|
احترت مع هالرجال وابي حل
حبايبي انا جيتكم بعد ما طفح فيني الكيل ولا اقدر اشتكي على احد
غير الله ثم انتم وانا راجيه منكم الحل او الطريقة السليمة اللي اتصرف فيها لانه لو بسأل احد من اهلي بتاخذهم الحميه معي ضد خطيبي المشكله ان هذا الادمي حيرني يكلمني ويكون في قمة الحب والشوق وانا ابادله نفس المشاعر لدرجت اني حسيت اني مجرمه في حقه لما اغيب عنه بسبب سفر او غيره مرت الايام وجات اخته زيارة وبدى يتغير يجلس باليومين والثلاثه ما يكلمني قلت عذره معه مشغول مع اخته وهي الوحيده بينهم وهو يحبها مرررره فما اعطيت الموضوع اكبر من حجمة بعدها غاب عني 4 ايام ومررره تضايقت فارسلتله ورد ورسالة عتب على العمل بعدها كلمني واعتذر وانا كنت زعلانه مرره وعاتبته جااااااامد مر اسبوع وانا زي العسل بعدها انا سافرت كم يوم وكان يكلمني عادي وقبل ما ارجع قلتله ان بكره راجعة وكان طاير من الفرحة لـــــــــــــــكن وصلت مدينتي وما كلمني ولحد الان لي اسبوعين ما يكلمني لاتقولون اتصلي لان اهلي مانعيني اتصل عليه وهذا كان شرطهم انه اذا يبغاني هو يتصل ارسلتله مسج على الجوال لاكن لاحيات لمن تنادي ابوي يشوفه كل يوم في العمل وطيب وبخير وما فيه اللى العافيه وتصرفاته طبيعيه لاكن مدري المهم انا حاسه ان فيه احد يقوله يجمدني ويثقل والاحساس هذا مررره قوي عندي لان هو ما يقدر يبعد من حاله كل هذي الفترة المهم الحين اعطوني الحل والراي والدبرة تراني بموووووت من القهر والشوق تحياتي :mad: |
أختي العزيزة،
من الأفضل أن تتركيه لا تسألي فيه دعيه هو يسأل عنك، لكن لا تفهميني غلط لأنك أرسلت له رسالة ولم يرد عليك. فأنت فعلت ما عليك. افتراضا أن أحد قال له شيئا عنك ينبغي أن يسألك ولا يأخذ موقفا. وإلا ستكون حياتك صعبة جدااااااااااااا. عذرا على كلامي... هذا رأيي الشخصي فقط. |
مجرد رأي
اختي العزيزة
قد يكون كما قلتي بأن أحد ما طلب منه أن يثقل ولكن إلى متى ؟ أحتي العزيزة إذا أهملتيه سيزداد شوقك إليه وإذا كلمتيه تخافين من احراج نفسك كما أعتقد . ولكن أختي العزيز لا يعرف النار التي تشتعل في القلب من بعد الأحبه دون سبب إلى من جربه فنصيحتي لكي بأن تتوكلي على الله وتتصلي به فشيء أحسن من لا شئ ومعرفة السبب أحسن من عدمة وإن لم يرد عليك إبعثي له برسالة تبينين له عتبك الشديد له . وهذا مجرد رأي ولكي القرار أخوك ملك |
lady_sou رأيك هو نفس رأيي وهذا الوضع اللي متبعته ولكن إلى متى
ملك اتصل صدقيني صعبه علي بالحيييييييييل لاكن بنتظر إلى النهايه والله يعين تحياتي |
أختي الكريمة ربما خطيبك هذا غير جاد في أنره أو أنه في طرف آخر يؤثر على مشاعره فهل أنت ارتبطي به أم أنها مجر خطوبة قبل الكتاب اذا كات الأمر كذلك عليك التريث في أمرك ولا تستعجلي مادام من بدايتها وخليه ياحسر على فعله حسسيه بالجفا أتمنى لك حياة موفقة وشكرا تحياتي |
تبغي نصيحتي؟
لا تتصلي خليه الين ما يحس ويتصل بعدين انتوا لسه مخطوبين وبيسوي كده اجل لو متزوجين ايش بيسوي؟ والافضل انك تعاتبيه وتفهمي ايش لزمه الحركات دي وجها لوجه تحياتي |
عزيزتي هدى والله والله أنا حاسة معاك
|
لكن لا تتصلي به انتظري قليلا وخلينا معاك بالجو لنرى ما علينا فعله..........
|
الله يعينج أختي ..
يكمن يريد يثقل و يختبر غلاه عندج ... أنت ثقلي ... و كوني عادي .. حاولي تشغلين تفكيرج بأي شي .. اقري قرآن .. احفظي كم سورة .. اقري كتب .. تعلمي شي جديد .. و هو من نفسه .. أو ما تنسين الموضوع و تاخذينه عادي .. بتلقينه يتصل .. ( الرزق يبيله غفله ) .. مبين عليه يحبج و يريد يثقل .. و معاهم حق أهلج لما اشترطوا أنه هو يتصل .. لأنه الريال يموووت على البنت الثقيلة .. الله يوفقج يارب و يسعدج دنيا و آخرة .. |
مخطوبه في مجتمعنى الخليجي يعني مكتوب كتابها لكن باقي حفل الزواج
اشكركم على تفاعلكم واتمنى تكونوا معاي دايم خصوصا ان اخته هذي كانت حامل وعلشان كذا جات هنا تولد والحين ولدت وامي واختي اليوم رايحين يزورونها في بيت اخوه الكبير وانا جهزة هديه فخمة وبرسلها مع اهلي لان عندنا من يوم تتملك البنت ما تروح بيت اهل زوجها اللى بعد الزواج وحابه اضيف شي اخته ترى مرررررررره طيبه وحنونه لاكن مااقدر ابرر تصرفه من يوم ما جات هنا وغير كذا امس جاني خبر ان اخوه قال لواحد نعرفه ان انا وهو دايم في مشاكل وهذا الكلام مافيه شي من الصحة والله مدري كيف هذا الوضع الغريب لاكن اتمنى انكم تدعون لي ان الله يهديه ويعقله تحياتي للجميع |
الله يهديه ويعينك عليه .
ما فعلتيه هو عين الصواب في نظري لان المراءة بطبيعتها يمنعها الحياء والكبرياء من طلب الرجل وهذا دور الرجل في الغالب وخصوصا في فتره الخطوبه ومن دون ان يحدث اي خلاف بينكم . حالة غريييبه . ضيع احلى ايام عمره معاك المسكين |
ربنا يهديه عليكي يارب
|
أختي العزيزة
تبين رايي؟ و انا مجربته دوم بعض الاحيان الريال يتثاقل مو لانه ما يحب زوجته بس يبي يعرف غلاته عنده اول شي اتسوينه و ادري بيخلي اهلج يغضبون انج تحاولين تكلمينه بالتلفون و اصري انج تكلمينه يعني لو ما رد عليج مرة و عشر لا تيأسين و صدقيني ما راح ينسى لج هالتصرف ترى الزواج تضحيات خصوصا اذا الزوج يحب زوجته و مرة ارسلي له ورد و مرة مسج و مرة رسالة على البريد الالكتروني و مرة بالبريد و هكذاخلج بالزيادة اسبوع اتسوين هالشي يوميا يمكن اهو ماخذ على خاطرة منج في شي انتي غافلة عنه مثل سفرج بروحج او اي شي ثاني و لا تنسين اذا بتراسلينه او بتكلمينه لا تعتبي عليه بالعكس بيني له اي قد انتي مشتاقة تسمعين صوته يعني اول حوار يصير بينكم تعبير عن الشوق و الوله لانه اكيد اللحين يخاف يقدم على اول خطوة و هي انه يكلمج فانتي ليني له الجانب و بعدين حاولي تعرفين منه سبب القطيعة بكل هدوء و من غير عصبية و بعدين ما خبرتينا عن اهله اهم ما كلموكم بشي؟ يعني ما قالوا ليش خطيبج مقاطع هذا اذا يدرون عن الموضوع و اذا ما يدرون دام اهلج بيروحون عندهم لازم الموضوع ينفتح و تعرفون شسالفة ولدهم معاج اتمنى ما يكون فيه الا كل خير و الله يوفق لج يارب |
باختصار لاتثقلي ابدا على زووجك او زوج المستقبل ومن نصحك بالثقل او عدم الاتصال فاعتقد انه لايريد
لك الخير او اخذته موضوع الحمية والكبرياء الذي لاداعي له . |
اليوم ارسلي مسجين على الجوال
يعاتبني فيها على الجفا ............ شفتوا القهر هو يصد ويبعد ويحطها على راسي واللي قهرني زياده ان اخوه يقول لابوي اني مطوله لساني عليه ونصح خطيبي انه مايكلمني دايم وان مكالماتنا بتجيب المشاكل معن والله العظيم عمري ماقلتله كلمة غلط حتى لما يزعلني صح اعطيه من الكلام الجامد اللي يحسسه بغلطته لاكن لا ارفع صوتي ولا اطول لساني ابوي قالي على الموضوع وكان بينادي خطيبي ويتفاهم معاه ويقوله من فوض اخوك يقول هالكلام خصوصا ان انا وياه ما بيننا مشاكل ولله الحمد بس انا قلت لابوي لا زي ماراح برضاه يرجع وذيك الساعة لكل حادثا حديث حبيت اقولكم ان خطيبي كل شهر يزورني مره في تاريخ معين وهو تاريخ الخطبه وباقي على التاريخ هذا كم يوم فا وش رايكم اذا جا اتفاهم انا واياه قدام الوالد لان التلفون ما يصلح في هذا الموضوع واذا طنش اخلي ابوي يناديه ويحط حد للمهزله هذي ردو علي تكفون تحياتي |
وينكم ترى بالحيل محتاجتكم
|
غاليتي و اختي العزيزه.. جعل الله المانع خيرا انشالله .. ارجو منك ان تتريثي و ان تصبري لتري كم من الوقت يريد ان يبقى بعيدا عنك هكدا ..و خدي مشورة اهلك لانهم يريدون تعزيزك و ان تنازلت الان فسيرغمك على دلك دائما .. حبيبتي لو كان الموقف مختلفا لما ترددت بنصيحتك ان تهاتفيه و لكن موقفه غريب و يجب ان يتعلم ان يحترم مشاعرك فهو الان ليس وحيدا لا بل مرتبط ببنت ناس .
|
اقتباس:
|
لا تقحمي طرف ثالث في الموضوع
بعض من المضارحة والمكاشفة بأسلوب لطيف يكفي ، حاولي الاستفهام منه قبل الاتهام فأسلوب الاتهام يجلب الغضب وما لا يحمد عقباه ، أظهري لطافتكِ وحبكِ له حين المواجهة السؤال ولا أنصح أبداً بإقحام الأب في الموضوع ، فأمر مثل هذا بسيط ارجأي والدكِ للمهام الصعبة يسر الله أمركِ وأبعد عنكِ كل سوء عاتبيه إن شئتِ ، فالعتاب صابون القلوب ثم استفسري عن الأقوال الغريبة التي تصلكِ وقولي وصلنا عن فلان كذا وكذا فهل هذا صحيح؟ وحاولي إظهار استغرابك لا حزنكِ وكأنكِ لا تصدقين فيه أي قول وأنكِ تثقين فيه سيفخر ويسعد بهذا كثيراً كما أنكِ لا بد أن تشعريه أنه المسؤول عنكِ وهو من يجب أن يتصرف بالأمر ويضع لمن يتكلم حد وأنكِ أصبحتِ من مسؤولياته وأنكِ تشدين الظهر فيه باختصار إلجأي له لا أن تثوري عليه لأنه زوجكِ وأشعريه أنه كأباكِ وأنتِ طفلته فقط أسأل الله لكِ التوفيق |
بسم الله الأخوة ساهموا والحمد لله ولكن اختلفت وجهات النظر ولي إضافة سريعة على الزوجة الصبر والتحمل ، والبدء بالتنازل لأن هذا الزوج يتغير بسبب الذهاب لأهله أو لأخته لأسباب أخرى، عليك بامتصاص هذا التغير بعض الأعضاء نصحوا الزوجة بالعناد والتصلب نحن نريد التفاهم والصراحة والتنازل والبعد عن علو الكرامة نريد علو الهمة في الإخلاص للزوج والعمل على إسعاده ، ابدي بالخير تحصدي الخير ، وهل جزاء الإحسان إلا الإحسان والله الموفق |
صدمة عمري عرفت السبب وليتني ما عرفته
السبب وبكل صراحة زوجة اخوه زوجه اخوه تكون زميله لي تعرفت عليها من سنه ونص يعني قبل لا اخذ حماها تعرفت عليها وعلى ثلاث بنات غيرها في جلسة عمل وصرنا المجموعة اكثر من الاخوات ومن كثر ما تحبني خطبتني لاخو زوجها وانا وافقت من كثر ماتمدح فيه وفي اخلاقة الرجال لاغبار عليه لاكن المفاجاء انها ما تغطي عنه وهذا ما كنت ادري ولما جات اخته تولد راحت عند زوجة اخوها لان امهم متوفيه فكل يوم عندهم وكان يكلمني من هناك من جواله وانا ما ادقق حتى لو سمعت اصواتهم عنده مهما كان هذولي اهله فاليوم وحده من زميلاتنا المشتركات بيني وبينها سألتني عن اوضاعي مع خطيبي قلتلها عادي وما يتصل قالتلي ان زوجة اخوه لما كلموها وانا مسافرة تكلمت علي كلام مررره كبير وقالتلهم يقولون لي ان خطيبي ما راح يتصل علي بعد اليوم والزواج هذا ماشكلة بيتم زميلاتي اعقل منها وماقالولي في البداية لاكن لما شافوا ان تهديدها وكلامة تنفذ قالولي وتخيلوا بكل وقاحة تقول قولولها هذا الكلام انا بتجنن ليش قلبت علي وانا وهي اللي لنا فتره اكثر من الاخوات وهو وش صار له مني علشان يطيع وحده غريبه عنه واخوه وين غيرته ورجولته ما يوقف زوجتة عند حدها صدقوني بموت من القهر المفاجأة كانت اكبر من قدرتي على التحمل انا مسافرة كم يوم وراجعة وراح افاتح ابوي وامي بالموضوع لان هذا شي مو طبيعي راح اطلب من ابوي يناديه واتفاهم انا وهو ولا انتم وش رايكم انا ما ابي اخرب بيت البنت هذي ولا والله اوديها ولا السحاب لاكن اخاف ربي ولا ابي هذا بداية دخلتي عليهم انصحوني وش اقوله كيف اتصرف ولاتبخلون علي بدعاكم |
السلام عليكم ورحمة الله وبركاته جميعاً
مع احترامي لك ولخطيبك حبيت اقول ولاتزعلين مني وش لعب هالبزارين واحب اوجه لك نصيحة أخوية فكري في مستقبلك وخططي له أفضل من هذا الدلع ؟ اعتذر مرة أخرى على وقاحتي . وشكراً لك . |
من الاخرررررررررررررررررررر ؟؟؟!!!
باختصاااااااااااااااار شديد هدى ....خطيبك مع احترامى لكى ما عنده اى سالفة واذا زودها غيريه والشباب الحلوة كثييييييييييير انا واحد منهم !!! :D |
انا اوئيد كلامك بضرورة تدخل اوليلاء امرك في الموضوع ووضع حد للمهزلة هذي لكي لا تتكرر .
وكلامك عن اللي صار من زوجة اخيه وارد وممكن يصير في احسن العائلات بعد . بس زوجك يبدو انه ضعيف شخصية ويتأثر من اي كلام وهذي مو في صالحك بعد الزواج وهنا تكمن ضرورة وضع حد للمهزله والتدخل في حياة الغير. لو وصلتي لحل لهذه المشلكة وان شاء الله راح تتوصلون .عليك يا اختي باخذ الضمان من زوجك بان ما حدث لن يتكرر مرة ثانية وذلك باخذ التعهد منه بان لا يسمح لاي شخص ان يتدخل في حياته الزوجيه سواكما انتي وهو. والله الهادي الى سواء السبيل بوعابد |
اعتقد ان المكتوب ينقرأ من عنوانه
وخطيبك هذا ماعنده شخصية ولو انتي اختي او ابنتي لناديت خطيبك وانهيت الموضوع فورا ولو نزلت دموعك دم لان تصرفاته ليست بتصرفات رجل قد المسئولية اشلوت تعتمدين على رجل كلمة توديه وكلمة تجيبه كيف سيفتح بيت ويواجه المشاكل في المستقبل وهو يطيع كلام زوجة اخيه احمدي الله ان هذا الرجل بان على حقيقته وانتي بعدك على البر توكلي على الله وتخلصي من هذا الشخص واشطبيه من سجل حياتك يعني سوي له delete ولا عاد تفكرين فيه ابد وتأكدي بأنك لن تندمي على التخلص منه والسلام ختام |
السلام عليكم ورحمة الله وبركاته
بدايةً أحب أن أنوه بأن كل المشاكل لها حل وحلول المشاكل تأتي بالتفاهم ثم أنه من الواضح من كلام زوجة أخوه أنها واثقة ومعبية راسه صح ويمكن ملفقه لك أشياء يمكن أن تخدع وخطيبك هذا أنسان يصيبه الشك والضن ويحتمل الصح والخطأ لذا أنا أقترح أن تكلميه هاتفيا وتتفاهمي معه لتفهمي سبب المشكلة ولوضع حل لهذه المشكله وإذا لم يرد عليكي يجب أن تكلمي والدك ليحضره ويتفاهم معه ويضع حد لهذا الموضوع وأعتقد مو من حقك تلومينه بحجة أنه سمع كلام الناس لأنك أنتي أيضا سمعتي كلام الناس ولكن ستكونين أنتي الأفضل في حال أنك بادرتي بالإتصال به وتفهم المشكلة وأتمنى أن تقومي الآن من على الجهاز وتتصلي به. |
مرحبا بأختي ...
تبين الصراحة ...لو كان خطيبك شاريش صحيح كان دق عليش وتفاهم معك بالموضوع ولو كان له شخصية ورجولة لو وقف زوجة اخوه عند حدها بنفس الوقت الي قالتله الكلام هنا يبين لها انه صحيح يحبها وانه ما ممكن يسمح لحد يتدخل بحياتهم .. بس هذا للاسف ... كلمه توديه وكلمه اتجيبه واذا كان حاله الحين كذا فالله يستر لو تزوجتو ... حبيبتي وانا اختك هذي نصيحة مني ... سكري الموضوع وانهيه لانك لو لستمريت معه ما تدرين وش من قصص راح تخترعله زوجة اخوه مو شرط ممكن اي احد ما دام هو ينسط للجميع ... واشكري ربك وصليله ركعتين هذا هو يبينلك الشخص هذا كيف طبيعته ...وزين انه الامور اتضحتلك الحين قبل لا يصير شيء بينكم وهذا دعاء ادعي فيه دائما وردديه بعد كل اذان ...اللهم ارزقني بزوج مؤمن صالح تقي رؤوف رحيم طيب القلب يكون فيه خير لي اف ديني ودنياي واخرتي وارزقني من لدنك ذرية طيبة انك سميع الدعاء ولا تنسين الدعاء لنا وللجميع |
تري الثقل زين لا تكوني خفيفة
اذا كنتي تمونين على أختة بالهاتف سلمي عليها وباركي لها بالمولود وستدرجيها بالكلام حتى تعرفي السبب واذا أزمت خلاص منتي قادرة على هجره رسالة جوال والله ييسر تمنياتي لك بأخبار سارة إنشاء الله |
اهلين حبيبتي هدى ،،، اتصلي عليه واسئليه عن سبب تصرفاته هذي ؟! واذا حاله زاد وعيا يرد عليك ،، لازم تدخلي اخوك او ابوك في الموضوع ،، وتخليهم يشوفون حل مع هالرجال ،، وانشالله يصير خير ،، تحياتي ،، اختك:فوافي ،، |
خلاص انا وصلت معي وشبعت من التفاهات حاسه اننا اطفال صغار
واغبياء بعد قلت لبوي على الموضوع وكلم ابوه في العمل وبالصدفه كان فيه هو اخوه وبدى يقول اخوه كلام فاضي وابوهم سبهم الاثنين وبعد كذا قاله ابوي تجي اليوم تتفاهم انت وهي يا اتفقتوا ولا كل واحد يروح بدربه وانا الحين حاسة بتفاهه مي طبيعيه تجاه الموضوع يعني بجلس اتكلم قالت لا قلت اسباب اكبر من التفاهه نفسها ما اقول غير حسبي الله ونعم الوكيل ادعولي معاكم ان لو في الانسان هذا خير لي ان الله يسخره لي واذا فيه شر لي يصرفه عني تحياتي للجميع |
اللهم ارزقني بزوج مؤمن صالح تقي رؤوف رحيم طيب القلب يكون فيه خير لي اف ديني ودنياي واخرتي وارزقني من لدنك ذرية طيبة انك سميع الدعاء
آآآآآآآآآآآآآآآآآآآآآآآآآآآآآآآآآآآآآمين آآآآآآآآآآآآآآآآآآآآآآآآمين |
بقولك بصراحه ابن عمي كان يعامل خطيبته كذا مثل خطيبك بالضبط وكانت خطيبته تزعل لانه كان مايكلمها بالاسبوع واكثر بعد نصائح الاهل له اتضح انه مشغول او اعتقد انه مايعرف الذوق والاتيكيت في التعامل مع البنات , واليوم متزوجين صار لهم سنتين سمن على العسسسسسسسسسسسسسسسسسسل ماتقلقي وممكن انك تعاتبي احد من اهله علشان ينبهوه , الله يوفقك
|
اسفه ما قرات ما استجد من القصه الا الحين اعذريني اختي , برائئي كلمي اهلك علشان تشوفي حل لهذي المشكله اما زوجه اخوة صدقيني ربنا يمهل ولا يهمل
|
طنشيه ولا نسالين فيه واذا يحبك عن جد بيدق
وسالفة اخوه اللي يقول انكم دايما بمشاكل ر تخلينها تعدي اساليه ليش قال كذا وعلى اي اساس؟؟ شاكرة لك |
اختي العزيزة ..
انا قرأت الموضوع .. ولكن ما قرأت الردود الا اللي بالصفحة الاول (يعني ما تابعت الموضوع كله ) ولكن نصيحتي لكي بأنك في اول حياتكم الزوجية والافضل في هذه الايام بالذات تحكيم العقل لا العاطفة ما دمت على البر العطاء بمستوى الأخذ فلا تعطي اكثر مما تستطيعي أخذه والعكس واذا كان ابتعاده ليس له مبرر الافضل يكون لك موقف حاسم وقوي . |
| الساعة الآن 11:28 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©