|
عجزت أفهم بروده وأتعامل معاه!
السلام عليكم
انا عشرينية وزوجي يكبرني بثلاث سنين ومتزوجة لي 4 سنين، احب زوجي ويحبني لكنه حساس بزياده ويزعل من اي شيء ومشاكلنا دائماً تافهة بسبب هالموضوع! والأسوأ انه يتخذ نفس اسلوب الزعل في كل مرة، فعلى سبيل المثال بقولكم مشكلتنا الاخيره التافهة! انا موظفة ودوامي مُختلط ودايم متوحده هناك ماعندي صداقات! في يوم من الايام حصلت لي مشكلة بالدوام وانا ماكان لي دخل لكن عصب المدير وكنت بأنطرد ومحد وقف معي الا واحد من الزملاء اللي بقسمي دافع عني لانه كان موجود وقت الحدث وكلم المدير وعطاني اجازه يومين الين تنحل المشكلة! يوم رجعت البيت ودرا زوجي ان عندي اجازه سألني عن السبب وعلمته بالسالفه وقلت له انه لولا الله ثم فلان اللي وقف معي كان انا مطروده الحين وقلت له اني اخيرررا حسيت ان فيه عندي ع الاقل صديق واحد بالدوام (انا قصدي شخص يحترمني ويحسسني بقيمتي بالدوام لاني كنت وحيدة ودايم مع نفسي) لكن عاد وش يفهمه، قال لا والله صديق ماشاءالله!! قلت مب قصدي كذا وحاولت افهمه لكن مافيه فايده زعل وقال سوي اللي تبينه! ومن عقبها صرت بالنسبة له مجرّد هوا! مايعطيني وجه اكلمه مايرد علي واذا رد يرد بكلمة وحده وبدون نفس وبدون مايناظرني حتى! كل ماقلت شيء قال لي "والله شوفي صديقك فلان يمكن يفيدك"، "ايه وش عليك عندك فلان"، عرفت ان الموضوع ضايقه فاعتذرت له ووضحت له ان مابيني وبيني اي علاقه وهو يبيّن لي ان الموضوع جداً عادي بالنسبه له ومو فارق معاه! لكن اللي اشوفه عكس كلامه مدري وش اصدق وفي النهايه قلت خلاص شكله اقتنع! رجع كويس لمدة يوم ثم رجع يطنشني ويعاملني كأني ولا شيء، قلت له ياخي انت وش فيك؟ انا وش سويت لك عشان تعاملني كذا ممكن تبطل مكابره وتفهمني لاني ماني فاهمه الزعل هذا كله على ايش! رفض يتكلم وانا نشبت له الين في الاخير نطق بكلمتين (وقالها بصيغة واحد مب فارقة معه) قال انتي تقضين وقتك برا البيت مع واحد غيري والمشكله انك ماتشوفين هالشيء غلط لكن والله عادي بكيفك انا ما امانع هالشيء ابداً (هو مايقدر يطلعني من دوامي لان هذا كان شرطي من الملكة) يوم خلص هالكلمتين قعدت جنبه وقلت له بهدوء وحنية يا فلان ياحبيبي ياحياتي ترا كذا كذا وقلت كلام كثيررر وسكت انتظر رده 5 دقايق اناظر فيه بس ولا كاني اتكلم ولايطالعني حتى قلت طيب، بكيفك انا رايحه بيت اهلي ذليت نفسي بما فيه الكفايه وانا اشحذ رضاك وانت مب مفتكر حتى، يوم تفكر تعقل وتقول لي وش فيك كلمني! وانا حالياً في بيت اهلي لي اكثر من شهرين ولا حرك فيه هالشيء شعره، ولا صار بيننا اي تواصل طوال هذي الفتره! _________________ الحين ابي افهم وش ذا الزعل الابدي!!! وانا غلطت ولا لا؟ اشوف اني اعتذرت بما فيه الكفايه دوري خلص! مدري هو غيران ويكابر ولا طفشان مني ويبي الفكه ولا وش وضعه! تعبت منه ومن بروده القاتل والله لو اني جدار مايعاملني كذا مدري كيف اتعامل مع شخصيته ذي! المشكله داااايم يسويها اذا زعل ويطنشني ويتثيقل ويوم اروح بيت اهلي يرجع بعدها باسبوع او شهر بالكثير يترجااني ارجع له اما هالمره احسها جد مو فارقه معه وخلاص احس طفشت من اسلوبه ذا! ممكن تفهموني وش قاعد يصير داخل مخه لاني جد مو فاهمه ليه دايم يتخذ هذا الاسلوب رغم انه واضح جداً انه مايفيد معي!!! |
رد: عجزت أفهم بروده وأتعامل معاه!
لو زوجك أخبرك أن عنده صديقه وحيده بالعمل ودايم يشوفها كل يوم ودافعت عنه بيوم من الأيام
وش بيكون ردة فعلك مع زوجك |
رد: عجزت أفهم بروده وأتعامل معاه!
يالروح الصامتة
يبي لك سنين وسنين عشان تستوعبين وش خطاك تدرين ليش؟! لأنك حتى وأنت تكتببن هنا، تكتبين وأنت مو حاسه بإنك زلزلتي. الثقة وخربتي أساس مهم من أساسيات الحياة!! تبدأينها ب مالك أحد بالوظيفة وتتهينها بصديقي من متى نقول حنا يالحريم ترى عندنا صديق؟! وفوق هذا هو الشهم البطل اللي وقف معك!! أنت عاكه الدنيا ، وملخبطه الأمور ومو حاسه!! لازم تستوعبين أول حجم خطاك ، عشان تعرفين تعالجينه. |
رد: عجزت أفهم بروده وأتعامل معاه!
مكانه الانسب
|
رد: عجزت أفهم بروده وأتعامل معاه!
اقتباس:
وليش ماتشوفين لك وظيفه مافيها إختلاط تراه فيه فتنه كبيره ربي سبحانه مايحرم شي إلا لحكمه . |
رد: عجزت أفهم بروده وأتعامل معاه!
ضعي نفسك مكانه في الموقف دا !!!
و اذا جيتي تعتذريلو بينيلوا ادراكك للخطا مش اعتذار تسليك!! |
رد: عجزت أفهم بروده وأتعامل معاه!
يعني جايه تقولي له انا عندي صديق ووقف معي وما قصر , واخير صار عندك صديق بالدوام , بالله عليك منتي حاسه انك غلطانة ؟؟
اتمنى تقرأي موضوعك مرة اخرى بس تخيلي انه زوجك هو كاتب الموضوع , وغيري كلمة " صديق " بكلمة " صديقة " ,, هل ترضين بهذا الشي ؟؟ يا بنت الناس انتي دمرتي كل شي بينك وبينه ,, انا حاولت اتخيل الكلمة هذه تطلع من زوجتي ,, والله صعبة صعبة جدا على الرجل . مافي رجال " غيور " يرضى يسمع او حتى يتخيل انه زوجته تقله كلام زي كذا ,, حتى لو انك في مكان مختلط ,, حتى لو حصل معك مواقف معينة ,, يفضل ما تقوليها لزوجك ,, او قوليها بطريقة ما تثير غيرته انا من وجهة نظري " واتمنى ما تضايقك " انتي غلطانة 100% ,, وزدتي الطين بله لما رحتي بيت اهلك ,, وانتي عليك الغلط بالكامل ,, ما ادري صراحة لو مكانه ما اعتقد حرجعك الا اذا فصلتي من وظيفتك وجلستي ببيتك . غير كذا مستحيل ارضى ترجعين تشتغلي بعد الكلام اللي قلتيه . ولعلمك حتى لو اللي بينك وبين الصديق هذا " مجرد صداقة " ,, الشيطان شاطر , والله سبحانه قال " ولا تقربو الزنا " ما قال " لا تزنو " ,, لأن الزنا ما يجي في يوم وليلة ,, الزنا له مقدمات وأولها اللي صار بينك وبين هذا " الصديق " . ............................................... |
رد: عجزت أفهم بروده وأتعامل معاه!
شكراً على ردودكم، لكن ياجماعة الخير انا يوم قلت صديق ماكان قصدي انه فعلاً صديق
صحيح انا غلطت في اختياري المصطلح الخطأ لكني اعتذرت مليون مره ومايبين في عينه شيء وانا وربي اني ما اكلم الرجال هذا بالدوام ولا بيني وبينه شيء!!! يعني حرام ان اللي قاعد يصير كله على "ولا شيء"! لو اني اخونه الحين بقول كلامكم صح لكني مب قاعده اسوي شيء من وراه وهو مكفيني ولا ادور غيره لكن بروده هذا مو طبيعي ولا يُحتمل!!! يعطيكم العافية |
رد: عجزت أفهم بروده وأتعامل معاه!
اقتباس:
هوا الصحيح والأكيد, انه مو كل شي يقال للرجل, رغم اني رجل. هل يهمك العمل ام رضى زوجك؟ اذا رضى زوجك اهم, انصحك بالتالي: ترسلين رسالة لزوجك :: وتعتذرين له وانك عرفتي حجم خطاك وانك تبين رضاه, وانك مو قادره تنتظرين اكثر بعيده عنه وتشرحين له قدر اشتياقك له, وتكتبين له ايضا اذا تطلب الامر اريد ان اترك العمل لاجل رضاك.. وطبعا لو هوا طلب انك تتركين العمل اطلبي انك تبحثين عن عمل آخر, والله ويفقك. وزي ماقولت لك, مو كل شي يقال للزوج!!! |
رد: عجزت أفهم بروده وأتعامل معاه!
اعان الله زوجك سوء تصرف وتتركين البيت وتبينه يرجعك!!!!
|
رد: عجزت أفهم بروده وأتعامل معاه!
اقتباس:
حاولي تتداركي غلطك واعتذري له |
رد: عجزت أفهم بروده وأتعامل معاه!
واضح نيتك ماتقصدي لكن القهر إنك رحتي لأهلك متوقعه إنه كل مره تروحي لأهلك بيراضيك وقلتي يالله بختصر الطريق بدل ما تمتصي غضبه تدريجياً
أشوف الافضل إنك تدقي عليه او ترسلي له إذا وظيفتي سبب الي بينا وتبغاني أتركها أبشر طبعاً حتى ويهدأ وشوفي إيش بيرد عليك |
رد: عجزت أفهم بروده وأتعامل معاه!
صحيح فيه كلمه انتبهت لها ماعجبتني جداااا !!
اقتباس:
زوجك يحتاج تبينين له محبتك له مو تمشين عنه! يعني مين قال لك ان الزوجه تحتاج تروح لاهلها كل مره زعل زوجها؟ أنا اشوف روحتك لاهلك وتجاهلك للموضوع هيا بكبرها مشكله! تقولين لا بالعكس انا افكر فيه, سلامات؟؟ ايش اللي واضح قدامه؟ زوجته مشيت عنه وما تواصلت؟ أنا شخصيا راح اقول هيا مستغنيه عني, ومراح اذل نفسي عشانها! كرامتي اهم! اللي راح بنفسه يرجع بنفسه! ومو اي اعتذار لازم يكون مقبول في لحظتها! يعني المفروض كل شخص يتحمل عواقب كلامه, مو انه يلزم الشخص الثاني بالقبول, وان لم يقبل انا اللي زعلت ومشيت لاهلي؟؟ ضربني وبكى سبقني واشتكى؟ |
رد: عجزت أفهم بروده وأتعامل معاه!
اقتباس:
إنك من الناس اللي مو من هالنوع ، ولا راعين هالحركات بس يجيبون البلى لأنفسهم بحكيهم أوزني كلامك |
رد: عجزت أفهم بروده وأتعامل معاه!
بعيدا عن الي قلتيه هل هو كلام جارح او عادي ، في رأيي ان الخطأ على زوجك لوحده لسبب بسيط وهو أنه وافق على عملك من قبل الزواج وهو يعلم انه مختلط ومتوقع انه يكون بينك وبين الرجال اي نوع من الكلام او الصداقة او خلافة ،،
اذا هو زعلان على انك قلتي صديق فهو أساسا ليش وافق يتزوج وحدة موظفة في مكان مختلط ! |
رد: عجزت أفهم بروده وأتعامل معاه!
اقتباس:
شتان بين الصديق, والزميل في العمل!! مو معقوله كل شخص يوافق زوجته تعمل, تكون صداقات! بل زملاء عمل وليس اصدقاء اذا كان فيه اختلاط! وطبعا صاحبة الموضوع قصدها زميل وليس صديق! وايضا المفروض ماتمدح اي رجل او تصرف اي رجل قدام زوجها بتاتا!! |
رد: عجزت أفهم بروده وأتعامل معاه!
اخوي ادمنتك بعنف حياك الله
مقصدي واضح وصريح من ردي .. من يرضى بأن يتزوج من امرأة تعمل في مكان مختلط فليهيء نفسه لأي شي ولأي صدمة .. ليس الموضوع موضوع زميل او صديق والفرق بينهما الموضوع أكبر من هذا |
رد: عجزت أفهم بروده وأتعامل معاه!
اختي
انا عايشة بمجتمع مختلط من الالف الى الياء و مع هذا هناك خطوط حمراء لا تقال كلمة صديق معناها مخاويته عكس زميل اللي تنتهي العلاقة معه بنهاية الدوام لو اتصلت زميلة زوجك بغير وقت الداوم وش رح تكون ردة فعلك احتوي الموضوع و ارجعي بيتك البعد رح يزيد الجفاء و الهوة بينكم |
رد: عجزت أفهم بروده وأتعامل معاه!
اقتباس:
اذا ماطفشت ورحت بيت اهلي وش يخليني اقعد مع انسان بهالبرود مايعتبرني موجودة حتى! نص اليوم وهو طالع مع ربعه واذا رجع قعد ع الجوال او يتابع التلفزيون واخر شيء ينام بالصالة احس انه ينتظر مني شيء بس مدري ايش هو! لاتقول لي اطلع من دوامي لاني بالعافيه حصلت هالوظيفة بعد سنوات من البطالة وغير ان القطاعات اللي توظف ناس بتخصصي كلها مختلطة وهو بنفسه راتبه مايكفي الحاجة مع الاقساط اللي عليه فيعني لو طلعت من الداوم بنتبهدل كلنا انا وهو الين احصل لي وظيفه ثانيه وعاد مدري بعد كم سنه! كلكم تقولون اعتذري له وانا ياخي اعتذرت مليون مره ومافيه فاايده معه احس المشكله مالها حل رغم ان السالفة تااااافهة وماتستاهل وهذا اللي يقهر في الموضوع |
رد: عجزت أفهم بروده وأتعامل معاه!
اقتباس:
|
رد: عجزت أفهم بروده وأتعامل معاه!
طيب
اختي. اهلك ما سألوك عن سبب تواجدك معهم؟ وش ردة فعلهم؟ نصائحهم ؟ |
رد: عجزت أفهم بروده وأتعامل معاه!
ارجعي لبيتك
|
رد: عجزت أفهم بروده وأتعامل معاه!
كلامك جارح وتصرفك خطأ
كلمي احد يمون عليه يصلح بينكم وإذا مانفع اختاري بين الزوج أو الوظيفة |
رد: عجزت أفهم بروده وأتعامل معاه!
كلميه وقولي بدور وظيفه غيرها
اهم شي اللي بيني وبينك ما ينخرب اذا هذا سبب زعلك .. انا فهمت غلطي وبدور وظيفه غيرها بس بظل فيها لين القى غيرها وانتي اقصري الشر و كلميه لاتكبر القلوب على بعض وفعلا دوري وظيفه اهم شي بيتك الله يصلح قلوبكم |
رد: عجزت أفهم بروده وأتعامل معاه!
اللي ظهر لي إن شخصيتك درامية تبي الحياة تمشي على هواها
أجل قلت صديقي وأنا ماقصدت؟ و جلست ومسكت يده وياحبيبي بعدين قلبت عليه تعلمي احترام الزوج وإلا ترا بيلقى كثير نسوان يعرفون الاحترام ويعطون الزوج قدره ومكانته "قلت له ياخي انت وش فيك؟ انا وش سويت لك عشان تعاملني كذا ممكن تبطل مكابره وتفهمني" "قلت طيب، بكيفك انا رايحه بيت اهلي ذليت نفسي بما فيه الكفايه وانا اشحذ رضاك وانت مب مفتكر حتى، يوم تفكر تعقل وتقول لي وش فيك كلمني" هذا ياعزيزتي أسلوب أبو الشباب اللي جالس مع ربعه بالاستراحه مو أسلوب أنثى ومع مين مع زوجها! انتبهي لنفسك يا أختي ولأسلوبك عشان لاتضيعين من بين يديك حياة مستقرة الكل يتمناها الزواج يبي صبر ومسايسه من الطرفين لما يشد طرف يرخي الطرف الثاني الزوج زعلان بسبب هو يراه يستحق الزوجة تراضيه وتسمح خاطره والعكس الرجل سهل إذا جته الأنثى بأسلوبها |
رد: عجزت أفهم بروده وأتعامل معاه!
اولا هو ما يريدك تتوظفين ، و انت عارفه هذا الشيء ، و كلمة صديق انت مو قائده لكن كنت تشرحين الوضع خاصه بعد مشكله ، لكن للأسف ما فهمت له وما ألومك لان البنات عموما نحب الكلام والتعبير ، اذكر موظفه متزوّجه ، لما كنت اعمل سابقا ، دار حديث لا اذكر المناسبه لكن فيه ان لا تقولين ولا تعملين كذا اذا تزوجت بعدك ما عرفت حق الرجاجيل،،، ارجعي لبيتك افضل ، وقولي له هذا شيبه كبير في السن في عمر والدي او اي شي تقللين من شأنه .
|
رد: عجزت أفهم بروده وأتعامل معاه!
عزيزتي silent soul
غلطين هم اللي غلطتيهم الاول : كل مازعلتي قلتي له ودني بيت اهلي و هذا اكبر غلط تعودين زوجك ان كل مشكله حلها بيت اهلك الثاني : قلتي لزوجك عن موقف زميلك ماكان له داعي تعلمينه الموضوع .. موضوع زي كذا جدا حساس حتى لو نيتك طيبة ما تقولينه له ابد كان ممكن تعلمينه السالفه بس بدون تفاصيل او ذكر موقف زميل العمل ارجعي بيتك لان الغلط عليك مو عليه الغلط عليك ميه بالميه |
رد: عجزت أفهم بروده وأتعامل معاه!
اقتباس:
تقولين لة صديقي بدوام وتجين تكتبين السالفة تافهة شي غريب وكانك تناشدين بموت غيرة الرجل بالعكس انا اشوف زوجك رجل وردات فعلة جدا طبيعية..الي عليك تسوينة تغيرين عملك اذا كانت عندكم اقسام غير مختلطة ولا لها علاقة بالرجال او تقدمين استقالتك وتكسبين رضى زوجك. |
رد: عجزت أفهم بروده وأتعامل معاه!
لا اله الا الله محمد رسول الله
الرجل ما عمل الا انه وقف مع مظلوم و هي حظها و لسانها شين انها خبرت زوجها يمكن الحماس او اي كانت المشاعر انه احد وقف الى جانبها ليتها قالت فلان اللي يشتغل معي و لا قالت صديق زلة لسان ما حسبت لها حساب المفروض امور العمل تبقى في العمل و هي تحط بحسابها مشاعر زوجها و غيرته هذا اللي غلطت فيه لاخت و لا قالت اتصلت بالرجل و لا صار اي نوع من التواصل بعد الحادثة بينهم الشيطان وجد مدخل ليفرق بينهم و حاليا منتصر و فرحان يعني اذا ساعدني زميلي معناه وراه شئ او اني ضعيفة ???? عجبي |
رد: عجزت أفهم بروده وأتعامل معاه!
الاستفسار بشأن حذف أو تعديل تكون في أركان المراسلة المتوفرة في أقسام المنتدى
|
رد: عجزت أفهم بروده وأتعامل معاه!
الحل عودي لبيتك
هو ما طردك فموقفك ضعيف ولن يعيدك ما لم تعودي بنفسك حتى لو هو مجافيك بصراحه معه حق كيف استبسطي كلمة صديق؟! لا واخيرا صار لي صديق!!! لو صغيره بسنها ما قالت هالكلمه كيف بك موظفه يعني اكيد كبيره وناضجه!! كما قلنا لك جميعا عودي لبيتك بعدها كل شيء سيحل باذن الله ثم المفروض تعطيه فرصه يعبر عن زعله وغضبه من الكلمه مو تدربكينك ايش فيك زعلان وايش صار وليش وكان كلمتك عاديه !! شوفينا هنا كلنا استغربنا كلمتك واستنكرناها كيف عاد زوجك!! ارجعي بيتك |
رد: عجزت أفهم بروده وأتعامل معاه!
من رأيي اختي
ان ترجعي بنفسك لانه فعلا لم يطردك. مو لازم تقولي له انا راجعة او تفتحي الموضوع للنقاش فور وصولك اذهبي و اجلسي ببيتك. و دعي الأمور (بداية)تمشي بسلاسة. ثم فكري |
رد: عجزت أفهم بروده وأتعامل معاه!
بالنسبة لموضعك أختي الكريمة
إذا وضعتِ نفسك مكان زوجك وأحسستي بإحساسه ونظرتي أن ماتقولي عنه أنه تافه وهو ليس بتافه .. عندها ستنحل مشكلتك أعانك الله |
رد: عجزت أفهم بروده وأتعامل معاه!
الاخوة والاخوات
قانون المنتدى يمنع تحويل الموضوع إلى حوارات ودردشة بين الأعضاء وكذلك المداخلات الغير المناسبة للموضوع والتي لا تفيد صاحبة المشكلة نرجو الالتزام |
رد: عجزت أفهم بروده وأتعامل معاه!
طيب اذا كنتي تريدين العودة ليه خرجتي من بيتك من الاساس،، وتحملتي ردة فعله
وردة فعله عادية ( اخيرا لقيت لي صديق) بغض النظر عن قصدك |
رد: عجزت أفهم بروده وأتعامل معاه!
أجمع المشاركون في هذا الموضوع من رجال ونساء أنك أخطأتي
وقل ما يجتمعون ولكن موضوعك واضح الخطأ فيه وضوح الشمس أولاً تعملين في مكان مختلط ثانياً يدافع عنك زميلك في العمل ثالثاً تفرحين بدفاعه عنك رابعاً بكل سذاجة تخبرين زوجك بأنك أخيراً وجدتي صديق يدافع عنك و يخرجك من التوحد في الدوام خامساً تسأمين من السعي في رضى زوجك سادساً تقررين الذهاب لأهلك دون إقامة أي أعتبار لزوجك و أخطاءك في حقه سابعاً تسمعيه كلام يسم البدن قبل ذهابك لأهلك ثامناً تجلسين شهرين كاملات عندك أهلك و لا تقيمين له وزن تاسعاً لازلتي مصره أنك لم تخطأي في حقه عاشراً أنتظارك له بأن يأتي أليكي ركض ليعتذر لكي إحدى عشر إظهارك لمشكلتك خارج عشك الزوجي صدقيني الرجل إذا وصل لهذه المرحلة من التجاهل فهو يقوم بدراسة خطوات لن تفرحي بها سارعي للملمة المشكلة و حلها |
| الساعة الآن 06:01 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©