|
مشكله كادت ان تنهي خطبتي !
السلام عليكم ..
ابقول لكم حادثه حصلت لي او مشكله وياليت اقراء تعليقاتكم .. انا خاطب بنت خالي من فتره .. وقبل كم من سبوع جالسه تتكلم خطيبتي مع اختي ومع بنات خوالي وخالاتي كانوا يتكلمون عن المهور :25: .. المهم ان خطيبتي قامت تتكلم بكلام حسب ماوصلني جارح وتقول ان البنت مفروض يعطونها 100 الف مهر ياله تكفي مصاريف .. و.......................... الخ ! اختي ماقدرت ترد عليها .. وزعلت وقامت .. وماجلست معهم ... بعد ايام لاحظت اختي ضايقه وزعلانه ... جلست معها الى ان قالت لي ايش الي صار ! انا صراحه صعقت من كلام خطيبتي الي كنت متوقعها عكس كذا ! وانها ماتهمتم بلفلوس وان حبنا اهم شيء ! عموما اختي - الله يهديها وصلت الكلام لامي ! او حسب كلام اختي .. امي ضغطت عليها الى ان تكلمت اختي لها امي مااستحملت كلامها وكلمت خطيبتي .. وقالت لها ايش الكلام الي قلتيه ..... الخ خطيبتي نفت بشكل كامل وقالت انها ماكانت تقصدني انا وان الموضوع البنات هم الي فتحوه ويتكلمون فيه عن المهور بشكل عام وان الكلام الي انقال لها مهوب صح .. انا فكرت فعليا بفسخ الخطوبه وخاصه ان الموضوع مابعد انتشر .. وانتظر بس رد خالي .. وامي كانت متضايقه مررررررررررره الاول بسبب خطيبتي وكلامها والثاني بسبب كلامها مع خطيبتي .. وخاصه ان امي كانت محبوبه من جميع البنات .. من بكره امي دقت على خطيبتي تقول لها اعذرينا اذا كنا ظلمناك وانتي في مثابة بنتي .... الخ واتضح ان خطيبتي ماعلمت اهلها سواء امها او ابوها .. وكتمت على الموضوع من باب عدم تكبير المشكله الان الموضوع تقريبا انتهى لكن : انا لازلت مصدوم بكلامها .. فهل معي حق |
اولا مبروووووك والله يتمم عليك
ثانيا يمكن كان قصدها أن كل شي في هذا الزمن غالي حتى 100 ألف ماتكفي حق عروس كمهر وإذا تبغى الصراحه والله أن خطيبتك صادقه لأن في هذا الزمن كل شي غالي بس بصراحه هذا الشي ما يزعل ولكن مو معناه أن هي تبغى مهر 100 ألف وبعدين لا تدقر في كل شي في حياتك الزوجية لازم تفوت شوي و بعض البنات من طبعهم إذا جلسوا يسولفون يخوضون في كل شي أخوك عاشق الحور |
الحقيقه اخي انت كبرت الموضوع
اولا من اللي مايحب الفلوس ويفكر فيها ؟؟؟؟ خصوصا اذا صارت بنت ودخلت السوق وتبي تجهز بعد ميه بالميه هي قصدها انه كل شي غالي في الوقت هذا وهي عروس وتبغى تجهز كل شييييييييييي بمعنىالكلمه فستان الزواج لحاله راح يكلف ثلاث الاف على الأقل وتجهيز الحفل والملابس والمكياج ووووووو سالفه ماتنتهي انت لو تحسبها تلقاها تتعدى الميه الف ... ولو تعطيها ميتين الف عسى تكفي .... الله يعينك ويعينها اذا من اولها زعلت على مجرد كلمه .... |
انس الموضوع
و اكيد خطيبتك متحسفة و هذا يكفي و خطيبتك ما شاء الله ما علمت احد و هذه صفة زينة |
انا احس انها ماكانت تقصد بدليل انها ماوصلت الكلام اللي جاها من امك لاهلها وانه كان مجرد سوالف وانت لا زم تتعلم كيف تواجه مثل هذي الامور لانها تافه بس الحريم دايم يكبرونها وهي صغيرة حتى لو تقصد كلمة جدا عاديه كل الحريم يقولونها تفسخ الخطوبة وتصير تفرقة ومشاكل بين العائلة علشان كلمة؟؟؟؟
|
عاشق الحور.. الله لايحرمك شوفة الحور والله يجزاك الفردوس على هالرد احسك فهمت الموضوع اكثر من poiuyt
اخوي poiuyt اول شي مبرووك و الله يتمم عليك ويوفقك وييسرلك امورك.. ثاني شي الكلام اللي قاله عاشق الحور صح 100% اختك كبرت السالفه شكلها حساسه بزود والكلام اللي قالتة خطيبتك عادي والله وهذاني حلفت! اني سامعته من اغلب البنات اللي اعرفهم وخصوصاً اختي وزوجة اخوي.. ويوم قالت زوجة اخوي هالكلام انا مازعلت منها ولا شلت بخاطري لاني مجربه يوم جهزنا اختي كل شي غاااااالي.. زبدة الموضوع خطيبتك ماتقصد اللي ابالك وانت بلسانك قلت انها قالت ((ياله تكفي مصاريف)) كل البنات يقولون هالجمله وأولهم أنا بس مو معناته اننا نبغى مهر 100 الف! الله يسعدكم ان شاءالله ولا (((تدقق على كل كلمه))) و اذا تزوجتو ان شاءالله هي بتقولك نفس كلامي وقل اختي شهد ماقالت :) موفق ان شاءالله.. |
سبحان الله اخوي انت من جدك ... كنت ناوي تفسخ الخطبة عشان موضوع كذا ... انا ما اعرف وين وصل عقول الرجال في زماننا هذا ... بجد قهرتنى يوم تقول انه نويت تفصل الخطبه ... انت الظاهر بتنقلب حياتك فوق تحت اذا بتاخذ بكل صغيره وكبيره شوف نصيحه منى لك ... نصيحه من اخ يتمنى لك حياة سعيدة . اذا اتزوجت بكرة وانا اخوك انصحك لا تاخذ بكلام الحريم نهاااااااائياً لا تصير تسمع لهذي وهذيك ولوووووو كانت امك نصيحه لك ... ترى والله الحريم زي البزارين يزعلون شوي ويضحكون ساعات والبنات هذا طبعهم ما يدخلو بموضوع الا تلاقي كل شي يقولونه ... ومن المواقف المضحكة اللي سمعتها من وحده من قرايبي تقول: مره كنا نتكلم عن صدام ومحاكمته ... وهي قضيه سياسية جلسنا نتكلم عن اللي سواه في العراق .. وفيه وجهات نظر مختلفه ومره نقول امريكا ظالمه ومرره صدام ظالم ... شوي اتفقنا ان امريكا ظالمه وان صدام ضعيف وبيعدموه وحنا نتكلم كانت فيه حرمه كبيره شوي تفاعلة مع الموضوع و قامت تبكي وتقول الله ياخذ امريكا. يعنى تخيل الحرمه هذي تفاعلت مع الموضوع الى درجت البكاء . وبصراحه بنت خالك عاجبتنى صح وهي صادقه المفروض اقل شي مهر البنت 100 الف لكن ما فيه فلوس ... رضينا بالمقسوم هذي وجهة نظرها ... ايش دخل اختك تروح تعترض ... ولوو ان بنت خالك ما تحبك ما كان قبلت فيك من الاول ... من جد انا زعلان منك المفروض تكون صاحي من الاول بعدين شوف تشعب الموضوع ... بنت خالك قالت لاختك وراح الموضوع لامك وووو حبيبي الله يحفظك خلي لك شخصية مستقله ... لا تصير متأرجح مره ورى امك ومره ورى اختك ولو قالت خطيبتك ..والله خطيبي شكله مو عااجبنى انت قول وربي خطيبتى تطير طبنات العقل . هذي عقول البنات ولزم يكون موقف الرجل كذلك لك تحياتى اخيراً انا اعرف انى شديت عليك بالكلام لكن صدقنى هذا كله لمصلحتك ... لا تدخل اهلك بمشاكلك |
أخي نصيحه
سيبك مما يدور في مجالس النساء و لاتعره أهتمام. لو فسخت الخطبه فأنت ظالم للفتاه فهي قالت رأيها و ليس معناه أنها ستطلب الكثير. مثلها مثل الرجل الذي يدافع عن مفهوم التعدد و لكن ليس معناه أنه سيعدد . العمل على العقد , فلو وقتها غالت في المهر فأرفض أما الأن فلا تكن ظالم. |
ليه ما تصارحها بنفسك , خل النساء على جنب , ولا تسمح لهم بالتدخل فيدمروا حياتك ..
افهم من زوجتك ما تقصده , ولا تستعجل الحكم , فتكون ظالم للبنت .. قلها قيمتك عندي مو بالمال .. |
في البدايه اشكر كل الي ردوا علي وتفاعلوا مع مشكلتي ..
بس لاحظو ااني ماذكرت ايش قالت بالضبط .. هي لو انها قالت بس ان 100 الف ياله تكفي عادي جدا ! انا قلت هذي الكلمه وقلت ... الخ يعني اقصد انه كلام كثير عن المهر وعن الفلووووووووووس لكن هي لمحت بشكل عام ( حسب الي جاني ! ) عني انا وان صديقاتها دايم يعايرونها بان مهرها راح يكون قليل ... ومن هذي الامور يعني من جد كلام يقهر ! انا مااقول مالها حق تتكلم زي كذا بلعكس من حقها لكن ليه هي تكلمت بوجود اختي !! اقل شيء تحترم وجودها حتى لو هي تمزح .. مفروض تراعي وجود اختي معها .. وخاصه ان اختي حساسه اختي يوم تكلمني تقول لي يمكن خالي غاصبها وهي ماتبيك ! انا في البدايه صدقت وقلت اذا هي كذا راح افسخ الخطبه وماعندي استعداد اعيش مع وحده مغصوبه علي .. هذا في البدايه مع اني كنت متاكد في السابق من حبها لي ... لكن قلت يمكن هي ماتبيني وعلشان كذا تعمدت تتكلم عند اختي علشان يوصلني الكلام .. لا تلوموني وربي ان معكم حق في كثير من كلمكم .. وانا تاكدت من انها تحبني او على الاقل متمسكه فيني يوم تكتمت على الموضوع ولا نشرته .. تحياتي لكل من رد حتى لو كان قاسي .. |
الله يهديك ياأخي لاتكبر الموضوع مايستاهل هي ممكن نيتها سليمه وماتقصد شي لانها قالت انها بتتكلم بشكل عام وماحطت في بالها انكم بتأخذوا الكلام عليكم وماشاء الله باين عليها عاقله لانها ماقالت لامها وابوها وماحبت تكبر السالفه
|
شوف يا اخي الكريم
الصراحة و الحق كل ينت منا مهما كانت قنوعة تحب انه يكون مهرها كبير عشان تجهز نفسها و تشتري و تتهني لا غير.. بس مش معنى هذا ان كل البنات يشترطوا المهر كشرط اساسي و تكون عندهم عقدة او زعل اذا كان المهر قليل .. و حب الزوج و اهتمامه يغني عن اموال الدنيا .. لا تاخذ الموضوع بحساسية زايدة .. البنت تكلمت بطيب خاطر و مزاح و الدليل وجود اختك .. لانه لو كانت اختك مش موجودة و وصل لك انها قالت هذا الشي بتقول ها ليش قالته قدام البنات اكيد ما كانت تمزح والا ليش قالته من ورانا.. طيب اقولك على شي .. انا مهري 1500 ريال و احيانا كثير نجلس نمزح انا و صديقاتي .. اهلي .. اهله .. و احيانا انا وهو و نقول ان مهري و قيمة الثلاجة اللي في المطبغ سوا عاد الثلاجة اغلى !!!! عادي مافيها شي . . لا تتحسس .. كانت تتكلم بشكل عام .. و عندها حق .. و مثل ما قال لك جمر اياك تبدء تسمع لكلام الحريم و لا ما بتخلص .. خل كل شي بينك و بينها بس ربي يوفقكم و يجمعكم قريب |
اقتباس:
الشكر لله سبحانه ثم لك على هذا الدعاء الذي اسأل الله العظيم أن يستجيبه فما أحلى من الدعاء في ظهر الغيب :d :d :d |
يا اخي خطيبتك عقلها كبير واكتمت الموضوع حفاظا على الزواج ليه انت تكبرته ؟ وحتى اختك وامك الله يهديهم كبروا الموضوع زياده عن الزوم هذي سوالف حريم ولها حق بقول وجهة نظرها مايصير تمنعونها ولا تزعلون منها عشان هذا رايها بالمهور .. ثم هي لم تطلب منك زيادة المهر ولا اي شي هي جالسه مع بنات خالاتها وتسولف مسكينه ماقالت شي
|
اخوي اسمح لي اقولك ان انت واختك كبرتوا الموضوع وخطيبتك قالت رايها واذا انت علشان هالموضوع كنت ناوي تفسخ الخطوبه اقول الله يعينك
اخوي خلك من كلام النسوان ولا تفتح اذونك لهم والله يوفقك |
اخي العزيز ،،، ربنا يوفقك ويوفقها ويكتب الخير لكلاكما
|
اولا خطيبتك عقلها اكبر من عقلك و عقل اختك و كدا عقل امك
اختك لو فيها الخير كانت تكتمت عن الموضوع و ناقشته معها بالاسلوب اقصد مع خطيبتك اختك بهده الطريقه اتفتن بينك وبينها لا تدافع عنها و تقول حساسه زيادة و ما دخل امك كان الارجح ان تكلمها انت و تفهم منها اين شخصيتك المستقله و انظر الى تصرف خطيبتك حيت انها لم تقول لاحد هدا من ناحية وانت على فكرة ما تستاهل بنت خالك هل يعقل ان تخطب بنت الناس و بمجرد الكلام منقول من الاخت الحساسة تهدم كل شى انت شخص لا يمكن الاعتماد عليه و لا احساس بالامان معه |
ياأخي مكبر السالفة وهي صغيرة
وثاني شي صح كلامها ماقالت شي غلط... وطلعت أنها عقلها أكبر منك لدرجة ماخبرت أحد من أهلها... على العموم الله يوفقك أخوي وإذا بتكبر السالفة على بس كلمة انقالت ماراح تعيش بسعادة.. |
هى لم تطلب مهرا تحديدا انما قالت رايها بشكل عام
|
اقتباس:
الكلام الذي قالته خطيبتك كلام عادي ، كل البنات يتكلمن به .. ومن وجهة نظري الشخصية فإني أوافقها عليه ..! والخطأ ليس خطأ خطيبتك بل هو خطأ أختك سامحها الله التي نقلت الكلام إليك ومادرت عظم وجريرة مافعلته ..!!!!! ألم يقل نبينا الكريم صلى الله عليه وسلم ( لايدخل الجنة نمام ) ؟!!! أي وعيد أشد من حرمان الجنة ودخول النار ؟!! أخي الكريم ، ربما بل أعتقد أن دافع أختك لنقل الكلام هو ((غيرتها عليك من خطيبتك )) ..، لاتستغرب هكذا أكثر الأخوات والأمهات في موقفهن من زوجة الولد .. وهذه إشارة تنبيه مبكرة تقول لك ( احذر من سماع الكلام المنقول ولاتسمح به من أي أحد حتى لو جاء من أمك ) ..، فكم هدمت بيوت بسبب نقل الكلام ..وكم تفركشت خطب ..، والغالب أن الدافع الأول من نقل كلام كهذا خاصة في (مجتمع النساء) (((((((((((الغيــــــــــــــــــــــــــــرة))))) ))))))))..!!! فكن رجلا ذا عقل راشد .. وكن ذكيا فطنا وانتبه ! مع أمك وأختك خل أذن طينة وأذن عجينه وأي كلام ينقل لك عن زوجتك أظهر لهم تضايقك من نقل الكلام وإن كان الكلام نفسه ضايقك في نفس الوقت.. ولاتعطيهم علم ، قل لهم ( يصير خير ) ..، وخل كلامهم يدخل من أذن ويطلع من أذن .. فغالبا أخطاء زوجة الولد تضخم من قبل أهل الزوج وتزاد عليها البهارات .. وفي النهاية مأساااة : هدم علاقات وبيوتات ! وأي كلام من زوجتك عن أهلك قل ( هذولي أهلي ولاأسمح لك تتكلمين فيهم ) .. صدقني هنا فقط سترتااااح ! |
اخوي اسمح لي اقولك ان انت واختك كبرتوا الموضوع وخطيبتك قالت رايها واذا انت علشان هالموضوع كنت ناوي تفسخ الخطوبه اقول الله يعينك ........................خطيبتك ماغلطت وانا دايم اقول كذا ....بس هذا مجرد كلام .........الواقع غير ..ولكن نحن نتحدث بسبب ..ان كل شئ غالى الان ......................
|
اول شيء ابي اقول للي غلط علي الله يسامحه !
في البدايه انا تفكيري عن فسخ الخطبه ماكان مني انا ! لا انا لما عرفت عن الكلام الي هي قالته " وللمره المليون اقول مو كل شيء قالته قلته لكم ! " لكن كلام ماينقال " انا توقعت انها هي ماهي راغبه فيني وتبي تفسخ الخطبه .. بلعربي مغصووبه علي ! اختي ماجت تعلمني وهي مبسوطه ! لا بعد مده وبعد ماقعد اسحبها في الكلام هي قالت لي وماقالت لي السالفه كلها السالفه جت من بعييد ! جت من خالتي بعد ان قالت لها بنتها الكلام وهي وصلته لاختها الي هي امي .. ! انا ماكنت افكر لا في فسخ خطوبه وماتقدمت للبنت الا وانا راغبها .. ومازلت على ذالك اما الي يقول كلمها وتفاهم معها فللعلم لايوجد عقد بينا ولايجوز اني اكلمها .. وفي الختام ابشركم المشكله انتهت ... بعد ماتصافت النفوووس ! لكن بجد اشكر بعض الردود والي حاولت تنصحني بكلماتي اخويه .. |
_الله يسعدك أخي الفاضل_ يغلق للإكتفاء بالردود تحياتي حائزة الأمل |
| الساعة الآن 02:41 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©