|
الشك يأكلني بسبب موقفين لزوجي
[B][SIZE="5"][SIZE="2"]السلام عليكم ,,
بسم الله , هذه أول مشاركة لي بهذا المنتدى , وماكنت أبي تكون استفتاحية بهالطريقة , لكن لما وصل فيني الحد. جيت. بداية انا متزوجة من ثلاث سنوات , ولدي طفلة عمرها سنتين , حياتي الزوجية نوعا ما مستتبه طبعا فيها مشاكل طبيعية يوميه واحيانا مشاكل كبيرة لكن ماتتعدى الى امور توصل للانفصال ,, زوجي نوعا ما زوج طيب مايقصر باشياء كثير , لكن من كثر المواقف الي جتني منه بدأ الشك يتغلل لحد ماصار هاجس يومي , أبي ارتاح منه... امور كثيرة صارت و موضوع واحد مايكفي اني اقولها , لكن حاليا رح اكتفي [اني رح اعرض لكم موقفين مريت فيهم ولازال الشك يحوم يحوم فيني , لاني وبكل صدق ماصدقته!!!! ولانه كذاب , وسبق وحلف بالله وصدقته وصار كذاب .. فا معد صدقته عقب كذا ,, خرب ثقته نهائيا وصرت متشككه معه دايم ,, اول موقف بعد سنة من زواجي قررنا نسافر , وبمنتصف السفر بالصباح كنا لسا صاحين ورايقين والجو كان عليل وكان هو بالبلكونه معاه قهوته ويدخن .. طبعا رسمت لكم الصوره عشان تعرفون ان الجو رايق اقلها هادي اقلها الوضع عادي , لكن مو طفش!!! علما بأن السفرة كانت حلوة وماكنا متخاصمين ولا أي حاجه والوضع طبيعي جدا ! انا جيت لزوجي وقربت منه وهو كان ماسك جواله , خلال هالكم ثانية وهو ماسك جواله , احد كلمه بالواتس اب , وكان الاسم ((اسم رجل..)) والكلام كان (( طفشآآآنه مرررة)) !!!!!!! طبعا انا تثلجت كل حواسي , سكت ورحت لدورة المياه عزكم الله , حاولت اجمع نفسي , ورجعت بعد خمس او عشر دقايق وكان هو طبيعي جدا , جلست سألته ,, مين اللي كلمك قبل شوي؟؟؟؟ رد علي .. يووووووه انا عارف انك بتكبرينها !!! قلت لا والله؟ اشوف كذا وماتبيني اسأل؟؟ قلت لو سمحت ابي اشوف المحادثة ؟؟؟؟؟؟ قال مسحتها !!!! قلت ليه تمسحها ؟؟!!! قال في اشياء مابيك تشوفينها ؟؟!! قلت مين اللي كلمك؟؟ قال خويي !!!! قلت وخويك يكلمك يقول طفشانه مره؟؟؟؟؟!! قال ايه هذي طريقه كلام بينا يالشباب زي اذا قلنا ادفيك حبيبي؟ وهكذا , طبعا كان تفسير غبي وكان مو من حقه انه يعاملني بهالاستغفال اقلها يصير رجال ويعترف بغلطه..سكت واصريت انه يعترف ولا اعترف , قال والله انه خويي حتى شوفي وسوى كانه يكلمه بالواتس ويقول اقري وذاك يرد عليه انت زلابه عند زوجتك وكلام من هالحكي !! وقام ألف لي قصه انه هذا الشخص معهم بالاستراحه ويشرب وانه دايم يجي يكلمني يقول لي لاتجي اليوم الفلاني بجيب الشراب وهكذا , وانا مابيك تقرين هالكلام عشان تدرين!! انا لحد الان ماادري اذا تفسريه صح او لا وكان بالامكان انه يكلم اي احد من اخوياه ويقول له كلمني كأنك هذاك...؟؟!! كيف طفشان؟؟؟ وليه طفشانه وحنا بقمه الروقان؟؟؟ واذا انت ماتبيه حتى بالاستراحه وشلون تاخذ رقمه؟ وشلون تحفظه؟ وشلون تسولف معه بقمه روقانك وتعبر له عن طفشك بحيث انه يطنز عليك؟ امور كثيرة مادخلت مزاجي وتفسيره غير منطقي تماما .. لكن اكتفيت اني اصدقه ومررت الامور وسويت نفسي غبيه ووصدقته , مابينت له نهائيا اني شاكه .. ومرت الحياة عادي .. وكل فتره يجيني الشك , علطول اتذكر ان الرجال ماتغير مافيه أي بادر مو بوادر انه يكلم , اهدى نوعا ما وانسى ... الموقف الثاني بعدها بسنة ’ او بالاحرى قبل شهر تقريبا , كنا راجعين من الدوامات , ونزل هو يجيب شغله وترك جواله بالسياره , جواله فجاة دق وكان الاسم اسم رجل ... نغزني قلبي! مادري ليه! بالرغم انه دايم تجيه اتصالات من ناس كثير بس مالفتني زي هذا .. علطول بعد ماانقطع الخط , جت تنبيهات انه احد كلمه بالواتس ابد ,, ست او سبع تنبيهات ورى بعض !! والاسم كان بنت !!!!!!!! واسم البنت هذا في حياتي وحياته مو موجود الا عند شخصين , اختي وزوجه خاله ,, واختي انا اعرف اسمها بالواتس اب !! وبرضو زوجه خاله اعرف اسمها بالواتس اب وكلهممم مو نفس الاسم اللي كلمه!! طبعا كنت على نااااااااااااااارر استنى متى يجي , وحرمت اني اسكت واصبر زي الموقف اللي راح قلت رح اسأله علطول ولااعطيه مجال انه يفكر ويخطط بحلول! جا , ومديت الجوال قلت مين هذي!! قال يمكن اختك!! قلت لا مو اختي اختي اعرف اسمها وهذا مو اسمها!! قال اصبري اشوف! وكان رافع الجوال بحيث اني مااشوف المحادثه ,, قلت لو سمحت ابي اشوف المحادثه!! وكان هو يكتب بكل حماس ويكتب ويكتب قلت ابي اشوف المحادثه !! قال لي اصبري اكلمها :!! قلت قاعده اقولك ورني !! قام نزل الجوال بحيث اني اناظر ,, وطبعا ماشفت الكلام لكن المحادثه كانت سطرين بس !!!!! وهي يوم تكلمه كلمته يمكن ست او سبع مرات !!!!!!!!!!!!!!! قلت كلمها قدامي اللحين !!! قال هذا الجوال جوال معي واحد بالدوام مدري من هذي !!! قلت اقولك دق ووحط سبيكر !! دق وحطها سبيكر !! طبعا هو ماعطاها فرصة تتكلم !! علطول تكلم وبكل نفخه قال من معي هذا جوال فلان الفلاني !! هي رديت ملحوسه ردت كانها مو غلطانه لالا ردت كانها متلخبطة , قالت مدري جوال جديد أ أ أ كانت متلعثمه مره ! قالت معيش ومدري وشو ,, كان كلامها مكسر مو كلامها ابدا وحده غلطانه كلامها كانه وحده متفاجأة ,, وكان تطلع صوت كانه صوت احد مزكم , او احد كان يصيح! قلت له وش كتبت هي! قالت انها تحسبني صديقتها وتبيني اكلمها ضروري!! قلت ليه مسحت المحادثه!! هي كلمتك ست سطور!!! وانا ماشفت الا سطرين!! سكت مارد علي! سكت وتجاهلت ., رجعنا للبيت , وقال ماعرفها وهذا معاي بالشغل واكيد انه باع رقمه وكلام كثير قام يقوله , انا سكت وماقلت شي .. ومررت الموضوع وصدقته , لكن من داخلي ألف شك , واللي خلاني اعرفه انه مايكلمها اللحين , لانه ماتغير علي ولا فيه أي بوادر الشخص اللي يكلم , الا اذا كان ذكي مره وانا غبيه مره !!! لكن فيني شك قوي انه كان يعرفها !!! [طبعا لما جلست افكر ... ركزو معاي ان زوجي يحفظ رقم بجواله ويكون هذا رقم واحد معاه بالشغل وهذا يبيع رقمه وتشتريه بنت .. وهذي البنت تقوم تتصل على خويتها تبيها ضروري... وتغلط برقم خويتها ... وبالصدفه الرقم اللي غلطت فيه يكون رقم واحد متزوج اللي هو زوجي ... وهذا زوجي مسجل رقم البنت نفسها اللي شرت الرقم !!! امانتكم مو صدفه غريبه؟؟؟!!!!!!!!!!! مو شي مايدخل العقل؟؟!!! معقوله يكون فعلا صادق؟؟ ومايعرف البنت؟؟!! معقوله يكون كذاب؟؟ وكان يعرفها؟؟ وتصير صدفه غريبه زي قصص المسلسلات؟؟! ولا انا المسلسل وهو اللي يلعب علي ولاقيني ؟؟! حتى ردة فعلها بحد ذاته تجيب الشك؟؟! لو كان مايعرفها المفروض زيي يستغرب ونتفرج سوى عالمحادثة ونتناقش !! هذي ردة الشخص الواثق!! مايتلخبط!! ويتوتر!! ولا !! ويمسح المحادثة!! الواثق واثق!! لكن هو لا حركاته وردة فعله تقول عكس كذا تماما! ولما قلت له هالكلام ! قال لي خفت اوريك وتقرين شي وتقلبينها علي! قلت له مو معقوله اصدق وحده ماعرفها واكذبك انت! لكن اللي يصير قدامي بعد مو معقوله ومن حقي اطلب منك تفسير منطقي! مو كلام واهم ولا يدخل العقل! قال انا زيي زيك ماني عارف وش صار ولاادري!! بديت اشك ان في احد حاطه براسه ويبي يهدم حياته !! لكن مستحيييييييل تصير ! حتى لو صارت يبيلها تخطيط افلام هنديه! ياسبحان الله ! ماتصير وش بيدريه ان جواله عندي وهو بعيد عنده .. وش ووش ووش؟!! حاولت اجيبها من هنا ومن هنا .. ماجت !!!! علموني وريحوني .. زوجي خاين؟ ولا زوجي صادق؟ عجزت اعرف الصح من الخطأ .. تعبت تعببببببت انا دوائر شك باديه أثرت فيني وببيتي وبنتي وحياتي ونفسي وكل شي ,, كارهه كل شي حتى هو .. وماادري وش اسوي وكيف ابعد هالوساويس براسي جزء كبير يقول انه كذاب وستين كذاب...وجزء يقول انه ممكن يكون صادق ,, خصوصا انه ماتغير علي ولاحسيت انه بعيد هذا الشي اللي مشككني .. ولاادري ولااقدر اصدقه خصوصا انه داااااايم يكذب بامور صغيره وكبيرة .. الموقفين تصكرو ولااني عارفه كيف احل مشكلتي .. ودي اكلمه ولكن عارفه انه مارح يجيب نتيجه .. لكن ابي حل يرضيني ويبعد الشك حاولت بشتى الطرق وماقدرت كل شوي اذكر كل موقف كل مقطع فلم أي سالفه تذكرني باللي صار .. مااني عارفه ايش اسوي ولا ايش الحل! انتو يا بنات وش رايكم بالموضوع؟ هو صادق ام كذاب؟؟ وانتو يالرجال خصوصا من نظركم ؟؟ هل هو فعلا يخون او صادق؟؟! ابي الراااحة |
رد: الشك يأكلني,أحتاج مساعدتكم بشدة,تكفون ادخ
وانتو يالرجال خصوصا من نظركم ؟؟ هل هو فعلا يخون او صادق؟؟!
لا هو صادق ومستحيل يخونك لأن ما فيه دليل ع خيانته وأنتِ تتوهمين وتسئين الظن به فلا تعذبي نفسك بالشك القاتل وتعذبيه معك فيتركك إلى الابد ثم تندمي |
رد: الشك يأكلني,أحتاج مساعدتكم بشدة,تكفون ادخ
حبيتي نصيحه من أخت اذا كان مو مقصر عليك وطيب معاك ومتفاهم ويتقبل الحوار رجعيه لك
|
رد: الشك يأكلني,أحتاج مساعدتكم بشدة,تكفون ادخ
نطبخ ونحمل ونولد وغير ترتيب البيت ومسووؤلياته تطلع لنا بلاوي ثانيه
حبيبتي لا تاكلين بنفسك احسبيها صح بس تأكدي وخلي معاك إثبات لازم تواجهينه وتقعدين معاه اذا اعترف الحمدلله واذا أنكر كان الله في عووونك |
رد: الشك يأكلني بسبب موقفين لزوجي
طنشي اختي
ووريحي بالك ماراح تنالين الا التعب كذا واكثري دعاء |
رد: الشك يأكلني بسبب موقفين لزوجي
صادق والا كاذب هذي بعلم ربي
المفروض دام في احتماليه يكون صادق.. تبعدي الشك خصوصا انه ماتغير عليك بشي وجالس يبرر لك ويحاول يقنعك بصدقه وهذي بحد ذاتها نعمه عظيمة ياختي لا تدوشي راسك وتجيبي الشك لنفسك ولو لاسمح الله اخطأ ترى غلط تواجهينه انتي كذا تنبهينه يأخذ احتياطاته اسلوبك غلط |
رد: الشك يأكلني بسبب موقفين لزوجي
المهم طنشي سالفته
ونصيحه من أخت لا تتعبي نفسك .. لا تتعبي نفسك .. لا تتعبي نفسك تذكرت موقف صار معاي مع طليقي لما كشفت خيانته بالجوال تعرفي وش صار فيني ؟؟ جاني هبوط ووقعت من طولي من الصدمه ودخلت المستشفى !! اسبوعين وانا تعبانه مو مستوعبه أمشي خطوتين واطيح .. جاني هبوط حاد والله ثم والله الحين لما اتذكر اللي صار لي اقول سلامات يا بنت !! وعلى مين ذاك التعب كله !! بغيتي تفقدين صحتك وشبابك وتموتين من الضغط عشان مين بالله ؟؟ يستاهل الأخ كل ذاك التعب !! ياشيخه اتمنى الزمن يرجع لوراء بس واتماسك وأكون قويه وأبين له انه ماهمني وانه يروح في حريقه .. هذا شي مايخصني كلن بيحاسب بعمله .. خيانته مع نفسه .. هو اللي بيتحاسب يوم العرض على الله بسبب خداعه لبنات الناس وعدم اكتفائه بالحلال .. ربي انعم عليه بزوجه وفرت له كل سبل الراحه لكن لا حسافه على الفاشلين .. |
رد: الشك يأكلني,أحتاج مساعدتكم بشدة,تكفون ادخ
اقتباس:
|
رد: الشك يأكلني,أحتاج مساعدتكم بشدة,تكفون ادخ
اقتباس:
حابه استرجع ثقتي به ! |
رد: الشك يأكلني,أحتاج مساعدتكم بشدة,تكفون ادخ
اقتباس:
انا احتاج حل اني انسى الموضوع واصدق انه شخص صادق و احاول ارجع ثقتي فيه اللي فقدتها |
رد: الشك يأكلني بسبب موقفين لزوجي
اقتباس:
ياليت اقدر... توكلنا على الله وهو على كل شيء قدير.. |
رد: الشك يأكلني بسبب موقفين لزوجي
اقتباس:
لكن وربك ساعتها التفكير يضيع وانسى نفسي حتى تنفسي يصير صعب .. ما اقدر اجمع نفسي كل شي الا الاستغفال بالنسبه لي! ليته اعترف وريحني وجاني رجال صادق وده بالسماح ووده انه يعوض خطأه لا! هو حسسني اني مغفله ومحسس نفسه انه هو الصح وما انقلب عليه بشي وبكذا ما انحل ولا شي , لا عرفت الحقيقه , ولا هو انتبه انه هالشي خطأ احمر وانه نهايه لحياتنا , ولا انا اللي ارتحت وريحت راسي!!! عايشه باوهام وشك كل منه , وهو مبسوط ومرتاح وانا اللي اتعب , وللاسف هو حاسس بهالشي! ودايم يقولها لي , انا زعلان عشانك انتي تتعبين ولا انا عايش! |
رد: الشك يأكلني بسبب موقفين لزوجي
اقتباس:
خله يلعب بيدينه ورجلينه , لكن من يطق بابي يبيني زوجته يحترم هالشي!! انا بنت ناس ومتربيه ولا تعودت ولا ارضى على هالامور والبيت اللي خذه مني يقدر يضمني مره ثانيه وانا بكل قوتي ابي احافظ على بيتي لكن لازم اشوف انه بعد هو متمسك ويترك كذبه والالاعيب .. ودي اقلها يجي يقول انا احس ودي اكلم ! وش اسوي نسيني!!! ابحاول معه الفين مره! ولا يروح ويكلم ! انا عندي الصراحه وانه يحترمني ويقدرني كزوجه ولا يعاملني كمفغله .. مو خطأ انه يحس بالتغيير , لكنه خطأ انه يعاجله بخطأ ليه حلال عليه وحرام علينا؟؟!! ليش انا ماعمري فكرت اني اخونه ومحترمه وجوده بحياتي؟! تتوقعين لو درى اني اكلم بيكون نفس رده فعلي؟!!! وعلى قولتك عنده رب يحاسبه وانا مادورت ولا بحثت من وراه ربي كشفه قدامي انا مارحت افتش ولا شي هي دقت وارسلت تنبيهات قدامي .. ربي كشفه .... انا ماازعجت راسي وابحث لين لقيت هالشي هو كذا صار .. ومتعبني وابي انسى ابي اعيش حياتي ابي ارجع احضنه بدون مااحس بشعور ياكلني من جوى .. انا مو كامله وهو بعد مو كامل , اذا مب مبسوط بحاجه يجي يقول فيك وفيك واحاول الاصلاح .. لكن لا يروح من اقرب مخرج ويدور على احد ,, حتى ما مر علينا كثير لدرجه انه بادي يطفش الله يعين .. |
رد: الشك يأكلني بسبب موقفين لزوجي
اوكي لنفترض احساسك بمحله
وزوجك فعلا يكلم بنات لاتجلسي تقولي المفروض قال لي الخ مايبي يعلمك.. يدري انه غلطان.. ومستمر انتي ايش بيدك؟ ولا شيء! الهداية من الله بس نرجع للنقطة المهمه: تعامله معك كويس وماتغير عليك وزوج ممتاز أقول لك هنا احمدي ربك الف مرة ايش رأيك باللي ماسكه على زوجها شغلات مشابهه وعطاني تصريفات هبله مثل زوجك بنفس الوقت قالب علي وتغير وجاحدني والى 3 الفجر يسهر مع الجوال واذا رحت اسهر معه تنرفز وقال لاتصيري نشبه بالعربي يبغى يجلس مع راعيه المزاج لو عشتي هالظروف ايش هتعملي؟! زوجك فيه بذرة خير يكفي انه مداريك ويبرر لك غيرهم وجهه وسيييع.. يقلب الطاوله ويقول: كيفي! نصيحة اختي.. حافظي عليه وتعوذي من الشيطان |
رد: الشك يأكلني بسبب موقفين لزوجي
اقتباس:
انا من تزوجت اخت روان وزوجي هذا طبعه انا ماقلت حنون ولا قلت زوج ممتاز لكن من عرفته ماتغير , يعني هو مايكب حنان لكن بنفس الوقت مو جاف تماما يعني تلقينه ايام عادي وايام حنون واياما جاف , ومن تزوجته وهو كذا عشان كذا ماحسيت بفرق , انا لو دريت رح ارتاح , ولو كان سبب مني , رح احاول اغيره عشان اعفي نفسي من التفكير بالذنب ولو كان لسبب المملل والتغير , ما اقدر اصفح عنه , لاني حتى انا يجيني شعور بالملل والتجديد ولكن ما اشوف الحل اني اخون! الرجل والحياة الزوجية متعبه جدا خصوصا اذا فيه طفل بالمنتصف , انا بالنهايه ابغى احل اني اشيله من راسي واطنش واشوفه زوج وشراكه حياة واطفال واحترام فقط او اني اعيش كزوجة وام وحبيبة له و انسى هالامور وارتاح لكن شعور اني ضايعه ومو عارفه قدري عنده , يذبح |
رد: الشك يأكلني بسبب موقفين لزوجي
اقتباس:
أتوقع الوازع الديني ضعيف عند زوجك وانتي ادرى فيه بهالناحية وحابه انبهك لشغله اذا شكيتي بزوجك لا تبيني ان دمك محروق وانك انهررررتي ومزاجك تعكر ما انصحك ابدا حتى ماتكبر الشغله برأسه.. هذا لو فيه شي أصلا.. |
رد: الشك يأكلني بسبب موقفين لزوجي
حبيبتي شوفي والله انتي مافيك عيب
ولا مقصره .. ولا ناقصه واكيد انك جميله واسلوبك عسل وكلك رووووعه كمان .. الخلاصة .. عيشي حياتك وطنشي وتري ما انصحك بالطلاق حافظي ع بيتك .. على عيالك وهو اتركيه مع التفاهات تبعه .. لكن الا الطلاق لا تفكري فيه نهائياً وخليك اعقل منه .. |
رد: الشك يأكلني بسبب موقفين لزوجي
عزيزتي،
انت ما عندك شيء ملموس ضد زوجك و ان شاءالله ما يكون فيه.. فلا داعي تحرقني أعصابك.. الشك اول مدمر للحياة الزوجية و هي من وساوس الشيطان ..و هو معنا في كل حركة و مع كل رمشة عين نعوذ بالله منه.. اعلم انا الكلام سهل و التطبيق صعب.. لكن فكري بصحتك و بابنتك اهم شيء و اتركي الخلق للخالق.. اكثري من الاستغفار و الدعاء من القلب و سترتاحين الله يرزقك السكينة و راحة البال |
رد: الشك يأكلني بسبب موقفين لزوجي
كان الله في عونك
تأكدي اذا عنده خيانه مصيره ينكشف لك لكن نصيحتي لك بيني له انك واثقة فيه عشان مايأخذ حذره منك ولو حصل وكشفتيه في حركات مثل هذي على طول خذي الجوال ولاتفكينه الا بعد تشوفين ايش فيه عشان ترتاحين من الشك لكن لاتسوين كذا الا اذا كنتي تقدرين تتحملين النتائج أما اذا تحبينه وتعامله معاك تمام وتهمك حياتكم فنصيحتي لاتبحثين أبداً انشغلي بنفسك ولاتجعليه محور حياتك ومصيره ينكشف اذا عنده شي |
رد: الشك يأكلني بسبب موقفين لزوجي
اللي عندها شك أو متأكده إن زوجها ماشي بالحرام وتسكت ....، اللي تحب صدق بتخاف على زوجها من عقاب الله أولاً ومن الفضيحه ثانياً ، مسألة إنك تعيشين حياتك ولاكأنه فيه شي هذا أكبر غلط ، أول شي لما تشكين بزوجك ماينفع تواجهين إلا ومعك دليل قوي وماجبتيه من التجسس عليه عشان لايقلب الطاولة عليك ، ولازم تكون لك جلسه معاه بلحظتها وماينفع الموضوع يمر عادي وإنتي تاكلين بنفسك ، إذا زوجك يسوي الغلط والله سبحانه يستدرجه بالستر عليه عشان يتمادى صدقيني بينفضح إذا مو عندك عند الناس ، ماراح أقولك طنشي وعيشي حياتك لأني عارفه هالشي يقتل إن شريك حياتك يخون لكن حاولي تتعاملين معه بشكل طبيعي لحد مايصير موقف ثاني و وقتها لاتسكتين لين تعرفين وترتاحين ياإنه صادق ياإنه يخون ، الله يكون بعونك
|
رد: الشك يأكلني بسبب موقفين لزوجي
اختي صاحبة الموضوع
لا ادققين بكل شي طوفي وطنشي بس اذا لقيتي دليل قوي لا تسكتين والله يعينج يارب |
رد: الشك يأكلني بسبب موقفين لزوجي
صاحبة الموضوع انتي معاك بنت
بنتك تستحق تعيش في بيئه اسريه مثاليه تعاملي مع الموضوع بحكمه لكن لا تطلبي الطلاق وتخربي بيتك اصبري واحتسبي وحافظي على بيتك وبنتك وهو مصيره بيعرف انه غلطان .. |
رد: الشك يأكلني بسبب موقفين لزوجي
اقتباس:
هل هناك بوادر للشخص الي يكلم البنات عالجوال؟ لو تأكدتي انه يكلم بنات ماذا ستفعلين؟ |
رد: الشك يأكلني بسبب موقفين لزوجي
وعليكم السلام ورحمة الله وبركاته
أختي لنفترض أن شكك صحيح وان فيه اللي فيه .. ليه ما تحاولين تقويمه وتصحيح سلوكه ..! أعتبري الأمر نزوه وتمر ... ذكريه بالله و العقاب المترتب على هذه الافعال بأسلوب جميل صدقيني تتعبين الأن وترتاحين عقب ... ماعليه جاء الرد على فصلت النوم ودي أسترسل لكن المخ مشوش هههههه الله يوفقك ويريح بالك |
رد: الشك يأكلني بسبب موقفين لزوجي
اوكي راح نقلك زوجك خاين وشكله يعرف بنات !!! ايش ردة فعلك ؟ هل راح تنفصلين عنه وتطلبين الطلاق ولا راح تصبري وتتحملي الوضع؟؟
ان كنت من النوع الي ما يتحمل الخيانه وحدية وترفضين البقاء مع خاين فدوري وفتشي الى ان تصلين للحقيقة ولعلمك مو صعبه الوصول لو كنت جادة .... اما لو انت مستحيل تتطلقي لهل سبب فيا اختي تركي عنك الشك وحطي ببطنج بطيخة صيفي وطنشي تصرفاته ودامه كويس معك فلا تبحثين عن امور ممكن تعيشك بدوامة الشك القاتله وعيشي حياتك |
رد: الشك يأكلني بسبب موقفين لزوجي
اسمعي حبيبتي،،الموقف الاول واااضح انه صادق زوجي دايما يكلم اخوياه بمزح ويستخدمون لبعض تاء التأنيث سواء بالمكالمه او المسجات..الوقف الثاني شكله والله اعلم كان يطقطق وقتها...بالعربي زوجك مو راعي علاقات وحتى الموقف الثاني واضح انو مافي علاقه جديه ...
|
رد: الشك يأكلني بسبب موقفين لزوجي
اقتباس:
اول موقف والله انهرت , ثاني موقف كانت ردة فعلي مختلفه تماما الله يعين :( |
رد: الشك يأكلني بسبب موقفين لزوجي
اقتباس:
انا جايتكم ابي الراحه كيف اعدي هالموضوع براسي وكيف اتعامل معه اذا صار موقف اخر |
رد: الشك يأكلني بسبب موقفين لزوجي
اقتباس:
ابحاول قد مااقدر ان شاء الله عشان كذا جالسه ادور حلول عشانها وعشان صحتي وعشان الحياة تستمر :( |
رد: الشك يأكلني بسبب موقفين لزوجي
اقتباس:
كلامك صح وهذا كان خطأي عطيته مجال بكل الموقفين انه يلقى له مخرج المفروض سحبته ولا عطيته مجال يكتب ويتصرف الله لا يعيشني اياها مره ثانية , لكن تصرفي رح يكون مختلف حتى مايدخل الشك اكثر , ما نويت ابحث نهاااائي , ولا رح ابحث الا اذا شكيت باشياء ملموسه وسبحان الله كل الموقفين صارت امامي وامامه من دون أي بحث واستطلاع واي حاجه بتصير انا ميقنه ومتوكله على ربي انه بيفضحه قدامي لكن كيف انسى واعدي حاولت ماقدرت , لانه بادي يأثر علي ماني قادره اعطيه نفسي زي اول كل ماتذكرت |
رد: الشك يأكلني بسبب موقفين لزوجي
اقتباس:
يعني فلنفرض مثلا جالسه يومي طبيعي ويصير شي وفجأة اتذكر , تلقيني علطول انعفس! ويبدى يبين علي! كيف بهاللحظه انسى!!!! على كثر مااحس اني قويه...الا ان دخول بنت ثانية بحياة زوجي يكسرني تكسير مااقدر اشاركه احد مااقدر حتى بالتفكير , باي شكل من الاشكال تصدقين امور كبيرة مايرضى عليها احد كثيرة صارت بيني وبينه وعديتها بتفهم الا موضوع الخيانة سواء خيانه شرعيه او محرمه مااقدر اتقبلها ابدا ""::: |
رد: الشك يأكلني بسبب موقفين لزوجي
اقتباس:
امين , اجمعين |
رد: الشك يأكلني بسبب موقفين لزوجي
اقتباس:
ما نويت الطلاق إلا اذا ثبت شي. |
رد: الشك يأكلني بسبب موقفين لزوجي
اقتباس:
ايه طبعاً .. وتختلف من شخص لآخر , وتعتمد على امور كثير .. طبيعة العلاقة , مدتها , وهل له سوابق او لا... لكن سبحان الله , الزوجة تعرف! كذا تحس انه زوجها بادي يتغير ... بعدها تقول تغير زوجي! بامور صغيره قد لا تلاحظها بالبداية بعدين شوي شوي تفتقدها تستغربها تعطيه فرصه فرصتين تتعذر له .. اخر شي اذا مالقت اعذار تبدى تثبت انه فعلا فيه شي صاير ... مو شرط للخيانه لاي امر دخل عليه بحياته .. يعني طريقة كلامه , اسلوبه , ممكن حركات كان يسويها افعال اشياء كانت تحبها زوجته وتفقدها بعد فتره وبدون سبب يحب يختلي بنفسه مايجلس بالبيت كثير وان كان بيتوتي يحب يعتزل ماسك جواله كثير واذا كان يكلم من جوال اخر تشوفه كل شوي يطلع كثير او يصرف بالخروج , مبسووووووووط ومزاجه رايق لكن مو معك ومو عشانك .. واحيانا يعصب عليك يدقق بامور فيك تلفته اشياء ماكانت تهمه او ماكان جايب لها طاري .. مزاجه متغير دائما , فجاة عصبي فجاه رايق , هذي طبعا ماتنطبق كلها , كلها تعتمد على الشخص نفسه , ولا في اعراض معينه , كل زوجه تعرف زوجه وطبايعه واسلوب حياتهم وهي بنفسها تحدد كيف تغير ووشلون .. اذا تأكدت انه يكلم.. اذا تأكدت انه ارخصني ولا قدر اللي بين يدينه.. الطلاق. بلا رجعه. انتهى. |
رد: الشك يأكلني بسبب موقفين لزوجي
اقتباس:
الموضوع خلص وانتهى .. وماابي ارجع اعيده لكن ابي حل كيف انسى , والله لا يقوله لكن كيف اكون مستعده لامور مماثله المرات القادمه انا احيانا اتكلم بطريق غير مباشر عن الخيانات وبشكل عام اذا جا طاري , لكن بدون حوار وبدون نقاش مجرد شي عابر , استغليته .. الله يهديه ويصلحه ويثبته ويسخره لبيته |
رد: الشك يأكلني بسبب موقفين لزوجي
اقتباس:
لاء , انا حاليا مارح ابحث عن موضوع صار شهر وموضوع صار له سنه عدى الامر وانتهى .. ولا في شي واضح مجرد شك ..وجيتكم ابي حل كيف انسى واكون مستعدة لامور قد تحدث .. عشان اعرف الحقيقه بدون مااطلع بشكوك وحياة كلها نكد لكن اذا اتضج شي وثبت , وقتها بتكون ردة فعل ثانية .. |
رد: الشك يأكلني بسبب موقفين لزوجي
اقتباس:
احس انه كان يعرفها .. وتوقفت العلاقة , قبل الزواج او بعده مدري بس مستحيل قبل الزواج مستحيل بعد ثلاث سنوات توها تذكره!!!! وهي جته بوقت حنين ويمكن اشتياق (الله يشغلها بنفسها وجعلها تذوق حرتها) لكن الله يعين .. عرفتي اللي انا كنت احسه ارجل الرجال كنت اشوفه فوووق .. ماكنت اشوف أي عيب فيه مع ان اغلبه عيوب بس كنت اشوفه شخص نبيل وصادق وانسان اللي اتمناه لانه يبيني ومتمسك فيني .. لكن من دخل الشك ومن عرفت انه ممكن يكلم احد يكلم وحده؟ ويتغزل معها؟ ويسولف معها؟ يصبح ويمسي؟ ويراسلون ودنيا.. تكسر كل شي فيني له حتى صرت اشوفه شخص ثااااني .. كرهته وصرت ادقق بعيوبه ماعاد اعطيه شي ولااحسه يستاهل .. ذابحتني الفكرة ذابحتني خصوصا انه اكبر كذاب .. فا معد صرت اصدق شي واحس اني عايشه تسليك |
رد: الشك يأكلني بسبب موقفين لزوجي
اقتباس:
مافيه شيء أسمه خيانة شرعية |
رد: الشك يأكلني بسبب موقفين لزوجي
اقتباس:
|
رد: الشك يأكلني بسبب موقفين لزوجي
أختي الكريمة راحة النفس بالمصارحة والفضفضة، وأما الكتمان فلن يزيدكِ ألا متاعب نفسية، وفي علم النفس معروف ان البوح ما في مكنونات النفس من هموم وأشجان لإنسان ثقة كالزوج أو الأم يرفع متاعب النفس ويغسل الادران والاوساخ منها وترتاح.
أنتِ تريدي تمضي حياتكِ مع زوجكِ بسلام وتريدين تنسين الموضوع. اسمعي أختي الكريمة قولي لزوجكِ أريد أخرج معك في مكان بعيد عن جو البيت لأتكلم معك في موضوع . تخرجي معه على شاطئ البحر أو حديقة من الحدائق الجميلة وقولي له انا سوف أتكلم معك بوضوح وارجوا تتفهم كلامي ولا تقاطعني ابداً حتى انتهي من كلامي وتعرف ماذا اريد أقوله لك ، أعلم يا زوجي أن المرأة اذا قررت تتزوج فهي تريد الاستقرار مع زوج ثقة ومخلص لها، والمرأة الشريفة العاقلة تحافظ على زوجها وتخلص له وتعطيه كل ما تملكه وتضحي بعز الأشياء عندها لتستقر مملكتها وتعيش بأمان واطمئنان، وكما هو مطلوب من المرأة تكون كذلك، فالرجل أيضاً مطلوب منه ينسى أيام العزوبية والطيش والتهور ويحافظ على زوجته وبيته وعياله ولا يعمل حركات صبيانية كما كان أيام العزوبية وعليه يحترم الحياة الزوجية ويقدسها وضع لها ألف اعتبار. أريد أنصحك ان كنت بالفعل تعمل أشياء صبيانية وخيانة وتردد في نفسك ما يقوله الشباب الصايعين (الزوجات هبلان لا يدرون ماذا نعمل من خلفهم، ونعلب عليهم بكلمتين ونستطيع نغشهم وينسون الموضوع) فاعلم ان هذه الفكرة اذا كانت راسخة في ذهنك وتريد تطبقها على حياتك، وتضن انك سوف تستمر في استغفال زوجتك فانت الخسران وستضيع منك زوجتك وسينفضح أمرك عاجلاً أم آجل، ولا يوجد انسان يمشي في هذا الطريق يسلم من الفضيحة، فأين ستولي بوجهك أمام أهلك واهلي والناس اذا كانت اعمالك علاقات وبنات وخربطة ؟ الموقفان اللذان تكلمنا عنهما مسبقاً أنا بصراحة لم أصدق ما انكرته أنت لان كل العلامات تدينك، وأنا لازلت أظن ومتأكدة أن عندك شيء تخفيه عني، وانا قلقة من هذا الموضوع وافكر فيه منذ فترة طويلة، لاني اذا وجدت حقاً بالدليل أو مسكوك الشرطة أو أي إشارات وعلامات انك تخونني وعندك حركات وعلاقات بايخة، فأنا أعرف نفسي بأني لن اتحمل أعيش معك ابداً وسوف تخسرني للابد، انا كل شيء اتحمله إلا موضوع الخيانة أو موضوع ان زوجي يكون مخربطجي ، هذا شيء لا اتحمله . أنا لن افتش هاتفك وأنا أحاول نسيان الموضوع ولن اراقبك ولست مكلفه بمحاسبتك على ما تعمله في حق ربك، ولكن كن واثقاً بأن اذا شاء الله يفضحك سيطلعني الله على أفعالك بطريقة انت لا تتوقعها وحتى لو أخذت حذرك وحاسبت أشد المحاسبة على إخفاء الامر، اذا ربي أراد يكشف لي ما تعمله من خلفي سينكشف بسهولة. أنا لا أخوفك ولكن اريدك أن تنتبه لنفسك وتحافظ على بيتك ، حتى اذا حصل شيء ووجدتني اخرج من غير رجعة، سيكون هذا بعد ان حذرتك ونبهتك بأن لا تمشي في هذا الطريق الملتوي الخطير . الله يعينكِ اختي الكريمة |
| الساعة الآن 08:17 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©