وينكم يا أهل الرومانس!!!
 

وينكم يا أهل الرومانس!!!

عندي طلب خاص بس يمكن يستفيد منه الجميع يعني أفكار للمتزوجين تكون حلوة

زوجتي بتجي بعد كم يوم من بيت أهلها صار لها مدة هناك وحبيت اشتريلها هدية بس الأوضاع الاقتصادية مو مساعدة (يعني تعرفون سعر البترول مرتفع وداو جونز طايح حظه ) لذلك قلت أكتب لها كم بيت شعر (قال لك مصدق نفسي أبو العلاء المتعري ) وصار اللي مو بالحسبان وكتبت لي قصيدة ما عرف كيف طلعت بس طلعت روحي لما طلعت .

المهم الحين أبغى طريقة رمانسية عشان أقدم القصيدة يعني أكتبها على ورقة مثلاً وأشبكها بوردة ولا أي فكرة زي كذا .. ترى الشباب ما شاء الله زي ما شفت كلهم أفكار رومانسية جريئة (مهم جداً تكون جريئة وما صارت قبل كذا )

وترى هاه ترى قلنا الأوضاع الاقتصادية مو بشي يعني فكرولنا بشي يكون مو غالي حيل

ومشكورين مقدماً على أفكاركم اللي متأكد أنها بتكون خطيرة

شاعر الوجد ... والله باين عليك دمك خفيف

ما يحتاج تصرف دام أنك تحت الحديدة ( لاحظ أني ما قلت على الحديدة ) .. صدقني الوحده تكفيها وردة
وتشوف الفرحة في عيون زوجها برجعتها وشوقه لها تغنيها عن هدايا الدنيا كلها ..

أنا أنصحك أخوي لو تجيب لك كم ورده وكم شمعه على شكل قلوب وتوزع الشموع في الغرفة وتنثر الورود على السرير وتحط قصيدة ابو العلاء المتعري على قولتك :23: في وسط السرير بين الورود ولو تكتب لها رساله بكلمات من قلبك بعد تعبر بها عن مشاعرك لحظت غيابها وتلزقها على المراية في الغرفة أو في مراية الحمام ورسم لها قلوب حولها بالروج .. صدقني بذوب زوجتك من الوناسة ..

والله يوفقكم ويهنيكم يارب ..

شكرا على الفكرة الحلوة

وبالمناسبة يعني أنا فوق الحديدة شوي مو تحتها والحمد لله

دام أنك فوق الحديدة يالله روح عيل أشتر لها عطر حلو وحطة مع القصيدة ولا تنسى تختار ريحت العطر انت بنفسك وتقولها أن أنت أخترت هالريحة لأن ودك تشمها فيها ..

وأذا أن فوق فوق الحديدة بعد شوي تقدر تقولها وبكرا مسويلج مفاجأة تخليها طول الليل تتحرقص ما تنام هههههههههه رتب لها طلعة بالسياره مدري عاد اذا عندك بحر ولا شي المهم مكان رومنسي والأفضل يكون بالسياره بس يعني ما تنزلون لأن صراحة الجو في الخليج ما يساعد الا عاد أن كنت تتكلم من جنيف مدري .. ولا تنسى تحط لها اغنية وانت في السياره تكون شوي معبره عن حبك لها


واذا انك فوق اكثر روح أشتر لها تعليقة ذهب والأفضل لو كان طقم ألماس ( هاذي مزحة )
<<<< ما تنعطى وية

بالتوفيق انشالله

فكرة العطر وايد حلوة
عاد بس مشوار السيارة ذا بيذبحنا لأن عندنا في سويسرا يعني في طوز والحرارة فوق 400
شكراً علىفكرة العطر بسويها

لكن ابي فكرة للقصيدة مو حلوة أكتبها على ورقة وأناولها ياها يعني

أخي .... بوكيه .. ورد ... صغييييير ... وناعم ......+ ورق بني من المكتبات ..أحرق أطرافه بطريقة فنية .. واكتب عليه القصيدة بخط يدك ... ضروري بخط يدك .....+ خاتم ناعم .. حتى لو كان رخيص ( لكن لايكون بلاستيك أو من أبو ريالين )

أطلب من منسق الورد .. أن يضع القصيدة مع البوكيه بطريقة فنية .. بعد ةأن يلفها بشكل أسطواني .. ويحيطها بالخاتم ....

خبئ الهدية .. تحت مفرش السرير ... واحرص أن يكون جو الغرفة باردا حتى لايذبل الورد ... ويتبخر المشروع .......

وبعد أن تؤي ضيفتك ... لسريرها .. وترفع الغطاء ... ستجد الهدية .. بانتظارها ...........



لكن أنصحك .. بأن تتقاضى منها ثمن القصيدة ...... والخاتم ... والورد ... حتى تستطيع تقديم المزيد من الهدايا مستقبلا ...
وفقك الله

السلام عليكم ورحمة الله وبركاتة...
الله يسعدكم ويهنيكم...كلمة ولهت عليج وما اقدر اعيش من دونج تكفي الدنيا وما فيها...خذ شموع وخذ ورد وزع الشموع في كل ارجاء الغرفه...والورد خذ ورد صغير وكمية حلوه وانثرها على الباب والقصيده لفها واربطها بشريطه ذهبيه وحطها في مكان ما ادله او اي لون موجود عندك ...وهات قصاصات ورق وكل ورقه اكتبلها كلمة شوق ..الورقه الاولى اكتبلها ابا اتعبك معايه شوي بس معلش شوفي الدرج..تفتح الدرج وتقرى الورقه الثانيه اكتبلها لالا مش هنيه دوري عليه بالخزانه...والثالثه اكتبلها اذا ما عليج كلافه روحي المكان الفلاني والرابه اكتبلها يمكن عندي بجيبي..والخاميسه هاي بوسه وانا ادليك عليها....وهكذا ..واذا عندك بالغرفه اباجوره غير لون الليت للون الأحمر اذا لقيت في الجمعيه ليت بألوان مختلفه....ودخن الغرفه وعطرها..وأستقبل عروسك...واذا مفكر تاخذلها هديه تقدر تاخذلها عطر مثل ما اخترت أو اي شي انته تحس انها تحبه...قميص أو سويره أو قلب أو برواز وحط فيه صورة زواجكم...

يا الله خبرنا شو راح تعمل عشان تزيد أفكارنا...

السلام عليكم
اخوي احلى من انك تكتبها
تحفظها واعتقد الحفظ سهل لانك انت اللي كاتبها
وتقولها وانتو بجلسه شاعريه او مع رقصه رومانسيه
تهمس القصيده بأذونها
احلى من الف هديه والف طقم ماس
وشكرا :22:

مشكورين يا أخواني واخواتي كلكم جميع

والله ما خيبتو ظني يعني أفكار ولا ألف ليلة وليله

الله يحفظ لنا هالمنتدى وأفكاره الرررررررررررررررائعة

بحاول أجمع بين فكرتين أو ثلاثة من اللي قلتوهم وأطلع شي حلو إن شاء الله

مشكورين مرة ثانية يا اخوان والله يديمكم لنا مورد للرومانس والأفكار الحلوة

السلام عليكم و رحمة الله و بركاته . .




اهلا و سهلا فيك اخي الفاضل . .




احيي فيك ابداعك . . و حبك لزوجتك . . عسى الله يسعدكم و يديم عليكم المحبة و راحة البال . . و يزيد بينكم الألفة و المحبة ياا رب . .




انا عندي فكرتين مختلفين عن ما ذكروه الأخوات و الأخوان الأفاضل . .



الفكرة الأولى . .


جيب عشاء جاهز من اي مطعم تحبه زوجتك . . "لكن ليس مطعم وجبات سريعة" يعني سلطات او باستا. . ضعه في صحون جميلة "من صحون البيت التي تستخدمونها للضيوف مثلا" . . و جهز طاولة الأكل بأشياء بسيطة . . مثلا مفرش حلو لونه مناسب مع غرفة الطعام . . جيب لك كم شمعة . . و اكتب القصيدة بخط يديك . . و جيب وردة طبيعية "اي نوع زوجتك تفضله" . . مثل الجوري او التوليب او الزنبق . .


و جيب المنديل الخاص بالطعام و لفة بطريقة . . انك تحط الوردة بالأمام . . و تضع القصيدة داخل المنديل الملفوف بشكل مخفي . . بحيث انها لما تفتح المنديل ستفاجأ بوجود هذه الورقة . . و ستفتحها و ستتفاجأ بوجود القصيدة التي خطتها يدك . . و صدقني المفاجأة راح تكون رائعة . .


هذه صورة توضيحية ممكن انها تساعدك كيف تلف المنديل . .



احرص ان القصيدة يجب ان تكون مخفية من الخهة الخلفية للمنديل . .






و هذه الصورة اوضح شوي . .








ممكن ايضا ان تعمل المنديل بهذه الطريقة . . "اسهل"





ضع الورقة داخل المنديل . . و الوردة بجانب الصحن . .








و الفكرة الثانية . .


نفس الفكرة الأولى باختلاف بسيط . .


انك تسجل القصيدة على شريط كاسيت بصوتك . . و تعمل خلفية لصوتك مثلا صوت ماء جاري او صوت طيور . . و حاول تعيد و تزيد بالأبيات حتى تبين القصيدة طويلة . .


و تشغل الشريط و انتوا على العشاء . .
راح يصير هالشريط عندها ذكرى سعيدة لا تنسى . .




و لا تنسى اخوي الفاضل . . اطفئ الأنوار كلها . . و اكتفوا بنور الشموع . . و ايضا حاول عند قدومها يكون كل شئ جاهز . . يعني حتى تتفاجأ . .




و اتمنى ان افكاري عجبتك . .




اتمنى لكم السعادة و الهناء . .


هذه الأفكار رائعة

الشكر للأخ المشرف على ثناءه الجميل

يعني أخجلتم تواضعنا وما عاد ندري وش نقول والله هو جهد متواضع حبيت بس أظهر لزوجتي كم أنا مشتاق لها بطريقة تكون مبتكرة وفيها بعض الاختلاف عن الطرق العادية مثل الوردة والهدايا (طبعاً بدون التقليل من أهمية هاذي الأشياء)

وإذا حب الإخوان ممكن أني أنشر الشعر بس بشرط بعد ما أهديه لزوجتي عشان حقوق الطبع والقص واللصق :D

لا حصلته بكرة علأنترنت مشكلة راح كل تعصير المخ سدى

أبي رايكم في فكرة

عندنا بغرفة النوم مرايتين كبار على الخزانة

وش رايكم لو كتبت الأبيات على المرايا

فكرة حلوة ولا مو شي عطوني رأيكم وياريت من الأخوات تحسون أنها فكرة حلوة

وإذا كانت حلوة بأي شي أكتبه ما أدري علموني ؟؟

جيب قلم سبوره واكتب القصيد على المرايا بس بشرط انك تقدر تمسح الكتابه بعدين عشن ما تتوهق..ممكن تجيب عشا خفيف وعصير من الي تحبه بس لازم تكتب الرساله عشان اتم ذكرى عندها..وحط عدال المرايا شموع كثيره وصغيره عشان تقدر تقراه...ولف الهديه إلي حاب تشتريها وغلفها مع باقة الورد وحطها في نص طاولة العشا......شكلنا بنخليك تحت الحديده هههههههه

ليش ماتكتب الشعر على تذكار وتحطه في غرفة النوم عشان يدووووووووووم ولو صار بينكم زعل لاقدر الله تشوفه زوجتك وتذكر هاليوم الحلوووووووووووو وتراضيك على طول.

أخواني وأخواتي ما أدري وشواقول أفكار بعد ولا كذا روحو الله يوفقكم جميع وينولكم مرداكم

ترى حتى الأفكار اللي ما بسويها الحين بحتفظ فيها لأوقات ثانية تلزم يكون الواحد مزنوق في فكرة ولا شي الحين عندي مخزون

والظاهر أني ببيع الحديدة عشان لا اعرف نفسي فوقها ولا تحتها :D

مشكورين

شاعر الوجد صار خاطري اقرأ القصيدة اللى كتبتها لزوجتك عشان اقلبها لزوجي (((((((((((هههههههههههههه))))))))) وأهديها له في عيد ميلاده000
وعلى فكرة فكرة كتابة القصيدة على المراية فكرة روووووووعه لا تفوتها لانة فيها جنون شوي 0

أخي .. يا صاحب مخزون الأفكار المجنونة ... :22:

فكرة الكتابة على المراية .. جداًُ جميلة ... عندي عليها تطوير وإضافة لو تسمح لي ...

إيش رأيك لو تحاول تشتري لك قماش أحمر شفاف جدا .. من هذا القماش الخفيف ...

وبعدين تحاول تحطه فوق كل مراية بعد ما تكون كتبت عليها طبعا .... تكتب بالروج أو بقلم سبورة أهم شيء يكون بلون أحمر ....

وخلي القماش لونه بنفسجي ( موف ) أو أسود ، واسود حلو جدا لو كان رقيق جدا جدا لدرجة إنه يبان اللون الأحمر من بعيد ... طبعا لن تكون الكتابة واضحة .. بس في شيء أسود ..

هدف الفكرة .... إنها ما تشوف الكتابة أول ما تدخل لغرفة النوم .... فتكون مفاجأة .. وكذا لو عندك أكثر من شغلة .. لا تخليها على طول تظهر ... سوي لها مقدمات وإخفاءات تشويقية ... أتوقع لو مفاجئتين في كل زيارة جديدة ....... تخليها ما تنسناها إلى المرة اللي بعدها .... وإن كنت لا أؤيد أن يكون لزاماً في كل مرة ... لأسباب نفسية معروفة لكل خبير في النفسيات ...

تحياتي ... سامحني طولت عليك بس يارب تكون تخيلت الفكرة .. وإذا ما استطعت فعلها .. فضمها إلى المخزن :17:

والله فكرة القماش هذي فكرة تربش مرة بس عاد وين أروح وأقصص وأركب تعرف طال عمرك الدوام والشغل ما يرحم

على العموم مشكورين الجميع ما قصرتوا والله يساعدنا على تنفيذ أفكار هالمخزون في زيارات قادمة إن شاء الله

تشكرون جميع

هههههههههههه تسلم حبيبي ... كان الله في عونك ...

موفق .. الله يديمكم ويخليكم لبعض ...

تحياتي وتقديري ؛؛؛

يا اخي طالما انت بتحبها وحريص انك تقدم لها شي يدخل السرور في قلبها


اكيد كل ما تقدمه يكون معبر ومؤثر طالما نابع من قلب محب وصادق