|
البنت صارحتني بكل شي وانا الان متضايق جدا
السلام عليكم
انا كان عندي موضوع ومشكله حصلت وحليتها ولكن كان شكي في محله البنت صارحتني بكل شي وقالت انها مغصوبه عالزواج من امها لان امها وابوها منفصلين والبنت عايشه عند امها طبعا حياتها مأساويه لان امها قاسيه عليها تقولها انتي غلطه حياتي وابوكم ضيع شبابي ودايما تضايقها واختها الصغيره نفس الحاله امها تعاملها بقسوه ولكن مونفس زوجتي وفوق هذا بطاقه السحب حق زوجتي عند امها يعني راتبها كله عند امها وحتى المهر عند امها البنت حياتها مأساويه جد انصدمت واخوها اللي اصغر منها يقولها انا مالي دخل باي شي لان اهو الولد المدلل عند امه ومن كم سنه هي قالت لها انتي محجوزه حق ابن خالتك واي احد يتقدم لها ترفضه امها وهي تقول ابن خالتي مابغاه قالت لهاا غصب عليك هو رجال طيب بس مطلق ولكن اهو يصلح لك لان هادي وموراعي مشاكل ماعنده خرابيط ولابنات رجال بار لاهله وسمعته زينه عرفت انها مغصوبه من امها وانا ياغافلين لكم الله حتى امي تقول هذي خوش بنت تصلح لك هاديه وماعندها مشاكل لان امي ماتبغى وحده غريبه والسبب تجربتي القديمة وابوها من عرف اني متقدم لها ووافق على الفور لان يعرفني وقالها خطيبك رجال وهو ابن خالتك واولى منك احسن من الغريب حتى ابن عمها اللي ولد اخوه رفض يزوجه بنته لان عليه سوالف ومايصلح لبنته قالها اما خطيبك اللي اهوا ابن خالتك اعرفه انسان طيب وهو اللي راح يستر عليك ويحبك اهيا البنت اساسا متعلقه في ابوها اكثر من امها لان وايد يتعاطف معاهاا ويقولها اتركي امك ومالك شغل فيها وخليك مع زوجك مع ان ابوها الله يستر عليه راعي شرب وخرابيط تخيلوا ومع هذا يبي يزوج بنته حق رجال يعرفه عشان يضمن حياتها هذا عيبه انه يشرب ايوها بس لوتشوفونه من ناحيه ثانيه يحب الضحك وانسان حبوب وومايبين عليه انه راعي شرب (والعياذ بالله) والبنت بالنهايه وافقت بس عشان تهرب من امها واعترفت لي انها تشرب شيشه مع بنات عمه حتى امها وابوها يعرفون انه بنتهم تدخن شيشه تخيلوا حتى امها تشرب شيشه صدمه يابعدها صدمه لا وابنه خالتي بعد !!! يعني الله يستر لو بعد الدخول الاقي شي مايسر اعوذ بالله قالوا خل نزوجها هالرجال يمكن تعقل !!! لا وبعد تقول انا ماابغى انجاب لانها مومستعده للمسؤوليه بس تبي تهرب من حياتها المأساويه ولا تبغى فرح ولا شهر عسل ولاتسافر معاي تقول سافر مع اصحابك عادي عشان اذا سافرت تطلع وتروح بكيفها اهم شي تتزوج وتهرب من امها عشان تاخذ حريتها عشان كذا مستعجله تقول خل نشتري حاجيات الشقه ونسكن على طول لان انا لسه خالص الصبغ وشريت صوفه للغرفه المعيشه وغرفه نوم بس لسه ماكملت الشقه باقي الاجهزة واكسسوارات وكذا ولكن انا راح اوقف ماراح اكمل اثاث لين اعرف شنو نهاية هذا الزواج امها تتحكم فيها وتقولها اقدر اطلقك منه مثل مازوجتك اياه هيا الام الله يهديها تسوي الحركات عشان تنتقم من ابوها وانا كل اللي قالته ضايقني جدا بس مابينت اني متضايق يوم قالت ابغاك تجيب شيشه في الشقه عشان ماخرج مع بنات عمي جان اقولها اي معسل تبغين هههههه بس والله من داخلي قلبي يشب نار بس ماابغى ابين لها اني متضايق يعني جد في حد يرضى يشوف زوجته شرفه وعرضه تشرب شيشه؟ لا والف لا بس قلتلها خلاص من نسكن بالشقه اجيب اللي تبغينه يعني سويت نفسي عادي عشان بشوف نهايه هالزواج شنو تبغى مني انا مصدوم جدا هالكلام صار يوم الاحد وانا من امس يوم الاربعاء مااتصلت عليها من الحين بتغير عليها خلاص ماراح اتصل حدي متضايق ياجماعه شنو هالناس يزوجون بنتهم وبعدين يسوون سوالف؟ يعني تعرفون الرجال لي بغى يعرس يكون مجهز كل حاجه واخر شي يخسر صحته وماله وعمره وحياته عشان بنت مثل ذي؟ من كم سنه حاجزين البنت لي وفترة الخطبه كانت شهرين ومن بعد الملكه والاثاث نسوي حركات ونلعب بالرجال ؟ يحسبون الزواج لعبه؟ انا اخاف اعلم اهلي بالموضوع وتصير مشكله كبيره لان هذا زواج عائلي وراح تنفضح البنت والستر زين انا بسكت وبشوف شنو النهايه لانها قالت انا لواتطلق راح اضيع وماتبغى تعيش عند امها تورطت بهذا الزواج فعلا ماني عارف شنو اقول للاهل والناس تعبت نفسيا شكلي بعلقها وماراح اتصل لين اعرف شنو النهايه الله يسامحك يا امي كيف ماتعرفين حركات اختك !!! انا بفهم شنو بتستفيد امها من هالزواج ؟ ولونفترض حصل اللي حصل وطلقتها شنو بتستفيد اذا خواتها واخوها اللي اهمه خالاتي وخالي عرفوا بالموضوع شنو راح يكون موقفها؟ الله يستر من هالزواج انا لي حد الحين يوم كامل ماكلمتها بشوف شنو بيحصل اذا قالت ابي الطلاق وخلاص بعلقها الى ان يردون المهر كله لان مابني على باطل فهو باطل والزواج مب لعبه والبنت غير صالحه للزواج وانا ابي استقرار وزوجه صالحه |
رد: البنت صارحتني بكل شي وانا الان متضايق جدا
انت مطلق
و لا سمح الله لو ماتفقت مع هذه بعد الزواج راح تنحسب عليك طلقة تانية .. اسال نفسك باختصار ( هل هذه تنفع تكون ام لأطفالك مستقبلا !؟ ) كيف راح ترضى بعدين انه اولادك و بناتك يعيشوا مع ام .. تشرب شيشة في البيت !؟ يمكن فيه ناس عادي عندهم !! بس واضح انت .. انك ترفض الشي هذا .. و شي كويس انك ترفضه الحمدلله |
رد: البنت صارحتني بكل شي وانا الان متضايق جدا
البنت تشيش ومغصوبة وامها قاسية عليها
وبوها راعي شراب واخربيط بصراحة مدري وين عقلك وجاي تشورنا بعد ..نصيحتي لك لا يتم هالزواج |
رد: البنت صارحتني بكل شي وانا الان متضايق جدا
اكيد لايتم
مستحيل استمر بهالزواج يعني الواحد ليش عايش اذا لا يقدر يتزوج بالحلال ولا يقدر يروح للحرام بس يتزوج عشان يطلق وينظلم وبعدين تقولون الشباب ليه مايبغون زواج ولبه نسبة العنوسه زادت والله حاله الواحد يطلق ويجلس 5 سنوات يسدد قرض الزواج ويجي يتزوج ثالث مره ورابع مره وكل مره يطلق مايجوز ياناس مايجوز تزوجون بنتكم وتطلقونها مايجووووووز |
رد: البنت صارحتني بكل شي وانا الان متضايق جدا
. أنا أقول دام هي بنت خالتك ليه ما تتم الزواج يمكن ينصلح حالها على يدك الشيشة موضة عند البنات هذي الأيام والمقاهي النسائية موجودة ومنتشرة في كل مكان لا حول ولا قوة إلا بالله أنا أعتقد بأن البنت ما لها ذنب قي التفكك الأسري اللي عاشت فيه أنت بعقلك وحكمتك تقدر تعوضها وتغيرها للأحسن |
رد: البنت صارحتني بكل شي وانا الان متضايق جدا
كم عمرها !؟
كيف شخصيتها بشكل عام ( عناديه طيبه عصبيه لينه ؟ في تفاهم بينكم ؟ كيف اخلاقها ؟ حجابها ؟ صلاتها ؟ تعاملها مع اهلك ؟ تعاملها معاك ؟ تحترمك تسمع كلامك تهتم لامرك ؟؟؟؟ هذه كلها امور اهم لتاخذها بالحسبان لتقرر تكمل ولا لا لك ماخذ من وضع البنت الاجتماعي (انفصال اهلها) من شرب ابوها للخمر الله يهديه من شربها للشيشه من اعترافها انها مغصوبه عليك اول نقطتين اعتقد انك تعرفهم من زمان بحكم قرابتك لها فا ليش الحين فتحت عيونك عليهم ؟! نجي للشيشه طبعا غلط وستين غلط لكن للاسف الحين صارت موضه .. زوجته قالت لك وكانت صريحه ممكن تخطب بنت ثانيه وتكون تشيش وماتقولك وتشيش عند صحباتها وياما شفت متزوجات يشيشو وراء ازواجهم بدل ماتطفي تلفونك وماترد عليها وهي ماتدري اساسا انت ليش متضايق خليك صريح معاها اتصل عليها وقول لها موضوع الشيشه هذا انسيه ماعندي زوجه تشيش واعطيها كم كلمه حازمه موضوع الاطفال وموضوع انها مغصوبه بيتغير اذا احبتك و من خلال طيب تعاملك ماراح اقولك انفصل ولا كمل معاها لكن باقولك استخير ومد فتره الخطوبه اكثر لا تستعجل بالزواج وهي الي تحدد لكن نصيحه مع خطيبتك الحاليه او مع غيرها الصراحه ثم الصراحه هي اساس الزواج انك تظهر شي وتبطن شي وتروح تزعل وهي ياغافين لكم الله موضوع متعب للطرفين ويجر مشاكل لاحصر لها |
رد: البنت صارحتني بكل شي وانا الان متضايق جدا
اقتباس:
اخاف اكشف ان البنت فيها شي وثاني شي هالزواج لايمكن يستمر لان أمها وراها وراها ماراح تخلينا بحالنا نعيش وانا متضايقيعني اخسر عمري وصحتي ومالي على هالزواج لا وفوق هذا ماكو إنجاب ؟ انا لو فكرت استمر بس بستمر عشان انها قريبتي وعشان لا أقرب للحرام فقط لاغير واخليها حق فراش وغيرها بعيش حياتي مثل ماكانت عموما انا بطنش فيها الحين الين تتصل وأخليها بس اهيا اللي تتصل انا ماراح اتصل نهائيا لين تحس اني متضايق عشان لو طلبت الطلاق اقولها مومشكله رجعولي المهر كله أو خليكي عند اهلك ماكو طلاق الا لمن ترجعون المهر هذا زواج مب لعبه بصراحه البنات ماينعطون وجه لي جاهم رجال طيب وحبوب ومايقصر شافوا نفسهم عليه وذا رجال يشد معاها ويخليها بالبيت ويحرمها من اشياء قالوا بخيل ومابخيل ف انا سويت اللي علي وكافي اللي عطيتها لكن ألحين بخليها تحس بالنعمه اللي كانت عليها ويمكن الله يهديها على إيدي |
رد: البنت صارحتني بكل شي وانا الان متضايق جدا
اقتباس:
انا ادري ان البنت مع الوقت ببتتغير واقدر اغيرها بنفسي ولكن الموضوع محتاج وقت طويييييييييييل مو بشهر ولا شهرين لكن كل اللي بسويه حاليا بثقل عليها لإن البنت تقولي انا مومن صالحي اتطلق لان بعدها راح تضيع وهيا ودها اني استر عليها لأن محتاجه رجال وفوق هذا تبي تهرب من أهلها لأن ابوها منفصل وأمها منفصله وأخوانها كل واحد بصوب وأهل ابوها مشاكل مع ابوها حتى جدتها( أم أبوها ) زعلانه على ولدها اللي اهو ابو البنت تخيلوا يعني البنت بالعربي عندي مثل العجينه اذا طلبت الطلاق اخليها ترجع المهر بالكامل وذا تبي تستمرمعاي راح اتعامل معاها تعامل ثاني سالفه البنت تبي الإنفصال مستحيل لأن هيا مستعجله على السكن تقول يلا خلينا نسكن بسرعه بالشقه تبي تهرب من أهلها ولكن انا راح أماطل بالموضوع لوسألتني بقولها بعد العيد انا موفاضي حاليا وبعد العيد بماطل لين اشوف هيا وش تبي من هالزواج الحين الكره في ملعبي لإن انا لو ابي استمر بس عشان ماأبغى الحرام وما أبغى افضحها فقط لاغير طالما الموضوع مافيه انجاب ولا فيه شهر عسل ولا فيه حاجه لأن اخاف اطلق هذي وتزوج ثالث مره ورابع مره وماعرف وين نصيبي لكن خن نشوف وش اخره هالزواج لأن الكره في ملعبي وعرف كيف اصوب الهدف للمرمى ""gg |
رد: البنت صارحتني بكل شي وانا الان متضايق جدا
يا ساتر
انفذ بجلدك.. مو المشكلة بكل هذا.. المشكلة شلون ماعرفت كل هالمعلومات الا الحين؟ مو ممكن تبي تنحشك باي طريقة؟ كم عمرها؟ شكلها صغيرة وغير ناضجة! وفعلا مثل ما انقال اذا طلقت مرتين بتنحط عليك علامة استفهام.. لايغرك الكلام مهما انكروا لا تاخذ الزواج تجربة.. ماراح تعرف تستقر بعدين وخاف ربك |
رد: البنت صارحتني بكل شي وانا الان متضايق جدا
اقتباس:
ولو طلقتها راح يحطون علي علامة إستفهام وان مايعرف يشد مع البنت او ماعرف يعطيها عين الحمرا او يخليها او يحرمها او بخيل او طيب او كريم شي طبيعي ماراح اخذ الزواج تجربه زهقت لاقادر اتزوج واستقر ولا اقدر اجلس بدون زواج المفروض أي بنت في الدنيا اذا جاها نصيب على الأقل تكون مستعده للزواج والمسؤولية وش راح يكون موقفج اذا زوجج عرف انج مب قد المسؤولية ولا حق زواج ؟ العمر ماله شغل بنات اعمارهم 19-20 مستمرين في زواجهم وبنات اعمارهم فوق ال30 عقولهم صغيره ومب قد المسؤولية كل وحده وحياتها وظروفها يعني الواحد ببدايه الزواج اكيد بيكون رومنسي وحنون وطيب مو على طول يشد ويحبسها ويكلمها بطريقة مو كويسه ويحرمها او شي من هالقبيل انا قلت اول شهر اكيد بحسسها انها عروس ومن هالكلام وبعدين اذا شفتها تتصرف كذا ذيك الساعه الواحد يثقل عليها ويتغير ويشد معاها يقولكم المثل تمسكن تمسكن حتى تتمكن يعني لي شفت البنت تبدأ تجري ورايا وحبتني وشافت انها الحياة معايا حلوه وحياتها في البيت ماتنطاق اهني انا اقدر اتحكم فيها وذيك الساعه ماتقدر تطلب الطلاق لانها صار عندها بيت وزوج حنون كيف تتركه بسهوله وتروح عند امها ولي رجعت عندها مطلقه راح تعيش حياة قاسيه أكثر من اول ؟ لا تخافون انا الحين صارت الكره في ملعبي عشان كذا انا من الأول كله لين معاها وحنون ورومنسي الحين بتغير عليها |
رد: البنت صارحتني بكل شي وانا الان متضايق جدا
لاتتزوجها الله يهديك
لماذا تتحمل مسؤولية اصلاحها هي أولى بنفسها أتركها و اسأل الله أن يرزقك الزوجة الصالحة بكرا لو يكون عندك مشكل معها ولاواحد راح يوقف معاك يقولون لك كنت تعرف وقبلت أترك عنك المشاكل والانسان يتزوج ليرتاح لا ليزيد رأسه تعبا انا لوكنت مكانك مافكرت واذا سئلت لماذا تراجعت قل لم اجد فيها ما اريد أو لم نتفاهم و إذا ألزمت فقل مافيها ليش تخاف أنت رجل وتخاف؟!! لعله ليس خوف لكن فيك طيبة لكن في الاقبال على الزواج مافي طيبة و لا تضحية انما التضحية تكون بعد الزواج اما قبل اذا كشف لك الله أمور لا ترضاها فاحمد ربك و اترك |
رد: البنت صارحتني بكل شي وانا الان متضايق جدا
اقتباس:
|
رد: البنت صارحتني بكل شي وانا الان متضايق جدا
اقتباس:
بس ترجع المهر وخل تبشر بالطلاق بس انا ابيها تحس وتتصل وذيك الساعه بتصرف معاها تصرف ثاني بنات هالوقت مايعجبهم العجب لو جاهم رجال زين لعبوا فيه وذا جاهم رجال موب زين قالوا الرجال مامنهم امان ويلعبون ومايخافون على خواتهم ويجون يلعبون ببنات الناس لان بنات هالوقت كل شي يبغونه على مزاجهم ولكن هيهات ماعاش اللي يمشيني على مزاجه خلها تجلس ببيت أهلها واللي مب قد المسؤولية لاتتزوج لاتتزوج لاتتزوج لان الزواج مب لعبة والبنت موب كل يوم بيجيها رجال زين كل اللي قاعد اسويه حاليا عشان اخليها تعرف النعمه اللي تبي ترفسها هي وأمها حسبي الله عليهم |
رد: البنت صارحتني بكل شي وانا الان متضايق جدا
اقتباس:
أقول يا لحبيب ترى هذا زواج يعني بيت وأسرة ومسئولية مش ملعب كوره اليوم زواج وعرس وبكره طلاق ومحكمة الموضوع أولا وأخيرا ليس لعبة أو هو لعبة لكنها خطيرة ونتائجها لا تستهين بها نصيحتي لك من البداية لا تبني علاقتك معها على أحتمالات واوهام لأن الأوهام لن تبني لك بالضرورة بيت سعيد وعلاقة قوية ولن تجلب لك راحة البال ولا الاستقرار |
رد: البنت صارحتني بكل شي وانا الان متضايق جدا
اقتباس:
انا اعرف ان الزواج مب لعبه ولكن هالكلام المفروض اهمه يعرفون إن الرجال يوم تزوج أكيد أكيد يبي بيت واستقرار ومسؤولية ولكن انا مثل مايعاملوني انا بعاملهم نفس المعاملة يعني لاتقنعني اني قررت أتزوج وجهزت المهر والشقه و و و و للزواج وآخر شي اروح المحكمه برجلي وقولهم ابي اطلق لعبه مستحيل اي رجال يفكر كذا سبحان الله ربك خلا العصمه بيد الرجال لأن الرجل يفكر بعقله موبعاطفته والحرمه مزاجها متقلب لكن عموما انا قاعد اقولك اني راح احسسهم بالبدايه كذا وماراح اتصل بس لان لو رحت المحكمه وطلقتها راح اخسر كل شي انا ابيها هيا اللي تطلب الطلاق وفوق هذا تعطيني المهر كله انا محترم نفسي معاهم بس طالما يعاملوني هالمعامله انا راح اعاملهم تعامل ثاني لنفترض تزوجت واستمريت لمده سنه او سنتين او 5 سنين او حتى 30 سنه يعني هل في شي يمنع الطلاق ؟ ماتدري الواحد وين نصيبه الزواج مو صك ملكية خلاص طالما تزوجت البنت يعني بتظل معاك حتى الموت !! ناس تطلقوا بعد شهر وناس تطلقوا بعد سنه وناس تطلقوا بعد 5 سنين وناس تطلقوا بعد 10 سنين وهكذا انا شللي يضمن اذا طلقت وتزوجت مره ثالثه يمكن الاقي وحده راعية خرابيط وسوالف لان مستحيل وحده بكر وبنت ناس توافق على واحد مطلق مرتين او 3 او 4 أو 5 يعني مو كل يوم انا بتزوج وموكل يوم بيكون معاي مبلغ للزواج مو كل يوم بعرس وموكل يوم بلاقي بنت بتوافق علي عرفت الحين شنو اقصد انا كل اللي بسويه فقط ماراح اتصل ولي اتصلوا انا راح اتصرف تصرف ثاني ان شفتهم مايبغون قلتلهم رجعولي المهر عشان لايقولون هذا ميت علينا ولا مايقدر يستغني عنه خلهم يشوفوني اني متغير ذيك الساعه ماراح تتجرأ وتقول أبي الطلاق ولو طلبت راح تضيع ولو ماطلبت ماراح تستقر من هالزواج عشان مره ثانيه لاتخدعون ولد الناس وتخلونه يتزوج بنتكم وتالي تقولون نبي الطلاق وآخر شي يقولون مافي رجال يبغى زواج لان تفكير البنات كل الرجال يلعبون ومب قد المسؤولية وهمه عكس ذلك لي جاهم هالرجال زين لعبوا فيه استغفرالله |
رد: البنت صارحتني بكل شي وانا الان متضايق جدا
اعذرني أخوي لكني أحملك جزء من المسؤلية بخصوص سؤالك عن البنت قبل ارتباطك بها .. خصوصا أنها من قرايبك لو مافيه قرابة ممكن .. مثلاً : طبايع أمها ممكن تعرف جزء كبير منه سواءً من أمك أو أحدى عماتك أو خالاتك وكذلك أخلاق البنت وحالة بيتهم بتتضح ولو بنسبة بسيطة بسؤال أكثر من شخص
والان مالك إلا تستخير رب العباد والله يكتب لك الخيرة |
رد: البنت صارحتني بكل شي وانا الان متضايق جدا
اقتباس:
لأن اهلي بالنهايه يبون يفرحون فيني مومعقوله يزوجوني بنت عشان اطلقها ؟ انتوا ليش تحسبون ان الرجال لهالدرجه يطلق ؟ رجال تزوج وطلق بعد 3 سنين تزوج وطلق وبعد 4 سنين تزوج وطلق وبعد سنتين تزوج وطلق يعني متى هالرجال يستقر ؟ يحسبون الرجال كل يوم عنده فلوس عشان يتزوج ؟ يحسبون الرجال لعبه متى مابغوه ومتى ماخلعوه ومتى ماعافوه عافوه ؟ الظاهر بنات هالوقت يبغون رجال ملاك ومن الفضاء عشان يرتاحون ويستقرون وياخذون اللي محتاجينه الله لايبلانا صج زمن أقشر الواحد من بعد هالزواج يجلس وحيد من غير زواج انا ماني مستعد أتزوج عشان اطلق وكل يوم والثاني بطلق ؟ انا ابي اتزوج عشان استقررررررررررررررررررررر موكل يوم اطلق واطلق واطلق ؟ معناتها مالي نصيب في هالدنيا خلاص عوع من الزواج |
رد: البنت صارحتني بكل شي وانا الان متضايق جدا
شكرا أختي الغالية على هدا الموضوع
|
رد: البنت صارحتني بكل شي وانا الان متضايق جدا
حاليا هي مشتته بين ابوها وامها اتزوج عليها يمكن ان علاجها زوج صالح يمكن تكون في جواتها انسانه طيبه وبتدعي ربها بالزوج الصالح وفي الاخير انت مانت خاسر شي اتزوج واتكل على الله والشيشة ماهي حجة ابدا لانها عادة وراح تتركها وبعدين المفروض ان اول ماجابت سيرة الشيشة ترفض الموضوع على طول مش تجاملها الاشياء هذي محتاجة شوية حزم وخلاص ياخوي اتوكل على الله زوجتك مافيها عيب ولاهي مفتضحة وبعدين موضوعك كلة بيتكلم عن اهلها والبنت مافيها شي
|
رد: البنت صارحتني بكل شي وانا الان متضايق جدا
هل مكلت عليها يعني كتب كتاب ؟؟ ام فقط خطبه ؟؟
ودام انها مغصوبه ...وانها تنظر لمصلحتها ... فاظن تركها اسهل بكثير من ان تبقيها على ذمتك ... مغصوبه ... وتشتيش .. وتريد وتسمح لك ان تذهب وتروح عشان تاخذ راحتها .... يعني اعترفت ..الافضل ان تبقى في بيت امها عشان ما تاخذ رحتها ...الله يهديها ويهدي امها .. الافضل ان تتركها ...لا تدخل نفسك وتتحمل مسوليات فوق طاقتك انت من حقك ان تختار زوجه صالحه وتعيش وتربي ابناءك ... وهذا هو الصح ... استخير الله على تركها ... وهي ما راح تضيع راح ترجع لبيت امها ... وابها راح يزوجها اللي ترتاح له ..والله يهديها |
رد: البنت صارحتني بكل شي وانا الان متضايق جدا
غالبا بكره ما راح تذكر انك اويتها من اهلها ..
راح تذكر انها مغصوبه لك .. |
رد: البنت صارحتني بكل شي وانا الان متضايق جدا
اقتباس:
البنت اللي موب قد الزواج لاتتزوج وتورط ولد الناس لأن غالبا الرجال لي حب يعرس ويتزوج بنت الحلال مايبي يظلم شريكة حياته اما بعض البنات الله يهداهم تستمر معاها فترة وبعدين تقولك مغصوبه او مثلا كانت تحب واحد وماصار نصيب معاها ف قالت خل اتزوج اي رجال يجينا من الباب وانسى حبيبي وتقولون بعدين كل الرجال يلعبون وموب قد المسؤولية الله يهدي بنات هالوقت |
رد: البنت صارحتني بكل شي وانا الان متضايق جدا
اقتباس:
|
رد: البنت صارحتني بكل شي وانا الان متضايق جدا
لا تبني حياتك على يمكن ولو...
أنت خارج من تجربة سابقة.. يعني أختيارك المفروض يكون مدروس من جميع النواحي.. مع أحترامي لها ( تشرب شيشة ) إذاً لا تصلح أن تكون زوجة لي وأم لأطفالي.. ولا يغرك الكلام اللي يقول موضة وخرابيط بنات.. يعني بتكون مشغولة في جلسات وصاحبات وغير متفرغة لك ولبيتك.. الشيشة ( كيف ) والكيف يحتاجه الراس كل يوم.. وإذا ما جاتك البنت متعدله من بيت أهلها ما راح تقدر تغيرها وبتتعب معاها.. أبحث جيداً عن الزوجة الصالحة اللي تقدر الحياة وتعبها وربي بيعينك إن شاء الله.. لا تجامل أحد على حساب حياتك وراحتك.. اللي يزعل يجي يوم ويرضى.. وهذا زواج قسمة ونصيب الله يرزقك الزوجة الصالحة بالتوفيق |
رد: البنت صارحتني بكل شي وانا الان متضايق جدا
اقتباس:
اعطاكِ الله عقل أكبر من عمركِ ، وردودكِ لا تبين ان عمركِ 22 سنة عكس بعض البنات ردودهم الله يهديهم كأنها بنت عمرها 11 سنة . اخي الحبيب صاحب الموضوع ، من اكبر نعم الله على الانسان يكشف له حقيقة الطرف الثاني قبل فوات الأوان ، فشكر ربك على نعمة كشف حقيقتها فلو اكتشفت هذه الاشياء بعد الزواج والحمل ستكون طامتك اكبر وصدمتك خانقة ربما تكرهك بأي بنت في الدنيا. انت تقول يا اخي الحبيب انك تريدها الان بعد ان اكتشفت هذه الامور حتى لا تصبح بين العائلتين خلافات وفضائح ولن تعيش معها بسعادة وستبقى كالعزابي ، وتخاف بعد الزواج تنصدم بأشياء ثانية ، لأن الثقة بها انعدمت. هل هذا زواج ؟ هل ستعيش بسعادة مع زوجة تحس ان اهلها غشوك بها ؟ هل بعد اكتشاف الغش اواصل على الموضوع ابناء وبعدها اطلق؟ هل هذا عقل ؟ تتزوج امراة وتعيش معها مشتت ؟ لن تستطيع الجلوس معها في البيت وستكون حياتك مع ربعك وطلعاتك وسهراتك وستكره البيت وانفاس البيت والمراة التي في البيت وستقول مستقبلاً لو اعيش طول عمري اعزب افضل من ان اعيش مع امراة كهذه ، ولكن ماذا؟ بعد الانجاب وفوات الاوان. انجو بنفسك من الان ولا تتأخر في هذه العلاقة وتخلص بسرعة حتى تتأثر نفسياً من صالح الاسراع في الطلاق . لست مسؤول عن تصرفات امها ولا تبالي بأمها زعلت ولا في ستين داهية ومثل ما غشتكم فعليها تحمل المسؤولية ، فلتزعين مليون زعل فهي المذنبة. |
رد: البنت صارحتني بكل شي وانا الان متضايق جدا
لاتصلح زوجه
اتركها وربي يعوضك خير |
رد: البنت صارحتني بكل شي وانا الان متضايق جدا
مانعرف ظروفك و ظروفها
الله العالم يمكن بعد الزواج تتغير للأفضل لكن أنت أستخير و لا تستعجل بأي قرار تاخذه أصبر أستخير و أدعي شوف وش بيصير معك الله يـكتبلك إللي فيه الخير |
رد: البنت صارحتني بكل شي وانا الان متضايق جدا
انا انبذ الشيشه الحمدلله الذي عافنا مما ابتلا به كثيرا مما خلق
لي قصة مع الشيشة واول مره اعرف ان فيه حريم تشيش كنت في جدة قبل 18 سنه في اول زواجي ورحت عند ناس حضر كانو كرماء ومحترميين والله وكانت فيه جمعة حريم ونادوني رحت لهم كان فيه مجلسين مقابله لبعض واحد دخلنا فيه والثاني اشوف الشيش مركزه فيه استغفرالله العظيم واعوذ بالله من الشيطان الرجيم خفت ليكون بيجون الرجال والمجلسين قريبه من بعض والحرمه تجهز الشيش سئلت اللي في جنبي قلت لها وش يبون يجيبون الرجال للمجلس المقابل قالت هذا مو للرجال هذا للحريم وهو سالف عندهم الحريم تشيش انا جاني رجفان وخوف كنت اطالع الساعه وحاولت اعتذر وطلعت من عندهم ومعد دخلت لهم رغم انهم مقد ضروني بشئ والله يسامحني اذا اخطيت في حقهم المره الثانية قبل حوالي 5 سنوات رحنا جازان تمشية نبغى فرسان اول ما فتح مرسى الاحلام دخلنا العصر والمكان هادي وحلو اذن المغرب وصلينا وطلعنا نبغى نجلس الا المكان مليان اوادم بشكل فضيع ومعضمهم حريم والعامل يحط عند كل طاوله شيشتين او ثلاث الا اشوف الحريم تشيش وعيالي معي قالي طليقي ها ودك على وحده تبغي تفاح او فروله وهو يتريق استغفرالله والله ان طلعنا ومعد دخلنا هذاك المكان نهائي مدة جلستنا في جازان اخي الكريم اذا تبي تتزوجها عالجها من ادمان الشيشة لانها مضره لها وكمان مضره عليها بعد الزواج اذا تبي الحمل واولا واخيرا استخير وشوف الخيره وين والله يسهل لك دربك |
رد: البنت صارحتني بكل شي وانا الان متضايق جدا
نصيحه لك اخي العزيز .
هذا زواج مو لعب اطفال ! والزواج استقرار وراحه واذا تزوجتها وهي مو كفو ولاقد المسؤوليه وجابت لك طفل او طفلين وطلقتها بتبلش زياده وفوق همك همين وبيكون 2 طلاق لك لا فيه اطفال هم الضحيه الجديده فكر فكر زين لاتظلم نفسك في ذا الزواج اللي معروفه نهايته .. وبكره اذا انجيت بنت بتصير تشيش مع امها بعد فكر في نفسك وفي عيال المستقبل والله يوفقك يارب |
رد: البنت صارحتني بكل شي وانا الان متضايق جدا
-
لانعلم مافي الغيب والهادي هو الله لعلك تتزوجها وربي يهديها ضروف البنت صعبه جداً جعلت منها انسانه ضائعه اب يحشش وام قاسيه واخ عديم المسؤليه اتوقع البنت تحتاج الئ توجيهه ( الله يهديها ) وبالاخر هي بني ادم تخطى وتصيب اضافه الا انها في سن المراهقه عموما استخر الله فالله وحده يعلم اين الخيره لك الله يفرج همك وهما حتى هي كسرت خاطري |
رد: البنت صارحتني بكل شي وانا الان متضايق جدا
الغريب انها صارحتك
عارفه انه كلامها محسوب عليها وضدها ومع ذلك فتحت لك قلبها |
رد: البنت صارحتني بكل شي وانا الان متضايق جدا
غلبتك النخوة
الزواج ماهو مغامرة بكرة بتطلع مشكلة أكبر وأنت للآن مو عارف شخصيتها ولا عارف كل حكاياتها مو شرط حكت لك عن كل مساوئ حياتها وماخبت عنك شيء كبير يكفي إللي اظهرته دل على أنها لا تصلح بإمكانك الفرار من الآن مايستدعي أنك تحافظ على الصورة التي اخذوها عليك مقابل جحيم حياتك |
رد: البنت صارحتني بكل شي وانا الان متضايق جدا
لو العلاقة صداقة قلنا اصبر وربما تكون سبب اصلاح و...
لكن العلاقة زواج..ارتباط..شراكة حياة..وربما اطفال في المستقبل.. برأيي الموضوع لايتحمل المغامرة.. |
رد: البنت صارحتني بكل شي وانا الان متضايق جدا
هذا زواج
ومن القواعد المعروفة أسرياً في الإسلام هي اختيار الزوجة الصالحة.. أنت لست مسؤول عن خطأ والديها لتصححه هم عليهم تحمل هذا الخطأ وكذلك هي نفسها عليها أن تربي نفسها بنفسها إن وجدت أسرتها في بيئة غير مناسبة أنت عليك أن تأمر بالعروف و تنهى عن المنكر بيدك فإن لم تستطع فبلسانك فإن لم تستطع فبقلبك فذلك أضعف الإيمان.. |
رد: البنت صارحتني بكل شي وانا الان متضايق جدا
لا تصلح للزواج
انا عشت بين والدين مطلقين و في ظروف صعبه ما راح اتكلم عن الشيشة بس شوف اسلوبها ماهي متعلقه فيك تقول روح سافر تمشى !! و الله كنت اجن بدون زوجي تعلقت فيه جدا لأن اعتبرته امي و ابوي و اما هي اظن مخليتك مفتاح للوناسة و الصديقات و تهرب من واقعها و فعلا بعدين بتقولك مغصوبة مغصوبة ما احبك >>> ما شاءءءءء الله كان من بدري بلا هبالة ماهي انسانه مبدأها الزواج و الاستقرار و بعدين ايش اخليها حق فراش و بس استغفر ربك و احرص على الزوجه الصالحه الزواج سكن و رحمه |
رد: البنت صارحتني بكل شي وانا الان متضايق جدا
أنت تخاف على بنت خالتك من الضياع اذا طلقتها ..
لذلك تنتظر وتخفي عنها امور من المفترض من البداية تكون واضح معها حتى لا تتعب بعدين .. وبنتظارك هذا تريد ان تعرف هل سوف تغير من حالها حتى تتم الزواج !! والجميل فيك انك لم تستعجل في الزواج من البداية ..والجميل كذلك لا تريد ضياع بنت خالتك .. والله يهديها ويرزقك الزوجة الصالحه اللي تعوضك عن زواجك الاول .. |
| الساعة الآن 12:38 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©