|
عصبيته الغير مبررة
السلام عليكم..
مبارك عليكم الشهر جميعاً والله يتقبل طاعاتكم... في البداية :- *زين ما قبل الزواج : عصبية - ولازلت - لدرجة إن تمر أيام لو احد يكرر علي السؤال مرتين لان ما سمع جوابي اتنرفز ... بإختصار كنت نااار و شراار .. جبريت متنقل .. صوتي عادي و طبيعي ان مرتفع طالما متنرفزة او اتكلم بلهجة واضحة فيها النرفزة ما بعد الزواج: لازلت عصبية بس هادئة .. ما ارفع صوتي حتى لو بنفجر من العصبية .. واتكلم بلهجة عادية جداً... اقرب للبرود ليش ؟ .. لاني متزوجة حقل ألغام .. ممكن ينفجر فيني بأي وقت / بغض النظر عن كل ايجابياته اقل شيء ينرفزه .. اقل شيء يعفس مزاجه .. بإختصار عصبيته تقتلني لاعت جبدي صار الوضع لا يُطاق... مثال : اليوم كان بيشتري اغراض حق شهر رمضان ولو ان ما نفطر في البيت الا احيان نادرة بس السنة قررنا نتقضى بعض الامور اللي مدة صلاحيتها طويلة... بكل أدب و بكل هدوء وبالحرف الواحد قلت له : حبيبي آنه اليوم احس بضيق خل اروح معاك ناخذ اغراض واوردي من زمان ما طلبت منك نطلع.. قال : لا - قالها بنرفزة قلت له : جواب نهائي ؟ قال : نعم نهائي قلت له : خير قال : خوش ( من يقول هالكلمة معناته ان حقل الالغام مُهدد بالانفجار ) صكيت التيلفون .. ثواني واتصل فيني قال : انعفس مزاجي ما باشتري الاغراض الحين خلهم للعصر.. آنه تنرفزت اموت واعرف ليش انعفس مزاجه!!! سألته : عسى ما شر فيه شيء يضايق ؟ بغيت السلامة على عمري.. ظل يتكلم و يتحلطم ووو الخ وآنه بكل هدوء ساكتة قلت له خلاص ما ابي اروح مكان روح بروحك .. عصب اكثر! اسكت عنه يقول حقرتيني اتكلم كلام مختصر يقول تبين تسكتيني ارد على كلامه يقول ترادديني كرهني في عيشتي .. مو قادرة ابلعه لاعت جبدي هالعصبية تنسف مواقفه الطيبة تنفرني منه وبعد كل هالتحلطم والتنرفز يجي يمزح معاي ومطلوب من الآلة اللي اهي آنه تتفاعل وتضحك من قلبها .. من قلبهااا ولا راح اكون النكدية اللي ما اقدر انه جاي يراضيني اليوم عطيتها اياه كاااش و قلت له كلام ادري ما يعجبه ... قلت له آنه لو قليلة ادب وارفع صوتي عليك جان تجنبت ترفع صوتك .. قال يعني جبان ؟ قلت له لا بس تتجنب الصراخ... انت جذي تبي وقاعد تجرني ان اكون قليلة ادب واتنازل عن اخلاقي عشان اتجنب صراخك على امور سخيفة يقول بصراخج ما بتكسبين قلبي .. قلت له ما ابي اكسبه عوع ما ابيه .. ابي اكسب هدوئك والقهر يبيني اعترف بطيب نفس ان آنه غلطانه !!!!! ركزوا على كلمة بطيب نفس... شالفايدة تقهرني وتعفس ابو مزاجي وتجي تراضيني .. من قهري في النهاية صرخت في وجهه قلت له صوتك لا ترفعه علي ابدا ابدا واغلب المواقف تكون بهالسخف واسخف بعد! للحين صايمة ما طب بطني شيء من اذن المغرب للحين .. مو طايقه آكل.. زهدني عمري ما همني خل يعصب .. لان ما يقدر عليه الا اللي خلقه .. لكن آنه ابي اطنش .. قلت له آنه ما اصلح لك .. ما اقدر اتحملك .. لا تنشوي ولا تنقلي ولا حتى اقدر اغليه .. شلون باقضي عمري جذي! من اسبوع يمكن من قهري فمت اطق نفسي حتى لدرجة ان شمخت ويهي و رقبتي حتى الدم قام ينزل اللي يشوفني يقول متهاوشه مع قطوة طلعني من طوري... عباله لين يجي يراضيني او يجيب هدية او حتى يعتذر بنسى و بيصفى قلبي في نفس اليوم! يجي يعتذر و يمزح ويجيب اي شيء احبه لكن والله قلبي شايل عليه عصبي عصبي عصبي ادري بعد شوي بيأنبني ضميري ان كتبت اللي كتبته 😢 |
رد: عصبيته الغير مبررة
معقولة يعني باقضي عمري جذي !
عايشه مع حقل ألغام! والله قلبي يعورني لمن اقول عنه جذي بس تعبني! اذا استمر الوضع جذي باقي لي حوالي 6 اشهر بالكثير و راح اقدم اوراقي في وزارة الشؤون الاجتماعية يمشوون ليي 100 دينار! لان عقلي بيروح مني! يمكن تحسوني ابالغ .. بس الحياة صعبة ما اقدر انطق بشيء الا تنرفز! هو جذي طبعه جذي! ساعات افكر بالطلاق عالاقل ألحق على الباقي من عقلي! تغيرت والله خلاني اتغير! مو عاجبني حالي! ابي اطنش ابي لمن يعصب آنه عقلي كأني في سويسرا |
رد: عصبيته الغير مبررة
الله يعينك
جد الحياة مع العصبي حياة تقصر العمر تاخذ من عمرك وصحتك ونفسيتك سهل نقول طنشي ولا تفكرين بس صعب التنفيذ بس اللي قدامك حاولي تبعدين عن الاشياء اللي تعصبه واختصري الكلام معه اذا معصب او اسكتي عشان مايأثر عليك بعصبيته كلميه في وقت صفاء يخفف من هالعصبيه وانك مو قادره تتحملين اكثر من كذا العصبيه مو عذر يقدر يخفف منها بالرياضه والاستغفار وتمارين التحكم بالنفس |
رد: عصبيته الغير مبررة
تعالي صفي جمبي 😢😢
|
رد: عصبيته الغير مبررة
كل عام وانتي بخير
وتقبل الله منا ومنكم صالح الاعمال بصراحة ماني شايف اي مبرر لعصبيتة في الموقف الي ذكرتية الا اذا فية امور خرى لا اعلم.. عموما ابحثي بالنت كيف التعامل مع الزوج العصبي وان شاء الله تجدين حلول جوهرية |
رد: عصبيته الغير مبررة
زوجك عصبي مره
خليك بارده وفوتي بعض المواقف وألا راح تتعبين |
رد: عصبيته الغير مبررة
اتركي عنك مابتحمل وبتركه وووو
هذا مو حل يمكن هو ضايق من شي وحط حره فيك يعني انتي طلبتي هالطلب وقت تقفيلة مزاجه وترى حتى الزوج اللي اعصابه بارد يحرق الدم ويقهر القلب صدقيني هذول البشر كلن وله طبعه انتي عليك بالحلول انه وقت صفاءه وهدوءه تطلبين منه يخفف من عصبيته وفهميه انك مو قادره تتحملين ويارب يتجاوب معك اذا هو ماغير من نفسه عمر اي أحد مابيسمع كلامه ولا بيتأثر لايغير الله بقوم حتى يغيروا مابأنفسهم.. الله يوفقك ويبرد على قلبك زين |
رد: عصبيته الغير مبررة
مرحباً أختي
مبارك عليك الشهر وتقبل الله منا ومنك الصيام والقيام سأقول رأيي والله أعلم 1- وصفتي نفسك بالعصبية قبل الزواج وبعد الزواج ولكن الفرق أن بعد الزواج أصبحتِ أهدء وأستطعتي التحكم في نفسك وربما هناك أسباب لذلك منها .. خوفك أن تحتد الأمور لو أطلقتِ عصبيتك وقد تؤدي إلى الإنفصال .. ومنها عصبية زوجك التي أساساً غطى عليك برفع صوته وعصبيته على كل أمر وأنتِ أخذتِ وضع المستسلم أو السكوت أو الإمتصاص حتى لا تكبر المشكلة ... وأتوقع لو زوجك كان من النوع الهادئ لتغيرت الموازين 2- لابد أن تتصارحي مع زوجك وتشتكي من عصبيته عليك .. وأن عليه أن يشرح لكِ كيفية التعامل معه مثلاً : هل تسكتي أم تردي على السؤال فقط أم غير ذلك ... وأخبريه أنك لكِ قدرة تحمل وأن كثرة الشئ قد تؤثر على صحتك لأنك تتضايقي من طريقته وتكتمي في قلبك وذلك حباً له وإحترام 3- بما أنه رجل متدين وداعيه .. فأدخلي عليه من باب الأخلاق الإسلامية والقدوة الصالحة والأجر والإحتساب وكذلك مبدء الإثم والضرر أعانك الله |
رد: عصبيته الغير مبررة
وش تبيناننصحك زين
شلون تصيرين قالب ثلج هذا اطباع ناس شلون تفقدين الاحساس مادري بعد |
رد: عصبيته الغير مبررة
إذا حطيتي في بالك إنك في تعاملك مع زوجك تتعاملين مع ربك وقتها مو بتصيري قالب ثلج إلا بتصيري ثلاجة .. ياأختي تعاملي مع الله وبس واحتسبي الاجر والثواب صدقيني راح ترتاحي..
شغلة ثانية دام زوجك يراضيك فهو يحبك ويشتري رضاك بس طبيعته عصبي فمايقدر يتحكم بنفسه مع انه المفروض يحاول يتحكم بنفسه .. لكن دامه يصلح غلطه معك فهذا شيء طيب .. أنت الصدر الحنون بالنسبة له تحمليه وسايريه وصدقيني مو بكيفه ومو تقليل من احترامك ومكانتك عنده بس يعصب غصب عنه .. تعوذي من الشيطان ودايم أدعي ربك يلهمك الرشد وراحة البال وبرود الاعصاب .. ولاتقولي ماأقدر لانك بتقدري .. (ما العلم الا بالتعلم وما الحلم الا بالتحلم) |
رد: عصبيته الغير مبررة
اقتباس:
بس الفرق ان طليقي ممكن يمد ايده و يسب لين خليته مع اخلاقه وسوء تربيته وشريت راحة بالي وكرامتي |
رد: عصبيته الغير مبررة
اقتباس:
اتجنب شنو ولا شنو! زهدت .. ما ابي يخفف عصبيته .. ابي اكون باردة اقتباس:
اقتباس:
بالضضضبط ما فيه مبرر ! تخيل قبل جم يوم كان عنده عزيمة من 8 ونص الصبح لين 1 ونص الظهر وآنه بالمطبخ عزيمة حق 50 شخص جاني شد قوي في ظهري لحد الان ما اقدر اتحرك منه جاني وآنهي بالمطبخ شميت ريحة عطر .. قلت له الله عجيبة ريحتها شسمها قال ما ادري هذا واحد جايب عطور المسجد عشان المصلين يحطون منه قلت اوه في المسجد يجيبون عطورات ؟ قال اي عشان المصلي يتطيب قلت له شيء غريب اول مرة اسمع في منطقتنا ما يسوون جذي و شب فيني! ولع ولع... آنه جذاب يعني ؟ جلسة تحقيق ؟؟ قلت لج واحد يجيبهم المسجد تبين اتصل له يعني ؟ وشنو المغزى من سؤالج!!! 😢 |
رد: عصبيته الغير مبررة
شوفي اختي ماقرأت الردود وبجاوب عليش مابتعيشين حياتش جديه اذا عرفتين تتصرفين في هالمواقف انا زوجي مريض ضغط وعصبببببي عادي كان يهزأني بوسط مجمع الحين تغير لاني صرت اعرف اليه من يبدي كلامه ينحى منحى العصبيه انبهه اقول بدلع ليش ترفع صوتك علي الموضوع مايستدعي علطول ينتبه لنفسه ويشرح الاسباب ع الاغلب موقف خارج عن الموقف اللي احنه فيه...تصرفش صح انش نبهتينه لرفعة صوته وطبقي تصرفي مع التكرار بيتغير
|
رد: عصبيته الغير مبررة
لاعاد تسولفين معاه وتسالينه عن اي شي
لان المواقف الي ذكرتيها عاديه جدا ماتستدعي انه يعصب ابد اذا تشوفيه مضغوط بعزيمه او شي تجنبيه مادري وش انصحك لان العله فيه هو طيب هو مايشوف ان فيه شي غلط مايحاول يخفف عصيبيته ما يحاول يغير من طبعه |
رد: عصبيته الغير مبررة
تعي يا روح رفيئتك انت كل سويسرا لعيونك مع جبالها كمان وبحطك بكوخ عالثلج بتصيري جبل تلج بحاله ههههه
حتى وانت وعم تحكي معاناتك بتشيلي الهم عن القلب fffsg ربي يحفظك ويحميكي وممكن زوجك لقى انو انت الوحيدة اللي بيقدر يكون معها طبيعي وينفس عن غضبه وعصبيته ويفرغ الضغوطات وبيعرف انك الوحيدة اللي بتحتويه لانو بيرجع بدو يراضيكي فبيعرف غلطه معك بس ما بيقولها بشكل مباشر يعني افهميها لوحدك ممكن البريستيج وممكن الله اعلم فيا حبي اتوقعي دايما حقل الالغام وافرحي بالهدية والكلام المعسول من بعد الانفجار يعني شي بيغطي عن شي ما في كمال بهالدنيا حبيبتي حاسة فيكي لانو انا عصبية بس نعمة من رب العالمين اللي عندي محتويني والا كنا قتلنا بعض 😁😁😁 روقي حبيبتي وارمي وراكي كل شي الا سلامة عقلك كم زينو عنا ddgddgddg قومي كلي ولا تنكدي على حالك وخليكي يا جبل ما يهزك ريح رمضان كريم يا عسل fffsgfffsgfffsg |
رد: عصبيته الغير مبررة
اقتباس:
اقتباس:
فجأة اقول شيء الاقيه تنرفز! فهمته في اوقات الهدوء و بكل لطف قلت له ان اتعب من عصبيته وان لازم تخففها عشان نقدر نبني حياتنا بإستقرار نفس و طمأنينه مستحيل الشيخ يعترف انه غلطان! يقول انتي السبب تقولين كلام يخليني اتنرفز |
رد: عصبيته الغير مبررة
اقتباس:
ميمو أنتي عصبيه ههههه لا ماأتخيل أجل إيش أقول عن نفسي عصبيتي تظهر حتى في كتاباتي شكل عصبيتك سبيشلghjj زين مالك إلا الصبر الله يكون في عونك |
رد: عصبيته الغير مبررة
اقتباس:
مراحب اخي سعيدة بردك لاسيما بعد سوء الفهم فشكرا لك و كل عام وانت بخير 1- صحيح .. لو اظهر عصبيتي له مثل ما هو يظهرها .. جان حتما بيتنا انهدم فوق روسنا وما عشنا مع بعض شهر ... و فعلا يجوز لو هو هادئ يمكن آخذ راحتي بإظهار عصبيتي... 2- سألته يا اخي .. يقول لي سكتي عني و غيري مكانج .. حلو ؟ حلو .. قمت اسكت عنه قال تحقريني! صرت ارد عليه ب ان شاء الله .. حاضر .. ما عليه .. قال تسكتيني! قمت اغير مكاني يقول لي اذا اكلمج توقفين .. صرت اقول له ممكن اروح الغرفة ؟ يقول خل اخلص كلامي .. اي مو لين خلصت كلامك بتكون خربت مالطا قلت له انت تؤذيني بعصبيتك .. قال آسف حبيبتي بس تعلمي شنو اللي يضايقني و تجنبيه...! مو احيانا اقول كلام واتفاجئ ان حتى بهالمقدار يتضايق 3- عليك نور .. قلت له و ما خليت فيديو ما دزيته له .. ساعات يا انه يشوف نفسه صح .. او يقول قاعد احاول وانتي بعد لا تنرفيني .. من جم يوم كانت له محاضرة عن الغضب .. بالعادة يخليني اقرأ واعطي رأييي قبل المحاضرة او الندوة .. دشيت حالة هستيرية وآنه اضحك .. قلت له صج لين قالوا باب النجار مخلوع .. قلت له المكتوب تحفة ادبية .. بس لا تلقيها للناس لان ابدأ بنفسك .. وفعلا ما القاها .. غير الموضوع اقتباس:
اقتباس:
واقدر له جزئية ان يراضيني... بس آنه بشر و لي طاقة محددة حتى الحب مو رصيد مفتوح وبعصبيته قاعد يستنزف الرصيد يعصب و يجي يمزح ولو اطلب اي شيء بيجيبه بس عشان ارضى .. لكن الامر متعب... متخيله ان للحين ما فطرت! مو مشتهيه بسببه هو الليلة مو معاي .. حرق تيلفوني اتصالات ما رديت يطرش واتس اب و تيلغرام و دايركت مسج في الانستغرام ولا كأني اشوف شيء.. وقبل لا اسوي هالحركة كتبت له رسالة ان اذا سويت في نفسي شيء من قهري فأنت السبب فألحين هو عايش على اعصابه.. رغم ان ما باسوي في نفسي شيء طبعا طبعا .. بس خل يتوتر شوي .. ما بيخسر شيء عل وعسى يوتعي ان عصبيته بتفقدني اعصابي |
رد: عصبيته الغير مبررة
اغلب العصبيه مكتسبه خاصه اذا كان عنده عزيمه او مناسبه يبي كل شي تمام وهو يشرف عليها بنفسه ويكرر على اهله الكلام عشرين مره لاتفشلينا ضبطي العشا، ضبطي القهوه والشاي بيجوني ضيوف واذا شاف من الزوجه برود وردت فعل عصب وصرخ ، لازم ياحريم تفهمون ازواجكم واذا فهمتيه صار مفتاح التحكم عندك بتوفيق من الله .
|
رد: عصبيته الغير مبررة
اقتباس:
هههههههههه هيك انا بقول عن حالي😁😁😁 للصراحة بعمري ما عصبت مع اي حدا او بالاحرى ما بيعرفوا الا الوج البشوش الفرفوش 😊😊😊😊 بس ايه بعصب ببيتي وما حدا بيهديني بس ممكن اضحك انا ومعصبة حليها بقى هههه طبعي ما بحب النكد وبنفس الوقت ما بحصر بقلبي بعبر عن كل حالاتي يعني شي عصبني بعصب ليش لاء هههه البرودة بتقتلني فيكي تقولي خليط تناقض فايت ببعضو انا ما بفهم على حاليfgfg بس العصبي اكتر شخص متسامح وقلبو كبير هيك بيقولوا 😊 زينو طمنيني عنك ان شاءالله هديتي والله الحياة ما بتسوى شي انت لازم تجاريها يعني بتكرهي صفة العصبية بزوجك خلص خلي الاشياء الحلوة اللي فيه تضل بواجهة تفكيرك والا بيجي نهار وبتنفجري وكرمال شو ؟؟؟ يا بدك تتعايشي مع هالوضع اذا بقي بهيدي الحدود وما اتخطاها يا ما في شي كامل والكمال لله عندي مثل بضل قدامي اللي بشوف مصيبة غيرو بتهون عليه مصيبتو فكرمال هيك هونيها بتهون دعواتي ترافقك حبيبتي ddgfffsgddg |
رد: عصبيته الغير مبررة
اديلو كلمتين بالعظم وهو معصب ولاتقروشي نفسك بإذن الله يتعدل
اما انك بداريه بالطالعه والنازله حيفضل كذا محا يتغير ان شاء الله مو تخبيب ربنا يهديه وينزل عليه السكينه كل عام وإنتي بخير |
رد: عصبيته الغير مبررة
موهبة .. زوجي يعصب بس للأمانة ما يتلفظ بألفاظ بذيئة
ممكن يجرح بالكلام مثل انا شلي متزوج 😒 على اساس اني مكسرة عتبة بيتهم من الالحاح عشان يتزوجني! . اسينات ههههه ضحكتيني الله يسعدج هذا ردي عليه غالبا و يعصب اكثر يقول بعد مو عارفة بشنو غلطتي!!! 😊 الله يرزقني صبر النبي ايوب . مبتعثة اساسا صرت ما اشتهي اكلمه في شيء يفترض مني اصير له آلة ادري ان ما بلقى وياه حل عالاغلب .. بس فاض فيني آنه ما عندي صبر يخليني اتجاوز الامر . مرحبا يا رفيئتي 😊 ما اقدر اصدق انج عصبية يا اختي... للأمانة احيانا اعتذاره او هديته او كلامه بعد الانفجار ما له طعم قلت له احس انك تظلمني بعصبيتك اذا مو مسويه لك شيء يستحق العصبية الله يصبرني.... . متفائلة يا رب الله يرزقني الصبر يا اختي اغبط الصبورات ما شاء الله عليهم الله يزيدهم من خيره و يرزقنا . عمار... هو مو متوتر من العزيمة ابدا لانه مجربني خلال سنتين في عزايم وايد ومبيضه وجه وجهه بعد .. واشيل عنه مسؤولية كل شششيء.. حتى ثيابه انه اختار له شنو بيلبس واحدد له مواعيد تعديل لحيته و شعره شايلته شيل .. لو واحد غيره جان سوا لي تمثال وللامانة هو ما ينكر اللي اسويه له .. بس مشكلتي في عصبيته ولما قلت عن العزيمة كان على سبيل المثال لان حتى في اوقات الروقان فجأة يصير التماس كهربائي |
رد: عصبيته الغير مبررة
غسق .. مرة سويتها
كنا نتكلم في التيلفون فجأة ارتفع صوته لا شعوريا استهلكت احبالي الصوتية وقلت له بسسس خلاص مللتني على كل شيء تعصب .. عبالك تكلم جدار تعصب وترفع صوتك و بسكت عنك طلعت اللي في جبدي كامل انصدم وما رد كملت كلامي وسكرت التيلفون .. صج ارتحت بس مو كل مرة تسلم الجرة ولا ودي افقد احترامي له .. اعرف نفسي اذا بديت اعطيه كلام في العظم بتعود و بستمر.... ميمو جبتي التايهه ... راح احاول افكر بإيحابياته بعيدا عن العصبية جهاد .. والله يصبرني حالي حاليا افضل لاني معيشته في توتر شوي قاعد احس ان قاعده ابرد جبدي شوي |
رد: عصبيته الغير مبررة
زين
هل مع زوجته الثانيه بعد عصبي هل مع عياله عصبي هل هو مدخن |
رد: عصبيته الغير مبررة
مرحباً أختي
كان لي زميل في العمل ملتحي وإمام مسجد في حيه ويخطب بعض الأحيان كلمات بعد الصلاة في مسجد العمل كانت دائماً أكثر خطبة يكررها عن الأمانة والإلتزام بحقوق الناس والذمة والضمير والعجيب .. أنه لا ينجز أي شئ في العمل معي ودائماً متشكي وعنده أعذار حتى لا يعمل .. والأعجب من ذلك أنه لا يجلس في الدوام أكثر من 3 ساعات إلا وهو مستأذن بشكل يومي أو يغيب وكان الزملاء ممن يعرفه في عملنا ويعرف طريقته يستهجن من أفعاله وأنه يقول ويخطب الناس بما لا يفعل .. أما الناس الذين لا يعرفوه فهم يحترمونه جداً وفي يوم من الأيام تكلمت معه ونصحته أن العمل أمانه سواء في وقت الدوام أو العمل وكان مقر بذلك ولكن كانت له وجهة نظر يريح بها ضميره أنه غير ملزم بالإنتظام أو الإنجاز وأنه كافي عليهم حضوره ما أقصده من هذه القصة أن الإنسان يعرف الصح وربما يدعو إليه .. ولكن في نفسه عنده قناعه مختلفه يرضي بها نفسه أن هناك إستثناءات لظروف معينة ولذلك .. أعتقد أن زوجك يعلم عن الغضب وحكمه وأضراره والنتائج السيئة بسببه.. ولكنه يجد لنفسه المبررات أنه محق وله فعل ذلك تحت وطئة حرارته النفسية وإنفعالاته .. ولكن إذا هدء يتراجع بالإعتذار أو الهدية .. لأنه يعلم مسبقاً أن دخوله في حالة الغضب خطأ ماكان ينبغي أن يدخلها ... وعلى فكرة هذا النوع يراجع نفسه ويندم ويعزم في نفسه أن يتغير .. ولكن للأسف دائماً يفشل في التغير خصوصاً لو وجد من أمامه أضعف منه أو له سلطة عليه أخيراً لازلت أوصيك بالمصارحة وأن تقولي له كما قلتي هنا في ردك .. تبيني أسكت أو أتكلم أو أخرج أو أو ... وخذي منه شرح واضح .. وأخبريه أنه سوف تعتمديه في التصرف معه في المرات القادمة عشان يكون على دراية أعانك الله |
رد: عصبيته الغير مبررة
مبتعثة..
مو مدخن الحمدلله اي عصبي معاهم كلهم.. مع بناته يحاول قدر الامكان يضبط نفسه لان مشغول باله عليهم.. يقول يكفيهم معاملة امهم لهم.. ما ابي ازيد عليهم من ليلتين بنته الصغيرة مسويه شغلة غلط .. غلط شنيع فعلا وابوها عرف .. وجايتني تبيني اتوسط لها عنده عشان ما يعصب اكثر! 😆 في داخلي ضحكت وايد .. رغم ان نجحت ان اخفف من عصبيته عليها وقلت له خل الامر علي انه باساعدها تصلح الوضع..!!! باب النجار مخلوع . اخي الرسمي غدا بإذن الله او بعد شوي بتكون بيني و بينه مواجهة لما يرجع من صلاة الفجر لان لحد الان يتصل وما ارد .. ف بيجي يتطمن .. و راح اقول له هالكلام وبخصوص صاحبك في العمل الحمدلله ان زوجي ما القى محاضرة الغضب وانحرج اساسا من كلامي رغم ان اقرب المقربين منه ما جربوا نار عصبيته! وياهم قمة في الحلم... بس داخل البيت جذي! يجوز لان بره مضغوط من جهات وايد ويبي البيت فقط للراحة!!! |
رد: عصبيته الغير مبررة
الدعاء يصنع المعجزات زين
توكلي على الله وتصدقي بنيه ان يشفي الله زوجك من هالطبع واعتبريه مريض والله يسخره لك يارب |
رد: عصبيته الغير مبررة
اجل نصف كلنا 😂😂
كنت احسب زوجي حاله خاصه أفتكر بملكتي 9 شهور ماقد شفته معصب او متنزفز وهذا يدل ان الشخص اذا يبغى يمسك نفسه يقدر بس تزوجنا نار والعه طلع كل المستخبي كنت من الصدمه أطل وانا ساكته يقولي ردي ليه ساكته أعطيه نظره فيها اشمئزاز واتركه وأقول روح شوف نفسك بالمرايه بعدين تعال نتفاهم كان يعصب زياده هههه ويلحقني ويقول اشفيني ويولع ولاتسيبني لما أتكلم اقول طيب اذا خلصت علمني ويصرخ يصرخ اقول خلصت يقولي آيه اقول يلا باي يقول ردي لاتطنشي اقول لما تهدا أتناقش معاك اما الان لا كان يفور زي المغلي مرا على مرا يحاول يهدي من نفسه بنفسه اسمع احيان لما يزفر كنت أتضايق حتى من اشياء عاديه تستفزني زي مثلا يشرب فنجانين قهوه ويخلص صحن الحلى وانا باقي اجهز مكان قعدتي ، اقول ليه بسرعه بسرعه روق مين يلحق وراك صرت اجهز له وانا لا اذا سألني اقول ابي اتقهوى لوحدي اذا طلعت عشان اروق واسوي لي جو طبعا يعصب ، بس اعرف انه بيفكر بينه وبين نفسه وبيتغير ، صح طبع فيه العجله ،لكن عالاقل يخفف منه صرت مثلا لما احضر يقولي هيا مابي اتقهوى الين تقعدين ، عاد اذا قعدت وبدأنا بكيفه ، اهم شيء مااقعد والاقي قد خلص في السوالف العاديه لما ألاحظه بدأ يعصب اقول خلاص بلاش تتكلم اذا الشيء هذا يستفزك يقول لا ويرجع يتكلم أقوله والله مابي اسمع خلاص كنت اسولف عادي مو شيء مهم اعرف بس اذا يعصبك مابي صار لو فتحت سالفه وبدأ صوته يعلى ارجع أغير السالفة طوالي ، يبدأ يستوعب من حاله اني ماعاد ابي اسمع شيء بسبب صراخه اللي مو بمحله بالأماكن العامه زي مثلا نرفزه النادل أقوله لاتخلي شخص مثل هذا يخرب جوك وينرفزك أحسه يهدأ بسرعه فيه اشياء كثير منها بعد الكلام الطيب واجيبها من باب نفسيتك وصحتك والله مافي شيء يسوى والخ النقاشات بالمواضيع ابتعد عنها مو عشان شيء بس لانه يستفزني مايعرف يناقش فعشان أحب نفسي وماحب اعصبها أقوله صح صح يالله مرا وجهه نظرك بطله :) وانا ماايده بالعكس بالشرق وهو. بالغرب عاد هو ينبسط مرا اخلي نقاشاتي مع صديقاتي غالبا انا طبعي هادي مع اني اتنرفز من الحار والعجل اشوفه همجي وقد قلته لزوجي حرام تخليني انظر لك النظره هذي كان يقولي وانت مرا ينرفزني برودك قلت ماتعرفني لكن أحب أتمالك نفسي قلت اسأل اخواني سألهم بيوم بمزح قالو يوه اذا زعلت اشرد منها سبحان الله جاء اليوم اللي عصبت فيه كان بيشرد من البيت ويقفل الأبواب كلها ويهديني عشان صوتي وبدات ارجف وادوخ وطحت من طولي وساعتين يرش مويه ويقرا علي اخرتها قلت شفت ليه مااحب اعصب نفسي ترى كل الناس تتنرفز وتعرف تعصب بس فيه ناس عالطالع والنازل وفيه ناس نفذ صبرها قال تكفين لاعاد تعصبين كنت بتموتين علي فوق ماراضاني قعدت شهر مااحب أطل في وجهه غصب عني بعدها فتره طويله تاب يستفزني😂 رجع يعصب الان لكن الموقف الاخير هو اللي خفف كثير من عصبيته خاصه اذا بدأ يشوف عيوني تفرصع وبدات اطلع من طوري أحسه يخف ويرقع لنفسه لان فعلا لما اعصب يعني انهار مااعرف اصرخ بعدها ارجع اسولف واضحك زيه كتبت كثير يمكن تستفيدي شيء |
رد: عصبيته الغير مبررة
جرب تبتسم في وجهه وهو معصب ، افقعي مرارته ، وإذا غلط عليك ، ازعلي و لا ترضين بسهوله ، يعني تداري و تحاولين تتجنب عصبيته بكل الطرق ، لكن ما في فايده ، بصراحه اشوف تمادي منه .
|
رد: عصبيته الغير مبررة
والله ماتحملته امس مرة متوترة وقالي كلمتين وقبيت فيه واررررررتحت وهديت خليه يتحمل هو شوي كمان
والله جالسة ادعي يعدي الشهر ع خير |
رد: عصبيته الغير مبررة
ماذا تعني لك النرفزة اختي زين من وجهة نظرك كأنثى؟
ماهي مشكلتك بالضبط مع نرفزة زوجك؟ ماذا تشعرين وقتها وكيف تفهميها ؟ ضعي نفسك بموقع زوجك وحاولي تحللي لي لماذا اتنرفز بخصوص العطر على سبيل المثال؟ |
رد: عصبيته الغير مبررة
العيشة مع زوج عصبي تقصر العمرتحسين نفسك دائما في حالة استنفار
اتنازل عن الوسامة والطول مقابل زوج متفهم وحليم |
رد: عصبيته الغير مبررة
وانا امس قهرني زوجي وعصب علي
ونكد صيامي وفطوري بدون داعي وبقيت مهمومة طول اليوم ليه الزوجة لازم تسكت وتبلع اخرتها الوحده تمرض ومحد سائل فيها مافي شي يقصر العمر قد النكد والمشكله الرجال اذا تعودوا استمروا يعني حكايه بيتعدل بعدين مستحيله لكن هم ابتلاء عظيم من الله |
رد: عصبيته الغير مبررة
اقتباس:
|
رد: عصبيته الغير مبررة
اقتباس:
بس تخيلي جالسه عالسفره ودش هواش تسكتي ولا يسكت شوي وتغصي باللقمه وما يوقف صراخه الا اذا دمعت عيونك اذا مادمعت عيونك يعني ما تأثرتي يعني عادي يجلس ساعتين يصرخ السكوت والتطنيش مجرد هروب من المشكله مو حل ابدا واللي زوجها يعصب باستمرار بتفهم قصدي |
رد: عصبيته الغير مبررة
زوجي عصبي ويصرخ بطريقه مستفزة جدا جدا واذا عصب يكسر الاشيا اللي حوالينه او بالسياره يتهور بالسواقه ويتضارب مع الناس في الشارع ......زمان كنت ارد وادافع عن نفسي او ابرر وقد سبق وصلت الامور لحد متطرف جدا
الان صرت اسكت ولا ارد وبداخلي اتحسب او استغفر بس القهر يستمر داخلي لايام وانسحب من كل شي يجمعنا حتئ الكلام وهو يتوقع انه اليوم الثاني امن يرجع يتاسف او يتكلم طبيعي او يتلطف انه اتوماتيك راح ارجع طبيعيه!!!! اخر موقف من يومين طالعين مشوار وطلب مني افتح الخارطة عشان هو مايعرف الموقع بدقه وهو يسوق تجاوز المنعطف ويضطر يطول المسافه عشان يلاقي يوتيرن صار يصرخ زي المجنون ويقول قفلي الخارطه وانا غلطان اجي هنا وخلاص نرجع البيت وفعلاً رجعنا نص المسافه للبيت وفجأة لف ورجع يكمل للمشوار وكلللله وانا ساكته ووصلنا المكان وانا ضغطي ارتفع وخلاص من القهر ماشوف قدامي وهو يبتسم ويطلب مني اخذ كل اللي احتاجه !! قد سبق وناقشته عن عصبيته واني مو مضطرة اتحملها .......رده انه انا حبيبته وزوجته اذا ماتحملته انا مين بتحمله؟؟؟!!!!! |
رد: عصبيته الغير مبررة
مبتعثة : يا رب والله دايما ادعي ونسأل الله الاستجابة
. سكر اي حبيبتي اكيد استفدت الله يعينج ويعيننا اوحيتي لي بفكرة راح اجربها معاه . ومض 😊 سويتها كذا مرة و طلع من طوره يقول ان استهزء فيه لما ابتسم وهو معصب . جنى 😢 الله يعين وآنه من البارحة معاه في شد و جذب وتو قبل شوي تناقشنا .. وقال بيحاول يضبط نفسه والحمدلله اخيرا اعترف انه غلطان! خفت اموت قبل لا يعترف وقال بيحاول يضبط نفسه .. بس اهم شيء لا تعصبيني!!! 😐 . وفا 😢 تقصر العمر و تشيب الراس مقدمة شعري على جنب بدأ يزيد الشعر الابيض وآنه حتى ال 30 للحين ما دشيت! . كنافة 💔 لا تشكي لي ابكي لك . لست .. كنافة قالت اللي بخاطري ترى التطنيش بعد يسبب تراكمات يبي له وحدة قلبها بارد . بلا حدود .. مو المشكلة ان زوجته و حبيبته بعد لها طاقة تحمل الاعتذار والكلام المعسول مو دايما يطيب القلب |
رد: عصبيته الغير مبررة
ماذا تعني لك النرفزة اختي زين من وجهة نظرك كأنثى؟
- يهز استقرار نفسي ، يزعزع الامان اللي احس به لان باخاف اتكلم معاه بأريحية .. بنظر له على انه جلاد مو زوج ماهي مشكلتك بالضبط مع نرفزة زوجك؟ - مشكلتي ان ما عندي الصبر اللي يخليني اتحمل عصبيته وان يمر الموقف دون تراكمات... فيه مواقف اعديها بس مواقف يبقى اثرها .. اخاف انفر منه! مو قادرة اتفهم ولا اتقبل عصبيته... وصرامته ماذا تشعرين وقتها وكيف تفهميها ؟ - اشعر بالنفور منه ، بعد موجة نرفزة دايما اتسائل شلون بستمر معاه طول العمر جذي! ... افهمها انه ما يقدر يتحمل مني كلمة مع ان عصبيته مو بس معاي... ضعي نفسك بموقع زوجك وحاولي تحللي لي لماذا اتنرفز بخصوص العطر على سبيل المثال؟ - حس انه في جلسة تحقيق! وان آنه اظهره بمظهر الجذاب! واليوم صعقني ما شاء الله عليه لما تناقشنا وقال ان فهمها بعد ان انه ألمح له ان العطر مو بالمسجد! ما اقدر اوضح اكثر لان تفكيره اصابني بالغثيان |
رد: عصبيته الغير مبررة
صررحة الزوج العصبي اسهل بالتعامل مع الغير عصبي
لان العصبي بعصب و بيخرب الدني و بعدها بروق و بيندم و بيجي بيعتذربك خلص تعودي ع هالشي ولا عاد تاخدني ع كلامو وقت بكون معصب و بعدها استمتعي بالدلع |
رد: عصبيته الغير مبررة
اقتباس:
بالعكس والله.. كل شي تهون بعينها بعدين كيف يبغاها تدلله وتدلع وتهتم له وهو معطيها جو التكشير والتعصيب طول الوقت الزوج الذكي يعرف اذا اسعد زوجته بتسعده واذا نكد عليها بتنكد عليه لو غصبا عنها |
| الساعة الآن 03:25 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©