اكتشفت أمورا عن زوجي .. كيف أتصرف ؟
 

السلام عليكم ورحمة الله

في البدايه انا متزوجه من 7شهور تقريبا ، من رجل والنعم فيه طيب ومايقصر في حقي ابدا
عمره 26 كان يدرس في الخارج لمدة 7 سنوات ، تقدم لي واستخرت كنت جدا مرتاحه لكن حصل خلافات مع خواتي مايبوني ارتبط فيه بسبب غربته وان الرجال عنده ماضي ، انا ما انكرت كلامهم لكن كان عندي حسن ظن بالله كبير ان مثل مايقولون ماضي وما اقدم على الزواج الا وهو فاتح صفحه جديده .
تملكنا وكلمنا بعض ومع الايام صار يفتح معي مواضيع علاقاته مع البنات احسنت النيه قلت يمكن بيعلمني عن ماضيه وسوابقه علشان يكون معي صريح من البدايه وحتى هو كان يقولي انا اسولف معك علشان اصارحك بكل شي ، مره سالني بالملكه قالي وشي الاشياء اذا شفتيها فيني ماتصبرين علي ، علمته ان الصلاة والبنات والدخان والشيشه وعلمته ان هذي الامور من البدايه قبل لا ادخل عليك اذا كان فيك شي من هذولي عدلهم ، وتزوجنا وكان يروح لاستراحه حقت الشباب وكان مفتون فيها بشكل مو طبيعي كنت اتضايق جدا منها لانه يتاثر سريع بحوالينه ومع الايام صار يجيني وريحته شيشه سالته ريحتك شيشه وش السالفه يقولي هذولا الشباب ومن هنا بدت خلافاتنا انا اكره ريحتها ومابيه يروح لهم وهو رافض وجهة نظري مع الايام بدا الشك يدخلني انه هو يشيش واجهته وانكر وزعل علي ردة فعله شككتني اكثر واكثر ، مع الايام عجزت اصبر كلمت اخوه يكلمه وكلمه اخوه مافيه اي فائده صح وكان بعد مقصر جدا بالصلاة يصلي لكن ولا فرض بالمسجد وياخرها زعل علي ليه اكلم اخوه ، اخوه رجال كبير وعاقل ، واكتشفت فيه انه عنييييييد وغيور اكثر ما اقدر اوصفه فيه انه (طفل) اي شي اقوله لازم يعاندني حاولت بجميع الاساليب والطرق والغيره ذبحني مايبيني اكلم احد ولا اجيب طاري حتى ابوي لما اسولف عنهم يجلس يسب ويرمي كلام عليهم ، بعد 4شهور رحت بيت اهلي زعلانه تمادى كثير علي ، علمت امه بكل شي سواه واخوه نفس الشي بعد ماكملت اسبوع مسكوه وكلموه ورجعني ،للعلم اهلي دخلت وطلعت مافتحت معهم اي موضوع يخصني كنت اتعذر اني بذتكر عندهم وبس ، رجعت له نفس اطباعه ماغيرها بس بزياده صرت اشم الشيشه وكل ماسالته وين رايح يقولي المقهى مع الشباب اقوله لازم ترتقي عن هذي الاماكن يقولي انا ما اقدر اغصب الشباب هم يبون يشيشون ومااقدر امشيهم على كيفي ، جواله يخليني افتحه عادي لكن يمكن من شهر ماعاد يبيني اقرب من عنده وهو فاتحه ولا شي ،قبل يومين كان نايم وفتحت جواله وفتحت الواتس لقيته مكلم كذا بنت وفتحت محادثه خويه اللي يطلع معه دائما وتاكدت انه هو اللي يشيش وواحد من عيال عمه سافر هو وياه اول مارحت لبيت اهلي زعلانه ويوم فتحت محادثتهم لقيتهم رايحين اماكن مو مضبوطه والرجال مرسله صورة شراب ، انا ضاقت فيني الدنيا ماعاد ادري وش اسوي جلست ساكته كل هاليومين ولا رديت عليه ولا كلمته وهو مستغرب وش فيني وليه ساكته ، دلووني على الحل انا سمعت ان الرجال لايصااارح وابي حل معه ، اليوم يقولي اذا بتستمرين على سكوتك روحي عند اهلك لين تتعدلين وتعالي مره ثانيه .

تم تغيير العنوان

رد : حل سريع ارجووكم
 

وقفيه عند حده ...
شراب و شيشة و زعلانه و سافر وأماكن مو مضبوطة .،. و لو صارحتيه ما شي فايده ... لااااااا زم تأخذين موقف قوي وحازم و ترتبين افكارج معاه و مع هالحياة...موفقه

رد : حل سريع ارجووكم
 

للاسف تعود منك ترجعين ويقولها لك صريحه روحي تعدلي وتعالي


بلغي اهلك بكل شي واتخذي موقف قوي ..

وبالتوفيق .

رد : حل سريع ارجووكم
 

مايصلي كويس
شيشه
يكلم بنات
علاقات سابقة
يشرب


اش باقي
سؤال ترضين هذي تكون مواصفات ابو ابنائك؟؟؟؟
انتبهي لاتحملي

وردة فعلك تجاه صراحته سلبية جدا
لو منك افسخ الخطوبة فورا
لانه لو تاب صدق كان ستر نفسه
بس هو يبي يجس نبض
وا تاح لردة فعلك


نصيحه بلغي اهلك وخذي بشورهم

رد : اكتشفت أمورا عن زوجي .. كيف أتصرف ؟
 

الوقفات الي لازم تتخذيها من زوجك ، تكون حازمه زي ماقالو الاخوات
بس هالوقفات مو علي سفاسف الامور ، زي الشيشه ، والاستراحه ،
تروحي لااهلك وتعلميهم ، وماترجعي له بحال الصلاة والسفريات والشراب وكلام البنات
اما الشيشه. والاستراحه هاذي بيدك انتي وذكائك وصبرك تغيريها
هذا هو تعود علي روحت بيت اهلك وتبلد وماعنده مانع تروحي مره ثانيه
وبيجي يوم يقول لك ، اعلي مابخيلك اركبيه
لاتكثري حساب علي زوجك وتطهقيه حياته ، الزمن تغير والشباب تغيرو
والشيشه الي شايفتها مصيبه صارت منتشره وعاديه هي والاستراحات بين الشباب
اجلسي معه وقوليله الي راح كوم ، والي بقوله لك ياابن الناس الحين كوم ثاني
بنات ، سفريات ، شرب ، تقصير بالصلاه وكل شي بخاطرك بهالامور قوليها
رتبي افكارك وكلامك وخلك واثقه وانتي تتكلمي معه ان الباطل ماينسكت عنه
وقبل لاتكبري السالفه وتروحي بيت اهلك اجلسي معه وحاوريه وحاولي تغيريه
واذا فشلت محاولاتك بيت اهلك موجود معززه مكرمه فيه ولااحد يلومك وقتها انك ماحاولتي ع الاقل
لعل الله يجعل هدايته علي يدك

رد : حل سريع ارجووكم
 

انا ابي طريقه للمصارحه مابي اغلط

اهلي مابي ادخلهم بالموضوع ابدا
لا الحمل ماافكر ابدا

رد : اكتشفت أمورا عن زوجي .. كيف أتصرف ؟
 

يعطيك العافيه على ردك
انا ابي طريقه اصارحه فيها لانه مايعرف اني فاتحه جواله واذا كلمته بيسالني كيف عرفت وتاكدت

رد : اكتشفت أمورا عن زوجي .. كيف أتصرف ؟
 

أعذريني، بس هاذي مو إسمها صراحة هاذي وقاحة اللي يحكي لخطيبته عن بطولاته وسواد وجهه هذا مستحيل يكون تاب ..
أدبيـه عن هالنقطة لا تخلينه يجيب سيرة أهلك بالناقص ..! خذي موقف أقشر وأعطيه درس ماينساه، والله لو إنتي تجيبي في سيرة أهله كان نطلك في بيت أبوك ولا تحسف عليك !
أهله مهما كان ماراح يوقفون في صفك ضد ولدهم ولا راح يضغطون عليه عشان عينك، خصوصا إن الشيشة وطلعات المقاهي مو مصيبة عظيمة ! وإذا راح مع أصحابه لمقهى وجلسوا يشيشون وين المشكلة ! ترى شيء عادي خلي الرجال يوسع صدره بالطريقة اللي تعجبه ..
هاذي العلوم اللي ينزعل عليها .. علمي أهلك هم سندك مش أهل زوجك

رد : اكتشفت أمورا عن زوجي .. كيف أتصرف ؟
 

حبيبتي ممكن اعرف ليش ما تبين تدخلين اهلك قي الموضووووع؟؟؟؟؟؟



ممكن اعرف شو سبب الخوف !
معاملتهم لج او خوفج يطلقونج منه.،! تفكيرج في حياتج بعد الطلاق كيف بتكون؟!



هالامور كبيرة في ضرر ع نفسج اهلج صحتج فكري زين

رد : اكتشفت أمورا عن زوجي .. كيف أتصرف ؟
 

الغلط منك لنه تعرفين قبل ماياخذك عنده ماضي اسود ليه وافقتي

رد : اكتشفت أمورا عن زوجي .. كيف أتصرف ؟
 

أختي الامور كانت واضح أمامك قبل الزواج وبعد الزواج
زوجك صارحك بماضيه
أخواتك نصحوكي من ماضيه
يعني تتحملين نتيجة قرارك ولا تتوقعين أن ماضيه لن يظهر على مستقبله

رد : اكتشفت أمورا عن زوجي .. كيف أتصرف ؟
 

ان كنت تريدين حلا جازما اما بقاء او استمرار فادخلي رجل حكيم من اهلك يحدد فيها زوجك موقفه ويعرف موقفك وان كنت تريدين الاستمرار معه بضمانات مفترضه الحصول فعليك بتغيير نفسك
1_ان كنت تحاولين مقاومة مايفعل عليك ان تكوني انثى هادئة وغامضة وثابتة وغير منفعله عاطفيا لان محاولتك الحالية للمقاومة بتضييق الخناق عليه ومحاصرته يسبب النفور وعدم الرغبة في الاقتراب وتذكري انه طفل فماذا يريد طفل عنيد ياترى, تمعني.
2_شخص انعدمت لديه الرقابة الذاتية لمدة 7 سنوات يعني ان الهوى عنده الحاكم والقائد والرجل المندفع اتجاه اهوائه يعرف المنطق والخطا ويكره تذكيره بذلك"أرأيت من اتخذ إلهه هواه أفأنت تكون عليه وكيلا" فلكي يعود الى رشده حركي هواه اليك ولاتنفريه منك وما ان تميلين اليك قلبه فانت استطعت بعون الله والدعاء المستمر تحريك عقله بالنصح والمنطق وما الى ذلك من ايحائات ايجابية
3_ان كان يزني بالمواطئة فلتخشي على نفسك من مرض جنسي وهنا انت بحاجة لرجل حكيم من اهلك
4_ان كانت رغبتك في البقاء معه لقلة تقديرك لذاتك وتحقيقا لعاطفتك التي جعلتك تتمسكين به رغم المؤشرا , فعليك مراجعة نفسك. وافصلي قلبك عن عقلك انت بحاجة لعقلك
4_1 اما ان كان السبب هو تقديرك لذاتك وانك ستحققين بذلك مشروع العمر الناجح بإذن الله من اسرة مفيده وتنضح بالنجاح فالسكنى ونصف الدين لم تتحقق بزواجكما بعد, فاسعي ان كنت تريدين باكماله ليكون ارض خصبه تتمكني من تحقيق مشاريعك فيه
5_تأكدي انك بدون دعاء الله لن تستطيعي شيئا ولو فديت عمرك وعقلك وعلمك لتحقيق ماتريدين

رد : اكتشفت أمورا عن زوجي .. كيف أتصرف ؟
 

كأنك تتكلمين عن زوجي بس الفرق انه هو اعترف لي بنفسه انه يشيش ويدخن بعد

حاولت معه بكل الطرق زعلت وهددته بالانفصال ووعدني انه راح يترك هالأشياء والنتيجة رجعت حليمة لعادتها القديمة

للأسف الرجال اللي كذا ماراح يتغير إلا إذا غير أصحاب السوء اللي 24 ساعة جالس معهم في المقاهي والاستراحات

أنا مثلك من النوع اللي أصدع من ريحة الشيشة والدخان وتزوجت زوجي على أساس انه مايقرب لهالأمور لكن للأسف خدعني وكذب علي

النتيجة صار عندي تبلد وشبه قناعة ان في هالزمن من بين كل 10 رجال 9 يشيشون أو يدخنون

بس حبيت أعلق على نقطة كون انك شفتي صورة شراب في المحادثة مو معناها ان زوجك يشرب إلا عاد لو ان الصورة لزوجك وهو يشرب هذا شي ثاني

رد : اكتشفت أمورا عن زوجي .. كيف أتصرف ؟
 

نسيت ما أعلق على محادثات زوجك مع البنات

هالشي يحتاج وقفة جدية منك

غريبة قدرتي تمسكي أعصابك ولا تصارحيه في هالموضوع!

رد : اكتشفت أمورا عن زوجي .. كيف أتصرف ؟
 

مدري احس مافيه مشكله الا بس انك تبينه يتغير غصب عنه
تقدرين بس مو بالضغط
ترا الاستراحات شر لا بد منه
وبالعكس احس انه كل مابعد شوي عنك تقدرين تركزين وتحلين اي مشكله عندك
وتجلسين مع نفسك
لا تكبرين المشكله ومافيه اي شي يذكر او يستاهل للمشكله الي طالت بينكم
ترا المشاكل تصير بس المشكله انه محد يعترف بخطاءه او يستعجل الحل

رد : اكتشفت أمورا عن زوجي .. كيف أتصرف ؟
 

أدبيـه عن هالنقطة لا تخلينه يجيب سيرة أهلك بالناقص ..! خذي موقف أقشر وأعطيه درس ماينساه، والله لو إنتي تجيبي في سيرة أهله كان نطلك في بيت أبوك ولا تحسف عليك !

أهله مهما كان ماراح يوقفون في صفك ضد ولدهم ولا راح يضغطون عليه عشان عينك، خصوصا إن الشيشة وطلعات المقاهي مو مصيبة عظيمة ! وإذا راح مع أصحابه لمقهى وجلسوا يشيشون وين المشكلة ! ترى شيء عادي خلي الرجال يوسع صدره بالطريقة اللي تعجبه ..

هو يضرب حساب لامه بشكل كبير وبالعكس امه وقفت وقفه قويه ضده .

وبالنسبه للشيشه عمرها ماكنت وساعة صدر الا اذيه عذرا على الصراحه


هاذي العلوم اللي ينزعل عليها .. علمي أهلك هم سندك مش أهل زوجك [/QUOTE]

رد : اكتشفت أمورا عن زوجي .. كيف أتصرف ؟
 

بالعكس انا عارفه اهلي لو بروح لهم ماراح يقصرون معاي

لكن الضنى غالي واذا عرفوا انه مضايقتي بشغله راح ياخذون منه موقف وماراح تنحل الامور الا تزيد زياده
وانا ودي اصلح امور بيتي بنفسي اذا ماقدرت استعنت بااهلي

رد : اكتشفت أمورا عن زوجي .. كيف أتصرف ؟
 

سهر لأخر الليل ، ويكلم بنات ، ويشيش ..........
كل هذه الامور تشوفها مو مشكلة !!!!
اجل وين المشكله بضنك ؟!

رد : اكتشفت أمورا عن زوجي .. كيف أتصرف ؟
 

انا ما سمعت ولا شفت منه شي هم فقط مجرد احاسيس

رد : اكتشفت أمورا عن زوجي .. كيف أتصرف ؟
 

جزاك الله خير وكثر من امثالك على ردك
انا عندي قوة اصرار وعزيمه باذن الله الواحد الاحد اني اغيره للافضل باذن الله

رد : اكتشفت أمورا عن زوجي .. كيف أتصرف ؟
 

للاسف بس يتعبثون بانفسهم
الله يفرجها ويبعدهم عن اصحاب السوء

رد : اكتشفت أمورا عن زوجي .. كيف أتصرف ؟
 

يكلم بنات إنتي قلتي قبل الزواج
الشيشة والسهر شي عادي اقصد صار من روتين الحياه عند اكثر الشباب
وانا ما أبرر بقدر ما حبيت أوضح فقط

رد : اكتشفت أمورا عن زوجي .. كيف أتصرف ؟
 

أختي الكريمة
هذا الشيء راجع لك في مدى عزيمتك وإصرارك وتحملك للجهاد والكفاح والمناضلة من اجل إصلاحه
ولكن اخيتي ضعي في بالك انه ربما يستجيب لك ويتم إصلاحه ولو بصيص وربما لا يستجيب لك وينفر منك ويزداد سوء وانت تزيدي ألما ومعاناة
عتبي عليك وعلى كل فتاة ترمي نفسها مع رجل وهي تعلم انه لهو ماضي غير مشرف بحجة انه اذا اراد الزواج فهو اراد العفاف لم يكون الزواج يوما حجة لأمثال هؤلاء لأنهم اعتادوا على هذا الطريق الشائك وزين لهم الشيطان أعمالهم وروه حسنا وحرموا من لذة الحلال لأنهم استغنوا باللذة الحرام وهم كما وصفهم رسولنا الكريم عندهم اللحم الطيب ويذهبون للحم العفن النتين ومن اراد التوبة تاب الله عليه ومن اراد ان يستعفف يعفى نفسه مهما كان ومن اراد الخوض في هذا الطريق فانه خاض حتى لو كان متزوج ومحصن فلم يكن المقياس التوبة لهؤلاء الزواج باي حال من الأحوال وانظري الى الواقع من حولك فمن له ماضي غير مشرف مسبقا وقد تزوج فانه مستمرا حتى بعد زواجه لانه لم يكن بزواجه تابا لله وراجعا لله
ارى فيك حماسا للإصلاح وانت معه في بداية الطريق كما يقال على البر وبدون أبناء فضعي في حساباتك هذا الشيء أعانك الله وسهل أمرك لكل خير

رد : اكتشفت أمورا عن زوجي .. كيف أتصرف ؟
 

لو مابينكم اطفال
اختاري مصلحة نفسك ..

انت داخلة الزواج هذا
كتحدي لنفسك

لا تجعلي مستقبلك لعبة في يد واحد مثل هذا

رد : اكتشفت أمورا عن زوجي .. كيف أتصرف ؟
 

اختي أنت كنت مكتشفته عيوبه من زمان من الخطبة والملكة
ولكن تذوقتي مرارتها الآن
واللحظة التي اعترف بالأمر بها كان يمهد لحياة يعيشها الآن
على العموم هناك أمور يجب التحقق منها
مع رد الغالية unlimited
اقرئيه بتمعن

رد : اكتشفت أمورا عن زوجي .. كيف أتصرف ؟