منتدى عالم الأسرة والمجتمع - مُعدد.. ويبغى يوم راحة !!!

منتدى عالم الأسرة والمجتمع (http://www.66n.com/forums/index.php)

- المتزوجين (http://www.66n.com/forums/forumdisplay.php?f=6)

- - مُعدد.. ويبغى يوم راحة !!! (http://www.66n.com/forums/showthread.php?t=258665)

مُعدد.. ويبغى يوم راحة !!!

تعبني والله ..
قبل ساعه كنت ابكي .. تذكرت زين ابيها لما بكت وتمنت تموت وووو ولما عرفنا السبب شفنا انه ردة فعلها أقوى من الموقف .. انا الان ردت فعلي أقوى من الموقف هذا اللي يقوله لي عقلي ...
بس مدري ليه انا زعلانه .. مو زعلانه وبس والله مقهوره وتعبانه ...
انا بختصر السالفه وإذا في اي استفسار بكمل التفاصيل مع الردود ..
زوجي يقول يبغى يوم راحه له ؟ ويقول قصده مو راحه قصده يوم يقضي اموره فيه .. مع العلم انه بيومي يمر الوقت طبيعي يعني زي يوم الجمعه هذي وداني البحر .. وجاب كم شغله ابغاها بعدين من ثمنيه لعشره تابع مباراة بعدين اخبار بعدين من اللاب للجوال للأخبار يتنقل وانا عنده خلصت كم شغله بالبيت وهو يتابع المباراة اجيب له عصيرات وشوكولاتات وكذا .. وشوي على ايبادي اتفرج مسلسلي .. واتعشينا بعدين رجع ع اللاب يتفرج على طيارات وصواريخ اجنبيه وثعابين وخرابيط ماتناسبني لكن اجامله وجلست اتفرج معاه من وحده الين 3 ونص .. لما جا وقت النوم قال انا السبت والأحد بكون ببيتي هذاك علشان يصير أدمج هذي اليومين مع بعض لك ولهم .. قلت تمام ... بعدين قلت طيب يصير كل سبت واحد عندهم !! قال لا عندي يوم راحه بالاسبوع لا عندك ولا عندها .. افكره يمزح بس طلع من جده..
ياجماعه ..
قلت له مو من حقك تتخذ قرار يخصني انا وانت بدون ما تاخذ رايي..
قال اتخذت القرار وخلاص
قلت ماني مضطره أنفذ كلامك.. انا حره كمان بنفسي وقراراتي.. خذ راحه مني الى ماشاء الله .. دامك قبل يومين كنت تقولي انتي راحتي .. والان بترتاح مني .. قال مو راحه بخلص اشغال .. قلت مانعتك انت عمدي تمارس حريتك بدون ما اعيقك عن اي شي ..
فين اللي يقول امتي صديقتي وحبيبتي .. فين كلامك اني سعادتك..
قال وانتي كل هذي الأشياء بس خلاص انا قلت اللي عندي وترا تعبان بنام تجي تنامي ؟
قلت شكرًا ماني نايمه نام وارتاح وهذا جزات اللي تدور راحتك وسعادتك بالاخير انا ولاشي .. انا مجرد عبده عليها السمع والطاعه ..
راح بعدين رجع لي وقال ما يهون عليا انام وانتي زعلانه هيا تعالي انا عازمك عندي وما صار شي ترى لا تكبري الامور..
رحت وبكيت وقال هاه ترى ما أحب الدموع وكتمتها بنفسي لما نام طلعت وجلست ابكي وكلمت امي حكيتها اول شي قالت غريبه بعدين قالت اقولك بلا وجع قلب بلا هم الحريم خلوا الرجال يرتاح منكم يوم زوجك رجال ومو مقصر معاك خليه على راحته ..
الموهم يومها نمت 10 ونص الصباح وصحيت 11 ونص .. تعبانه وفيني صداع الدنيا وسويت الغدا وانحرق من كثر اني مو مركزه ...
قريب العصر جا باس جبيني وجلس بعدين عني قلي حبي ايش فيك ميت عندك احد ؟
قلت مافيني شي انا ممنوع علي أناقش او اتكلم بس أنفذ مجبره وخلاص
قال لا اتكلمي انا بسمعك
قلت علشان تصرخ وتقول خلاص قفلي السيره
قال لا بسمعك
قلت لسا مصمم ع يوم الإجازه ؟
سكت قال كملي ما برد عليك
قلت انا اللي قاهرني ومتعبني مو يوم الإجازه ولا انه نقص من أيامي معاك يوم
انا اللي مزعلني اني أسعى على راحتك وهمي رضاك بالاخير بترتاح مني
قال مو برتاح عندي اشغال
قلت اي اشغال ولا لايكون بتعاكس من ورايا وانا مدري
ضحك وقال لاحول ولا قوة الا بالله
قلت له مو من حقك هاليوم انا ما أقيد حريتك بيومي وبعدين مافي رجال يسويها بس لانك مغرور وتحب نفسك .. خلاص ضحك اهلي عليا انك بترتاح مني..
ما رد..
حصلت تفاصيل بس جالسه احاول اختصر قد ما اقدر واللي جالسه اكتبه جالسه اكتب بصدق عني وعنه علشان توقفوا مع الحق .. مو معايا .. ولا معاه.
قال لي جيبي ملاعق حطيها مع الاكل علشان يوديها للعمال
قلت ضيعتها خلاص مو لازم
قال اجر
قلت يكفي الأجر بصبري عليك
قال ياااا ولد وقام يتريق علي
بالسياره طلبت منه كابتشينو لاني مصدعه وطلبت عصيرات باخذها معايا .. وعند باب بيت اهلي مسكت يده وقلت له ممكن اقول شي
قال لا
قلت نص دقيقه خساره فيا ؟
قال قولي
قلت: انا بجلس ببيت اهلي فترة ما انت ترتاح مني .. ومتى ما حسيت اني راحتك تعال خذني .. بس لاتنسى موعدي بالمستشفى الربوع
قال : مين قال انك مو راحتي ؟
قلت القصد لما ينلغي يوم إجازتك مني وقتها تعال خذني ..
سكت ونزلت
هذا الكلام المغرب
الساعه وحده بالليل ولأول مره بحياته يعاتبني من لما تزوجته ماعمره كتب لي كلام ع الواتس طويل وعتاب بالعكس حظرني اول لما عاتبت
كاتب انه هو مجروح وزعلان واني سببت له احباط وكرهته حياته واتعبتيني تفكير وحيره وتوهان لمتى بصبر على طريقتك ومشكله من لاشئ وكلام زي كذا وكتب الله يسامحك بس املي انه الوضع يتغير وترى للصبر حدود
قلت له اني ما سويت شي وانه انت تدور راحتك وانا حققت طلبك لكن تأكد اني انا كمان مجروحه ومصدومه منك
قال تصبحي على خير بس والله انا تعبان مرا
سكت شوي ما رديت
بعدين كتبت له اني احبه وانه الحياة بدونه مو حلوه واني هذا انا أتنازل عن قراري علشانك لانه ما يهون عليا تعبك وبرجع معاك متى ما جيتني.. وخلي يوم الإجازه عيشه براحتك في حب اكثر من كذا ؟ انا كتبت له هذا الكلام بس اختصرته
امس رجعت معاه البيت بس احسه طفشان وتعبان حتى قال لي ترى انتي وزوجتي الثانيه اخس من بعض قلت له انت ما تفهمني قال أرجوك افهمي نفسك اول وريحيني انا ما ابغى نقاش ترى بمخي الف شغله
كان عنده عزيمه راح لها ووداني عند صاحبتي واعدتها العصر لاني كنت محتاجه اخرج وأغير جو ولما جا أخذني ... كلمته برواقه وحب وقال انه تعبان وطفشان وعرضت عليه انه يوم إجازته يخلص شغله وياخذني من عند اهلي ان كان يومه او يروح لزوجته ان كان يومها
رفض يتناقش بالموضوع مع العلم انه اليوم عنده مباراة وتبث ببيته الاول وراح يروح هناك يشوفها ..
من ضمن كلامه قال:
انا احبك والله وقلبي وروحي وعقلي يعشقونك
انا تعبان وطفشان وان سألته ايش فيك افتح لي قلبك يسكت بعدين يقول تطمني مو انتي السبب
قلت كيف اقدر أساعدك طيب
قال تهجدي الشيطان اللي براسك وجلس يضحك
قال الحمدلله انك بحياتي والله من غيرك مدري كيف راح اكمل حياتي..
ياناس يكلمني بشوق بحب وبلهفه ويقول لي انتي تغيرتي كثير عن اول وكل مرا راح تكوني احلا أنثى بنظري ..
يقول ماعشت الحب الا معاك...

طيب ليش يعذبني ؟
ليش مابيننا نقاش اذا قرر خلاص قرر؟
انا مو قادره أتقبل طريقته بفرض رأيه ... طيب انا أساسا تعبانه من الحمل وبنص السابع الان وودي اجلس عند امي ايام زياده عادي بس مو بالغصب .. انا ما ابغى أزعل بس مو عارفه كيف أتقبل الوضع..
خاصموني.. قولوا لي اني مكبرة الموضوع .. هدوني شويا ،.. من اليوم استغفر وابكي وأكلم النونو اللي ببطني .. يا ناس اقوله بعد كم يوم في شي حلو تعرفه ؟
قال لا
قلت معقول ما انت فاكر؟
قال يوم ملكتنا ؟
قلت ايوا
قال تجاهليه ما كانك تعرفيه..
وانا مجهزه بحتفل فيه .. كنت بحتفل بيوم زواجي بعد شهر بس اكون بالثامن وماليا خلق .. الان يالله يالله ماشيه الحمدلله بس ..
لكن بحتفل وبتجاهل كلامه مو يوم الملكه ايش رأيكم ؟!

ياناس هو طيب وانا والله حبيته بس صعب .. فيه جفا.. مدري كيف اشرح لكم
اليوم اقوله لما تزعل ليه ما تقرب لي
قال انا ابغى اقرب لك وتكوني معايا بس ممكن ما يظهر علي انه في قبول لك وانا بقلبي العكس وراح تفهمي غلط وتصير مشكله واضطر اجلس بعيد وساكت

تعبانه والله اكتب من الجوال ويدي تألمني لي نص ساعه اكتب

كونوا معايا زي كل مرا
خلوني اكون قوية واقوى من هموم الحياة

كيف اتعاااامل مع يومه الإجازه

بعيش بقلب قوي ... او اقول بعيش بدون قلب كيف ؟!

انا ما يمديني ارجع اقرأ اللي كتبته وأتمنى انه ما يكون في اخطاء من الصداع والعجله بالكتابه ..