|
كيف اتخلص من الملل العاطفي؟
bhالسلام عليكم
بتوفيق من الله وجدت هالمنتدى الرائع واللي اتوسم فيه الخير بحل بعض الإشكاليات اللي تواجهني .. ابستفسر عن نمط حياتي هل هي طبيعيه او لا قرأت كثير ومابقى منتدى زواجي ولا اكاونت يخص العلاقات الزوجيه الا عندي ولاني محبه للقراءه ف تعمقت فيها حتى كرهت حياتي مقارنة بحياة فلان وعلان من الناس عارفه المقارنه غلط بس كنت ابي اتأكد هل انا طبيعيه بشكواي او ابالغ اتمنى تتحملوني وتتحملون طول الحكي واعتذر مقدما ولكن لازم احطكم بالصوره حتى تعطوني رأي تم تعديل العنوان بما يتناسب مع المضمون |
رد: حياتي الزوجيه طبيعيه ولا لا ؟!!
البدايه وصفت نفسي حزينه اي والله انا امر بفترة حزن صامت واحاول مادقق ولكن حيل الله اقوى ...
اولا بحكي عن البدايات بشكل موجز انا البنت الوسطى بعائلتي .. والدي ووالدتي في حرب ضروس من فتحت عيوني حرفيا الوالد مايحب الوالده ابد .. والدتي ملتزمه جدا وموظفه على مرتبه ممتازه .. والدي موملتزم ووظيفته عاديه .. وكانت جل المشاكل على اسلوب والدي واهاناته و المسؤليه والصرف وامور كثيره* وكذا والدتي متحمله المسؤليه لدرجة ان البيت والسيارات من عندها ماكنا ندري بس الوالد قاله .. على اني مدللة والدي الا اني ماحس اني احبه لانه يهين امي ويحزنها دايم* واحب والدتي مره.. الله يعوضها بالجنه وبصلاح ابنائها ان شالله ويهدي والدي يارب الان والدتي في الخمسين ووالدي بالستين والامور بينهم هدأت كثير عن قبل* ... انا خذت عبره انو اعيش لنفسي محد راح ينفعني .. وكنت اقول لامي لو انا مكانك اتطلق من غير حسوفه شوفي كيف مشاكلكم تعبتنا كثير واني لو اتزوج واحد زي بابا وانا موظفه زيك والله ماجلس عنده دقيقه .. والله بفترة مراهقتي انام كل ليله على دموعي بسبب صراخهم هالامر سبب لي عقدة من الرجال عموما كرهتهم .. وماصدق ان في احد منهم في خير .. المهم في ثاني جامعه وعمري 20 تقدم زوجي لي .. وكان عن طريق خالي .. خالي معاه بالشغل وهو من نفس عائلة امي ونفس الفخذ وانا من عائلع وقبيله اخرى .. المهم اني فرحت كثير لاني معجبه بخالي هذا وزوجي نفس مواصفاته تماما نفس الوظيفه ونفس العائله وتصورت انو نفس الاخلاق كمان وكنت اشوف كيف خالي مدلل زوجته وقدامنا وكيف تعامله معانا شخص حنون ويخاف الله وشخصيه وقلت ماراح يجيب الا الخير خصوصا انه دقيق جدا ومايرضيه اي شخص .. وعلى طول بدون تفكير وافقت . ( كنت اخطب لابناء عمومتي كثيرا ولكني لا احبهم ولم اوافق على اي شخص فيهم حتى قاطعونا بس احدهم شافني مره خدعوني اخواته ودخلوه علي وخطبني خمس مرات حتى وقت اعلان خطوبتي لزوجي وبعدها توقف وللان لم يتزوج هذا دايم اقول لابوي رح جب غساله عينه فيني على هالتعاسه اللي اعيشها ) المهم خطبت وتملكت وزوجي كان سعيد وعملنا الشبكه وكان مره طاير فيني .. وبعدها مرضت مرض شديد فجأه** ولما تشافيت* زوجي تغير تماما !! صار يغلط ويزعلني ويطنشني حتى يوم الزواج عمل مشكله وهزأني ؟؟ ومره قالي بعد الزواج مرضك علامه على ان زواجنا فاشل وانو مفروض اتركك بس انا ماتركتك ولا خويي زوجته مرضت وطلقها ؟؟؟ قلت له خويك مب رجال !!! على فكره مرضي التهاب رئوي حاد ادخلني المستشفى تنويم اسبوعين* وطلعت منه بربو مزمن صار معي .. |
رد: حياتي الزوجيه طبيعيه ولا لا ؟!!
تزوجنا زواج مختصر فقط رجال بقاعه وانا لوحدي بعد المرض وسوست امي وزفتني بدون زواج كبير .. اخذني زوجي عالفندق وصارت مشاكل بالعلاقه الخاصه ورحت طبيبه بطلبي لاني خايفه( وكشفت وقالت انو يبي عدة محاولات وتتم* ) وزوجي من وقتها للان يدق بااكلام ليش ماخليته يتممها وليش مابان علامه .. !! وقلت الحمدلله رحنا الطبيبه وسمعت منها ايش قالت وانا واثقه بنفسي شاك فيني رجعني بيت اهلي ..
المهم رحنا شهر عسل دوله اوربيه .. هو يمين وانا يسار قاسي وجفس وكلامه تهكم ومايحترم مشاعري ومو حنون ابددددددد ... الحمدلله رجعنا بعد مابكاني كذا مرا .. وبدت الحياه الحقيقه من اللحظه الاولى للان وحياتي وحده مع التغيرات للاسوء طبعا .. زوجي عنده قدسيه خاصه لاصحابه وللاستراحه لانه يشيش عصبي ومايحشم ويصارخ علي دايم وبشكل يخوف صراااااخ والسبب تافه..قاسي .. ومهملني عاطفيا بشكل مو طبيعي .. مشت الحياه شد واخذ لا تطلع واطلع وغشني بالشيشه ماقال انه يشيش وخالي والله لو يدري مايزوجني اياه بس كان ذكي خاشها ..حتى اهلي والناس للان مايدرون انا بس كشفته.. طبعا كان ببداية الزواج يحشم البيت شوي يجلس ويطلع خفيف ويطلع الويكند كامل سهر للفجر و طبعا جلوسه بالبيت عالتفزيون او الجوال انا مزهريه بالبيت .. وعقب ماتخرجت وتفضيت له عشان ادلله واجلس اهتم فيه صار يطلع يوم ورى يوم والان مايجلس ابد .. حياته دوام .. نوم استراحه .. نوم بالسفر حياته نوم تمشي يرجعني الاوتيل ويروح يسهر بمقهى شيشه بعدين نوم .. انجبت بنتي الاولى ثاني سنه زواج ومافيه لهفه للحمل بالعكس قسى اكثر.. ماكأنه زوجته حامل .. وبنتي الثانيه انجبتها لما صار عمر اختها خمس سنين .. وعمرها الان ثلاثه شهور وماكنت راغبه بالحمل بس هو غصبني لانه كبير عمره 36* .. ممكن بعضكم يقول البيت مايهيء للجلوس .. والله يشهد علي ربي اني انسانه هادئه وماحب المشاكل لي جوي ورومانسيه ومرحه الحمدلله محد يمل جلستي وسوالفي الا زوجي طبعا .. البيت تبعنا مافيه الا صوت التي في .. حتى بنتنا عالصامت زيينا لانو مافي احد يحكي ف مو مزعجه والرضيعه دايم نايمه وهادئه كمان الحمدلله كل شيء موفرته بالبيت ومع كذا ينفعل ويصارخ الا يطلع وقلت خله على راحته تمادى صرت ماشوفه الا وقت الليل لدرجة شكيت انو متزوج غيري صراحه .. !!! ويقسم ويحلف انها استراحته ويشوف كوره ويشيش بس* وانا مصدقته للامرين انو مايلبس كويس وبرضو محافظ على العلاقه لو عنده غيري ماحتاجني ؟؟ هالست سنين زواج تخللتها خيانات منه كفشته وكنت اضحك واضح مو لم هالامور اسلوبه معاهم مضحك غير انه مايتغزل .. بس كان يبي صور جنسيه لهم وسكس فون يعني ... وواجهته وحلف لي انه مايخون والله الادله واصحه وبرضو ينكر قلت كويس يحترمني وان شالله انها انتهت .. برضو حصل وضربني لاني اصريت نحتفل بعيد زواجنا بيوم مباراة فريقه وكلمه مني ومنه وصراخ وضربني ..* ودخلت امي وماقصرت معه وتعهد لها مايفعلها ثاني وبرضو طلقني طلقه بغضب ووماحسبها الشيخ ورجعت له ... ولا احد يدري عن الطلاق الا امي بس .. من ناحية حسناته كريم ولا يرفض لي طلب مادي ويهديني انا اقوله ابي هديه ويجيب لي على طلبي* ولا مقصر ببيته يقوم فيه اول بأول ولا ببناته يحبهم كثير ونسافر كثير ومايهتم بالماده اذا لي مايدقق ..بار بوالدته ويخاف الله ان شالله .. بس من* ناحية تعامله سيء معاي وعشرته سيئه وصراخه وعصبيته بكل وقت حتى لو قدام الناس وكذا مرا سواها وعملت له سالفه احترمني وعقل ... قاسي لو اموت قدامه مايهتم .. مو حنون ولا عاطفي مافي كلام حلو ابد حتى وقت ..... بس مداعبات بسيطه. مايجلس معاي ولا يحكي معاي ابد عالجوال والتي في حتى لو خرجنا مطعم او اي مكان ع جواله ومايصدق اخلص ينطلني بالبيت ويروح استراحته... وحاليا مقل جدا في الطلعات بسبب دوامه مع انه لنفسه كل يوم طالع والله .. من طلعت من النفاس الا الان مارحت الا مطعم !!! ولا بيت اهلي الويكند بس.. حياتنا ممله اقرب للجحيم وصرت اتهرب منه وابي نكون متخاصمين عشان اقصر بحقوقه .. احس اني خادمه مع امتيازات ليليه !!! لا احد يقول البسي اطبخي اعملي ليلة شموع* سافري عادي ينبسط مع نفسه وياخذ اللي يروقه ويسحب علي ي جوال ي استراحه على الجوال محمل العاب كثير ويلعب .. او تويتر واخبار .. عالتي في كوره وماكوره وسياسه ولا راح شاركه هالامور لاني اكره الكوره والسياسه ومو جوي ... واحسها تجرح الانوثه هالامور الحمدلله والله اني مهتمه كثير وربي معطيني من الجمال والاخلاق الشيء الكثير* واصغر منه بكثير واجذب اللي ماينجذب بس ليش هو كذا شحيح بعاطفته معاي !! ليش مايحبني وش سويت له والله اني قايله به هه .. مره تخاصمنا وقلت له ياخاين .. وقالي احمدي ربك متحملك ولا مابيك من اول ليله بس قلت اخذ فيك اجر هالكلام جرحني على اني واثقه اني شيء واو بس قطع قلبي كلامه لانه من زوجي ... وعقب ماتراضينا قال انا وقت الزعل اخربط بالحكي لا تواخذيني... * |
رد: حياتي الزوجيه طبيعيه ولا لا ؟!!
انا اخاف على نفسي انجرف ورى الكلام الحلو
وزوجي بخيل فيه وبخيل بالاحتضان والتقبيل والتودد مافيه موده ورحمه حتى لمسه مافيه الا اذا اراد العلاقه .. انا حساسه ورومانسيه واخاف يصير حظي حظ امي وافكر كثير اتطلق منه واشوف نفسي مع شخص يحبني ويحن علي ويقولي كلام حلو ويتغزل فيني :( احس اني حسوفه على زوجي هذا وصرت ابخل بنفسي خصوصا بعد ولادتي الثانيه كرهتتتتته بشكل مرا معاد اطيقه لانه وصل لي الشعور بالنبذ بس يجيني ويعرف طريقي وقت حاجته وعقبه انقلعي مالي لزوم فيك :( وبس يارب القى حل يريحني ويخفف عني الم الطلاق العاطفي اللي جالسه اعيشه على فكره مانعني من اي تواصل اجتماعي لا صديقات ولا قرايب بيت اهلي وبس ولو بغيت اقارب يقول روحي مع امك انا مو سواقك !!! |
رد: حياتي الزوجيه طبيعيه ولا لا ؟!!
الظاهر انو هذي شخصيته وهذي طباعه ومو مستعد يغيرها
طبعا هالشي غلط الله يهديه |
رد: حياتي الزوجيه طبيعيه ولا لا ؟!!
الله يفرج همك ويصلح زوجك ارقي نفسك وزوجك بالرقيه الشرعية العين حق
|
رد: حياتي الزوجيه طبيعيه ولا لا ؟!!
اقتباس:
|
رد: حياتي الزوجيه طبيعيه ولا لا ؟!!
اقتباس:
المشكله اني اخصائي نفسي متخرجه من جامعة الملك سعود قبل سنتين وعندي خبره بس كلش ماجاز مع زوجي :( وانا مرات يجيني اكتئاب واعالج نفسي بنفسي ومرات اعزي السبب لحبوب منع الحمل بس لازم اخذها ابد مو مستعده احمل مع انه يبي ولسى بنتي عمرها ثلاثه شهور :( لما اشتكي من اي شيء يقول انتي شكايه ونكديه وانا بس ابي طبطبه او كلمة شكر . انا حريصه اتعب بالبيت واتعب على نظافة بناتي وبنتي الكبيره تدرس لها جدول خاص نومها اكلها لبسها والرضيعه معروف شقا الرضع .. وللبيت والطبخ وانا مثل ماقلت جسمي صعيف وبرضز فيني ربو اتعب بسرعه وزوجي دكتور بالمستشفى كل يوم لازم اغسل ملابسه قطعه قطعه من الى واكويهم عشان كورونا .. تعبت كثير ويقول خلاص فكيني بجيب لك شغاله انا مابي شغاله اكره الخدم .. ابي طبطبه ومساعده خفيفه زي الكي برا .. او الغداء وهو جاي صحيح انو يجيبه يوم يومين بس بعدين ينقلب ويقول عطيتك وجه تيب انا تعبانه مع البيت وبناتك والغسيل والكي والطبخ مرا مالي قدرع خصوصا اني طالعه من بيت امي ماعرف اقلي بيضه بس تعلمت وتسنعت عشانه :( شوية احساس ... |
رد: حياتي الزوجيه طبيعيه ولا لا ؟!!
اخر امر يضايقني بجنون امتداحه لي قليل يعني لما اجي من اهلي بعد الويكند اكون ع سنقة عشره مرات ينطل كلمه كذا صغيره معفوصه معناتها انتي حلوه كأن الحكي هذا يقلل من قدره .. لما اكشخ لزواج او مناسبه او اعمل نيو لوك برضو كلمه كذا طايره
انا نفسي بغزل ومدح اقوى شوي :( كلام الحب ... احبك واعشقك واموت فيك وطقتها ذي بالمناسبات الوطنيه وبعد عالواتس مايقولها فيس تو فيس الغزل اثناء العلاقه مفقود دايم عالصامت وانا اتكلم ههههههه صراحه صغرت بعين نفسي مع انه يثيره الكلام ويوديه بداهيه بس ابي بعد انا كم كلمه ياخي عبر بموت . برضو اناني بالموضوع دا ومايشبعني اهم شيء نفسه حتى لو كان الوضع مؤلم جدا لي ... اتمنى اعرف شيء واحد هو يحبني يبيني مقتنع فيني كزوجه ولا انا تصبيره :( حتى مادري اذا مرتاح معاي بالعلاقه مايعبر بس اشوف انو يرغبني بالموضوع وانا متجدده واكثر من الانجري والشغلات ذي مابقي شيء حتى لما نطلع برا اشتري امور غريبه وماتنباع هنا وتعجبه يعني يعجبه اللبس يمدح اللبس .. بس مايمدح ادائي وانا والله محتويته عاطفيا عكسه ادلله واهتم فيه حتى اظافره اقصها وابردها له وكلام الحب مايوقف عندي وامدحه امدح شكله وتحليقته وعيونه وكله وامدح ادائه الجنسي وامدح كرمه شوي وامدح مساوئه من الحب |
رد: حياتي الزوجيه طبيعيه ولا لا ؟!!
.................................................. ..
شكيت لامي اهماله العاطفي قالت ايه معليش تحملي بس مرا اذا معذبك تعالي لنا ماتحمل احد يعذب بنتي بس ماراح نطلقك خليه عشان بناته .. قلت ماما لو بفكر انفصل ابي اتزوج غيره قالت ليش نظرتك شهوانيه ومدري ايش :( عاد دريت ماعندها حل وبرضو هي صبرت على ابوي ف ماظنتي مشاكلي تهمها وتعتقدها مشاكل |
رد: حياتي الزوجيه طبيعيه ولا لا ؟!!
اقتباس:
مدري أحسك منتي عارفة وش تبي بالضبط،، أول شيء حددي شيء معين تهدفين له وبعدين اشتغلي عليه،، الله يفرج همك يارب،، |
رد: حياتي الزوجيه طبيعيه ولا لا ؟!!
انا محتاره بين الصبر عليه والجلوس معه
او الانفصال لانه مايعرف يكون حسن العشره كل شيء فيه اوك بس زواجنا يفتقد لأهم عنصر العشره الحسنه الموده الرحمه طبعا من ناحيته انا اموري تمام معاه الى من شهر كذا تغيرت عليه مره اذا تشوفي حياتي طبيعيه ف راح استمر بس هي مو طبيعيه ابي حلول تعدل زوجي واذا مافي امل من تعديله بظطر انفصل لانو بالعربي هذي مو عيشه |
رد: حياتي الزوجيه طبيعيه ولا لا ؟!!
اقتباس:
بعدين اطفالك وش خانتهم في الموضوع؟ مافكرتي في مصيرهم لو انفصلتو؟ |
رد: حياتي الزوجيه طبيعيه ولا لا ؟!!
مايحب جلسة المصارحه يتهرب ويقول لا تقلبين جوي ..
بس انا ي حليلك ماخليه بحاله ارسله معلقات وروايات ودواويين من المصارحه لو تشوفين الواتس اب ههههههههه ي ربيه روايه مو مصارحه ويرد ب اقتضاب .. او يحط العيبه فيني .. انتي مريضه .. طفله .. جاهله .. مراهقه .. تيب فهمني مريضه بشو طفله بشو !! لا تعليق .. ولو كانت مشكله يقولي مابي اشوفك اذا جيت بطلقك مابيك اكرهك !! عاد حفظت هالحكي اقوله يلا طلق ... !! ماراح اطلع الا لما تطلق .. لانو قبل اطلع ويعلقني شهر وشهرين .. وبعدين يتركم يراضيني او يفتح مجال للنقاش .. ف من السنتين الاخيره اقوله ماطلع الا مطلقني .. واجلس واكشخ وكيذا كيد نساء ونتراضى عادي ويقول بليس ومابليس ولا انا احبك واموت فيك ولاب لاب لاب ... بس انتي تنرفزيني ليش انرفزك لانك تبين تتحكمين فيني او تمشيني على كيفك ووالله يكون الطلب ابي بيت اختي ولا اجلس معاي الليله نشوف موفي سوا ومن هالطقه ماعندي انا طولة لسان انسانه هادئه ورايقه جدا ... بقولك مثال اخر مشكله اللي عقبها نفسي طابت # فجأه وانا بالنفاس اتصل علي وقال بغير بيتنا قلت ليش قال مو مرتاح واحس فيه عين وكوابيس وفعلا شقتنا من تزوجنا واحنا نعاني فيها .. قلت اللي تشوفه ... بداء يبحث وكان عنده اجازه وتعب بالبحث وكل يوم يتصل يخبرني انو مالقى ويهاوش تيب وش دخلني ذا قرارك مرات يوصل للتلميح انو من شافني ماشاف الخير ومره قالي وكنا سوا بالسياره وزحمه الطريق .. قال سبحان الله ماتتعسر اموري الا وانتي معي .. !! كلامه جارح :( ي خي ماتبيني طلقني وش حادك علي هففففف وقلت له كذا ولا اطلع بجواب ... المهم لقى شقه اعجبته جديده في حي فخم ب 45 الف السنه ايجار .. قلت له حبيبي اوفر ولا تنسى اقساط بنتنا لانها تدرس ومدرستها ب 15 الف* قال صح معك حق راح كم يوم يبحث ثم دق علي يسفل فيني وكلامي حريم ومفروض مايأخذ رأيي !! تيب قلبي انا ابي لك الزين ومابي تنهد مصاريف في خيارات كثيره غير شقه بهالمبلغ قال انتي همك نفسك عشان ماتنقص امورك !!! وفعلا انا فكرت ب* نفسي ماراح اصور مع القصر ذا اللي بنأجره كم سنه ولا احد بيشوفه بحكم اني ممنوعه من الاجتماع مع بني البشر.. واقصر على نفسي بسسبه ولا اجلس اتخاصم معاه عالقرش يكفي مشاكلنا الحاليه مو ناقصه .. يعني والله لو انه بيتنا حقنا ماقول كلمه واصبر عشان بيت العمر بس تراه ايجار .. !! وزعل وخاصم وجلس كم يوم بعدين دق وقال انو لقى شقه تجنن جديده وب 35 وكويس ماستعجل والله يخلينب له .... واجرناها واحنا فيها الان الله يجعلها منزل مبارك .. شفتي زعله وسبه لي من لا شيء كذا فجأه يقب !! زيه الان يسألني عن بنته وهي روضه واقول حبيبي لسى ماخذو شيء يبيها تحغظ جدول الضرب مثلا لسى توهم وهم يتعلمو حرف حرف ورقم رقم وبتعلمو باللعب مو بالتلقين ويجلس يسب فيني ي جاهله !! انتي مهمله ولئيمه ماتهمك دراسة بنتك تيب اقسم بالله ماخذو شيء اشق هدومي لسى ماخذو شيء اذاكر لها اياه .. وهالمشكله بتلذات كنت مو طايقته وسبيته سب سنين وقال جزمت انك ماتنفعين لي قلت ابركها من ساعه .. وبرضو رجع بكلامه وانتي قليتي ادبك وماتسمعين كلام زوجك .. تيب يالحب والحكي اللي قلته وهلم جرا .. يختي لو اقوله ابي بيتزا عشا ويطلع ومايلقى بيتزا يدق يهزأني ليش ياخي كذا .. |
رد: حياتي الزوجيه طبيعيه ولا لا ؟!!
انا اشوف انك تخففين من مدحك له
بكل شي لا ادائه ولا جسمه ولا تتغزلين ولا شي عامليه بمثل مايعاملك واعطيه قد مايعطي ولا تزيدين وطبعاً كل هذا بدون نكد وشوفني اني قاعده اردها لك وحده بوحده لا لا خليك بشوشه ومبتسمه وراضيه بس عامليه مثل مايعاملك بالضضضضضبط اعطاك كلمه صغيرونه حلوه مو تردينها له صفحات من العزل.. لا رديها مثل ماهي كلمه مثل كلمته او ابتسامه تكفي ادائه في العلاقه الخاصه لا تثنين عليه كل مره خليه يتشفق انه يسمع منك كلمة (( واااااو حبيبي انت تجنن )) خليه يحلم فيها ومايسمعها الا بالقطاره ترا كثر العطاء الزايد للرجال يخربه ومايصلحه ولا يقربه منك ابداً خصوصاً الرجال الشرقي معروف بجفافه ربي يسعدك بحياتك ويبلغك في بناتك ياقلبي |
رد: حياتي الزوجيه طبيعيه ولا لا ؟!!
اقتباس:
أيضاً حاولي أن تنظري لنفسك ربما تكوني أحد الأسباب. كلام الحب ربما مايقوله فيس تو فيس لكن هذا طبع الرجل غالبا قليل التعبير، والمحبة موجودة، وانظري إلى النصف الآخر من الكاس، فهو يعبر عن حبه بالواتس وبعض المناسبات، وغير لم يلقي شيئاً. استمري بالغزل أثناء العلاقة واشبعيه، وحتى لو لم يتكلم هو لا تقلقي، وليس عيباً أن تتكلمي بغز أثناء العلاقة، وهذا مايثيره ويحببه ويعلقه فيك، ويجعل انعكاس ذلك جيداً على حياتكم. استمتعي بمدحه حتى لو كانت كلمه كذا صغيره معفوصه، فغيرك حين تتجمل له يصد عنها! مايجري في بيتك هو نوع من الملل ليس إلا، والرجل غير مقصر، وأنتي تريدي المزيد والمزيد، ولو اعطاكِ ذلك المزيد، لطلبتي أكثر، وربما اختلقتي مشاكل من لامشاكل، وهكذا هي طبيعة الإنسان. الرجل يحبك، لكن هكذا هم الرجال لايعرفون كيف يعبرون عن حبهم ولا يعرف كيف يوصلونه إلى النساء، خصوصاً مع طول العشرة. باختصار، تعوذي من الشيطان، واستمتعي بحياتك الزوجية، ولا تفكري بأحساسيس سلبية. أنتي بخير. |
رد: حياتي الزوجيه طبيعيه ولا لا ؟!!
اقتباس:
|
| الساعة الآن 03:55 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©