|
لا أقول أشتكي منها .. بل أقول كيف معي أغيرها
السلام عليكم ورحمة الله
قد عرضت من قبل عليكم مشكلتي مع خطيبتي والتي تتلخص في كيفية تغيير شخصيتي معها - بحيث تراني كما تمنت - شخصية قوية زي ما قلتلكم قبل كدة إن خطيبتي بتحبني جدا .. أنا متأكد من كده . لكن أسلوبها معي محيرني جدااااااااااا وتتلخص مشكلتي في أربع شكوات : الشكوى الأولى : أن خطيبتي لي عندها تليفون في شقتهم بل إن والدها عنده في محل تجاري أسفل بيتهم الخاص - 2 تليفون أرضي وواحد جوال .. ومع ذلك حين خطبت ابنته لم يحاول أن يجعل أحد تلك التليفونات فوق بالرغم من إنه كان فيه الأول تليفون من الاتنين في الشقة لكن الله أعلم ليه نزل المحل .. المهم أنا كلمت حماي بخصوص التليفون قال إنه هيطلع واحد .. ولم يفعل .. كلمه والدي وووعده بإنه سيركب خط جديد لهم غير اللي في المحل .. ولم يفعل والمشكلة إنني لما بتصل بخطيبتي بتصل عند بنت عمتها اللي ساكنة في الشقة اللي تحتهم .. وده مضايقنى جدا لأني مبعرفش أتكلم معاها براحتى وكذلك هي والمشكلة المترتبة على كده إني أنا بس اللي بتصل بيها وهي ما بتتصلش إلا (نادرا) أنا قلت يمكن عشان خطيبتي كانت معي في العمل في فترة تدريب لها وكنت بشوفها 3 أيام في الأسبوع غير آخر الأسبوع كنت بروحلها يوم في بيتها وده خلاها تتعود إنها تشوفنى ومتتصلش لكن كانت ساعات تخرج من كليتها وتتصل بي حتى في أيام التدريب وحين طلبت منها أن تتصل بعد ما انتهى التدريب زي ما كانت الأول .. إما تقول (أنا ما بنزلش تحت للمحل خالص عشان المذاكرة والامتحانات) أو تقول ( لا مش هتصل بيك).. كأنها بتغيظني.. ولا تتخيلوا شعوري لما بلاقي زملائي في العمل اللي خاطبين إزاي بيكلموا خطيباتهم كل يوم وخطيباتهم بيكلموهم . طبعا غير المسجات وخلافه .. بكون زعلان جدا من كده إن خطيبتي متجاهلاني .. دي حتى لما كانت بتدرس آخر سنه ليها كانت في الأول بتتصل بي على الجوال من أي سنترال أو كارت لأنها لس معها جوال لكن منذ وقت قريب لم تتصل بي وانقطعت تلك العادة ونظرا لذلك بقيت أتصل بيها في الأسبوع مرة أو مرتين زي ماهي مبتتصل حتى والدتها قالتلها أمامي يبقى هاتي الجوال من عند والدك من تحت وكلمي خطيبك فقالت حاضر ثم ........................... انتو فاهمين ( طناش) قولولي بقى أحل المشكلة دي إزاي لإني نشف ريقي من كتر الكلام في هذا الموضوع أنا نفسي خطيبتي تكلمنى زي ما بكلمها ونكون زي أي اتنين مخطوبين بيكلموا بعض أقنعها بكده إزاي ؟؟؟؟؟؟؟؟؟؟؟؟؟؟؟؟؟ أزاي أقنعها ؟؟؟ الشكوى التانية : إني كنت الأول في بداية الخطوبة كنت لما بروح عندهم بروح كل أسبوع مرة يوم الجمعة بس كنت بروح على الساعة 8 وكنت بقعد مع والدها تحت في المحل معه حوالي ساعة ثم أطلع أقعد مع خطيبتي فوق وكنت بقعد من 9 لغاية الساعة 12 أنا حسيت إنهم بيبقوا متضايقين من كده فقررت إني آجي بدري شوية عشان أرجع من عندهم بدري لكن خطيبتي سبقتني وجت في يوم قالت إن والدها وأخوها بيضايقوا لما بقعد لوقت متأخر .. تعالى بعد كده بدري وامشي بدري .. أخدت أنا الموضوع بحساسية وزعلت لكن لما قعدت مع أصدقائي وحكيت لهم قالولي هي ما غلطتش إنت اللي غلطان وحاول تتقبل الموضوع بصدر رحب وبالفعل عملت كده المشكلة بقى إيه إني لما بروحلها بنقعد مع بعض أحلى وقت لكن ساعة ما يقرب موعد خروجي من عندهم ألاقيها تقولي (( يللا قوم عشان قربت تمشي )) تخيلوا .. ده بدل ما تتحايل عليا وأنا ماشي وتقوللي ولو كدب (( اقعد معايا لسه بدري)) طبعا انفعلت جدا من الكلام ده وحسيت إنها مش مستحملة وجودي معاها بالرغم من أننا خلال زيارتي بنبقى بنتكلم ومش حاسين بالوقت وسعداء جدا ببعض بررت هي كلامها ده بإنها مغلوبة على أمرها بسبب أبوها وأخوها اللي بيزعقولها لما بقعد معاها لوقت متأخر .. فكل شوية تذكرني بموعد رجوعي وتنظر في الساعة وده بس لما تقترب ساعاتي الأربع معها على الانتهاء فقررت أنا إنها لو قالت كده تاني سأطلب منها عدم تكرار سماعي لهذا الكلام مرة أخرى وإن كررته تاني سأترك لها المنزل ولن أرجعه .لأنه لو كان ذهابي بيضايقهم .. فلن أذهب لهم مرة ثانية والكلام ده مش هيكون ليها لوحدها هيكون أمام أهلها فهل ده تصرف صح وإن كان غير كده فما نصيحتكم لحل مثل هذه المشكلة الشكوى الثالثة : إن خطيبتي نادرا ما تناديني باسمي ولا تذكره إلا في حديثها مع زميلاتها أو أهلها عني .. ده غير إنها نادرا ما تقول لي أي كلام يحسسني بحبها لي تخيلوا .. اسمى حتى اللي بتمنى أسمعه منها دايما .... بخلانة عليا به ولم تناديني به إلا مرات قليييلة جدا ولما سألتها عن سبب ذلك قالتلى إنها بتخجل لما بتناديني بإسمي وبالرغم من ذلك في تحبني جدا وهناك الكثير مما أكد لي ذلك بدون ما أطيل عليكم أكتر من كده فما الحل في تلك المشكلة هل أطلب منها ذلك .. بس ده صعب عليا لأن مثل هذه الأشياء لا تشحت أي ليس فيها تحايل حتى تقال .. الشكوى الرابعة : ودي اللي أنا حاسس إنها أساس شكوتى الأولى والثالثة وهي أن خطيبتي لها صديقة في الكلية أنا حاسس كده إن خطيبتي بتحكي لها عن كل حاجة تخصنا .. وهذه الصديقة - وده حصل أمامي فعلا - بتنصح خطيبتي بتجارب بيكون نتيجتها الزعل بيني وبين خطيبتي فما أنا واثق منه أنها بتحاول إنها تخلى خطيبتي تتغلى وتتقل عليا في كل شئ وتكون دي سياستها معى دائما عشان أنا تملى اللي أجري وراها وده يمكن سبب أغلب المشاكل بيني وبين خطيبتي فكيف أقنع خطيبتي بأن لا تسمع لتوجيهات صديقتها اللي بتسبب الزعل دي وتكون معايا على طبيعتها تلك هي شكواتي الأربع فما حل كل واحدة منها وآسف لللإطالة .. إوعو تكونوا زهقتم ومليتم منى بس حبيت إني أضع الصورة أمامكم كاملة وواضحة حتى يكون رأيكم في محله و نصيحاتكم لها تأثير لأني اتخذت قرارات بيني وبين نفسي بس خايف تكون قرارات طائشة وغير حكيمة وتكون عواقبها سيئة أرجو من رواد الموضوع اقتباس كل شكوى وإبداء الرد والنصيحة بعدها وجزاكم الله خيرا وسخركم لحل مشاكلى حتى تتم سعادتي بزواج موفق .. |
اخي تامر ، سأقترح حلا للمشكلة الثانية ، الحل بسيط وهو اختصار وقت الزيارة الى نصف الوقت المعتاد ، فهذا حل وسط بين الزيارة الطويلة او عدم الزيارة ، اذهب ولا تمكث الا قليلا .
|
بالنسبه للمشكله التانيه فأنا اؤيد رأي الباتول امكث فتره قصيره حتى تشعر هي بذلك فتطلب منك بعد ذلك ان تجلس معه اكثر ولكن ارفض حتى لا تحرجها مع والدها فهي اكيد معذوره وبكره تتزوج وتمكث معها زي ما انت عاوز
|
مالكم
يظهر إن المشكلة التانية هي المشكلة الجامدة طب وبقية المشاكل .............................................؟؟ على العموم شكرا أختى البتول وأختي الأميرة الحالمة على النصيحة للشكوى الثانية بس ياريت كده ((بصة)) على الشكاوي الباقية ورد سريع كده على الماشي |
دي عاشر مرة أدخل على النت ومش لاقي حد يرد عليا
يظهر إن موضوعي بلا أهمية !!!!!!!!!! عندكم |
بالنسبة للتلفون صارحها واسالها فهي ادرى الناس
بالنسبة للزيارة كما ذكرت الاختان البتول والحالمة بالنسبة لصديقتها احكيلها تتعلم تخبي سرها واطبع موضوع بعد ملكتها طارت واخبرت زميلاتها في قسم عالم المقبلين على الزواج يمكن بالسبة لخجلها عادي البنت المتربية ببيئة محافظة تكون خجولة باسلوبك خلصها من خجلها وخليها تموت فيك |
بص يا اخ
بالنسبة للمشكلة " إن خطيبتي نادرا ما تناديني باسمي ولا تذكره إلا في حديثها مع زميلاتها أو أهلها عني .. ده غير إنها نادرا ما تقول لي أي كلام يحسسني بحبها لي تخيلوا .. اسمى حتى اللي بتمنى أسمعه منها دايما .... بخلانة عليا به ولم تناديني به إلا مرات قليييلة جدا ولما سألتها عن سبب ذلك قالتلى إنها بتخجل لما بتناديني بإسمي وبالرغم من ذلك في تحبني جدا وهناك الكثير مما أكد لي ذلك بدون ما أطيل عليكم أكتر من كده فما الحل في تلك المشكلة هل أطلب منها ذلك .. بس ده صعب عليا لأن مثل هذه الأشياء لا تشحت أي ليس فيها تحايل حتى تقال .." انا صاحبتي القريبة جدا لي كانت تفعل نفس الشئ و لا تنادي خطيبها باسمه لأنها كما قلت كانت بتخجل، و كنها تزوجت الأن و اصبحت تنطق اسمه مئات المرات فلا تقلق كما يمكن ان تأخذ الموضوع بصورة رومانسية و تطلب منها ان تسمع اسمك من شفتيها لأنه رائع منها الخخخخخخخخخخخخ و تشجعها على ان تناديك باسمك بان تمزح معها و تقول لن ارد الأ اذا ناديتي باسمي |
كان الله فى عونك
اتجوزها و خالص |
السلام عليكم ورحمه الله وبركاته. اخي تامر اولا متتخدش اي قرار سريع بعدين ترجع وتندم عليه . ثانيا . ان خطيبتك الضاهر شخصيتها متقلبه بحيث تؤثر عليها كل كلمه تسمعها . وانت لازم تنصحها لان بكرا لما تتجوزو باذن الله حتواجهو ولا سمح الله مشاكل كثيره لو بقت هي على هذا الحال. :14: وانا انصحك انك تتقل نفسك واعمل زي ماهي تعمل . ومتخابرهاش كثير وخلها تحس انك زعلان منها حتى تحس بغلطتها . وبعدين ولاتحزن على التصرفات دي اوي لان البنات بطبيعه حالهن بيحبن الدلع الزايد . وفي بعض الاحيان ده ميكونش في صالحهن. وماتشيلش هم لما تتجوزها حتعرف وقتها حتمشي امورك ازاي معاها لانك حتصبح الراجل الي بيتولى امورها . :18: وان شاء الله ربنا يوفقك تقبل تحياتي |
يا جماعة أنا وصلت لدرجة إني اتخنقت من كتر الهم والتفكير في حالي
أنا يا جماعة مش حاسس لغاية دلوقت إني خطبت كل اللي حواليا من الخاطبين سعادة الدنيا مرسومة على وجوههم وصحتهم تحسنت أكتر أما أنا فكل اللي يشوفني يقوللي .. مالك .... إنت خاسس جدا ووشك مش باين عليه الفرح وشلت الهم بدري كده ليه انتو عارفين يا جماعة .. أنا مش شايل هم مشكلة بعينها من المشاكل اللي عرضتها لكن أنا صعبانة عليا نفسي جدا لأني مش لاقي الاهتمام من الإنسانة اللي توقعت لما خطبتها إني هعرف معاها طعم السعادة الحقيقية والله يا جماعة إني ساعات أخرج من البيت واتمشى لوحدي وغصب عنى بلاقي نفسي ببكي نعم.. لا تندهشوا.. فالإنسان حين يقدم أحسن ما عنده دائما للإنسانة اللي بيحبها ولا يجد منها إلا كل ما يضايقه منها تصعب عليه نفسه على إخلاصه الشديد معها أنا قررت بيني وبين نفسي إني أقعد معاها وأكلمها بصراحة عن كل ما أجده منها وكل ما أشتكي منه معها وإن كانت هتغير من نفسها فسنظل أحسن مخطوبين وإن بقيت زي ما هي ولم تتغير وقررت هي أن لا تغير من أسلوبها معي .. فستخسرني وساعتها ستكون صدمتي كبيرة أوي عليا ومش عارف بعدها هيكون حالي إيه ؟؟ |
اعمللك استخاره وبعدين اعمل الي نفسك فيه. وان شاءالله ربنا يوفقك تقبل تحياتي |
شوف اعتقد بالنسبه للمشكله الاولى اظن انها ممكن تكون قصد من والدها لاني على مااعتقد انك لسه خاطبها يعني مفيش كتب كتاب وخلافه فممكن يكون والدها من النوع المحافظ يعني ما يحبش ان بنته تعد تكلم في التليفون دايما لعلى وعسى ما يحصلش نصيب ودا خوف اي اب طبيعي لاني كان لي صديقتي كان عندها نفس المشكله دي حتى اني والدها كان يرفض انهم يخرجوا مع بعض و سبحان اللله الخطبه فسخت فأكيد اللاب كان حقه يعمل كدا و يمكن لما تكتب الكتاب الموضوع دا يتغير
وبالنسبه للمشكله الثالثه ما تضغطش على البنت هي اكيد محرجه وفي بنات كتير كدا وصدقني دي حاجه طبيعيه وانا شايفه انها حتى مش مشكله بكره تتزوج وتمل من كتر ما تناديك باسك ممكن مثلا تختارلها اسم دلع تناديها بيه ودايما تناديه بالاسم دا اكيد هتفرح ولما تكون زعلان منها ناديها باسمها هي هتحس واطلب منها هي كمان تختار اسم تناديك به والمشكله الرابعه فاذا فعلا زي ما بتقول فأكيد دي تبقى المشكله اسالها هي هتبقى مبسوطه لو انت قلت لصاحبك على كل حاجه بتحصل وسمعت كلامه في كل حتجه كأنها مخطوبه لصاحبك مش ليك قولها ليه ما يكونش لها شخصيتها المستقله وان بدل ماهي تقول كل حاجه لصديقتها يحصل العكس والكل ياخذ بارائها وعارفه ان كل البنات بتغير من بعض حتى الاخوات ايه عرفها ان صديقتها مش غيرانه منها ومن حبك لها فالله اعلم باللي بالنفوس وعرفها ان صديقتها مش هتكون عاوزه مصلحتها زي ما هتكون انت عاوز مصلحتها وربنا يوفقك |
شكرا أختي ( الأميــــرة الحالمة )
ولكن أنا عايز أقولك حاجات بالنسبة لرأيك في المشكلة الأولى مشكلة التليفون جايز يكون رأيك صح ولكن ماذا عن مشاعر اشتياق البنت لخطيبها اللي ما بتشوفه إلا يوم كل أسبوع هل كمان متسمعش صوته في التليفون ؟ دي حتى البنت اللي بتحب واحد من وراء أهلها بتتصل به وبتسأل عليه ... فما بالك بخطوبة شرعية أمام الله والناس أنا فكرت في إن موضوع الاتصال ده يكون من طرفي فقط لكن حسيت إني كده هعودها على إني أنا بس اللي أسأل ..فماذا لو مرضت أنا أو جرى لي مكروها كيف تعرف هي يا أختى العزيزة غالبية المخطوبين بيكلموا بعض في التليفون وبيسألوا عن بعض .. أنا لا أقول تقعد تكلمني بالساعة والاتنين أنا كفاية عندي ( ميسد كوول ) على الموبايل ده يشعرني أني على بالها . أما عن مشكلة أنها بتناديني بإسمي هي ساعات وهي في وسط الكلام تيجي تقول اسمي .. فتتوقف قبل ما تقوله وكأنها كانت هتغلط غلطة كبيرة .. وأغلب المخطوبين بيبقى كل طرف عنده اسم حبيبه ده يبقى أحلى كلمة على لسانه .. فكيف لا أسمعه منها وبالنسبة لحل المشكلة الرابعة ممكن فعلا أتكلم نفس كلامك .. لكن ماذا لو أنكرت أنها بتسمع لصاحبتها وقالت إنها ليها شخصيتها المستقلة فكيف سأرد عليها أنا قلقان جدا من موعد زيارتي لها بعد غد لأني لو لقيت المقابلة فاترة بعد 3 أسابيع مفيهاش ولا زيارة عشان امتحاناتها ستخرج الشكاوي كلها أمامها وأمام والدتها غصب عني لأضع حدا لهذه المواقف الغريبة جدا من خطيبتي اللي شايف إنها بين المخطوبات في تعاملها مع خطيبها تاخد ( 1/10 ) |
خليك ثقيل
اخوي الكريم
نصيحتى لك في كل النقاط تقوي شخصيتك وعلاقتك تكون اقوى بالبنت واهلها انته اعلم بعاداتكم ودخولكم وخروجكم على اهل المخطوبة خليك خفيف عليهم واهي لها دور كبير المفروض في حياتك والحين كل واحد يملك نقال في هذا العالم اشتري لها تلفون خاص اعتقد انه مو مكلف كثير وكلمها حتى طول الليل لانها في مثابت زوجتك ولا تحاول حتى تزورهم الا في اوقات خاصة في نقطة مهمة يمكن فترة الخطوبة طولت ! والاهل متضايقين من الحال ! يمكن دخولك عليهم في اوقات خاصة بهم ! الزيارات لها اوقاتها والاتصالات كذالك عليك بزوجتك هى مفتاح الاهل والله الموفق اهم شئ شخصية الشخص حاول تصل بعمك وتسلم علية بدون ما تسئل عن مخطوبتك وكذالك مع عمتك يعنى حاول تحسسهم بجانب الاهتمام من قبلك حياك الله وسارع بالزواج افضل . |
الاخ تامر.....اشعر جدا بما تقوله في البداية احب اقولك انه بالرغم من المأخذ الي اخذها علي خطيبتك لكني احب اقول كلمة حق في الموقف الي قالتلك فيه:يالا قوم امشي والله ثم والله رغم اني اعشق خطيبي بشكل لا يمكن تتخيله فكان بييجي علي اوقات كانت الكلمة دي علي طرف لساني وبمسك نفسي....لانه بييجي متاخر جدا ويقعد لحد 2 او 3 الصبح كان بابا وماما يناموا ويوكلوا اخويا بالحراسة في اوقات غصب عني كنت ببقي عاوزة اقوله كدة اولا عشان شكله هو ميبقاش وحش قدامهم وثانيا عشان مسمعش كلام يضايقني(فانت عدي النقطة دي) ثانيا:لو كنت متاكد تمام الثقة ان خطيبتك بتحبك فاحتمال كبيييير يكون تصرفاتها فعلا نوع من التقل او التدلل عليك ومحتاجة هزة كبيرة عشان تفوق....هزة كبيييرة فعلا وسبحان الله...حصل معايا نفس الشئ كنت بتعامل مع خطيبي بخجل وتجاهل شوية.....حتي افقني فعلا من اللي انا فيه كلمني بصراحة بصدق وفتحلي قلبه...قالي نفس كلامك انه محتاج حد يشعر به ويفرح معاه ويخاف عليه ويهتم بامره وخيرني اي اسلوب احب نتعامل بيه سوي اسلوب الخاطبين اللي قلوبهم متالفة ويخافوا علي بعض مالهوا الطاير ولا كاني واحدة هيتزوجها والسلام يشوفني ميشوفنيش متفرقش معاه اسالها وخليها تختار..... صدقنييييييييييييييييييييييييي لازم ولا مفر من انك تجلس معاها جلسة صراحة تقولها كل كل كل حرف اخبرتنا بيه وتكلمها بصدق وتحكيلها عن اصحابك الخاطبين والفرق بينك وبينهم وتجعل في كلامك معها نبرة تهديد انك لن تتحمل الوضع دة كتير والله العظيم صدقني ان كانت تحبك كما تحبها هتغير من اسلوبها فورا بلا جدال بس اصبر شوية يمكن اهلها مقفلينها عليها شوية ودة غصب عنها وربنا يجعلك قرة عينها عاجلا غير اجلا يارب |
السلام عليكم
والله فكرتني بالذي مضي يعني من قيمه سنتين بس مش بعيد يعني بس الواحد بعد الجواز بيحس ايام الخطوبه دي من الماضي السحيق دلوقتي هتموت وتكلمها في التليفون وكمان هتموت عشان تقعد معاك براحتكوا بكره بقي هي تفكرك بالحاجات دي تقولها هو انتي لسه فاكره انا مقولتش كده ههههههههههههههههههههههههههههه بص انا مش عايزاك تدي الموضوع اكبر من حجمه وخليك فريش يعني البني في فتره الخطوبه بتبقي تحت ضغط كبير جدا اولا تربيتها المحافظه وعدم خبرتها وتأثرها بأي كلام يتقالها انا ساعات كنت بتكلم كلام مش بتاعي وتحت ضغط من أهلي خاصه موضوع التأخير دا وكمان وجود أخ شاب بيخلي في حرج جامد أوي بس انت برده كلمها براحه خالص وبكره لما تتجوز هتفهم وخاصه لما يبقي عندك بنت مخطوبه والسلام ختام |
كلامكم عصفورة وأم يوسف أفادني كثيرا
والحمد لله الذي يريح صدور عباده لقد هداني الله إلى ما فيه راحة البال صارحتها بما يضايقنى منها .. وصارحتني بما يضايقها مني وتصافينا ووعدنا بعضنا أن لا نفتح مثل هذه المواضيع مرة أخرى أشكركم شكرا جزيلا وأتمنى من الله أن يريح صدور عباده أجمعين ممن عندهم مشاكل في هذا المنتدى وفقكم الله وأرجو من المشرفين غلق هذا الموضوع |
اعانك الله
تامر ويسر امورك |
_ مغلق_ |
| الساعة الآن 01:50 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©