|
زوجي يعتبرني زوجه ع ورق مستجدات الرد17
السلام عليكم ورحمة الله وبركاتة..
اسعد الله مسائكم بكل خير اعضاء المنتدى الكرام.. عندي مشكله واتمنى القى الحل لاني بجد تعبت من حياتي بالبدايه انا تزوجة زميل اخوي بالعمل ومن خارج قبيلتي ومطلق وعنده ولد المهم وافقت بعد الاستخارة هو رجال شهم وحنون بس مشكلته غيور حييييل طبعا امه واخواته رافضين زواجه مني لكن هو حطهم امام الامر الواقع المهم حاولوا بكل الطرق ومن تحت لتحت مشاكل الحمدلله كنت اطنش وهم بالرياض وزوجي متعين بمنطقة اهلي ولا اشوفهم الا بالاعياد لكن ما اسلم منهم الموقف اللي صار لي وبعدها طلقني كنا بالعيد وجالسه كاشخه ولابسه لبس محتشم جاني ولد زوجي قال بابا يبغاك في المجلس اللي برا قلت متأكد ماعنده احد قال ايه عماني رايحين رحت ولبست شرشف الصلاة تغطيت به وانا بطلع من الباب الا اخو زوجي جاي مسرع بيدخل بغينا نتصادم بعض انا صرخت من الفجعه وثبت مكاني ماقدرت تشيلني رجولي واهرب الرجال انحاش بكيت من الفجعه جاتني اخت زوجي السوسه قالت علامك يا ،،، وش بك جلست مكاني وقعدت ابكي بقوم عجزت قلت مافيني شي التوت رجلي وقومتني دخلت غرفة زوجي هنا راح ولد زوجي علم ابوه جاني مثل المجنون مسكني بشعري قال اللي قاله فلان " ولده " صدق تكلمي هنا بكيت قلت له لا طلع الولد قايل عمتي " ،،،، " تسولف مع عمي بكيت قلت كذب وقلتله السالفه كلها بس تغطيت بجلال الصلاة ع طول والله ماشاف وجهي ماصدقني عمتي ماصدقت هي وبناتها اشتغلوا ع راسه سحبني مع شعري قدامهم ضربني ضرب شي يركلني برجله بظهري وانا حامل بالشهر الرابع وبالعقال صرخت مافكني من يده الا عمي ابوه من قوة الضرب فقدت الوعي ودوني المستشفى نزيف وحالتي حاله وانا عندي مرض(القلب) من قبل وزوجي يعرف لو مت بيده بينفعه الندم طلقني وهويضربني طلقه وحده اليوم الثاني وانا طالعه من المستشفى وداني اهلي بحايل حتى اغراضي ما اخذتها والمشكله انزف مارحمني وحنا بالطريق ادعي عليه قلت جعلك ترجعلي متكسر مافيك عظم صاحي كانك ظالمني وتناقشنا وتهاوشنا قال تخونين مع اخوي ياللي ماتستحين قلت الله ياخذني الحين انكاني سويتها انبح صوتي وانا احلف وابرر ويلعن ويسب المهم وصلت بيت اهلي ولا حتى نزل قلت انزل واجه ابوي واخواني وقولهم الكلام اللي قلته لي بالسيارة وعند اهلك قلت منت برجال اخوي الصغير ارجل منك ونزلت بسرعه طبعا ربي عطاني 15 اخو وانا الوحيده بينهم ماراح يرضون علي ومتفاهمين دخلت بيت ابوي يوم شفته بكيت بكاء واغمى علي وانا بالحوش صحيت بالمستشفى تنومت اسبوعين نزيف واحتمال الجنين ينزل لكن رحمة ربي اكبر عطوني مثبتات وابر ودم والحمدلله ثبت الجنين وصحتي في تحسن طلعت وعلمت ابوي بس بسبب طلاقي والموقف اللي صار طبعا عصب ولامني كثير قلت يبه انا تربيتك اذا تشك بتربيتك واني ممكن اسوي كذا مالوم ابو راكان باللي سواه فيني انا حافظة القران الكريم كامل لايمكن اخون ربي واهلي اخواني علمهم ابوي بطلاقي وش السبب وعصبوا وقوموا الدنيا لكن واجهتهم بكل ثقه ودافعت عن نفسي واني مظلومه وممكن اي وحده غيري تصادف نفس الموقف بس ردات الفعل تختلف عن زوجي لانه طبعه غيور وله مواقف كثير بداية زواجي وعانيت منها لحد ماخفف منها .. عانيت بحملي تنومت 5شهور بالمستشفى ولا اتحرك بس منسدحه ع ظهري والجنين توقف الغذاء عنده مايوصله عن طريق الحبل السري فصار يعطوني ابر عن طريق السره كل اسبوع ابره تعذبت من الابروالسدحه بالمستشفى 5 شهور اتعذب جاء وقت الموعود "الولادة" تعسرت وجلست 4 ساعات اشوف الموت وبعدها حددوا عملية قيصريه ولدت الحمدلله وجبت ولد وسميته (انس) ليونس علي حياتي نسيت الالم والعذاب الجسدي والنفسي خلال الشهور العصيبه اللي مريت فيها رفضت انهم يعلمون زوجي تفهموا اهلي ولا علموه هو خلال هالشهور لا سأل ولا يدري وش صار لي ع باله سقطت اوجهضت بعد الضرب اللي جاني منه قبل لا اولد ارسلت له يرسل علي ورقة طلاقي لكن رد علي حلم ابليس بالجنه المهم كمل ولدي سنه وابوه مادرى عنه انا متوظفه الحمدلله فصرف ع ولدي ولا هو بحاجته ابوي قال لازم يعرف وانا حلفت مايشوفه ولا يستاهله انا اللي عانيت لوحدي وانا اللي ربيت قلت والله لخليه يسمع بأسمه ولا يدري كيف شكله نفذت حلفي ابوي علم زوجي وجاء بكل جرئه وتفاهموا معه ابوي واخواني قال انا جاي برجعها لكن عقب ايش رفضت ارجع ولاخليته يشوف ولده اخواني خافوا ع وضعي الصحي لاني عندي القلب وبكيت بكاء مرير خفت ياخذه مني جاني خوف اخذه معي للمدرسه ولتحفيظ اخاف يصورونه ويرسلونه ع ابوه عشت ايام قلق وخوف لكن اوعدوني مايسون شي الا بشوري واذني الحمدلله خف الضغط شوي وبعدها بأسبوع جاء ولا خليته يشوف ولده ورجع الرياض وهو راجع صار عليه حادث وتكسر انكسر الحوض والفخذ والساقين اليمنى واليسرى واليد اليسرى بس وربي استجاب دعوتي يوم ظلمني . اعتذر لطول مشكلتي بختصر قد ماقدر رجعني زوجي لانه محتاج عنايه بعد ماطلع من المستشفى اخذ شهرين بالمستشفى وطلع امه من تعتني فيه من تغيير لانه مايدخل الحمام ليقضي حاجته بس ع ظهره المهم سأل شيخ عن كشف عورته لامه قاله حرام ورجعني ع هالاساس رجعت لكن بشروطي شقه بعيده اهله ورضاوة 30 الف نفذ كل شي اخذت شهر اجهز نفسي من جد وجديد رجعت له لكن صدمني قالي انتي زوجه ع ورق تربين ولدي وبس قدام الناس زوجين لكن داخل البيت مالك حقوق عندي واثناء تغييري له قال الله يلعن الحاجه اللي حدتني عليك اعتذرت وناقشته لكن مافي فايده قلت انت ظلمتني واللي فيك حوبتي طلب مني لما اكون معه اتغطى عنه بكامل حجابي ولا يعطيني وجهه 4شهور وقام يمشي الحمدلله لكن الطامه تملك ع بنت خاله انهرت وبكيت ادري من التوبيكات بالواتس اب ولا قال لي شي قبل ولا حتى لمح لي يدخل الشقه وصامت لايتكلم ولا شي انا من الصدمه سكت ولا ناقشت قلت اقضب بيتي واربي ولدي يمكن يتغير بعدين لكن لاحياة لمن تنادي اطبخ وانظف واسولف مع نفسي بس يعطيني من النظرات وهو ساكت اللي بينا سلام وبس واذا بغيتي شي الواتس اب عندك احس ولدي مع الوقت بيحسبنا صم بكم قهرني لنا الحين 7 شهور صامتين ولا يعطيني وجهه بيجني انفصام من الوحده تعبت منه اكلم نفسي ماتقولون عندي ادمي بالبيت وينام معنا بنفس الغرفه بس معطيني ظهره ولكأني زوجته انا اخذه اجازه بدون راتب يوم رجعت له عشان وضعه لكن افكر اقطع الاجازه وارجع (مستجدات الرد17) http://66n.com/forums/showpost.php?p...4&postcount=17 |
رد: هل معه حق يعتبرني زوجه ع ورق
ينقل للقسم المناسب قسم المتزوجين الإشراف ،،، |
رد: زوجي يعتبرني زوجه ع ورق ،، هل معه حق
قصتك غريبه ووين اخو زوجك من كل الموضوع هذا ليه ماتكلم وقال الموقف الحقيقي
صراحه شي غريب وبعدين ايش الحاجه اللي تخليك ترجعين لزوجك وهو قاذفك تقولين اهلك مايقصرون معك خلاص اغني نفسك عن رجال مايشوفك شريفه ومتربيه الله يعينك بس المفروض خليتي اللي ركب عليك الكلام هذا يحلف ع المصحف |
رد: زوجي يعتبرني زوجه ع ورق ،، هل معه حق
يا عزتالك
ويا عزتي لحالك ! |
رد: زوجي يعتبرني زوجه ع ورق ،، هل معه حق
طالما اهلك وعزوتك شايلينك ظلمتي نفسك بالرجوع لواحد ماهو طايقك ،،، كرامتك ووظيفتك ابدى وأهم ،، طفلك الله لا يحرمك منه اهتمي فيه وانفذي بجلدك من جوار هذا الانسان الغريب
|
رد: زوجي يعتبرني زوجه ع ورق ،، هل معه حق
حسبي الله على أشباه الرجال
عورني قلبي عليك حييييل وش حادك على الذل والمهانة ارجعي بيت اهلك معززة مكرمة وربي ولدك في جو صحي الله يعوض عليك |
رد: زوجي يعتبرني زوجه ع ورق ،، هل معه حق
مافي شي واحد
ولا ميزة تحدك عليه.. |
رد: زوجي يعتبرني زوجه ع ورق ،، هل معه حق
نحن نسمع من طرف واحد ولا يحق لنا
التعاطف مع طرف دون الاخر ولكن اذا بيئة حياتك الزوجية لاتصلح ارحلي بهدوء |
رد: زوجي يعتبرني زوجه ع ورق ،، هل معه حق
شي عجييييب !
الوحده ترضى الإهانه اذا كان ماعندها اهل تعتزي فيهم + او حادتها الماده والحاجه + او خايفه على عيالها انتي عندك اهل واخوان حافظينك الله يحفظهم وعندك وظيفه وفلوس وعندك ولد والحمدلله انه ولد مو بنت يعني ان طالت ولا قصرت ولد مرده لك وش مصبرك على الذل والاهانه واصلا ليه ووشلون ترجعين وانتي عارفه انه متكسر ويبيك ممرضه لا بعد ويسبك وانتي تغيرين له !! ظلم وبهتان وعايله متأمره وعالم ماتخاف الله ورجل يفتقد لكل معاني الرجوله في الدنيا صابره ليه ابي افهم !! يختي عزي نفسك دام ربي عازك ولاتسمحين للدنيا تسرق كرامتك وسعادتك واستقرارك وضحكتك |
رد: زوجي يعتبرني زوجه ع ورق ،، هل معه حق
الظلم ظلمات يوم القيامة
بصراحه قمة التناقض انك تاركته سنه وكنتي قويه ورجعتي حتى تكوني ممرضه لمريض عقلي قبل جسدي! اتوقع انك فرحتي انه احتاجك وظنيتي انه بيتعدل لكن خاب ظنك! المهم اشلك وحرق الدم والاعصاب تنتظرين يجيبلك مرض نفسي ولا جسدي؟ فكري بنفسك وولدك وبس شكله حقود وما ينسى!! |
رد: زوجي يعتبرني زوجه ع ورق ،، هل معه حق
بعد كل الي ذكرتيه عن زوجك
لسا تسألين هل معه حق!!!!!!!!!!! انتي اسألي نفسك هل راضيه بوضعك!!!! الله يفرج همك ويهديك للصواب أعوذ بالله من قهر الرجال |
رد: زوجي يعتبرني زوجه ع ورق ،، هل معه حق
هذه المشاكل كلها لانك التقيت باخو زوجك صدفة لم تتعمدي ذلك ما هذه العقلية المتحجرة .الله يعينك اختي استخيري واستشيري ولا تهدري شبابك.
|
رد: زوجي يعتبرني زوجه ع ورق ،، هل معه حق
السؤال هل انتي راضيه عن نفسك المسمى زوج يعاملك هالمعاملة ؟
كيف كرامتك سمحت لك ترضين تعيشين مع شخص قذفك و وبنفس الوقت يهينك ؟؟ الله منعم عليك و عندك اهل و عزوة ووظيفة وولد و انتي رافسه النعمة و صابرة على الضيم الله عازك تهينين نفسك ليه ؟؟ لك حقوق كزوجه أهمها الاعفاف لاهو اللي عفك ولاهو اللي احسن معاملته معك !! ايش اللي زواج على ورق ؟ استغفر الله وش اللي حادك تعيشين حياة كذا طول العمر مع شخص زي كذا ؟ فكري و اجلسي مع نفسك و عزي نفسك . |
رد: زوجي يعتبرني زوجه ع ورق ،، هل معه حق
وينهم ال 15 أخ الي ربي رزقك إياهم
بعدين كيف ماياخذو حقك من واحد اتهمك بدون دليل ؟؟؟ ولما كان راميك ولا سائل عنك وينهم لا مطلقه ولا متزوجه وولدتي وكبر الولد ومو سائل فيك هذي كلها واخوانك يتفرجون وآخرتها يرجعك ب30 ألف المهم روحي لهم وقولي لهم انك ماعاد تبغيه وخليهم يساعدوك تتطلقي |
رد: زوجي يعتبرني زوجه ع ورق ،، هل معه حق
مسك الخير انتي مصدقه ان زوجش ردش بس عشان عورته ما تنكشف الا لزوجته ؟
لا بجد محترم ويعرف الاصول ردش لان عارف ومتأكد انش مش خاينه ... اذا كان بالفعل يغار عليش ليش يطلب منش تجين المجلس وفي يوم العيد وكلنا عارفين الوضع في العيد .. ناس طالعين وداخلين .. كان هو جى لين عندش من غير ما حد يصادفش نصيحتي لش ردي بيت ابوش اهون بكثير من الحياه هذي |
رد: زوجي يعتبرني زوجه ع ورق ،، هل معه حق
سؤال،،ليش قاعدة معاه إلى الآن؟
تتوقعي راح يحن؟ ولا عشان ولدك؟ هل غيرة زوجك توصله إنه يضربك؟ ولا كان شاك لأن الكلام اللي وصله غير عن اللي صار؟ |
رد: زوجي يعتبرني زوجه ع ورق ،، هل معه حق
اشكر كل من رد علي واعطاني من وقته الثمين انا ماجيت الا وانا مطبقه معه جميع الحلول واستخرت ع الطلاق لما رجعت قلت اكيد حس بالغلط وبيتاسمح مني ماكنت اتوقع منه هالصدود كله ولا الموقف يستاهل بس كبر الموضوع اخوه حلف ع المصحف عند اهلي ماخلوه يمشي الموضوع كذا بالساهل ولا وفيه وحده ترضى بالاهانه ع نفسها قلت اصبر وصبرت7 شهور ولا تغير شي .. البارح تناقشنا وتهاوشنا بعدها قلت كل مافي قلبي له وهو اذن من طين واذن من عجين ولا كأن اللي معي انسان .. رحت واتصلت ع اخوي يجي ياخذني من عنده ولا راح اعلمه اني بروح اهم شي عندي صحتي ولدي والله العظيم اني تعبانه حيل احس جبت لنفسي الهم والنكد يوم رجعت وجلد الذات ذبحني rfegrrfegr دعواتكم
|
رد: زوجي يعتبرني زوجه ع ورق ،، هل معه حق
اقتباس:
ولدي ابديه ع نفسي قلت اصبر علشانه ويعيش مع ام واب انا جدتي اللي ربتني ولا اعرف امي من عمري 4سنوات والي يومك هذا الومها واكرها ليه خلتني بالسهوله هذي ليش ماضحت علشاني فخفت ان ولدي انس بعدين يلومني 😢 مع اني مدري عن ظروف امي كيف يوم تركتني صح كنت اعاني من غيرته الزايده بس خفف علشاني مع اني عارفه انه مو بيده الكلام ابصم لك ع العشره انه واصله غير انا يوم جاتني اخته وقالت وش بك قلت التوا برجلي ماعلمتها باللي صار لاني عارفه انها بتبهرها عند اخوها وسبقها ولده وقام بالواجب بدالها حسبي الله ونعم الوكيل |
رد: زوجي يعتبرني زوجه ع ورق ،، هل معه حق
[QUOTE=kooki3;3398894]مسك الخير انتي مصدقه ان زوجش ردش بس عشان عورته ما تنكشف الا لزوجته ؟
لا بجد محترم ويعرف الاصول ردش لان عارف ومتأكد انش مش خاينه ... اذا كان بالفعل يغار عليش ليش يطلب منش تجين المجلس وفي يوم العيد وكلنا عارفين الوضع في العيد .. ناس طالعين وداخلين .. كان هو جى لين عندش من غير ما حد يصادفش نصيحتي لش ردي بيت ابوش اهون بكثير من الحياه هذي[/QUOTE وهذا اللي بسويه ان شاء الله |
رد: زوجي يعتبرني زوجه ع ورق ،، هل معه حق
اقتباس:
|
رد: زوجي يعتبرني زوجه ع ورق ،، هل معه حق
اقتباس:
|
رد: زوجي يعتبرني زوجه ع ورق مستجدات الرد17
من كلامك زوجك مافيه ولا حسنه كله سيئات ومن كلامك كذلك انه ماله امل في التغيير
اتمنى ما تكون رجعتك له شماته بموضوع عجزه اللي صابه اتركيه وانتبهي لصحتك وتربيتك لابنك وعسى ان يكون هالامر خيره لك |
رد: زوجي يعتبرني زوجه ع ورق مستجدات الرد17
يا لطيف يا رب
منت في حاجة اللي اسمه زوجك ارجعي لأهلك عيشي بإنسانية . |
رد: زوجي يعتبرني زوجه ع ورق مستجدات الرد17
إذن قررت الرحيل من حياته، وهذا قرارك
وفقك الله |
رد: زوجي يعتبرني زوجه ع ورق ،، هل معه حق
اقتباس:
حياتك معاه تخلو من المودة و الرحمة و الاعفاف انتي في غنى عن رجل بالمواصفات اللي ذكرتيها الله يوفقك و يرزقك و يعوضك بالعوض الصالح . |
رد: زوجي يعتبرني زوجه ع ورق مستجدات الرد17
الحمدلله ع كل حال طبعا وصل اخوي ورحت معه وحاليا انا عند اهلي وزوجي حرق الجوال من الاتصالات بس مارديت عليه ابي لما اهدى شوي لان نفسيتي تعبانه مررررره وابلغه بقرار الانفصال بس خوفي ياخذ ولدي مني بعدين💔
|
رد: زوجي يعتبرني زوجه ع ورق مستجدات الرد17
اقتباس:
|
رد: زوجي يعتبرني زوجه ع ورق مستجدات الرد17
اقتباس:
|
رد: زوجي يعتبرني زوجه ع ورق مستجدات الرد17
اقتباس:
ارتاحي ولا تردين على اتصالاته لحتى ماتوصلين لقرار بنفس مرتاحه و ذهن صافي اسأل الله ان يفرج همك و يبدل همك فرح و سعادة .. امين |
رد: زوجي يعتبرني زوجه ع ورق مستجدات الرد17
اقتباس:
ماراح ارد عليه وان اتصل بعطيه ابوي يتفاهم معه الحين ازعجني بالواتس لكن مافتحت رسايله وماراح افتحها نهائي الا بعد كم يوم لما ارتاح نفسيا |
رد: زوجي يعتبرني زوجه ع ورق مستجدات الرد17
الله يفرج همك ويعوضك بزوج صالح يخاف الله
|
رد: زوجي يعتبرني زوجه ع ورق مستجدات الرد17
آمين يارب..
|
رد: زوجي يعتبرني زوجه ع ورق مستجدات الرد17
بما ان خلاص مافي حل غير الطلاق والحمدلله امر المؤمن كله خير ..
اتمنى حذف الموضوع .. |
رد: زوجي يعتبرني زوجه ع ورق مستجدات الرد17
أسأل الله أن ييسر لك ما فيه الخير
يغلق |
| الساعة الآن 07:57 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©