|
زوجي يستغفلني !!
بسم الله الرحمن الرحيم أول مرة أتجرأ وأطرح مشكلة لي في منتدى عام، مادري يمكن لأن صدري ضايق واحترت شلون أتصرف وأعالج الموضوع. قلت أطرح مشكلتي وأسمع آرائكم، يمكن عل وعسى.. انا متزوجة عن حب من شخص يحبني ويحترمني ومو مقصر علي بأي طلب أطلبه منه، عندي ولد واحد الله يخليه لنا، يعني باختصار أطالع ربي وهالأثنين (زوجي وولدي). قبل الزواج زوجي كان له بعض المغامرات، طحت عليه ، واعترفلي، وسامحته، وبعدها صار انسان مخلص، ماعنده سوالف كلش. تزوجنا وما شفت عليه شي يشكك، بس قلبي كان دايما يتذكر لحظات خيانته لي اللي قبل الزواج، سواءا لو صادفت اللي كان يكلمهم مثلا، أو سمعت قصة عن خيانة، دايما يرجعلي شبح الذكريات وصورته واهو يخونني ! لو أقولكم ان ثقتي فيه 100% مراح أكون صادقة مع نفسي ومع ربي، لأ أشك فيه أحيانا ! في سنتنا الأولى.. كان طالع، وناسي موبايله بالبيت، الشيطان وزني وقلت خل أتعبث وأشوف شنو فيه ما فيه، والصدمة إني لقيت بالرسائل المستقبلة رسالة تقول: " فلان دق على فلانة اعزمها على الحفلة باجر --- وحاط رقم تلفون البنت" ! والرسالة هذي من رفيج مقرب له، صادف اني اعرف رقمه بالصدفة. أنا حسيت ان قلبي انشلع من مكانه ! شلون..؟ أي حفلة..؟ ومنو هذي..؟ ما قدرت أتحمل الموقف، واجهته.. وكان رده ان المسج هذا واصله بالغلط من رفيجه، كان بيدزه حق واحد نفس اسمه بس دزله اياه بالغلط ! طبعا اهو ما يدري ان اعرف رقم رفيجه هذا، فقالي في البداية ان المسج واصله بالغلط، وما عقّب ان من رفيجه، ولمن قلت له ان هذا رقم رفيجك، نكر، وأصر على نكرانه.. لين دقيت على الرقم وطلبت رفيجه بالإسم وقالي نعم، وقتها اعترف ان رقم رفيجه وما كان حاب يقولي عشان ما يعقد السالفة ! طوفت الموضوع، ومرت السالفة على خير.. طبعا عقب، ترجي وزعل وسوالف وايد دامت اسبوع تقريبا.. هذي السالفة الأولى، قلت أذكرها لكم يمكن تربطونها بالسالفة الثانية اللي صارت قبل يومين. كنت حلمانه ان ماسكة تلفون ريلي جان ألقى رقم بنت، قعدت من النوم متضايقة وقلت له السالفة على ضحك وعادي مر اليوم. العصر، راح ينام وكان تلفونه بالصالة، قلت خل أشوف الأرقام يمكن ألقى الرقم اللي شفته بالحلم ! خذيت الموبايل وقعدت أطالع، دخلت على الرسائل المرسلة.. وايد مسجات تهنئة من ربعه، وتعزية ونكت وسوالف عادية موجودة بموبايل أي شخص. بس الصدمة لمن طحت على مسج يقول:" جهز حالك فلانه تبي تجي معانا" وكان بالرسائل المرسله يعني ريلي اللي داز المسج ! والرقم اللي دازه له رقم رفيجه نفسه صاحب المسج القديم، اللي عن الحفله ! طالعت التاريخ، وتذكرت هاليوم اهو وين كان بهالوقت، تذكرت انه قايلي انه بيروح البحر وكنا متزاعلين، بس ماقالي مع منو بيروح، أذكر قلت له:" الله معاك"، وما كلمته طول اليوم لين رجع بليل. حدي ينيت، وقلت هذي اكيد البنت اللي بالمسج مال الحفلة، وقتها انا كنت محتفظة بالرقم اللي بالمسج القديم، مادري شلون مسكت تلفوني ودقيت عليه، وشالته وحده، وقلت لها:" ألو.. منو فلانه"، جان تقول:" لأ النمرة غلط". يعني مو اهية...! قعد زوجي من النوم، وكان قاعد يطالع مباراة (أنا نوعي كل شي يبين على ويهي اذا تكدرت).. قالي:" شفيج " ! قلت له:" حلمي تحقق" ! قالي:" أي حلم " ؟ المهم قلته له كيت وكيت.. عطني تلفونك. عطاني اياه، وقالي وريني شفيه تلفوني..؟ المهم رحت على المسج ووريته، وقلت له أحب أعرف منك، شنو هالمسج..؟ اهو ويهه انقلب، وحسيت ان قلبه قام يطق بسرعة،أول ما قراه، قالي والله مو أنا اللي داز هالمسج !! هااااااااااا !! شنو مو انت اللي دازه واهو بموبايلك وبالرسائل المرسلة، ومنو بيتجرأ يدز مسج من تلفونك !! طبعا اهو قالي:" مادري والله مادري" ..! قلت له:" هذا المسج اندز الصبح نفس اليوم اللي انت رحت فيه البحر، وكنا متزاعلين ما نكلم بعض". جان يقول:" اي امبلا يمكن فلان أخو رفيجي دازه حق أخوه لأني كنت عنده الصبح بعطيه أوراق من التعليم العالي يوديها معاه لمن يسافر يسألي عن جامعة بره بما انه واهو يدرس بره - وصج اهو يدرس بره - " قلت له:" يا سلام، وأخو رفيجك هذا ما عنده تلفون" ؟ قالي:" لأ ماعنده، حتى اهو كان يدق عليه من البيت وكلمه ومادري شقاله تواعدو بيروحون المحكمه جنه، وبعدها دق عليه وما يشيله، عاد خذا تلفوني والظاهر دز المسج هذا... وانا على فكرة توني أدري بهالمسج ولا شفته أصلا.." وقال انه اهو كان رايح البحر مع ولد اخته، وهذا رقم ولد اختي اخذيه ودقي عليه وسئليه، والا دقي على اختي وسئليها ولدج يوم الثلاثة وينه ومع منو، أكيد أمه تدري ولدها وين رايح ومع منو..! وخذا التلفون ودق على ولد اخته وحط سبيكر وكلمه قاله انت مع منو يوم الثلاثة، والولد كان نايم مسكين اخترع وقال رحنا البحر الظهر جان يقوله والجمعة جان يقول اي كنا بالبحر ليش...!!؟ (( دق علي ولد اخته اليوم الثاني، يعني في احتمال يكونون طابخينها سوا.. احتمال لا أكثر !! )) أنا السالفة ما دشت مخي، اشمعنا رفيجه هذا نفسه اللي صايره السالفة معاه قبل، وشلون هذا يدز مسج من تلفون، ومعقولة حتى لو يدرس بره يكون ما عنده تلفون...!! يعني ما يدش العقل !! حلفلي بالله، وقالي أحلفلج على المصحف، وحلف بحياة ولدنا، وقالي ان المسج ما يدري عنه !!! أنا موقفي كان جدا بارد، وحيل هادية، وما عصبت ولا تنرفزت، اللي قلته له:" ان السالفة هذي ما تطوف علي بسهولة، وأنا ما أقدر أعيش مع واحد يستغفلني". أحب أسمع رايكم بالموضوع، لأني قاعدة أفكر بأفكار حيل هدامة... تعبت ودي أحط حد لمعاناتي هذي، ما أقدر أعيش مع انسان اشك فيه وبتصرفاته، ولا أقدر أعيش مع انسان يستغفلني !! دلوني الله يجزاكم خير... |
السلام عليكم :
أختى اعطيه فرصة اخرى ولكن من موقف قوة وليس ضعف بانك لا ترضي ان يكون لك شريكة في حياتك الا اذ كنت خارج حياته. |
شوفي اختي
بصراحه لو انه مكانج بعد بحس بنفس الشيء لكن فكري معاي شوي كلنا نعرف ان حبل الكذب شنوووووووووووووووووووووو قصير صح يعني تمالكي اعصابك عشان ما تغلطين وعشان بيتك وزجك وعشان ولدك بعد مايحسن انهفي مشكله بينكم بس والاتقصرين عليه وعطيه الامان كنك مصدقته خليه على راحته وتأكدي ان ربك بيفتح عينك اذا كان في شي وراح تشوفينه من غير ما تسعين وراه (احن نقول ياغافلين لكم الله ) وهذي المقوله 100% صح لان الله سبحانه يفتح عين الغافل دائما بس كوني شاطره وعالجي الموقف لون كان لقدر الله صح بصبر وطولت بال ولا أهم تعرفين سبب التصرف عشان تعالجين الخطء من جذوره والله يسوي الي في الخير |
نقل الى عالم المتزوجين ليلقى التفاعل
|
حبيبتي ..هوني على نفسك ..
أختاه ... لا أعلم إن كان زوجك صادقا أو لا ...ولكنني من وجهة نظر محايد أراه كذلك .. أخية عادة الشخص الذي يسرق لا يترك دليلا وراءه .. فلو كان زوجك هو الذي أرسل الرسالة لكان قد حذفها فور ارسالها ..فلماذا يبقيها وهو على علم بأنك قد تأخذين جواله في أي وقت وتفتحي الرسائل ((هذا ما استنتجه بأنه ليس لديه أي مانع من أن تفتشي في جواله )) أخيه لا أستطيع الا أن أقول احذري الشيطان ..احذريه لكي لا يفسد عليك حياتك ..فهو يوسوس لك دائما بأن زوجك ممكن أن يكون على علاقة بأخرى وهو أيضا من دفعك لتفتيش في جوال زوجك .. أنت تعيشي حياة جميلة ... فإحذري أن يحولها الشيطان الى غير ذلك ... أتمنى لك حياة زوجية سعيدة بعيدة عن وساوس الشيطان ... دمت بود ..اختك أم البنين |
أتفق مع أختي أم البنين في كل كلمة قالتها..و هذا ما تهيء لي أيضاً:)
أدام الله عليكم السعادة.. |
أتفق مع الأخت أم البنين
نفس الموقف تقريباً صار لي مع زوجي و ما صدقته لكن تأكدت بعدين إنه صادق و كانت ردة فعله نفس ردة فعل زوجك فانتبهي من الشيطان و لا تستعجلي |
اختي لا تخافين لا تخلي الشيطان يفرق بينكم
تصوري لو كان صادق و بعد الفراق عرفتي الحقيقة راح تندمين اشد الندم لو كانت السالفة صج ما كان يخليك تفتشين في موبايلو هذا على حسب وجهة نظري و اظن ان زوجك صادق و لا تخافين ما في الا الخير ان شا الله |
اقتباس:
|
اختي ما اظن في رجل بهالغباء.....
يخون زوجته ويرسل رسائل لاصحابه بخصوص بنات وحفلات ويترك الرسائل في قائمه الرسائل المرسله......!!!صح؟؟ بعدين واااااااااااضح ان زوجك موخايف من شيء مشبوه بتليفونه....والدليل انه ينام بالغرفه وتليفونه بالصاله..... يعني الرجل اذا بيخون زوجته اقل شيء يسويه يقفل تليفونه برقم سري او يقفل لوحه المفاتيح برقم سري..... او حتى يشتري له خط تليفون سري لصديقاته......وتدرين الحين الخطوط بسعر التراب..... فلو زوجك قادر يخونك اكييييييييييييد مراح يكون عاجز عن اي شيء من الاشياء اللي ذكرتها..... من خبرتي .......مافي اي شيء يخليك تحرقين دمك على الفاضي..... واذا على المسجات.....احسني الظن بزوجك....يمكن واحد من ربعه حاب يسوي فيه مقلب....او يمكن احد من ربعه فعلا داز المسجات من تليفونه......!!! لا تخربين بيتك بايدك......ولا تعطين الشيطان اي مجال يدخل بينك وبين زوجك..... وصدقيني حبل الكذب قصيييييييييييييييير.....ولو زوجك يخونك....مصيره راح ينكشف على اتفه الاسباب...... وانتي بعد اختي الحبيبه لا تتعبثين بتليفون زوجك ........خليها على الله.....وبهالمنتدى مواضييييييييييييييع كثيره بخصوص التفتيش من وراء الزوج..... الله معاك دووووووت |
مش عارفة اقول ايه
يظهر كل الرجال كده بجد انا كرهت كللللللللللللللللللل الرجاللللللللللللللللل خلاص انا كمان اواجه نفس مشكلتك بالضبط و لا ادري ما افعل يار يت حد يساعدنا |
بصراحة،
ردودكم أثلجت صدري وريحت بالي. وأحب أقولكم إني تصالحت معاه الحمدلله. أمس رجعت من الدوام لقيته خنت حيلي نايم مو رايح حتى دوامه وحسيت انه تعبان نفسيا وجسديا، ما رضى يتغدى بس قاعد مع ولده ويلعب معاه ويبوس فيه :( قلت له:" يالله تعال تغدى" وخذيته من ايده، اهني اهو حس اني طخيت شوية.. وقعد يحلفلي انه ما يحب غيري بهالدنيا وانه انا الوحيدة بحياته وعمره ما فكر يخوني والمسج هذا ما يدري عنه وقالي نفس الكلام اللي قلتولي اياه، انه لو بيخوني بالتلفون وعنده خرابيط ما يخلي تلفونه بالصالة وينام بالدار. قلت له:" خلاص، انسى الموضوع... أحبك =* " بس ألف شكر على ردودكم وكلامكم الحلو، والله يعطيكم على قد نياتكم ويجزاكم خير يا رب. |
الحمد لله ان الامور بينك وبينه رجعت زي ما كانت
بس ارجوك ان تبعدي ماضي زوجك قبل الزواج عنك وعن حياتك انت وزوجك لان الماضي وتذكرك له هو سبب المشاكل وشكك في زوجك |
اختي لا تخلي الشيطان يخرب عليكم
الكثير من النساء يلاقين اكثر منك مع ازواجهم ، ولكنهم عندهم اصرار ان ازواجهم حقهم ولا يمكن يتركوهم لوحدة ثانية ، عالجي الامور بحكمة وتروي ، واعملي كل ماهو جديد لجذب قلب زوجك وتعلقه بك ، اعطيه الحب والحنان حتى يتعلق بك مثل ولدك ربنا يسعدكم |
تسلمون، ومشكورين على النصائح بحاول اطبقها.
ألف شكر. |
اختي الكريمة لا تجعلي نار الغيرة تحرق بيتك
مثل ماذكر الاخوة عدم احتياطات زوجك تؤكد بشكل كبير سلامة موقفه لا تزعجي زوجك فيكرهك وقد يقوده هذا الى الانحراف مستقبلا اتمنى لك السعادة ولجميع اخواني واخواتي والسلام عليكم |
لاحول ولا قوة الا بالله ..
والله عورني قلبي .. أختي اول شي فيه شغله لازم تعلمين فيها ريلج لان فيه كثيير من الناس يتهاونون بمسألة الحلف الكاذب وخصوصا لما يكون الحلف على المصحف وعلى كلام الله أختي الكريمة من باب التبليغ فقط وليس التشكيك .. يجب عليك اخبار زوجك بان الشخص الذي يحلف على كلام الله وعلى المصحف فانه يحاط بعمره لو كان كاذبا أن الله يقتص من عمره ان كان يحلف على كتاب الله كذبا .. فإياه اياه من التهاون بهذه المسألة .. عموما بالنسبة لمشكلتك .. حاولي السيطرة على أعصابك والتأثير على زوجك واجتذابه اليك وابعاده عن اي طريق يمكن للشيطان ان يزينه له وحاولي ان تظلي متيقظة للأماكن التي يخرج اليها وتابعيه باتصالاتك واستفقادك له حتى لا يجد منفذا للوصول الى ما يريد .. عسى الله ان يهديه لك ويوفقكم الى ما يحبه ويرضاه تحياتي |
حاولى تزيدى ثقتك فى زوجك ومثل ما قال الاخوة انسى ماضيه والله يسعدكم دايما ويبعد عنكم شياطين الانس والجن
|
الحمدلله على كل حال....
اختي الحبيبه ردك الاخير ريح بالي..... الله يخلي لك زوجك ويخليك له.....ويرزقكم بالذرية الصالحه دوووووت |
| الساعة الآن 03:13 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©