح زوجي ويهديه ويبعد عنه بنات وعيال الحرااااااااااام ويرده لي |
اسوء شيئ تفاجاءت فية هو......عدم المبااااااااااادرة...فهذا شيئ قاتل.....والروتين نوعا ما....عموما كلة يهون لانى احبة و ان شاء الله مع الايام كلة بيتصلح
|
جدا حنووون... ما توقعت انه لهذي الدرجة حنوون!! حبووووب.... و كل شي فيه حلووو... حتى دفاشته.... احسها حلوة :) و تعودت على دفاشته.. و شكلي صرت دفشة مثله ههههههههههههههه |
انا كل شي سيئ توقعته حصل من ليله الدخله بنيت توقعاتي ويوم حصل ماكنت مستغربه ومن توقعاتي اللي حصلت انه كان يسافر برا وهذي عقدتي وانه يدخن مع انه قعد سنه مايدخن قدامي ومع ذالك كنت اعرف ومن غير المفاجأت الصغيره اللي تخص العزوبي وفيه حاجه ماتوقعتها وكانت صاعقه بالنسبه لي وهي كنا بشهر العسل بحدى الدول العربيه دخلنا انا وزوجي السوبر ماركت نشتري بعض الاحاجيات شفته يحط بالسله بعض المشروبات حسبتها بيره عاديه خبركم عليميه ما افهم بالأمور هذي بعدين عند المحاسبه استنكر المحاسب لأني لابسه عبايه وقالي هذولي بيره بالكحول وهذا المشروب الفلاني اناكذا:eek: ولتفت على زوجي وقلتله تدري قال نعم ادري وشتريتها علشان ننبسط اكثر تخيلو وش سويت خليته صح ينبسط:30: :29: ومازلت اعاني من المشكله لكن احمد الله انه ليست في كل وقت بس وقت مل نسافر برا وطبعا من الاشياء الحلوه تفاجأت برقته وذوقه وحنيته وحبه لي من اول نظره وايضا هدوءه
|
اخي شقرديه
شاكره لك مشاركتك ...واللي لاحظته ان احد الطرفين يتفاجأ بالحب الكبير اللي ممكن يكون بشريك حياته .... والله يعوضك اللي فقدته ومافي احد ياخذ غير نصيبه ... اختي بنت الثويني جزاك الله خير وسعيده بمشاركتك ...والحمد لله على كل حال اختي آآآهات ... الله يهديه ويساعدك تخلصيه من التدخين ...فعلا شي غريب ماتكتشفين انه يدخن بعد ست سنوات .... لكن هذا دليل ان يعزك ويغليك علشان كذا مايبغى يزعجك بخبر انه يدخن ... بأذن الله راح يتخلص منه بمسادتك .. والله يوفقك .. n-d-m مشكور على المشاركه وجزاك الله خير .. سالفه الحرج في الأكل عند البنت شي عادي واسمع عنه كثير من البنات .. مايكلون في البدايه قدام ازواجهم .. اختي ( كبيره بعيوني ) الله يهديه ويصلحه ويبعد عنكم كل شر .. والله يعينك ... maya52 الله يعينك .. صدق انه شي مزعج لكنه اهون من اشياء كثيره .. ومثل ماقلتي مع الأيام تتغير اشياء كثيره والله يديم المحبه بينكم ... اختي غناتي ماشاء الله لاقوه الا بالله .. لكن بجد انا مستغربه ليه كثير منكم يقول اتفاجأ انه يحبني او تحبني او طيب ا وحنون بشكل غريب ... احسه هذا شي طبيعي ومتوقع من الطرفين في البدايه والا لا ؟؟؟ يعني المفترض دائما في بدايه الحياه الزوجيه يكون اغلبها اذا مو كلها ( حب) ... الشي الغريب واللي يخوف ويصدم انه يكون يكرهها او تكرهه والا انا غلطانه ؟؟؟؟ اختي ديمو 2006 لاحول ولاقوه الابالله .. والله بجد بديت اخاف من الرجال .. يعني مو مره وحده سمعنا ان الزوجه تتفاجأ بزوجها يدخن او يشرب او او او .. شي يخوف فعلا . الله يستر ويهدي الجميع يارب .... الله يوفقكم جميعا لكل خير ... وجزاكم الله خير جميعا ماقصرتوا |
طيب أنا ليه ما أذكر شي !!!
و الله انقهرت... ابي أتذكر ما قدرت.... |
بس بغيت اقولج موضووعج حلوو ما شااء الله.. ومتابعين..^^ |
بسم الله الرحمن الرحيم
يسعدلي صباحكم اذا كان صباح ~~~ ويسعدلي مساكم اذا كان مساء يا لووووووووووو لوووووووووو موضووووووووووووعك مررررررررررره حلللللللللللللللللللللو وجاء في وقته الصراحه انا عني كنت ايام الملكه شميت ريحه دخان في فم زوجي اوكيه وكحته زي كحه اخوي المدخن سكت حتى سافر من عندنا جيت بكلمه بتلفون وسألته قلت له : انت تدخن ؟؟؟ قالي لا ليش؟ انا ماقدرت اقوله ريحه فمك من الحياء الزايد قلت له كحتك زي كحه اخوي يعني من الاخير كحت واحد يدخن قالي حراااااام عليك تظلميتني وانا اصلا اكره الدخان وانا وانا وانا طيب ؟ عاد رده فعلي كله ندم وحزن وبكى عشان اني ظلمته بسؤالي قد ما انا ندمانه على اني سألته ولا على قولته اني ظلمته تخيلوا لدرجه ان الموضوع اثر على دراستي ونفسيتي والله وتزوجنا وانبسطنا وغيرنا جو حتـــــــــــــى وصلنا للبيت وجلسنا ذيك الجلسه قالي بقولك على شي ولازم اصارحك فيه وانا ما انكر لان كان بوجهه علامات ندم قالي انا ادخن والله والله والله اني حسيت الدنيا ظلمت بوجهي قلت ليش تكذب علي انت ماتتخيل وش صار فيني ذاك اليوم على قولتك اني ظلمتك ليش ماتقول الصدق تخيلوا وش رد علي ..... قال انا انتظرك من يوم انتي صغيره وما صدقت انك وصلتي لثانوي عشان اتزوج بك وخفت يكون الموضوع هذا يخليك ترفضيني وانا خايف تتزوجين واحد من عيال عمك يوم قالي هالكلام بكيـــــــــــــــــت بس وعدني انو يترك الدخان وقعدنا حوالي يمكن سته شهور او اكثر فتره يتركه وفتره يرجع له لييييييييييييين الحمدلله تغلب على رغبته والف شكر والحمد لله على كل شي بس انا مبسوطه لانو ترك الدخان عشاني الحمدلله رب العالمييييييييييييييين واعذروني لاني طولت بس حبيت افضفض *** واي سؤال انا حاضره ارق التحااااااااااااااااااااااااااااااااايا |
اختي ام مجاهد هلا بيك ...
وان شاء الله تتذكرين ..يمكن بدايته واجك كانت بسيطه مافيها تعقيد .. مشكوره على المرور ضايعه في الدنيا تسلمين وكلك ذوق ..مشكوره اختي شاااش تسلمين ياذوق ومشكوره على ثنائك ... الصراحه والصدق انا مااحب اللي يدخن ...والله شي يخوف ويقهر ان الوحده تتفاجأ بزوجها مدخن ..لكن المهم انه يكون مستقيم ويصلي واخلاقه عاليه وطيب ... والدخان بأذن الله ثم بارادته الزوج ومساعده زوجته يتركه..وانتي اكبر مثال اختي شااااش ونعم الزوجه ماشاء الله ..الله يخليكم لبعض .. الله يديم عليك السعاده ويوفقك ...والله يرزقك الذريه الصالحه عاجلاغير اجل يارب .... |
اقتباس:
هلا عزيزتي *&* لولو *&*.. انا استغربت من الحنان اللي عنده.... اي نعم كثير رجال حنونين.. لكــن... نادر ما تشوفينهم يظهرون حنانهم:25: صحيح بداية الحياة الزوجية اغلبها حب و رومانسية.. لكـن.. تبقى بعض الاشياء اللي يسويها الزوج.. فعلا مفاجأة للزوجة :d . و تنبسط منها... الله لا يغير علينا:17: آآميــن |
اختي ذكرتيني باللي عمري مانسيته
ثاني يوم من زواجي انصدمت لمل شفت بطاقة العائله تدرين ليش لاني اكتشفتشئ ماكنت متوقعته اكتشفت ان زوجي وحبيبي اكبر مني ب14سنه يعني كان عمري 20 وهو عمره34 اللي قهرني اكثر ان امي وابوي سألوا عن عمره اهله وكانوا يردون له سنتين متخرج من الجامعه فعلا هوله سنتين متخرج بس كان يعيد سنين الدراسه بالهبل(بصراحه مااطيق اخته اللي كانت طول الخطبه تردد متخرج من سنتين) بصراحه دقيت على امي هذاك اليوم وجلست ابكي من قلب وجلست امي تسكتني وتهونها علي تقول احسن الكبير عاقل اسفه طولت عليك بس حبيت افضفض |
أبشرك
حياتي كانت مليانه مفاجآت أول طلب قلت ليله الملكه لاتخذلني والحمد لله آخرها خذلني وأول صدمه إختفاء شهر بعد الملكه بخمس شهور وآخر صدمه المخدرات وقفلنا بالطلاق ولله الحمد * * * برغم هذا لله الحمد |
بسم الله الرحمن الرحيم
بصراحه تفاجئت .. بعد زواجنا بحبالها الصوتيه مشاء الله عنها .. اكون بجنبها نتكلم وتجيني لحظه افكر انها بتتكلم في ميكرفون من علو صوتها.. لكن في اثناء الخطوبه اضع ودني على بقها لسمع صوتها كان واطي ورومنسي بشكل لا يسمع ام الان تمسكت بصوت العالي والرومنسيه وتركت صوت الواطي .. بس من مده قصيره انتبهت لشي هذه يزعجني وبدئت تخفض صوتها واتمنى تكون دايما هكذه |
مشكورين على هذا الموضوع الشيق
انصدمت بالكثير من الأمور بالنسبة له انصدمت بأنه ينسى كثيرا ولا يركز في أي شي أقوله له !!! بالإضافة إلى أنه كثيرا ما يكون خارج المنزل اكتشفت بأني احب اهلي من أي شيء آخر واشتاق إليهم كثيرا أما بالنسبة لأهله فقد انصدمت بطريقة حياتهم واسلوبهم وطريقة تعاملهم معي!! |
طرحك للموضوع جداااااا راقي
:17: الاخت لولو موضوعك حلو بالمره ونستنى منك الاكث:17: :17: ر ...
الحياة الزوجية مليئه بالمواقف منها مواقف سعيدة ماتنسي ومنها مواقف الله لايعيدها ... دعواتي لك حبيبتي بالتوفيق وحياة مزخرفه بكل الوان السعادة ... |
ما شاء الله
موضوعج وااااااااااااااااايد حلو لولو :22: مع اني لي الحين مو متزوجه :21: بس ان شاء الله لا تزوجت راح تشوفوني عضوه دايمه وياكم :14: لاني اتابعكم على طول :11: ادعوا لي بالزوج الصالح :) يعطيج العافيه حبيبتي :28: |
هلا بيك غناتي
اللهم امين الله لايغير عليكم دووووم م يوم .. ويارب مثل ماتقولين يكونون كل ا لرجال حنونين مو اغلبهم.. مشكوره على ردك لسؤالي .. اختي توله عود الحقيقه فعلا مفاجأه ..ومالومك علىالصدمه .. لكنالمهم انهم ماكذبوا عليك هو فعلا متخرج من سنتين ...يعني علىاعتبار مثلا انه متوظف جديد او مااستقر في الوظيفه والعمر مو مهم كثير ... والكبير فعلا احسن من الصغير ... يعني كثير بنات يتمنونه كبير وانتي بأذن الله راح تبقين بعيونه طفلته طول العمر .. اكيد شي مزعج لما اكتشتفي فرق السن الكبير ... لكن والله فرق حلو بالنسبه لي ولو صار لي اعتبره احلا مفاجأه بحياتي .. وبأذن الله راح تكتشفين حلا ه الفرق هذا مع الأيام .... سعيده بمشاركتك ... اختي فتــايم لاحول ولاقوه الا بالله .. الله يعوضك باللي احسن منه يارب ... والحمد لله اللي خلصك منه .. كل شي ولا المخدرات الله يعافي الجميع ويحفظهم يارب ....الله يصبرك ويساعدك ويعوضك كل خير يارب ... اخي وحيد بغربتي يمكن طبيعه صوتها نبرته عاليه شوي ... المهم التفاهم والوصول لنتيجه ترضي جميع الأطراف بالأخير .. الله يديم عليك السعاده .... الحب المستحيل مشكوره على المديح ...يمكن زواجكم جديد وماتعودتوا على بعض للحين ... بأذن الله كل الأمور هذي تتعدل مع الأيام بس يبغى لها صبر ... الله يوفقك اختي مهـــا تسلمين ياذوق ..اللهم امين وجزاك الله الف خير لدعواتك لي .... اختي ( كيفي بطه ) <<<< صراحه اسمك مرح .. ليه تبغين تصرين بطه ؟ حتى انا مو متزوجه عزيزتي .. والله يرزق جميع البنات الزوج الصالح عاجلاغير اجل يارب ... والله يعافيك عزيزتي.. |
| الساعة الآن 07:51 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©