|
مشكلة مستعجلة: تعرفت على شاب في التشات ......
اول شي السلام عليكم جميعا، وثاني شي عارفة ان الموضوع مكانه المفروض منتدى المشاكل المحلولة بس ماقدرت اضيف موضوع هناك ماادري وش المشكلة بالضبط..
اتمنى من كل قلبي انكم تساعدوني بمشكلتي وبدخل بالموضوع على طول.. مشكلتي اني تعرفت على شخص من تشات وتطورت العلاقة للمسنجر وقعدنا على هالحال تقريبا سنة ننقطع أيام عن بعض ونشوف بعض، وكانت العلاقة بينا علاقة ضحك وهبال بس وماتتعدى غير هالحدود، الى ان جا الوقت اللي تعرفنا فيه اكثر على بعض وقربنا من بعض أكثر ودخل قلبي ودخلت قلبه وكنا متفاهمين على كل شي واقنعني اني اكلمه وكلمته شهر تقريبا بالبداية كان حريص علي ومهتم فيني اهتمام كبير، ومايبغى يخسرني بأي شكل من الاشكال وكبر بعيني أكثر لكن بعد مده حسيت اهتمامه قل وكنت اعاتبه على هالشي واقوله دايما انت عودتني على شي ماابغى افقده ويتعذر لي بكل مره نفس العذر انه عنده ظروف مع اهله وهمه الوظيفه لانه تخرج من الجامعه ويدور على وظيفة ووده يسافر برا ويكمل ماجستير يعني مشاغل وهموم كثيرة وحاولت اقنع نفسي واتقبل الوضع برحابة صدر لانه معاه حق ينشغل ويشيل هم ويوم من الايام طرى ببالي سؤال قلت بسأله انا بالنسبة له ايش؟ وتتوقع علاقتنا لوين بتوصل؟ وسألته وصدمني باجابته يقولي ماادري الى وين بتوصل علاقتنا بس اهم شي نكون مبسوطين بيومنا وبس !! وتناقشت معاه بالموضوع قلت له انا ماافكر ليومي وبس ولا اعيش ليومي وبس يعني اذا انا احبك لازم افكر اني اتزوجك، رد علي مو كل حب نهايته زواج، قلت بس لازم يكون الهدف زواج يعني اذا مو هدفك انك ترتبط بالانسانة اللي تحبها عمرك ماحبيت !! قالي انا تفكيري منطقي وعايش بواقع مجتمعنا واسألي اي احد راح يقولك انه معاي حق، المفروض نستمر مع بعض ونحط ببالنا انه بنفترق لاني بسافر برا وادرس أقلها سنتين ومافيه اي بنت تنتظر شخص سنتين بدون ارتباط الين يرجع، قلت انت تتكلم بشكل عام وماتتكلم عني، انا مو كذا، اذا انا احبك وابغاك زوجي راح استناك ان شالله عشر سنين قالي مصيرك تطفشين والا تدورين غيري فخلينا زي مااحنا اللحين وماندري عن اللي ربي كاتبه. بصراحة انا ماارضى ارتبط بعلاقة مصيرها معلق والارجح الفراق ولاراح اتعلق بامل شبه مقطوع ومااتحمل ابدا الصدمة، يعني بعد مااتعلق فيه اكثر، نفترق؟ وقلت له نفترق من اللحين احسن دامنا بأول الطريق ولا تعلقنا ببعض كثير، يقولي انتي مانتي عايشة بالواقع انتي عايشه بخيال مافيه واحد يحب وحده ويقولها بتزوجك ويعيشها احلى جو وتسمح له ظروفه انه يسوي كل اللي قالها عليه الا نادر من الناس والمشكله انه يقول ماراح اتزوج قبل مااكمل دراستي ابد ورافض فكره اني بستناه الين يرجع من دراسته يقول مافيه اي وحده تسويها حتى المتزوجه اذا سافر زوجها وغاب مده طويله خانته! ماادري كيف تفكيره وكيف افهمه طفشت ومليت من التفكير مرات اقول بنقطع العلاقة وبننهي كل شي وماراح اتعلق فيه اكثر دام ان الارتباط مو مضمون، ومرات اقول بكمل معاه بس بقعد كل يوم انتظر النهايه هو يقولي انا ماقلت راح اتزوجك وضمنت لك هالشي عشان ماتنصدمين اذا حصل شي ومنعني اتزوجك وماتزوجتك وتقولين لعب علي وماادري ايش، وماتدرين يمكن اتزوجك لاني فعلا ابيك واحبك بس مااضمن لك هالشي.. واللي مجنني وشاغل بالي ماابغى اتعلق بشخص وتكون علاقتي معاه مصيرها مجهول يافراق وياارتباط ساعدوني تكفون احسموا لي الموضوع وربي اسوي كل الي تقولون لي عليه والله ماعندي احد اشاوره من بعد الله الا انتم.. تم تعديل العنوان |
اختي في الله
ترا دا انسان لعاب يتحجج بكلام ماله معنى لو فعلا يحبك ويبغاكي يرتبط بيكي مو لازم زوج ودخلة اقل شي يملك عليكي صدقيني دا بس بيتسلى ولو فكر يتزوج يمكن تكوني اخر وحدة يفكر فيها انهي علاقتك بي ولا تشغلي بالك بي وربنا يرسلك ابن الحلال اللي يخاف الله فيكي وتقبلي خالص تحياتي اخوكي في الله عازف الاحزان |
مررحبا إختي
إختي انا بقولك هالكلام وإن شاء الله تستفيدي الشباب معروفين بالشكل العام كل علاقاتهم مجرد لعب يعني مجرد تسلية يتعرف على بنت الناس ويلعب عليها واخرتها يقول روحي بطريقك إختي إنتي حسب طبيعتك بنت يعني كلك حب ومشاعر الشباب يا إختي والله غير مو مثلك يعني هم فيهم حب لكن مو بكثر اللي في قلبك وصدقيني لو يحبك ما راح يقدر يتخلى عنك اللي يحب يضحي هذا هو الحب هو حسب ما قريت ماله نية اصلا يضحي يعني صدقيني والله حبه لك مجرد لعب وإنه ما فكر بيوم إنه يحبك من قلب مثل ما إنتي تحبيه إختي ما ابي اطول عليك بالكلام الزايد انا برائي تنسيه وتمحيه من بالك تحطي في بالك إنه خاين لانه فعلا هو خاين صدقيني إذا حطيتي في بالك هالصوره له بتنسيه وهو المطلوب لا تحاولي بعد تدوري له اعذار بحكم حبك له هو مكان اللؤم هو خاين ابغى منك تحطي بس هالصوره في بالك ولا تفكري في يوم إنه حبك والله حبه لك مجرد لعب في بنات الناس انا انصحك واطلب منك وارجو منك كل الرجاء تسمعين كلام اخو يبي يحفظ شرف إخته إنسيه إقطعي علاقتك معاه لو مهما صار ومهما حاول إنه يرجع لك لا تعطيه فرصه خلاص هو بين على حقيقته اتمنى منك إختي تفكري بكلامي زين وتشوفي العقل والمنطق شو يقول ما ابغاك تفكري بقلبك ابغاك لما تفكري تنسي إنك تحبيه وتحطي في بالك إنه خاين ولا بيوم حبك تحيااااااااتي ليك مع كل تمنياتي ليك بحياة سعيدة اخوك عاشق الليل |
السلام عليكم
أختي العزيزة ثالث وحدة باختصار الرجال يلعب ويتسلى فيك وحتى لو فرضنا إنه صادق صدقيني إن طريقكم خطأ ونهايته مؤلمة في كثير من الحالات ( ولا تنسين إنها معصية ) إذا تبغين فعلا نصيحة أخت لأختها اقطعي هذه العلاقة فورا وانسيه تماما , قبل ماتحدث أمور لاتحمد عقباها وأنا متأكدة إن كثير من الأعضاء سوف يؤيد رأيي مع دعائي لك بالتوفيق في حياتك والله يرزقك الزوج الصالح اللي يسعدك في دينك ودنياك أختك yala |
عجيبة و الله شو قصة الشات مع بنات هلايام ؟؟؟؟؟؟؟؟؟؟؟؟؟؟
كلام حب و غزل بس لمجرد الحب و بدون هدف ؟؟؟؟؟؟ وين الخوف من الله سبحانه و تعالى سنه كامله و انتي تتكلمي و تضحكي مع واحد غريب و لا تعرفي شنو اخلاقه من وين اصله بس تضييع وقت هذا سببه قلة الايمان و البعد عن رب العالمين هذا الشاب تافه و لعوب و كذاب و ما يستاهل انك تفكرين فيه .... ابتعدي عنه و ارجعي الى ربك الله يهديك و يستر على جميع المسلمات امين يا رب.. |
يا أختي هذا ذئب من الذئاب فاحذريه يريد اللعب بمشاعرك وعواطفك دون أن يفكر بالزواج منك وما سألت نفسك ليش هو رافض الزواج منك ورافض إنك تنتظرينه سنتين حتى ينتهي من دراسته ؟ الجواب واضح هو إنه ما يفكر يرتبط بوحدة تتكلم مع الشباب عبر الشات أو الماسنجر وثانيا هو قال إنك يمكن تخونيه خلال هذه السنتين وهذا هو شعوره الحقيقي الذي يدفعه إلى عدم الارتباط بك لأنه لم يعد يثق بك وسيقول لك : مثلما كلمتني سوف تكلمين غيري وأنا لاأضمنك وربما لو تزوجتك تخونيني ..أنصحك أنهي العلاقة فورا بدون تردد حتى لايتطور الأمر وتروحي فيها والله يرزقك بزوج صالح يحبك وتحبينه ويبي يتزوجك بأسرع وقت وسامحيني
|
اختى لو الرجل يرغب بالزواج من بنت معينه فانه يستميت فى سبيل قبولها وقبول اسرتها
الزواج منه فالرجل لا يدفع الى خطبه امراه وكان واضح معك انه لا نيه له بالزواج بالتالى تركك بين طريقين -- اما ان ترضى باى فرصه زواج من غيره وانهاء علاقتك معه -- اما ان تستمر علاقتكم وغالبا تتدرج العلاقه من شات الى تلفونات الى مقابلات الى معصيه |
السلام عليكم
اختي الكريمة الرجال صريح معاك وقال لك انه يتسلى معاك ويعيش يومه وبس ومو بس هو اغلب الشباب والبنات يتعارفوا لجل التسلية واهداف ثانية والكل عارف انتي اختي مو صغيرة حتى تكوني فريسة لذئاب همهم التسلية واللعب بالمشاعر وانتي عارفة واصلا لو فكر بالزواج لن يختارك لانة راح يقول انك خنتي اهلك وكلمتية وراح تخونية وتكلمي غيرة . اختي انتي ترمين نفسك عليه وهو هدفة التسلية الكاملة فقط وتذكري كلمتة عيشي يومك........ هدا الله الجميع وعقبال ما نترفع عن حب التلفون واللعب عن المشاعر في جميع مجتمعاتنا تحياتي لك |
والله هذا لعاب خطير
|
1+ 1 = 2 ..
هذي العملية الحسابية واضحة جدا ..ومستحيل انين عاقلين فاهمين يتناقشون فيها .. يعني امرك محسوم ..وما فيه اي جانب للنقاش .. مبين عليك بنت عايلة ومحترمه ..وتخافين على نفسك .. اختي ..اتقي الله في نفسك وفي اهلك ..وتركيه عنك ..وهذا من اسلوبه لعاااب .. اول شئ ..انه مقتنع ان البنت ما تنتظر احد ..ولو وجدنا ان البنت هي اكثر وفاء للرجال دائما ..وهو حكم عليك من نظر هقاصره .. ثاني شئ ..حكم على جميع المتزوجات بالخيانة لو غاب عنها زوجها ..وهذا يدل على تهربه وعلى نظرته القاصره ..وانه ما يفهم بامور الزواج والمسؤوليه .. كيف ترتبطين بشخص يفكر بالاسلوب هذا ؟ انا انصحك انك تتركينه وتنتظرين الحب يجيك من الباب ..مو من الشباك .. |
وربي مو عارفة اشكركم لكم كل الشكر واحد واحد من جد ريحتوني بكلامكم قسم بالله انه مرت علي ايام مايعلم فيها الا الله ماادري مين اكلم بمشكلتي الين فكرت اسجل بالمنتدى واتكلم لعل وعسى احد ينصحني وفعلا لقيت عندكم الي ابغاه الله يعطيكم الف الف عاافيه
الله يوفقكم وين مارحتوا ويرزقكم من اوسع ابوابه اااااااامين يارب.. |
الرجال لعاب في لعاب.... وسخيف بعد... طنشيه ولا تعطيه وجه وفتحي عينك على المستقبل المشرق.. وخليه يلعب على نفسه... أنا شاب وأعرف الشباب .. هذا من النوع اللي يحب يضحك عالبنات.. يخليهن يحبنه عشان يلعب بمشاعرهن بعدين.. أنا أعرف وأساليني عنهم... وشكرا
|
يابنات,
ترى الرجل الذي ينوي الزواج لايبحث عنه في الشات, بالله عليكم وين عقولكم, كل الرجال الذين يدخلون الشات همهم الوحيد هوالتسلية |
مرحبا
من خلال كلماك انك لا تحبين كثير بس يا اختى كم فتاة ضاع شرفها من خلال التعرف على شباب من خلال الشات وانت فتاة والبنت اي كلمة او حرف يوثر على سمعة الفتاة يا اختى انصحك بأبتعاد عن هذا الشاب، لو كان يردش او يرغب فيك لكان تقدم لكي مند البداية ولا داعي للسفر وشكرا للتعاونكم سوسو |
هو نظرته الي يحاول يقنعني فيها انه ماراح يعشمني ويقولي بتزوجك ويجي مانع ويمنعه من الزواج فيني سواء الاهل او غيره يعني يقول خلي الامور تمشي مثل ماربي كاتبها، والزواج في الوقت الحالي مايفكر فيه ابدا لانه مو متوظف ويبغى يكمل دراسته يقول بدري عليه
قلت له لاتفهم اني بتزوج اللحين بس ابغى يكون الهدف من العلاقه الزواج وبس لانه بنظري اذا ماكان الهدف زواج مايكون حب حقيقي ! اللي ابغى افهمه هل انا بنظرتي صح والا خطأ؟؟ |
انا اشوف ان الولد صريح جداً معاها .. مادري كيف خليتوه ذئب بشري وشوي تخلونه من الفئة الضالة :d
صحيح ان العلاقة كلها غلط لكن هو واضح جداً معاها وماوعدها بالزواج ولا غيره وهي اللي طلبت الزواج وعطاها رأيه بشكل صريح .. وين المشكلة ؟ :25: الاخت ثالث وحده : نصيبك مكتوب لك .. انتظريه لأنه بيجيك إلى حدك بدل البحث بالشات وغيرها وخلي ثقتك بالله كبيرة . سلام |
إختي مشكلتك منتشرة كثير وهو أن الشخص يتعلق بسرعة ويهدي قلبه لأي إنسان بأسرع وقت دون تفكير وإختبار.؟ مأقصد التجريح لا هذي مشكله نعاني منها كثير في حياتنا.
بالنسبة لموضوعك يمكن إنتي حبيتي الشخص هذا وتعلقتي فيه .بس من كلامك الشخص ماوعدك بشي يعني (ماقال إنه زوج المستقبل). بعدين حاط لعلاقتكم نهاية وهو بسفره لتكملة دراسته يعني علاقتكم صداقه بس. وهذي نصيحة لنفسي و أقدمها لك ولك الناس (مابني على باطل فهو باطل) يعني علاقتك ماكانت صحيحة وتعلقك غير مشروع وبعدين الأهم من هذا عدم تحكمك بمشاعرك ولازم تفكري بعقلك مو بقلبك. وأفضل حل هو ترك هذا الشخص وإشغال وقتك بأشياء ثانية تفيدك بدنياك وأخرتك. وإبعاد أي شي يذكرك فيه وإحنا بشر ومافيه أحد منا معصوم من الخطأ. وأتمنى لك التوفيق ........ |
((((((( قالي مصيرك تطفشين والا تدورين غيري )))))))) هذا الكلام اللي قاله لك حبيبك المزعوم ... هذي الجمله حطيها في بالك زين مازين قال لك تدورين على غيري يعني هو ماخذ عنج فكره انك كل مرة مع واحد يعني اليوم كلمتيه هو وباكر بتكلمين غيره وهذي الجمله دليل على انه مستحيييييييييييييييييييييييييييييييييييييييييييييي يييييييييييييييييييييييييييييييييييييييييييييييييي يييييييييييييل انه يفكر يرتبط فيك والله انا مستغربه من بنات هاليوم كيف تطاوعهم نفسهم انهم يكلمون شباب المهم انا ما بزيد على كلام الاخوان الله يجزيهم الف خير نصايحهم كفت ووفت بس انا الكلام اللي بقولك اياه ...... اتمنى انك تنفذينه
كل ما وسوس لك الشيطان ويا في بالك انك تكلمينه روحي اقري قرآن احسن لك صدقيني والله راح ترتاحين ... ونحن لو ما نحب مصلحتك اصلا ما نصحناك ..... الله يوفقك |
عزيزتي
هذا الرجل لا يفكر بما تفكرين ولا يشعر إتجاهك بما تشعرين ولا يحمل نية صافية كما تحملين ولايريدك زوجةماعاش أبدا فكيف تثقين؟؟ هذه لعبة يلعبها الرجال الذين لا هدف لهم في الحياة وكم هو سهل للغايةأن ينطق بكلمات تفيض ودا وعشقا وغراما وكم هو سهل عليه أن يكذب بأنه يريدك ولايقدر العيش بدونك وكم وكم..... أختي أفيقي من هذا الوهم أفيقي وأتركيه ولا تربطي قلبك لشخص لا يستحق ولا تطلقي مشاعرك لأي شخص قبل أن يربط بينكم شرع الرحمن نصيحة صادقة من قلب مخلص ( إنتبه إيها القلب..) وقد أخطأتي عزيزتي بأن سمحتي لنفسك أن تحادثي شاب غريب عنك أو حتى تحاوريه كتابةأنصحك بالإبتعادعن هذا الطريق فهومليء بالمعاصي والذنوب أشغلي وقتك بما يفيد حبيبتي ولا تضيعي عمرك فيما هباءفلنا حساب غداعند رب العالمين وفقك الله عزيزتي |
[QUOTE=د.بطاطس]انا اشوف ان الولد صريح جداً معاها .. مادري كيف خليتوه ذئب بشري وشوي تخلونه من الفئة الضالة :d
لا ياأخ دبطاطس هذا من أخطر الذئاب البشريه وهذه إحدى أساليبهم. |
اختي الحبيبة ادعو الله ان يفرج همك ويبن لك الصواب اعرف موقفك واقدره لاني ممرت بتجربة فاشلة كنت مخطوبة لثلاث سنوات وانا اعيش احلى ايام ولكني صدمت بالواقع وانه اناني ولا يفكر غير في نفسه وانصحك بان تتركيه رغم صعوبة الموقف اعلم ولكن ضعي رضا الله نصب عينيك وان الله سوف يعوضك خيرا وان من ترك شيئا لله عوضه الله بافضل منه وللاخوة الذين ذكرو بان الفتيات يقمن العلاقات الغير مشروعة بحثا عن الزوج هذا غير صحيح هم من يبدا وكون الفتاة رقيقة وصادقة في حبها ومشاعرها ولا تخون من احبت مهما حصل وانها مستعدة لان تنتظره طوال حياتها لو حقا كانت له ظروف تمنعه من الارتباط ليس لكونها تبحث عن زوج والسلام ولكن لصدقها الذي قلما يوجد بين بعض الشباب للاسف ويضنون ان كل الفتيات لاهيات غير مباليات يسعين ورا التسلية الغير مشروعة وحسب
اختي استعيني بالله وهو حسبك وسوف يعوضك خيرا ان شاء الله انصحك بعدم الاستمرار معه اذا هو صارحك من البداية وصدقيني هو الخسران لانك افضل منه وتستحقين لافضل |
حبيبتي موقف الشاب واضح لا يحتاج الى اي تبرير انسيه ولا تفكري فيه والله يرزقك بابن الحلال
|
| الساعة الآن 08:30 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©