|
هل هناك فرصة لإنقاذ شخصيتي ؟؟
مش عارف أبدأ منين لكن حاولوا أن تقفوا بجانبي وتنصحوني بدلا من أن تلوموني
بعد ثلاث شهور من الخطوبة وحدث ما حدث من مشاكل بيني وبين خطيبتي كأي اتنين مخطوبين خلال تلك الفترة لقيتني بلوم نفسي إن المفروض إني كنت آخد موقف في كل مشلكة يجعل خطيبتي تتمسك بي أكتر وتراعي مشاعري وتخاف تزعلني لكني تغاضيت عن الزعل في كل مشكلة بالرغم إنه كان هناك مشاكل كبيرة وكان من الممكن ان نفسخ فيها الخطوبة لكنى كنت باجي على نفسي في كل مشكلة وأحاول أصلح المواضيع لكن يظهر إن خطيبتي مش عايزاني كده عايزة تلاقي قدامها رجل ذو شخصية تزعل وتخاصم وتبعد عشان تجري هي وراءه لكن أكبر غلطة إني كنت بجري أنا وراها وأروح بعد كل مشكلة وأروح أصلح الجو وأتفاهم معاها وأحايل فيها لغاية ما نتصالح (سواء كنت أنا الغلطان أو هي الغلطانة ) وما أكثر غلطاتها اللي صلحت أنا فيها الجو معاها النتيجة لم تعد تتصل بي .. حتى لو مر أكثر من يوم من غير ما نتكلم أو نشوف بعض لم أجد فيها لهفة وشوق للقائي لم أجدها تتضايق عشان أنا ماشي من عندها في كل مرة بزورها بدل ما تقوللي ( أقعد شوية ) بل بالعكس بلاقيها بتبص في الساعة عشان تنبهني لمعاد عودتي لبيتي عمرها ما نديتني بإسمي اللي المفروض هو أحب اسم عندها عمرها ما حسستني إني وحشتها مهما غبت عنها واللي يجنن إنها بتحبني جدا وفي الساعات اللي بنقعدها مع بعض بنبقى فيها في منتهى الرومانسية بس اللي بتعمله ده لا يمكن يتصوره حد لأي اتنين مخطوبين أنا في مرة حبيت أتأكد من حقيقة حبها .. ففتحت في مرة دفتر محاضراتها لقيت اسمي في كل صفحة من صفحات دفترها ومعه أحلى كلمات ورسوم وتعبيرات الحب الجميلة بقيت هتجنن طيب هي ليه ما بتظهرش حبها ده ليا وليه ما بتحاولش تعبر عن حبها ده لقيت الإجابة منها ومني بعد استنتاجها أولا منها : كانت كتير خطيبتي تقوللي إنها بتحب الرجل اللي يقهرها واللي يعاقبها ويضربها إذا غلطت ..... تخيلوا !!! حتى إنها بقت بتحاول تغلط فيا عشان تشوف رد فعلي بقيت أرد عليها وأقولها تحترم نفسها معايا لإني بكره البنت اللي تطول لسانها وإنها لو بقت كده هسيبها ولم أجدها إلا أنها بقت بتسكت فترة وبعد كده ترجع زي الأول وكانت كثيرا ماتختلق المشاكل عشان تشوف رد فعلي وكنت برضه مباخدش موقف دي الإجابة بعد استنتاجها منها أما من ناحيتي فلقيت إني عايش في الهم ده لإني لم أتخذ معها مواقفا حاسمة وقرارات حازمة وشديدة تجعلها تشعر بشخصيتي القوية هي حست من خلال تصالحي الكثييير معها والتغاضي عن غلطاتها ومحاولة إيجاد جو هادئ من غير مشاكل إني بحبها جدا وإني هتنازل عن أي شئ عشان أرضيها لأني مقدرش أستغنى عنها دي المشكلة أعزائي اللي أوضحت لي أني وبكل ألم بقول على نفسي إني شخصيتي ...ضعيفة .. أمامها لكني لست كذلك أبدا أنا كنت قرأت فاتحة بنت قبلها لكن محصلش نصيب كانت بتحاول البنت دي إرضائي بأي شكل من الأشكال وكانت بتتصل بي وبتظهر حبها لي بعفوية وتلقائية شديدة وكذلك كنت أنا لكن أنا تركتها لأنها كانت بتكدب كتير وملاوعة ونديتني باسم غير اسمي اللي أنا عايز أوضحه من خلال ذكر موضوع فاتحتي اللي فاتت إني إنسان طبيعي بحب التعامل علىطبيعتي وأحب اللي قدامي يكون كده لكن خطيبتي مش كده عايزاني أكون جامد عليها وناشف وجاف معاها تخيلوا هل فيه بنات كده أم إن بنات اليومين دول كما قال لي بعض الأصدقاء عايزين الرجل اللي يجروا وراه مش هو اللي يجري وراهم عشان كده قررت إني هكون شخصية تانية خالص تتخذ مواقفا رادعة وبرضه بكل هدوء وبدون تجريح أو إهانة ليها عشان مخسرهاش وساعتها هعرف مدى حبها لي وهل ستغير من نفسها أم لا وهل هذا ماتريده .. أم أن طبيعة شخصيتها كده ولو حاولت أغيرها لن تتغير وستكون النتيجة صدمة لي ؟؟؟ هل ما قلته وما أوضحته لكم .. هل كنت على صواب أم لا أرجوكم جاوبوني وانصحوني لوجه الله هل هناك فرصة بعد مرور ثلاث شهور إني أعدل من شخصيتي معها ومع كل الناس مستني نصائحكم وتوجيهاتكم لي وشكرا |
خطيبتك بدها النوع الحاسم خود واعطى معاها بس لما تحكيلها لا يعنى لا
ماتحاول تصالحها ا>ا كانت هى الى غلطانة وخليها لترجع هى الى تحكى معك مو انت فرجيها شخصية الى هى حابة اتشوفها انك ممكن اتبهدل واتصرخ وتخانقها بعديها لحالها رح تحن لإيامكم السابقة ورح تعرف ان شخصية الرجل ليست بصوته بل بالحنان والله يوفقك |
الي حابه اقوله ان المرأه احيانا وبتفكير جنوني
تحب ان الزوج يفرض عليها رأي .. يتغلب عليها في شيئ يظهر شيئ من قوته فلا تفتقد ان تكون تلك المراه الضعيفه التي لا حول لها ولا قوه وذلك الذي يتلسط يأمر فينفذه له فسبحان الله خالق المرأه ....وسبحان الله خالق الرجل لعلك فهمت قصدي اختك هند ... |
أخوي ..
المرأة تحب الرجل القوي .. خذها معك بأي وقت للخارج ( مطعم أو أي مكان ) .. و خلها بنفسها تشوف كيف تعاملك مع الآخرين ..؟؟ و من ثم .. راح تعجب بك أكثر .. :) |
جميل أن تعرف الداء والدواء ,لكن هل تحتمل مرار ة الدواء , ولتعلم أخي ان الحزم هو سر شخصية الرجل , وهي زمام الأمور في كل أمور الحياة وليست في الحياة الزوجية , فإن لم تحزم من الان فستنخرط عليك الأمور ولا تستطيع توثيقها , ولا يمنع ذلك من تأطير كل ذلك بالأخلاق الحسنة , فلا غنى عنها , ومن حق الزوجة أن ترى في زوجها جوهر ما تريده المرأة من الرجل ومنبع الإثارة لديها , وأنت قد حرمتها من ذلك , اذن أن تثبت لها أنك في غنى عنها , في أي لحظة تستطيع الإستغناء عنها ولا تبالي , واذا أساءت الأدب معك , فاهجرها هجرانا مبينا , حتى ترى ذلك في طبيعتها ولا تعد كما كنت عقابا على عدم تقديرها لك ,,,
|
طيب يا جماعة قولولي
هل أنا غلطان في ,أسلوبي معاها أم هي التي لا تقدر مدى حبي لها وحب عمل أي شئ لإرضائها أنا بحبها جدا بس صعبانة عليا نفسي كان متهيألى إني هلاقي اللي يحبني ويهتم بي ويحسسني باهتمامه زي أنا ما بحبه وبهتم به أليس الحب أخذ وعطاء فلو كان الحب أخذ فقط أصبح أنانية وإن كان عطاء فقط أصبح سذاجة وضعف هذا بين الرجل والمرأة عشان كده يا جماعة هل تؤيدوني في قراري بتغيير تعاملي معها وأن آخذ المواقف الجادة في وقتها حين يكون هناك ما يستدعي فعلا لأخذ تلك الموقف ؟ أنا لازم أحسسها بي وبقيمة حبي لها بس إزاي ؟؟ من فضلكم من واقع الحياة هاتولي أمثلة وربنا يوفقكم إلى ما فيه سعادتكم وسعادة غيركم تيتو |
الحب ليس إلحاحا ..........الحب ليس تمـلّـكا للآخر .............الحب لا يعني ان نفرض انفسنا بالقوة...........الحب لا يعني الذوبان في شخصية الآخر...............الحب لا يعني إنكار الذات.
اخي الكريم انصحك بالتمعن في تلك الكلمات ، فيبدو ان ما يتعب نفسيتك هو فكرتك عن الحب . |
أخوي ..
أنا أبغى زوجي يكون بقمة الحنان و الرومنسية وووو إلخ .. و الحمد لله ،، إنه ربي رزقني هو .. لكن بنفس الوقت ،، و حتى أكون عايشة بإطمئنان و أتطمن على مستقبلي ،، أبغاه شخص شخصيته قوية .. و يعرف قول ( لأ ) .. و يكون له موقف ،، إذا شاف مني غلط بيوم من الأيام .. :) فأنصحك ،، إنك تثقل عليها شوي .. :) و هي أكيييييد بتحبك .. :) |
ما وضعتم نصيحة
لقد تعلمت من كلماتك يا بتول ....ولكن أنا أريد نصائح مباشرة فخطوبتي هي أساس لزواجي وإذا تم الزواج ولم تنصلح خطيبتي معي فستصبح حياتنا معا جحيما وليس نعيما فالمرأة إذا أصبحت هي الآمر الناهي في البيت وتبدلت الأدوار فإما أن أهدر شخصيتي إلى الأبد أو أنفصل عنها لا قدر الله وهذا ما سيحدث لأني لن أطيق أن تتحكم فيّ امرأة وكذلك أي رجل فيا زملائي وزميلاتي الأعزاء النصائح والتوجيهات والأفكار لوجه الله أريد نصائح وتوجيهات مباشرة وواضحة للعمل بها مع خطيبتي وتكون جايبة نتائج جيدة حين أتعامل بها معها |
[size=3]السلام عليكم
اخى انا لا الوم خطيبتك فا من الواضح انها من البنات الاتى يحببن الرجل الذى يفرض راية عليها كما قالوا لك الاخوة وهذا فى نظرى ليس عيب وليس عدم حب لك وليس معناها انها لا تقدر تضحياتك او حبك لها ولكنها تتمنى ان تجد فيك ما تحبة فى زوج المستقبل وبطريقة غير مباشرة تحاول ان تغير من هذا فى شخصيتك وربما ما تفعلة هو الطريقة التى اختارتها لذلك فلا تلومها ولكن حاول ان تفهمها وليس عيب ان تحاول ان تغير من نفسك من اجلها اذا مثلا حدثت مشكلة وكانت هى الغلطانة لا تتصل بها حتى تتنازل هى وتتصل حتى لو مرت فترة طويلة صدقنى هذا يحسسها انك فعلا زعلان منها اذا مثلا قالت شىء دايقك قول لها ان هذا دايقنى ولو تكرر مرة اخرى سوف يكون غضبى اكبر وهكذا ... ارجو ان اكون افدتك السلام عليكم[/size] |
والله يا autocade لقد جئت بما أشعر به فعلا
فكثيرا ما أحس بأنها تريد تغييري إلىما تتمناه وهذا ما أنوي عمله شكرا لك ها يا جماعة مفيش عندكم كلام كده زي أخي autocade |
إيه يا جماعة هل موضوعي ميستاهلش ردودكم
انتو فين ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ |
السلام عليكم
العفو يا اخى وربنا يهدى خطيبتك ان شاء الله ولكن.... انا اختك فى الله autocade :o |
المرأه تحب الرجل ذو الشخصيه القويه التي تستطيع الاستناد عليه واخذ رأيه و مشورته
وليس الرجل الضعيف امام حبها لانها لا تستطيع الاعتماد عليه وتشعر انها المسيطره والمتحكمه دائما المرغوب ممنوع والمرأه تحب الرجل التقيل مش اللي يجري وراها عودها انها تاخذ رأيك في حياتها وفي المواقف اللي تمر به بحيث تكون لها مرجع ذات ثقه وحكمه فتكون قرارتها بناء على نصايحك فتشعر بخبرتك و حكمتك اطلب منها الا تذهب الى اي مكان دون علمك فأنت تعتبر مسئول عنها امام الله وهذا حقك اذا حصل بينكم مناقشه حاده او خناق اياك بتاتا ان تسمح لها بأن ترفع صوتها عليك وخذ موقف اذا خدث ذلك حتى لا تفلت منك زمام الامور واخبرها اذا حدث ذلك نره اخرى بأنك ستترك لها المكان و تذهب وكن جادا فيما قلت حتى لا تشعر انه مجرد كلام وليس فعل اتقل عليها لو ما اتصلتش واياك انك تتصل عليها الا اذا اتصلت حتى تشعر بالحنين و الشوق اليك و تحمل الامر في البدايه حتى تنصلح امورك فحينها ستشعر بحبها لك وايا ان تصلح الخطأ بخطأ اخر وان تملي عليه هذهالاشياء في صيغة اوامر فتشعر كأنها كالجاريه وبالمهانه ولكن اخبرها اياه بمزيج من الحب والحزم معا لا تنسى بأن تتغزل بها و بأناقتها و بجمالها فالمرأه تحب الرجل الذي يشعر بها كأنثى و يشيد بجمالها فتنجذب نحوه و ذلك لا يمنع ايضا بـنك اذا رأيت شيئا لا يعجبك في ملبسها او اي شيء ان تقول رأيك و لكن بطريقه جميله فتجعلها بذلك تحاول ان تغير في نفسها لكي تعجبك ولكي تسمع منك اللغزل لا تكثر ايضا من قول كلمات الحب مثل حبيباتي فيعتاد عليها لسانك فلا تشعر هي بقيمتها بعد ذلك وتشعر بأنها مجرد كلمات اعتادتها منك ولا تنسى بأن الشيء اذا زاد عن حده انقلب ضده فالوسط ثم الوسط ........................... وان شاء الله نطمن عليك |
في البداية
عذرا أختي autocade اعذريني وشكرا لك وربنا يتقبل منك وبالنسبة لأختي الأميرة الحالمة عايز أقولك إني فعلا بتغزل في ملبسها وأناقتها حين أراها تلبس رداءً جميلاً فهي أنيقة جدا في ملبسها وكمان بقولها أجمل كلمات الحب لكن يظهر زى ما بتقولي اني زودتها حبتين في الكلام ده وأنا زي ما ذكرت قبل كده إنها اتعودت على الأشياء الآتية : * أن تسمع منى كلمات الغزل والحب * أن تراني ملهوفا على رؤيتها * أن تراني بحاول أصفى جو الزعل وأجعل الجو هادئا لأني من النوع اللي مبيحبش المشاكل * أن تراني فعلا زي ما قلتي إني غير جاد في قراري بأن أتخذ موقفا من غلطة عملتها أو قالتها * أن تراني بسأل عليها تملي في التليفون على فكرة بالنسبة لموضوع التليفون هي معندهاش تليفون في شقتها لكن والدها أسفل منزلهم الخاص عنده محل تجاري به 2 تليفون أرضي وتليفون محمول ومش عايز يطلعلهم التليفون مش عارف إيه السبب ...... ولما بتصل بيها بتصل بيها عند بنت عمها اللي ساكنه في الشقة اللي تحتهم ولما بسألها : ليه مابتتصلي بي : تتحجج بأي حجة وذكرت لكم في موضوع : موقف سريع إنها الأيام دي في امتحانات وكنت كل يوم عندها فيه امتحان كنت بطمئن عليها في الامتحان الأول رحت ووصلتها وهي راجعة للبيت واتفقنا نخرج سوا آخر يوم في الامتحانات وفي الامتحان التاني اتصلت بيها واطمنت عليها وفي آخر المكالمة لقيتها بتخلف اتفاقنا عشان تخرج تتفسح مع زميلاتها بعد ما تخرج من آخر امتحان فتضايقت جدا وقلتلها : يظهر إن صحابك أهم ..... أخرجي معاهم هما الأهم ...... فحاولت ترجع في كلامها وكأنها بتختبر موقفي اللي المفروض هاخده .......وفعلا قلتلها إني مش هروحلها خلاص وخليكي مع صحابك وانهينا المكالمة على كده ومن ساعتها - من يوم الثلاثاء - ولم ترفع التليفون لتكلمنى وتحاول تعتذر أما أنا فقررت أن يكون هذا الموضوع هو أول موضوع اتخذ فيه موقفا حازما معها ولن أتصل حتى تتصل هي حتى ولو بعد شهر حتى أعرف مدى حبها لي وهل أنا مهم عندها وللا لأ .....وقلت لو حتى اتصلت هى قبل يوم الامتحان عشان تخليني أروحلها لن أذهب بحجة أي شئ حتى تشعر بغلطتها فهل توافقوني على ذلك كبداية لانقاذ شخصيتي زي ما ذكرت لكم . السؤال مطروح أمامكم والإجابات عايزها بأفكار واقتراحات لعمل أشياء تانية بعد كده أستعيد بها شخصيتي أمامها وللعلم .......... أنا لست صاحب شخصية ضعيفة مع الناس لكن أنا كده - أو كنت كده - مع خطيبتي - وكنت فاكر إن ده طبيعي كواحد بيحب خطيبته ومخلص ليها فهل استعادة شخصيتي معها ممكن وللا فات الأوان مستني ردودكم على سطوري السابقة - ومستني المزيد من النصائح والتوجيهات |
أين أنتم زوار الموضوع ؟؟؟؟؟
|
ايوا اعمل كدا لحد ماهي تتصل وتعتذر عن اللي حصل عشان ما تحسش انك ضعيف امامها وامام حبك لها
فتشتاق لك ولسماع صوتك وتكلمك و يمكن هي بتعمل كدا عشان تشوفك هتكلمها او لا .......................... |
أعرف الأغنية طبعا
وبالمناسبة >>>>>>>>>>>> خطيبتى النهاردة اتصلت بي وحاولت تصلح اللي عملته وقالت لي تعالى معايا بكره بعد الامتحان فاعتذرت لها وقلت لها إني عندي شغل فكان لا يمكن أن أقبل أروحلها بعد ما قالت في الأول لا متجيش فألحت عليا وكنت خلاص قربت أوافق وقالتلي مكانش فيه اتفاق مع اصحابي ولا حاجة وتعالى بقى انت معندكش شغل لكن قلت في نفسي أنا مش لعبة في ايديها وحسيت إني لو وافقت يبقى أنا معملتش حاجة وفضلت شخصيتي ضعيفة وساعتها هتقول ( أنا بكلمة أزعله وبكلمة أراضيه ) أنا كان نفسي أروح معاها من الأول لكن بعد ما هى عملت كده حسيت إني ( لعبة ) في إديها وقت ما تعوزها تلاقيها كانت فاكرة طبعا إنها لما هتتصل بيا هنسى الزعل بسرعة وأجري عليها ( كالعادة ) ..... قبل كده .........للأسف !! لكن أنا رفضت أنا طبعا فرحت لما اتصلت لكن أنا عاوز أعودها على إنها مش وقت ما تحب تزعلنى تزعلنى ، ووقت ما تحب تصالحنى تلاقيني مدلووووووووووء عليها أسئلتي لكم أحبائي: ما شعورها هي الآن بعد ما عملت أنا كده ؟ هل هتشعر بغلطتها ؟ أم هتزعل مني عشان مروحتش معاها ؟ وما الذي ستنوي عمله ( السؤال ده للبنات عشان هما اللي حاسين بيها دلوقتي بعد اللي حصل ) والأسئلة العامة هل أتصل بها بعد ذلك لأسأل عنها بعد امتحانها بكره أم أستنى لغاية ما تتصل هي .. وكده كده أنا ناوي إن شاء الله أروحلها الجمعة القادمة بإذن الله كالعادة ) وللا أعمل إيه .. دبروني ومعلش طولت عليكم |
السلام عليكم
انا ممكن اتوقع انها دلوقتى حاسة انك فعلا زعلان وممكن تكون مبسوطة لانك اخدت موقف وما صالحتهاش فى حاجة هى الى غلطانة فيها بس بالرغم من كدة برضو ما تزودهاش اوى يعنى لما تروح لها الجمعة الجاية حاول تفتح الموضوع وقولها انك ادايقت جدا من الموضوع وانة لو اتكرر تانى حاتكون غضبان اكتر وان المفروض ان ما فييش اهم منك عندها وبعد كدة اقفل الموضوع وكون على طبيعتك معاها وانساه خالص بس اقولك واضح ان خطيبتك طيبة والى فى قلبها على لسانها ان ما كانتش بتمتحنك بموضوع اصحابها دة انا راى انك تحسسها بس بانك اخدت موقف بس ما تزودش من الموقف اوى :d وربنا معاك السلام عليكم |
أختى autocade
بصراحة خطيبتي طيبة جدا فعلا لكن أنا عايز أخليها تتوقف عن ما تفعله فهل عند زميلاتي في هذا المنتدى آراء في إحساس خطيبتي دلوقت إيه ؟؟؟؟؟؟؟؟؟؟؟؟؟؟ هل حست بغلتطها وهتكلمنى تاني عشان تصالحنى وللا هتقول مش هتصل لغاية ماهو يتصل بيا أنا عايز أعرف من أخواتي الزميلات بالذات لو أي واحدة فيكم في نفس موقف خطيبتي دلوقتي ( بم تشعر الآن وكيف ستتصرف )؟؟!! |
النسبه لي لو مكان خطيبتك كنت اتكلمت لاني من النوع اللي ما يحبش المشاكل والزعل ودايما احي اصفي الامور بسرعه
واكيد هي حاسه الوقت بزعل بس اكيد برضه مشتاقه لك لانها ماكانتش متوقعه منك كدا |
طب أستنى لما تتصل
وللا أعمل إيه؟؟؟؟؟؟؟ دلونى |
السلام عليكم ورحمة الله و بركاته
صح مائه بالمائه ...... + تذكر هذه القاعده :- المرأه تحب الرجل....الذى يعاملها مثل العجين ......لا يتركها دون رقابه فتقع من يده ....و لا يشدد عليها جدا فتخرج من بين أصابعه لآخر يقدرها كن حنونا دون تسيب و كن حازما دون قسوه السلام عليكم ورحمة الله و بركاته |
فهمت قصدك ..........
شكرا جزيلا لك وفقك الله |
بسم الله الرحمن الرحيم
اخي العزيز انت عايز نصائح مباشره 1- انا كبنت بأكدلك انها بتحبك جدا و انها عارفه انك بتحبها جدا 2- ما تغيرش اسلوبك معاها لانها حبتك بطبيعتك دي ولو اتغيرت ممكن تتصدم وتفتكرك كنت بتمثل عليها 3- حاول تظهرلها شخصيتك القويه من خلال تعاملك مع الآخرين و ان ضعفك ده ليها لوحدها ساعتها لا يمكن تتخيل حياتها من غيرك 4- سبها هي بتتعامل معاك بطبيعتها احسن ما تمثل عليك 5- لو حاسس ان طبعها مش مناسبك ابعد فورا [[ ولو اني شايفه انك هتخسر شخص بيموت فيك ]] 6- بالنسبه لقصه التليفون هي صالحتك فعلا و انك ما تكلمهاش ده هتعتبره قسوه منك وهي خدت عل حنانك اللي يمكن ما لقتوش غير معاك وصدقني حبها كله هيظهر بعد اتمام الزواج لكن هي بتدلع عليك لانك كنت احن الناس عليها وربا يبارك لكم سلااااااااااااااااااااااااااااااااااااااااااام :22: |
شكرا شيماء
بارك الله فيك أنا فعلا ناوي أكلمها النهاردة متتصوريش هي وحشاني أد إيه لكن كله من عمايلها دي لكن أنا مش معاكي في مسألة عدم تغيير الجزء الضعيف في شخصيتي أمامها فهي التي تريد منى اتخاذ مواقف أنا مش بقول إني هغير تعاملي معاها أنا بقول مش هسمح لها إنها تغلط معايا بدون اتخاذ موقف حتى لا أكون أنا سلبيا وضعيف الشخصية وشكرا أزعجتكم |
| الساعة الآن 06:24 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©