|
زوجي راجع من السفر
السلام عليكم اخواني
وكل عام وانتم بخير زوجي سافر باجازه العيد ونزلني مع الاطفال بيت اهلي طبعا سافر برا سياحة ووناسه وانا بين 4 جدران مع الاطفال وطبعا عطاني مصروف لي وللاولاد البارح تعب ولدي واخذته مع اخوي المستوصف هو يسافر يهيص ونسايبه يشيلون عياله للمستشفى انا مفروسه منه خاصه اني عانيت معه كثير الفتره الماضيه وهو بكل برود راح سافر مع اصحابه ويشوف هالشي حقه لانه رجل وانا لاني امرأه ابلعها واسكت واضف عياله لحد مايرجع من وناسته اللي يقهر كل ماكلمني يتشكى ان الديره حر وزحمه هناك واذا شفت الصور والفيديو انواع الضحك والوناسه امس علمته ان ولده مريض واكتفى بالسؤال عنه وعطيه كيت وكيت بالليل قال ايش فيك اليوم قلت سلامتك انا اقابل الولد وانت انبسط قال خلاص طلعتي هالسفره من عيني مارديت عليه هو راجع بعد يومين انا زعلانه منه مرررره بس تعبت من المشاكل خاطري مكسوووور يا ناس مدري كيف اتعامل معه اذا رجع وللامانه هو واعدني بسفره بعيد الاضحى بس زوجي شاطر بالكلام ومقصر بالافعال وانا مره ضايق صدري من تصرفاته وانانيته عطوني اراءكم |
رد: زوجي راجع من السفر
انا ما ابغى اتخانق معه
بس ابغى احسسه بتأنيب الضمير ولا ابغاه يعيد هالتصرف انو يرميني باجازه العيد ويسافر يستانس مع اصحابه ياليت اقتراحاتكم |
رد: زوجي راجع من السفر
كوني منأكدة اذا هاوشتيه او نكدتي عليه... ماراح ياخذك لمكان!!
خلي تأنيب الضمير يجي من عندو.. هو عارف انك زعلانة.. لما يجي استقبليه زين وقولي مبسوطة لانك طلعت ... وبعيونك شوية حزن.. حزن مو غضب!!!!! راح ياخذكم من نفسو.. ومثل ما قلتلك الرجال بحاجة بين الفينة والأخرى يسافر لحالو... الي يزعجك فقط رفقة السوء والاماكن المشبوهة.. اكرر يا كنافة هو يعرف انك زعلانة.. واكيد ناوي يعوضك.. اذا اظهرتي زعلك مرة ثانية حيصير نكددددد |
رد: زوجي راجع من السفر
من حقه يطلع يستانس ويرفه عن نفسه وين المشكلة في الموضوع
يعني حاسدته على هالاربع ايام ليه يسافر ويتركك عند اهلك ثقي ثقة تامه لو انك تفهمينه وماعندك مشاكل معه فراح يكنسل سفرة اصحابه وياخذك معاه بدلا منهم شكلك من النوع النكدي |
رد: زوجي راجع من السفر
اقتباس:
|
رد: زوجي راجع من السفر
اقتباس:
لو يحبني ابدا ماعملها انا اقول هالكلام مع نفسي بعدين اتعوذ من ابليس بعدين زوجي طول السنه يطلع يستانس يوميا يشوف اصحابه ويرفه عن نفسه بينما هو كاتم انفاسي واخرتها استغل اجازه العيد وسافر وخلاني انا مو نكديه بس بشر.. مو جماد |
رد: زوجي راجع من السفر
ياليت اللي يرد يعطيني اقتراح يفيدني
بدون مايقول انتي نكديه وما اعرف ايش هالكلام بس يضيق صدري بدون فايده وترى الباشا سافر وهيص وهو اللي نكد علي العيد قبل يومين رايحه عزيمه لاهل زوجي شافتني وحده وقالت: مسكينه سافر وتركم كذا قدام الحريم قلت لها: الله يرجعه بالسلامه وسكت شمت الناس فيني حسيت نفسي من هذولا الهيلق اللي زوجها يسافر ويرمي المسؤوليات عليها مع ذلك اتعوذ من ابليس بدل المرة الف فلا احد يبرر له رجاء بس كيف اتعامل معه اذا رجع؟ |
رد: زوجي راجع من السفر
اقتباس:
انا اطلعت على بعض مشاكلك السابقة واضح ان كل واحد فيكم يجامل الثاني بس علشان تمشي الحياه |
رد: زوجي راجع من السفر
بصراحه اختي انا شايف انك جالسه له على الحبه
طيب واذا اخوانك ودوا ولدك للمستشفى ايش فيها خاله ووداه للمستشفى لان ابوه مسافر هذا الطبيعي وين المشكله وبعدين انتي متضايقه انه مبسوط ومستانس اشوف بصراحه انك تدورين الزعل دواره |
رد: زوجي راجع من السفر
استقبليه مثل ما يحب... بكل شي..
وخلي يحكيلك عن سفرو،، وانتي افرحيلو لكن خلي شوية حزن بعيونك بسسسس.. هو بيفهم اكيييد،، انتبهي تحكي اي كلمة والا ماراح يوجعو قلبو عليك.. اذا سكتي صدقيني راح يأنبو ضميرو أكتر.. وكوني له متل ما يحب بكل شي.. |
رد: زوجي راجع من السفر
اقتباس:
لاتنكدين عليه |
رد: زوجي راجع من السفر
اذا عطيته من الكلام الحلو
اخاف هذا تشجيع له يكررها كأنوا انا وحده عادي ماعندها احساس سافر واستناس وانا انلعن بالديره اضف عيالك عادي حبيبي كررها الاحتمال الثاني برضو خايس انه يقول تسنعت لما سحبت عليها وسافرت هذي ماتجي الا بالعين الحمرا |
رد: زوجي راجع من السفر
اقتباس:
اسمحلي اختي كنافة نكدية ونص طليقي الأولي عقب وفاة بنتنا راح تايلند ومن حسابي وبدون لا ادري وانا مخليني بروحي عقب هالموقف الصعب جدا ولما وصل استقبلته بكل وناسة ورحابة صدر انتي تبين تحكرينه فيج وتبين تكون دائرته ضيجة فيكم وهالشي ما يناسب تكوين الرجل لو انا منج اكسر عينه هو درى انج زعلانه وعنده تأنيب ضمير واذا استقبلتيه بكل حب مراح يعيدها لانه عارف ان هالشي يضايقج ومع هذا انتي مستانسة لوناسته اذا رجع استقبليه بمفاجأة او شي يسر خاطره مع أكله حلوة هو يحبها صدقيني زوجج فيه الخير بس رجل وبطبيعة الرجال اناني يعني هو مو خارج قانون الذكورة وبعدين عياله اهما عيالج طلعوا من بطنج مو من بطنه وما فيها شي لو اخوانج ودوا عيالج المستشفى وهو مسافر إبو بنتي مخليني اعابل في بنته وهو مثل ....... قاعد عند امه لو مسافر اهون خلج احسن منه واستقبليه بكل حب وفرح |
رد: زوجي راجع من السفر
كيف استقبله بمفاجأه
حسستوني راح يجيب الدكتوراه والا راجع من عمره وهو سافر يتصرمح بشرق اسيا انا بحاول اعصر على نفسي ليمونه واستقبله عادي ماراح اعاتبه عشان ما اصير نكديه اللي عنده خطه ثانيه يفيدني فيها ما ابي هالشي يعدي بالساهل |
رد: زوجي راجع من السفر
اقتباس:
لاتحطين راسك براس زوجك خليك حواء واحتوي الموضوع وحاولي تلمحين له بطريقة حلوة "انه يازوجي كان ودي تبقى عندنا" لان انتي ماقبليته زوج لك غلشان يقعد مقابلك 24 ساعة لازم يغير جو وانتوا يطلعكم اي واحد ثاني لانكم عائلته اما اصحابه اكيد رتب معهم من اول وخالص انتي خسرانه اذا حطيتي راسك براسه حتى ماراح تستفيدين لانه هو سافر ورجع ماراح تخرجين الا بكره ونكد يعود عليك بالضرر |
رد: زوجي راجع من السفر
اقتباس:
وليش تعصرين على نفسج ليمونة استقلبيه بحب وبدلع وبلبس حلو وغيري شوي بالبيت يعني اي شي تحسينه بيلاحظه زوجج واعتقد اول ما راح يلاحظ انتي انتي تغيري عشان هو يتغير |
رد: زوجي راجع من السفر
اقتباس:
كلام فاضي وكذب لما يقولو اذا ريحتي زوجك مابيقارقك ويترك اصحابة << ياما ياما سكتنا على امور اقوى من سفر وياما و ياما ريحنهم وسمحنا لهم يسافرو + ويسهرو + وينبسطو والنتيجه = تمادى الرجال والحل هو الانفصال دامة مو قد مسؤلية بيت وزوجه |
رد: زوجي راجع من السفر
ماراح يحس بتأنيب الضمير .. بالعكس لما تنكدي عليه راح يطفشك بالسفر وكل مشكله حيقولك بسافر ...
والمفروض الزوجه لما يسافر زوجها تجلس ببيتها.. لو راحت لاهلها حيفضل مرتاح ومطمن ولا على باله ... وخاصه الزوج الغيور مستحيل يتحمل يسافر وزوجته بالبيت ... انا ماأيد سفر الزوج وزوجي عارف هالشي من قبل الزواج وفوق كداا.. مطفشني بالسفر وكل فتره يقولي حجزت .. ابين له انه فكه ومبسوطه وفرصه عشان اخرج مع صحباتي.. ينسى السالفه ولا سافر للان ... واتوقع لو بينت زعلي ورفضي بيصمم اكتر .. الله يعينك ويسخر لك زوجك ويفتح لك من اوسع ابوابه 💓 |
رد: زوجي راجع من السفر
بصراحه ما أشوف في سفرته خطأ ..
كملك وأعطاك مصروفك وين المشكله والرجل واعدك بسفره .. يعني مو مقصر عليك .. وبخصوص مرض الولد وأنا أخوك هو ما يعلم الغيب .. والمرض مو كايد الحمدلله يعني تبينه يرد عشان الولد مرتفعه حرارته او شئ خفيف مو معقوله وأخوك كثر الله خيره قام بالواجب .. وتبين الصدق سافرت لأندونيسيا أكثر من سفره وقررت أخذ العائله وأخذتهم فرق شاسع من ناحيه الراحه النفسيه اولاد وصياح و السفره صارت كلها تحذير ومشاكسه الأولاد متعبه لا وطاح علي الولد الصغير 4 سنوات واخذ له 6 غرز فوق عينه وقدمت حجز ورجعت ..، لكن الواحد بحاله هو وأخوياه وربك راح نفسيه لا تفكير ولا دوشه هو معك طول السنه خليه يهج له كم يوم وين المشكله ،. سفره له وسفرك لك يسعدك ربي عن النكد استقبليه بحفله خاصه مع هديه وجو هادئ وش زين الرومانسيه. . وما يمنع تقرصينه قرصه خفيفه مثل تقولين لا عاد تتركنا وتسافر ترى فيه ناس تفقدك وتبيك وهيك شئ الله يألف بينكم ويسعدكم |
رد: زوجي راجع من السفر
لاتبيني له انك حزينه ولاتستقبليه بحب ودلع لان خاصه ان الايام الي قبل كانت متوتره... انا اشوف انك تطنشيه بيوم رجعته شوفي لك خرجه مع صحباتك او اعزميهم ببيتك... اهم شي تنشغلي بس لاتنشغلي ببيتك واطفالك ابدااااا...
|
رد: زوجي راجع من السفر
لا تصيرين نكديه
ازعلي اذا سحب وما سفرك كذا بتخلينه يحقد عليك |
رد: زوجي راجع من السفر
الحين هو مسافر منحاش مني لاني نكديه
والا مسافر عشان ينبسط وبس ترى تفرق الحالتين عن بعض الثانيه ارحم من الاولى بكثيييير الرجال اللي يبررون له ترى انا بعد انسانه ودي اغير جو والود ودي اتركه هو والعيال واسافر مع صديقاتي والا خواتي بدون مسؤوليات ولا حنه ورنه وصراخ وبكاء وبامبرز ودوشه لكني حارمه نفسي من هالامور لانه صرت زوجه بينما الرجال يبون يعيشون حلاوه الزواج وحلاوه العزوبيه.. مايخلون بخاطرهم شي هذا مو موضوعي انا مقتنعه ان تصرف زوجي غلط ومتردده كيف اواجه هذا الغلط كوين قلبي قلت له بجلس ببيتي ورفض لان اهلي بنفس المدينه وانا بعد خفت اتوهق لحالي |
رد: زوجي راجع من السفر
اقتباس:
انو اسوي اللي قلتي بس خايفه قبولي لسفرته يعني اني مقتنعه انها حقه وعادي يسافر كل عيد مع اصحابه وافتح لي باب مايتسكر اخاف يفهم سكوتي انه تسليم وانه من حقك يا حياتي |
رد: زوجي راجع من السفر
انا زوجي مسافر ولا افكر ادق عليه او استقبله ..
هو اللي رايح ومستمتع وفالها الله لا يهينه المفروض اذا جاء يستقبلني احسن استقبال دام نفسيته انبسطت .. |
رد: زوجي راجع من السفر
اقتباس:
مو شرط اول ما يجي يمر ياخذ الغرض اللي هو انا والعيال واحضر له اغراض الدوام زي الشغاله اللي رجع كفيلها من السفر |
رد: زوجي راجع من السفر
اقتباس:
بس الرجال عليهم افكار غريبه ولاحظي الردود بموضوعي هنا نفس نوعيه زوجي الله يأجرنا |
رد: زوجي راجع من السفر
في غلطة كبيره ارتكبتها امس
صور لي فيديو بوسه سناب صورت له نفس الفيديو سناب بعدين احتقرت نفسي حسيته ضحك علي وانا خبله رجعت عطيته بوسه ابوسه على ايش ياحسره هو متسدح برا وانا ملخومه مع بزارينه اعترف لكم ماعرفت اثقل عليه وهو مسافر بس افكر هاليومين ما اكلمه ابد ابد |
رد: زوجي راجع من السفر
علاقتكم متوترة مو بصالحك التصعيد
بس ارجعي ولا تفرحي ولا تزعلي سوي زي ماقالت كوين ماظن فيه طريقة تضمن عدم سفره مرة ثانية اذا حاول السفر مره اخرى عاد وقتها دوري حل للموضوع انتي من كثر ماتقولي بيسافر بيسافر حسيته بيقعد شهر طلع اسبوع وبعدين اسلوبك الولد تعبان وهو يتصرمح ومخليه ومدري ايه يعني فيه خنقة بالمسؤلية هو قايم فيهم بوجوده ومهي مشكلة لو وداه خاله في غيابه |
رد: زوجي راجع من السفر
بعض الأحيان كثرة الكتابة في المنتديات لكل مشكلة في حياتنا لها أثر سلبي كبير على توجهات الشخص وقراراته
ولابد أن الشخص يعتمد على نفسه في حل مشاكله بالطريقة التي يراها مناسبة ويتحمل تبعات أفعاله .. لأن هذا يقويه ويكسبه خبره البعض قد يقول أنه أستفاد من آراء الناس وتغيرت حياته .. ولكنه في الحقيقة هو قد يعتبر عبارة عن حقل تجارب لعقول الناس والله أعلم |
رد: زوجي راجع من السفر
اقتباس:
اذا سوا لك تصرف ايجابي رديه له ..لكن ما احبذ تكون المبادرة منك |
رد: زوجي راجع من السفر
اقتباس:
ايوه الله يسعدك.. ودنا نحن كمان نهج ونخلي الأولاد ونطلع ونتفسح لا صراخ لا عياط... لكن؟ قلتيها،، نحن صرنا زوجااات وامهاااات وهذي مسؤوليتنا غصبا عنا! والعناد ماراح يغير هالحقيقة ماراح تخليهم لابوهم ولا لاهلك ولا راح تتفسحي مع صحباتك شووووو ما عملتي.. الرجل رجل..كذا تكوينهم وتربيتهم.. يعني ما بتزعلي على زوجك لما تطلعو سفرة والاولاد يصارخو ويبكو وتغيير ويشيلهم و و و .. والله السفرة بتصير مالها طعم.. شوفي انا فاهماك كتير لان شخصيتي تشبهك نوعا ما.. انا ما كنت احب الاطفال وماكان بدي اجيبهم من الاساس وكان عندي احلام ودراسه وانا بنت وحيدة وسط 4 اخوان يعني مالي بسوالف الحريم.... لكن بضغط من زوجي انجبت لانه واعدني يساعدني وحياتنا ماراح تتغير و و و انجبت ولقيت نفسي مثل كل هالزوجات اصبحت فجأة ام وانا عندي 20 سنة نفسي تتوق للطلعات والسفرات والصحبات و الونااااسة عقلي مو مستوعب الحياة الجديدة لكن الحمد لله تأقلمت مع الوضع الجديد وعرفت انو هاي مسؤوليتي.. ماهمني اذا هو تملص من المسؤوليات .. اساسا انا بالبيت ومتحملة الجزئ الاكبر سواء ظل معي او لا.. فانا فخورة بنفسي لاني قمت بالواجب تجاه العيال رغم احلامي المختلفة تماما.. لو سايرته وعملت زيو ايش بيتغير؟؟ لا تفكري اننا ننصحك بالخضوع والسكوت او اننا نسوان من غير عقول او الجيل القديم.. ننصحك بلي راح يفيدك في حياتك انتي وزوجك.. الحياة ما تمشي بالعناد وهذا حقي وهذا واجبك لا لا.. اعطيك مثال.. انتي على رجولك واشارة المرور خضراء.. وجاية سيارة واشارة الامور عندها حمراء.. السيارة ما خففت السرعة ( هي غلطانة).. وانتي عندك الاشارة خضراء وقمتي عبرتي الطريق رغم انك شايفة السيارة جاية ( انتي مصرة على حقك).. عبرتي الطريق وصار حادث لا قدر الله وصار عندك اعاقة او اصابات... طيب مين على حق؟ ومين الغلطان بالسالفة؟ ماراح نختلف لكن ماذا استفدتي من اثبات الحق والعناد.. خذي هذا المثال للتعامل مع زوجك.. انتي مش بمعركة وزوجك فيه خيييير لكن يفرق معاه الأسلووووب.. وشخصيتك القوية الوجيهة المختلفة عن النساء الاخريات حلوة بنظر زوجك.. لكن يبغاك تطلعيها مع الاخرين.. لكن معاه خلي الانوثة تطغى |
رد: زوجي راجع من السفر
اقتباس:
معناة حتى وهو مسافر بيفكر فيكم والله في ازواج اذا سافرو ينسون ان عندهم زوجه اصلاً وبما انك واثقة فية وسفرتة مافيها خيانة لك لاتزعلين ولا تشيلي بخاطرك |
رد: زوجي راجع من السفر
اقتباس:
|
رد: زوجي راجع من السفر
المشكلة مو قادرة تستوعبي ان زوجك راح يعيش ويسافر ويعمل الي براسو حبيتي او كرهتي. فيه خاسر واحد هو انتي.. واحتمال زوجك يتزوج ثانية او يتزوج مسيار ويحقق الكل بالكل..
مفكرة حالك راح تمنعيه بالغصب والله امه وابوه ما يقدرو عليه.. |
رد: زوجي راجع من السفر
شايف اغلب الردود غلط تنصحوها تتحمل وكل شي عشان ماتنكد على زوجها وهو طبعا ولا شي كل شي جاهز قدّامه يسافر ويستانس بينما لو حطت كل وحده مكانها زوجها سافر وهي في البيت راح تزعل اكيد حتى لو مابين عليها تاخذ في خاطرها راجعت بعض مواضيعك زوجك يدور على الزله كنه مثل الطفل على كل شي يزعل ويصيح ويبغونك الاعضاء تمشين له كل شي عشان ماتصيري نكديه ههههه حتى لو تزوج عليك قالو لك انبسطي افرحي عشان لاتنكدين عليه صراحه اشوف زوجك غلط في سفرته مفروض يسفرك انتي أولى من اصحابه ايام مراهقه غير متزوج يسافر براحته اما المحين متزوج وراه مسووليه واطفال وبيت لازم يتحملها مو يتهرب ويسافر اشوف افضل انك لما يرجع حاولي تطنشيه بس اذا سئلك جاوبي قد السوال لاتطولين كلام معه لازم يحس انه له حق عليك يسفرك مثل هو يستانس زوجك مثل الطفل تقعدين تدارين فيه تمشين عليه عشان ماتصيري نكديه لين متى ??
|
رد: زوجي راجع من السفر
اقتباس:
كنافة أختي حياتك صارت عرض للآخرين تذكريني ببرنامج كان يعرض عزيزتي لازم تكوني اشوية خصوصية مش كل يوم موضوع منزلة حتى لو كان المنتدى مخصص للمشاكل د وأنت إنسانه من النوع اللي تتشرب الردود التي تؤيدها وتبدئي تلغبي دور الضحية تحبين هذا الدور جدا عزيزتي.. فلتكن لحياتك خصوصية فلا تسمحي لأحد أن يسترق الباب الذي بينكما.. موفقة. |
رد: زوجي راجع من السفر
طيب لي ماتطلبي اهلك يسفروكم خمس ايام يعني يرجع زوجك وانتي مسافره مو حقد لكن يحس شوي
|
رد: زوجي راجع من السفر
ما أعرف إذا كلامي بيعجبك أو لا
لكن سفرة بالسنة عادي وسعي صدرك اللي يشوف طريقة كتابتك يعتقد إنه كل شهر يسافر ياقلبي أنت شئنا أم أبينا فيه فرق بين تكوين الرجل والمرأة الرجل طبيعته حياته برا البيت ، يسعى ويحضر مجالس الرجال ويبيع ويشري والمرأة قال لها الله تعالى (وقرن في بيوتكن) هل يأمر الله بشيء يخالف فطرة حواء؟ أنا معك ودنا نسافر ونطلع لكن مانوصل مواصيل الرجال مين الزوجة اللي ماقد سافر زوجها بدونها؟ والله كلهم يسافرون وزوجي إذا قال لي بيروح بما إني واثقة فيه وبأصحابه والله إني أفرح أحصل إجازه من شغل البيت واتسدح في بيت أهلي مع خواتي محفولة مكفولة وفلوسه أتهنى فيها مطاعم وغيره وعيالكم مالك منّه إنك تقابلينهم ترا عيالك وش فيك عياله وعياله كلنا عيالنا بحلوقنا ولو طلعنا بدونهم تلقين كل شوي متصلين عليهم أكلتوا شربتوا نمتوا ؟ كذا انخلقنا ياكنافة ما انخلقنا رجال وأمرنا بتصرفات الحريم انخلقنا حريم نعرف نستمتع بحياتنا بطريقة غيرهم كأنك زوج زوجته موظفه وحاسدها لأنه هو اللي يصرف على العيال وكل ماقام وقعد قال راحت فلوسي على عيالها وطار راتبي على البيت والله حاسه بقهرك لكن مو على سفرة بالسنة أنت مبالغة شوي اقترح اذا بتبردين خاطرك وما اشتقتي له احجزوا شاليه مع أهلك ثلاث أيام وإذا جاء تكونون هناك، واذا رجعتي خلاص صافي يالبن وإذا على التكرار مافي فعل يضمن لك مايكررها لو أظهرتي قهرك ممكن يتحمس يعيدها في وقت المشاكل لأنه بيحصل راحه وقهر لك ولو استقبلتيه استقبال حلو ماراح تصبرين وبتخربينها اقترح عليك تستقبلينه بما يرضي الله لوجه الله قولي هذي يارب عشانك.. وربي بيعوضك دنيا أو آخرة |
رد: زوجي راجع من السفر
انا مدري ليش اذا ازواجكم سافرو بدونكم سويتوها سالفة وكأنهم مسويين مصيبة ..
ياااحبكم للنكد .. |
رد: زوجي راجع من السفر
والغريب ان حياتكم كلها مشاكل في مشاكل .. يعني غيابه المفروض يكون افضل من وجوده .. بس انتو تحبون عوار الراس وماترتاحون الا لما تتقابلون وروسكم بروس بعض ..
انا لما اوصل لهالمرحلة من المشاكل اقول لزوجي ماتبي تسافر ونرتاح شوي؟ |
| الساعة الآن 01:27 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©