|
زوجي مدمن جوال !
يوم عن يوم جالسين نبتعد عن بعض ،
وصلت لمرحلة والله مافيه شيء نتكلم فيه ، كأننا أغراب . نطلع سوا لكنه مدنق راسه ع جواله .. نجلس سوا لكنه ع جواله .. أنا فعلاً مليت ، صرت أهرب للجلوس عند أهلي لكن بآخر سفره زعل ورفض سفري .. يجي من دوامه العصر وهو تعبان ويقولي تعبان ومرهق ، يلمح لي عشان ما أزعجه بالسوالف :/ ويجلس ع جواله ساعة أو ساعتين .. ينام حتى المغرب يصحى برضو عند جواله بعدها يطلع لاهله وبعدها اذا فيه مشاوير له يجي الليل يطلب مني شاي ، احط صينية الشاي والله مايرفع عينه ، عند الجوال ويقولي مرهق الخ فيني نوم نروح ننام يجلس ساعة او ساعة ونص ع جواله وهو بالفراش . مهملني عاطفيًا وكذلك بنتي ، تقول كلمة لأولمرة ماينتبه لازم انبهه تسوي حركات لاول مرة ماينتبه لها انسان باله مو معانا ابدا والله كاني جالسة مع جماد مليت من كثر ما اشحذه وقت ، مليت من كثر ما اطلبه يسكر جواله واحنا طالعين احيانا يسكر الجوال ويقول يالله سولفي ! مو كذا الموضوع ما اقدر اسولف تحت ضغط 😅 واكره انه جالس وهو بحسب الوقت .. ما أعرف إيش التصرف الصحيح والله .. |
رد: زوجي مدمن جوال !
نزور أهله طبعا ع طلبه لانه يهتم بنظرة اهله له ،
والله مايرفع عينه من جواله .. مغيّب تماما مايدري ايش نقول واذا كلمناه مايرد الا بعد وقت انا اجلس واحكي واسولف مع والده ووالدته وهو زي الجماد وصل لمرحلة انه يطلع ع شقتنا بدون محد ينتبه عشان يجلس ع جواله بدون محد يشغله واذا قرّب وقت العشاء جاء :) |
رد: زوجي مدمن جوال
قبل فترة كنت طالعة لأهلي ، وطلبت منه يوقفني عند مصرف حتى اسحب مبلغ لاخوي هدية ..
سأل عن السبب قلت اليوم مسوين حفلة لأخوي لأنه تخرج قبل شهر .. قام يعااتب انك ماتقولين لي شيء ومدري ايش ! انا فعلاً ما اقول شيء لانك مو معاي .. لو احنا نجلس سوا زي اي زوجين طبيعيين اكيد راح اقولك الاحداث اللي تصير . وانسان زيادة ع كذا روتيني جدا .. من ثلاث سنوات نفس حياتي ماتغير فيها اي شيء ماسافرت لمكان ماجدد نا شيء للبيت ما سوينا اي شيء لحياتنا بداوم كل يوم ويك اند روتين خاص ياخذ اجازاته عشان يرتاح من الدوام 3 اسابيع وهو نايم وجالس ع جواله :) 3 اسابيع او شهر يجلس لي في البيت ماعنده مشكلة والسنتين الاخيرات صار ياخذها في رمضان وايام العيد عشان مايتعب مع الصيام .. وانا نفس الكرف المطلوب مني اني فقط امارس امومتي وشغل البيت بدون تذمر .. انا والله مليت وخارت قوتي 😭 احتاج زوج بس يتكلم معي راضية بالكلام اوكي مايبي يتكلم سفرني طيب ابغى اغير روتيني القاتل ابغى استجمام شوي 😭😭 |
رد: زوجي مدمن جوال !
أعاني من نفس ما تعاني
لدرجة اني تعودت وما عدت أشوفها مشكله صار الموضوع عندي عادي |
رد: زوجي مدمن جوال !
نفس وضعي.. برضو تعودت
|
رد: زوجي مدمن جوال !
هل سبق ان أبديتِ لزوجك ما تعانيه ؟!!!
|
رد: زوجي مدمن جوال !
بصراحه الجوال صار علينا افه .. او على البعض عشان ما نعمم .. خصوصا مواقع التواصل الاجتماعي ..
لكن الحل بايدك اختي .. حاولي انتي تبادرين في الحديث معاه .. ولو تقولين له يا بوفلان اترك جوالك ابي استشيرك في موضوع .. او ابي اكلمك وش صار في بيت اهلي اليوم .. يوم بعد يوم راج يتعدل باذن الله ويعطيكي مساحه اكبر من وقته .. لكن ما تقولي خلاص راح اتركه على راحته .. هنا راح يشوف انه مافي مبادره منك بالحديث معه ويمكن هذ1 هو السبب الي مخلي كل وقته على الجوال لانه ما يلاقي الي يتكلم معه .. في زياراته لبيت اهله .. هل نفس الحال على الجوال .. ولا لا ؟؟ |
رد: زوجي مدمن جوال !
غاده 💔
لا تشكين لي ابكي لك 24 ساعه حتى في طلعاتنا الخاصه سواءلمطعم او كوفي حتى بالسفر الله وكيلك 💔 الغالب انه تويتر والعاب متنوعه الله المستعان احس بنفس ماتعاني منه من التجاهل والانفصال العاطفي ترى كلنا عندنا جولات وبرامج ليش هالشفقه عليها منهم ! الله يعين انا مخليته ع راحته عندي صحباتي واهلي ابربر عليهم هو خل يسوي كل اللي خاطره فيه راح يجي يوم ويندم وقت مارح ينفعه الندم |
رد: زوجي مدمن جوال !
من المهم ألا يديرنا ويسيطر علينا الجوال لأننا سنخسر أشياء كثيييييييييييييييييييييييييييييييييييييييييييرة وعلى مستويات متعددة بداية من المستوى النفسي نهاية بالاجتماعي وبين هذا وذاك مستويات متعدددددددددددة
|
رد: زوجي مدمن جوال !
ليس زوجك فقط غالبية الناس مدمن على الاجهزة الذكية زوج , زوجة ’ أبن ’ بنت
كنا في السابق اكثر قرباً من بعض نحس ببعض نفهم بعض نتحاور نختلف نتفق لكن مع الأسف الوضع تغير الآن اصبح كل منا مشغول بجهازه بعالمه الخاص الذي يعيش فيه لا أدري هل هذه التقنيه نعمة ام نقمة فقد اشغلتنا كثيرا وابعدتنا أكثر عن بعض فكان الله بعوننا جميعاً |
رد: زوجي مدمن جوال !
نفس حالتك وبديت اتعامل معة بطريقة اخرى
بدل مأقول له سكر جوالك وكلمني اذا خرجنا اترك جوالي عمدنا في البيت واذا ركبت السيارة وهو فاتح جوالة اقول لة : تصدق انا تركت جوالي عمداً في البيت لأني حابة اطلع معك انت وبس وحتى الجوال مايلهيني عنك شو رايك بطريقتي يافلان هههه يقول : فكرة حلوة ويطنش لكن يحاول يغلق جواله علشان مأزعل ^^ قبل مشاكتنا 😭😭 ودعواتك لي ربي يصلح حالنا ويألف بين قلوبنا بحاجه لدعواكم جميعاً |
رد: زوجي مدمن جوال !
الله يعين الأجهزه تأخذ الشخص أخذ ، بس بدا يتكون عندي اعتقاد ان الشخص الغارق في المنتديات و غيره مثلي طبعا لا أزكي نفسي ، لكن الفارق انه عنده حياه اكثر يعيشها في الواقع ، مثل الازواج او المتزوجين ، هو شخص فاقد شي ويحاول البحث او التعويض عن هذا الفقط بطريقه غير مباشره ،،،،
|
رد: زوجي مدمن جوال !
اي كان السبب ، حتى ان كان البحث عن عالم خاص منفصل به ، و عندي حل لا اعرف ان كان مجدي او حل ، لكن جربي ان تشاركيه في وسأءل التواصل هذه ، يعني قول له إِيش اتابع راح أسجل معك ،،،، وايضاً امر اخر حاول ان تعرف ما هو الشي الذي يفقده او يشغل باله
|
رد: زوجي مدمن جوال !
ظنيت لوهله انك زوجة اخوي :d :d
الله يصلح الحال, معظم الرجال مثل زوجك. |
رد: زوجي مدمن جوال !
يبي يشغل نفسه بأي شي هذا مفهوم اللي متعلقين بجوالاتهم
|
رد: زوجي مدمن جوال !
اقتباس:
بس بالفترة الأخيرة بطلت أطلبه صرت أسكت |
رد: زوجي مدمن جوال !
اقتباس:
بعد ماتنتهي السالفة يرجع لجواله اشغله مرة ثانية ومرة ثالثة بس مايستجيب يصير استيعابه بطيء وتركيزه ه الجوال اتقرف واسكت واقول بلاها من سوالف . ونعم عند اهله عند جواله ودايما امه تعلق عليه بعصبية اذا كلمته ولا سمعها لانه ع جواله اقولك مغيّب تماما 😟 |
رد: زوجي مدمن جوال !
اقتباس:
كل الازواج الطبيعيين يتكلمون وقت النوم .. انا وزوجي ماصرنا نسويها .. تدرين عاد صرت بطلعاتنا الجين مستحيل اجلس ببارتشن مستحيل ينهبل زوجي شلون تاكلين اقوله معليش اكل وانا اتغطى .. المهم انفرج ع العالم هو عند جواله وانا ايش اسوي اقابل الجدران ؟!! فصرت اتغطى واتفرج ع الحياة الطبيعية اللي برا طاولتنا يالله اشوف ميف الناس الطبيعية تعيش وتطلع ترفه عن نفسها مالت على اللي عندي 🙌 |
رد: زوجي مدمن جوال !
اقتباس:
ما ادري ايش النهاية .. |
رد: زوجي مدمن جوال !
اقتباس:
صرت احس باحساس غريب اذا سكر جواله ما اعرف ايش نتكلم فيه ! حتى لما اسولف سواليفي عامة جدا جدا احس فيه شيء بيننا ماصرنا قريبين من بعض |
رد: زوجي مدمن جوال !
اقتباس:
و اطلقي فيها عنان مشاعرك تُجاه سولكه ! لكنني أأكدُ عليكِ اللطف في المعاملة و الكلمة الطيبة ...!! ثم وافنا - بعدها- بدوافعه ...! أسأل الله لك صلاح الحال .... آمين |
رد: زوجي مدمن جوال !
اقتباس:
هذي المشكلة ، ما ابغى اجبره اجبار بالجلوس معي واغلاق هاتفه ، انا دقيقة ونبيهة السط الايماءات انتبه لها .. فيترك جواله ويبدا يحرك رجوله او يطقطق باصبعه ع الطاولة اعرف اذا سوا هذي الحركات يعني خلاص يبغى يرجع لجواله وجالس ع اعصابه :) واذا تجاهلت هالشعور كلها ثلاث دقايق وهو راجع |
رد: زوجي مدمن جوال !
اقتباس:
واتس اب متابعة للقروب انستغرام متابعة فيستحيل اني اجاريه بعالمه لان عالمه اصلا واضح ولا يستدعي هذا الادمان |
رد: زوجي مدمن جوال !
اقتباس:
|
رد: زوجي مدمن جوال !
اقتباس:
|
رد: زوجي مدمن جوال !
اقتباس:
مع اني اكره شحذ المشاعر جدا جدا لكن بضغط ع نفسي وبكلمه .. امين شكرا لردك ❤️ |
رد: زوجي مدمن جوال !
السلام عليكم ورحمة الله
اختي غادة بقول كلام لك ولكل زوجة تعاني من نفس مشكلتلك وانا اقرا شكواك من زوجك تذكرت نفسي بداية الزواج ولمدة تقريبا خمس سنوات او اكثر تماما تماما كنت مثل زوجك ويمكن اكثر لدرجة ان زوجتي كانت تقول لي سالفة وتنتهي منها وانا مدني عالجوال ومدري اش قالت وتعيد لدرجة انها تصيح عشان تنبهني وافز فجأة حاولت زوجتي وسوت كل طريقة وانا زي الجدار تلبس وتكشخ الله وكيلك ما اعبرها ولا اهتم فيها ولا اسولف معاها والله يا جماعة الخير مدري ليش كنت على هذي الدرجة من التبلد واللامبالاة لدرجة ان امي تطلع احيانا عندنا وانا نفس وضعي ساحب على امي وزوجتي وجالس على جوالي تويتر وخرابيط وشبكات الخلاصة المفيدة : ان زوجتي بدأت تسحب علي شوي شوي وانتبهت لنفسها كملت الجامعة واشتغلت فشركة مندوبة مبيعات بمعنى اعطتني جوي بالكامل وسبحان مغير الاحوال سارت ورب البيت تجذبني وهي بعيدة عني سرت أتأملها من بعيد وهي تذاكر ولا شعوريا اجي احضنها فعلا سارت تعجبني يمكن عشان شخصيتي غريبة شوي ما احب الي يفرض نفسه علي احبه يكون بعيد يجذبني ويشدني اكثر متأكد ان زوجك شخصيته زي شخصيتي ،،، نصيحتي لك اعطيه جوه وانتبهي لنفسك وابعدي شوية شوية حملي كتب عن تربية الاطفال او التاريخ وغرائب الحياة وانشغلي شوية وطوري نفسك بتلاقينه يتقرب منك زوجك من نوعية الرجال الملول الروتيني الي اذا تعود على شي خلاص انسي يغيره الا بقناعه من نفسه حتى امه وابوه ما يقدرون يغيرون شي فيه موفقه اختي والله يسخر قلب زوجك لك ويوفقكم فحياة سعيدة |
رد: زوجي مدمن جوال !
هل جربتي تدخلين عالمه وتبدأين بالتواصل كتابياً معه على الواتس وهو بالعمل او بمكان اخر غير مكان تواجدكم
ثم تدخلين بتسجيل مقطع صوتي لك سوالف عابره وطفلتك جنبك تلعبينها وصوت ضحكاتها ظاهر بالمقطع الصوتي هذه كانت من اجمل اللحظات تجعلني اركض للمنزل بس بلحق على الجلسة الحلوة والضحك والوناسه اتوقع روتينكم اليومي ممل وسوالفكم مع بعض نوعا ما ممله لما تسولفين مايهمه ماتتكلمين عنه ولما يسولف ممكن ما يهمك او نبدل كلمة ما يهم الى ما يستهويكم هذا النوع من السوالف تدرجي بالسوالف من كتابي الى صوتي الى ان تصبح السوالف بينكم وجه لوجه لي صديق لما يتصل علي اعرف انه سيقول سالفه غير مهمه ولا تستهويني ولا تعجبني سوالفه احياننا ما ارد واحياننا ارد واختصر اني مع اطفالي اجمحي بالسوالف الى المود اللي يعجبه وبينتبه لك |
رد: زوجي مدمن جوال !
^
^ شكرا على ردك اليوم جاء من الدوام وحطيت الغداء وتغدا ماقال كلمة واحدة لي كان ع جواله .. وأنا انقرفت ، فـ رحت لغرفة الملابس وطلعت دولابي وجلست اعيد ترتيبه لساعة ونص وهو ع حاله .. نام ولما صحى طلب شاي .. سويت الشاي وجلست وكان معاه جواله قلت له بنبرة جازمة : بتمسك جوالك باخذ فنجالي وبشربه بالمطبخ . وترك الجوال ، وهذي بتكون استراتيجيتي الجديدة ، اذا مسك جواله بروح عنه واجلس لوحدي 😅 ونشوف ايش النهاية .. صح تذكرت ، اخذت عهد ع نفسي لو طلعنا لمطعم او كافيه ومسك جواله .. باخذ كوبي او عشائي وبطلع اجلس بطاولة ثانية 😌 ونشوف وش بيصير .. طبعا لما ترك جواله ماحكينا ، مافيه شيء أقدر أقوله صراحة تعبت من كثر ما اسولف معاه .. خلصت كل سوالفي .. بس حتى لو ماتكلمت ، مارح يفتح جواله ✌️ |
رد: زوجي مدمن جوال !
. الله يعينك غاده بس اذا سكر جواله سولفي اي شي خاص فيه او فيكم بالبيت الاطفال او سولفي بالامور الخاصه فيه مباراه شوفيها معاه حتى لو كنتي ماتهتمين بالكوره او عالم سيارات زي كذا وانتي ادرى بزوجك بس اهم شي ماتصير جلستكم صمت بيمل وبيفتح جواله. اتمنى فهمتي على ياقلبي كتاب قريتيه طبخه اي شي. 😉الله يعينك ويسهل لك امورك. وشوي شوي مافيه شي يجي بالساهل. الحياة يبي لها صبر.
|
رد: زوجي مدمن جوال !
اثر زوجتي معها علم يوم كانت تجنني عالجوال 😂😂😂
هي مرحله وتعدي اعتقد انا كنت متعلق بلعبة كلاش وتويتر وحذفت حسابي في الثنتين بنفسي بدون ضغط منها لاني مليت والحمدلله رجعنا لوضعنا .، فلا تضغطينه بيجي وقت يطفش منهم |
رد: زوجي مدمن جوال !
الله يفرج همك
|
رد: زوجي مدمن جوال !
اجل الغالبيه نفس الحال انا صرت لا انسغل ع جواله اطنش واجلس ع جوالي
وفعلا فكرت اذا دخل البيت افصل الدي اس ال مو فرض هو حيشغله بس حتى يحس ويعرف اني طفشت من الوضع |
رد: زوجي مدمن جوال !
اقتباس:
كان متزامن مع ردي اعتقد ولا انتبهت له .. نعم جربت كذا مرة ويتفاعل معاي عادي ، عموما من الناس اللي تفاعلهم وسط بكل حالاتهم .. مدري كيف اوصل لك ، انا ما ابغى بس تفاعل ، ابغى ترجع حياتنا الاولى لما نسولف قبل النوم ، لما نطلع كافيه او مطعم ومانسكت من السوالف الصمت هذا ينرفزني |
رد: زوجي مدمن جوال !
اقتباس:
صار له قريب 3 سنوات ع هالوضع . |
رد: زوجي مدمن جوال !
اقتباس:
|
رد: زوجي مدمن جوال !
كلنا نعاني من نفس المشكله
وعلى قولهم صرت ما اشوفها مشكله بس انا اول مايفتح تلفونه انا آخذ تلفوني واتابع سناب واسمع بالسماعات واتفاعل معاها واضحك من قلبي اذا شي يضحكني بعدين هو يترك جواله يقول غيري خلينا نتابع شي بالتلفزيون نحط جوالاتنا ونفلها جرب كذا اذا مسك جواله لاتقعدين تزنين فلان اسمعني فلان انا قاعده اتكلم لا لا مسك جواله امسكي جوالك وانشغلي وتابعي وضحكي وسعي صدرك موفقه حبيبي |
رد: زوجي مدمن جوال !
اقتباس:
راي ممتاز جربي يمكن ينفع مع زوجك اقلبي عليه الطاولة صيري انت محل اهتمام |
رد: زوجي مدمن جوال !
اذا مسك جواله مسكي جوالك وعيشي جوك مع الجوال
خلي الجوال زوجك الوهمي😜 وابتعدي عنه مع الوقت بستغرب وبيترك الجوال |
رد: زوجي مدمن جوال !
عاد يا حلوة مو يترك التيلفون وما تعرفين تسولفين
حضري سوالف من ألحين... عشان ما يمل .. ولا انتي تملين |
| الساعة الآن 08:17 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©