|
حياتي الزوجية انهارت
السلام عليكم ورحمة الله وبركاته
كل عام وأنت بخير , سبق وأن كتبت لكم عن مشكلتي مع زوجي بسبب أبنته مر حوالي الثمان أشهر منذ جاءت عندي في المنزل كنت حاملاً بطفلي في الشهر الخامس ومرت أشهر الحمل وأنا أضغط على أعصابي في البداية حدثت خلافات كثير بسببها وتجاوزناها بالتنازل مرة من جانبه ومرة من جانبي والأكثر كان من جانبه في شهور حملي الاخيرة كانت الطفلة تتحدث مع والدتها بالهاتف يومياً وبدأت تستفزني إذا جاء والدها تطلب محادثة أمها وانا في كل وقت حين يخرج والدها اعطيها الهاتف لتكلم إذا طلبت منها شي ترفض وتقول اسال بابا اذا طلبت منها تأكل وحضرنا الغدا ترفض تأكل حتى يأتي أبوها وإذا جاء ابوها لينام معي في الغرفه تظل تراقبنا من عند الباب وأنا أتجاهل وجودها وتأتي ردة فعل زوجي القاتلة حين يقوم من جانبي أو يعطيني ظهره ! مرت علي أيام صعبة من التجاهل والتهميش كنت أطبخ كل يوم حتى قبل ولادتي بيوم وأطلب منه الجلوس على طاولة الطعام ويرفض يريد الأكل على السفرة في الارض احيانا أجامل وأجلس ولا أستطيع الوقوف والله حين أتذكر كيف كان يتجاهل مساعدتي أو حتى مد يديه الي حتى أقف وتأتي الشغاله لتساعدني على الوقوف ويظل يراقب أبنته ويقرب لها الطعام ! وكنت أرجع من الدوام أجهز القهوه وأدخل الحمام فقط لا غتسل أفاجأ أنه وأبنته تقهوو ! تشاجرنا على كل ذلك وذهبت لمنزل أهلي وحرمت من أطفالي وصغيري الذي لم يكمل الشهر وقتها ثم أتصلت عليه وتعاتنبا وتعدل الحال قليلاً بدأت أعلم الطفلة الصلاة والحمدلله بفضل الله أصبحت تجيد الصلاة والوضوء علمتها كيف تبدل ملابسها كيف تتحمم كيف ترتب سريرها كيف تهتم بنفسها أثناء الدورة الشهرية كيف تحمل أخوها وترضعه وتأقلمت معها تقريباً وكانت الأمور تسير على ما يرام وتجاهلت كل استفزازت أمها وجاءت أمها لمدينتنا مرتان حضرت خلالها خطبة بنت اخو زوجي وفي المرة الثانية حضرت زواجها ! وكانت تجلس مع أهل زوجي وأخواته وكانها لم تطلق ! وتراقبني خلال حفل الخطوبة كلما رقصت أو قامت أو جلست تراقبني تجاهلتها تماماً وتركت لها الناس والمجلس وجلست لوحدي مع بناتي في طاولة أخرى ترفعاً وفي الزواج لم أحضر عندما علمت بحضورها فقط جهزت للطفلة فستانها وأغراضها وأرسلتها وفي اليوم التالي جاءت الطفلة للمنزل وكانت ترتدي ملابس كبيرة وفضفاضه جاكيت يصل للقدم وصديريه عريضه وبنطلون مطوي من عند الساق!!! ومعها ملابسها فتشت ملابسها وجدت ملابس داخليه نسائية وتيشرت عليه حرف زوجي طبعاً سبق وأرست لي روب حمام من نعومي!! تكلمت مع زوجي وتشاجرنا وقلت له أني رافضه وجود أبنته ومرغمه عليها وهي تنقل كل أسرار منزلي وتستفزني بتحريض أمها وانه بالمقابل لا يهتم لمشاعري أشعر أني مجرد خادمه ! أتصلت على أم الطفله وسألتها عن التيشرت والملابس وأجابت بكل وقاحة هذا تيشرتي الرياضي والملابس عجبت أبنتي وما أحب أرد لها طلب!! خرجت من منزلي وأخذ الأطفال حدثت خلافات كثير وتدخلت أخواته في الموضوع وذهبنا بعد ذلك لوحدنا مع طفلي وقضينا أياماً في فندق .. عدنا وكنت قررت أن الطفلة لن تكلم والدتها يومياً وأصبحت أعطيها في الاسبوع مرتين ولم أعد أرد على اتصالات أمها وأتجاهلها وأدخلت الطفلة مركز تعليمي وتحفيظ لكن جعلتني أنفجر تظل تبكي عند المعلمات وإذا خاطبتها تظهر أنها خائفه أو تصد عني ولا ترد !! وأرسلت لي أمها أنها ترغب بمكاملة ابنتها كل يوم وكتبت لها أنا قدرت أنك أم لكنك لا تعرفي حدودك ومكاكلمة كل يوم هذي انسيها أتصل ابوها واخوها على زوجي وهي أتصلت على أخوات زوجي وسلفتي وسار الجميع يتصل على زوجي وأنتهي ان زوجي أخبر والدها بكل ما يحدث من أبنته وقال أن المكالمات لن تكون إلا باختيار زوجتي وأخبرته أنني لن أجعلها تكلمها إلا في رمضان وكان باقي على رمضان اسبوعان ولم تنته أربع ايام وجاءت الطفلة تريد مكالمة والدتها طبعاً رفضت وجاء إلي يقول أنا لن أمنع طفلتي من أمها واهم شي عندي نفسيتها تشاجرنا الحقيقة أنفجرت بكل وجعي قلت وأنا وين نفسيتي عندما حرمتني من أطفالي اسبوعين وأنا نفاس وين نفسيتي وأنا اتحمل تدخلات الجميع وتهميشك وين نفسيتي وأنا اتحمل قلة ذوق ابنتك وأمها وأخذ الهاتف مني هاتف الطفلة الخاص وأخذت بناتي وسار يجر البنات مني ويقول تطلعي لوحدك وبنتي ما تطلع وبناتي يتربو سوى ! سرت أسب وأسب طلعت كل كرهي وألمي وتعبي وقلت للطفلة أذهبي لجدتك أنا أكرهك كلنا نكرهك وضربتها على كتفها وقال بخليك تندمي ويطلب من بنته تتحسب علي وذهب لاهلي وأشتكاني لوالدي ابوي قال له بنتي مو ملزومه في بنتك وأحنا ما زوجناها تربي والآن أنا في بيتي ما نكلم بعض ظليت أربع ايام لا أكل ولا أشرب هزلت كثيراً تدمرت نفسيتي كرهت البنت جداً قلبي تغير عليها في وقت الشجار سبيتها واشعر بالندم وفي نفس الوقت أعذر نفسي فالطفلة لا تطاق وكان لازم يعرف أني وصلت لمرحلة أني ممكن امد يدي عليها جاء رمضان مثل كل رمضان حزين عرفته معه أول رمضان طردني وكان يجيب بنته عندي وامها على ذمته لتقضي وقتها في الاسواق وثاني رمضان طلقني بسبب هذه الطفلة ورابع رمضاني هجرني ويقضي الوقت مع أخوته وأهله وأنا وحيده وهذا رمضان أنا غريبة ومشتته في بيتي أن خرجت انحرمت من بناتي وأن بقيت فعلي غيظ وقهر ! كلامي متلخبط أشعر في داخلي تعب لو تأخرت في الرد فمنكم العذر لكن من يسعفني بحل أكون له شاكره |
رد: حياتي الزوجية انهارت
الله يعين البنت يوم طاحت بين يديك...كل هذي غيره!!! خلاص امها تطلقت وراحت بحال سبيلها ليش للحين حاطه ببالك انها عايشه بينكم لو يبيها زوجك ماطلقها وشتت بنتها عندك،،وتمنعين الضعيفه انها تكلم امها يومياً!!! وش هالقلب عليك خافي الله هذي ام بالنهايه ،،تحرمين البنت تتواصل مع امها عشان غيره وتحدينها عالعقوق!!،حتى لو قصر زوجك معاك لاتخلين هالبنت شماعه لردودافعالك وضغطك..الله يعينك على نفسك وتأكدي كل شي تسوينه بيرجع لك مع الايام،،،
|
رد: حياتي الزوجية انهارت
اعتذراختي لكن ردة فعلك كانت كبيرة كيف تظربينها وتقولين لها اكرهك حرام يا اختي البنت دائما تميل لابيها وتلتصق فيه وليس غايتها اغاضتك ابنتي منذ دخول ابوها البيت وهي تتبع فيه من مكان لاخر وتجلس وتنام في حضنه رغم اني امها
شوفي يا اختي افهمك لكن تحاملي على نفسك قليلا وراضي البنت اولا واخيرا هي ضحية طلاق وفهميها انك لم تقصدي ما قلتيه وحاولي استمالتها اليك بالاحسان وعامليها كابنتك ولا تبيني ضعفك كي لا تتشمت بك طليقته والله يهدينا الى سواء السبيل |
رد: حياتي الزوجية انهارت
لاحول ولاقوة الابالله
هذا من نتائج الطلاق الي تركض لة ركض الكثير من الزوجات بسو تصرفاتها مع زوجها |
رد: حياتي الزوجية انهارت
الله يعينك ويساعدك حاولي تخلين والدك يكلمه فعلا البنت مكانها عند امها او جدتها ويبغى بنته يروح يشوفها استغرب من اصرار بعض الرجال على ان يجعل بناته او اولاده عنده ويحرمهم من امهم ويفرضهم على وحدة ثانية وفي الغالب مااحد يتحمل عيال غيره
|
رد: حياتي الزوجية انهارت
لو تطلقتي وزوجك تزوج أو ارجع طليقته ام بنته
وأصبحت هي من تربي بناتك وتحرمهم من مكالمتك وتفرض متى يكلمونك وتقول لبناتك نكرهكم ستعرفين معنى الألم الحقيقي اتقي الله في هالبنت وبرافو على زوجك انه ماوافق على منعك لبنته أنها تكلم والدتها بطبعك هذا ستنهار حياتك الزوجية وبناتك سيعاملون كما كنتي تعاملين بنت زوج |
رد: حياتي الزوجية انهارت
لاحول ولاقوة الابالله
المشكله انك تقولين عنها طفله والطفله سوت والطفله راحت والطفله جت ولما انتي عارفه انها طفله تحطين عقلك بعقلها!!! وبعدين انا ماني شايف غلط بالموضوع بنت ومتعلقه في ابوها وين الغلط وتقولين انك شعرت بالالم عشان زوجك رفض ياكل على الطاوله وجلس على الارض وجلس يأكل بنته !!! واخر شي تضربينها وتقولين لها نكرهك والمصيبه انك مانتي شايفه نفسك غلطانه مااقول الا الله يعين زوجك وبنته |
رد: حياتي الزوجية انهارت
اقتباس:
|
رد: حياتي الزوجية انهارت
خبري البنت مولودة بمتلازمة داون او البلاهة المنغولية صح؟!
اذا نعم فقدراتها العقلية اصلا ماتسمح انها تسوي اللي تقولين عليه! استشرتي مرة وقلنا لك التعامل مع شخص من هالفئة حالة خاصة ومو اي احد قادر عليها! كنت في السابق متعاطفة معك.. لكن كلامك هنا اسمحي لي!!!! المعاملة هذي غير مقبولة مع طفلة.. فما بالك بطفلة عندها اعاقة! |
رد: حياتي الزوجية انهارت
صاحبة الموضوع تخاف على بيتها
تخاف أن زوجها يحن لطليقته واضح أن طليقته راسمه عليه والدليل لما أعطت بنتها ملابسها بأساليب نفهمها كنساء والصراحه هي مو ملزومه تربيها |
رد: حياتي الزوجية انهارت
خلنا نكون منصفين...
طليقته لازم توقف عند حدها! يُفترض ان زوجج يوقفها ويحط لها خط ما تتعداه نعم تكلم بنتها يومياً لكن ان تلبسها ملابسه وعليه حرف طليقها لا طبعاً! وما ننسى ان صاحبة الموضوع انسان و لها طاقة و قدرة تحمل وتشعر بالضغط ... نعم اللي سويتيه مع الطفلة غلط عود وايد .. ما اعرف ليش زوجج مصر يخلي الطفلة عندكم! تكون عند امها احسن حق كل الاطراف... |
رد: حياتي الزوجية انهارت
صحيح طليقته مره تمادت لازم أحد يوفقها عند حدها
|
رد: حياتي الزوجية انهارت
اقتباس:
وهي ان الرجال اذا طلق زوجته وعنده اولاد منها يزيد تعلقه فيهم لانه يرحمهم اكثر وردت فعله تكون عنيفه اذا احد اذاهم اما قولتك مو ملزومه الا ملزومه ونص واذا حطت نفسها بمقارنه مع البنت راح تكون هي الخسرانه البنت مسكينه معاقه وحالتها حاله وهذي تضربها وتمنعها عن امها وتبهذلها بسبب ان امها ارسلت ملابس عليها حرف زوجها طيب وخير وياطير يعني لو زوجها يبي امها ماكان طلقها اصلا والا كان رجعها |
رد: حياتي الزوجية انهارت
كثر الله خيرها ألي علمتها على الأعتماد على نفسها
والمفروض بعد يراعي نفسية زوجته هي غلطانه لما ضربتها لكن زي ما نقول أكيد أنفعلت وحست أنها هي وأمها السبب وراء مشاكلهم هي وزوجها ترا الضغط يولد الأنفجار |
رد: حياتي الزوجية انهارت
كيد النساء لا يفهمه الا النساء وتصرفات طليقته واضحة لكل امراه تفهمها وهي لما تزوجته ماكانت بنته شرط معاه في قبوله عشان نقول ملزومه فيها لا مو ملزومه بهالبنت وحتى لما كانت امها تروح الاسواق تخليها عندها هذا شي زائد وتصرفها مع البنت خطا لكن بسبب ابوها لو ابوها وضع حدود لطليقته من الاول ومافرض البنت عليها بالاجبار ماصار كل هذا
|
رد: حياتي الزوجية انهارت
اقتباس:
بنت صغيره ومعاقه ماتدري عن شي حاطه دوبها ودوب هالمسيكينه وانتم خلكم على هالوضع حرضوها حتى تطلق اما قولت ماهي ملزومه هي الضيفه والبيت بيت ابوها بعد تبون تطردونها من بيت ابوها ماتبي تعيش مع البنت في بيت واحد تكلم زوجها اما يلبي طلبها والا يسرحها ولكن البنت مالها دخل بالمشاكل هذي كلها انتي شايفه انه سهله لما تقولين لطفل كلنا نكرهك وتحرمينها من امها وتضربينها خافوا ربكم تراها طفله ومريضه |
رد: حياتي الزوجية انهارت
اقتباس:
|
رد: حياتي الزوجية انهارت
وأضيف على كلام برادا
زوجة الأب لا يمكن تجي بمكان الأم البنت تحتاج أمها لأنها مريضه مو الموضوع طرده لكن صاحبة الموضوع عانت من المشاكل بسبب أمها |
رد: حياتي الزوجية انهارت
معليش الغيره من الطليقه أعمتك
وخير ياطير كان أخذتي التيشرت بدون ماتحس البنت ورميتيه في الزباله ليه علمتي زوجك وسويتي من الحبه قبه كان قدرتي بالكلمة الحلوه تكسبي زوجك وبنته أما تسوي مشاكل وفوق هذا تحرمي البنت من مكالمة امها غلط يا زوجة الأب والله غلط لو انك ذكيه كان فكرتي إنه لو يبغاها كان رجعها فليش مسويه كل هالشوشره لأنك وحده غيوووره بزياده الله يلطف بالصغيره |
رد: حياتي الزوجية انهارت
اقتباس:
::PPP::PPP::PPP |
رد: حياتي الزوجية انهارت
اقتباس:
|
رد: حياتي الزوجية انهارت
تصرفات الطليقه مستفزة
اتوقع قصدها تنكد عليكم وانتي بلعتي الطعم!! يا اختي اذا شفتي شي غلط لاتعلمين زوجك بسكوت خذي الملابس وارميها هي تزرع فتيل المشكله وانتي تشعللينها مايصير خلك اذكى منها وطنشي اما الطفله فياحياتي مسكينه ارفقي عليها لاتفرغي غضبك فيها وبقول لك شي اذا انتي قاهرتك طليقه زوجك تأكدتي كل ما احسنتي لبنتها بتنقهر اكثر يا اختي ضميها لصدرك واكسبي اجرها |
رد: حياتي الزوجية انهارت
إنتي بأي حق تمنعين البنت إنها تكلم أمها ؟
كيفها إن شاء الله تكلمها في اليوم عشرين مرة .. لا الجوال جوالك ولا إنتي بتدفعين فاتورته .. إنتي لو تطلقتي والبنات عاشوا عند أبوهم بترضين مرت أبوهم تمنعهم يكلمونك ؟ خافي ربك .. |
رد: حياتي الزوجية انهارت
اختي صاحبة الموضوع ولا يكلف الله نفساً فوق طاقتها
انت امرأة ولك حقوق وواجبات واحتياجات العقد اللي بينك وبينه عقد زواج وليس عقد استقدام خادمة |
رد: حياتي الزوجية انهارت
الحل :
يا يتزوج وحدة تهتم في بنته .. و هو يبغى بناته يتربوا مع بعض .، أو يجيب شغالة تهتم في بنته .. و انت اتق الله في البنت المريضة .. |
رد: حياتي الزوجية انهارت
مشكلتك دخلتي بنت زوجك وطليقته بالنص بينك وبين زوجك..
المفروض تتعاملين مع طليقته بذكاء هي تحاااول تهدم بيتك وشكلها وصلت لهدفها تجاهلي خرابيطها لاتدخلين زوجك بمهاترات سخيفة وكبري عقلك بنته خلاص خلي جوالها مع ابوها وانتي اطلعي من سالفة المكالمات.. وقد ماتقدرين لاتحتكين فيها بأي شكل من الأشكال واهتمي بزوجك وبناتك ولو احتسبتي الأجر كسبتي نفسك وزوجك والبنت.. |
رد: حياتي الزوجية انهارت
يا جماعة الخير
شوي شوي على صاحبة الموضوع البنت من ذوي الاحتياجات الخاصة و عندها تخلف الحل يجيب لبنته خادمة او ممرضة و يدخلها مؤسسة خاصة لمن بحالتها بالنسبة لتصرفات امها اذا رجعت لتصرفاتها حطي صور الملابس بكروب العائلة خليها تحرم ترجع لافعالها |
رد: حياتي الزوجية انهارت
بغض التظر عن البنت ومرضها لكن صاحبة الموضوع محقه في تجاوزات طليقة زوجها
المراة زودتها ولو كانت حييه وتحترم الزوج الي هي عنده الان لما فعلت ما تفعل عزيزتي احتسبي ما فعلت للبنت عند الله واطلبي من والدها ممرضه او خادمه خاصه بها اما طليقته فصدقيني انها تغار منك على طليقها وافعالها اكبر دليل فنامي وقري عينا زوجك في احضانك وليس في احضانها اياكي ان تتفاعلي مع استفزازاتها الواضح نيتها منها وهو تفريقك انتي وزوجك استمتعي بحياتك وزوجك واهداءي ولا تعطيها مرادها من التفريق بينكم اي شيء تجديه مع البنت وفيه استفزاز لك خذيه والقيه في الزباله وانت صامته ولا تساليها ولا تخبري زوجك بالامر وادعي الله ان يشغلها بنفسها وان يحمي بيتك من شرها ارجوك لا تحققي لها مرادها وتهدمي بيتك |
رد: حياتي الزوجية انهارت
بغض النظر عن نية طليقته لانا احنا قرأنا تفسيراتك ووجهة نظرك(حتى الحرف على البلوزة ممكن صدفة ) لكن الطفلة ما الك أي حق تمدي يدك عليها ولا تحددي عدد المرات الي بتكلم امها
ارحموا من في الارض يرحمكم من في السماء وتجبرك بالبنت بهذا الشكل خالي من الرحمة ولا يوجد الك اي مبرر . وزوجك محقوق اكثر منك ما زال شايف غيرتك المرضية من بنته(ذات الاعاقة) لدرجة اذا اهتم بيها واكلها بتقارني كأن هالطفلة هي ضرتك مفروض ما يجبرك عل الاعتناء بها ويجيب لها خادمة بالرغم اني بتوقع بناءا على الي سردتيه انه مجرد وجودها بضايقك الافضل للبنت تربيها امها او جدتها وانت لا تستمري بظلم الضعيفة لانه الك اطفال وما بتضمني يوم يعيشوا لا سمح الله مثلها. ونصيحة لو توثفي بنفسك وما نظلي تقارني زما تعطي للتفاهات اية قيمة بتعيشي سعيدة وبتشعري بقيمتك ببيتك وعند زوجك . |
رد: حياتي الزوجية انهارت
كان الاجدر بكِ معالجة مشكلة تصرفات طليقته بعيداً عن لفت انتباهه هذا من جهه ومن جهة أخرى تصرفكِ غير مقبول مع الطفله
|
رد: حياتي الزوجية انهارت
أتوقع تصرفات طليقته ( عفوية ) .. و لو هي تبغى تستفز الأخت صاحبة الموضوع ..
ما كانت هي طلبت الطلاق ، و هي اللي رفضت الرجوع له ، و هي الي تزوجت بعد طلاقها .. |
رد: حياتي الزوجية انهارت
النار ماتحرق اللي من وطاها
بلاكم علي صاحبة الموضوع هي سوت اكثر من اللازم والمفروض ماتسويه هي مش مجبورة تربي بنته تقولون بنت صغيرة ومريضة والخ ركزتوا عالبنت وتركتوا صاحبة الموضوع كثر الدق يفج اللحام بنت صغيرة ورآها تصرفات كبيرة تراقب وتوصل كل العلوم والزوجة مب ماخذة راحتها من اول الزواج وصابرة فوق هذا تربي البنت وتهتم فيها وتوفرلها الرعاية طلعتوها غلطانة ف النهاية وين الانصاف عصبيتها وقالتها أكرهك كل هالتصرفات سببها التراكمات والضغط اللي سببه الزوج لزوجته من بداية الزواج والبنت ماشاءالله ماقصرت لو تقولون صغيرة ،، يبالها اهتمام كبير مب عادي وهي قامت فيها ومالقت مقابل عطاءها الا التهميش والتجاهل وعدم التقدير شو تتوقعون منها اكيد اللي سوته ودليل ندمها هي أساسا مب راضية عالتعامل اللي سوته مع الطفلة بس تحممملت فوق طاقتها وجاء وقت الانفجار ، اللي مرت فيه انا ايضا كنت امر فيه من فترة ليست بقصيرة بس الفرق اشوف بنت اخو زوجي ورغم حبي وهتمامي لها ماتحملها لنها تسبب لي ضغط بسبب سلوكياتها الخاطئة واشياء كثيرة كم مرة قلت لزوجي انا مش مجبورة عندي بنت وابي أربيها واستمتع معاها بس بطريقة عقلانية وهادية لكن دون جدوى والى ان شاف كذا شي بعينه بدا شوي شوي ييأيدني ،،، ترى الواقع صعب الله يصلح حالج للافضل |
رد: حياتي الزوجية انهارت
اقتباس:
واي عفويه تقولين؟!! ترسل التيشرت حقها وفيه حرف زوجها!!! اذا البنت صغيره ومريضه انا وين عقلي افكر شوي واسكتها باي شي ولا انها تاخذ اي قطعه من ملابسي سواء عليها حرف ولا لا ! مجرد فكرة تروح بيت طليقي بقطعه من ملابسي فكره وتدل على والمرض ايضا والبنت فعلا مستفزه _ رغم اعتراضي على الضرب والكلام الذي قالته_ اجل تجلس تناظرهم وهم في غرفة النوم عادي وغير مستفز؟! اختي حافظي على بيتك ولا توصليها لاهدافها في تخريب بيتك وسعادتك |
رد: حياتي الزوجية انهارت
اقتباس:
من الوضع؟؟؟!! |
رد: حياتي الزوجية انهارت
اقتباس:
ام البنت متزوجة من رجل آخر فلما الإنفجار ؟ لو مطلقة ولم تتزوج ممكن افهم واعرف لكن متزوجة وعلى ذمة رجل لم افهم الا انها وضعت نفسها في موقف لاتحسد عليه ان كانت شرطت من البداية مالي علاقة ببنتك وزوجها فرض البنت عليها فرض يحق لها ترفض ولا يحق لها تنفجر على طفلة تبي تفرغ هالشحنات تنفجر على زوجها |
رد: حياتي الزوجية انهارت
حاولي تهدين نفسك شوي
لكن بقولك شيء ترى الاطفال يطلعون اسرار البيت حتى لو كأنو أطفالك ، عادي يحكون كل شيء ويزيدون بعد من الخيال لكن انت مو متحملتها زياده يمكن لانها مو بنتك والغيره شوي دخلت بما انها طليقه زوجك اذا كانت الطفله من ذو الاحتياجات الخاصه تتعبك اكثر صح بالبدايه لكن لو حبتك حبها يفوق الاطفال العاديين ومستحيل ترضى احد يتكلم فيك طنشي كل كلامها وكلام أمها ولاتحرميها من شيء حطي ربك بين عيونك وخليها تتواصل مع أمها متى ارادت يااختي انا لي تجارب مع ذوي الاحتياجات خاصه الداون مرا حبوبين وشطار اذا حبوك ومابيحبوك الا اذا احتويتهم مادي ومعنوي سهل ينقادون لك اكثر من الأسوياء لما تتذكري ان ربي بيأجرك بتتعلمين تصبرين وتطنشين كأنك ماتشوفي ولاتسمعي شيء .. اكسبي زوجك اكليها ولبسيها ونيميها قبل يجي عشان تقعدين لحالك معه منها يشوف اهتمامك فيها ومنها ترتاحين وانت معه البدايات صعبه ولكل مجتهد نصيب |
رد: حياتي الزوجية انهارت
تقولوا تمثيل و مراقبة و مكائد ووووو الخ
عن طفلة + متلازمة داون !؟ متلازمة داون .. معروفين انهم جدا عاطفيييييين و يحبوا الناس .. ارحموا الطفلة .. يكفي امها متزوجة و بعيدة عنها .. و عايشة مع زوجة اب .. إعاقتها لوحده ( كفاية عليها ) .. جيبوا شغالة و خلاص .. |
رد: حياتي الزوجية انهارت
المرجو من السادة اعضاء المنتدى احترام موضوع صاحبة المشكلة و عدم تحويله الى حوارات جانيبة بين الاعضاء عبر الردود
|
رد: حياتي الزوجية انهارت
اقتباس:
زوجها لم يراضيها ((بينه و بينها)) و لم يراعي مشاعرها وهذه نقطة جوهرية. وكل شي يهون بعدها |
رد: حياتي الزوجية انهارت
حتى لو زوجها ضغطها المفروض ماتحط حرتها في طفله مريضه
كل الي سوته ينهدم في ضربها وطردها للبنت لو عملته لله عزوجل ماكان فكرت تمد يدها ع البنت أو حتى تفتش أغراضها وتبحث عن أي شيئ بينها وبين أمها توقعت إنه أمها لا زالت مطلقه والعجيب أنها متزوجه شيئ مضحك بصراحه تنفجر براحتها بس مو ع طفله مادري ليه متعاطفين معاها تخيلو وحده تدف بنتك وتقول إحنا نكرهك وكلنا نكرهك ليه ماقالت هذا الكلام لزوجها الله يعطيها ع نيتها هذا الي نقوله |
| الساعة الآن 04:18 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©