|
محتاجة مشورتكم
السلام عليكم :)
أخواني مدري شلون أبدأ..فاعذروني إذا كان كلامي ملخبط أو غير مفهوم بس أنا ودي أوضح لكم الصورة أنا إن شاء الله عما قريب راح أسافر مع أهلي و أبوي هو اللي دافع لي مصاريف سفري (التذاكر و السكن) بدون تفكير (يعني عادي حالي حال أخواني و خواتي الباقين)...أبوي مو من النوع اللي يدقق في هالسوالف بس أنا حز في نفسي شوي إن زوجي (خطيبي، مليكي..المهم) تعامل مع هذا الشي كأنه شي عادي يعني ما علق ولا سأل...يعني أنا متأكده مليون في المئه إن أبوي ما كان بيطلب منه فلوس و لو ان هو عرض فأبوي ما بياخذ منه..بس اللي حز في نفسي انه ما سأل ولا حتى عرض...بس بعدين فكرت يمكن هو كان مثلا ناوي يعطيني مصروف للرحلة (بالذات ان عندي عرس صديقتي بعد عودتنا من السفر مباشرة و أنا قلت له اني ناويه أجهز في السفر و كمان كنت ناوية أجهز للجامعه) المهم أمس كنت أتكلم مع خطيبي في السيارة و من خلال الكلام اكتشفت انه ما كان ناوي يعطيني شي (أو حسب تعبيره ما جاء في باله انه المفروض يعطيني) المهم أنا سألته يعني انت ما كنت ناوي تعطيني فلوس؟ قال لي محتاجه فلوس؟ قلت له موب مسألة حاجة بس أنا كنت متوقعه انك بتعرض علي قال لي كم تبين؟..عاد أنا في هاللحظه كنت خلاص تضايقت و حسيت بخيبه أمل فما رديت عليه و ظليت ساكته فترة طويله...بالأخير هو قال لي أيش الحين؟؟ قلت له وش تقصد؟ قال لي سألتك كم تبين و ما رديتي علي..سكتت شوي بعدين قلت له مو مسألة المبلغ مسألة انك ما كنت حاط هالشي في بالك هو ما رد علي بس يوم وصلنا البيت و جلسنا شوي قال لي مو ناوية تتكلمين؟ قلت له وش تبيني أقول..قال أي شي بس مو معقولة تعاقبيني لأني ما قرأت أفكارك..و انتي ما قلتيلي انك محتاجة فلوس و أنا عارف ان انتي عندك فلوس في حسابك..الخ......أنا كلامه هذا نرفزني أكثر يعني هو ما كان راضي يفهم إن أنا مو قصدي اني أبي فلوس من عنده اللي كنت أبيه اني أحس ان هو متحمل مسؤليتي (يعني تحصل أحيانا مواقف اني أروح معاه السوق و أنا اللي أدفع أشيائي يعني هو ما يعرض يدفع بس أنا ما كان يضايقني هالشي لأن هو كل شهر يعطيني مصروف و فكرت ان هو يمكن يعتبر ان هالأشياء المفروض يشملها المصروف فتعلمت ما اتضايق من هالشي..بس الكل يدري ان السفر غير يعني يحتاج مصاريف ثانيه) المهم بعد كل هذا أنا ظليت زعلانه فهو قال لي قومي سوي لي طريق أنا بأمشي و بأحول لك فلوس في حسابك..ما رديت عليه فقال لي مادام انتي مو ناويه تتكلمين خلاص أنا بأروح و إذا حبيتي نتكلم رقمي عندك قومي سوي لي طريق..عاد أنا هالكلام خلاني أبكي...هو يوم شاف كذا جلس و أخذني في حظنه و لما خلصت قال لي ليش بكيتي تعرفين اني ما أستحمل دموعك..بعدها قال لي قومي اغسلي وجهك و لما رجعت أعطاني كاس العصير و اخذ هو كاس و جلسنا نشرب بعد ما خلصنا قال لي أنا ماشي قلت له ليش؟ قال لي مو عارف كيف أنهي اليوم..أبوسك، أتصرف كأن شي ما صار، أكمل كلام في الموضوع...أنا قاطعته و بسته و بعد كذا صرنا كأن ما صار شي..و انتهت الليله على خير يمكن تتسائلون أنا وش اللي أبيه الحين ما دام كل شي مر على خير بس أنا أبي أستفيد من تعليقاتكم على الموضوع يعني أيش رايكم في تصرفي..إذا سويت شي غلط أيش هو الشي الصح اللي ممكن أسويه أيش رايكم في تصرف زوجي..إذا كان في تصرفه غلط كيف ممكن اني أصلحه أيش رايكم..أقفل على الموضوع ولا أفتحه مره ثانية؟؟ على فكرة بس علشان تعرفون أنا زوجي مقتدر و أنا عارفة انه يقدر يصرف علي..و في نفس الوقت أبوي ما يقصر يعني يعاملني مثل أول (عادي هو يدفع فاتورة تلفوني و يعطيني مصروف كل شهر بس هو يقول لي هذه اذا ما تحتاجينها لا تصرفين منها جمعيها علشان تساعدك في تجهيز زواجك)..و أنا عارفه ان زوجي موب ملزم يصرف علي بس أنا اللي مو عاجبني احساسي انه مو متحمل مسؤليتي و أنا أخاف ان بعد الزواج يصير نفس الشي يعطيني مبلغ كل شهر و أنا أتصرف...إذا رحت السوق أنا أدفع..فاتورة جوالي أنا أدفعها...الخ أنا ودي أستفيد من هالتجربة فلا تبخلوا علي بنصايحكم و ملاحظاتكم آسفة إذا طولت عليكم أو دوختكم و شكر مقدم |
اختي الكريمة ، جيد انكِ اوصلتي له الرسالة ، لا تفتحي الموضوع الا اذا فتحه هو او اذا تكرر موقف مشابه ، لا ارى انكِ ارتكبتِ اي خطأ ، من المفروض ان الزوج هو الذي ينفق على زوجته حتى لو عندها مال خاص ، والمرأة تحب ان يعطيها زوجها بدون ان تطلب فذلك تعتبره انه يحرص على الاهتمام بها وباحتياجاتها ، لكن بعض الرجال كما قال خطيبك لا يستطيعون قراءة الافكار ، فاعتادي على توجيه الطلب منه مباشرة خصوصا إن وجدتِ انه لم يستفد من ملاحظاتك التي حصلت في الموقف الاخير.
|
اختي لا انتي ولا هو غلطانين ولكن من رأيي ان تقولي له انا مازعلت علشان بدي فلوس ولكن عشان اي بنت تحب تحس ان حبيبها هو اللي بيصرف عليها تحس انه رجلها فهميه وجهه نظرك وبعدين لا تفتحي الموضوع ثانيه وشوفي كيف سيتصرف والله يوفقك ولاتنسي تدعيلي بتفريج كربتي
|
أنا أيضا من رأيي ماتفتحي معاه الموضوع مرة تانية بس نصيحة لاتعوديه إنك إنتي اللي تدفعي ، مثلا خليه هو اللي يدفع دائما وبين فترة وفتره جيبيله هدية قيمة تردين فيها جزء من اللي يصرفه عليكي والمقصود من هالطريقة
1- يتعود هو عالصرف 2- يحس إنه ملزم فيكي وأن هو رجلك 3- يكون متاكد إنك مو بخيلة ولاطمعانة فيه لما تجيبيله هدايا قيمة مع تحيـــــــــــــ سيدرا ـــــــــــــــــــــــــات |
اقتباس:
:22: |
اقتباس:
|
اقتباس:
أنا بعد فكرت نفس الشي أهم شي انه وصلته الرساله لأن أنا عارفه ان تصرفه هذا مو ناتج عن بخل بس ناتج عن غفلة يعني هو يفكر ان هو يعطيني كل شهر و عندي مكافأة الجامعة و أبوي يعطيني و مصاريفي الرئسية (فاتورتي و كذا) مدفوعة..فهو يفكر اني ما أحتاج و أنا عارفه ان هالشي بحسن نية بس أنا كنت أبي ألفت نظره لهالشي و ان شاء الله أكون نجحت |
اقتباس:
أنا فعلا قلت له هالشي و ما رجعنا فتحنا الموضوع سوى انه قال بمزح عاد خلاص اذا هالمرة بكيتي ترا بتركك و بمشي ما بتمشي علي دموعك..قلت له متأكد؟؟ :25: ...قال لي لا :d أختي الله يوفقك و يفرج كربتك و ييسر لك اللي فيه الخير مشكورة على اهتمامك |
اقتباس:
أنا مو معودته ان أنا اللي أدفع يعني إذا رحنا مطعم ولا شي دائما هو اللي يدفع إلا إذا كنت أنا اللي عازمته..و أحيان كثير نطلع على أساس اني عازمته و هو يدفع و اذا قلت له مو المفروض أنا عازمتك؟ يقول لي ما فرقت المرة الجاية و دائما إذا اشترينا شي هو يدفع بس أنا ألاحظ إنه بعض الأحيان إذا كان الشي خاص لي (لبس أو شنطة أو جزمه) هو ما يتقدم إنه يدفع..و صراحة أنا أستحي أطلب منه و أقول له انت ادفع..لأن مثل ما قلت هو يعطيني مصروف و أنا ما أقصر يعني بين وقت و ثاني آخذ له هدايا تتراوح بين قيمة و بسيطة..يعني ممكن عطر..مسباح..نظارة شمسية ماركة..قلم ماركة...أو من الناحية الثانية لعبة بلايستيشن..نوع شكولاته هو يحبه...أشياء زي كذا....و هو بالعاده نفس الشي بشكل دائم يجيب لي هدايا بسيطه (ورد، شكولاته، فأرة كمبيوتر يوم اختربت الفأرة اللي عندي..أشياء زي كذا) و الهدايا الثمينه يخليها للمناسبات (يوم مر 6 أشهر على ملكتنا..بمناسبة نجاحي..ذكرى ميلادي (ذكرى مو عيد :25: ما سوينا احتفال بس جاب لي هدية و عزمني على العشا)) المهم أنا أكون كذابة إذا قلت ان قاصر علي شي...أنا كل اللي أبيه اني أحس انه متحمل مسؤليتي أو على الأقل يحس اني مسؤليته..فأنا كنت أبي ألفت نظره لهالشي...بالذات ان هو دايم يقول لي أنا أول مره أخطب..ما عمري صار لي خطيبه من قبل يعني مو دايما أعرف أيش هو التصرف الصحيح...و أنا مو كامل بس اعرفي ان مهما صار أنا ما يوم راح أتعمد أسوي شي يأذيك...الخ أنا عارفه ان ما فيه انسان كامل و كلنا فينا عيوب و أنا أحبه و واثقه من حبه لي علشان كذا ودي اننا نكمل بعض..يعني أنا فيني بعض الصفات اللي مو حلوه و هو دائما يشجعني اني أتخلى عنها...أنا ودي أسوي نفس الشي له..ودي أنبهه للأشياء اللي هو يغفل عنها و أشجعه على صفاته الحلوه و أساعده انه يتخلص من الصفات اللي موب حلوه...تظنون ممكن ولا مجرد أحلام بنات وردية؟؟؟ ادعوا لي الله يوفقني |
أخواني admini و فاقدة الأمل شكرا على المرور
|
السلام عليكم ورحمة الله
المراة اذا لم تكن فى بيت الزوج ولم يدخل عليها فهى مسؤولة من ابيها مسؤولية كاملة وبعد الزواج تنتقل المسؤوليه كاملة الى زوجها فهمت من الكلام انك لم تتزوجى بعد وان كان ذلك صحيحا فانت المخطئه |
السلام عليكم ورحمة الله وبركاته
ما فهمته أنكما مخطوبان .. تم عقد القران ولكن لم يتم الزواج .. وحسب العادة فالخطيب لا يتكفل بمصاريف خطيبته ما دامت في بيت أبيها .. ولكنه يتكفل بها بالكامل عندما تصبح زوجته وفي بيته ( بعد ليلة الدخلة ) ..وإن كان عليه أن يتفقدها ببعض الهدايا في المناسبات المختلفة .. العيدين أو مناسبة خاصة مثلا .. لذلك فإني أرى أن " زعلك " منه غير مبرر .. ونصيحتي أن لا تبدآ حياتكما بهذه الحساسية .. فالحياة أمامكما طويلة .. مع تمنياتي الطيبة يوسيبوس |
اقتباس:
أخي أنا عارفة بهالشي..أدري إن شرعاً هو موب ملزم انه يصرف علي..و حتى ذكرت هالشي في نهاية المشاركة الأصلية أنا ما أطالبه انه يتحمل مسؤليتي بالكامل..أنا كل اللي أبيه اني أحس انه يعتبرني مسؤليته...يعني مثل ما قلت أبوي مو مقصر معاي ولا يبخل علي بشي..يعني الحمد لله رب العالمين أنا مو ناقصني شي..بس يعني تمنيت لو ان زوجي ولو بس سألني..مجرد السؤال كان بيحسسني انه متحمل فيني (يمكن ما بتفهمني كونك رجال..أتوقع الأخوات بيفهمون هالنقطة أكثر)..يعني صدقني البنت مهما أعطاها أبوها..عطية زوجها يكون لها مكانة خاصة في نفسها تصدقني لو قلت لك انه لو سألني كان ممكن أقول له اني ما أحتاج..لأن هذه هي الحقيقه (أو أقول له مثل ما أقول لأبوي إذا سألني ان كنت محتاجة فلوس أقول انت كريم و أنا أستاهل و تعرفني ما أقدر أردك في شي :d ) يعني سؤال ولو مجاملة ما يضر بس مثل ما قال هو ما جاء في باله هالشي و مع احترامي أخوي أنا ما أعتبر نفسي غلطانة ولا أعتبره هو غلطان (مع اني في البداية فكرت كذا بس أشوه الله هداني و فكرت بعقلانية "شوي" :) ) بس على العموم أنا مبسوطة من هالموقف علشان كذا ودي أستفيد منه قد ما أقدر..يعني من ناحية هو التفت نظره لهالشي و أنا تعلمت إن إذا كان في بالي شي أقوله لأن حسب تعبيره "هو ما يعرف يقرأ أفكار"..فأحسن طريق هو المصارحة...يعني من جد أنا مبسوطة إني تجرأت و سألته من البداية..يعني صحيح اختلفنا شوي و زعلنا شوي بس هذه أشياء طبيعيه تحصل في أحسن العائلات..أهم شي الواحد أيش يستفيد من التجربة اللي حصلت له |
انا مع الاخوان جدا غريب انك زعلتي لانه ماعرض عليك مصروف للسفر وغريب جا انه يعطيكي مصروف شهري وانتي ببيت ابوك انا عمري بحياتي ما سمعت عن وحده متملكه وزوجها يعطيها مصروف شهري ويدفع لها اغراضها يعني عادة اذا طلعت معاه مطعم طبعا هو يدفع واشياء زي كذا بس توصل انك تروحين السوق وتشترين اغراض وتتوقعين انه هو يدفع لك هذا غريب انتي مازلتي تحت مسؤولية والدك واللي عليه انه يدلعك ويجيب لك هدايا ويعزمك على مطاعم وكثر الف خيره لكن يصرف عليك؟ يشتري لك اغراضك ويعطيك مصروف شهري؟ وانتي ببيت ابوك؟ اسمحيلي اقولك انه اغرب شي سمعته الا لو كان لكم عادات وتقاليد مختلفة مادري
وما توصل عاد انه يعيطك مصروف للسفر وانتي مسافرة مع ابوك يعني لو عرض عليك مصروف ياختي بصراحه انا اشوفها اهانه لابوك يعني انتي رايحه مع ابوك ويقولك تبغين فلوس يعني وش قصده ابوك ما يقدر على مصاريفك؟ والله العظيم وبدون مبالغه لو خطيبي اللي انا متملكه عليه عرض علي مصروف شهري او مصروف سفر وانا ببيت ابوي لازعل منه واعتبرها اهانه لابوي.. اوكي يعطيني هدايا ويعزمني على مطاعم ويشتري لي اغراض وكل شي بس يصرف علي لا انا مازلت عند ابوي وبكرا اذا تزوجته يصرف علي هذا اولا اما ثانيا ياعزيزتي العادة بين الزوجين انهم يتفقون ببداية الزواج اقصد لمن تنتقل للعيش معاه انه يعطيها مصروف شهري وتتكفل هي بمصاريفها او انه ما يعطيها مبلغ شهري ويصير يدفع لها اذا راح معها السوق او يعطيها قدر اللي تحتاجه لو بتروح مكان او محل لكن يعني صعبه انك تبغين يعطيك مصروف شهري وبنفس الوقت انتي منتب مطالبه تدفعين لاغراضك يعني وش فايدة المصروف اجل؟ هو عاطيك اياه عشان تصرفين على نفسك.. هذا رأيي والله اعلم |
أخواني يوسيبوس و البحلة بالنفس
حسستوني إني وحده مدري شلون داخلة على طمع كذا :( و الله ثم و الله إن السالفة مو كذا أنا عارفة إن شرعاً الزوج غير ملزم إنه يصرف على زوجته ما دامه ما دخل عليها بس أنا في المحيط اللي حولي هذا شي عادي و يحصل بالذات إذا كان الزوج موظف و له دخل فما بالكم لو كان طبيب ضروس قد الدنيا؟؟ :26: هذا الشي يحسس الزوجة أو الخطيبه ان زوجها يحبها...أرجوكم لا تهاجموني..أنا عارفة إن الحب ما يمثل بالفلوس بس أنا أوضح لكم كيف الوضع في محيطنا...يعني مثل ما الرجال يشتري لزوجته شبكة بعشرات الآلاف و يشتري لها هدايا علشان يبين لها انه شاريها نفس الشي المصروف و ما يعتبر هالشي اهانة للأب أبدا المهم أختي البحلة بالنفس أنا ما طالبته إن يدفع لي بالسوق و هو عاطيني مصروف بس علشان أكون صريحة معاك أول مره حسيت تفشلت "بشكل لحظي" لكن لما راجعت نفسي شفت ان فعلا ما دام هو يعطيني مصروف فأصير قوية عين لو قلت له بعد يدفع لي لما أشتري شي (تعرفين الواحد لما يمر في موقف تمر في راسه أفكار بس لما يراجع نفسه يشوف الموضوع من منظور ثاني...أنا بس وضحت هذا الشي علشان أبين لكم الصورة) تبون الصراحة؟ ممكن تفكرون إني مكبرة هالموضوع بس تعرفون ليش؟ أنا في بيت أهلي كلنا مو من الناس اللي ندقق على الفلوس يعني عادي المال واحد..يعني أطلب من أخوي يشتري لي شي عادي يشتريه و ما يطالبني بالمقابل..أكون طالعه و أمي تكلمني تبي شي من البقاله عادي أشتريه من عندي و ما أفكر إني أطالبها بثمنه..أخوي بيطلع و يبي فلوس أقول له خذ من شنطتي و ما أسأله حتى كم أخذت بس أهل زوجي ألاحظ انهم بالعكس تماما..يعني اخته موظفة تعطي أبوها فلوس يدفع فاتورة تلفونها..عمي يعطي خالتي مبلغ كل شهر تصرف منه على نفسها و على البيت و على بناتها (زوجي الولد الوحيد) و عاد خالتي تتصرف..زادت المصاريف هالشهر قلت المصاريف هالشهر ما فرقت المبلغ نفسه نفسه..و إذا خوات زوجي مثلا عندهم مناسبة و احتاجوا مبلغ زيادة أمهم تعطيهم من معاش تقاعدها..زوجي مثلا بيشتر خبز ولا لبن خالتي تعطيه ثمنه..أنا مرة دفعت لأخته شي فهو رجع لي ثمنها و بعدين طلب من أمه مقابل اللي دفعه له (مع اني ولا حتى فكرت يعني كلها ميه مدري ميتان ريال ما أحس انها تسوى و يوم قلت له قال لي أنا موب ملزم بخواتي)...أنا هذا الشي يضايقني أحس إنه فيه نوع من الجلافة..يمكن لأني ما تربيت على هالشي...علشان كذا أنا ما ودي إن بعد ما أتزوج علاقتي مع زوجي تصير كذا..ما ودي إذا صار عندي أولاد تصير حياتنا كذا علشان كذا أنا فكرت من الأن لازم أشتغل على هالشي بشكل تدريجي..و هذا السبب اللي علشانه كتبت هالموضوع.ز.يعني حكاية مصروف السفر و كذا هذه تقريبا انتهت..و هي تقريبا عباره عن جزء من الصورة الكبيره..أنا اللي أبيه ملاحظاتكم و آرائكم على هالموقف علشان أستفيد منها إذا صار موقف من هالنوع مرة ثانية (بالذات إن هالمرة كانت أول مرة يصير فيها بيننا مواجهه بخصوص الفلوس) و نقطة حابه أوضحها..حدود علاقتي مع زوجي..لأن الناس اللي وضعنا (مملكن) علاقتهم تتفاوت بحسب العادات و الأعراف و طبيعة البنت و أهلها أنا و زوجي تقريبا معطيين حرية تامة (مو مطلقه يعني لو نتأخر برة البيت عن الساعه 1 أمي تحرق جوالي من الاتصالات..مسموح لنا نجلس بروحنا و نقفل الباب حتى لو نبي ما دام هذا في الدور الأرضي أو ما دون الأرضي..أعلى من كذا لازم معانا أحد) بس بالنسبه لناس كثير تعتبر حرية تامة فالشي اللي أبي أقوله ان صحيح في الشرع الرجال غير ملزم انه يصرف على زوجته دامه ما دخل عليها..و النفقه تكون مقابل استمتاع الزوج بزوجته (و بعد الدخله تكون ان يختلي الزوج بزوجته مع علمه بها و قدرته على جماعها)...هذا اللي درسناه بالفقه بالثانويه..هذا من ناحية شرعيه...بس من ناحيه أعراف عند غالب الناس الدخلة هي ليلة الزفاف فعلشان كذا ممكن نقول الزوج غير ملزم بس من ناحية الاستمتاع هل ممكن نقول ان اللي يختلي بزوجته استمتاعه يعادل اللي ما يشوف زوجته غير مره بالأسبوع بوجود أخوها؟؟....مابي أخوض في هالشي لأن أنا مو مفوضه اني أتكلم بحكم ان ما عندي العلم الكافي...فأرجوكم لا تمسكوا علي هالكلام اعتبروه مجرد تفكير بصوت عالي..يعني أنا من النوع اللي أحب أطالع المواضيع من مختلف الزوايا و آخذ آراء من ناس مختلفه و أحلل و أفكر و بعدين في النهايه أطلع بالشي اللي يناسبني....و هذا اللي ودي ان شاء الله أطلع فيه من ردودكم و مشاركاتكم معي :) سبحانك اللهم و بحمدك، أشهد أن لا إله إلا أنت، أستغفرك و أتوب إليك سبحانك اللهم و بحمدك، أشهد أن لا إله إلا أنت، أستغفرك و أتوب إليك سبحانك اللهم و بحمدك، أشهد أن لا إله إلا أنت، أستغفرك و أتوب إليك سبحانك اللهم و بحمدك، أشهد أن لا إله إلا أنت، أستغفرك و أتوب إليك |
واااضح الفرق بين اهلك واهل زوجك وضروري تحولين تغيرين زوجك لو بالتدريج على قولتك لان التأقلم بينكم مارح يكون سهل بس عموما هوبيأثر عليك شوي وانتي بتأثرين عليه شوي كل واحد لازم تنازل شوي
|
السلام عليكم ورحمة الله وبركاته
لفت نظري تكرار كلمة " زوجي " مع أنه ليس كذلك .. صحبح .. لقد تم توثيق عقد الزواج وتم تسجيله .. ربما .. في المحكمة الشرعية .. وأنت أصبحت شرعا زوجة وهو شرعا زوج ولكن ليس عرفا .. ولن تكوني زوجة حقا حتى تنتقلي إلى بيته .. بعد حفل ليلة الدخلة .. ويغلق عليكما الباب وتكونان وحدكما تحت سقف واحد على سنة الله ورسوله .. عندما قال .. صلى الله عليه وسلم ( ............... وأظهروا النكاح ) لأن الإظهار فيه حكمة .. وإلاظهار تعني العلن .. أي أن زواجكما أصبح مشهورا على رؤوس الأشهاد .. والكل يعرف أنكما زوج وزوجة ولكن .. بعد ليلة الدخلة و ........... تحريك الغرابيل .. أي الاحتفال . لذلك أكرر .. أنك عملت من الحبة قبة .. كما يقال .. والموضوع لا يستحق كل هذه الضجة .. نصيحتي أن تنسي الموضوع بكامله .. ولا تجعليه يترك ترسبات قد تطفو يوما وتعكر عليكما حياتكما التي أتمنى أن تكون سعيدة بإذن الله .. مع تحياتي وتمنياتي الطيبة يوسيبوس |
سلامتك ..................
|
اقتباس:
أكون أنانية لو توقعت منه إنه يتخلى عن الأشياء اللي تعود عليها من صغره و أخليه يتطبع بأطباعي و أطباع أهلي..و في نفس الوقت أنا نفسيا أحس ما أقدر أتطبع بأطباع أهله في هالموضوع...علشان كذا أنا فكرت إن بما إن أهلي في الشرق و أهله في الغرب من الحين أنا أحاول أقرب المسافات بيننا بحيث إن لما نتزوج نكون أنا و هو التقينا في الوسط :) اقتباس:
أنا تراني بالعادة ما أستخدم لفظ زوجي بكثرة بالعاده إذا تكلمت عنه استخدم اسمه بس من خلال قرائتي في المنتدى لاحظت إن إذا عضو/ة استحدم لفظ خطيبي أو خطيبتي دائم يفهم ذلك إنها خطبة بس بدون عقد...علشان كذا أنا قلت أقول زوجي و ما دام هو في عالم المقبلين على الزواج راح يفهم وضعي صح....ممم أستخدم مليكي في رايك أحسن؟؟؟ المهم أخي مثل ما قلت أنا الموضوع سكرته بس ما أتفق معك إني أنساه تماما...لازم أستفيد منه أقصى استفاده..وش فايدة المواقف اللي تمر على الانسان إذا ما طلع منها بفائده تفيده في مواقفه القادمه؟؟...يمكن فعلا بعض الأحيان يجيني هوس بموضوع معاك حق :22: بس لا تخاف علي يوم يومين بس أطلع اللي في نفسي و بعدين أنسى و أنا مرتاحه :) ...أعرف نفسي إذا قفلت على موضوع بدون ما أطلع حرتي فيه يرجع بعد فترة بقوة أكبر :25: ...المهم بديت أخرف... شكراأخوي على مرورك اقتباس:
|
بالعكس يا اخ يوسيبوس الموضوع مب صغير الفرق بينهم كبير ولو ما تأقلمو على بعض هالوقت رح يكون التأقلم بعد الزواج صعببب اسألني اعرف ناس تطلقو بسبب هالمشاكل يعني البنت متعوده تاخذ فلوس وتصرف وما تحسب شي وتتزوج واحد دقيق ومصاريفه منظمة .. موضوع مب سهل وانا أأكد عليك انك لازم تستغلين هالفتره لانها اسهل بالتأثير عليه لكن بعد الزواج رح تكون الامور اصعب
ارجع اعيد وازيد لااازم تأثرين عليه وتعودينه يدفع لك ويعطيك بدون ما يحسب كل شي لاازم تعودينه الحين عشان ياخذ شوي على عادتك بعد الزواج وما تكون صدمة لكم اثنينكم .. طبعا كله بتفاهم وحدود مو قصدي تتهاوشين وتصيحين ومادري ايش ثاني شي يا اخ يوسيبوس انا ما الومها اذا قالت زوجي ياخي اعضاء المنتدى يخوفون من تقول الوحده خطيبي تجيها عشر ردود وش تقصدين؟ كتبتو العقد ولالا؟ ترا ما يجوز تلكيمنه ولا تقعدين معه ولا لا لا .. وحتى لو وضحت بالبدايه انها متملكه عليه وبعد كذا في الردود قالت خطيبي الغريب يرجعون يسألون وش تقصدين بخطيبي؟ كيف تكلمينه؟ وضحي يا اختي هل كتبتي العقد؟ وينسون المشكله الاساسيه بتكرير هالسؤال |
اقتباس:
أختي انتي الحين فهمتيني هذا اللي كان في بالي يوم اني فتحت الموضوع (ولا يعني كان يمديني بس أكتم في نفسي و أبوز و اذا سألني وش فيك أقول له سلامتك ولا شي :29: مثل عادتي :25: ما أقول انها صفه حلوه فيني بس طبيعتي كذا) بس أنا قلت لازم أستغل الموقف على قولتك :22: ...ممكن الصياح كان حركة مالها داعي بس ترا أنا ما صحت علشان هالموضوع نفسه أنا صحت يوم قال بيمشي..ما قدرت أمسك نفسي حاولت أمسك دموعي قد ما أقدر بس شسوي ما قدرت...أنا دموعي ما تنزل بسهوله بس إذا نزلت خلااااااص ما فيه مجال لوقوفها الا لما تخلص و بالنسبة للهواش أنا مو من النوع اللي أصارخ و أرفع صوتي (ما فيه الا واحد من اخواني هو اللي يخليني أطلع من طوري بحركاته الاستفزازية)..أنا طبعي أبوز و أسكت و إذا مرة مرة وصلت حدي أبكي...بس الحين قاعدة أتعلم إن رد الفعل هذا رد فعل سلبي..و المفروض الانسان ياخذ رد فعل ايجابي بالمصارحة و التفاهم و بدون تجريح لأن ما فيه انسان معصوم من الغلط هذا اللي استفدته من ردود اخواني كلهم..الأخوان اللي اتفقوا معي علموني ان المصارحة أفضل و ان الشخص الثاني ما يقدر يقرأ أفكاري الا إذا أنا بينتها له (صحيح أنا خربت الموقف شوي بالبوز و الصياح بس شوي شوي إن شاء الله أتعلم أتحكم في هالشي)...و أخواني اللي ما اتفقوا معي و قالوا لي زوجك/خطيبك/مليكك مو ملزم يصرف عليك..لفتوا نظري لهالنقطة فأنا بهالشكل أقدر أفهم وجهة نظره أكثر و هذا الشي راح يقلل أو حتى يمنع من لومي له..يعني أنا تعلمت منكم إن إذا حصل موقف زي كذا مرة ثانية (بالذات ان لسه باقي على عرسنا عمر..الله يحيينا و يحييكم..يعني أكيد بتصير مواقف كثيييييير) المهم إذا هو أعطاني أنا سأكون له من الشاكرين و راح أعتبر عطيته هدية منه لأن هو موب ملزم فيها...و إذا ما أعطاني هذا ما راح يحز في نفسي مثل هالمرة لأن بالأول و الأخير هو موب ملزم أنا مرة مبسوطة منكم شكرا يا اخواني...هذا اللي كنت أبيه يوم كتبت الموضوع..مثل ما قلت لكم الموضوع كان منتهي بس أنا كنت حابه أستفيد للمرة الجاية و اللي بعدها و اللي بعدها :15: هذا بالنسبة للموقف بحد ذاته .... أنا الحين ارتحت خلاص طلعت حرتي كلها :22: :17: :18: و بالنسبه لتغيير الطبايع هذا أتوقع محتاج جهد أكبر..يعني لازم أعوده إن ما فيها شي إنه يعطيني و إنه ياخذ مني (لأن هو اذا ما عنده فكه عادي يدفع شي سعره عشرين ريال بورقة خمسمية ولا انه ياخذ مني..و اذا أخذ يرجع لي)..هذا راح ياخذ وقت و صبر..ادعوا لي الله يقدرني و مرة ثانية ألف شكر لكل اللي ردوا علي..ما تدرون وش كثر أنا مقدرة مشاركاتكم :d |
السلام عليكم ورحمة الله وبركاته
ما أريد أن أؤكد عليه هو أني لست آخذا موقفا من أحد ولكني قلت ما أعتقده أصر على أن كلمة زوجي لا تطلق على الرجل إلا بعد ليلة الدخلة .. حتى لو تم توثيق عقد الزواج المشاكل بين الخطيبين تكون عادة تافهة .. ولكنها طريقة ليتحسس كل منهما مشاعر الآخر .. فترة الخطوبة هي فترة دراسة .. كل طرف يدرس الآخر ويتعرف عليه أكثر .. قديما قيل " لا كرامة بين الزوجين " .. عندما يكونان قد تزوجا فعلا .. ومن هنا كان كلامي .. حيث أنك تعتبرين نفسك زوجة .. أن لا تحفظي لزوجك كلا أخطائه .. فهو ليس ملاكا .. أنا أؤمن أن الزوجة أقوى من الزوج .. وهي الاسفنجة .. واعذروني لهذا التشبيه .. الذي يمتص متاعب الرجل ومعاناته .. أن أنصحك وأنصح كل امرأة أن لا تحفظ لزوجها أخطائه .. وأعترف .. أن المراة أعف من الرجل في أمور كثيرة .. أتمنى للجميع حياة زوجية سعيدة وخالية من المنغصات .. واقبلوا تحياتي يوسيبوس |
| الساعة الآن 11:47 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©