|
شفت وحده تحضن زوجي
مرحبا
ادري من زمان ماغثيتكم بمشاكلي ، لااني اتبعت اسلوب طنش تعش فتنتعش اما هالمره واصله حدي يااهل الخير اسمعو اش صار رحت مع زوجي المول نشتري لبسات للعيال مع اني ماكنت حابه اروح بنهار رمضان بس لاان ذاك اليوم معزومين بلجامع وزوجي عنده فراغ وتو داخلين الا اتشوفه وحده من اللي يشتغلو معاه وتقوم تحضنه انا انفجعت وزوجي ارتبك ولا كملت معاه ورجعت البيت بروحي وهوه بروحه اللي اشترالهم ولمن رجع البيت صرت طول الوقت ساكته لااني قبلها بكيت شبعتي ماتوقعت يوم انحط بهالموقف وسئلتها مين هادي انا قلت بنفسي يمكن من زمان مااشتغلو مع بعض ولمن شافته سوت كدا وهدول الاجانب كلشي عندهم عادي والشي الثاني اللي اتوقعته زوجي يبعدها او يتاسف لها باددب خصوصا انه صايم بس طلعت وحده اخر مره من شافها من يومين بسس ولا وقالي هدا صيامي وانا ربي اللي بيجازيني فيه وطلع مو اول مره ينحضن فيها طلع متعود وانا قبل فتره بس مكلمته بهدوء انه مايركب حريم بسيارته لاانه ياخد وحده ويتنقل معاها مابين المباني وتكون المسافه بعيده حوالي الثلث ساعه ووقتها ماتهاوشت بس فهمته اللي يسويه غلط واليوم انفجع بهالموقف المشكله انو مو مشتهيه اطلع في وجهه احسه اصغر بنظري كثير ، مااانكر انه جا وحاول يراضيني بس وش الفايده مو مشتهيه حتى انا على سريري معاه خدت مخدتي ونمت بغرفة الاولاد المشكله يعتبر اللي يسويه شي عادي والمفروض ماازعل وطبعا اذا يبغا يسكتني يقولي انتي تغاري اخاف اكرهه من جد الله يخليكم اكتبولي شي نصيحه لااني الى الان مو مشتهيه حتى اطالع بوجهه والله لو مارعيت ربه فيه ماكنت نبهته للسحور |
انا بصراحه لما شفت العنوان حسبت انك راح تحكي عن حلم بس الظاهر انه كابوس
اختي الظاهر ان زوجك متحرر كثير و طبيعة شغله مع الاجانب زادت من تحرره طبعا انت من حقك تغري و تغضبي لانه الي حصل مو شوي و المفروض انه يتاسف على الي صار الين ما يرضي غرورك ولازم انك تستغلي شهر رمضان و تحاولي تقوي الوازع الديني عنده و تهديه الكتب الي تتكلم عن الاختلاط و الاهم من كده انه يكون حاسس ان الي حصل غلط مو بس يتاسف عشان يرضيك |
لاحول ولاقوة الا بالله هذا ما جنته يد الأختلاط ...
|
الرجاء عدم التعميم في الطرح والحديث عن فئة معينة او دوله معينة بهذا الشكل غير مقبول وفق الله الجميع VIP2992 |
اللي يقهر ويعل الكبد اني يبينلي انه عقلي صغير وماافهم وهذا اللي اسويه جنون وانا ملليت من كثر مااصبر وزوجي مو صغير
|
ربنا يلهمك الصبر على مثل هذا الزوج , ففى الصبر مفتاح الفرج ولاتساليه هذه مين او تعرفت عليها فين , لو عنده احساس هو حايخبرك بكل شئ .
وان شاء الله ماتكدر عيشتكم شئ . ولك نحياتى ابوعمار ان شاء الله تكتب هكذا VIP2992 |
قولي له لو تشوف واحد يحضني وش يكون احساسك !
بصراحه الله يعينك عليه من جد قهر ! |
شكرا ابو عمار هوه لمن اساله يقول هادي فلانه ومحترمه ولا هادي فلانه واشتغلت معاها كم سنه
بس مو معناتها اتوصل لهالحد يركبهم معاه ويحضنهم هدا غير المسخره والمزح وتلفونه الجوال كم مره يفضحه وهو يمزح مزح وسخ معاهم والله انا صرت ادعي ربي وادعي الله يهديه مااانكر الله يجازيه كل خير خالو ريان كتب مقاله عن الغربه والمغتربين وحطيتها كانها باك قراوند وجا وقراها واحس الحمدلله من بعد ثلاث سنوات مضيع صلاته الحين صار يلتزم فيها وحتى مره قلتله هدا اللي اتسويه مايجوز والله كثير انت لو اتشوفه كيف يتكلم معاهم بلتلفون لمن يتصلو عليه لمريض اتقول هدا يكلم بنوته ام ثلاث سنوات من كثر ماينعم صوته ويدلعه والله لاعت كبدي فوق اني اهلي مانزلت علشانه لسنين ماشفتهم حتى بس هوه يكمل دراسته ويخلص فوق هالقهر اللي اشوفه منه وقلتله الف مره لاتتميع معاهم تعرفو ويش يرد علي رفقا بلقوارير قسم بلله انا من غير شي لمن اقعد بيني وبين نفسي اتذكر الاشياء اللي يسويها من قبل تلوع جبدي واحس ذاك اليوم مااشتهي اطلعه حتى احيان يوسوسلي الشيطان اسوي مثله علشان بس يحس وارجع استغفر ربي |
اختي اسيل اقوله طبعا ينقهر ويستنكر
ولمن اقوله اجل اشلون انا؟؟ هوه حبيبتي ضامن مااسويها لاانه كم مره وقدامه انكون بمحل ملاهي كبيير ضخم مليان ناس يمدو رجال ايدهم ولااسلم فهو غاسل ايده من هالشي حتى لو قلت لو لو ولو |
أنا ودي أعرف الجنسية لك ولزوجك حتى أعطي رأيي في الموضوع فلكل بلد أسلوب يخاطبون به .أرجو معرفة من أي دولة أنتما
|
ليش اخوي الشرقي هوه الحرام حرام عاد عندنا لو بمصر لو لبنان
مدام احنا مسلمين فالامر واحد وعلشان ارضيك اقولك احنا سعوديين بس احسه مايفرق الغلط غلط عاد عندنا لو باي بلد مسلم ثان |
الله يخليكم شورو علي ماابي اضيع مستقبل اولادي :(
|
لهذي الدرجه
الله يكون في عونك من شاف مصيبة غيره هانت عليه مصيبته ... آآسفه بس هذا الي طلع مني والله يكون في عونك يبقى الدعاء له بالهدايه ........... |
اختي الكريمه هاشم
ارجو منك بكل اخوه وعفويه ان تتقبلي رأيي ولا اريد ان ازيد جحيمك جحيما وقلقك كارثه لا سمح الله . اختي الكريمه مجال الطب واسع جدا وفيه اختلا ط بكل معاني الكلمه ولكن هناك نقطه صغيره جدا لو لم يسمح زوجك لهذه الاجنبيه بان تحضنه من قبل لما حضنته بالسوق وامامك ؟؟؟؟؟؟؟؟ فعذرا منك الظاهر ان زوجك متحرر جداااااااااااااااااااااااااا ولكن هل تحرره بحسن نية املا فالله اعلم ممكن انتي تعرفي زوجك اكثر هناك رجال وبكل اسف يحبون الاحتكاك والمزح بالنساء وخاصة الاجانب ولكن الى مدى بسيط فقط ليحسسهم بالصداقه او غيره او لطبيعة هذا الشخص هو هكذا وهناك رجال لا ختلطون بالنساء ابدا ولا يتكلمون معهم ولكن في الخفية الله اعلم وهناك من يتكلم معهم بالعلانية والخفيه وهناك من لا يتكلم معه لا بالخفيه ولا بالعلانيه ولكن اختي الكريمه ارجو ان تنظري الى هذه التجربه القاسيه التي تعرضت لها برويه وعدم التسرع ففمكن ان يكون زوجك فقط من باب الصداقه او هي طبيعته هكذا لا ياخذ بها شيء او حتى الاجنبيه التي حضنته ؟؟؟؟ بالرغم من انها قاسية عليك ولكن من اجل عائلة يجب ان لا نتسرع بالاحكام وبالقرارات وصارحي زوجك واسأليه عن مدى العلاقه التي تربطه بها وهل هو طبيب وهي ممرضه ففي هذه الحاله يجب ان يكون هناك حاجز ولكن زوجك للاسف ازال الحواجز؟؟؟؟ |
اختي الحبيبه ام هاشم لاتزعلي نفسك حبيبتي واهدي وصلي على رسول الله
شوفي حبيبتي انا في الغربه مثلي مثلك اقسم بالله اني اشوف الهوايل وكم من مرة صارت لي مشاكل مع زوجي اشوف هنا الحريم عندهم كل شي عاااااااادي ويحبو لمن يسلمو على احد وبالاخص الرجال يلصقوا فيه لصقه وبالاحضاااااااااااااان ( يعني الموضوع عندهم طبيعي جدا ) تصدقي حتى اخي الصغير اللي عمرة 22 سنه معاة وحدة تدرس لغه عمرها قد امي ( الله يذكرها يالخير والعافيه ) تصدقي انها متصورة مع اخوي وهي حاضناه حضنه استغربت جدا يوم شوفت الصور بس اللي اتضح لي ان الموضوع عاااااااااااااااااااادي بالنسبه لزوجي ياحبيتي انا عندي جارة اجنبيه مطلعه لي روووووووووحي تخيلي ان زوجي يدرس في الكمبيوتر وهي مطلقه تقوم تتصل بكل وقاحه في وقت متا خر توقل لو سمحتي ممكن تخلي فلان ( اللي هو زوجي ) يجي يصلح لي الكمبوتر الان لانه اتعطل تخيلي ايش بيكون ردة فعلي طبعا انا اعرفها وهي تعتبر صديقه للعائله ولكني بصراحه مارتاح لها خاااااااااااااااااااااالص ويقوم زوجي يقول( عيب لازم اروح لان هذي المرة خدمتنا وساعدتنا كثير يعني عادي الموضوع مافيه شي وانتي فيك وسواس وهنا الناس عقليتهم مو مثل عقلتنا كل شي نفكر فيه بالغلط ) :eek: طبعا بعد مشاكل كثيرة بطل يصلح كمبوتر لاحد بعد تهديد ووعيد مني انا طبعا حبيبتي مراح اكلمك عن الحلال والحرام لان هذا الكلان مفروغ منه بس اللي احب اقولك عليه انه مو معناة انه يحضن وحدة يوم يشوفها بالشارع او اي مكان هذا مهناة انه على علاقه غير شرعيه معاها ( لاقدر الله ) ولكن اتضح لي مؤخرا ان الموضوع لايخلو من المجملات ومجاراة اهل البلاد بعاداتهم القبيحه ادعي الله بالهدايه لزوجك وادعي انكم تروحوا على بلادكم قريب مثل ما اعمل انا لاني اعتقد الحل الوحيد هو الخروج من مثل هذة الدول المشؤمه الى الابد اسال الله لك ولي وللجميع الله يجعل السكينه في قلوبنا اختك ام مجيد |
اشكرك اخي الكريم بلوبيرد
انا اعلم ان مجال الطب مجال فيه اختلاط الكثير ووالله العظيم ماامدح نفسي غيرتي اعتبرها ولاشي قدام غيرة الحريم الثانين وانا سالته البارحه شكلها مو اول مره تحضنك قالي انا قلتلك هدا الطب وكلامك صحيح جدا ، اتخيل هادي اشتغلت معه شهرين بس وكدا يتعاملون فمابالك بلباقي اللي لمدة خمس سنين ايشوفهم اكثر من ان يشوفني يقولي المفروض ماتغارين طلعي شكلي هدا شكل ينغار عليه!!!!! ردوده عجيبه غريبه لايتقبلها لاعقل ولامنطق (هناك رجال وبكل اسف يحبون الاحتكاك والمزح بالنساء وخاصة الاجانب) هادي الجمله تنطبق عليه تماما والقهر مزح مزح هوه مايمزحه مع خواته مشكلتي صرت اكره وهذا الي ماثر علي مو طايقته وبنفس الوقت ماابغى اضيع اولادي اولادي مايتكلمو عربي ولمن ارجع لازم اقلها سنه او سنتين بحطهم مدارس خاصه اما هوه على كثر مااحتج وافهمه اللي يسويه غلط فقدت الامل فماادري اتشورون علي اتصل بااهلي واقولهم دمعتي ماتنشف احس بلظلم والقهر ومو عارفه اركز بشي الله يعلم بهالخمس سنين طلعت روحي صحيح يسوي مصيبته ويقوم يراضيني وانا ارضى صحيح بعد فتره بس ارضى ماابغى اخرب بيتي ويتششتتو هالصغار هوه بنفسه يقولي انت قاعده تتحمليني اقوله اتغير لاحسن علشان ماتعب منك والله اولادي مو متعبيني قدماهو متعبني |
اخت ام ماجد هون الله عليكي
انا والله مهونه اشياء كثيره مايعلم فيها الا ربي بس وصلت ان زوجك يتصل بوحده قدامك ويضحك وينعم صوته بدون سبب للاتصال؟؟ وصلت يركب بنات معه بلسياره بحجة مشوار طويل ومايحتاج كل واحد يروح بسيارته وصلت بزوجك يمزح مزح وسخ مع الحريم؟؟ وصلت بزوجك يستحي من حجابك ؟؟؟؟ وصلت فيه ماحبيت اكل بروحي فرحت ناديت فلانه اتاكل معاي؟؟ وووو ...... |
انا ادري ومتيقنه مايقيم علاقات غير شرعيه (هادا اللي ناقص)
بس تجاوزاته مو معقوله وانا مااتحملها مع اني اتحملت كثير بس الحين مو قادره |
اختي ربنا يخفف عليك ، اعتقد لا بد من وضع حد لتصرفاته المتمادية والمستهترة بالدين وبمشاعرك ، فهذا ما اتضح من ردك الاخير وخصوصا ( مزح وسخ مع ا لحريم ) كما تقولين.
|
السلام عليكم ورحمة الله وبركاته....
اختي الكريمه... ازاح الله همك.. لاشك عندنا بخطأ سلوك زوجك في حق الله...وفي حق نفسه ..وفي حقك انت..وهو ان دل فبكل وضوح يدل على قلة الدين والاستخفاف بمسؤولية الاخلاق والقيم... واستمري بالنصيحته ولا تيأسي لانه من كلامك الاخير يتضح ان لديه شعور بسيط جدا جدا من الاحساس بالذنب فنمي هذا الشعور بالاساليب المتنوعه... ولا تنسي ان الانسان يتصرف ويتعامل بما تربى عليه في صغره عند اهله فراعي ذلك.... واين انتي من الدعاء لاتستبعدي ذلك فالقلوب بيد الرحمن وقادر على هداية زوجك...والان نحن في شهر فضيل لديك فرص استغليها بالدعاء ... وفقك الله... اختك معالم |
الاخ / الاخت ( الزحيف ) كيف نفاضل بين ما يفعل ذلك الزوج من امور محرمة وبين زواجه بالحلال ؟ !
وكيف تتوقع من الاخت الشاكية ان تعتبر ما يفعله زوجها مجرد لهو ولعب ؟! وهل في الامور التي يتم فيها التعدي على حدود الله نقبلها ببساطة هكذا ؟! لا ليس الاهم هو انه لم يتزوج عليها ، لأن الفرق واضح بين الحلال والحرام. |
اختي الكريمه بتول
الله يعلم كم احترم رايك وشكرا جدا لكي |
اختي الكريمه معالم الله وحده يعلم كيف ادعي بكل وقت ان كان وقت صلاة لو وقت اذان لو وقت مطر والله حتى طريقي للجامعه ادعيله
هوه متاثر كثير بهالبلد مع انه تربيته تربيه ملتزمه وبلعكس هوه من عائله حتى القصير والعاري اليدين بلمناسبات ممنوع وهوه كان بفترة شبابه الاول ملتزم وكان من المنظمين لمجالس الفقه للنساء والرجال حتى اقوله اشمعنه انت مغتر فيهم هدا انا كنت عايشه هنا مع ابوي وامي فتره بهالبلد حتى بنفس المدينه وبلعكس ابوي كان مو شديد كثير معانا بس ربانا على الغلط والصح والحمدلله عقلنا براسنا وعرفنا الصح يعني تربيته مو السبب انا الى الان ماحد قالي كيف انزع احساس الكره اتجاهه ومن ناحية الدعاء ان شاء الله مااياس واظل ادعي لينما ربي يفرج عني انا مادري يجوز لي ادعي على اللي قالله ونصحه ان يحاول يدمج روحه بلبلد والله احس هوه السبب بدل ماكان نصحه ان يحافظ على صلاته ويخاف الله في زوجته المشكله احس لمن اقوله كلا من رئيسك هوه اللي نصحك هالنصيحه قبل لاتجي اهنا كانه والله العالم يتمسخر لاان بنصيحته واندماجه كتبو فيه احسن التقريرات لاانه شغال ومحبوب من الكل الا كم واحد متخانق معهم واللي زاد الطين بله كان معاه واحد من نفس بلدنا ماكان يسمع كلام رئيسته لاانها وحده وماكان يمزح مع الحريم فقالو عنه ثقيل دم ماعنده اخلاق ووقتها... مسخرته مع الحريم وهالضحك بينهيه اول مايكتبو فيه التقارير علشان يضمن بس الظاهر هدا طبعه صار |
اسمعي هذا لازم تأديبنه ! وماتفوتين له هالحركات بالساهل لازم يعرف انه غلط عليك وغلط كبير وصعب يغتفر! ازعل عليه ! واحقريه ولا تكلمينه الين ما يعتذر ويعاهدك بقسم يحلفه امام الله سبحانه انه ماراح يسمح للمهزله هاذي تحصل ! والا مالك الا حلين ! ياما تصبرين وتحطين اعصابك بالثلاجه وتطنشين او انك تتركينه للابد ! هذا انسان مايحترمك ولا يحترم وجودك ! وانتي منتي ملزومه تعيشين مع انسان مايحترمك !لان المفروض تكوون عندك كرامه !
وانتي بنت ناس وراك اهل ! مو ماخذ وحده من الشارع عشان تستحمل هالاهانه او انه مايتشرف فيك ولا في حجابك ّ! خليك قويه وراح يركض وراك صدقيني اهم شي تخليك حازمه ! وتوصلي معاه لحل للمسخره هاذي ! |
بصراحه أختي الله يعينك و هذا شكله ابتلاء كبير من الله عز و جل
من وجهة نظري اعتقد انك بحاجة الى ان تعتبري هذه المصيبه معركة فاصله بينك وبين الشيطان ( لا تفهميني غلط فأنا لا أقصد بالشيطان زوجك لا سمح الله وانما اقصد به هذه العادات الغربية الفاسدة ) اعتقد انك اذا فعلت ذلك سوف تحسين بطاقه تحدي جبارة تستمدينها من قوة ايمانك و خوفا من ان يفوز عليك الشيطان وستنتصرين باذن الله تعالى :o لا اقول لك بانه موقف بسيط بل انه موقف تعجز عنه كل زوجة فيما لو كانت مكانك فعليك يا عزيزتي بتلاوة القرآن الكريم حتى يشحنك بالطاقة التي تدمر كل ماهو باطل وانصحك انه اذا كان موجود تشغلي المسجلة بتلاوة للقرآن الكريم واختاري الآيات التي تحث على التقوى وغض البصر والثواب والعقاب ( وكل سور القرآن وآياته هي نور و هدى للعالمين ) وانت قلت انه كان يحضر مجالس فقه للنساء والرجال ...جيبي له بعض الكاسيتات اللي عن هالموضوع او بعض الكتب او حتى خليه يحضر بنفسه لمجلس ديني من هذا النوع لان اللي اعرفه ان المراكز السلاميه منتشره في كل مكان حتى في الغرب حاولي اتحببيه بجلسة البيت لان هذا الشئ الوحيد اللي بيبعده عن الاجواء اللي هو عايش فيها ( قد ما تقدرين ) وان شاء الله يبتعد عن كل هذي الامور ان شاء الله تعالى وبالدعاء تفرج الكروب هذا كل اللي عندي وما اخبي عليك انا لما قرأت الموضوع خفت واجد لأن زوجي حصل على بعثة دراسه بره عالسنه الجايه ولكن ما اقول الا الله يهديهم كلهم وان شاء الله نسمع منك اخبار حلوه عزيزتي :) |
شكرا اسيل اننك طيبه واتفاعلتي معاي
المشكله الحقران هالمره جاي طبيعي يمكن كل مره اسوي حالي ثقيله اشوي بس هالمره من جد مو مشتهيه اطالع بوجهه . |
اختي عين الشمس بلفعل احسه ابتلاء
واحنا هنا مافيه كاسيتات متوفره وهو عارف اللي يسويه غلط مافي احد سواء امراه او رجل يتحمله بس كانه مسحور فيهم لازم يسوي اشياء ترضيهم احسه ضعيييف ومايعتمد عليه والشي االلي يقهر اننه يصلي وصلاته ماتنهاه عن هالشي ولمن انكون معاه بلسياره يقرا اجزا من دعاء حتى والله احس صوته نشاز يردد بس مايطبق انا مادري هالمره اتصل واقولهم ولا شو؟؟ وعزيزتي لاتخافي انا معاي يدرسو شباب عرب مسلمين وعزابيه بعد قمه بالادب والاحترام مع انه البنات حولهم مثل النمل من كثرهم يابنت الحلال المحترم محترم وين ماراح بس نصيحه اذا تقدرين تروحين معاه روحي الله يوفقكم يارب |
الرجاء عدم التعميم في الطرح والحديث عن فئة معينة او دوله معينة بهذا الشكل غير مقبول وفق الله الجميع VIP2992 |
الرجاء عدم التعميم في الطرح والحديث عن فئة معينة او دوله معينة بهذا الشكل غير مقبول وفق الله الجميع VIP2992 |
هذه نتائج الاختلاط في دور العلم والعمل و قد بيناه على هذا الرابط http://vb.66n.com/showthread.php?t=11852 -------------------------------------------------------------------------------- وان من المُحرمات التي استهان بها الناس مصافحة الأجنبية : وهذا ما طغت فيه بعض الأعراف الاجتماعية على شريعة الله في المجتمع ، وعلا فيه باطل عادات الناس وتقاليدهم على حكم الله ، حتى لو خاطبت أحدهم بحكم الشرع وأقمت الحجة وبينت الدليل اتهمك بالرجعية والتعقيد وقطع الرحم والتشكيك في النوايا الحسنة … إلخ ، وصارت مصافحة بنت العم وبنت العمة وبنت الخال وبنت الخالة وزوجة الأخ وزوجة العم وزوجة الخال أسهل في مجتمعنا من شرب الماء ، ولو نظروا بعين البصيرة في خطورة الأمر شرعًا ما فعلوا ذلك . قال المصطفى صلى الله عليه وسلم : [ لأن يطعن في رأس أحدكم بمخيط من حديد خير له من أن يمس امرأة لا تحل له ] ، ولا شك أن هذا من زنا اليد كما قال صلى الله عليه وسلم : [ العينان تزنيان والرجلان تزنيان والفرج يزني ] وهل هناك أطهر قلبًا من محمد صلى الله عليه وسلم ومع ذلك قال : [ إني لا أصافح النساء ] ، وقال أيضًا : [ إني لا أمس أيدي النساء ] . وعن عائشة - رضي الله عنها - قالت " والله ما مست يد رسول الله صلى الله عليه وسلم يد امرأة قط غير أنه يبايعهن بالكلام " . ألا فليتق الله أناس يهددون زوجاتهم الصالحات بالطلاق إذا لم يصافحن إخوانهم . وينبغي العلم بأن وضع حائل والمصافحة من وراء ثوب لا تغني شيئًا فهو حرام في الحالتين . الخلوة بالأجنبية : الشيطان حريص على فتنة الناس وإيقاعهم في الحرام ولذلك حذرنا الله سبحانه بقوله: ( يا أيها الذين آمنوا لا تتبعوا خطوات الشيطان ومن يتبع خطوات الشيطان فإنه يأمر بالفحشاء والمنكر ) ( النور : 52) . والشيطان يجري من ابن آدم مجرى الدم ، ومن سبل الشيطان في الإيقاع في الفاحشة الخلوة بالأجنبية ، ولذلك سدت الشريعة هذا الطريق كما في قوله صلى الله عليه وسلم : [ لا يخلون رجل بامرأة إلا كان ثالثهما الشيطان ] وعن ابن عمر رضي الله عنهما عن النبي صلى الله عليه وسلم قال : [ لا يدخلن رجل بعد يومي هذا على مغيبه إلا ومعه رجل أو اثنان ] . فلا يجوز لرجل أن يختلي في بيت أو حجرة أو سيارة بامرأة أجنبية عنه كزوجة أخيه أو الخادمة أو مريضة مع طبيب ونحو ذلك ، وكثير من الناس يتساهلون في هذا ؛ إما ثقة بنفسه أو بغيره فيترتب على ذلك الوقوع في الفاحشة أو مقدماتها وتزداد مأساة اختلاط الأنساب وأولاد الحرام . ---------------------- الشيخ / محمد المنجد |
يغلق الموضوع ويكتفى بهذه الردود لخروجه عن مساره بارك الله في الجميع
|
| الساعة الآن 05:28 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©