|
كيف أتعامل مع زوجي بعد التقاعد؟
السلام عليكم ورحمة الله وبركاته
أثق فيكم وحابة آخذ آراءكم وتنوروني بنصايحكم كيف أتعامل مع زوجي بعد التقاعد ، هو باقيله عدة شهور ويتقاعد.. كيف تكون نفسية الرجل بعد التقاعد خصوصاً وهو متعود عُمره كله دوام وشغل. والشي الثاني أنا مدرسة وعندي دوام وهو حيكون جالس في البيت وأنا أروح للمدرسة ،أنا حنام بدري وهو أكيد حيسهر لأنه يحب الكورة وبرامج الكورة ،،كيف أنسق هذا الموضوع؟ وهل هذا الوضع يأثر على نفسيته أو على علاقتنا؟ والأمر الآخر هو يقول إنه راح يريِّح بعد التقاعد شهر ثم يفتح مشروع،، طيب إلين مايفتح المشروع ويوقف على رجوله معقولة ياخذ مصروفه مني؟ مع العلم هو راح يستلم من عمله كل مستحقاته المالية حقت نهاية الخدمة وراح يكون مبلغ حلو. أرشدوني كيف أتصرف معاه من هذه الناحية.. خلال زواجنا هو قصر معايا كثير كثير كثير مع إني ماقصرت معه مادياً بشي.. بس لما شفته اتسلتح علي وما قدّر مواقفي صرت ما أعطيه قرش ولا أوقف معاه حتى لو قال ماعندي مايهمني ولا أتأثر ولا أحن عليه .. قولوا لي دحين كيف أتصرف في حياتي الجاية معه؟ أنا راح أعتبرها حياة جديدة وعلاقة جديدة لأني ماأبغاه يستغلني أكثر مما استغلني ، ولو إنه ماكان متزوج مدرسة كان حيتصرف وياكل ويأكل مرته من عرق جبينه.. أعطوني أي نصيحة تفيدني في حياتي حتى ولو ماكانت النصيحة ضمن المحاور اللي ذكرتها.. الله يسعدكم ويجزاكم كل خير.. |
رد: كيف أتعامل مع زوجي بعد التقاعد؟
واضح من كلامك اخت حور انك النوع المنان في عطائه ..
يأخت حور راجعي نفسك اذا انتي بتذكرينه بأفضالك عليه ليه تعطينه من الاساس .. معروف الرجل اذا وجد في الحياه الزوجيه من تقوم بدوره يبدأ بالتملص من دوره حبه حبه حتي يكون الحمل كلها عليك .. وفكره انه يفتح له مشروع جيده جدا حتي مايتفرغ لك ويكون بينكم صدام دائم |
رد: كيف أتعامل مع زوجي بعد التقاعد؟
اقتباس:
من فين اتضح لك من كلامي إني منيت عليه؟ اطلاقاً ماحصل هذا الشي وربنا هو اللي شايف ومطلع على كل شي. أنا أخذت موقف وقرار ونفذته إني ما أعطيه لأني لمست منه -- مقابل العطاء. فليش أستمر؟ ثم كيف أوفق مابين مقولة الحرمة تساعد زوجها وتوقف معاه وبين كلامك ((((معروف الرجل اذا وجد في الحياه الزوجيه من تقوم بدوره يبدأ بالتملص من دوره حبه حبه حتي يكون الحمل كلها عليك .))))) |
رد: كيف أتعامل مع زوجي بعد التقاعد؟
استشفيت من كلامك انك مانسيتي الي قدمتيه له فمجرد التفكير في هذا المنطق قد ينغص عليك حياتك
وهذا رأي قد يحتمل الخطأ |
رد: كيف أتعامل مع زوجي بعد التقاعد؟
عزيزتي انا حور
تقولين بتقاعد معناة راتبه التقاعدي يقدر يصرف على نفسه منه .ماراح ياخذ مصرفه منك،، ثاني شيء شجعيه على المشروع الي بيسويه وتناقشي معاه ، لأن الرحل يعد التقاعد تتغير نفسيته ،، ابوي تغير بعد ماتقاعد صار يدقق بكل شيء ، صار يراقب تصرقاتنا ، صار اغلب وقته بالبيت ،زادت مشاكله مع امي، لكن له فترة تحسن بكثير عن اول 6سنوات تقاعد فيها.. صار يسهر معانا انا وخواتي ،صار يدخل معانا المطبخ يمزح معانا بالكلام ..يسوي لنا مقالب.. يعني انتي لا تقصري وياه مايصير وقت فراغ عنده اشغليه ،انتي وشطارتك استاذتي الغاليه |
رد: كيف أتعامل مع زوجي بعد التقاعد؟
واذا عاونتيه ماديا وكنت مقتدرة هل في اشكاليه ؟ بينكم عشرة عمر ورفقاء درب ,واكيد ماكملتوا المشوار والحياة الزوجيه الا ان شاء الله بينكم الفه وموده .
|
رد: كيف أتعامل مع زوجي بعد التقاعد؟
اقتباس:
لو في رجل تزوج فتاة وهي تدرس انتساب في الجامعة ودراستها في منطقة تبعد عن سكنه 150 كيلو هذا الرجل وقف مع زوجته وتعب لأجلها وضحَّى بأمور كثيرة من أجل تخلص دراستها مثلاً ماتطبخ يطبخ هو أو يجيب من السوق طول السنة مو بس أيام الإختبارات يوصلها للجامعة ويظل ماسك بنته الصغيرة معه بالسيارة إلين تخلص من اختباراتها ينظف البيت بنفسه ومرات يجيب شغالة بالساعة تنظف ماقصَّر مع أهلها بيَّض وجهها في الصغيرة والكبيرة يهديها بمناسبة وبدون يسفرها يحترمها ويقدرها وووو.....الخ أكيد ماكان مطلوب منه كل هذا العطاء والحب والإهتمام، لكنه كان يأسس حياته على العطاء والتضحية والوفاء طبعاً هذا الرجل مو كامل ومايخلى من العيوب البشرية لكن هذه بعض مميزاته.. زوجته تخرجت وتوظفت ولا تدفع في البيت قرش في المقابل ماقصرت على أهلها أغدقت عليهم أشكال وألوان الرجل اتفيرت ظروفه وصار مسؤول عن أهله وهي مامدت يدها وساعدته أو اتحملت شي من المسؤوليات تخفف العبء عنه ولو على الأقل من باب رد الجميل ما أصدق إنه ماراح يجي بقلبه إنه وقف معاها وضحَّى عشانها وهي ماوقفت معاه وما ضحَّت عشانه. جاوبني بواقعية بعيداً عن المثالية لو كنت مكانه حتنسى كل اللي سويته عشانها وحيستمر عطاءك بنفس القدر وبنفس السخاء لهذه الزوجة ولا حتشوف من حقك تاخذ موقف وتوقف عطاء ماله داعي تأدي واجبك وبس. |
رد: كيف أتعامل مع زوجي بعد التقاعد؟
اقتباس:
أمك هل كان لها دور في تغيُّر والدك للأحسن؟؟ |
رد: كيف أتعامل مع زوجي بعد التقاعد؟
اقتباس:
من ناحيتي جاني خيبة أمل لأني مديت يد المعاونة وهو جحدها والآن مابدي أكرر نفس المأساة وأنكسر من جديد... القلب ماعاد يتحمل.. |
رد: كيف أتعامل مع زوجي بعد التقاعد؟
تغير محور الموضوع
هل تبحثين عن حل لاقناعك بزوجك وتقصيره عليك سابقاً او تبحثين عن طرق التعامل معه بعد التقاعد؟ لاقناعك شوفي الاشياء اللي بينكم والعشره اللي بينكم مو بس لانك صبرتي شوي يمكن هو بعد عانى وتعب يمكن انتي تشوفين الاشياء اللي سويتيها كثيره بينما لو تقارنين كل شي سويتيه وكل شي هو سواه بيكون هو الاكثر (يمكن) شوفي العشره اللي بينكم والسنين اللي راحت. تقولين انا معلمه وهذا بحد ذاته البعض يشوف انه شي صعب. صحيح انك تساعدينه مادياًَ لكن معنوياً ربة البيت تساعد اكثر منك ولا تحاولين التبرير بانك ماقصرتي معه معنوياً وان الوظيفه ما أثرت عليكم بالبيت لاني دايم اسمع من الموظفات اللي يقربون لي انهم بحياتهم ماقصروا بشي وبالعكس ازواجهم مايلاحظون انهم موظفين واللي حاصل غير اللي يقولون ترجع الوحده منفسه وتعبانه حتى لو انها حاولت تبين غير كذا يظل الشخص يقدر يلاحظ ومايمدها تطبخ الا وهي نايمه ترتاح واذا قامت تحاول تخلص اشغالها التابعه للدوام وعيالها وهواش وازعاج اما اذا كان الموضوع عن تقاعد زوجك عادي حاولي تشغلينه واذا تقاعد بينزل له راتب ومبلغ عن كل سنه خدم فيها شوفي الاشياء اللي ناقصه بالبيت او قولي له يهتم بالعيال والبنات ويتقرب منهم اذا كانوا مراهقين والحجه علشانه الاب وهم يحتاجونه :) |
رد: كيف أتعامل مع زوجي بعد التقاعد؟
من كلامك أحس انك تكرهين زوجك فما هو السبب ؟
|
رد: كيف أتعامل مع زوجي بعد التقاعد؟
اقتباس:
أنت غيرت محور الموضوع وأنا رديت عليك..ولما سألتك سؤال محدد إنت اتجاوزته.. اتشعبت في ردك وتقارن بين الموظفة وربة البيت مدري ليش إلا تبغى تقنعني إني مقصرة لأني موظفة وإني ممكن ما أكون شايفة حسنات زوجي وإنه فعل وفعل وفعل عشاني وممكن يكون عطاؤه أكثر من عطائي وووو ...... الخ بس أنا مو شايفة ولا مقدرة.. يا أخي أنا ماجيت كتبت هنا إلا بعد معاناة مُرّة شديدة ماجيت نَمَّقْت الحروف عشان تصفقوا لي والله سويتِ وسويتِ وسويتِ ومحد يسوي اللي إنت سويتيه ولا أحد يقدم اللي قدمتيه.. أنا ماقلت لكم إني فعلت وفعلت عشان ماتتهموني حنانة ومنانة.. مع ذلك أول رد جاني منك إني منانة.. وضحت لكم الصورة وأعطيتكم الزبدة أبغاكم توجهوني للوجهة الصحيحة لأني تعبت نفسياً من زوجي ومن نكرانه وجحوده.. وما أبغى حياتي تستمر للأسوأ... قايمة بواجباتي المادية والمعنوية على أكمل وجه.. وبشهادة زوجي نفسه.. ومابيننا أولاد ولا بنات يشغلوني عنه.. عندي بنت واحدة من زواج سابق وهي ماشاء الله كبيرة شايلة نفسها مو مشغولة بيها عنه.. أصلاً مافي شي يشغلني عنه وعن البيت غير شغل المدرسة وحتى شغل المدرسة ثلاث أرباعه أنجزه بحصص الفراغ.. وهو يجيني قرب المغرب من الدوام.. يعني خلصت شغل وطبخ ومتبخرة ومتعطرة كل يوم زي العروس أنتظره.. وتجيني شغالة تنظف لي البيت مرتين في الأسبوع.. حياتي بتوفيق من الله من أحسن مايكون..لكن ماقدرت أعالج -- والجحود اللي متأصل في زوجي.. عموماً موضوعي واضح يخص التقاعد.. لكني بجاوب على مداخلاتكم عشان تجاوبوا علي والرؤية تكون واضحة لكم.. مع العلم زوجي ماعنده راتب تقاعدي... |
رد: كيف أتعامل مع زوجي بعد التقاعد؟
اقتباس:
كنت أحس إنه الهواء اللي بأتنفسه كنت أحب الأرض اللي يمشي عليها حبيته بجنون وبات حدود كان كل دنيتي مدري تصدق ولا ما تصدق لكن هذه هي الحقيقة من كثر ماخذلني ودمرني الصراحة ماكرهته لأن اللي يحب بصدق مايقدر يكره لكن جاتني حالة احباط وخذلان وخيبات فصرت حذرة. |
رد: كيف أتعامل مع زوجي بعد التقاعد؟
أنا أصلاً كان لي موضوع في هذا المنتدى استشرت فيه قبل عدة سنوات بس ضيعت المعرف حقي وما قدرت أوصله.
|
رد: كيف أتعامل مع زوجي بعد التقاعد؟
اقتباس:
هل تقاعدة لظروف صحية لاانة بدري على التقاعد وانتي تقولين يعمل في مؤسسة وسن تقاعد المدني بالمؤاسسات والوزرات والشركات 60 سنة !!!! هل انتي زوجة ثانية؟ |
رد: كيف أتعامل مع زوجي بعد التقاعد؟
اقتباس:
كان متزوج قبلي ومطلق زوجته وأنا انزوجته تقريباً قبل 8 سنوات وماعنده زوجة غيري المؤسسة اللي هو شغال فيها جالسين يخلوها من الموظفين لأسبابهم وهو اتقاعد قبل الـ60سنة يعني مو هم اللي قاعدوه. |
رد: كيف أتعامل مع زوجي بعد التقاعد؟
مرحباً أختي
1- مسألة كيف سيكون زوجك بعد التقاعد وكيف ستكون نفسيته .. هذه علمها عند الله والرجال مختلفين في طباعهم في هذا الأمر فمنهم من يبقى على نشاطه ومنهم من يكسل ومنهم من تبقى نفسيته كما هي ومنهم من يصبح يدقق ويصبح ممل وغثيث وغير ذلك من الإختلافات 2- مسألة ماذا ستفعلين معه .. هذه تنبني على مدى رغبتك العيش معه والصبر على ظروفه الجديدة .. لأن التقاعد يعتبر الآن حياة جديدة سيمارسها زوجك وبالتالي ستنعكس عليك 3- مسألة هل ستصرفين عليه أم تتوقفي .. هذه مبنية على الواقع الذي ستعيشيه وقتها وهل ستضيق عليك الحال لو هو أصبح لا يملك المال للصرف عليكم أم سيتدبر أمره .. كذلك لا مانع من أن تساهمي معه بمبلغ بسيط لو أحتاج الأمر .. فأن تسير حياتك وتعيشي مع زوجك أهم من بعض المال الذي ستدفعيه له وتمشي حياتكم سوياً 4- مسألة عدم تقديرة لما فعلتيه من أجله والوقوف معه .. هذه ترجع لأخلاقه وإنصافه للحق ورد الجميل لكل من يحسن إليه .. ولكن إذا كان هو لا يملك كل هذه الصفات .. فليس لكِ حيلة إلا أن تحتسبي مواقفك معه لعل الله يكتب لكِ الأجر بها في إحسانك لزوجك وأنك كنتِ نعم الزوجة الصالحة المعينة لزوجها بارك الله فيك |
رد: كيف أتعامل مع زوجي بعد التقاعد؟
اقتباس:
نادرا ماتسمعي هذه الكلمه من الرجل ( انا ضحيت عشانك كثير ) فهي مرتبطه في المراءه انا اتكلم في الغالب بعيدا عن الحالات الإستثنائيه فالمثال الذي ذكرتيه تأكدي ان الرجل لن يقوم به الا اذا كان راغب بذلك رغبه تامه وإلا سيتهرب ويبدي الحجج ويختلق المشاكل .. وفي حال قام بهذا الدور من مساعدتها وجحدت هذا الجميل لن يتطرق لما قدمه لأنه لم يقم بذلك الا بناءا علي مارسخه في ذهنه انه واحب عليه قلا تعتقدي ان العطاء المادي قد يجعل من الرجل ذاكر لجميل ماقدمتيه يل سيعتقد انه من باب الواحب في بعض الاحيان أنا لا انظر يا أخت حور لكن اتكلم بواقعيه قد لاتعجب الكثير |
رد: كيف أتعامل مع زوجي بعد التقاعد؟
اتركونا من موضوع الفلوس
الفلوس هي جزء من الامور التي يجب أن يتم التعامل معها بعد التقاعد لأن هناك ثمة متغيرات لابد أن تحدث للمرء بعد تعاقده، وليس أولها الفلوس كما أن المرأة من حقها تتخوف من هذا الموضوع، خصوصاً إذا كان هناك تاريخ غير مقبول من ناحية التعامل المادي بين الزوجين. الانسان حينما يتقاعد، قد تكون هناك آثار مختلفة منها أثر سلبي، والاحساس باللامعنى ونزول مستوى الاحساس بالقيمة الذاتية والتقدير من قبل الآخرين احساس المتقاعد أنه كان يستند على جانب متين (وهو الوظيفة) يعزز وجوده بين الناس. احساسه باندثار أحد أهم مقومات قوته المتثلة في الوظيفة أكثر من يعاني من هذا الشعور هم التالي: 1- الناس الذين يحبون عملهم ويشتغلون بجد وعطاء 2- أصحاب المناصب، فكلما كبر منصب الشخص كلما كان أثر تقاعده أكثر سلبية على نفسه وهذا الامر ليس قاعدة، ولكنه ملحوض. هناك بعض الناس حينما يتقاعد يطور من نفسه ويكتشف هوايات أو بزنس جديد، وهؤلاء هم أكثر الناس واعياً بما يقابلهم من مخاطر بعد التقاعد، فيبادرون إلى العمل وإلى ملئ وقت فراغهم قبل أن تداهمهم عوارض التقاعدات. ينتشر لدى كثير من المتقاعد وبحكم كثرة الفراغ التدقيق والملاحظة على كل صغيرة وكبيرة، بحيث يصبح فارغاً من الاعمال ومن الأفكار التي تجرها تلك الاعمال على بقية يومه وعلى قلة وقت فراغه، فيلجأ إلى التدقيق على كل صغيرة وكبيرة على الأخرين وخاصة أهل بيته وعلى ممتلكات بيته. بخصوص المال: المتقاعد يأتي مبلغ جيد بعد تقاعده بالعادة، ويمشي له راتب عادة يكون أقل من راتبه أيام الوظيفة، ولذلك هو لن يكون عالة على زوجته أو أهله، كما هو الحال مع العاطل. |
رد: كيف أتعامل مع زوجي بعد التقاعد؟
اقتباس:
يستلمه من التأمينات الاجتماعية |
| الساعة الآن 01:11 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©