|
زوجتي والسناب شات !!
السلام عليكم يا اخوان ويا اخوات
مشكلتي ما اعتبرها مشكلة بالنسبة للمشاكل اللي اشوفها هنا , والله يعين الجميع مشكلتي مع السناب شات ومشاهير السناب شات , اولا انا متزوج من 6 شهور , عمري 28 وزوجتي عمرها 19 هي من المتابعين للسناب شات وخاصة هؤلاء الشباب المشاهير , انا صراحة اغار وبشدة لما تتفرج عليهم وتتابعهم , لكن اكتمها في نفسي لعدة اسباب : اولا : زوجتي ما زالت صغيرة , واغلب من هم في سنها يتابعون السناب , وما ودي اضغط عليها واحسسها اني مضيق عليها ثانيا : ما اعتقد انها تتابع لأجل انها معجبة بهم , بحكم انها " بحسن نية " تجيني وتقلي شوف تابع هذا الحساب يصور حاجات جميلة , او يصور يومياته وهكذا . انا من الناس اللي ما اتابع السخافات هذه , ولا اعترف بشهرتهم ابدا , خصوصا اللي ما عنده محتوى وكل تصويره مجرد يوميات عادية وحاجات سخيفة مالها داعي . بالرغم اني لمحت لزوجتي اني اتضايق اشوفها تتابع الشباب هذولا , وقلت لها ايش موقفك اذا انا تابعت بنات على السناب ؟ سكتت وما جاوبت , فهمتها انه انا ما ارتاح لما اشوفك تتابعيهم وفي نفس الوقت ما ابي اضيق عليك , حاولي تخففين من متابعتهم عشاني . سؤالي هنا: هل يحق لي امنعها تتفرج عليهم ؟ هل يحق لي اغضب وازعل واسوي مشكلة عشان الشي هذا؟ انا داخليا مقتنع انه ضروري البنت اذا تزوجت المفروض تحترم زوجها ومشاعره وتبطل تتفرج عليهم , ولكن كما اسلفت ما ودي اضيق عليها . ما استغني عن ارائكم |
رد: زوجتي والسناب شات !!
يحق لك ولأي رجل يغار على اهله وخاصه من سنابجات التعيس ، وتويتر واقلهن ضرر انستغرام ، والله ابتلينا بالبرامج والاجهزه الحديثه صارت سبب من اسباب الطلاق ، اذكر احد المقبلين على الزواج من شروطه ان لايكون لديها حسابات ببرامج التواصل الاجتماعي مثل سنابجات وغيره ، لابد تصارحها ليس من المرؤه متابعة المترديه والنطيحه ، والي يتميلحون ويتغنج كأنه ،،،،،! هذا من خوارم المرؤه والله المستعان ......!
|
رد: زوجتي والسناب شات !!
اغلبهم ماعندهم موضوع وسنابات دون محتوى او فكره او فائده
تصوير يوميات روتينيه وتصنع لابعد الحدود .. خلها تصرف نظرها لمتابعة اشيا مفيده .. وان لا تكرس جل وقتها خلف مواقع التواصل الاجتمااعي وان تكرس اغلب وقتها لك وللبيت .. |
رد: زوجتي والسناب شات !!
اخي الكريم.. بتفرق كثير اذا الحساب فيه يوميات وبس.. واذا كانو يحطون صورهم ويستعرضون فيها..
عموما انا ماعندي سنابجات.. بس عندي حساب بالفيس ولا اصادق شباب ابدا.. مشاء الله فيه كثسر بنات نتابعهم وصفحات مفيدة ليش الشباب يعني؟ وصدقني زوجتك بتفهم هاي النقطة.. كما قلت شوف بالاول اذا مجرد تصوير شغلات.. او انه استعراض لاجسامهم واشكالهم.. |
رد: زوجتي والسناب شات !!
هي تتابع شباب وبنات , اغلبهم تصوير يوميات عادية , يعني فلان سافر فلان راح مطعم فلان قاعد يتكلم في فلان , فلان ينكت , فلان يستهبل , فيه بعض الحسابات كويسة ومفيدة , بس الغالبية مع الاسف ما عندهم سالفة , وهذا حال الاغلب مع الاسف , واغلب البنات الان يتابعوهم وهم عارفيه ما عندهم سالفة ,
انا الى الان ما امرتها تبطل تتفرج عليهم ,, مجرد تلميح فقط بس سؤالي : هل اذا منعتها تماما عن متابعتهم , تشوفو فيها تضييق ؟ هل تشوفو انه تشدد بزيادة ؟ هل اعطيها وقتها وتعقل مع الوقت ؟ خصوصا انها صغيرة في السن |
رد: زوجتي والسناب شات !!
وليه اخوي تمنعها
هي ماشافت شي حرام ولا اطلعت على مفاتن الرجال وانت بنفسك تقول نيتها سليمة وكل جيل هالوقت يتابعون مشاهير! اذا هي يوميات تراها زي يوميات قناه بدايه وبرامج التلفزيون هالوقت وياما ناس ملتزمين ودعاة وصالحين فيها وهي ماعملت شي من وراك يعني ماهي جالسه تغلط والله ان بعض حسابات سنابشات فيها فوايد عظيمه دينيه ونفسيه واجتماعيه اخوي انت كزوج لك حق الطاعه لكن لا تتسلط على البنت مشاعرك منجرفه لانكم لسى عرسان بكرا امور كثيرة بتهدى بينكم فأنت لا تدخل هالشكوك وسوء الظنون خصوصا واضح ان زوجتك وحده عاقله بعدين اذا هي جالسه بالبيت ايش تبغاها تعمل بوقت الفراغ؟ ترى هالامور تسلي خلها ترفه عن نفسها شوي ----------------- |
رد: زوجتي والسناب شات !!
اقتباس:
قيسي ردك هذا على نفسك |
رد: زوجتي والسناب شات !!
في نظري أنها ميول للاهتمام بمثل هذه السنابات مثل بنات جيلها، عادة البنات الصغار يحبون ويلفت انتباههم مثل السنابات التي لامعنى لها عندك، والميل لتلك الاهتمام أخذته من بنات جيلها وزميلاتها.
صحيح أن كثير منها لافائدة منه، ولكن إذا تريد نصيحتي أجعلها تحمل تطبيق (موجز) جميع السنابات التي فيها هي مفيدة وتعليمية وثقافية، وأنصحكَ أنتَ وغيرك أيضاً بتحميله، فشخصياً استفدت منه ويطرح فيه مواضيع مهمة كثير، ولا أدري هل زوجتك سيعجبها ذلك أم لا، وتذكرت بالمناسبة كنا نهوى لعب الكورة أنا وابناء جيراننا أو أخواني، فيأتي أبي ويقول أتركوا الكورة وروحوا أقروا قرآن بالمسجد، ومع ذلك كان طلبه ثقيلٌ علينا، لأنه يجلعنا نترك هوايتنا وماتحبه نفوسنا إلى أن (ننطق) بالمسجد ونقرأ القرآن بالغصب وفكرنا كله بالكورة :) ، وأخشى أن يحدث ذلك مع زوجتك، لأن النفس غالباً تتوق لما يسليها وحتى لو لم يقتنع به الأخرين. |
رد: زوجتي والسناب شات !!
اقتباس:
وانا عطيته حساب ثنتين من عندي وحده مصممه ديكور تعرض تصاميمها ووحده سيده اعمال تعطي نصايح لاني كنت حابه اصرفه عن المغنيات والفيشانيستا بالنهايه ماعندي مشكله يتابع بعلمي احسن مايتابع من وراي لكن اكون صادقه معك اتضايق من شغله وحده لما يمدح فلانه اللي يتابعها او يقول موتتني ضحك دمها خفيف او البس شي ويقول واو صرتي شبه فلانه هالتعليقات البايخه ارد عليها بوقتها بليز لا تقول كذا وخلاص اذا زوجتك مالها بهالاستفزازات خلاص اتركها مصيرها تمل تراها هبات كل فتره يطيحون بشي |
رد: زوجتي والسناب شات !!
انا زوجي كانعني اتابع رجال في الانستقرام مازعلت لأنه بالمقابل مايتابع بنات .. ولأنه مابينقص من حياتي شي اذا ماتابعتهم،
اما السناب فأنا بنفسي حصرته للأهل والصديقات ولا اتابع غريب أبدا لأني احسه بياخذ من وقتي كثير.. ممكن تكلمها وتبين لها غيرتك وانك ودك لو ماتتابعهم .. لكن لا تفرض عليها لأن القوة والاجبار تسبب ردة فعل عكسية .. |
رد: زوجتي والسناب شات !!
يحق لك الضرب بيد من حديد
ومنعها حفاظآ على زوجتك لا احد يلومك على ذلك فا انت صاحب البيت ونظرتك اشمل واوسع |
رد: زوجتي والسناب شات !!
اشكركم لردودكم
سأضطر اتجاهل غيرتي عليها , واجلس المح من بعيد عن تضايقي من الشي هذا , وان شاء الله تفهمها وتحاول تخفف , مع اني غير مقتنع تماما ما ابي اضغط عليها خصوصا انه لسا متزوجين وما تعودت علي تماما , لسا قلبها على اهلها وتفكيرها كأنها بنت غير متزوجة , تحتاج وقت عشان تستوعب وتتعود على حياتها الجديدة الله يعين ويساعد |
رد: زوجتي والسناب شات !!
اقتباس:
|
رد: زوجتي والسناب شات !!
اقتباس:
اخوي ابو بدر ماينفع التلميح من بعيد في الموضوع هذا لازم تقرر اما انك تسمح لها وتتركها من نفسها لين تمل او تمنعها عن متابعة الشباب لانهم يستخفون دمهم ويتميلحون وانت ما ترضى بالشيء هذا على زوجتك.. وخلها تتابع حسابات نسائيه او مفيده او سفريات الوضوح والصراحه مع اتخاذ القرار المناسب اهم صفه في الزوج لازم تكون فيه |
رد: زوجتي والسناب شات !!
زوجتك صغيرة.. والي بياخذ وحدة بهالعمر لازم يساعدها للتعود هلى حقيقة الزواج والتكيف معه..
بس بصراحة انا ما أأيد متابعة المشاهير خاصة في هذا السن.. الوحدة لسه تعتبر مراهقة ولم تكون شخصيتها بعد.. ماعندها فهم كافي لحقيقة الزواج ومسؤولياته.. وحقيقة الحياة برمتها... هي اساسا بهالعمر تشوف الزواج حياة وردية ودلع ودلال لاينتهي.. الزبدة ان هذولا المشاهير سواء شباب او بنات يعيشون حياة بعيدة جدا عنا.. عن واقعنا.. اضافة الى ان اغلبهم ناس فاضية وكل اهتمامهم شوفو شو اشتريت شو لبست.. يعني تخرب عقل المتابعين الي عمرهم صغير زي مرتك.. وماتخليها تفهم الحياة والزواج بشكل خاص وتتقبله.. اعارض متابعتها من هذا الباب.. وزي ماقال الاخ الي قبلي الرجل اذا شي ماعجبه وكان على حق.. فلازم يتصرف بحزم.. اذا شافتك متذبذب يمكن تفهمها انك ضعيف الشخصية.. هذا رأيي |
رد: زوجتي والسناب شات !!
حياك الله اخوي ابوبدر
سبحان الله السناب هذا صنع من التافهين مشاهير بالنسبة لي ماأتابع بنات ولا يمكن أسمح لزوجتي بمتابعة رجال إلا حسابات سياحية مايستعرض فيها صاحب الحساب مثل حساب ( عمر الرشود ) حساب مفيد ومافيه استعراض أخوي بالتفاهم والمحبة تقدر تقنعها ان الشي هذا يضايقيك وصدقني غيرتك في محلها وراح تشعر زوجتك بمحبتك لها واهتمامك بها بس باللين والإقناع لإن ماتقدر تعتبر هذا خطأ واضح تقدر تقول سلوك غير مقبول تحياتي لك |
رد: زوجتي والسناب شات !!
زوجتك صغيره وهذي موضوت هاليومين هابين فيها وتلقي البنات سواليفهم كلها شفتي سناب فلانه شفتي سناب فلان...
المنع سيزيد المشكله لكن الحل انك تتابع مشهورات امامها وبعدها احذف هم هذا سيجعلها تراجع نفسها... فهذه الطريقه افضل من المنع.... |
رد: زوجتي والسناب شات !!
لا بصراحة ما لك حق تمنعها..
يعني لو كانت تشوف اشياء سيئة باقول اي معاك حق أما سنابات عاديه .. ليش التضييق عليها! عن نفسي اتابع حسابين يديرونهم رجال واحد رحالة .. كل يوم ببلد والثاني يعرض تقارير من حول العالم واتابع الفاشنيستات.. لو زوجي مثلا يتابع ؟ .. احس بستصغره لأن هذي بالعادة اهتمامات البنات مو اهتمام رجال طول وعرض و هيبة... والحمدلله زوجي ما يهتم حق هالأمور |
رد: زوجتي والسناب شات !!
ليش تمنعها
اذا حسيت بالغيره او تضايقت قول لها وهي حره قرارها اخي الي يتزوج صغيره يتحمل مهما كان هذي لسه ماكملت العشرين فمسئوليه زواج بالاضافه تفرض عليها اشياء صعب اتابع يوميات بسناب لمجموعه شباب دخل اخوي وانا اشوف سناباتهم وتضايق وقدرت شعوره لكن لازلت اتابعهم واحس هذي حريات شخصيه اصبر ومع الوقت بتمونون على بعض وصارحها حزتها |
رد: زوجتي والسناب شات !!
سؤال
ايش فرق بين اللي يتابع يوميات بسناب واللي يتابع مسلسل من بطوله ممثل فلاني ؟؟؟ احس كلها واحد لا وبالعكس سناب شات ارحم مليون مره من المسلسلات التركيه والافلام الامريكية السخيفة سناب شات فيه ناس منا وفينا يطبخون ويقولون نكت يعملون تغطيات مطاعم وسياحة ويتكلمون عن القرارات الجديدة والا شغلات تنمية شخصيه وغيره احنا بعام 2016 لا تصير نظرتنا للامور سلبيه تذكرون اول ماطلع الدش ياكثر اللي منعوه عن زوجاتهم وعيالهم والحين صار شي عاااااادي انا ضد ثقافه المنع اذا الشخص واعي ويستخدم الشي صح مافي اي مبرر ابدا ابدا واذا عالغيره فلازم تعرف اخوي انت زوج وهم اشخاص عابرين والمرأة ماتتفتن زي الرجال! الرجال هو اللي بالعاده ينفتن بالنساء فلا تخلي زوجتك تقول بنفسها ليتني ماعلمته بسنابي ولا قلت له من مضافين عندي انسى الموضوع بارك الله فيك |
رد: زوجتي والسناب شات !!
إذا هالشي يضايقك علمها وفهمها..خصوصا انكم توكم في بداية الزواج
قولها بأسلوب حلو وإنك تغار عليها من إضافتها لهم |
رد: زوجتي والسناب شات !!
هذا من ضمن الأسباب اللي تخليني أفكر ألف مره قبل لاأتزوج مره ثانية ، يجي واحد يفرض علي وش أشوف وماأشوف ومين أتابع ومين ماأتابع ، إذا بتمنعها من السناب إمنعها من التلفزيون والراديو وإمنعها تروح الأسواق وحتى تطلع الشارع ترا بكل مكان فيه رجال ، يعني وش فرقه عن برنامج بالتلفزيون أو الراديو مقدمه رجل وبين السناب؟؟ ياخي اللي مايعرف السناب يتوقع كل اللي فيه تافهين ، أنا مسجله في كل برامج التواصل وفي فترة كنت مدمنة سناب وإستفدت إستفادة عظيمة من اللي ضايفتهم سواءً بنات في مجال الأشغال اليدوية والديكور أو رجال في مجال المحاماة والطب وتطوير الذات ، السناب حاله حال أي برنامج فيه المفيد وفيه السيء ، وفيه منهم يقدمون تقارير للمدن والمحلات اللي يزورونها وهالشي يفيد ، لو اللي عندها رجل أو إمرأه وسناباتهم تافهه عطها رايك فيهم لكن تجبرها غلط تقدر تتابعهم من وراك والأفضل إنت بعد تحمل السناب وتضيف حسابات في مجال عملك أو هواياتك أو حتى أصحابك ، السناب ممتع للي يعرف يستغله صح
|
رد: زوجتي والسناب شات !!
اخي الفاضل بدر
الصراحة حلوة وجميل انكم بداية حياتكم الشيء الي مو حلو هي التراكمات،،اذا فيه شيء مضايقك قوله لزوجتك ،، اتدكر اخوي عمره26 وزوجته 22 كل وقتها على مواقع التواصل الاجتماعي ماكلمها لكن اتبع نفس اسلوبها حست عليه ولأنها متعلقه فيه وتحبه خففت الجلسة على مواقع التواصل، سابقاً حتى مع زيارتها لنا مو معنا مع الجوال ، الان احسن بكثير .. الله يسعدكم |
رد: زوجتي والسناب شات !!
فترة وراح تمل من نفسها وراح يكون السناب شي من امور الماضي ,
غض الطرف عن الموضوع لانك لو دقتت راح تاخذ زوجتك عنك فكرة سيئة تمشي معاها عمر من الزمن ،، وبتبقى نقطة ضدك في كل تصادم بينكم ! |
رد: زوجتي والسناب شات !!
اقتباس:
وع طاري السناب حملته لكن اللي اضفتهم معي الله يهديهم زادو من شهيتي للأكل بتصوير طعامهم اللذيذ :D وحذفته وارتحت منه وهذا لا يعني عدم وجود فائدة له |
رد: زوجتي والسناب شات !!
السناب لا يقارن بالتلفزيون والراديو والطلعة بالشارع ..
السناب طريق إلى الإعجاب، وخصوصاً الحسابات اللي فيها شباب يستعرضون بأشكالهم وأصواتهم ويتميلحون ... أنا أأيد كلام اللي قالوا أن هذا الموضوع ما ينفع فيه التلميح ، إن كانت حسابات فيها فوائد ولها رسالة وهدف ( تربوية - تعليمية ) ما أشوف أنها تستحق المنع أما حسابات ( السفر والسياحة واليوميات) هذي أشوف أنك تمنعها وكونك تقول لها: يرضيك أتابع بنات؟ هذا السؤال خطأ من الأصل، لذلك جاك رد : نعم أرضى زوجي يتابع بنات ويمكن بكرة تقول لك زوجتك: إيه راضيه ! صغر السن لا يعني أن نتنازل في أمور نرى أنها خاطئة، وكونك تصارحها بالحقيقة أحسن من السكوت اللي ممكن يتطور إلى شك وفي النهاية تسيء وتتعقد الأمور |
رد: زوجتي والسناب شات !!
شرعا مافيها شي تتابع رجل
واحد مشهور كاتب والا طباخ والا ممثل ترى الرجل مو عورة زي المرأة لا وجهه عورة ولا صوته عورة وهي امرأه محصنه ومتزوجه يعني معتبره هالمشهور وسيله ترفيه عشان كذا قلت زي اللي بالتلفزيون بعدين نصهم اصلا بالتلفزيون ياما هنا يا ما هناك زي بدر زيدان مشهور بتويتر وكيك ومذيع بالتلفزيون وش بيفرق بالله تابعته هنا والا هناك؟؟ خلونا نتكلم بالمنطق غيره الرجل على المرأه حلوه لو طلبها تحتشم/ ماتضحك الخ لكن هذا زوجته جالسه ببيتها مستوره ما عرضت نفسها عشان نقول يغار وببراءه وتلقائيه تتابع سناب وتسولف على زوجها بعد يعني البنت مخها نظيف ومتربيه ليه غصب نحط شكوك بسلوكها اسمحوا لي هذي مو غيره هذا اسمه تسلط وتحكم وانتم الرجال تنزعجون من اللي ينشب لكم فلا تنشبون لبنات الناس باشياء عاديه ترى هي بتقارن نفسها بخواتها وصديقاتها ومعارفها المتزوجات وبتنقهر حتى لو ما بينت من حسن العشرة انك ماتضيق عليها |
رد: زوجتي والسناب شات !!
صراحة انا كبيرة واتابع شباب بس حساباتهم جميلة ومفيدة وأقول لزوجي احيانا يتفرج معايه
هو ما قد علق الله يستر لا يكون مثلك كاتب بقلبه وساكت والله ما نتابع الا بحسن نية والتسلية فقط لا اكثر نصيحتي لك لا تضغط عليها خلاص لمحت لها يكفي هي مع الوقت بتحاول تخفف علشان خاطرك ومراعاة لمشاعرك خاصة اذا انت راعيت مشاعرها وما اجبرتها تترك مشاهدتهم لان الاجبار معناه انك تشكك فيها وفي نيتها وأخلاقها وهذا الامر يخلي المرأه تعاند وكأنه نوع من العقاب على شك زوجها فيها لا تشيل هم المسألة مسألة وقت وراح يخف الموضوع |
رد: زوجتي والسناب شات !!
اقتباس:
|
رد: زوجتي والسناب شات !!
مرحباً أخي
كانوا الرجال زمان أول يتداولون كلمة عند الزواج وهي ( إذبح بسك ليلة عرسك ) والمقصود منها كون رجال في بيتك وولف زوجتك على طبائعك وعلى إحترام البيت وإحترام الأصول ولأن الزمان الآن تغير وتغيرت فيه بعض أفكار النساء ومطالباتهم وضعفت فيه بعض شخصية الرجال وإدارتهم لحياتهم الزوجية .. ومع إنتشار وسائل التواصل والتي في ظني أنها أفسدت كثير من البيوت وذلك بسبب الإستخدام السئ لها ومن ذلك أقول .. أين غيرة الزوج عندما تتابع الزوجة رجل مهما كانت شخصيتة وعلمه ودينه .. وهناك فرق بين أن أنظر إلى معلومة أو مقطع بشكل عابر سواء في التلفاز أو اليوتيوب أو الواتس وبين أن أتابع شخص وأكون تابع له في أي رسالة أو مقطع يبثه .. فهذا قد يعكس بشكل ظمني الإعجاب بالشخص حتى لو كان إعجاب برئ .. ولكنه مما يخالف طبيعة الغيرة .. وهذا الأمر قد يحصل حتى من النساء عندما يتابع أزواجهن النساء مهما كانت شخصياتهن .. وقد ترضى بعض النساء بمتابعة أزواجهن لبعض النساء وذلك بسبب أنهن من أرشدن أزواجهن لهؤلاء النساء .. أما لو ترك الحبل على الغارب فأعتقد أنه لن تقبل الكثير من الزواجات بمثل هذه المتابعات أخيراً ما أريد أن أصل إليه .. ليس الأمر كما يظن بعض النساء أنها حبس للحريات وكتم للنفسيات وسلب للإرادة وإستعباد وإنما هي إستشعار من الزوج بعظم وحق الولاية التي كلف بها من الحفاظ على رعيته وحمايته لهم مما قد يثير الشك أو يدعو للإنفتاح وكسر بعض الحواجز أو حتى ربما الإنجرار في عالم بدايته مضيئة ونهايته مظلمة لو أُ سيئ إستخدامه لذلك .. رأيي الشخصي أن تصارح زوجتك أن متابعة الرجال تزعجك ولا ترضاها وأنها ثبت الغيرة في قلبك وأنك تخاف عليها وكذلك أنت بالمثل تمتنع عن المتابعات كي تكون قدوة لها وأما الفوائد والعلم فمصادرها كثيرة وليست مقتصرة فقط على السناب والله أعلم |
رد: زوجتي والسناب شات !!
مااشوف فيها شي تتابع الي تبي
انا اتابع شباب بالسناب واغلبهم يوميات وابشرك صرت اطفش منهم واغلب السنابات سكيب😂 |
رد: زوجتي والسناب شات !!
الله يعطيكم العافية يا اخوان على ردودكم ,, افادتني كثير
مع اني نوعا ما احترت , الردود بين مؤيد ومعارض , ولكن يرجع لبيئة الشخص في النهاية حجلس معها ان شاء الله واكلمها للمرة الثانية وان شاء الله خير . فعلا هذا عيب اللي ياخذ الصغيرة , كنا زمان نقول خذ الصغيرة تربيها على يدك , الكلام هذا ما يمشي دحين . |
رد: زوجتي والسناب شات !!
اذا تقدر تتحمل , اسمح
اذا ما تقدر تجامل نفسك , امنع شخصيا انصح بالمنع تجنبا للمفاسد , لكن بالراحة لانها صغيرة |
رد: زوجتي والسناب شات !!
أنا ضد منع زوجتك بالكليه من متابعة حسابات الرجال بالسناب، لأنه يوجد بالسناب حسابات لرجال متخصصين في مجالات مفيده ونافعه مثل التنميه البشريه وعلم النفس والطب والسفر والتقنيه وغيرها وأغلب المحتوى نافع ومفيد وأنا شخصيا أستفدت منها ولا أعارض زوجتي من متابعة مثل هاذي الحسابات.
لكن يوجد في السناب حسابات لمشاهير رجال أنا ضد انا تتابع زوجتي حساباتهم وامنعها من متابعتهم وأنصحك ان تمنع زوجتك من متابعة مثل هذه الحسابات لان ما يعرض فيها هو استعراض وتميلح ومقاطع سخيفه ... وقد تألب زوجتك عليك عندما تبدا بالمقارنه بينك وبينهم في المظهر واللبس وخفة الدم ... نصحيتي لك وازن بين النافع وغير النافع من الحسابات و بين لها انك لا ترضى أن تتابع مثل هذه الحسابات اللتي فيها استعراض وتميلح ... وبالمقابل لا مانع عندك من انك تتابع حسابات لرجال مفيده ونافعه واذا وجدت حساب محتواها نافع ومفيد اطلب منها ان تتابعه واذا اردت ان ازودك ببعض الحسابات المفيده والجميله لتشاركها مع زوجتك |
رد: زوجتي والسناب شات !!
للأمانه بعض سنابات الشباب المشاهير تجذب وتأثر في الأشخاص العاطفيين ويحصل التعلق فيهم وعدم الاستغناء عن شوفتهم فكيف لو كان الي يتابعهم مراهقين ؟
خاصه انه بعضهم يتميلح بشفايف بالجسم بحركات ماينتبه لها الا الاشخاص العاطفيين زي ماذكرت لمح لها تدريجياً وان شاء الله تتركهم وقولها تعوض بسنابات المشاهير من البنات يعني تضيف مشهورات اكثر |
رد: زوجتي والسناب شات !!
صديقتي مرة فتحت قلبها لي و اخبرتني بأنها اضافت مصمم ديكور .. في البداية مدحت افكاره وذوقه .. بعد ذلك بدأ قلبها يتعلق فيه .. تقول اشعر بأنه شهم وذويق وجنتل و و و الكثير من الصفات .. مع ان حسابه ليش شخصي ولا يعرض فيه حياته اليومية بل افكار في التصميم الداخلي والديكور ويتحدث بشكل عام . لكنها كانت في فترة خلافات وتوترات زوجية.. كانت تنتظر بفارغ الصبر ان ينزل مقاطع سناب وتمنع نفسها قسرا من توجيه اي كلام له على الخاص والسؤال عن سبب غيابه او تأخره أو حتى مدحه وشكره ..
بعدها استدركت حالها وشعرت ان انجذابها وتعلقها به يزيد من نفورها لزوجها فمسحته وارتاحت هي من خذا التعلق وحتى من تأنيب الضمير.. |
رد: زوجتي والسناب شات !!
مثل هذه الامور المفروض تنبع من ذاتها صعبة تنبع منك
حاول ان تعبر بشكل غير مباشر علها تنفع و زوجتك ليست صغيرة بهذه السن الكل يعرف العيب و الاصول |
رد: زوجتي والسناب شات !!
-اللي يقول الرجال اللي بالسناب زي اللي بالتلفزيون ابدا غير صحيح..التلفزيون هنالك كنترول اما السناب فيقول ويعرض مايشاء
-اللي يقول قس عليها لو تابعت بنات مشاهير مالذي يحدث؟الوضع يختلف تماما فالبنت لاتظهر وجهها ولااحد يعرف من هي اما الشاب فيظهر وجهه وقد يكون لبسه او وضعه مغري لمن يبحث عن العاطفة البنات والشباب المراهقون دائما عاطفيون لذلك متابعتهم للشباب تكون بسبب الاعجاب وليس الفائدة فنادراً مانجد منهم من يتابع حسابات السياحة او الشعر او غيرها انا اشوف التوازن مطلوب فالمراقبة والتشدد غير مجدية وتؤدي للنفور ولكن ليس معناه ترك الحبل على الغارب وارى ان تقنع زوجتك بالابتعاد عن متابعة مثل هالنوعيات من الشباب بالاسلوب الحسن وليس بالامر |
رد: زوجتي والسناب شات !!
اقتباس:
هذا اللي كنت اقصده والحمد لله انه من كلام نساء عشان محد يفكر انه الرجال متحيزين وما عندنا ثقة ومدري ايش لانه باختصار يمكن الايقاع بالنساء بدون حتى ان يشعرن |
رد: زوجتي والسناب شات !!
والله ياخوي لو حطيت نفسي بمكانك اكيد بتضايق خصوصا اذا كانت حسابات بدون فايدة
عموما انت لازم تشغل وقتها وااااااايد بحيث ما يصير عندها وقت وترد الليت تعبانة ومرهقة وسييييييدا عالنوم |
| الساعة الآن 07:51 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©