|
زوجتي وزوجة اخي واختي ..... شيء لايطاق
السلام عليكم ورحمة الله وبركاته
اخواني اخواتي ارجو مساعدتي :15: عن جد تعبت :( ما ادري وش اسميها غيره حسد نحاسه قهر كل وحده تبي تدق خشم الثانيه ( يعني كل وحده بتصير هي الأفضل ) :18: والضحيه مين !! :25: العبد لله اخوكم ( انا واعوذ بالله من كلمت انا ) :11: من وين نبتدي ؟؟ اذا وحده منهم سوت حركه جديده ( الحركات واجد : لبس ، بيت ، اثاث ، سياره ، راحت المشغل ، سافرت ، ووووووو ) حتى اتفه الأشياء :14: هذاك اليوم اللي يصير فيه كذا >>>>>>>>>>>>> قامت القيامه عندي في البيت .. حتى هم نفس الحكايه !!!!! :30: هن يشوفن بعضهن ويتقابلون اكثر شيء في بيت اهلي .>>>> كرهته مايجي من وراه الاالمصايب ... افكر مانروح او نخفف الزيارات او اروح انا لحالي هههههههههههههه تصدقون اذا رحت لحالي انجن اكثر !! لانه لازم اخذ معي عدة التصنت والحفظ واسجل كل مايدور من احداث واخبار الأعدء لأني برجع لسيل كبير من الأسئله :29: الثلاث ازواجهن يبين عليهم علامات التوتر عند اللقاء :28: عارفين نهايتها مقدما :16: الثلاث هذولي من كثر التعب اللي يصيبهم ويصيب ازواجهم بدو يراجعون عيادات نفسيه :20: هههههههههههههههههه والله شر البلية ما يضحك . الحين ومن كثر الحوسه اللي براسي وزحمة الأحداث اللي تصير صرت ما اقدر اركز في اي شيء دايم مشاكل :mad: اختك قرقرقرقرقرقرقرقر واذا خلصت زوجت اخوك قرقرقرقرقر طول اليوم فكرت اقطع العلاقه او اخففها بشكل كبير جدا .. لكن امي ؟؟ وش ذنبها . مسكينه حاسه باللي قاعد يصير ولا قادره تسوي شي .. كل وحده العن من الثانيه . فكرت انقل عملي الي مدينه اخرى ( عن جد ) وش ذنب عيالي يبعدون عن اهلهم ؟؟ حيرااااااااااااااااااااان راسي داااااااااااايخ ارجوكم لاتبخلو علي بالمشوره خاصه الحريم .. لأنكم اكيد فاهمين الوضع اكثر .. شكري لكم ومعذره على عدم التركيز |
:) الله يعينك حاسه باللي تعانيه كوني وحده من الحريم:)
ياخوي لازم اتكون صارم واطنشها وماتسويلها سالفه يوم تتكلم... اما انك تغير السالفه... واذا شفتها مصره عصب واقلب الوجه حبتين وقلها انتي ماعندج شي غير هالموضوع؟؟ بين زعلك خلك موقف... على الاقل يمكن تسكت اشوي..صح هي بتعصب وتقلب الدنيا:) بس اظنها مقلوبه مقلوبه:) الله يعينك على قلة عقولنا:) |
صحيحي كلامها اختي ام فلان .. وبعدين لاتشارك بنقل اي كلمة بيناتهم .. ولاتعطيهم مجال .. والله حتى لو تضطر لتهديد زوجتك باي شي حتى تكف عن ازعاجك بالكلام السخيف .. او حتى تجتمع انت واخوك ويكونون جالسين مع بعض .. وتشوفون اثنينكم منهم حركة او كلام مايعجبكم .. عصبوا عليهم وسكتوهم .. بحيث على الاقل اذا ما وقفوا هالسوالف البايخة .. يوقفوها امامكم على الاقل .. والله يعينك
والله بس بحزمك وصرامتك تقدر توقف هالسوالف صدقني .. والله يوفقكم |
جرب تزعل مثلا ولا تكلمها يوم واحد بس واذا سألت ليش قلها السبب
اتوقع اذا صرت حازم معها راح تتغير وحاول تكلم أختك الله يعنيك اصبر |
وانا مازيد عن كلام اخواتي
الحزم معاها .. وبعدين لازم تجلس معاها وتقول لها تكبر عقلها وقول لزوجتك لا تتكلم وش عندها وماعنده لاتصيبها عين خوفها يعني هههه ترى الحرمه تخاف من العين كثيررر بسسسس عن جد الي ذكرته يحصل ويصير خصوصا اذا هما عايشين ببيت الله يوفقكك يارب بهجه |
شغل طناااااااااااااااش ..
وإذا اضطريت تأدبهن اصرخ في وجوههن مرة واحدة في مكان واحد وبحضورهن جميعا : يالتفاهة عقووووووووولكن ! مالهذا خلقتن ..!! أعدك بعد هذا سيهربن إذا رأين ظلك .. كن قويا حازما أريبا .. وسترى النتيجة ! لكن لاتظلم واحدة على حساب الأخرى ..!! فكلهن مخطئات .. وتذكر : وقتك إن لم تشغله بالطاعة شغلك بالمعصية .. وأيم الله لاتصل أحوال بعض النساء إلى هذه الدرجة إلا لضعف إيمانهن وطول فراغهن .. الفاضي يعمل قاضي على قولة أخواننا المصارية .. أشغلهن بدور القرآن والمحاضرات وسماع الأشرطة المفيدة ..وعسى الله أن يبدل أحوالهن.. وإذا ماانحلت المشاكل ، أنصحك بالابتعاااااااااااد ..حتى لاتنهار حياتك الزوجية .. |
يا اخي هذا حال اكثر النساء ..
ولكن .. ابحث عن حل .. بأن يجعلهم لا يتقابلوا كثيرا ... مثلا اذهب انت وزوجتك و أبنائك لوالدتك في يوم مخالف لهم .. يعني اذا هم يذهبوا لها يوم الأربعاء , انت روح لها يوم الخميس .. |
السكن في بيت مستقل ..و الزيارة من وقت الى وقت :)
|
اعتقد انه احسن طريقه هي
الوعظ مثلا زوجتك ذكرها بان ما تفعله حرام غيبه نميمه و هل يستحق الامر دخولك النار من اجل فلانه او فلان وهكذا مع اختك و زوجه اخيك ذكرهم انت و اخوك و زوج اختك بهذا اعتقد هذا افظل علاج لمثل هذه الحالات |
أخوي.......
الخيل بخيالها والمرة برجالها. |
الصراحة إنت الغلطان.. لمن تجي زوجتك تتكلم عن أختك هي كلمتين ( ما اسمح لك بعد الآن تتكلمي في أهلي ).. إذا جات أختك تتكلم على زوجتك قلها نفس الكلام أما عن زوحة أخوك كمان نفس الكلام.. ترى اللي يدخل بين الحريم يضيييييييييع وما تطلع بشي.. عين زوجتك على طاعة الله وكن صارم وقفهم عند حدهم.. إلا إذا انت كنت مبسوط على كلام الحريم هذا شي ثاني ! المهم أعطيهم نظرة حادة وجادة وانت تقلهم لا أريد أسمع شكوى من أحد يعد اليوم ويسس..
|
السلام عليكم ورحمة الله وبركاته
الأخت الكريمه أم فلان جزاك الله خير لمواساتك ( ونعم الأخت ) الأخوات الكريمات : memoota فدن بهجة الروح زرقة البحر soso y ememememe أم اثير 4 أم جمانه mis hawaii جزاكم الله خير واشكركم جميعا على مروركم ومشاركتكم بطرح الحلول أسأل الله للجميع الصحة والعافية في المال والبدن والأولاد .. عوداً على بدء : للإيضاح : أنا وزوجتي في بيت مستقل . اخوي وزوجته في بيت مستقل . امي واختي في بيت مستقل . للإيضاح : أحب زوجتي وأموت فيها ـ وأرحمها جداً أما سالفة أني أعصب فقد فعلتها :( مراراً بس نفس زوجتي اطول !! وبعدين أنا من الناس اذا زعلت وما تصالحنا لمدة ساعات أبداء آكل نفسي وأصاب بالتوتر الشديد . أما من ناحية أكون ( موقف ) :11: فعزالله سويتها ونجحت إلاشوي هي تعرفني زين إذا وصلت حدي خلاص أقطع هدومي .. بس .. إن كيدهن عظيم / طلعت لي رنه جديده :23: أنت ماتحبني ! وما توقف معي وقت الأزمات ! شفهم مشلخيني تشلخ :16: ولا انت هنا ولاحاس فيني .. أنت أناني !!!! تبي ترتاح وبس !!!! أما وضعي ماتفكر فيه !!!! وللأمانة للأمانة اللي جايب لنا العله والضغط والسكر .. للأسف أخوي مو زوجته ـ الله يهديه ـ داعمها دعم قوي في هذا الإتجاه... وإلى الآن لا أعرف هدفه ـ مسخره ـ طيب وش اسوي له هذا ؟؟ طبعاً بتقولون هذا رجال وبيتفهم ... حاكه . فهمه . تناقش معه .. اشرح له .. اقول : (( ما حزرتوا )) جربت وليتني ما جربت !! قالي : ليش شايفين منا شيء !!!!!!!!!!!!!!!!!!!!!!!!!!!!!!!!!!!!!!!!! صدمني . حاولت .. يارجل ... يارجل !! ما فيه فايده ،، وكأنه هو وزوجته شخص واحد في هذا الموضوع .. يعني هو احيانا يعمل حركات تغيض زوجتي اشد من زوجته .. علشان كذا زوجتي تولع .. وانا قاعد اشوف اللي يصير !! ولذلك هي دايم تقولي شوف اخوك قاعد يدعم زوجته بكل شيء وانت ولا انت هنا . حيران !! :rolleyes: وخجلان :o ادخل نفسي في هالمواضيع ووالله اني امقتها . ولكن صغر عقل اخوي جعلني ارحم زوجتي اللي مر عليها أيام بغت تنهبل منهم ماتنام !! تفكر بالليل وتخطط :eek: ( للمعركه طبعاً ) ما اطول عليكم .... في النهايه : 1- اذا ماساعدتها قالت انت ما تحس فيني .. وتجلس تبكي ونفسيتها تتعب ،، وخاصة وانا شايف دعم اخوي لزوجته ، بل أحياناً هو المحرك لها ( سبحان الله ) !! 2- اذا ساعدتها في هذا سأترحم على نفسي وسأبداء بأفعال ليست من عاداتي ولا اخلاقي .. وجربت في بعض الأمور الخفيفه اللي احس انهم ظلموها فيها مرره وفي النهايه قالت : ( قطعت نفسك ) ؟؟ 3ـ التطنيش العام للجميع >>>>>>>>> وفيه جور على زوجتي !! ما أقدر !! بكل أمانه احس انها بين ذيابه ولو اصد عنها قطعوها . طيب وش اسوي ؟؟؟ ارجوكم لاتبخلو علي بحلولكم . |
أخي الكريم " هجير الليل " أهلا وسهلا بعضويتك يا أخي الفاضل معنا .. ونسأل الله أن تجد لدينا النفع الفائدة .... ولا تبخل علينا بخبراتك أخي الكريم ... لست أعلم ، المشكلة معقدة قليلاً ... سوف أطرح عليك ماكنت فاعلاً لو كنت مكانك ... إن استطعت ترك المدينة ونقل العمل إلى مدينة أخرى فعلت ، وإلا فإنني غيرت سكني إلى الجهة الأخرى من المدينة ، وزيارتي لوالدتي يكون في أيام تخالف زيارة البقية ... قد يرى البعض أن ذلك هرب من الواقع .... شخصياً لكي أسلم وتسلم عائلتي برمتها ... أفضل الهروب من الواقع وإنني لنعم الرجل إن شاء الله ، ولن أعتبر نفسي منهزماً ... أخي .. أود أن ألفت نظرك إلى نقطة هامة أطرحها باستفسار وتساؤل بسيط ... هل تسمح لنا أن تذكر هل لكل هذه الأحداث تأثير على أبنائك .. أيّاً كان نوع التأثير ؟؟؟؟ أتمنى أن تتفعهم وجهة نظري ... ولي عودة إن شاء الله تقبل تحياتي وعاطر امتناني ؛؛؛ |
للاسف هذه اطباع اغلب الحريم ومن ا لصعب تقدر تبدله دائما تقارن بينها وبين الغير
حتى ان لم تجاريها فى هذا ولم تصنع ما يصنعون فسافرت وحده وانت مثلا لم تلبى رغبتها هى للسفر لمجرد المباهاة فهى بالتالى بينها وبين نفسها بتفكر انك ظالم ومقصر بحقها صحيح انها غلطانه لكنها ما تفكر بهالطريقه لانه تفكيرها قاصر ومحدود ولا يوجد بيدك الا انك تاخذها على قد عقلها عشان تمشى الحياة فاذا ارادت السفر زى غيرها اقنعها بشغله ثانيه تناسبك بالشاليه مثلا قول لها وجدنا فرصه لحجز شاليه محد محصلها غيرنا |
لا حول ولاقوه الا بالله
ما ذا حل بنا و حل بامه حبيبنا و نحن على اعتاب رمضان عالمنا الاسلامي يئن مما فيه ما ذا حل بالاخوه و الارحام و الاقارب دسائس و موامرات صحيح لايغير الله ما بقوم حتى يغيرو ما بانفسهم حسبنا الله و نعم، الوكيل |
الاخ/الاخت نور وحنان كفى ووفى واتوقع هذا الحل الوحيد لمشكلتك
|
بصراحة الله يعينك .. انا من كلامك دخت عاد وين لما اشوف الواقع .. صحيح انا وحدة من الحريم .. لكن والله اكره سوالفهم موت .. دائما اجلس مع البنات واترك مجالس الحريم السخيفة ..
الله يعطي نسوانكم العقل بس يارب .. والله بس اقولك ابتعد مثل ماقالت اختي .. او قال اخوي النور والحنان .. واترك الموضوع مالك غير حل .. وطنش شو تسوي المشكلة شوية معقدة نوعا ما الله يكون بعونك.. تحياتي للحميع اختكم م |
الله يساعدك ....
لماذا لا تكون حازم مع زوجتك؟؟؟؟؟؟؟عصب وازعل وبين لها إن اللي يصير مو عاجبك وغير أوقات الزيارة... والأخوة كفوا ووفوا باللي قالوه |
فعلا إذا كان أخوك هو راس الحربة ، فهذه مشكلة عظيمة ..
وكونه يدافع عن زوجته ويغيظ زوجتك ، فبصراحة زوجتك تنرحم وصعبة توقف ضدها قدامهم.. أحسن حل صدقني في هذه الحالة واسأل مجرب : الهرررررررررررررررررررررب بعيدا .. وبعدين عندي ملاحظة من خلال كلامك : اتضح لي أنكم تجلسون مع بعض حريم ورجال !! حتى لو كانوا الحريمين متحشمات ، فهذه والله شرارة عظيمة ..وتأكد أن هذا الاختلاط هو أحد الأسباب الخفية لمايحدث لك ولزوجتك.. فعلا لقد عم الاختلاط بيوت كثير من الناس بل حتى أهل الدين لم يسلموا من شره ، وبحجة احنا أهل وهذا أخو زوجي ..وش فيك أنتِ والله كأنه أخوي ..وأعز من أخوي ! وهذي مرت أخوي ، والله كأنها أختي وأعز من أختي !! مأسااااااااااااااااااااااااااااااااااااااااااااااا اااااااااااااااااااااااااااااااااااااااااااااااااة .. ومابدأت المصائب إلا من هنا .. ومن هذه النقطة بالذات ! |
الأخ الكريم / النور والحنان
اشكرك جدا على الترحيب اعجبني جدا هذا المنتدى .. ولن ابخل بما ارى ان فيه منفعه باذن الله لقد وصلت الي الحل الذي في نفسي وهو الابتعاد ولكن ذلك سيؤثر على ابنائي وهذه مشكه اخرى ضمن بعض معوقات الانتقال . استفسارك اخي الكريم عن تاثير المشكله على ابنائي فهو تأثير غير مباشر وان كان في بعض الأحيان يدخل في صميم التربيه . اخي الكريم تقبل مني فائق الأحترام .. والشكر على تفاعلك اعجبني طرحك الواقعي وحكمتك . بارك الله فيك ولك . في انتظارك |
الأخت mona777
اشكر مرورك وتفهمك ولكن للموضوع اجزاء كثيره . الأخت أم اثير4 اشكر مرورك .. بس .. لاتكبري الموضوع ، هو إلى حد كبير ( غيرة النساء ) وإن زادت عن حدها !! الأخ/الأخت الفلوجه اشكرك على المرور .. بارك الله فيك memoota اشكر مرورك وطرحك وتفهمك .. بارك الله فيك . J-N اشكر مرورك اخي الكريم اذا كانت زوجتي مظلومه في هذه المسأله الي حد كبير ، هل أكون زيادة ثقل عليها ؟؟ ما هكذا تورد الإبل . الأخت الكريمه زرقة البحر اشكر مرورك وتفهمك .... وفي كلامك عقلانيه .... للإيضاح : لايوجد اختلاط . |
أخي الحبيب الفاضل " هجير الليل " يا من أحببته في الله أنتَ من نحن في خدمته كما البقية .. وكلنا إخوة .. ونحن على ثقة إن شاء الله بأنك لن تبخل علينا بشيء كان تركيزي على الأبناء لأنه وبكل صراحة وواقعية ودون زعل أو تهرب .. أصبح كثير من الأمهات والآباء هداهم الله لا يولون الأبناء أهمية ، ويقحمونهم في المشاكل ... ينقسمون إلى أناس يعلمون خطر ذلك ، ولكن النفس تتقدم ثم أناس آخرون يجهلون خطر ذلك على الأبناء .. وقد يكون هناك قسم ثالث ورابع وعاشر .... الزبدة في النهاية أن الأبناء متضررين جدا ، ولذلك دوماً نشتكي ونقول أن الجيل ليس على قدر المسؤولية .... نعيب الأبناء والله ثم والله ما عليب إلا فينا ... أخي المعذرة من شخصكم الكريم فأنا لا أقصدكم ولكن استطرت ليكون كلامي عاماً واستشهدت بقصتكم عزيزي وصديقي الغالي " هجير الليل " الأمر إليك في النهاية ، والقرار قرارك ، إن استطعت أن تذكر زوجتك بالله عز وجل وتخرجها من جحيم ماهي فيه فهذا خير ولتراوحوا أمكنتكم .. وإلا فصدقني البعد هو الخير إن شاء الله .... وإن كنت أقول لك لا تتعجل الأمور ... ولكن القرار قرارك فأنت في وسط المعمعة كما يقولون .. وأنت الأدرى بما ينفع ومالا ينفع ... وفقك الله وكلنا معك ؛؛؛ |
الأخ الكريم (( النور واحنان ))
الحمد لله اولاً وأخيراً على نعمه التي لاتعد ولاتحصى احبك الله الذي احببتني فيه ،، وجزاك الله خير الجزاء اشكر لك اهتمامك ،، واثني على رجاحة عقلك ،، سدد الله خطاك ووفقك لكل خير . اخي الكريم : اصبت كثير من الهدف ،، اما الأولاد فلله الحمد والمنه فهم بخير ، ولن اسمح بإذن الله بجرهم إلى المعمعه . اخيراً تقبل مني فائق الموده والإحترام . أخوك هجير الليل |
| الساعة الآن 11:28 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©