|
القوامة للأخ أو للزوج ؟مستجد الرد (21)
السلام عليكم
بحاول اختصر الموضوع وارجو ارشادي في ذلك عانيت في طفولتي من تسلط اخوتي وخاصة في مراهقتي من الضرب المبرح ومن تسلط لسان امي ومن ضرب اخوتي لي وتسلطهم علي وعلى اختي الاصغر مني ولا رادع لهم حاولت بعد الثانوية اشغال نفسي بتدريس القرآن للاطفال وعشت صمتا رهيبا في تلك الايام بعدها قبلت في الجامعة ولله الحمد بعد التخرج عدت للبيت لصعوبة الحصول على وظيفة عانيت فيها الامرين من اخوتي حاولت ان انهج حياة الصمت واصبر على ذلك لعل الله ان يفتح لي بابا ينسيني الهم والتعب أمي كانت في صف اخوتي وهذا ما تربينا عليه ان الولد يختلف عن البنت وكلمته مقدمه ولا رأي للبنت في شي ولا حق لها والتفاصيل تدمي قلبي حاولت ان تدخل امي احدى مدارس القران في بلدتنا علها تهدأ من عصبيتها وسبها ونعتها لي باليهودية رغم اني قائمة لليل احفظ اجزاء كثيرة من القران لا احب الخروج منعتني من صديقاتي الى ان باتت لدي عقدة فلا اخرج ابدا حتى في التجمعات العائلية كانت انذاك اختي الصغيرة في الجامعة مرت السنوات واذكر انني في ليلة من الليالي العشر في السنوات التي مضت دعوت الله بكل رجاء وصدق ان يخرجني مما انا فيه وان يجعل في قلبي انسا وراحة وان يرزقني بوظيفة كنت قد تقدمت لها قبل رمضان وبعد انتهائي من الصلاة وجدت الراحة وكأن البشائر ستأتي قريبا بعد رمضان جائني اتصال بقبول للوظيفة وكانت بعيدة اي انها في العاصمة وارتاحت نفسي عندما انتقلت للعمل هناك بدأت استقل بذاتي للعلم ابي كان ضريرا واخوتي لا يعيرونه اهتماما كنا انا واختي نقوده للمسجد ثم مرض واصبح طريح الفراش اصابه الشلل وكنت اقوم برعايته إلى ان فارق الحياة اسأل الله يجمعني به بعد سنة من عملي احست امي بفقدي لاني كنت اقوم بكل مشاغل البيت فأختي الكبرى متزوجة ولا تساعدها بل تحملها عناء الطبخ وتقول انا اتيه لارتاح مثلما كانت تفعل معي اعنت والدتي في كثير من الامور واخوتي وراتبي صار لأهلي الى ان من الله علي بتخرج اختي وساعدتني في ذلك بعد ان قضت على الديون المتكبلة عليها في دراستها لان جامعتها خاصة والفضل لله توظفت لم نقصر ابدا في البيت بل تغير حالنا للافضل سأكمل مستجد الرد 21 http://www.66n.com/forums/showpost.p...0&postcount=21 |
رد: القوامة للأخ أو للزوج ؟
نظام أهلي ان الاخت لو توظفت إجباري تساعد في مصاريف زواجه تزوجو إخواني
طبعا تحملنا عبء كبير من مصاريفهم اختي تكفلت بمهر اخوي أجبرت على ذلك وانا تأثيث بيته وياويلنا لو رفضنا او قلنا مع معنا الاخ الثاني ساعدناه بالمهر وتأثيث بيته يعني جاءتهم الحرمة بلاش ماعليه المشكلة مايخلونا براحتنا لو نطلع مكان لازم نستأذن الاخوة الاربعه كلهم عشان يأذنوا لنا وياليت في احترام مالنا حق نتكلم لو احد منهم عمل حادث الله يبعد الشر عنهم وعنكم لازم نعوض لهم كلهم يقوموا علينا ان لازم ندفع لهم وهم اصلا ما يدفعوا لأخوهم شي يعلم ربي ان وصل بي الحال التدين من زميلاتي وانا ما تعودت بس من كثر ماودي أتفادى سبهم وشتمهم كلامهم بعور القلب ببالهم ان فلوسي من حقهم يتمتعوا فيها اشتغل لي 10 سنوات ما جمعت لنفسي فلس تقدموا لخطبتي بعضهم رفضتهم وواحد جابه اخوي مطلق معه 7 أولاد يلي آربيهم وهو من قبيلتي رفضت ما أتحمل أعيش ها لوضع ودي اهرب من عيشة السيطرة صرت استغرب من اي وحده لما تقول طالعة مع اخوي كوفي وهو فعلا أخوها صورهم العائلية قوة الاحترام والانسجام بينهم والود تزوجت اختي اللي أصغر مني وربي رزقها بزوج طيب وحنون وصالح ومحترم شايلها فوق راسه وانا تقدم لي هالشخص بعدها بسنة يشتغل في نفس العاصمة كنت متخوفة من الأقدام على الموافقة ووافقت بعد استخارة لمرات عديدة للأمانة شفت منه الطيب والاحترام وما يرفع صوته علي أهله يحترموني جبت بنوته ولي من تزوجته ثلاث والآن في شهوري الأخيرة قلت الحمد لله بعيش حياتي بعيده عن منغصات البيئة اللي اعيشها وزوجي عقله غير عن عقلية إخواني يهتم لمشاركتي كل شي حتى بلبسه اللي وده يطلع فيه معي الحمد لله حمدا طيبا اخوي كان يقول زوجناهن ودنا نشوفهم يذلوهن لكن الظاهر خلنهم خواتم في أصابعهم صارت مشكلة بيني وبين اختي الكبيرة صارت تدخل بحياتي كثير وشغلها الشاغل تعبي راس امي ان كل فلوسي أعطيها زوجي رغم ان تعرف ان انا عندي سلفية كبيرة من بنك إسلامي تمويل وان اكثر من نصف راتبي يروح لها وكثرت الكلام علي وصارت تشحن إخواني علي قلت لعلها أزمة وبتعدي امي ماصات تكلمني لو بحط ببيتي مكيف من اللي دفع انت او زوجك اختي تسوي نفسها ماقالت شي قالت مصيرك تطلبي وترجعي لأهلك وزوجك ماراح ينفعك وزوجي احسن من زوجك زوجها ما بقى آدمي ما تسلف منها مصدومة من اختي للعلم هذي الكبيرة ماقصرت معها بشي حتى مهري عطيتها منه لانها أمورها متعرقلة عاملتها اساعدها فيها طبعا اخوي هذا حب ان يسوي فيها ان محد يقدر له جاء صار يتكلم على زوجي وأنك مصدقتي زوجناك انك ميته ع الزوج وتبعتيه وصرتي تمدحيه قلت وش يضرك لو مدحته المفروض تفرح لسعادتي قال وليش ما تتواصلي مع أختك قلت له هالموضوع بيني وبينها وانا وهي متفاهمين قال انت مافيك أدب ولا احترام ومن مرتبيه وانا قيمك وتفو على وجهك قام يتفل فيني طبعا نحن حقنا مهضوم تماماً ولا احد يرده قلت له انت اللي مافيك ولا احترام وانا حرمة بزوجي وعيالي وحامل وفيني تعب وانت هذي ألفاظك معي قال تشب مات تتكلمي معي لما أشتكيته مع احد إخواني قلت يمكن وضعي تغير بعد زواجي الا ويقول اخوي ليش تردي عليه المفروض ما تردي والحين اعتذاري له وهو قيم عليك ونحن كلتا قيمين عليك حتى يقدر يضربك والله االعظيم ان جاني انهيار عصبي من وضعي اتصلت بزوجي وجاء وكان يقول قدام زوجي هذي كلبه الله يكرمكم انفجع زوجي لان كنت امتدحهم أمامه وقول له هم عزوتي وانا ما شفت الا إهانة قلت له أرجوك خذني ودي أنام لي أيام انمت من التعب قالت امي لو طلعتي من بيتي لان انا أجي لامي واجلس ببيتها وان لي قسمة الميراث من أبوي الله يرحمه قالت لو طلعتي لا تدخلي يا امي انا تعبانه أغمي علي وصابتني حالة تشنج وأخذني زوجي المستشفى الضغط كان نازل حركة جنيني توقفت تماماً وبعدها شيكوا ع الجنين والحمد لله طبعا لا اخوي اعتذر ولا شي قلت لزوجي خذني لبيتك ودي أنام ودي ارتاح وبعدها ردني لبيت امي عشان تزعل انا لما طحت بنتي كانت تصرخ وهي تشرفني تعبانه رغم انها صغيرة مازلوا يرددوا ان لهم حق يأمروني يسبوني وان القوامة لهم ومصيري ارجع لهم زوجي ما سكت قال ولا اسمح لاحد يمد يده عليها قسم لهم ان لو صابني شي منهم لغير ما يسكت عن حقي ولو احد تلفظ علي بلفظ سيء كأن تلفظ عليه طبعا امي اتصل بها مايرد علي أبدا مساندة لولدها لين اعتذر منه ما فيني قلب اعتذر بعد اللي سببه لي بس تعبت من السكوت على ظلمهم وأعجرفتهم انتظر آرائكم ادري يمكن احد منكم يلومني ان رديت عليه بس والله من الضيم اللي شفته اذكر مرة قبل زوجي حتى كلمة الزانية قالها لي ومارديت عليه ولما رجعت لامي قالت ماراح أكلمك الا من تسلمي ع أخوك قلت امي قذفني قالت ما يهمني هذا عضيدك هذا سم سقيتوني لما جئت اسلم عليه دفني بقوة وقال ذلفي عني يا كلمة ماتنقال انتي مافيك أدب قلت لها شفتي قالت هذا أخوك عادي احس بختنق لو بيوم أشتكيت من زوجي لمن بروح اذا السند مات بالنسبة لي قلت لها اطلب احترامي واللي بيحترمني بعطيه ماء عيني واللي ما يحترمني مله قدر عندي لاني تعبت من التضحيات والتنازل ع سبيل رضاكم لين جاتني عقدة صرت أتمنى كل عيالي بنات |
رد: القوامة للأخ أو للزوج ؟
لو في أخطاء إملائية سامحوني وإذا أطلت عليكم عذروني بس بعض التفاصيل اللي اضطريت اذكرها بتوضح لكم
|
رد: القوامة للأخ أو للزوج ؟
كسرتي قلبي...
وظلم ذوي القربى أشد مضاضة . على المرء من وقع الحسام المهند.. الأهل المفروض يكونون عزوة،، وسند لبنتهم بعد الله،، الله يقويك ويصبرك على هذا الابتلاء.. برأيي انتِ تساهلت معهم جدا وضحيتِ تضحيات في غير محلها.. الى ان تجرأو عليك وحسبو معروفك معهم مفروغ منه و من المسلّمات.. للأسف البعض ولو كانوا الأهل ماينفع معاهم الصبر والمداراة.. عندك زوج طيب ومقدرك وبيتك واولادك خلاص اختي ابعدي عنهم وخلي صلة الرحم في الحدود فقط.. افهم انك خجلانة من زوجك، وطبعا تمدحيهم امامه هذا هو الاصل.. لكن هو حاليا اكتشف وجه اخر لهم.. لا تخلي هذا الأمر يؤثر على حياتكم.. لاتشتكي له منهم، حتى مايمل منك ومن سواليفك.. خلي بيتك دنيتك وابحثي عن رضى زوجك اما رضى اهلك فالظاهر غاية لن تدريكيها الا بقدرة قادر.. مستواهم في التعامل متدني جدا.. لا ادب لا احترام لا خوف لا دين.. لا تظلمي نفسك بالتودد لهم والسكوت على أخطائهم.. مما تخافين؟ صلة الرحم والاحسان لذوي القربى يجب أن لا يجلب لك الأذى والأمراض ويضر استقرارك مع زوجك.. اخوتك رجال خليهم يشمروا على سواعدهم ويتكفلوا بأنفسهم وأمهم انتي بنت هاد مو مسؤوليتك.. اما اذا تفكرين اذا راح الزوج مين بيسندك،، ساندوك وانتي بعزك بيساندوك اذا جار عليك الزمن؟؟ عليك بنفسكوزوجك وبيتك وخليك فرفوشة خلي زوجك ينسى السالفة.. |
رد: القوامة للأخ أو للزوج ؟
اقتباس:
|
رد: القوامة للأخ أو للزوج ؟
لاعاد تعطيهم ولا ريال وفلوسك إشتري فيها شي لك ولأولادك
وامك لو رفضت تقابليها براحتها متى ماطاح الي في راسها تطلبك تجيها عيشي لنفسك ولأطفالك ونصيحه لا تكثري شكي لزوجك لا يحس انك ضعيفه مهما وصلتي من التعب الرجل يحب المرأه القويه وماتدري يجي يوم يتبدل حالك معاه خليه يشوف ردك فعلك القويه تجاه أخوانك الي يسبك سبيه ولو وصل اخوك لمدة اليد بلغي عنه خليه يتأدب ويشوف زوجك قوتك التغاضي والتساهل مع الناس الي ماتقدر خطأ اظهري وجهك التاني لهم وربي يرزقك بالسند لاتخافي اذا ربيتيه ع احترام الانثى وعدم رفع صوته عليها بيحترمك ويقدرك امك تربيتها انقلبت عليها مو لانها تحب الاولاد اكثر لأنها تورطت هي انثى مثلك لذلك اكيد مابيحترموها اذا عارضتهم فهي مضطره تجري وراهم لانها بتلاقي نفس الي لقيتيه انتي واخواتك منهم وهذا نتيجة تربيتها الله يعينك لكن نصيحتي خليك قويه عندك وظيفه تحميك من الكل عندك زوج طيب بس اكيد يبغاك قويه من اجل أولادكم ماتدري ممكن الضرر يمتدد لأولادك |
رد: القوامة للأخ أو للزوج ؟
انتي مو غلطانة , انتي مظلومة , طنشيهم وتبرأي منهم وعيشي لزوجك وعيالك
هذه نصيحتي لك ,, ,و والله كنت سأعمل بها لو كنت مكانك , |
رد: القوامة للأخ أو للزوج ؟
اقتباس:
أختي الكريمة بياض الديم عندي لكِ قصتين وإن شاء الله تنفعكِ 1- صديقي أمه عصبية جداً جداً ومشكلجية ولا يمر يوم إلا وعندها مشكلة وصراخ من الصغر كانوا يتجرعون الويل منها ، الصباح توقظهم من النوم للمدرسة بالصراخ ، يالله يا غبي قوم من النوم ، خياسك فايحة منها كل الغرفة من نومك يالله قووووووووووووووووم الله يغربلك ويغربل ابوك .. يالله غسل وجهك ، بسرعة خذ شنطتك . وفي المساء مشاكلها على أشياء ثانية وتتحجج على كل شيء ، اتساخ الملابس ، التلفزيون، الاصدقاء، وتتحجج على الزوج وتمد يدها عليه وكل يوم صراخ معه. صديقي تزوج وعاش في بيت ابيه وحصلت مشكلة كبيرة بين زوجة صديقي وأمه . خرجت صديقي من بيت ابيه وسكن في شقة وقال لزوجته اسمعي يا بنت الناس ، أنتِ زوجتي أعرفك خلوقة ولم أرى منكِ مكروه، ونحن بيننا تفاهم ولا أرضى عليك ، وأمي أعرفها مشكلجية ولا عليكِ منها ، ومن اليوم أقول لكِ لست مجبره تذهبي لزيارتها وأنا لن أذهب لها إلا في السبوعين مرة واحد أسلم عليها واصل رحمي وأخرج. اتخذ موقف حازم مع امه ، أكثر من ست سنوات والى الان ، يذهب بيت ابيه كل أسبوعين مرة واحدة فقط ، يجلس نصف ساعة يسلم وأمه تبربر وتثرثر وتعاتب وتغلط وتسب وتشتم وتهينه وهو يستمع ويتألم قلبه ويختنق نفسه ويتكالب عليه الهم من كلامها الجارح وهو يصمت وبعد نصف ساعة بالضبط لا أقل ولا أكثر يقطع كلامها ويقوم يقبل رأسها ويقول الله يرضى عليك يا أمي وسامحيني ، ويخرج من عندها .. ولكن صديقي يقول بعد صبري على شتمها لي كل هذه السنين ولم ارد عليها أو أجادلها ، تغيرت وأصبحت تمدحني عند أخواني وتقول لهم أخوكم فلان هو أفضل واحد فيكم ، فلان مسكين اجرحه ولا ادع كلمة مؤذية ولها وقلتها فيه وهو يحترمني . 2- زميلي متزوج امرأة أمها متوفاة وعندها زوجة أب شريرة تتحكم فيها هي وأخواتها في كل شاردة وواردة ، ونشبت بينهن نزاعات كثيرة وزوجة الاب لا تكل ولا تمل ولا تستسلم ، هي تريد تتسلط عليهم، وحتى اختيار الزوج للاخوات هي التي تقرر عنهم ، هذا الشاب نريده وذاك نرفضه، والأب طرطور ليس له كلمه ولا موقف وليس عنده الشجاعة على ايقافها عند حدها لأنه جبان، حصل خصام بينها وبين زوجة الاب قبل زواجها من زميلي واستمر الخصام سنتين ، وأما أولاد زوجة الاب الذين من صلبها فهم ملوك يأمرون وينهون وكل طلباتهم مجابة ، وبعد ان تزوجها زميلي قلت له عن كل ما صنعته زوجة الاب لها ولأخواتها وأخوانها ووعدها زميلي يقف معها وقال لها سوف اقف معك وابعدكِ عن عنها وأنا انصحك لا تذهبي لها ابداً ، وابتعدت عن زوجة ابيها ولا تذهب لبيت ابيها إلا في الشهرين مرة واحد ، وأما اخواتها وابيها فهي تتواصل معهم في مكان آخر يتفقون على غذاء أو عشاء كل مرة بيت من بيوت الاخوات المتزوجات أو الاخوان المتزوجين ويجلسون هناك حتى لا تكون معهم زوجة الاب الشريرة . زوجة الاب تحاول تخريب حياتهم وتحريض الاب عليهم ولكن محاولاتها باءت بالفشل. أختي الكريمة تعلمي من القصتين أشياء كثيرة . لست مجبرة على زيارتهم كل يوم ولا كل أسبوع، والأفضل تقطعي لكِ تتعاملي معهم في حدود صلة الرحم الواجبة فقط. ولا تخافي ولا تتشاءمي من الغيب ، فأهلك صعبين سواء سعيتي لمراضاتهم أو الابتعاد عنهم فهم في كلا الحالتين حتى لو لا سمح الله حدث شيء لن تسلمي من ضغطهم . |
رد: القوامة للأخ أو للزوج ؟
مكانه الانسب
|
رد: القوامة للأخ أو للزوج ؟
لاحول ولاقوه الا بالله
الله لايسلط علينا من لايخافه ولا يخشاه لا يااختي مالهم قوامه عليك وهذولي طالمين اصلا لا تعطينهم فلس |
رد: القوامة للأخ أو للزوج ؟
ماحد له قوامه عليك
خليهم يقومون انفسهم اول ... |
رد: القوامة للأخ أو للزوج ؟
اقتباس:
انا اللي يتعبني امي تعرف ان ما اقدر على زعلها فتضغط علي بهالشي هم ماهموني وناوية ما اسكت لهم وأخلي وجهي لوح الله يهدي امي وترد عن الظلم بالأساس كان التأسيس غلط ثقتي بالله تسع السماوات ولو دار بي الزمن فالله يتولاني مو بحاجتهم الله لا يحوجني لهم |
رد: القوامة للأخ أو للزوج ؟
اقتباس:
فعلا تغيرهم صعب الله يهديهم |
رد: القوامة للأخ أو للزوج ؟
اقتباس:
وزوجي ما احكي له الموقف ساكته يدري عن شخصيتي قوية لكن انا من داخلي منهارة بصراحة وما اتكل على احد يقول لي هالشي وفعلا وظيفتي بفضل الله متوفقة فيها وربي يعين وتحليلك صح امي صايرة ماتقدر تقول لهم كلمة وعادي يرفعوا صوتهم عليها ترجع هي لهم انا نحن فلا لو اشهر ما ترد علينا الله يجزيك خير والله يعين ويقدرني على برها |
رد: القوامة للأخ أو للزوج ؟
اقتباس:
احس بالظلم الشديد والقهر بداخلي ياليت تستأهل اللي يصير لي وبالاخير يقولوا ما شفنا منها ولا شي الله يفرج هم كل من به هم |
رد: القوامة للأخ أو للزوج ؟
اقتباس:
أقول لها سامحيني لو غلطت وربي ان كان لك حق بياخذه لما صرت أنفق وانا طبعا ما قطعت شي عنها مرات تمدح وتقول راضية عنك ولكن لو غلطوا علي فالحرب علي ما ألقى لكل شي سويته مكان نكران وما شفت منك ير ما أقول الا طيب والله يجبر بخاطري جزاك الله خيرا وبارك فيك |
رد: القوامة للأخ أو للزوج ؟
اقتباس:
احس قلبي مخلوع واتظاهر اني بخير لكن آملي بالله |
رد: القوامة للأخ أو للزوج ؟
اقتباس:
جهل كبير في حياتهم الاخت بعد الأب ينكسر جناحها الله يعين الله لا يحوجني لخلقه يا رب الله يجزيك الخير |
رد: القوامة للأخ أو للزوج ؟
بعد سنوات سوداء مظلمة من العذاب وعدم الشعور بالأمان جا الوقت الي تعيشين فيه لنفسك أول ولبيتك وزوجك بعدها ..
إختي الحبيبه لاتجترين الماضي إنسي كل شي صار إعملي تفريغ منهجي عشان تتخلصين من ترسبات الماضي وذكرياته .. فلوسك لك لك إنتي فقط تصدقي منها واحفظي جزء لك للمستقبل واستانسي بالباقي زوجك الطيب حافظي عليه عيشي معاه طفولتك ومراهقتك وشبابك استمتعي بكل شي بحياتك معاه خلاااااص انسيهم إلغيهم من حياتك أمك واصليها بالتلفون ان قبلت تمام وإن ماقبلت إدعيلها وبس مابيدك شي تسوينه أما إخوانك مالهم أي سلطه عليكم لو فيهم خير ورجال حقيقيين كان زوجو نفسهم ماخلو خواتهم يصرفون عليهم ! هم أقل من إنك تشغلين نفسك فيهم ولاتسمحين لهم يقتحمون حياتك أبدا ربي يعوضك ويسخرلك زوجك والأرض ومن عليها يارب رجاء رجاء إبتسمي من اليوم ورايح وخلي الدنيا بره تتصافق دامك ببيتك واستقليتي عنهم |
رد: القوامة للأخ أو للزوج ؟
اقتباس:
أمي فعلا قررت اترك موضوعها لين تهدأ لان ابدا ما ترد على اتصالاتي ولا على الفويس اللي ارسله لها ما اقدر اتعب نفسي ولا جنيني ومشاكلهم زايده ما عاد مهم عندي |
مستجدات موضوعي ..يا أمي إلى متى ؟.
السلام عليكم
طبعا على سالفة انقطاعي ورفضي الشديد للاعتذار للاخت الكبيرة اللي مالها وجه حق تطلب ترضى عني الا من بعد ما اعتذر لاخوي اللي شتمني وسبني بدون جه حق هي حبت تسوي فيها ذل لي وتفكر نفسها تقدر تذلني اتصل بي واحد منهم وصراحة صرت لما اشوف اتصال اي واحد منهم انغث واتضايق لان مايقولوا حق المهم قال ليش ماتعتذري من اخوك قلت له ياولد الناس ماراح اعتذر ورضاه مو مطلب ولا رضى اختك مطلب خلهم بالطقاق يزعلوا لين ينفجروا قال طيب عشان امي قلت امي مالها حق تزعل طبعا انا اتصل بأمي ولا ترد على اتصالاتي ولا على اي مسج صوتي على الواتس قطعت الاتصال لعلها تلين ولا في فايدة امي كانت واعدتني على سعيي لها بأرض كبيرة ودخولي على الوزير ومتابعاتي للوزارة لمدة 10 سنوات كاملة ووعدتني تعطيني جزء من الارض ابنى فيه الآن قالت ماراح تعطيني امي ماراح تفهم ان مابي لا ارض ولا مال خلاص طابت النفس من كل شي وتعبي ربي يآجرني عليه طبعا لقيت الموضوع مع جارتنا اللي هي صديقة امي وجات لاختي الصغيرة قالت لها وليش اختي تغلط على اخوها وترد عليه ولازم تعتذر منه مدري ومن وين هالعقلية ياخي ما راح اعتذر من احد رد عليها زوج اختي قال لها جايه تكملي ظلم لها يعني اللي فيها كافيها يقصدني طبعا تواصلي الان مع خالتي ولقيت راسها مشحون علي والله يعين لكن صرت اتواصل معها عوضا عن امي اللي قطعتني بدون وجه حق سامحها الله العلماء يقولوا (اعينوا ابناءكم على بركم ) ونحن اهلنا يدوروا لنا التعب من الارض قراري الاخير ان اروح واسلم على امي واطلع لبيت زوجي وخلاص ما ودي اجلس وانام معها لان لا تاكل معي ولا تسولف ولا شي ادري عنها أولى بي بيت زوجي وما اضمن يجي اخوي ويضربني بعد واوصلها للمحاكم عليه ما اضمنه لانه فيه حنق علي الله لا يبلانا فيهم ويشغلهم بنفسهم عني |
رد: القوامة للأخ أو للزوج ؟
تم دمج الموضوعين لترابط المحتوى
|
رد: القوامة للأخ أو للزوج ؟مستجد الرد (21)
اذا تبين تريحين راسك زوريهم بالاسبوع مره ..تمرين على امك ممر تسلمين عليها وترجعين بيتك...وحبذا تكون زيارتك وقت اخوانك مو فالبيت
|
رد: القوامة للأخ أو للزوج ؟مستجد الرد (21)
الحمد لله على كل حال
مشكورة اختي زهرة الجاردينيا |
| الساعة الآن 11:23 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©