السلام عليكم ورحمة الله وبركاته
بعد التحية المعطرة
أنا كنت جالس مع واحد من زملاء الدراسة سابقاً وهو متزوج من سنه ونصف
فإستغربت إتصل لي على الجوال وقال لي أنا لازم أشوفك بأسرع وقت
بصراحه خوفني كان متصلي الساعه 11 بالليل وقال لي لازم أشوفك غداً
فلما تقابلنا
بعد التحية والمقدمات
قلت له : ها يابطل أخبار الزواج معاك ان شاء الله مرتاح
كنت عارف انه في شيء من هذا النوع قلبي كان حاس
فقال لي :
ياأخي أنا متزوج من سنه ونصف والحمد لله زوجتي مش مقصرة معاي ولا ترد لي طلب بس مش عارف ليه أحس بملل كبير من الزواج ولما أرجع البيت يبدأالروتين اليومي ، أحس انه دخلتي البيت صارت روتين
وقال لي : ياأخي حتى حقي الشرعي صرت أمل منه قمت أقوم به بس لمجرد انه واجب صحيح إني أشبع غرائزي وأباشر رغبات زوجتي ، بس ملل رهيب يتملك حياتي معاها .
ماراح أطول عليكم مسكت القلم والورقة وبعد عدة أسئلة ومناقشات معاه وكنت أدون ملاحظات مهمه علشان أعرف ايش اللي مطلوب أقوله وأعرف وين مكمن الخلل .
لكم تتصورون إلى أي نتيجة وصلت وإيش اللي تبين لي .
=== ، === ، === ، === ، === ، === ، === ، === ، === ، === ، === ، ===

طبعاً هذا الرجل اللي هو صاحبي صارحني بأمور كان يعملها قبل الزواج الا وهي ( على فكرة مش كثيرة ) :

كان يكلم بنات وتقدرون تقولون راعي غزوات ونزوات عاطفيه
كان يكلم هالبنات ويقضي أحلى اللأوقات معاهم وهذا ماكن يتصوره فكان يروح معاهم البحر ويلعب معاهم ويرقصم ويرقص معاهم ويلاعبهم ويتصارع معاهم ويسهر معاهم ويقوم بأعمال معاهم شبه طائشه مثل انه يسهر معاهم بالليل ولا يسبح معاهم في البحر ولكم تتصورون وتحطون كل اللي في بالكم من أفكار .

ولما تزوج ترك كل هذي الأمور وتقدرون تقولون تناساها ولا كان يطلع مع زوجته غير السوق وبيوت الأهل وأماكن محدودة مثل المطاعم ولا مستشفيات مثلاً
وكان دايماً يتحجج بأنه هذي زوجته وعيب تنكشف على الناس وحرام هذا الكلام ولاكان حتى يسبح معاها في البحر ولا يلاعبها ولا يلاطفها ولا أقل الأمور مثل يطلع يتمشى معاها في السيارة
كانت مجرد حياة ميته مش أكثر من واجبات متبادلة بين الزوجين .

أنا إندهشت بالفعل قلت سبحان الله لحد الآن ناس تقكر بهذي الطريقة
قلت له : ياولد الناس أعمل مع زوجتك اللي كنت تعمله مع رفيجاتك قبل الزواج .
قال : لا يا أخي صعبه .
قلت له : جرب انت مش حرام ولا عيب وهدية مني لك شاليه محجوز بأسمك انت وزوجتك وأعمل اللي بأقولك عليه مارس يوم كامل معاها على أنها رفيجتك بس راعي الحلال والحرام وأرجعلي .

بعد يومين بس رجعلي ، والله ماتتصورون كيف صار 180 درجة متغير ، حتى نفسية زوجته متغيرة .

ولاحظوا ياجماعه الأمر ماتطلب شهور فقط 24 ساعه مخصصة لإسعاد الزوجه كانت كافية لتغير مسار حياة .
وللأسف هذي مشكلة كثير من الشباب يعيشون حياتهم ويمتعون نفسهم ولكن بالحرام مع بنات مايربطهم بهم غير الحرام .
ولما تجي هالزوجه المسكينه اللي في بالها انه الزواج قمة السعادة والإستقرار والهناء ، تنصدم بزوج واضع لها سد منيع من الممنوعات والمحظورات فبالتالي يصبح عند هالزوجه المسكينة كبت رهيب وقتل لحريتها وطاقتها ونرجع لنقطه مهمه وتصبح مشكله تقتل فن الأبداع عند الزوجه لتتفانى في ارضاء زوجها ، وتكون انت السبب يا الزوج .

انا اقولكم اياها وهذا الكلام موجه للشباب فقط :
ياأخي الفاضل لاتمنع زوجتك عن شيء في حدود الحلال خلها براحتها تعمل اللي تبيه ، لعبها غنيلها دلعها غازلها تصارع معاها اسبح معاها في البحر
حتى لو تلبسها ملابسها الداخليه . هذي زوجتك ماأحد راح يحاسبك
بس لاتخلي الكبت يتخلل الحياة . هذي مشكلة كبيرة .
فلا توهم نفسك انه اللي تقوم به حرام ، الا حلال وأحلى حلال بعد فحاول توسع إدراكك ياعزيزي الفاضل .
فوالله الزوجه مثل الجوهرة المكنونة محتاجه بس من يهتم فيها وينظفها من الهموم دوم فكلما زاد التنظييف زاد البريق
وسامحوني على الإطالة


أخوكم
ابوالسنونو

السلام عليكم ورحمة الله وبركاته
إخواني وأخواتي الفاضلين والفاضلات
بصراحه أنا كتبت هذي المشاركة وماتوقعت انه ماشاء الله كل هذي الردود بتنهال علي بالشكر والثناء
وهذي أغلى هديه بصراحه جزاكم الله الخير الكثير فرحتوني عسى الله يفرحكم
ولا يضركم
وإن شاء الله أشوفكم متوفقين جميعا
أخوكم
ابوالسنونو