تواصلت مع رجل بهدف الزواج
 

السلام عليكم .. ببدأ بالموضوع ع طول

الحمدلله انا مطلقه لي سنتين تقريبا وسنه قبلها عذاب نفسي ... يعني في بعد عن ( الزوج) ثلاث سنوات .. عندي اطفال منه جميعهم عنده و موضوع اني اخذهم او لا حسمته حسب ظروفي وطبيعه طليقي فقررت قرار منتهي انهم يكونون عنده .. هو تزوج و بذل كثير. حتى ارجع بس ماعاد لي خاطر فيه يعني فكره الرجوع له منتهيه ..

انا مش صغيره .. وعندي اطفال .. بس اجمل بكثير من بنات في بيوت اهلهم .. كل بدون مبالغه من شافني يظن اني ما تزوجت .. حياتي وظروفي الحمدلله تخليني غنيه عن الرجل
فعلا انا ما احتاجه ابد اذا بنظر لظروف حياتي .. لكن انا بطبعي احب اكون تحت ظل رجل يحتويني .. اسولف معه اخرج معه يعني بودّي وميته بعد على رجل ( بمعناها ) اعيش معه... وشعوري هذا ابدا ماله علاقه بشعور احتياج المرأه للرجل من نواحي اخرى شعوري تجاهه او رغبتي في الزواج مثل شعور اللي ابدااا ما تزوجت وخايفه هالقطار يفوتها وكذا يعني احسب اللحظه احس هالشي منقصني وانا مو ناقصني ابدا شي .. ادري غلط بس هذا شعوري ..

احتاج زوج اعيش معه لاخر العمر .. وتااايهه مو لاقيه .. فعلا مو لاقيه .. او الله ما كتب ..
وبنفس الوقت .. احس طليقي بعد كل محاولاته الان تاركني على خانه الانتظار. يعني حتى امل واذا جاء لي .. قلت خلاص ابيك و عالشعووور. يقهرني كثيييير كثييييير

كل باب بدون مبالغه طرقته.. بس عجزت القاه ( ولد الحلال) اللي صار .. ساعات يجيني عريس عن طريق صديقه او اخت او خطابه بس الغالب ما يناسب .. وان ناسبني صليت استخاره .. ويطير الرجال .. يعني الله يصرفه حتى قبل يخطب رسميا .. في قرارت نفسي اعرف انه خيره بس قلبي موجوع حده

اخيرا لي قريبه تعرف رجل عن طريق بزنس بينهم ودلته علي لكن شرط هالرجل هو انه يكلمني قبل الزواج .. طبعا نفسي واهلي يرفضون هالشيء.. بس قلّت حيلتي .. قلت اوك عطيه رقمي خلينا نشوف ايش اخرتها .. وقلت هو على علاقه مع معارف لي فاكيد راح يكون منضبط وكذا يعني ما خفت بس كنت مرتبكه شوي

دق ( الشخص اللطيف ) قال لي اساليني قلت انت اللي تبي المكالمه اترك لك الحوار انت تديره .. وفعلا لان ما في بالي ولا شيء .. وياليتني ما خليته له!! سرد قصه حياته وكان واضح وسالني كم سؤال .. من ضمن الاسئله

قال .. انه طبعا يشرب سيجار ويشيش .. ومو مشكله عندي لو تشيشين .. قلت نعم !!
طبعا كان لي ردت فعل لكلامه لكن مدري هو من جده ولا يختبر ..

وكان يتكلم بمواضيع تتعدى الخطوط الحمراء .. وكنت اقاطعه انه ( انت تحرجني ) وصعب تتكلم في هالمواضيع من اول مكالمه وعطيته تنبيه انها اخر مكالمه ( لانه فعلا ما بقى شيء ما قاله) كان جرئ جدا جدا جدا وانا ابدا لا حابه ولا مستمتعه بكلامه .. بس قلت يمكن يبي يوصل فكره .. وانا بعد ما ابغى الوم نفسي اني وجدت الشخص اللي مبدئيا مناسب وطيرته من يدي

يرسل لي صوره ورى صوره له .. ويبغى احبه في هالساعتين .. ويقول انا جرئ وبتقولين عني مجنون .. وتعبا والله يا فلانه من العقل ... ( عمره هو في منتصف الاربعين)

صراحه حسيت انه ممكن يكون زوج لي ( لاني خلاص ما عاد ابي شخص يكتم بقلبه ويعرف يكذب ويتلون ) ابي بالعربي خبل وحسيته هالخبل مناسب

هو منصب وعنده بزنس ورجال بس ( يكب عشاه ) وهذي ظالتي اللي بغيتها

الموهم مليت من المكالمه و وقبل لا اسكر طلب مني صوره لي .. قلت له تبيني هذا رقم ولي امري. حياك .. غيره ما عندي

قال اخاف اجي وما اعجبك او ما تعجبني .. قلت عادي ما فيها احراج
طبعا هو ما وده انه ينقال خطب منا ورفضنا وكذا

انهيت المكالمه على اني برسل صوري .. ارسلت له واتس انه اعذرني .. ما دمت ما تحل لي فما راح ارسل وللامانه انا كنت اكلمه باسلوب جدا عادي بدون دلع وخرابيط

رد علي .. اها ما دام من باب ما احل لك فبراحتك .. وسحب علي ( ااااه يا قلبي )

جلست يومين وارسل لي مسج ديني عادي .. قلت يمكن يبغا نفتح الموضوع من جديد ارسلت استفهام .. ارسل لي ( اللي ارسلته قران كريم )

وبس طنشني .. انا مصليه استخاره مدري عشان كذا طار

لي اسبوع .. من اخر مسج .. ابغاه .. بس مدري كيف اسوي .. هو مش توب بس ممكن يكون الزوج الي ابغاه

مدري (( قلبي يقول لي .. الثقل .. ثم الثقل )) وشي يقول لي حاولي بطريقه معينه يرجع بس ماش كرامتي تأبى على هذا
واخاف الح واجيبه .. وعقب اتحسسسف ويطلع ما يسوى ..

ساعات احس اني بس ابي اتزوج .. ومش مفكره باللي بعده .. هي عندي قناعه تامه انها توافيق من رب العالمين ومهما اجتهدت في دراسه الموضوع فالترفيق من ربي


انا شعوري انتحاري في موضوع الزواج .. ودي اخليه مو مهم بس عجزت .. مشغوله طول وقتي وتعب في هالدوامات بس ماش عجزت اخلي هالرجل في حياتي شي ثانوي

دعواتكم

رد: والله احترت
 

سؤال
هل هو متزوج ؟ وراح تكوني الثانية ؟

رد: والله احترت
 

لا هو مطلق ولا مجال لرجوع زوجته

رد: والله احترت
 

بغض النظر عن تفاصيل القصة
خللينا في المبدأ
كونك تكلمي شخص غريب ( حتى لو نيتكم الزواج ) وتسمحي لنفسك تسمعي كلامه الجريئ هذا غلط وذنب

رد: والله احترت
 

اعذريني اختي
لكن بصراحة تخبظ غير طبيعي !
كيف رضيتي هذا الشخص يتعدا و لي امرك و يكلمك !!! عشان كذا دخل بجرأة
لا تلومين الا نفسك
معقولة لانك تبغين زوج تبحثين عنه بهذي الطريقة ؟
انا اقول لك عيشي حياتك و عيالك استمتعي بطفولتهم و خذيهم يملون عليك حياتك وامرحب معهم و ربيهم
اذا جاك الشخص المناسب خذيه
اما تعيشين فراغ ووحيدة و قاتلة نفسك بالتفكير ! فهذا الشي راح ينتج عنه تصرفات غير محمودة!

رد: والله احترت
 

والله يااختي قلتي جريء وكلامه مااعجبك وتقولي تبينه!! زي هذا ابعدي عنه اما اذاقصدك تبي زوج والسلام بغض النظر عن عقليته وتصرفه فارجعي لطليقك ع الاقل ابو اولادك ومع اولادك ،، وهذا احذفي رقمه مو ماتصدقي تجي منه رساله وترسلي رموز بكرا يقول عجبها كلامي الجريء ويزود العيار فووقي لنفسك

رد: تواصلت مع رجل بهدف الزواج
 

هذا لعاب ما عنده سالفه انتبهي منه

رد: تواصلت مع رجل بهدف الزواج
 

على يقين انها لحظة ضعف
إسأل الله الثبات
و أن يرزقك الحلال و أن يبعد عنك الحرام

رد: تواصلت مع رجل بهدف الزواج
 

لايصلح لكي زوجاً

رد: تواصلت مع رجل بهدف الزواج
 

شكرا لكم من القلب

هي ليست ضعف عندي ولا فراغ ولا غيره .. انا في الحقيقه ما اعطيته وجهه ابدا .. لكن كل شخص يريد ان يخطب .. يطلب مكالمه وتواصل قبل الخطبه .. ما اعرف هل هي موضه جديده ..
صدفت معه وقبلت لكن غيره ابدا ابدا ما قبلت ولن اقبل .. ولكن هذا سهل فكره تواصلي معه هو وجود قرابه بيننا بصوره بعيده

ممكن يكون جاد لكن ما عنده اقدام .. وهذا لا ينفعني ابدا

شكراااا جدا على حرصكم علي .. واتوقع ان صلاة الاستخاره كفيله بكل شيء

رد: تواصلت مع رجل بهدف الزواج
 

الجاد مايدخل في العميق من اول مرة

سلامات وين قاعدين

هو جاي يبحث عن زوجة وام لعياله ام يبحث عن فتاة ليل؟!

رد: تواصلت مع رجل بهدف الزواج
 

ردك الأخير مطمئن جدا ,, وتأكدنا من وضوح الصورة عندك ،، وفقك الله .

رد: تواصلت مع رجل بهدف الزواج
 

نصيحه لكل فتاه ... اياك ثم اياك التواصل مع اي شخص .. بهدف الزواج ... اللي يبغاك يعرف الباب

نصيحه أحببت طرحها بعيدا عن الدخول في تفاصيل موضوعي

رد: تواصلت مع رجل بهدف الزواج
 

ياعمري يالفتيات ضعيفات عاطفيات ..سبحانه اللي اشترط لزواجها ولي


وانا اقرا حديثك عنه وكل ماأنزل سطر اقول بنفسي ابدا ابدا ماينفع زوج ..
فري عنه

رد: تواصلت مع رجل بهدف الزواج
 

لا حول ولاقوة الا بالله العلي العظيم كل هذه الخفّه وتقولين كلامي ثقيل ....!؟
يااختي الي سويتيه هو درب الندامه والحسره ، بالله عليك كيف تقيم العلاقات بين الرجل والمرأه بغير هذا الدرب ، والله اني ناصح لك امين طريقتك غير سويه وغير صحيحه ، وبعدين رجال رقله خفيف عقل ودبره يرسل لك صوره تلوا الصوره ويتكلم معاك كلام بذيئ يتعدى الحدود ايش هذا الكلام السامج ، والله انها سقطه ، والي اسقط منها صديقتك راعية البزنس الي تدلتك على هذا الوقح ، اهربي منها هروب الي تريد النجاة لها بالدنيا والاخره ...!
والله المستعان ....

رد: تواصلت مع رجل بهدف الزواج
 

اسمحي لي فري 10 اصابع ايش هذا النتاقض ياليت تقرأين آخر السطور الي كتبيتيها ...!؟

رد: تواصلت مع رجل بهدف الزواج
 

رد: تواصلت مع رجل بهدف الزواج
 

دائما ً أتَوسم في ردودك العقل والفطنة لكن ماحدث معك كان سقطه! والحمدلله أنها انتهت على ذلك وأقرأي رد ابو مريم فهو ناصح أمين في حالك

وفقك الله

رد: تواصلت مع رجل بهدف الزواج
 

من حقك تختاري شريك حياتك
بأي طريقة تناسبك
الناس ماتعرف كيف حياتك وكيف هي معاناتك
والنوايا شيء لايعلمه إلا الله
لذلك دائما خلي نيتك طيبة و ربي راح يرزقك على قد نيتك و أكثر ، وراح يبعد عن الشر وأهله.

رد: تواصلت مع رجل بهدف الزواج
 

واضح جدا لعوب
الحمدلله ربي ابعده عنك
رزقك بيجيك لحدك مهما سعيتي
ومابيدك شي الا تتكيفي وتوكلي امرك لله
ماعندك زوج
غيرك ماعنده عيال سعى بكل الطرق وربي ماراراد له لحكمه يعلمها
غيرك فقران
غيرك مريض
وغيرك كثير
نفس وضعك انا بإختلاف اولادي معايا
احتاج للزوج ويجوا الخطاب
بس عازفه رحمة بعيالي
والله يعطيني ع قد نيتي ويعوضك ويعوضني كل خير..

رد: تواصلت مع رجل بهدف الزواج
 

ليه ماتبغي عيالك معاك حرام عليك سنهم هو احوج لك مو لابوهم .. وعدم وجودهم عندك هو اللي خلى هذا الفراغ القاتل اللي خلاك تقعين في هذي السقطة المريعة ضمي عيالك لجناحك واعطيهم حنانك وحبك وصدقيني راح يرجع لك اضعافه كيف تأمنينهم مع زوجة أب ماتدري كيف تعاملها معاهم .. حزنوني أطفالك الله يرحم حالهم وصدقيني ماراح ينسون تخليك عنهم ابدا لاكبرو وسرت في حاجتهم

رد: تواصلت مع رجل بهدف الزواج
 

تصدقين
تستفزني اي ام ترمي عيالها بحجة انه ورطهم فيها وطلقها
وخلاص ترمي المسؤولية عليه
طيب انتي ام و الحضانه لك
و ربي عظم حقك و فضلك على الاب
وجبلك على العناية بهم و القدرة على تحملهم و عدم الاستياء من رغباتهم
على عكس الاب الي قد ينفذ صبره عليهم واللي اصلا مستحيل يقابلهم ويغير لهم
ربي قدر انك تكونين مطلقة خلاص احتفظي بالنعمة اللي عندك و اشبعي فراغك العاطفي فيهم، وان ربي كتب لك نصيب و زواج بيجيك حتى لو كان الاطفال بحضانتك
و هو اصلا بيقاسمك مسؤولية المصرف بس طالبي بحقك
اصلا المفروض العين تصير اوسع لهم من الدار ، خصوصا انهم طفلين مو 6 او سبع

رد: تواصلت مع رجل بهدف الزواج
 

انا لست معك في هذا الكلام الاطفال مع ولي امرهم افضل الام ليست وليه امر وإنما مجرد حاظنه للاطفال من يريدها لأطفاله يحافظ عليها ويحترمها ويقدرها حتى تبقى لأطفاله قبل ان يكونو اطفالها بدليل قدرته على الزواج باخرى رغم وجود اطفاله معه اما هي فهي الى الان لم تجد نصيبها رغم انا اطفالها ليسو معها
وصاحبت الموضوع اتوقع لم يمضي على طلاقك كثيرا فصبرا لعل في كل تأخيره خير لك ولاولادك

رد: تواصلت مع رجل بهدف الزواج
 

قانوناً وشرعاً الحضانه عند الام الا اذا هي ماتبيهم ولاتبي تتحمل مسؤليتهم هذا شي آخر

رد: تواصلت مع رجل بهدف الزواج
 

الام لن تستطيع رعايتهم الا ان كان لها سائق خاص وشقة مستقلة افضل لها ولاهلها اعرف مطلقة بابنين يعيشون في منزل الجد ولديها اخوه صغار والمنزل مزدحم ماشالله وهي تعاني بسبب ذلك لو تركتهم لابيهم لكان افضل للجميع

رد: تواصلت مع رجل بهدف الزواج
 

الشرع ادري مني و منك بنفسية الطفل فجعل الحضانه لها
يوفر المطلق للطفل و ربما للمطلقة النفقة الخاصة لهم
وان لم يكن لهم مسكن فهو مجبر على ذلك
اذا الاطفال مع الاب من يقوم برعايتهم. ومراعاة نفسيتهم !!!!!هل زوجته !
هل يقتصر فهمكم للحضانة استقبال المحضون في البيت فقط!

رد: تواصلت مع رجل بهدف الزواج
 

الله يجزاكم خير في كل حرف

وفعلا هذا درس اورثه اجيال .. انا مدري كيف انعميت وخذيت وعطيت معه .. الله يكفيني شششره

يعني انا اول كنت انام على المخده وافكر باحلام سعيده

الان شايله همه حسبي الله ونعم الوكيل

يا عالم انتوا لو تسمعون الناس اللي طايحه بسالفه كلمته وخذيته .. كان انجرفتوا مع الموجه .. الغالب صاير كذا .. يارب سترك ولطفك


انا ابغى اتزوج لي انا .. لا اقهر احد ولا اسعد احد

لان عزوبتي هذي وحريتي بالحياه لوحدها قاهره طليقي لكن ماني حابه فكرت انه عندي شعور تجاهه لاني ما عرفت غيره

واحس انه من حقي القى رجل مناسب ..

موضوع اطفالي منتهي وانا مستخيره فيه ولا جربتوا تجربتي ولا عشتوا حياتي ولا طليقكم هو زوجكم او نسيبكم

كان والله عفتوا حتى زياره الاطفال


محد اعلم بظروف احد ..

رد: تواصلت مع رجل بهدف الزواج
 

وحتى حضانه الاطفال تنتهي عند 7 خلاص اصغر عيالي بيكون 7 السنه الجايه .. فليش اعذب نفسي واعذبهم

خلاص تعودوا وتعودت على بعدهم .. متعبه جدا المسؤوليه .. والاهتمام والتربيه

لو صلحوا قال انا ربيتهم ولو الله لا يقوله صاروا مو كويسين قال تربيتك

خليه يربيهم على كيييييفه

اصلا هم عنده يمشون على السراط المستقيم وعندي ااخر هبل اعصابي تتعب وانا ابداااا مالي مزاج

ارحمهم ايه واحبهم .. بس تعب بدون ابد تعععععععععب

واحمل اهلي مسؤوليتهم لييييييه ؟؟

رد: تواصلت مع رجل بهدف الزواج
 

خبل *_*

المهم
بصراحة أحس وضعك معقد ومنفر لأي رجل أو هكذا تصورته ( مطلقة وأم لأكثر من ولد كبير بالإضافة الي طليق مزعج )

المفروض إنك تنزلين من سقف التوقعات و المهر ايضا وتتواصلين مع الخطابات ( الثقة )

أو اعرضي علي صديقة عزيزة علي قلبك أنكن تتشاركون الزوج ^_^

رد: تواصلت مع رجل بهدف الزواج
 

مرحباً أختي

الحقيقة أني لا ألومك على رغبتك الزواج وحاجتك لرجل في حياتك

ولكن للأسف أن هناك من يستغل أوضاع النساء من أجل المتعة معهن فقط

بل أنه أصبح خبيراً في نفسية النساء ومعرفة تفكيرهن .. بل يعرف أن ينتقي منهن من ستوافقه على فكرته

فعلى سبيل المثال

أعرف رجل تزوج كثيراً .. وكل ما قابلته يحكي لي قصة زواج جديدة أو بداية خطبة لم تتم

وهو يستهدف النساء فوق الأربعين والمستقلات ممن لديهن مال

فهو يعلم أنهن يحتجن لرجل في حياتهن لأسباب عديدة .. سواء إحتياج عاطفي أو شخصي أو حتى وجاهه .. بل إن بعضهن يحتجن من يعشن معه كثرة السفر والخروج والمقاهي وأن يكون هناك رجل يظهر إسمه على شاشة جوالها لتشعر أن هناك من تنشغل به وتفكر به .

وقد نصحته كثيراً ونهيته .. ولكنه يقول أنه لم يفعل خطأ وأن قصده الزواج الحلال وبرضى الطرفين وبالإتفاق على كل شئ حتى عدم الإنجاب .

لذلك ..
على النساء ممن لهن ظروف خاصة أن يعلمن ماهي الطريقة الصحيحة والمناسبة للزواج المستديم حتى لو قدمن بعض التنازلات مثل قبول التعدد أو مطلق بأولاود أو راتبه قليل أو غير ذلك .

والله أعلم

رد: تواصلت مع رجل بهدف الزواج
 

رد استفزازي و تفكير متحجر من عصر الاجداد

رد: تواصلت مع رجل بهدف الزواج
 

بخصوص روح انتهت
و ردك الاخير بخصوص الاطفال

اعذريني .. ردك يدل على انانية كبيرة

ايش فيها اولادي يكونوا معايا و يلعبوا في اعصابي و اتحملهم و اربيهم و اعدل سلوكهم بدل ما يكونوا على الصراط المستقيم عند ابوهم

لا تقولي ما جربتوا

على العموم
بخصوص الي تواصلتي معاه
واحد بيتسلى و مثل ما قال الاخ الرسمي فعلا

رد: تواصلت مع رجل بهدف الزواج
 

هههههههههه بالعكس انا صيده ثمينه لاي ررجل

احتاج رجل طبيعي طيب بمعني طيب فعلا

واما ان اتشارك مع صديقه في زوج :)

يقولون كل مشروك مبروك الا شريك المحبه :)

ما اتوقع بتشارك مع مرأه الا اذا كان هو متنازل عن زوجته او هي تعبانه وهكذااا اما اخرب بيت ناس بهدف الله حلل الشرع اربع ما اتوقع.. الا ان يكتب الله شيغير خذا

رد: تواصلت مع رجل بهدف الزواج
 

كيف تعافين زيارة الاطفال فيه احد يعاف ضناه !!!!!!
الكلمة هذي في غير موقعها ابدا !
اللي اعرفه ان الوحدة تضحي و تقاتل علشان عيالها وتتحمل. لكن سبحان من خلق و فرق
ووتحملين مسؤوليتهم لانك انتي انجبتيهم قدر الله وصرتي ام
و الحضانه ما تنتهي عند 7
و اصلا الحضانه احق فيها الام ثم الجده من الام و الاقرب من النساء للام
لان هذي الفطرة سبحان الله
لكن للاسف اشوف العطف انعدم من الام و اهل الام اذذا زعلوا على الزوج تبروا من عيالهم واحفادهم ورموهم على الاب .والا لو فيه محبة و عاطفة كان كل شي يجي منهم حلو من مسؤولية و غيره مع العلم كامل النفقات يتحملها الاب .

رد: تواصلت مع رجل بهدف الزواج
 

اخوي الرسمي ... جبتها صح انت .. الرجال يستغلون عاطفه المرأه وممكن احتياجات المرأه مثل ما ذكرت

بس انا عمري مش بالاربعين انا واحد وثلاثين


لكن صديقك افضل بكثير من هذا الحقير .. تخيل. دور ناس يعرفها وتعرفه ... ثم عرض نفسه بهدف الزواج


لكن الصدمه انه يقول (( اريد علاقه كامله متكامله كزوج ولكن قبل الزواج وعهد وليس وعد ان اتزوجك ))

الله يكفيني شره .. لان رقم اهلي عنده وهو يعرفني والله حسبي عليه ونعم الوكيل

انا كنت اظن ان هذا ما يدور في محادثات قبل الزواج انا لست غبيه لكن انا فعلا غبيه مع اي رجل يكذب علي بكلمتين

المهم قلت له حرام .. وانهيت سخافته وما توقعت انه بيكون سيء لاننا نعرفه من بعيد

الان انا ميته خووووووف .. الله يكفيني شره لكن هذاااا درس والله ما اعيده

رد: تواصلت مع رجل بهدف الزواج
 

يا استنكار ياا جميله

اكيد محد يكره ضناه ولكن تعبيري كصيغه مبالغه

انا انوجع عليهم .. واصلي الليل لاجلهم .. وودي في طليقي لاجلهم بس انا خلصت لموضوع ان الله اذا مو كاتب الشي فما راح يصير

وبكذا ريحت راااسي وفوضت امري لله .. انا اخذهم واذاكر لهم اسمعهم اطلعهم اشتري لهم وبالمقابل ابوهم فقط جاعلهم في منزله ما اظلمه هو يهتم فيهم بس غير اهتماماتي


اعرفي الام لو تركت ابناءها ما تنساهم لو تزوجت وعاشت لكن الاب لو تزوج دفن عياله ولا يدري عنهم

خليهم قدامه يذكرهم


الشي الثاني الابناء فعلا يحتاجون ام سعيده مش قويه

افضل ان يروني سعيده ونسعد ونضحك واضمهم لصدي بين وقت لاخر

ولا اكون قويه واربيهم واضربهم بين وقت وااخر


مثل ما كان قدر الله اني تطلقت ورزقت بهم

ايضا قدرهم يعيشون من دووني

رد: تواصلت مع رجل بهدف الزواج
 

تركك للأولادك بالطريقه هذه والبحث عن زوج غير طليقك فيها تفريط بحق اولادك واستقرارك ، الزوج المستقبلي لو يعلم انك تركتي اولادك وماتبينهم ماراح يتقدم لك احد.، كيف يتزوجك رجل عارف حترمي عياله مستقبلاً ....! راجعي نفسك اتجاه عيالك وطليقك...!

رد: تواصلت مع رجل بهدف الزواج
 

بالعكس خليه يعرف انه اذا فكر ما يخليني مستقره .. انا مالي علاقه بالاطفال ابداااا


اصلا ما خلا الرجال يستهترون بالنساء عير معرفتهم بتعلق الام باطفالها

وازيدك .. كل رجل يتقدم لي جديد لا يريد ابدا اطفالي ..
وعرض علي رجال .. يقول لا اريدها مرتبطه باطفالها

وتجي تقول لي انه لو عرف انك مش مرتبطه باطفالك ما يبغاك



يا اخي لم تعد النساء نساء ولا الرجال رجال .. خلينا نعيش هالعمر برااحتنا يكفي اللي جاانا

رد: تواصلت مع رجل بهدف الزواج
 

الحاجة الي الزواج هي هي لم تتغير منذ العصر الحجري


أجل صييدة ,,
وري محد صادك : )

ما ادري ليه تعتبرون زواج المصلحة حرام او عيب

أغلب حياتنا عبارة عن مصالح

أنتم تتكلمون عن مثاليات غير موجودة

يعني الواحد يا الله يتحمل غثا عيالة اللي من صلبة ,, يتزوج أم عيال يضيف غثاهم علي غثا عيالة

تحليل بسيط

الواحد ممكن يتزوج المرأة علشان جمالها
لكن صعب أنه يشوفها في وسط ظروف مجتمعنا
ومستحيل أنه يذكرونها له
أصلا إذا تطلقت أو ترملت وهي جميلة كل المتزوجات يقطعن العلاقة معاها

طيب علشان مالها ,, هي ما تبيه يطمع في مالها

طيب علشان الحسب .. أهلها ناس بسيطين وليسوا بمطمع

الحل التساهل قليلا في الطموح و المواصفات

رد: تواصلت مع رجل بهدف الزواج
 

كذلك الزوج المعدد و المطلق او الارمل بطفل او اكثر منفر لاي وحدة 🙂 ومايلقى من ترضى به الا اذا حدتها الظروف
لكن الفرق انه هو يطرق الابواب لين يحصل وحدة
اما هي تنتظر نصيبها
المهم بالنسبة للموضوع شرع الله التعدد و فيه فائدة للاثنين
لكن للاسف المجتمع ساعد على محاربته ، لان اذا عدد الزوج قالوا اها ما يحبها وحطوا فيها عيب
سألت جدتي تقول قبل الوحدة فرص الزواج متوفرة لها حتى لو كانت مو حلوة
لدرجة ممكن تطلق باكثر من مرة و تتزوج بعد العدة مباشرة
وكذلك الارملة وكذلك حتى لو عمرها خمسين او قاربها و لم يكن هذا شيء مستنكر عندهم
وحاليا تعقيدات الحياة اللي احنا سببها ادت الى هذا الشيء للاسف