الحل لإبن زوجي الرضيع..؟؟؟
 

زوجي تزوج وانتهى الموضوع ولا راد لأمر الله،
أنجب ، أمر الله نفذ،وقُضي الأمر،،
رضيت أم أبيت ماراح يتغير شي،

موضوع زواجه مابي أتكلم فيه،لأن زعلي ماراح يقدم ولا راح يأخر شي،
وإن كبّرت الموضوع وصعّدته،راح أخسر صحتي ونفسيتي، والأيام ماراح ترجع لورا، عشان زوجي مايتزوج ولا ينجب...

المشكلة هي:
تذكرون ذاك اليوم خرج زوجي للدوام الصبح وما رجع،وبالليل أرسل رسالة يعتذر إنه مو جاي ؟

زوجي خرج من الدوام وراح لها،وهي طلبت العدل في كل شيء،زوجي رفض،وهي أصرت، والله مدري وش صار بينهم، المهم يقول زوجي اتصل بأخوها وراح لهم واتناقشوا وهي أصرت على موقفها العدل أو تترك له البيت وتتنازل عن الولد..

يقول زوجي حاولوا فيها هي وأخوها للساعة 2 تخلي الولد معها لأنه يرضع منها،هي رفضت رفض قاطع قالت له ماتبيني مابيك ولا أبي شي من ريحتك..

وتركت البيت وراحت مع أخوها..
زوجي ماعرف وين يودي الولد راح لأخته الساعة 3 بالليل..فهّمها السالفةوأعطاها الولد ترعاه..وجا البيت عندي،العيال منهم الصاحي ومنهم النايم..وجلس يتكلم معهم وأنا بغرفتي سامعتهم..

أخته ضعيفة حرمة مو مرة كبيرة لكنها مريضة سكر وضغط،، الولد مو راضي يسكت معها يبغى أمه،يبي يرضع، حاولت فيه بكل الطرق مافيه فايدة وصياحه مالي بيتها،،تعبت معه..

راح أحمد بعد الفجر لعمته وجاب الرضيع لزوجته، الولد يبي يرضع والظاهر أمه ماعودته على الرضاعة، عجزوا حريم عيالي فيه، يعطونه تصبيرة سيريلاك وعصير وموية لكن هو يبي صدر أمه، زوجي مازال مستمر معها تاخذ الولد وسمعته يترجاها وأرسل لها فيديو لولدها وهو مقطع نفسه من البكاء يبيها تحن عليه مافي فايدة...

أحمد بعدما جاب الولد جاني وقالي أمي الله يرضى عليك لاتزعلين مني،إنت أمي وهذا أبوي و....... صار أخونا وأنا والله مقدر أتخلى عن أبوي في هالظرف..

دخلت غرفتي وقفلت الباب على نفسي بكيت بكيت بكيت بكيت بكيت بأعلى صوتي،
بكيت بحرقة من كل قلبي،،ودموعي ماراح تحل شي..

المهم
بتقولون خطأ زوجي وهو المسؤول وهو اللي يتحمل،
هذا مو وقت حساب، أبي حل للمشكلة، الولد صار بالبيت،والين متى حريم العيال بيتحملونه؟!

والولد للأمانة يكسر الخاطر يحزززززن جيعان.. وأمه رافضته..

للعلم زوجي مازال يتواصل معها ومع أخوها تاخذ الولد ترضعه وتفطمه بالتدريج إذا هي مقررة ماتبي تستمر بنفس الوضع،،لكنها هي رافضة وأخوها يقول عجزت فيها..أبي شوركم.. وفضلاً لا تخرجوا خارج نطاق الإستشارة..

رد: الحل لإبن زوجي الرضيع..؟؟؟
 

ولو انه الحل مزعج لكن مامنه مفر العدل الولد حرام يتشرشح وانتي مش مسؤله عنه

أمه المسؤله وزوجك مسؤول عنه دامه قدم ع هذي الزواجه يتحمل ماجاه ...

حسيت انها قلبت الموضوع لصالحها لكن في النهايه مصلحة الولد أهم من كل شي انتي اخرجي منها وزوجك يتصرف لكن لو طالب بالعدل برأيي ترضي

أبنك لما كلمك واضح انه زوجك يبغى يعدل بينكم لكن مايبغاها تجي منه يبغاها من أبنائك ..

هي أزمه ياأم دان وتعدي مانتي اول ولا آخر وحده تزوج زوجها عليها

رد: الحل لإبن زوجي الرضيع..؟؟؟
 

لا حول ولا قوة إلا بالله

رد: الحل لإبن زوجي الرضيع..؟؟؟
 

كل الحفلة اللي سوتها عشان تحطه قدام الامر الواقع ويتورط به ويرضى باللي تبيه

مراعاتكم له لصالحك.. اذا الولد انلقى له من يشيله

هي اللي بتتورط مو انتو..

هي جابته عشان يتدبس فيها لان قبل كذا وضعها كان مهزوز كزوجة ثانية

بدت تطلع الوجه الثاني المعتاد

اللي جاي مو اصعب من اللي راح

تصبري يا ام دان

عموما هي عارفة مويتك وشافتك ماقبيتي وعرفت انك ماراح تضغطين على زوجك يسوي اي اجراء

ماعندها شي تخسره عموما.. هي ماكانت عايشة حياة زوجية سوية مع كل هذا

وكذلك تعاطي زوجك مع الموقف ماكان ضدها..

رد: الحل لإبن زوجي الرضيع..؟؟؟
 

الصراحة انا في موضوعك السابق كنت متعاطف مع الزوجة الثانية وقلت يمكن ظروفها العائلية والنفسية اضطرتها لهذا العمل ، لكن بعد ما عرفت انها تخلت عن ابنها الرضيع في اهم مراحل احتياجه لامه ، لا والله ما اتعاطف معاها وما في سبب في الدنيا يخلي الام تتخلى عن ابنها الرضيع حتى لو كل الدنيا تتخلى عنها .

اما عن الطفل ، جربوا حليب صناعي اكثر من نوع لغاية ما يتقبل الطفل الحليب المناسب له او ابحثوا عن مرضعة واكيد الطفل بيستجيب في النهاية ويسد جوعه

رد: الحل لإبن زوجي الرضيع..؟؟؟
 

هل هذا إحتجاجٌ منها و ما يسمى بليِّ اليد حتى تحقق مقصدها ؟
أم ان غرضها الطلاق ؟

رد: الحل لإبن زوجي الرضيع..؟؟؟
 

احس مصلحة الرضيع فوق كل اعتبار..احتسبي الاجر العظيم..بصبرك..ماله بد الا يعدل علشان الطفل..واذا كبر لكل حادث حديث..لعل الله يحدث بعد ذلك امرا.. لاتوجد حلول وسط😐 الله يفرجها عليكم

رد: الحل لإبن زوجي الرضيع..؟؟؟
 

اختي حملت و هي ترضع طبيعي فقط
فكان لازم تفطم بنتها و تعطيها صناعي
السالقة يبيلها طوله بال شوي يعني اتوقع الولد خلال يومين او ثلاث بيتقبل الحليب الصناعي

رد: الحل لإبن زوجي الرضيع..؟؟؟
 

سلمت يداك
...........

رد: الحل لإبن زوجي الرضيع..؟؟؟
 

أنا مادخلني بزوجي ونواياه،،ومسألة العدل مو متوقفة علي،،..
هو لو يبي يرجعها ويعدل مو محتاج شوري ولا إذني.

رد: الحل لإبن زوجي الرضيع..؟؟؟
 

مااعتقد انها تخلت عن الولد لانها ماتبغاه

واضح انها قويه جداً واذا بغت شي تجيبه وتدعس ع قلبها عشان تاخذ الي تبغاه واتوقع رح توصل للعدل لكن للأسف مارح تكسب أبداً قلب زوجها بالطريقه هذي بيجها وكأنه مغصوب ...

الطفل عنده أب واخوان يتناوبو عليه لما تنحل مشكلتها نصيحه ام دان اخرجي منها اتركي عواطفك بعيد حتى لو هو أخ أبنائك برضه أمه صديقه غداره ...

رد: الحل لإبن زوجي الرضيع..؟؟؟
 

الولد بيقطع القلب وبنفس الوقت ممكن تحصل بحالات طارئة في حال مرضت الام او حدث اي شي
فبدو يعذب اول يوم وتاني يوم وبعدين يستسلم للحليب الصناعي

وما دام اعتبرت ابنها كورقة رابحة وبالرغم انها شافت الفيديو وما اتأثرت او بدها تخليه وسيلة ضغط وتستعملها
فهون انا مع انك تكسبي الولد وتربيه وساعتها هيي اللي اختارت هالطريق


احترامي

رد: الحل لإبن زوجي الرضيع..؟؟؟
 

الولد نفسيته جدا تعبانة حتى لما ينام أحسه يئن مو مرتاح بنومه.وأول مايصحى يبدأ موال البكا

مو متقبل الرضاعة الصناعية اطلاقاً بتاتاً

رد: الحل لإبن زوجي الرضيع..؟؟؟
 

متفائلة أنا حتى اللحظة برة الموضوع
والولد عند حريم عيالي ضعيف مشتت
وزوجي صامت معي بخصوص الولد.

أنا طرحت الموضوع أشوف رأيكم.

رد: الحل لإبن زوجي الرضيع..؟؟؟
 

رد: الحل لإبن زوجي الرضيع..؟؟؟
 

الحل تاخذين الولد بحضنك وهذا اخو عيالك وزوجك يطلق زوجته الثانية لانه ماعاد يحتاج منها شي وتعتبر غلطة بحياته

او تقنعين زوجك يعدل بينكم بكل شي بالمبيت والطلعات والجلسات والمصروف وكل شي وبكذا تنتهي المشكلة بتنفيذ طلب زوجته الثانية ثم زوجته ماطلبت منه شي حرام ماطلبت الا حقها واذا كانت متنازله عن بعض الحقوق فمن حقها بما ان الوضع اصبح مكشوف تطالب بكامل حقوقها بكل عدل وانصاف

رد: الحل لإبن زوجي الرضيع..؟؟؟
 

ما اختلفنا.. بس انتي تقدرين تعطين المجال انها تتفرعن او لا..

بتسويها بزوجك هم احرار هي واياه.. لكن بحياتك وبحقك لا

الطرف المضحي هو الخسران هنا يا خالة ام دان وردود افعالك وتعاطيك مع كل الموضوع بهذا الوقت بالذات هي لها الدور الاكبر بكل اللي بيصير بعدين

مش من الطبيعي ان مشكلة ببيته الثاني مالكم علاقة فيها تهز وضعكم واستقراركم وتزعجكم كعائلة كل ما طق حصى بعود!

رد: الحل لإبن زوجي الرضيع..؟؟؟
 

زوجته الثانيه هي راضيه من قبل بالوضع مالها حق
الولد خليه عندك بعد اللي سوته لك من خيانه العشره اللي كانت بينكم

رد: الحل لإبن زوجي الرضيع..؟؟؟
 

عارفه ام دان غلطة زوجك انه يترجاها ويرسل لها مقاطعه كأنه قاعد يقويها المفروض لما يلعب الولد ويكون مرتاح يرسلها ويقولها ربي اغناه عنك ساعتها تطالب فيه بأقوى ماعندها ...
ممكن تكلمي أحد من أولادك يخبر والده يتصرف معاها كذا
لكن يبغالها كم يوم ويرتاح الطفل عشان يتفاعل معاكم ويهدأ

رد: الحل لإبن زوجي الرضيع..؟؟؟
 

هي جالسة تلوي ذراع زوجك و تفرض وجودها غصب عنه و عنكم
و تستخدم ولدها كسلاح لها

الحل :

مثل ما خططت و سرقت زوجك ..
خلي الولد عندك و ربيه مع اولادك و أحفادك ..

و خليها تطلق و هي اختارت طريقها
و هي من البداية قبلت بالشروط .. خليها تستحمل نتيجة شروطها

و انت لا تعملي نفسك مضحية و لا تتنازلي عن حقوقك

عنده مشاكل معاها .. يحلها بنفسه
الطفل يبكي مو عشان يبغى يرضع .. خايف و لانه ما تعود على ناس اغراب حوالينه ..

خليه يتعود على حضن شخص واحد فقط ..
حتى يحس بالاطمئنان و الراحة ..

رد: الحل لإبن زوجي الرضيع..؟؟؟
 

كلامها صحيح

رد: الحل لإبن زوجي الرضيع..؟؟؟
 

بان معدن زوجته
1_انسانه تخلت عن انسانيتها وعن فلذة كبدها

2_جعلت زوجها في هم شديد و مصيبة عظيمة بعز ضغطه ( علم زوجته الاولى )
ولو هي عاقله اقلها صبرت فترة كافيه لين تهدا الامور وتخف الضغوط على زوجها وطالبته بالعدل مع انها بهالحاله بتكون منافقه لانها نقضت عهد بينها وبين زوجها


ولو بتكون زوجة على المكشوف فالله يعينك على سلسة المواقف اللي بتحرق قلبك

فانصحك
خوذي الولد واكسبي اجر
وعادي بيتعب اسبوع عندك تحملي صياحه ونياحه لين يتعود عليك ...

رد: الحل لإبن زوجي الرضيع..؟؟؟
 

وافقوا على العدل عشان الولد حرام هذا الحل الوحيد لنفسية الطفل

رد: الحل لإبن زوجي الرضيع..؟؟؟
 

ما هو موقفُ زوجك من كلِّ هذا يا خالة أمَّ دان ؟

و كيف يرى حلَّ المشكلةِ من وجهةِ نظره ؟

رد: الحل لإبن زوجي الرضيع..؟؟؟
 

تضمن زوجها بعد ماتربيه انه يرجعها نفكر شوي ياروح هي قالت لو بغى يعدل ماأخذ شورها

ماابغاها بعد ماتربيه يقرر زوجها يرجع أمه وقتها ايش تقول ولدي ماتاخذه ولا ماترجعها

رد: الحل لإبن زوجي الرضيع..؟؟؟
 

ان وافقت على العدل بتدخل ام دان بمهاترات مع زوجته وحركات من تحت لتحت مع زوجته
واضح انها مو هينة شريرة ..

واللي بيتعب فيها نفسية ام دان

تحملي يام دان هم فترة مؤقته ولاتحملين هم فترة دائمة

رد: الحل لإبن زوجي الرضيع..؟؟؟
 

زوجي معي على الصامت حالياً بخصوص الولد شكله مستغرق بالتفكير..
ومو محتاج أعلمه العدل..اللي يعرف يتزوج بالسر،راح يعرف يعلن ويعدل.

رد: الحل لإبن زوجي الرضيع..؟؟؟
 

ماذا يقترحُ من حلولٍ في مشكلة ابنه الرضيع ؟

رد: الحل لإبن زوجي الرضيع..؟؟؟
 

اكتفيت بالردود
أرجوا من الإدارة إغلاق الموضوع

رد: الحل لإبن زوجي الرضيع..؟؟؟
 

عودوه على الصناعي وقوموا بالولد
وان شاءالله خير
كثير اطفال تموت امهاتهم او يجف حليبها فجاه
تطور العصر وصارو الاطفال يرضعوا صناعي في ضرف ايام يتعودوا
بس تحملوه هالايام
واخذي الولد عندك احسن اجر لك

رد: الحل لإبن زوجي الرضيع..؟؟؟
 

يغلق الموضوع .............