|
زوجي ضربني وتلفظ علي #37
السلام عليكم
صارت مشكله بيني وبين زوجي قبل اسبوع وهو اني شفت في جواله مقطع بنت بدون ما افتش كنت جنبه وشفته وقلتله جيب بشوفه قالي لا وانا زعلت مرا وضاق صدري وقمت من عنده عشان بنام قالي تعالي قلت ليش اجي وسكت هو ورحت انام انا المهم صحيت انا العصر وكان نايم لان ما نام الا متأخر وبما انه ويكند واهلي ساكنين فوقي كلنا بعماره وحده صحيته أستأذن منه انس بطلع فوق بيت اهلي قالي طيب وطلعت العشاء ارسلي في الواتس تعالي ونزلت انا بيتي على بالي بيكلمني بيراضيني بيقولي شيء الا صاحي من النوم والشياطين فوق راسه قالي وين البنت قلت فوق قال بعصبيه ليش ماجبتيها قلت مدري على بالي بتتكلم معي قال لييش ماجبتيها قلت انت ليش معصب كذا قالي ككيف معصب ككيف قالها بعصبيه وقال وماسويتيلي غداء ولك 5 ايام ماتكلميني ( يتكلم بعصبيه وصوت عالي ) قلت غداء معروف يوم الجمعه انكك تتغدون عند جدي انا ايش يعرفني انك ما اتغديت والا كان اسويله ماعندي مشكله و 5 ايام ما اكلمك لاني زعلانه منك وانت ولا على بالك وبعدين ناسي ايش شفت الصباح في الجوال قال ااييش شفتي هذاك مو مقطع بنت قلت يعني اكذب عيوني يقول ايوا كذبيها ويقسم بالله انو مو مقطع بنت 😳 وانا شايفه بعيني المقطع بس طبعه ينكر ويجحد لو كان عارف انه غلطان .. المهم تكلمنا كلمتين وقالي يالله انقلعي فوق علما ان مو اول مرا يقولها لي قلت طيب الحين انقلع وطلعت مع الباب قالي والبنت جيبيها قلت تبغاها كلم ابوي قالي ككيف ويجرني مع عباتي من ورا حتى رقبتي توجعني من جرته ويدخلني المجلس ويعطيني كف ويمسك يدي يلويها جلست ابكي قالي ياويلك تطلعين من البيت اتصلت على ابوي يجي وجا قلتله انا خلاص ما ابييه من جد اسلوبه سيء لابعد حد ولسانه طويل وما احترم اهلي اللي ساكنين في نفس العماره ولا احترم ابوي اللي هو خاله وعارف ان ابوي مريض بالضغط القاتل اول ما جا ابوي باس راسه وقال ابوي ايش السالفه قال زوجي اسالها ياخال و اي شيء تقوله لك هي مصدقه فيه ( لانه عارف نفسه غلطان ) وانا عند اهلي لي اسبوع ولا ارسل شيء ولا اعتذر و لا كلم ابوي قاهرني .. انا حاليا افكر بالطلاق لان خلاص الرجال اذا استباح على نفسه يمد يده مرا بيمدها كثير .. غير كذا صارت مشاكل قبل اتلفظ علي فيها تلفظ قوي من ضمن الكلام ( يانجسه ، انا احترم اللي بالشارع اكثر منك ، انتي لو عندك كرامه ماجلستي في البيت ، يالله انقلعي واقلبي وجهك ) عمري 23 وهو 33 ولد عمتي وعندي منه بنت آرائكم .. المستجدات 27 http://www.66n.com/forums/showpost.p...6&postcount=27 المستجدات 37 http://www.66n.com/forums/showpost.p...6&postcount=37 تم تعديل العنوان ليتناسب مع المحتوى |
رد: زوجي ضربني وتلفظ علي
فيه شيء ماقلته لكم وهو مشاعري :
ياناس احبه احبه لدرجة الجننون مو هاين علي الفرقا ابدا كل يوم ابكي لاني اححبه مو هاين علي الطلاق بس فكرت انه ضربني و اهانني تجبرني على فكرة الطلاق .. اقول في خاطري ليته ما سوا اللي سواه كان والله اعيشه بجنه |
رد: زوجي ضربني وتلفظ علي
سبحان الله البنت قلبها رهيف واذا عشق وحب , يعشق بجنوون
الله يصلح حالكم يا اختي , زوجك ببساطة يشوف انك ما تحترميه , و على فكرة هذا حال كثير ازواج مع زوجاتهم , اذا زوجته ما سمعت كلامه او ما سوت غدا مثلا او طنشته , يشوف انها ما تحترمه , كل اللي سواه من ضرب وشتم هذا يحاول يفرض هيبته واحترامه , مو لأنه يكرهك , يحاول يوريكي انه له هيبة وان كلمته لازم تكون مسموعة . بس مهما كان ما توصل انه يمد يده عليك ,, ولا يشتمك ابدا ابدا , فرض الهيبة والاحترام بطرق كثيرة ليس منها الشتم والضرب ابدا مهما كان . حاولي يا اختي الفاضلة تجلسي معه جلسة مصارحة , وضحي له انك تحترميه وانه سندك في الحياة وما تتخلي عنه و و و و , حسسيه برجولته وانه كلمته مسموعة , وحاولي ما تستفزيه او تعصبيه اذا عارفة انه عصبي . وربنا سبحانه امر ان لا يهجر المسلم اخاه المسلم اكثر من 3 ليال , فما بالك اذا كان زوجك , وخيرهما الذي يبدأ بالسلام , تنازلي المرة هذه وارسلي له , والله يصلح حالكم |
رد: زوجي ضربني وتلفظ علي
شوفي حبيتي اكلمك من واقع تجربه عشتها , وانمرضت
هنا الزواج للاسف يفقد كثير اشياء اولا الزوج وأغلبهم لازم تسمعي كلامه ف ايش م يقول حتى ع حسابك نفسك وصحتك واذا م سمعتي كلامه معناها انتي مو محترمه ولا تسمعي الكلام واذا جيتي نقشتي بيقولك طيب وخلاص ومن هالكلام للاسف هذا حال الاغلب المتزوجين م يفهم انك زوجه له ولازم بينكم حوار وأخذ وعطاء هالشيء مو موجود واسم انو زوجي لازم اسمع كلامه واسكت وانظم ولا يحق اتكلم ترا كثير أزواج كذا أولهم طليقي لازم رأيه وكلمته تمشيء لو اني ميته من التعب م فيه رحمه وبعدين الضرررررررررررررررب اذا انمدت خلاص راح يتعود بدال المره مرتين حتى لو تكلمتي م فيه شيء اسمه انا معصب اضرب هالكلا م لا تصدقينه معصب يطّلع برا البيت بس يمد يده مرفوض هالشيء حياتك طويله معاه اذا جرب وضرب بيضرب بعدين وبعدين وش يفرض هيبته وع من ع زوجته وشهالكلام زوجته اللي المفروض يكون لها امان بدال م يضرب وبعدين ترا الطبع ماراح يتغير ف انتبهي من حياتك معاه وشهالازواج م يفهم انو ذَا زواج احترم زوجتك ولا تضربها الله يعينك صراحه كل التفاصيل اللي ذكرتيها صارت معاي , اغلبها هم كذا ترا يحب يفرض شخصيته وع من ع زوجته شر البلية م يضحك استغفرالله واذا م سمعت قام ضرب ويقولون ليه م تتزوجون انا استحاله ارتبط ب رجل حقوقه ياخذها غصب عني وانا لو قصرت ممكن طلقني ولا بهذلني معاه حسبي الله ع كل زوج م يرحم زوجته ههه تحمست ف كتابه المهم حبيبتي اذا بتعيشي مرتاحه البال معاه مالك الا التجاهل اذا م فاد الكلام معاه |
رد: زوجي ضربني وتلفظ علي
لا تتواصلي معه الى ان يبادر هو ويكلم أبوك ويتعهد بعدم الضرب ..اذا رجعتي بدون اعتذار راح يتكرر هذا الشيء
وانتي بدورك حاولي انك ماتستفزي زوجك اذا شفتيه معصب ,حاولي تمتصي غضبه وتسكتي ولا تردي كل كلمه بكلمة .. الله يفرج همك .. |
رد: زوجي ضربني وتلفظ علي
انتي ماعندك حل وسط
ياتفكري بالطلاق يانك تحبيه وودك ترجعي وتعيشي معه رغم اللي سواه لكن الحل الوسط ابعدي فكرة الطلاق نهائياً لكن ادبيه وخليه ياخذ درس ليس لمجرد انك تنتقمين او تاخذين حقك لا عزيزتي عطيه درس حتى تعيشي باقي حياتك معه باحترام لاتردين على مكالماته حتى لو راضاك واعتذر خليك ثقيله لانك لو رجعتي بيضربك كل شوي وبيتلفط عليك بسهوله وعليك بالدعاء والاستغفار وخلي ابوك هو اللي يتولى الامر ويشد عليه |
رد: زوجي ضربني وتلفظ علي
لا حول و لا قوة الا بالله ...
كم هي عدد سنوات زواجك ؟ وهل هي اول مرة يضربك فيها اخت سام ؟ |
رد: زوجي ضربني وتلفظ علي
الله يدوم المحبة
يقال من الحب ما قتل المهم اختي لازم يكون عندك موقف هذه المرة يعني اثقلي واياك تنزلين من نفسك لان الرجل اذا غلط وضرب مرة وسكتي صديقيني ستتوالى الضربات ويتعود |
رد: زوجي ضربني وتلفظ علي
.
انا عكس من يقول لازم يتعهد بعدم الضرب الامر ببساطه, اذا ماردعه محبته واحترامه لك عن ضربه لك, ماظن التعهد بيفيد بشي! لا ارى تدخل الاهل بيفيد! انصح تتواصلين معه وتكشفين بنفسك مافي داخله اتجاهك, هل احساس الندم موجود؟ الخطاب مثلا يكون كالتالي: اسأليه بنفسك, هل تحبني؟ لما ترضى على من تحب ان يتأذى؟ انا احترمك واقدرك, خاطبني وراح أطيعك وافعل ماتريده! انا لدي كرامتي ولا ارضى ابدا بضربي وايضا لا اطمح بان اكون متقطرسه عليك ولكن زوجه مطيعه. انا لاني احترمك, لذلك تواصلت معك واردت انا وانت فقط نحل الامر بدون تدخل اكثر من الاهل. فهل انت نادم؟ . |
رد: زوجي ضربني وتلفظ علي
انتي تعاملتي معه كأنك ناظر مدرسة
وهو تعامل معك كأنك واحد من الشباب في فوضى بالادوار تعاملي كأنثى وبيعاملك كرجل طلطلتك بجواله ومحاسبتك له على مقطع بنت وطلبك: عطني الجوال تصرفات تفتقد للانوثة ونظام "ضبطتك" يستفز الرجال حبيبتي تعلمي فن التغافل التجاهل الحكمة حتى ما تدفعيه لأي تصرف همجي زوجك أخطأ وأخطأ وأخطأ لكن دقيقة صمت وهدوء وتذكري لا يصلح الله قوم حتى يصلحوا مافي انفسهم |
رد: زوجي ضربني وتلفظ علي
اقتباس:
من حقي ان اثور حين اجد مايهز مشاعري تغاضي وتجاهلي حتى تجديه يوما وقد ادخل عليك زوجه اخرى كانت هي صديقته التي تتغاضين ووتجاهلين امورها واموره اتغاضى عن بعض الكلام اتجاهل بعض التقصير اتنازل من اجل الحياه لكن ادس راسي بالتراب زي النعامه وجواله فيه نساء يتراقصن وارقام وامور تؤدي للعلاقات والحرام ومعصية الله اولا ثم اهانتي ثانيا لا عزيزتي التغاضي هنا ذنب عظيم وعمر وحده ماتغاضت بهذي الامور وطلعت بنتيجه |
رد: زوجي ضربني وتلفظ علي
اقتباس:
تجيك من الواتس اب.. من سناب تشوفيها انستقرام.. حتى لو ساخرة وارد جدا نفس الشيء الرجال نحن بزمن الفيشانيستات صور ومقاطع البنات بكل مكان اصبح الموضوع اعتيادي للاسف اعتقادك ان الرجل اذا شاف بيخون زوجته يعني ان 95% من الرجال هالوقت هم مشروع خونة واعتقد لو الزوج يخفي بلاء معين او متورط باعجاب او علاقه مع بنت معينه استحاله يفتح مقطعها وزوجته جنبه الواضح انها فتاه عاااابره كان ممكن يشوفها بمطعم او سوق وزوجته جنبه هل يعني هذا انه مشروع رجل خائن مستحيل طبعا السؤال الان هل الاهم ان اكون سعيدة مع زوجي او ان اتثبت من حقيقة شكوك واوهام؟ المرأة الذكية تبحث عن سعادتها وسعادتها فقط فقط فقط سعادتي كامرأه تعني الترفع عم السفاسف تعني الرقي عن مقطع جوال وألف بنت لو يشوف بيده ورجله المرأة الواثقه من نفسها لا تهتز ابدا ولا تقاطع زوجها بسبب بنت من الشارع المرأة الذكية تحتفظ باتزانها في كل وقت اعذريني هذا رأيي |
رد: زوجي ضربني وتلفظ علي
اقتباس:
يمكن انتي زوجك يهتم بالفاشينستات والبنات ومقاطعهم لذلك الامر عادي عندك اما انا فزوجي لايهتم الا بمقاطع الكوره والرياضه والسياسه قد يأتي مقطع من احد الاصحاب يكون فيه بنت يعبر عن موقف معين ويكون الامر عابر لكن القى جواله فاشينستات وبنات وسخافه ليش ؟ يتعلم منها كيف يحط ميك اب مثلا ؟!!! ولا كيف يعمل تريتمنت لشعره ؟ ولا يقزز بالجسم والدلع واصلا لو بتغاضى هو بيطيح من عيني على شفاحته وسخافته واللي يتابع هالامور صدقيني حتى بالواقع ماتفلت بنت بالشارع او السوق من نظاراته وغمزاته يازين الرجل العاقل الثقيل المحترم والله وبعدين تقولين هل الاهم ان اتثبت من شكوكي او الاهم سعادتي؟ من اين تأتي السعاده وفي قلبي شك تجاهه ياختي اكون سعيده لكن لا اكون مغفله اكون واعيه وفطينه واؤدي واجباتي تجاه زوجي بمخ صاحي انا اتفق معك ان المرأه ماتكون دقيقه وكل شي تعلق عليه وكل شي تدقق به وكل شي تعارض عليه وتغث الرجال وتزهقه عيشته لكن اكون متابعه حريصه ولا اتحدث معه بمجرد شكوك بل اتحدث معه حين اكون متيقنه من امر لايرضي الله اولا ثم لايرضيني كزوجه لي كرامتي واحترامي احترم رأيك .. لكن الزوجه تكون واعيه والرجل اللي عينه زايغه وجواله مقاطع بنات ولا يهمه لارضى ربه ولا مشاعر زوجته في النهايه بيطيح من عيني ويقل احترامه حتى لو كنت ساكته الله يجنبنا هالنوعيات |
رد: زوجي ضربني وتلفظ علي
كل الاسامي
اذا بنأخذها بنظرة المرأة للرجل فعلا هذه التصرفات تقلل من هيبته وتظهر سذاجة وسطحيه الرجل لكني ضد التصادم معه في هالامور اسلوب المباشرة والخط المستقيم منفر يدخل الرجل مرحله العناد يعتقد ان الزوجة تريد التحكم والسيطرة وينفلت اكثر لامور مستفزة فعلا عطني الجوال/ مين هذي ايش تشوف/ ليه ضايفها الخ عبارات تزيد الطين بله الانثى لا تغير الرجل بالصدام والمواجهة بل ببطء وهدوء واستمراريه كان بامكانها ان تظهر استياء صامت وهو بيرتبك ويسألها ايش فيك؟ لو حبت تجاوب ماتقول عطني الجوال كأنها عسكري مرور يقول عطني الاستمارة لا لا لا ممكن تقول: شفت شي صدمني انت رجل هيبه بعيوني وحكيم ومحترم ماتوقعتك تهتم لهالسخافات عبارات انثويه تقال بهدوء ورقه اعتقد مؤثرة اكثر من العصبيه واللجلجه مشكلتنا كزوجات اننا انفعاليات احيانا وهذا يقلب الحق الذي معنا الى باطل لو نعود قليلا لفطرتنا كاناث ودودات طيبات هادئات لانحلت معظم مشاكلنا لان المواجهة والعصبية صفات ذكوريه والذكور عجولين على التغيير بعكس الانثى تلف وتدور تلف وتدور وتحقق ماتريد بصمت ودون ان تشعر الرجل انه مُهدد |
رد: زوجي ضربني وتلفظ علي
نصيحه دامك تحبيه لاتسبيه الطلاق فكرة ابليس مو فكرتك . الندم يتعب مع السنين شوية احتواء وتفاهم والامور تزين الحياه كذا ظغوط وتعب وتسير اشياء غريبه الحياه تنازلات كل محد زعل من الثاني يقول طلاق وخربطه طيب والبنت اللي عندكم ايش ذنبها شوية تفكير وصبر وتنحل الاموور
|
رد: زوجي ضربني وتلفظ علي
اقتباس:
لي 11 شهر متزوجه |
رد: زوجي ضربني وتلفظ علي
اقتباس:
بس بعد احب كرامتي واحب نفسي مو هاينه علي كرامتي استباحت يده الضرب مرا ما اتوقع ماراح يكررها مرا ثانيه |
رد: زوجي ضربني وتلفظ علي
اقتباس:
انا هذا اللي خايفه منه .. خايفه يستمر على اسلوبه واندم انا اني ما استغليت هذي الفرصه وتطلقت لان اسلوبه كله فرض راي و اوامر لدرجة مرات يقولي لا عشان بس يفرض رايه علي كل شيء عنده قلة ادب وقلة احترام حتى لو ناقشته على شيء من حقي اناقشه فيه يقولي وين احترامي كزوج ههههههه ما ادري كيف فاهم الاحترام جنني |
رد: زوجي ضربني وتلفظ علي
اقتباس:
اخاف اذا تواصلت معاه وقلت كذا يشوفني ضعيفه وميته عليه وانا ما الغاه يحس هالاحساس عشان يحترمني ويحط لي قدر والف حساب اعرفه زين مستحيل يعترف بغلطه ومستحيل يشوف نفسه غلطان ابدا |
رد: زوجي ضربني وتلفظ علي
طيب اخي ادمنتك بعنف
لو قالت له. انت ندمان؟ و قال لها. لا وش تسوي😅 اختي. ابوك عرف بالموضوع؟؟ ماذا قال؟ على فكرة حتى مسكة اليد بالقوة و الوجه😳غلط ردة فعلك سريعة لان الامر لحظي و سريع حصل لن يأتي الإلهام وقتها لجواب أنثوي و صمت هي طبيعة كل وحدة تختلف. اما القول بأن كل الجوالات بها مقاطع معرف كيف و ان دا الحاصل للكل. هذا غلط. مو يعني انه منتشر نتعامل معاه انه عادي؟؟ حبيت أسألك هل لما حصل لك مواقف اخرى مثل مسك يدك او وجهك بقوة هل اعتذر. او شعرت بأسفه |
رد: زوجي ضربني وتلفظ علي
اقتباس:
ايوا ابوي عارف بالموضوع تضايق جدا جدا منه و احتار ماذا يفعل يقول انتي بنتي وهو ولد اختي استصعب الموضوع جدا خصوصا انا ابوي رجل طيب جدا ومايحب المشاكل .. في المواقف الثانيه لما يمسك وجهي او يدي بقوه ماعمره اعتذر او بالاصح حسيت انو ندمان حتى دائم يشوف انا السبب ويذكر اغلاطي حتى لو ماكنت على غلط يغلطني غصب عشان يبرر لنفسه فعلته .. هذا من غير المواقف الثانيه يضيق علي العيشه ما ادري ليش هل هو سيطره وفرض رأي والا خوف منه اني اتمادا لانو حاط فكره في راسه لا تعطي الحرمه وجهه عشان ماتتمادا ولا تعودها على شيء .. مع اني انا احاول اغير نظرته بس مافي فايده .. ياناس حتى اذا دخل علي ببسكوته اشكره واحضنه وابوسه و ابين له اني فرحانه بالشيء البسيط هذا بس مافي فايده بعد |
رد: زوجي ضربني وتلفظ علي
اخبري والدك بطريقة تفكيره تلك و ردود افعاله
و لا بأس ان يجلس والدك معه و مع امه. لتوضيح ذلك الامر. ليأتيه من باب الدين و طريقة التعامل مع الزوجة و احترامها. و من هالكلام. هو مدام هذا تفكيره لن يطرق بابكم و لن يعتذر. |
رد: زوجي ضربني وتلفظ علي
اقتباس:
زوجك ماراح يقدر صمت والدك ولا حيرته لو سمحتي له بهالشي كل يوم حالك بيصير تكفيخ ورفس على اتفه سبب الحب شي اخر والتعامل الخشن شي آخر وفكرة ان الحرمة ماتنعطى وجه هو اللي يخليه يضرب كوسيلة للاذلال عقليات - سبحان الله - الحرمة اللي ماتنعطى وجه قبلها كانت امك اللي سهرت وربت وعانت لين كبرت وطلع صوتك يخلوا الواحد تنفقع مرارته من كلامهم شاف محبتك له وخلاص واثق انك بترجعي له من غير ما يتعب عموما ابوك لازم يعرف كل شي وهو اللي يتصرف ويحزم الضرب خط احمر انت ماتزوجتي لتنضربي |
رد: زوجي ضربني وتلفظ علي
اختي الكريمة ، اسأل الله ان يصلح ذات بينكما و يجمع شملكما في خير و ان يهدي زوجك و يصلح عقليته ،،،، امين ...
طريقة تفكير زوجك تحتاج الى اعادة تأهيل في اسرع وقت و إلا ، خسف عماده و انهار بيته طال الزمان ام قصر ! |
رد: زوجي ضربني وتلفظ علي
اقتباس:
|
رد: زوجي ضربني وتلفظ علي
اخر المستجدات
ابوي اليوم كلمني قال ان زوجي طلع معاه بالسياره وكلمه قال ايش بيصير على الوضع قال ابوي البنت مرا زعلانه وانا زعلان بعد وان الامور ماتوصل للضرب قال زوجي صح والله .. بعدين جا ابوي كلمني يقول لمتى بتجلسين على الوضع هذا كان يبغى اتكلم معاه واتفاهم معاه لكن لما شفت ان زوجي قام يغلطني وكل مرا يغلطني وانا استر على اغلاطه انفجرت وقلت لابوي كل شيء على تفكيره وكلامه وشكوكه .. زعل ابوي مرا مرا وقال هالمرا انا خصمه مو انتي ماحبيت ان الامور توصل للمرحله هذي خصوصا اني احبه لكن كرامتي لهنا وبس مع العلم انو ما كلمني زوجي ابدا ولا اعتذر ولا تأسف ولا حاول حتى يبين لي انو ندمان .. حتى طلبته مصروف لي بما اني جالسه عند اهلي ما اعطاني ولا رد علي .. |
رد: زوجي ضربني وتلفظ علي
اقتباس:
عقلية زوجك ماراح تتغير ودامه كل مره يغلطك نفس شحصية طليقي سبحان م اقول الا الله يعينك تفاهمي معاه بعد م يكلمه ابوك ولو اني اشك انه ماراح يفيد الكلام معاه وبيحقد عليك عشانك قلتي حق اهلك اذا بتعيشين معاه مالك الا قلب جامد ولا تتاثرين وتقوين قلبك وأعصابك خلي ابوك يتفاهم معاه وشوفي وش يصير وطبعا حاولي م تشدين ولا تدخلين نفسك ب نقاشات عارفه ماراح يفيد معاه شيءذ معاه اذا رجعتي خليك ف بنتك وبيتك وتعاملي ب الحسنى لين تشوفين اخرتها معاه |
رد: زوجي ضربني وتلفظ علي
اقتباس:
فعلا دانه الكلام مايفيد معاه و يزيد عناد اذا احد كلمه .. خوفي اني اكمل معاه و اسلوبه مايتغير وخوفي اتطلق منه و تتبهذل بنتي جد محتاره !! |
رد: زوجي ضربني وتلفظ علي #27
كلمني زوجي امس وقالي بيوم وعدتك بحاجه اسويها لك
تعالي شوفيها قلتله ايش هي قال تعالي شوفيها بعينك قلتله ماني قادره امر حتى من تحت بمكان انجريت فيه زي البهيمه ينحرق قلبي قال تعالي شوفي بعينك وقلبك وقتها يبرد .. وهد جا بوقته قلتله مو جايه بعدها ماقال شيء ايش رايكم ؟ هل هذا يعتبر اسلوب اعتذار ؟ |
رد: زوجي ضربني وتلفظ علي #27
اقتباس:
لا تغلطي وتروحي \ خلي ابوك يتفاهم معه قالك ابوك هو خصمي الان ؟ خلي ابوك يتفاهم معه بعدين لاحقه على اللي جايبه لك |
رد: زوجي ضربني وتلفظ علي #27
[QUOTE=Sam_m;3488259]كلمني زوجي امس وقالي بيوم وعدتك بحاجه اسويها لك
تعالي شوفيها قلتله ايش هي قال تعالي شوفيها بعينك قلتله ماني قادره امر حتى من تحت بمكان انجريت فيه زي البهيمه ينحرق قلبي قال تعالي شوفي بعينك وقلبك وقتها يبرد .. وهد جا بوقته قلتله مو جايه بعدها ماقال شيء ايش رايكم ؟ هل هذا يعتبر اسلوب اعتذار ؟[/ شوفي كلشيء ينسكت عليه الا الضرب خلي ابوك يتفاهم معاه عشان يعرف انك وحده م ترضين ع نفسك المهانه انتبهي هالمرا موقفك ذَا يحدد مصيرك معاه لبعدين فكري لبعدين مو ف الحظه وبس خليك ع موقفك وشوفي وش بيقول حق ابوك وقتها عاد , شوفي وش تبين ---------------- |
رد: زوجي ضربني وتلفظ علي #27
فضفضه ..
احس مو قادره اكتم اكثر من كذا 9 ايام وانا مخنوقه ومقهوره منه لانه ما اعتذر او حسيت انه ندمان او حاول يصالحني نفسي اكلمه اهزئه اعاتبه ايش رايكم تأيدوني ؟ |
رد: زوجي ضربني وتلفظ علي #27
استخيري الله قبل ما تمشي اي خطوة ...
الله يفرج همك يا رب |
رد: زوجي ضربني وتلفظ علي #27
حبيبتي حطي هالشيء ف راسك ولحياتك قدام
انتي بتعيشي مع زوج طول العمر ف كلشيء يصير الحين لازم تحكمي عليه من الحين , موضوع الضرب م ينسكت عليه ياختي الحب يجي ب المعامله الحسنه مو احب واحد مو مقدرني حتى لو زوجي ف اتصرفي صح , واستغلي الموقف مثل هالمواضيع م فيه تنازل , ايه الحياه الزوجيه فيه تنازل وتضحيه بس ف مواقف تكون حلوه حلوه لما أكون تعبانه يكون معاي لما يحتاج شيء كبير اوك أكون معاه مو واحد لا يحترمني ويضربني واتنازل واكلمه معليش اصبري هالشيء راح يبين حياتك معاه ب المستقبل وتشوفين ردات الفعل انتبهي واستخيري ربك فيه أزواج لما تكون بينهم مشاكل وتنازل الزوجه وتناقش معاه ب العكس يفرح والبعض منهم للاسف يحسبه ضعف منها فهمني ف انتي عارفه زوجك من اي نوع عشان شوفي طريقك معاه وبعدين وش فيه لو اعتذر وقال معليش معصب مو يعتذر كلام وبعدين لا صار شيء يضرب ترا انتي زوجته مو مديره ف العمل لو قالك أسف بس بعضهم استغفرالله تخلف يشوفه اسفه حق زوجته ضعف وهالازواج بكثره موجودين ف الله يعينك ويصبر العيشه مع رجال يبي لها صبر مو اي صبر من خالي تجربتي بعضهم ينصبر عليه وبعضهم لا والله |
رد: زوجي ضربني وتلفظ علي #27
آختى لا تستعجلى هترجعى له ان شاء الله ولكن اتركى الوالد يآدبة لان الضرب خط احمر واذا تعود عليه الرجل لن يتوقف ادخلى موضوع آختى لوفتى لترى ان الزوج اذا مد يده مرة لن يتوقف ولكن يزيد الوتيرة مرة بعد الآخرى لانك لو تحدثتى اليه سيضحك عليك بكلمتين لانه اكيد مشتاق لك وانت بعيدة عنه اسبوع وبمجرد ما ينطفىء الشوق سيرجع مثل اول واسوأ مادام صعدتى الآمر واصبح بين الرجال لا يحق لك التدخل والا لن يكون لك اى قيمة عندة وسيعلم انك لا تصبرى على فراقة وكل مرة يفعل معك مصيبة ويقول هتزعل يومان وهترجع على انفها تصالحنى وانتهى الموضوع اسأل الله ان يربط على قلبك ويرده لك زوج تقى نقى صالح وانتى اكثرى من الاستغفار والصلاة الابراهيمة وسترى العجب اذا اراد الله عز وجل |
رد: زوجي ضربني وتلفظ علي #27
لا تكلميه و لا تهزأيه
انتظري |
رد: زوجي ضربني وتلفظ علي #27
صارت احداث جديده ..
زوجي كلم ابوي انه بيجيني اليوم وجاني اول مادخل حضني وباسني مع وجهي ويدي وجلس على الكنب واخذني بحضنه طبعا كل هذا وهو ساكت بعدين قالي كيف حالك قلتله طيبه قالي تدرين وحشتيني سكت انا ماقلت شيء وهو جلس فترة طويله ساكت استنى منه يعتذر يتأسف يقول شيء ماقال شيء ابدا بعدين قالي بخاطرك شيء بتقولينه ؟ قلتله ينفع الكلام ؟ قال ينفع ليش ماينفع قلتله تحبني ؟ قال هذي مافيها كلام قلتله طيب ليش تضربني وعلى ايش ضربتني اصلا مافي سبب ولو في سبب مايحق لك تضربني ؟ رجع يغلطني مرا ثانيه وانتي وانتي وانتي مليت من اسلوبه هذا ماحسيت فيه اي تحسن في الوضع او شيء بيتعدل بحياتنا لو رجعت .. قالي انا اقدر اوصلها للمحاكم واسوي مية مشكله بس ما ابغى امرمرط خالي .. اااهه ياناس غلطططان علي ويهددني بالمحاكم وهذي مو اول مرا مسوي فيها قوي .. لما شفت كلامه كذا وانا اقول انا خلاص ماعندي كلام اصلا احنا مستحيل نتفاهم ( طبعا كل كلامي كان بهدوء واحترام وماسكه اعصابي رغم طريقة كلامه المندفعه وتهديده بالمحاكم ) قالي يالله اجل انقلعي واقلبي وجهك شوفيلي الدرب !!!!! قمت وفتحتله باب البيت عشان يروح ( وماسكه اعصابي على الاخر ) قال تبغين بيتك هذاك هو قلت مو جايه ضربني كف خفيف ومسكني مع اذني وقال هذاك بيتك تبغينه تعالي فيه !!!! هههههههههههههههههه ياجماعة قسم بالله مدري ايش اقول يضربني كف في بيت اهلي بعد 😳😂😂😂 معليش بس جد جاني ضحك من هول الصدمه ومن اسلوبه السيء اتصلت على ابوي اخبره انه ضربني جا ابوي وكلمه ليش تضربها يحلف بالله انه ماضربني قال انا بس مسحت على وجهها 😳!!! بعد يكذذذبني بس حسبي الله ونعم الوكيل ما احس فيه نفعه خلاص وقبل شوي ارسلي بيت شعر ان بعدك عني عذبني وتعبني انا مصدومه من تناقضاته رغم اني متأكده انه يحبني بس اسلوبه ياناس اسلوبه سسسسسيءلا يطاق ايش رايكم |
رد: زوجي ضربني وتلفظ علي #27
احتاج ارائكم بشده بالذات اخواني شاطىء الراحه ولوفي والوحيد
لاني 70% افكر بالطلاق |
رد: زوجي ضربني وتلفظ علي #27
مدري وش اقول صراحه الله يعينك انا تنرفزت من أسلوبه معاك وش ذَا
الله ينور بصيرتك ويعطيك الصبر |
رد: زوجي ضربني وتلفظ علي #27
استخيري الله يفرج همك ويصلح زوجك ويسخره لك
|
| الساعة الآن 04:37 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©