|
خطيبي تغير فجأه !
السلام عليكم ورحمه الله ...
اعزائي اعضاء المنتدى حابه نصيحتكم .. انا مملكة ع معدد وانا الثانيه ،، كانت اول اشهر بعد الملكه خطيبي يهتم فيني بدرجه كبييييرة ،، طبعا شرح لي سبب زواجه انه مو مرتاح مع الاولى و علاقتها غير جيدة بأهله ،، المهم بعد ٣ اشهر تقريبا مر بظروف مادية صعبه جدا و بدأ و يتغير علي ،، م صار يكلمني بالايام ثم صار بالاسابيع والحين لي شهرين م سمعت صوووته ،،للعلم وقفت معه ف ضيقته الماليه و خففت عنه كثييير ،، ملخص الموضوع انه يحبني واعرف هالشي ،،لكنه تغير ولا صار يتواصل معي ،، وهالشي متعبني نفسيا ،، صارحته و يصير يتواصل ثم ينقطع فجأه ،، ابغى نصيحتكم لي .. |
رد : خطيبي تغير فجأه !
أول شي.. تأكدي من سبب زواجه لا يصير كيد نساء
المفروض مافوتتي نقطة ان علاقتها مو كويسة مع أهله فاحتمال انهم حرشوه وشيشوه لأنها متمشكلة معاهم وليست مشكلتها معه! يعني لازم تتاكدين مليون بالمئة ان مبادرة الزواج وقراره منه وليس من غيره.. ثاني شي.. نقطة انه مو مرتاح معاها كيف ذكرها لك؟ هل فصل وبين لك عيوبها ولا مو مرتاح وخلاص؟ ثالث شي.. كم عمرك وعمره؟ وحالتك هل انت مطلقة ولا لك تجارب قبل؟ وفرصك بالارتباط كيف؟ رابع شي..لما تفكرين بهالموضوع انتي بمرحلة حرجة.. اتركي عنك العاطفية تماما وتناسيها لو حضرت واقعيا مافي حب بثلاث شهور.. في ميول فطرية غريزية وموضوع التردد والتواصل والانقطاع يحسب ضده لذلك حتى بعد الزواج من المحتمل انه يطف فيك بالضبط نفس طفة بداية الخطبة اللي اهتمام زايد بعدين فتور -ولاحظي انها جات بسرعة وراحت بسرعة- اسألي نفسك هل انتي مستعدة تتحملين هالموضوع يمشي بنفس الطريقة حتى بعد الزواج؟ |
رد : خطيبي تغير فجأه !
القرار اتخذه بنفسه و هو من النوع الي يتخذ قراره بدون تدخلات
و موضوع انه مو مرتاح انا سئلته عن سبب زواجه ،، وقال انها م تهتم فيه و من بدايه زواجهم فيه مشاكل عمري ٣٠ وعمره ٤٠ و لم يسبق لي للزواج فكرت بالعقل و احس اني انا السبب لاني عودته داايم اسئل عنه و اهتم فيه ،، و اهتمامه بدايه الخطوبه لكسب ودي ،، بس انا اعطيته الحب والاهتمام ع طول ،، ومن قرآتي لبعض المواضيع ان الرجل يحب ان يجووع عاطفيا ،، وانا شبعته بزييياااااادة |
رد : خطيبي تغير فجأه !
اقتباس:
س 1 هل أنتي تواصلتي معاه لما أنتقطع عنك ؟ س 2 هل أنتي متأكده أن ظروفه الماديه هي سبب انقطاعه عنك ؟ على الارجح زوجك يمر في ظروف ماديه ونفسيه صعبه اليوم يومك اتواصل معه وتقربي منه أكثر وأكثر والله يسر أمرك ويسعدك |
رد : خطيبي تغير فجأه !
موضوع انه مو مرتاح معاها أنا أشك فيه لان سببه مو محدد.. اذا كان مثل ماذكرتي
الحب والاهتمام يعطى باعتدال.. أساسا الفترة هذي حديثكم العاطفي المفروض ما يكون كثير.. لان الهدف من المكالمات انك تعرفينه اكثر.. احيانا مو شرط من الكلام اللي يقوله تقدرين تستشفين شخصيته اذا كان يتحدث عن زوجته بالسوء أوقفيه.. لانه ممكن يحكي فيك بعدين "اذا كان طبع فيه" اذا كانت كلمته وحدة وقراراته ماتنثني مثل ماتقولين.. ليش أسباب زواجه متغيرة؟ وليش هالتردد اللي فيه؟ وموضوع الضائقة المالية.. تتحملينها؟ لاتسوين تضحيات ما انطلبت منك عزيزتي.. الرجال تفكيرهم غير عنا اذا هو تقدم لك وهو ماهو قادر يدير بيت واحد، مو بيتين.. ماهي مشكلتك! المرأة القوية المحبة لذاتها "لا اقصد الانانية" تهزهم.. كلامي يحتمل الصواب والخطأ.. لذلك خذي ماتشائين |
رد : خطيبي تغير فجأه !
اخي فارس مكة ،، نعم اتواصل معه و هو داايم يقول اذا انا متضايق م احب اتكلم ،، و حتى اهله قالو هالشي قبل يتغير علي ،، و تواصلنا عن طريق الواتس او الرسائل النصيه ،، و كثير يعتذر لي بسبب تقصيره معي ، لكن مكالمات ما فيه منقطعه ،، والتغيير صار مع بدايه الظروف المادية ...
عزيزتي فانتي .. هو ابد م تكلم عنها بسووء ، لكنه رد ع سؤالي عن سبب زواجه ،، وبالنسبه للضائقه الماديه هي جت فجأه وان شاء الله تنحل ،، و وظيفته بالاساس كوويسه و لله الحمد .. حاليا جالسه افكر اني م اتواصل معه الا قليل جدا ،، لان ممكن انه من النوع الي يبي ع طول اهتمام ، ولما يفقد هالشي ممكن يتحرك و يتصل فيني ،، تصرفي صحيح او لا |
رد : خطيبي تغير فجأه !
اقتباس:
وبعدين مسألة الكلام العاطفي هذي مسألة راجع الى الطرفين والله أذا ما تكلموا في الجوال أيام الملكه كلام عاطفي متى يتكلمون |
رد : خطيبي تغير فجأه !
اقتباس:
فارس احترم وجهة نظرك.. لكن المبالغة بالكلام العاطفي على أمور غالبا لم تُحس لقصر الفترة لمجرد الاندفاع "والرغبة لصب العواطف" منفرة نوعا ما.. حتى لو بدت في وقتها مثيرة للاهتمام |
رد : خطيبي تغير فجأه !
عزيزتي فانتي ...
م فهمت ايش قصدك بمتردد ؟؟ |
رد : خطيبي تغير فجأه !
اختي الكريمه ..تأكدي من جديه خطيبك وهل اقدم على الزواج الثاني عن قناعة تامه منه ام هي مجرد تجربه كما فعل الكثير من الرجال حين ارادوا التجديد..قد يكون سبب انقطاعه المفاجئ ضائقه ماليه فعلا او مشاكل مع زوجته الاولى ان كانت لم تعرف مسبقا بأمر زواجه او حتى غضبها لزواجه عليها وذهابها لبيت اهلها ماجعله يتردد كما قالت الاخت فانتي او يحاول اصلاح اموره معها لذا انشغل عنك و الله اعلم ..الاهم هوا ان تتعرفي على شخصيته جيدا واخلاقه وتسألي عنه جيدا والله يوفقك في حياتك الزوجيه.
|
رد : خطيبي تغير فجأه !
ليس كل ما عدد قادر على ذلك
هل لديك القدره على التنازل ؟! تنازلتي مره وستتنازلين على الكثير لم ساعدتيه ماديا وهل قبل بذلك ؟ احببتيه ولكن هل فهمتيه !! |
رد : خطيبي تغير فجأه !
السلام عليكم ورحمة الله وبركاته ..
أنتِ ياأختي الكريمة ذكرتِ سبب تغييره هو ضائقة مالية ، وكما قال الأستاذ الكريم شاي أسود تأكدي من جديته في الإرتباط .. تواصلي معه وأسئليه عن أحوال أعماله ، لاتكثري اهتمام كوني وسط .. بإذن الله عندما تمر هذه المشكلة ، سترين هل عاد أم مازال على تغييره . انتبهي تساعديه مادياً ، انتبهي هو المسؤول وليس أنت .. واستمري عالإستخارة والدعاء .. وكتب الله لك الخير . |
رد : خطيبي تغير فجأه !
ما ساااعدته ماديا و ابدا م طلب مني هالشي ...
و كنا متفاهمين جدا عكس م توقعت بسبب فارق العمر لكن تغيره صار مع الظرف هذاا بالنسبه لسؤالي له عن الجديه ف الارتباط ،، مضى ع الملكه ٧ شهور ،، كيف اسئله؟ |
رد : خطيبي تغير فجأه !
اقتباس:
عزيزتي.. هل تم الاتفاق على فترة عقد القران منذ البداية؟ هل تم تحديد موعد الزفاف؟ |
رد : خطيبي تغير فجأه !
اقتباس:
مع اني ما اشوفه عذر للانقطاع لمدة اشهر! لو ايام ممكن واجهيه قولي اذا غيرت رايك ف من البدايه قبل يوقع الفاس بالراس.. وما اايد اللي يقولون لك مستعده تتنازلين تتنازل عن ايش ان شاء الله!! حقوووووقك كااااامله ولا منه ولا فضل لاحد فيها هذي حقووووقك ولا كل واحد بطرييييق من اولها😪 |
رد : خطيبي تغير فجأه !
عزيزتي مهرة
نعم تم الاتفاق و حصل وفاه عمه الله يرحمه و تأجل الزواج ،، و حددناه بعد شهر لكن م زال البنك مطول اجرائته عشان يستلم المبلغ .. عزيزتي ملاذ هو تواصله بالواتس او رسايل نصيه لكنها اقل من اول ايام للملكه ،، لكن مكالمات م يتصل فيني و لما اسئله يقول م احب اتكلم وانا متضايق ،، و دايم يقول انا منحرج من اهلك بسبب الموقف الي حطيتك فيه ، الي هو تأجيل الزواج .. الله يهديه و يسخره لي ياارب .. |
| الساعة الآن 05:59 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©