|
خطيبي وكيف اتعامل معه
السلام عليكم ورحمة الله وبركاته
الشهر عليكم مبارك fdgrg ابدخل بالموضوع .. خطيبي انسان طيب وخلوق و خجول بعد والححمدلله وبعد يمكن وحيد له فتره 3 سنين بالغربه لحاله .. المهم .. انو هو اقترح ان تكون مكالمته معي اسبوعيه ... طبعا ماقدرت ارفض كاني ميته عليه .. الشي الثاني طول الاسبوع يكلمني واتس يسولف معي كاني صديقه .. مره يحرجني ومره احرجه ومره يقول كلام مافهمه ويقول مو لازم ويصرف وانا عارفه انه يلمح على شي .. بس انه اذا كنا رومنسيين يخرب الوضع بمزحه المهم مره وانا اكلممه قال انا اتعب من المكالمه >من كثر ما تكلمني ترها مره بالاسبوع المهم قلت خلاص يلا باي رفض يسكر ومره بالواتس قال انا عيوني تعورني من الجوال انتي ما تتعبين المهم مشيت الموضوع عادي وقلت ريح عيونك ويلا باي وقبل يومين واحنا نسولف عادي ونمزح قال انا زعلات ويلا باي بروح الدوام وماراح اكلمك الا بكره >هنا انا عصبت خير على كيفه .. بدون سبب المهم خليته جا بكره صبح علي .. رديت يبي يسولف ماعطيته وجه وجا ثانيه ولا عطيته وجه واليوم المفروض يكلمني ولا كلمني لان لي من امس ما ارد على كلامه الا بفيسات لانه قهرني اسلوبه ..حسسني اني مضايقته .. حتى لين دقيت عليه يقول هاه وش عندك بمزح بس خير يقهر .. انا قررت اني ما اكلمه ولا احاكيه واخليه ولو دق ما ارد بس مدري كيف اعلمه عن اسلوبه معي وغلطته... وعلى فكره الحين يمكن لي شهر مملكه صح يقول حبيبتي وقلبي بس ما احس اني فعلا حبيبته احيانا افكر انه كذا اسلوبه واحيانا اقول يمكن مايعرف يتعامل مع البنت بس مدري هو طيب ومزحه احيانا ثقيل وشغله كثير بس انا خطيبته لا يحسسني بكذا اني ثقيله انا والله ما ادق عليه تخيلو الا لما قال انه تعبان دقيت عليه وقال هاه وش عندك صح كان يقولها باستهبل بس اول مره ادق قهرني .. كيف اتعامل معه انا لي يومين ما كلمته واليوم ما كلمني ولا كلمته ولا حتى دق انا ماراح ادق ولا اكلمه بس كيف اوصل له انه هو حسسني باني ثقيله عليه وانا ما ارتاح مع احد يحسسني بهالاحساس محد مجبور .. اقترحاتكم لان ماعندي خبره في هالموضوع ولا اقدر احكي لاحد مدري انا مكبره الموضوع ولا معي حق .. انا اشوف المخطوبين حولي 24 ساعه مع بعض انا اتحمل مزحه ونرفزته واستهباله ولا اعصب ولا ازعل بس خلاص طفشت انا ابي احس بمكانتي عنده وسحب علي مير hgh ولاحظو ان كلامنا اغلبه واتس واذا كلمني فون للحين استحي لان مكالماتنا قليله .. jytt |
رد: خطيبي وكيف اتعامل معه
اهلاا وعليكم السلام..
مبارك علينا وعليك بالخير والبركة.. والف مبروك الملكة... '' اما عن الشب الحلو.. شكله متعبك.. طيب بسألك اول.. هو لما يكلمك.. يعرف يتكلم رومنسيه وكلامه كثير او قليل؟ هل لما تكونوا تتكلمون واتس.. بالساعات او اقل؟ هل تكونين مبادره بالرسايل له؟ وهو كيف يراسلك بالبدايه؟ .. بعدهااا اقولك' |
رد: خطيبي وكيف اتعامل معه
المراسلة في الواتسب او غيرها ما تكشف لك انطباع الشخص الي قدامك
ممكن تكشف لك حوالي 60 ٪ كذا عشان كذا هوني الموضوع و قولي له ترا انت تحسسني اني اثقل عليك و كذا و كذا و قولي له الي بقلبك و انتي لا تدققين كثير في المراسلة ترا بعض الشباب يحب الاستهبال كثير موفقه |
رد: خطيبي وكيف اتعامل معه
والله لما اتذكر مواضيعي مع زوجي ايام الملكة أقعد أضحك .. باقي قدامك مشوار حبيبتي..
الله يتمم لكم على خير... |
رد: خطيبي وكيف اتعامل معه
شكله خطيبك بخيل أجل واتس ها ومكالمة مرة بالأسبوع كويس ما قالك نزلي برنامج لاين عشان نتكلم بلوووشي 😅😅
حبيبة قلبي لما يكلمك مرة ثانية قوليله أنا سوالف ع الواتس ما أعرف أقول ولا أحب أكتب إذا تبغى تطمن علي رقمي مسيف عندك وبالمرة اعملي نفسك بطيئة في الكتابة عشان يعاف الواتس معاك 😅 .. مو شرط 24 ساعة يجلس ع السماعة ساعة يوميا ماراح تخرب بروجرامه ! بعدين الواتس ينفع للسوالف مع الأهل والصديقات مو خطيبك اللي لسه بتستكشفيه ! غيير كذا الكتابة عمرها ماتوصل الإحساس ولا توصل الشيء بالطريقة الصحيحة مهما إستخدمتي إيموجي .. أحيانا أكلم حد ع الواتس وأكتب كلمة وانفهم غلط مع إنه لو قلتها له كلاميا ماراح يزعل هالشخص لأن نبرة الصوووت لها دور كبييير 😊 بما إنكم توكم مملكين فأعيدي ترتيب البروجرام اللي هو حاطه لكم، لا تضيعي هالفترة في مكالمة مرة في الأسبوع وطقطقة ع الواتساب ..! ما أقولك الواتس لا بس مو هو وسيلة تواصلكم الأساس .. 😊 وإذا هوو ساكن بنفس المدينة خليه يزورك أسبوعيا عشااان تتعرفي عليه أكثر .. وخليك نبيهة وحاولي تعرفي أطباعه وتدرسي شخصيته لا تضيعي فترة الملكة بس في كلام فاضي يتبخر من الصباحية 😅 ما أقولك خليك ثقيلة دم لا .. كوني ذكية ساعة دلع وحب وساعة جد 😘 بالتوفيق .. |
رد: خطيبي وكيف اتعامل معه
اقتباس:
لما يكلمني فون لا مافيه رومنسيه نادر ماذكر اصلا اما كلام عادي ايه نسولف ساعتين او ثلاث بالواتس كل يوم دايم حتى بالدوام يكلمني واتس وعلى فكره دوامه طويل حتى باليل عنده دوام المبادره انا قليل اروح اكلمه لاني ادري انه بالدوام ومدري متى يفضى اما اوقات اللي اعرف انه طلع عادي ابادر بس هو اغلب كيف عادي يدخل ويسال او مزح نفس العاده وهذا الغالب (انا ارسل رساله نصيه رساله شعر او غزل او تصبيحه في هذي انا اللي ابادر دايم ومايجيني رد منه ) الا اذا كانت تصبيحه لان احيانا اذا كلمته واتس وهو بالدوام مايرد الا لين طلع وجا ينوم يجي يقول تصبحين على خير ولا يرد على كلامي بس سالفة مكالمات ماعرفه الا بالاسبوع مره مااحس باهتمام لان اغلب كلامه عن اشياء عاديه واول مكالمه قال انه مو راعي واتس ولا مكالمات jytt ملاحظه * هو يقول انتي بالواتس غير المكالمه يعني بالواتس جريئه وبالمكالمات استحي >>>>احس طبيعي دام ما تعودت عليه حتى هو مو جريىء |
رد: خطيبي وكيف اتعامل معه
اقتباس:
اقتباس:
فكرت اقوله .. اللي ببالي بس انا مابي اهتمام مصطنع ابي من نفسه يعرف او طريقه ما تبين اني اطلب هالشي لاني احسه يحس بضغط لو اطلب يكلمني فون دايم مع اني ما قد طلبت ولا لمحت |
رد: خطيبي وكيف اتعامل معه
اقتباس:
ما احس انه بخيل لانه ما يقصر والله بجرب بس هو عنده الرجال يكتم مشاعره مدري من علمهم هالحركات لانه مره قالها وادري انه يغليني من اشياء يسويها بس ما قد اعترف لي .. انا معد كلمته واتس كلمني ولا اخذت وعطيت بس ارسلت رساله نصيه عشان يدري ان السالفه مو زعل بس مابي واتس افكر اصارحه بس انا ما احب طلب الاهتمام اكره شي عندي لاني ادري بتعوف نفسي هالاهتمام مدري كيف ابين له ان هالشي ما يكفي عشان نتعرف على بعض بجرب طريقتك بدون ما اتاخر بالرد لانه جربني وانتهى بمسألة الواتس |
رد: خطيبي وكيف اتعامل معه
اقتباس:
ههههههههههه ياشيخه الله يستر بس المشكله دايم يقول الله يعينك علي عشانه مو رومنسي مدري ليه كذا .. الله يسخره لي بس و الله يوفقك ويسعدك و يسخر لك زوجك |
رد: خطيبي وكيف اتعامل معه
عادي صارحيه اخبطيها بوجهه مثل الطابوقه ههههههههههههه
قولي له بالواتس انت ليه ماتحب تكلمني وعددي له المرات اللي يصرفك فيها وان هذا اللي فهمتيه وبطبيعة الحال الزوج بفترة الملكة دائماً يتقبل الملاحظات ويكون هادئ بعد الزواج راوغي باحترافيه ووضحي اللي يضايقك اما الآن اشوف الافضل تصارحينه |
رد: خطيبي وكيف اتعامل معه
اقتباس:
يحس اني ازعل على اشياء مالها داعي يعني اتحسر على نفسي لما اشوف المخطوبات حولي يدق عليها اكثر من مره باليوم غير الواتس .. يلا الحمدلله على كل حال بس |
رد: خطيبي وكيف اتعامل معه
طيب هو كم عمره...؟ و الثلاث سنين.. خارج السعوديه؟
|
رد: خطيبي وكيف اتعامل معه
اقتباس:
لا في السعوديه بس ماعنده احد هناك |
رد: خطيبي وكيف اتعامل معه
..
اهلااا بك.. اعتقد اني فهمت بعض الجوانب عنده.. تقريباا نفس تصرفات صديق لي.. شوفي ابقولك اشياء.. اذا هي فيه. اكيد انه ما يكلمك كثير عن ماضيه و عن حياته.. يعطيك بس رؤوس اقلام.. اللي مثل كذا.. هذا طبيعته غامض يعني ماتعرفين وش يحس دايماا يكون على مود واحد.. مزح وضحك و مشغول يتجنب الكلام العميق.. و يطلع منه بطريقه لطيفه.. بدون ما يسبب لك جرح... . ما يرفض لك طلب. صح.. خدمه او حاجه تبيهاا؟ حسيتي هالاشياء فيه؟ |
رد: خطيبي وكيف اتعامل معه
اقتباس:
|
رد: خطيبي وكيف اتعامل معه
الله يتمم مابينكم على خير
اطلعي على المفضلة بالرابط http://www.66n.com/forums/showthread.php?t=259760 حبيت أفيدك بمفضلة المقبلين على الزواج رح تفيدك كثييير فيها اغلب تجارب الأعضاء والعضوات فترة الملكه من جميع النواحي |
رد: خطيبي وكيف اتعامل معه
مبروووووك حبيبتي الله يتمملك علي خيرررر ❤
يمكن طبيعه خطيبك يحب المزح فلما يقولك خير شعند لاتزعلي قولي مشتاقه اسمع صوتك ابي اطمن عليك .. لاتاخذيها بزعل عشان مايحط بياله انك زعووله واذا صار الشي اللي لازم تزعلي مايهتم .. اذا حسيتي انه جاف بمشاعره لينيها باسلوبك ودلعك معاه اجباري تطلع منه .. يعني لما يحكيك فووون قوليله اشتقتلك .. فقدتك مع انه ماشالله دايم يحكيك مايمديك تفقديه 😊 ماشالله .. . اما من ناحيه انه ممكن يكون بخيل لانه مايحكي فووون لامانوقع بعضهم يستحي او يكون ساكن مع اصحابه بنفس السكن فصعبه يكلمك قدامهم ... الشي الثاني مافي احسن من المصارحه .. اللي بخاطرك قوليه باسلوووب حلوووو مو جفاسه نفي كلامتك وقليله هالشي يضايقني وبخاطري نحكي عنه وانشالله ماهو مقصر .. الله يسسسسخره لك يارب 🎀 |
رد: خطيبي وكيف اتعامل معه
اقتباس:
طيب خليني اسألك بعد.. هل فيه مشاكل عنده؟ ماليه عائليه؟ وش مجال عمله.. هل فيه اختلاط..؟ و هل عمره سافر برا؟ وين يقضي وقته اذا برى الدوام؟ هل يتكلم انجليزي؟ ...... وبعدهااا رح اقولك...... |
رد: خطيبي وكيف اتعامل معه
اقتباس:
وظيفته شوؤن موظفين في شركه ماحكى انه قد سافر بس عنده جواز بالبيت اغلب وقته انجليزي مو مره علمني jytt |
رد: خطيبي وكيف اتعامل معه
اقتباس:
|
رد: خطيبي وكيف اتعامل معه
اقتباس:
الله يسعدك وين ماكنتي كلامك يجنن |
رد: خطيبي وكيف اتعامل معه
..اهلاا بك..
والله شوفي.. هذا شخصيته قد ماهي بسيطه بالظاهر لكنها معقده.. يعني يبي لك وزنيه معينه.. و امورك تمشي مثل العسل.. اللي مثل كذا غالباا.. ما هو بسهوله يكون صداقه او علاقه.. وبعد ماهو بسهوله يغضب و يتاثر.. يعني اول شي احب اطمنك.. ان الأشخاص اللي مثل كذا.. من اروع الشخصيات.. تلقينه طيب حيل و قليل كلام مع الاخرين وخدوم.. و عايش حياته مع اهله ونفسه.. يعني الحياه عنده اشياء بسيطه.. وحياته كلها مبادئ دايما يكون قليل اصدقاء.. لان اصدقائه غالبا قديمين معه.. ومو اي شخص يقبل صداقته.. او يتكلم معه.. يعني هو من النوع اللي يؤثر ولا يتأثر.. شخصيه قويه.. وكل اللي قلته تعطيك مفهوم لشخصيته من ناحية العلاقة. صعب عليه يمثل عليك.. او يدعي.. لان اللي مثل كذا غالبا ما يكذبون.. يعني اذا ماكنتي فاهمه شخصيته بتتعبين معه.. .. لكن هو واضح بباخذها بينه وبين نفسه.. من ناحية صداقه.. يعني بالنسبه له صعب يقول احبك فجأه.. ولو قالها. بيكون بضحك ومزح.. بياخذ ويعطي معك على فترات.. يشوف شخصيتك.. وهو رح يتقبلك وش ماكنتي.. لكن لو تبي توصلي معه لمراحل عميقه بالعلاقه.. ف يبي لك.. وقت طويل.. وحاليا لا تزعلين او ترسلين اي شي فيه نوع من عتب او شكوى.. بالعكس خذي الامور ببساطه واول ماتشوفيه.. تكلمي معه عادي .. غزل بمزح.. ولناااا حديث بعدين |
رد: خطيبي وكيف اتعامل معه
اقتباس:
بس انا حابه اعرف كيف افهمه اني ابي اعرفه اكثر وافهمه .. انا ابي اوصل له .. دايم يقول ويردظ هي فترة تعارف وماراح نعرف بعض الامع العشره ويمكن اللي بينا تمثيل .. طيب لازم يكون بينا مكالمات عشان نعرف بعض مو واتس بس .. ماشي على نظام ان هالفتره مو تعارف مدري ليش .. حتى ماعرفت تفكيره في اشياء كثيره ابي اعرف رايه عنها .. وكيف تفكيره .. مع ان قريبتي تملكت من فتره وصلو لمرحله احنا ما وصلناها عرفو بعض صح ماشاءالله تبارك الله وانا كل شي مدري .. ماكاني متملكه ولي شهر .. مابي اتفاجأء بعد الزواج ابي اعرفه.. وش الاسلوب اللي ينفع معه |
رد: خطيبي وكيف اتعامل معه
طيب حلو..
نفس ما قلت لك.. ما يحب يمثل.. و هذا الشيء الصح.. مع ان اغلب الشباب كلهم يمثلون و البنات يمثلون.. و بثاني يوم.. كلهم احبك و حبيبي.. وانتي اجمل شي.. للاسف انتي نوعك كذا وهو مو هذا نوعه.. طيب لسؤالك كيف افهمه و كيف الأسلوب الافضل معه.. بقولك.. مالك الا نفس المدخل اللي هو طلبه واللي قلته لك.. ' هذي فتره تعارف '.. معناها.. اول شي.. لا تقارنين نفسك بالثانيين... زي قريبتك هذي.. هذولا حبوا بعض بسرعه و رح يزعلون بسرعه ويتهاوشون بسرعه.. وو و حتى له هو.. لا تذكري له بتاتا.. موضوع المقارنات.. نهائي.. لأنه اكيد مايحب يقارن بأحد.. هو شخص ما يحب المظاهر.. فاغلب الأشياء اللي بنظرك مهمه.. كالعلاقه والمكالمات و الترتيبات و رأيه.. بنظره اشياء اقل اهميه.. لانه بيسويهاا بدون ما يقولك.. امر منتهي منه. صراحه مثل ماقلت لك يبي لك صبر و فتره طويله حتى تقوي العلاقه معه.. مو بسهوله. ' يعني لازم تعيدي تهيئة نفسك من جديد.. النوعيه هذي.. يحب الفتاه الذكية.. و الغامضه.. وقويه الشخصية.. و ما اعتقد انها متوفره بك كلهاا.. ف اولا اسلوبك.. هو اللي يعطيك هالاشياء هذي.. يعني... ' ارسلي له.. رسائل حكم.. و عن مبادئ.. كلها صور.. واتس.. و ابتعدي عن وينك.. كيفك.. وش تسوي.. حاجات ممله.. خلي صورة العرض شي مبهج.. ورده ابتسامة طفل.. ولا تغيري كثير.. الحالة.. خليها كلمتين انجليزي.. Me&u Forever او حكمة لها معنى.. عن الحياة. حتى لو انجليزي.. خليك مميزه بنظره. و مثلاا.. لما تتصلي عليه.. ولاتستحي من المبادره ع فترات.. اذا مارد عادي.. لايكون لك هم.. مو معناها شي.. الا انه مو فاضي.. واذا رد.. تكلمي بدلع خفيف.. '' مثلاا قولي له ووينك... مع ضحكه.. يعني لازم تخلينا ندق عليك عشان نسمع هالصوت.... اكيد بيقولك مشغول و يتعذر.. فانتي قولي لا والله روحي.. بس بغيت اسمع قبل لا انام.. ' خلي مكالمااتك بسيطه.. و بنفس الوقت استخدمي كلمات دخليها بنص الكلام.. مثل.. لا والله قلبي تدري اني ... ياروحي ما كنت.. وفي اساليب كثيره.. بس مو طول الوقت تبينه عندك.. ويكلمك ويراسلك.. هذي مع الوقت.. تقربك منه اكثر.. و يحبك اكثر.. يعني لاتحاولي تصيري تقليديه.. خليك مميزه بنظره.. اعطيه هديه.. مميزه.. اذا شافك.. خليك ذوق و اتيكيت.. ' و ان شاء الله اكون افدتك.. تعبت وانا اكتب.. هذا يبي له مجلد.. |
رد: خطيبي وكيف اتعامل معه
اقتباس:
هو بمدينه ثانيه التقرب منه صعب يعني وسيلتي معه مو اتصال لا بس (واتس ) .. حتى لو حز شي بخاطري مايفكر يناقش او يسال يسكت ويزعل انا ليه زعلت الا عشان انا ماعرف هو وش يبي اذا قربت بعد واذا بعدت يقول تغيرتي واذا زعلت وعلمته اني زعلانه يزعل ويقول حساسه واذا زعلتي مني لا تعلمني انك زعلانه خليك عادي .. وانا بعد طبيعي اتخذ موقف من اللي يجيني .. ما انكر هو طيب وحنون وانا متعلقه فيه مره بس اكره لما احس اني راميه نفسي على احد حتى لو احبه انسحب انا كنت معه مرره بس مثل ماقلت حسسني اني ثقيله صح بمزح بس اكثر من مره هالمزحه .. انا بعد يحق لي اعرفه و " ويعرفني " و عنده هو مستحيل يكون غلطان غير اني زعلانه يبيني انا اراضيه .. انا بعد ماعرف اراضي شخص ماغلطت عليه ! ارسلت رساله و صبحت عليه .. ولا رد .. اكثر من كذا انا مقدر اسوي معه .. ولا الي بكل مره يزعلني فيها انا اللي اراضيه انا ماكنت احط حدود وليه انا اراضيه واقوله كذا وهو لا وعادي بس لانه مارد فوق زعلي والشعور البغيض اللي حسيته مايرد علي! ليه انا اللي اراعي وهو ما يراعي ! انا ماطلبت رومنسيه منه وحتى اني اكلمه ماطلبت ماطلبت ولا شي انا اكره اطلب .. انا اشكي هنا لاني ما اقدر اطلب منه هالشي اذا ماجت من نفسه اعوف هالشي .. ولا اقدر اشكي لاحد اعرفه مااحب ولا احب احد يتعاطف معي .. هنا محد يعرفني بس شكيت هنا ممكن احد يعرف كيف اتعامل معه انا مابي احس اني معه مجرد لفضاوته واذا زعلت عادي ماهمه .. هالاحساس يبعدني عنه وانا ماودي .. هو مو اي احد الحين ممكن اقول اي كلام في بالي بكيفه يزعل او يرضى او حتى يبعد هو صار زوجي وبالمستقبل بنعيش مع بعض ان شاءالله ان ماراعاني وراعيته لمين بيكون هالشي |
رد: خطيبي وكيف اتعامل معه
..
اهلااا.. كنت ابكتب لك اول.. بس ماكان عندي وقت انشغلت.. .. يعني حاليا اعتقد يمكن فهمتي اكثر من ناحيته.. لأن اول شي.. لازم تفهمين ان اغلب البنات متشابهات بالطبع و الافكار.. لأن اسلوب التنشئة واحد.. والاماكن اللي تستقي منها ثقافتها.. بالصداقة او العلاقة ايا كان.. المصادر تقريباا متشابهه.. بيت تلفزبون يوتيوب دراسة جامعة.. صديقات.. والعادات.. ولأن البنات سريعات الثأثير على البنات.. فالنتيجة تطلع نموذج واحد.. باختلافات بسيطه.. لكن بالمقارنة مع الشباب.. فالفرق شاسع جداا.. اصلا نادر تلقي نماذج متشابهه.. بسبب الاحتكاك بكل مكان.. بيت.. شارع.. اصدقاء.. اقارب.. دراسة.. عمل.. انترنت.. سفر.. احتكاك بالاجانب.. علاقات.. يحتك بكل انواع البشر.. بكل شي.. حسب اهتماماته تتولد شخصيته.. فالمعنى من هذا كله.. ان عقل الشاب متوسع و مزدحم باشيا كثيره.. اذا عندك فكره وحده فانتي تسوي لها استنساخ لعشر مرات .. اما فهو تطري عليه عشر افكار.. بنفس الوقت .. بكل شي.. طيب انا قلت لك المقدمه هذي حتى تفهمي عقليه الشباب.. وانه كل منظورك للحياه مختلف عنه.. اللي يزعلك.. هو.. مايشوفها حاجه تزعل.. و قيسي عليها.. .. انا اتكلم لك لأني عاشرت بهالحياه كل الانواع.. فهمتهم و عرفتهم.. و النتيجه اصدقائي معدودين على رؤوس الاصابع.. لكن عن مليون صاحب. و الناس عندي بطبيعتهم.. مثل موجة الراديو.. مشوش الى ما تلقي الموجه الصحيحه لهم.. انا حاليا ابيك توسعين ادراكك.. حتى تفهمي بعض الاشيا اللي لو تمر عليك يكون عندك خلفيه.. لاني شفت من كلامك في اخطاء عندك.. اول شي.. قلت لك الشخصيه هذي تعيش على المبادئ.. يعني ما يتوقع ان يصدر منه خطأ ولو اخطأ بشي واضح راح يعتذر لك بدون طلب.. اغلب الأشياء اللي تبي تعرفيها عنه او عن رأيه باشياء.. قلت لك ما يعتبرها مهمه. لأنه بيسويها لك بدون ما تطلبين.. الواتس اب.. هو اكثر ما يسبب المشاكل.. لأن الكلام ممكن ينفهم على اكثر من معنى. لازم تضيفي فيس حتى يتوضح ما تعنينه.. ف' المفروض.. تعملي مثل ما قلت لك.. غيري من اسلوبك. ' بدايه بالعرض و الحالة.. و بدون ما تقضين وقت طويل بالدردشه.. لانك لما ترسلي له صباح و كيف الحال. وبعض الاشياء اللي تستلزم رد منه.. و مايرد.. تضايقين انتي.. وهو بنفسه عادي عنده يرد.. لكن يخاف.. يدري انك بتطولين بالسوالف بعدها وهو حسب ظروفه يمكن مشغول مو فاضي مو رايق.. ف' يفضل عدم الرد.. عشان كذا تجنباا لهالمشكله.. كنت اقولك.. ترسلي اشياء لا تستلزم الرد.. مثل صوره ادعيه حكم مقطع خفيف... او رساله منك ماهي على صيغة سؤال. أشياء رومنسيه.. مممم مثل اكتب له.. ' تدري يا... انك الشخص الوحيد بهالعالم.. اللي حبيته قبل لا اشوفه. ..' كأنك تسولفين على حالك احيانا.. مثل.. ' انا كل يوم قبل لا انام.. ما اقول الا الله لا يحرمني من حضنك.. ' قل امين .. و اتركي الجوال... هذي لها مفعول السحر. ف'بهالشكل.. راح تتواصلين معه.. و هو ما رح يحس بأي ضغط او مسؤلية من ناحية الوقت تجاهك. ورح يخف الضغط عليه.. و راح هو يجيك.. ورح يشتاق لك اكثر من ماتتخيلين.. بعكس لما تكون كل يوم زعل و نفسيه وو.. اتركي التقليد.. و التطنيش.. و الزعل.. خلي من نفسك مرحه.. مستقله.. فيه غموض.. مو كل شي عن حياتك تقوليه.. خليك على جوه.. ضحك بمزح برومنسيه.. .. نعست الحين... جربي هالاشيا و ردي لي... بعدين... ** تحياااتي.. |
رد: خطيبي وكيف اتعامل معه
اقتباس:
ماشاءالله تبارك الله عليك👍👍👍 مفيييييد كلامك الله ينفع به |
رد: خطيبي وكيف اتعامل معه
اقتباس:
انا تاركته براحته ولا احب افرض نفسي على احد .. بس اللي ماتعرفونه ان المشاعر تموت اذا ما لقت من يحتويها .. واذا ما ماتت تبرد وايش الفايده من اني اعبر عن مشاعري لشخص مدري هو بايش يفكر ومدري انا وش اعني له واحنا تونا نعرف بعض ! حتى ما حكينا بالحب حتى اقدر اكتب له حضنك استحي ماوصلنا لهالمرحله احنا بفترة تعارف اذا ضل بعيد كيف راح اعرفه واحس براحه وامان وافهمه واتقرب منه وامون عليه ! مثل ما البنت تراعي الرجال المفروض يراعي حاجتها بهالفتره على الاقل بانها تعرف هي من تملكت عليه من تزوجت من خذت وكيف راح تكون حياتهم .. 😁 اذا تعارفنا شي مو مهم وش المهم اجل وشوله فترة الملكه ! انا من النوع اذا مالقيت تجاوب اسحب نفسي ولا احط نفسي بموقف غبي (اكلم نفسي ) او كلامي ما يكون له رد وانا ادري انه فاضي مو مشغول .. .. وبعدها يجي يلومني ويعاتب .. لاني ما اسأل حتى انا احس بالضغط .. وزاد الضغط بتهربه واني لازم ابلع اللي يسويه وابلع زعلي منه وامثل شي مو انا .. انا مو زعوله والله بالعكس جدا بس انه يسفهني و ما يرد علي معليش .. يعني اقلها يقول انا مشغول ماراح اشغله. ادري انه انسان طيب الحمدلله بس والله ما اعرفه زين و والله انا تعلقت فيه واحنا ما بينا تواصل 24 ساعه ولا بينا لقاء ولا مكالمات .. حتى اسأله عاديه ان سالوني عنه ردي يكون (مدري) >طبيعي ! الله يسامحه .. انا ماعاد لي حماس لهزواج لان مدري وش داخله عليه لا تقضيت ولا استعديت لا نفسيا ولا جسدينا غير ضغط دوامي و بعض الامور و التفكير باني بابعد عن اهلي .. وبالحالتين لا اللي لمته و صارحته ولا افكر اصلا ولا اللي قدرت اشتكي لاحد لاني مابي الكلام يزيد فوق راسي انا جد مضغوطه ما تكلمت الا هنا .. |
رد: خطيبي وكيف اتعامل معه
طيب عيني بسألك...
الحين لكم تقولين... شهر مملكين.. ' كان في تلبيسه.؟ و هل حدد متى العرس؟ هل دفع المهر لك. ؟ كيف تمت الخطوبه. من اللى دله عليكم.. عن طريق أهله خواته. ؟ طيب الفتره هذي اليومين اللي راحوا كيف الوضع.. متواصلين.؟ |
رد: خطيبي وكيف اتعامل معه
اقتباس:
لا مابعد تم تحديد يوم العرس نعم دفع المهر من قريبه لهم شافتني و ذكرتني لهم وهم اتصلو علينا وتعرفنا عليه قبل اهله تواصل اليومين اللي راحو خفيف جدا و مو مثل اول |
رد: خطيبي وكيف اتعامل معه
واضح جدا انك انسانة حساسة واذا بقيتي
علي هاالوضع راح تتعبي في حياتك بعد الزواج وتذكري كلامي اذا تبين تعيشين سعيدة خففي الحساسية شوي |
رد: خطيبي وكيف اتعامل معه
اقتباس:
اولااا.. اجوبه حلوه جدا ومطمئنه.. لكن كمدخل لكلامي هذا... احب اقولك ان ماعندك مشكلة اصلاا.. و كل كلامي اللي فات يعني حاولت ابين لك شخصيته .. و بعض الأشياء اللي تحسن من الوضع. يعني في اشياء كثيره ما تكلمت فيها .. لكن بحاول اذكر كل ما يخطر ببالي.. .. انا سالتك اسأله كثيره.. انا و انا هنا بمكاني فهمت له.. و انتي يلزمك بعد فهمه.. لكن تابعي معي....... ... يعني قبل ما ادخل بعمق.. انتي لازم تفهمين انك بطور التغيير حاليااا .. يوم عن يوم تتغيرين.. افكارك كل يوم تتبدل و تتطور مع التجارب.. و هذا واقع. بينما لما تكلمت لك عنه قلت لك انه شخص مستقل بشخصية قويه.. انسان فاهم للحياه و متشبع تجارب وعاطفه اكيد... يعني وصل لمرحلة ' نضج فكري. و ابقولك أشياء اكيد انك حسيتيهاا فيه... اول شي.. واضح لك انه مستقل برأيه.. يعني انتي كان همك تشاركينه بالرأي.. و انا وضحت لك كيف يفكر .. وهذي بنظري شي ايجابي.. يعني مع الوقت تثقي انه مو اي شخص يقدر يخليه يغير رايه.. الشي الثاني.. مو مراهق و لا فيه تصرفات مراهقه و طفوليه... هو على العكس.. حتى انه ينتقد تصرفاتك.. وهذا شي كان واضح.. مفروض تكوني اكثر ثقه و ذكاء و تسيطري على احاسيسك.. ووضحت لك اول. الشي الثالث.. قلت لك هذا ناضج عاطفيا.. مو معناها شبعان علاقات.. لا بالعكس.. هو عنده ثقه بنفسه تخليه ما يحتاج احد عاطفياا.. كشخصيه اتكلم. يعني ما عمره اتكلم عن ذاته او انجازاته او الاحداث اللي مرت عليه.. لان بطبيعته فيه شعور انه ما يحتاج احد.. حتى يهتم فيه. و يمكن هذا اتكلمتي عنه انه عاش وحيد او طفولته.. يعني هالنقطه مهمه.... لازم تستوعبيهاا ** و فيه شي بعد.. خليه رابع.. يعني عنده مجال الحياه من خيارات و قرارات واحتياجات مفتوح على مصراعيه.. اوضح لك... انا اول قلت لك غامض.. لكن اكيد حسيتي ان عنده صراعات و تناقضات يعني مو من السهل انه يقول هذا صحيح.. و هذا خطأ.. حتى بالاشياء اللي تكون من احتياجاتك.. و تبغي منه تأكيد.. يجاوبك.. ب' يمكن. او مدري. .. طيب.. انا تكلمت لك الحين عنه واللي اعتقد انهااا فيه.. لاني مابي اكثر نصايح عليك.. فواضح انك متفهمه.. لكن بس اشياء بسيطه كانت تنقصك.. .. و نكمل بعدين..... تحياتي... * |
رد: خطيبي وكيف اتعامل معه
بالمختصر يا اخت حبق
لاتشغلين نفسك بهالموضوع واضح ان زوجك من الناس اللي يمشون على نظام لاتدلعها وقت الملكة وخلك ثقيل وبس وهالنوعية كثيرة جداً وانا ضد هالاسلوب اقترب من شريك حياتك وافهمه ماراح يهز في رجولتك شي ولا راح تضعف شخصيتك لأنك ابديت اهتمامك انا اشوف تكلمينه وتسألينه وش الوضع انت تتضايق من مكالمتي لك لو اتصل على احد اسلم عليه يقولي خير وش عندك قلت سلامتك وامسح رقمه من جوالي فما بالك بزوجك وبفترة الملكة بعد واضح انه متأثر بسياسة اثقل ولاتكلمها كثير |
رد: خطيبي وكيف اتعامل معه
اقتباس:
حتى اذا بينت اهتمامي احس يستثقل هالشي مدري بس يوضح عليه.. انا هنا وش دوري معه هو وش يفكر بالزواج بس تامين اكل وشرب وعيال !! العاطفه عنده مالها دور وشي سخيف ! كيف الحل معه ؟ |
رد: خطيبي وكيف اتعامل معه
اقتباس:
لما قالها كان يمزح ويضحك لان بوقتها اصلا كنا ع الواتس انا ماشلت بخاطري عليه انا بس تمنيت يستقبل اول مكالمه لي له بشي افضل jytt ادري فيه امور كثير تشغله ولا اساله عنها لين هو يتكلم هو والله مو مقصر بشي ابد الحمدلله بالعكس يضغط على نفسه حتى يرضيني لكن اني احسه معي .. قليل ما اقول معدوم لكن قليل يعني ماتقاربنا عاطفيا الا شي بسيط ابي اتعود عليه مابي استحي منه يعني الواتس ما استحي بس اذا كلمني استحي ولا بينا زيارات بحكم انه بمدينه ثانيه . حتى مدري وش يفكر من ناحيتي |
رد: خطيبي وكيف اتعامل معه
اقتباس:
لو عندك حل علمني كيف انا ماحب حساسيتي .. مع اني احس الموضوع مو مجرد حساسيه اكثر من اني ابي اتقرب لشخص مشغول ولا اعرف كيف ولا اقدر اتقرب لاني انثى مابي ابادر .. مستقبل مجهول |
رد: خطيبي وكيف اتعامل معه
اقتباس:
بالعكس انتي مرتبطه بانسان رائع.. ونادر مثله.. مشكلتك حساسه زياده و تبي اهتمام اكثر من جانبه.. بس. صدقيني فيه انواع سيئة جداا.. لكن انتي محظوظه بارتباطك مع شخص مثل كذاا.. ما اقولك الكلام هذاا من عبث.. هذا راح يبين معك مع الوقت وو وتذكري كلامي. . من اول كتاباتي لك.. قلت لك.. يبي لك وقت طويل و صبر. شوفي.. في قاعده فيزيائية.. عن الماده.. ' المادة التي تكتسب الحرارة ببطء تفقدها ببطء و العكس.. هذا ينطبق عليه.. لانه هو يطبق هالمبدأ. ف' لازم انتي تتكيفين مع الوضع... تسلحي بالصبر و الهدوء و اهداف طويلة الامد.. اللي بينكم راح يكون عمر.. ف'خلي لك خطط واهداف.. و نفذيها شوي شوي.. مع الوقت راح تجيب لك نتيجة.. ترى نوعيته مو صعبه.. بالعكس مجرد ماتدخلين عالمه.. رح تكوني أسعد انسانه.. الحلول كثيره والله... بس يبي لك جرأه.. و لا تعتقدين ان الجرأة غلط بالعكس.. خليك جريئة معه.. وخليك انتي المبادره.. مافيها شي.. بالبداية سوي مقدمااات.. مثل ماقلت لك اول.. حتى لو واتس.. ارسلي له مقاطع زي الانستجرام عشر ثواني او خمس طعش.. قصيره.. حب وعزل وشعر.. صور.. حكم.. شي طريف خفيف.. كل ييوم اعملي.. عااادي لو مايرد.. وحتى شيلي لك اخر ظهور.. حتى ماتشوفي متى اخر مره متصل.. لانها تسبب لك حزه بالخاطر.. ماعليك شيليه رح تعودين... شوفي هالاشياء هذي رح تحسن من احساسك... هو راح يتابعها و يتابعهاا ويشوفهاا.. و يفكر بك.. و مع الوقت تتعلق اشياء كثيره بتفكيره. راح تتولد عنده العاطفه.. تلقائيا.. بدون من تطلبيها منه ولا تكوون مصطنعه.. .. يمكن في تقصير من عنده بهالجانب.. وهذا واضح.. لكن موجوده فيه.. مع الوقت راح تظهر لك تدريجي.. مو صعب. '' بس يبي لك وقت. ' حااااولي... |
رد: خطيبي وكيف اتعامل معه
اقتباس:
مايعدم العلاقة بين الزوجين الا المكابر انتي بادري بتمنع كيف اذا قطع الوصل ارسلي رسالة عتب بسيطة بحروفها ومختصرة ونحن معشر الرجال نعرف انا عتاب المراة حب ولايخفى عليك ان العتاب صابون القلوب ومو كل ماقطع الوصل ترسلين لا مرة كذا ومرة كذ يعني حب بدلع وتمنع انتي في هالطريقة تخلينة يتعلق فيك ..وعسى يوفقكم يارب ويسخرة لك |
رد: خطيبي وكيف اتعامل معه
اقتباس:
بس جد اليوم صدمني مره لاني راح انتقل معه لمدينه ثانيه يقول زيارة الاهل بس بالاعياد !!!!!! والله لو اننا بقريح .. بنفس البلد بس منطقه ثانيه للامانه انا انصدمت وانا مستحيل اقدر ابعد عن اهلي .. هذا حرمان وقطاعه انا ما ارضى فيها .. وكلها ساعه من هنا لهنا بالطياره .! ليه التعقيد !! مدري كيف اتصرف معه والله انصدمت ما توقعتها منه وخفت منه بعد هذا اولها وهو عارف علاقتي باهلي ولا ماعندي احد هناك وهو طول وقته بالدوام !! لازم يعرف اني مقدر ابعد عن اهلي كل هالمده مو معقوله الرجال قد ايش انانيين.. |
رد: خطيبي وكيف اتعامل معه
اقتباس:
وان شاءالله ربي يقدرني والله يلين قلبه ويسخره |
| الساعة الآن 07:11 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©