|
كيف أصبح منظمة ؟! .. مهره الغالية
السلام عليكم ورحمة الله وبركاته
حبيبتي مهره أحتاج مساعدتك فيما كتب في العنوان هل أجد لديك الوقت والجهد الكافي حتى أبدأ بشرح المشكلة ؟! تحياتي غاليتي |
رد : كيف أصبح منظمة ؟! .. مهره الغالية
أوبس!
السالفة فيها شرح؟!! .. فكرت بنقضيها صياح وولولة .. وكنت مجهزة لج شوية أحضان وكم جرعة حنان :D اشرحي فديتج .. والله يقدرني. الجهد موجود بإذن الله .. بس إذا تأخرت حبتين فاعذريني لأن أبو الشباب موجود هالأسبوع واليهال إجازة. |
رد : كيف أصبح منظمة ؟! .. مهره الغالية
هههههه يا ويلي من مهره جرعة حنان أشرق بها وأحضان تعصرني عصر هاه :D راضية ومسلمة نفسي ليكي وبالنسبة للتأخير ماعليه مهره ما عندي مشكلة أهم شي ردي علي بتفصيل وروقان لاني يبدو أن الحالة مستعصية :D ولا تفكرين بالتوجيهات والنصائح فقط أحب أنتفع بطريقة الحوار كثير جدا لانا غير روتينية ghgjgf . . أنا في البداية راح أظهر لج مواقف وأنت احكمي عليها كطبيعتي كانسانة بشكل عام من ناحية البوصلة الشخصية (( غربية شمالية )) أذكر أيام عبير الأحلام كنت انت مش فاهمة في البداية وتايهة ولكن أذكر نمطج شرقي شمالي أو العكس المهم واضح هالشي بالنسبة لي كشخصية متقنة للبوصلة نوعا ما dgdg عموما أنا مرنة فعالة نشيطة اجتماعيا اتكيف في المجتمعات وما عندي خوف من التغيير في أشياء أساسية في حياتي ولكن ممكن تلقيني تقليدية في الأكل والشرب واللبس وما الى ذلك .. نجي لاهم سلبيات الغربي الفوضوية .. أو على الأقل صفاتي علشان ما أربطج تلتزمين بالبوصلة في ردج ( ردي بحرية ومن أي مكان تحبينه ) أنا بس حابة أكتب بشكل تفريغ ذهني فلا تلزمين بالبوصلة لو تزعجج راح أضرب أمثلة على الفوضوية : 1- أعشق كريمات العناية وأتلذذ بشراءها (الأماكن المفضلة عندي الصيدلية ) ، مثلا في روتيني اليومي أستحمام ، بعدين أبدا عملية العناية ، ألبس الملابس في الغرفة وكريمات الجسم قبلها ، أحط كريمات الوجه في غرفة عيالي ، أمشط شعري في الغرفة التالية ، أتمكيج في الصالة ، أنشف شعري عند زوجي بغرفة المكتب :D >> ههههههههههههه مشكلة لو أقعد أسويه كله في مكان واحد مهره أختنق ، أحس أني عصفور ومحطوط في قفص أبي أتحرك وأغير المكان وبكذا تتناثر أغراضي بكل بقعة في البيت بعد ما تعبت ورتبتها وبكذا أيضا أصبح فريسة سهلة لسرقة الخدامات لان اغراضي تناثرت وشي منها انساه ، ولاني مؤمنة ان غالبهن يسرقن لو اشياء بسيطة ، فما اتعب احالي مثلا واصرفها من البيت وما الى ذلك لان الخسارة علي أكبر .. 2- أنا شطورة في الجامعة الحمدلله ، كل بحث مكتوب لازم عليه عرض مرئي نقدم فيه مختصر بحثنا ، وكل وحدة ببراعتها في تقديم العرض ، بارعة بكل هذا ، ولكن لحظة انجاز العمل ، ماقدر أبدا صفحة صفحة بالترتيب ، تلقيني يمكن أبدا من منتصف البحث ، وأرجع للمقدمة ، ثم ارجع للخاتمة ، يعجب الدكاترة كثير لاني اضفي عليه لمساتي بطبيعتي غير متقيدة بما يكتبه المؤلف فأضيف وأحلل وأشرح وهذا ما يبحثون عنه بصمة الطالبة الخاصة \وليس النقل الحرفي فقط ولكن هو بنظري عمل غير منطقي وأحيانا وأنا أشرح أكتشف انقطاع الأفكار لاني ما مشيت بشكل متسلسل .. لحظة انجاز العمل حوسة بصدق والغريب اني مرة تورطت ببحث ولازم انجزه خلال يوم jyfngt ومستحيل أفشل نفسي قدام الدكتور أموت ولا أنحط في هالمواقف ولاني شمالية عندي جدية كبيرة في هالنواحي gfn قررت امشي بتسلسل منطقي ، وفعلا مهره خلصته بوقت قياسي وعرضته وعجب البنات والدكتور بشكل كبير .. يعني المشكلة متلخصة في أني أنجز العمل بأي شكل كان المهم النتيجة وهذا خطأ bfd 3- مثلا أدخل أطبخ في المطبخ ، أحوس المطبخ فوق حدر ght ماعرف مثلا أطبخ وكل شي أستعمله أرجعه مكانه .. 4- في أعمال المنزلية أتقن الطبخ ، مسح الأرضيات ، غسيل الملابس ، شطف الحمامات ، وأنظف من قلب ، بس تعاليلي قوليلي صفي ورتبي غرفة ggg تكون اصابة في مقتل هههههههههههه أحتاااار كثير كثير من وين أبدأ وكيف أرتب ووين أحط الأشياء ، حالتي تصعب على الكافر والله .. 5- النظام عندي قيد ، ولاني أعشق الحرية فأهرب من هذا القيد رغم حبي له .. 6- عيالي نمالهم نظام محدد ، مرات كلنا انام بكير ، ومرات كلنا نسهر باستثناء أحمد أحاول أنومه قدر الامكان مبكر ، وهالشي سلبي جداً 7- تسويف الأعمال ، عدم التزام بمواعيد الطبيب ، أكره اخذ شي بموعد لانه قيد وارتباط .. 8- في المنتدى هههههههههههه اقتليني ولا تخليني أقرى رد لشخص يكتب بأسلوب خطوط متابعة كهذا ........... ........... ........... ........... شخصيات مهمة ماحب أقرالها ، رغم جمال كلامهم ولكن هذا التسلسل يطفئ روحي yyy ، أحسه روتيني وممل كيف متحمل نفسه ههههههههههههه .. أحب أقرا ردودج وروح الطير فكرا وأسلوبا طبعا لان تفصلون بين الاسطر وخط طويل وخط قصير ونقط وعلامات استفهام وووو الخ .. وأيضا رغم أني أحب القراءة الا أني ما اتقيد أقرا من ورى ومن قدام وووو الخ لين أكون الفكرة العامة (( أنا فاهمة مشكلتي وين المشكلة تنبع من داخلي وهي حاجتي الدائمة للحرية اللي أورثت معها الفوضوية )) الموضوع مش كسل لأني أول شخصية يفكر يعتمد عليها الدكتور في انجاز مهام تخص الصف كامل ويتكرر هذا دائما مع الدكاترة بالتالي هم يدركون أني متحملة المسؤولية ويعتمد علي ماخذلهم في الغالب ولكن هم طبعا لا يعرفون كيف أنجز الأعمال هههه ولا كان علوم ... jh المهم توصلهم بشكل مرضي هذا شرح لحالتي مهره وأنتظر تقييمج وتوجيهاتج |
رد : كيف أصبح منظمة ؟! .. مهره الغالية
تصدقين توترت وأنا أقرا :D
انتظريني فديتج. أبا أضمن وقت كافي لج بدون مقاطعة من اللي عندي. |
رد : كيف أصبح منظمة ؟! .. مهره الغالية
ههههههههههه سبحان الله توقعت
لانه التنظيم احتياج الشرقيين والعشوائية احتياج الغربيين نفس احساسي لما اتقيد اتوتر وابا اتحرك بس بتغير باذن الله لان النظام راحة حقيقية خذي راحتج متشوووقة ههه :d |
رد : كيف أصبح منظمة ؟! .. مهره الغالية
هلا مهره
دام بعدج ما رديتي علي فيعني في فرصة اوضح امور ثانية بس اخاف تهربين من الموضوع هههههههه jhjh علشان تكون الصورة اوضح اكيد في جانب من الكسل بالذات بخصوص اعمال المنزل واللي زاد الطين بلة ان زوجي عنوان الفوضوية هههههه يعني جدر ولقى غطاه ههههههههههههههههههههه cgggfn لا والله بس حسيت لو استمر الوضع راح نصبح عائلة كارثية زوجي عاد حدثي ولا حرج كونه جنوبي غربي يعني انبساطي وتسويفي على الاخييييييييييييير كل شي ملحوق في الحياة jyfggg اممم العشوائية والفوضوية كلفتني ماديا الكثير الطفل بطبيعة الحال يحب العبث بكل شي وكوني ما اترك كل شي بمكانه الصحيح فيعني المزيد من الخراب والتكسير دائما يلعبون باغراضي المهمة ويخربونها اصلح شاشة الاي باد يرجعون يسطون عليها ويكسرونها تهئ تهئ مهره احس بتكفخيني hgh بس لازم اكون صريحة واراويج ابعاد المشكلة fgf من ايجابياتها ان الحياة راحة كل شي عادي هههههه مادري المنظمين مرتاحين ولا سترس :D انا بصراحة عندي نموذج شرقي شمالي متطرف حرمة اخوي دائما متوترة من ابسط الاشياء وقوع طفل :: انصب عصير بالغلط :: بوجودها البيت بحالة استنفار فكرهت عيشة المنظمين بزيادة لانه اعتبرتها وسواسية لحد يطفش بس انت مهره غير :D احسج تسوين اللي تبينه وبالطريقة اللي تبينها وبهدوء |
رد : كيف أصبح منظمة ؟! .. مهره الغالية
مبدئياً ممكن تعرفيني على مرت أخوج؟ :D
. . . فوفو حبيبتي .. بصراحة مب عارفة إذا كنت فعلاً راح أقدر أساعدج او لا .. لأني فعلاً حسيت إني أبا اكفخج :D لكن خلينا نسولف شوي ونشوف شو اللي ممكن تطلعين فيه من هالحوار. لكن خليني أقول لج شي قبل .. البارحة وأنا أقرا كلامج ما كنت قادرة أرد عليج بروقان لأن بنتي الصغيرة كانت تعبانة .. وكل شوي تقوم من النوم تصيح .. لكني فكرت وقتها إني أصور لج جزء من روتيني عشان تعرفين الجريمة اللي ارتكبتيها في حق نفسج لما قررتي تشاوريني gnn عادةً لما زوجي يكون في الدوام أنا طبعاً اللي أقوم مع عيالي ونروح المطبخ وأجهز لهم الريوق .. لكن لما زوجي يكون موجود فهو أحياناً كثيرة يقوم مع اليهال قبلي وهو اللي يوديهم المطبخ ويسوي الشاي ويريقهم. اليوم زوجي كان معاهم .. دخلت المطبخ عقب ما جهز لهم الريوق .. وهذا كان منظر المغسلة [img]http://im65.***********/asIgnT.jpg[/img] وصحنين زيادة فوق المواعين عقب ما خلص سلطان وأبوه ريوقهم [img]http://im65.***********/04gqt3.jpg[/img] عقب أضفت لمساتي على المواعين قبل الغسيل [img]http://im65.***********/efUq9g.jpg[/img] وبعدين ناديت الخدامة عشان تغسلهم ;) فعلاً أنا ما أتحمل منظر العفيسة أبداً .. حتى في الأشياء الوصخة أو اللي راح تنرمي مثلاً!! . . . لما قلتي إنج تتنقلين بين الغرف .. وتسوين كل شي في مكان .. ابتسمت بيني وبين نفسي وحسيتها حركة حلوة .. وتخيلتج مثل الفراشة أو النحلة اللي تتراقص وتتنقل بين الزهور gnn ولأن الحركة عجبتني فعلاً وحسيتها حيوية وفيها روح .. فما راح أطلبج تقرين في مكان واحد :D .. لكن تعرفين شو اللي خطر على بالي؟ الشنطة الصغيرة اللي تنربط حول الخصر. حطي فيها الأشياء المهمة وصغيرة الحجم اللي ممكن ما تحصلينها بسهولة إذا اختفت .. وبالتالي تتنقل الفراشة بين الغرف مثل ما تحب وفي نفس الوقت أغراضها المهمة معها وفي الحفظ والصون. |
رد : كيف أصبح منظمة ؟! .. مهره الغالية
راجعة أكمل يا فوفو. اترييني. |
رد : كيف أصبح منظمة ؟! .. مهره الغالية
بخصوص شغل الجامعة .. فبصراحة ما فهمت انتي ليش زعلانة؟
نتيجة شغلج مُرضية .. الدكاترة مبسوطين منج لدرجة إنهم يعتمدون عليج وواثقين في قدراتج. هذا شي طيب جداً .. وبصراحة أشوف إنه الأهم. لكن الملفت إنج قدرتي فعلاً تشتغلين بشكل متسلسل بعيد عن رقص النحلة والفراشة bht .. إن جاز لنا إسقاط هذا الوصف على الخلطبيطة الانتقالية بين المنتصف والمقدمة والخاتمة. الشاهد إن بذرة النظام موجودة بداخلج ولو بقدر ما. gnn |
رد : كيف أصبح منظمة ؟! .. مهره الغالية
اقتباس:
يعني أفهم من هالكلام إن مطبخج وكبتات الغرف معفوسة؟!! bgh <----- حطيت الفيس العود عشان تقدرين حجم المصيبة في نظري :D شوفي.. سبحان الله اليوم بالذات امي كانت عندنا .. وزوجي يلس معانا طبعاً .... سالفة ورا سالفة وكلام يجر كلام .. سألتها عن ولدها وزوجته لأنهم كانوا يبون يقدمون على خدامة .. وسألتها إذا كانوا قدموا والا بعدهم؟ هم ساكنين في شقة .. والشقق مثل ما تعرفين في الغالب صغيرة ومساحات غرفها ضيقة .. والشغل فيها مب قصة عويصة .. فزوجي استغرب من السالفة على اعتبار إن وضعهم الحالي مب محتاجين معاه خدامة. فماما ردت عليه بكلام بما معناه: هذه مب مال تنظيف وترتيب!!!!! <------ تقصد زوجة ولدها. وفعلاً في حوار سابق بين ماما ووحدة من بناتها كانت تنتقد فيه زوجة ولدها لأن بيتها معفوس وفيه أغراض مرمية من غير ترتيب .. وفي أماكن بارزة في البيت. لاحظي ماما كانت تتكلم عن الترتيب فقط .. مب النظافة. تتخيلين يا فوفو حد يدخل عندج ويكون هذا انطباعه عنج وعن بيتج؟!!! أكيد الترتيب لا يعني إن كل شي يكون مصفوف مثل المسطرة .. لكن مهم يكون له مكان ثابت .. توفيراً للوقت على الأقل .. عشان لما تحتاجين شي تعرفين توصلين له دايركت بدون حوسة وعفيسة. وعلى طاري المكان الثابت. الأسبوع اللي طاف رحت الجمعية .. وطبعاً شفت شو النواقص .. وكان من ضمنها الفول .. فاشتريته ضمن المشتريات. ثاني يوم اكتشفت إن عندي في خزانة المعلبات أربع قواطي فول!!! ليش ما شفتهم؟ لأني متعودة أحطهم في زاوية معينة في الخزانة .. وخدامتي الله يصلحها لما اشتريت فول آخر مرة حطتهم في الزاوية المقابلة. بس طوفتها للخدامة وما قلت لها شي ;) وعلى فكرة عن نفسي ما أوصل للتنظيم النهائي من أول مرة .. يعني أول ما سكنت بيتي في أشياء حطيتها بطريقة معينة أو في أماكن معينة .. وبعد فترة اكتشفت طريقة ثانية أو مكان ثاني أفضل. يعني حتى المنطمين تعبانين والله :D |
رد : كيف أصبح منظمة ؟! .. مهره الغالية
شو أخبار الذاكرة معاج؟
يعني لو حطيتي شي في مكان .. وبعدين حطيتيه في مكان ثاني .. وبعدين حطيتيه في مكان ثالث ..... تتذكرين كل مرة وين تحطينه؟ |
رد : كيف أصبح منظمة ؟! .. مهره الغالية
اقتباس:
iهلا مهرتي الغالية بجاوب على سؤالج هنيه وطبعا عندي ردود على كلامج القبلي بس بخليج تكملين دور دور يعني dg . . مهره ذاكرتي ماعرف شو اصنفها انسى ولا اتخلى عن الاشياء الغير مهمة بس تحديدا للاجابة على سؤالج في الوقت الحالي زايد النسيان عندي ولو وزعت الاغراض في الغرف اتذكر وينهم بنفس اللحظة ولكن بعد يومين او بعد يوم في الاغلب ماعرف الا لو كنت مثلا جمعتهم كلهم في غرفة لاني احيانا انقل كل شي بالغرفة التي يتواجد فيها زوجي بس عموما الوضع ليس بجيد عندي نسيان زاد مع ولادة احمد وزاد مع حملي الحالي وطبعا اظنك قراتي عن موضوع الية التفريغ التي تحصل لي بمعنى افرغ الذكريات والمشاكل اول باول حتى الاحداث الجميلة وانا بانتظارك ومستمتعة وبالعكس افضل شي عملته في حق نفسي اني سالتج احبج :) dff |
رد : كيف أصبح منظمة ؟! .. مهره الغالية
والله إني أموت عليج يا بنت fdgrg
الكريمات أو المكياج مثلاً أمور مقدور عليها في النهاية مهما غلا سعرها .. لكن تخيلتي إن الغرض هذا ممكن يكون ذهب أو فلوس .. أو حتى شي له قيمة معنوية كبيرة عندج؟! من حوالي شهرين زوجي عطاني المصروف كالمعتاد .. وبصراحة مصروفي مبلغ محترم جداً .. وفوقهم كان معاي مبلغ محترم ثاني كنت ماخذته من جمعية مشاركة فيها. عندي محفظة خاصة أحط فيها الفلوس .. وحسب احتياجاتي آخذ منها المبالغ ..... وهالمحفظة موجودة في أحد أدراج التسريحة في غرفة نومي. اللي حصل إني في هالفترة اشتريت كذا مرة .. وبالتالي سحبت من المحفظة كذا مرة .... وفي نص الشهر فتحت المحفظة أشوف كم باقي فيها .. لقيت الفلوس ناقصة بقوة!!! يلست أحاول أتذكر أنا شو اشتريت بالضبط .. وكم المبالغ اللي دفعتها .. تذكرت معظم الأمور .. لكن مب كل شي .. ولما جمعت المبالغ اللي تذكرتها لقيت إن في مبلغ 1700 درهم تقريباً مب عارفة وين راح وفي شو انصرف!!! ورغم حبي للتنظيم لكن أحد عيوبي إني ما أحتفظ بالفواتير!!! وهاليوم حسيت فعلاً شكثر كنت غلطانة بسبب هالإهمال .. لأني ما قدرت أتذكر هالمبلغ وين راح .. فلعب الشيطان في راسي وشكيت في الخدامة .. لكن ما قدرت أستمر في شكي .. مب بس لأن عندي دلائل ثانية على أمانتها .. لكن لأن حتى لو كانت هي فعلاً سارقة فالغلط عليّ في المقام الأول وعلى إهمالي لأني مخلية محفظة الفلوس في التسريحة سداح مداح!! وتميت أقول لنفسي: تستاهلين .. يعني مب قادرة تشيلين فلوسج مثل الناس!!! وفعلاً من يومها صرت آخذ المصروف من هني .. وركض على البنك أدخله في حسابي من هني. الشاهد من هالقرقرة .. إن بعثرة الأغراض اللي انتي تشوفينها انطلاق وحرية وعدم تقيد .. ممكن تكون في أمور بسيطة لحد الآن وما تمثل خطورة فعلية ..... لكن لا قدر الله لو صارت مع أمور مهمة وثمينة .. واقترن معاها النسيان .. فكيف الحال؟!!! |
رد : كيف أصبح منظمة ؟! .. مهره الغالية
مهره حبيبة قلبي
أرد ولا أنتظر لين ما تخلصين |
رد : كيف أصبح منظمة ؟! .. مهره الغالية
ردي حبيبتي. |
رد : كيف أصبح منظمة ؟! .. مهره الغالية
مبدئياً ممكن تعرفيني على مرت أخوج؟ :D
مهره ياخي لا تحفزيني على الحش :D مستحيل أن تكون في نطاق السلوك الطبيعي وكثير من الناس لا يحتملون هذا السلوك وحتى زوجها لا يحتمله في أحد مثلك حرصه دفعه لزيادة حرص على الأسرة هي حرصها دفعها لزيادة استقدام الخدم 3 خدامات على 4 اطفال :23: تو متش صراحة بالعكس يا مهره من دخولها أدخلت سلوكيات دخيلة على الأسرة مثلا نحن أغلبنا مثل أمي مسؤولات 100% عن الأطفال ، أنا وكل أخواتي المتزوجات كنا مسؤولات فجأة بدأت تتسرب أفكارها باعتماد على الخادمة ، وان الخادمة تمشي ورى الطفل بالأكل وووو الخ من سلوكيات كانت مستحيلة في البيت ! والخادمة تبقى مع الطفل في البيت وتخرج الام وووو الخ خليني ساكتة قلبي مغلغل :D سالفة اضافة لمساتج للمواعين بصراحة خطيرة مهوره تستاهلين صفقة والله ffb يحليلج يا مهره طيبة حتى المواعين الوصخة ترتبينها ههههه ما شاء الله dvf . . فكرة الشنطة حلوة وراح أحاول أطبقها مع أني الهدف أني ألتزم بأسلوب معين وأفك نفسي حتي تقل الفوضوية من الداخل مهرة بالنسبة لسؤالج عن ترتيب الأغراض في الكباتة الغرف والمطبخ ماقولج ان الكبتات معفوسة ولكن ترتيبها مش على ايدي عندي عاملة ومعتمدة عليها بالتنظيف والترتيب مش بالشكل اللي يرضيني أو أشوفه بالبيوت المرتبة وعندي سؤال مهره - ياليت تقولين كيف تعاملج مع الخدامة ؟ (شدتني جملتج طوفتها للخدامة وماقلت لها شي + بنفس الوقت تهدينها هدية عيدهم) - من ناحية المعاملة كيف نجمع بين الحزم واللطف ؟ - ومن ناحية مهامها في البيت على البيت نفسه والاسرة والاطفال ؟ - كيف رسمتي لها حدود كمرأة غريبة ؟ ياليت تفصلين لان موضوع راح تقراه كثير من الامهات اللي عندهم عاملات . . بيتي عموما نظيف ولكن لان الفوضوية سلوك فما احس البيت فيه لمسات جمالية يعني تدخلين البيت تحسينه مرتب وعادي ونظيف بينما بيت اختي رغم انه ايجار مثل بيتي ولكن لها لمساتها الجمالية الرائعة فعلا بيتها جميل رغم بساطته يمكن أكثر شي يزعجني اني فعلا ماعرف أرتب مهره اقصد الترتيب الجمالي مش التنظيف :11:ماعرف أحس تنسيقي يطلع عادي بالنهاية مكان مقبول ولكن ليس جميل مادري ان كان هناك حل لهذه المشكلة سوى كثرة الاطلاع على نماذج اخرى من الديكورات هل مثلا اعتياد النظام يقود للجمال ؟ وسامحيني على الاطالة |
رد : كيف أصبح منظمة ؟! .. مهره الغالية
مهره انا ماشوف الموضوع حرية وانطلاق وعدم قيد يعني اوووه انا عاجبني هالشي بالعكس عارفة ناتج سلوكياتي بشكل واضح ومقروصة كم مرة ! في ردي الأول أنا أشرح لج نظرة الشخصية الغربية للاشياء ليش هو فوضوي ؟ مايبا يتقيد يبا يتحرك دائما وما يحس أنه حبيس لأي نظام رعم ثقتي بالمشرفات هنا الكبيرة ولكن بدأت أتملل شوي من الدردشة لان كذا تنبيه جا وانغلقت مو لان سلوكهم خطأ أبدا ولكن أنا أقولج مشاعري تجاه القيود كيف ؟ أهرب منها بكل مافيني ومهما كان المبرر المهم الناتج من المبرر خطأ وضرر كبير علي وعلى أسرتي وعارفة أن الموضوع معتمد علي بشكل كبير مهره بقولج عما يختلج بداخلي وراح تستغربين من سذاجة سؤالي ؟ أسأل نفسي وأنا أقرا كلامج ؟ كيف مهره منظمة ؟ هل ممكن في يوم أكون منظمة هههه ؟ دليل أن النظام ذهنيا صعب توقعه علي ؟ dgdg ولكن متأكدة من هالسؤال حل المشكلة باذن الله وأوعدك أني أخبرك بنتيجة قريبة عن أثر هذا الحوار بس كملي بعدني ما تشبعت أحيانا لما أبا أخذ من صفات شخص ما أحاول أتشبع منه حتى الثمالة حتى تمتزج روحي بروحه وأكتسب شيء منه يكون بذرة باذن الله للتغير |
رد : كيف أصبح منظمة ؟! .. مهره الغالية
مهره
لما كنت أقرأ أقوى نقاط القوة عند الغريين هي الابتكار والابداع وأعظم نقطة ضعف هي عدم التنظيم هذه هي أنا بوضوح وردا عليج بموضوع الدراسة ليش يزعجني سلوكي مادامه معجب الدكاترة لان هذا السلوك يستنزف الوقت وانت عارفة الجامعة مش دائما يسعفج الوقت تكتبين بحرية الموضوع عندي ابتكار ومتعة مش دراسة والتزام فانظلق في البحث من حيث أرادت روحي أن تنطلق ولكن مش دائما يخدمني هذا يعني أنطلق بحرية وبعدين بعد ما أخلص لازم أرجع أعيد النظر الى ما أبدعته بعين التنظيم والترتيب بحيث يبدو ما كتب متناسق ومترابط الأفكار ومتسلسل .. وهذا ياخذ وقت فهمتي وين الخلل ؟ |
رد : كيف أصبح منظمة ؟! .. مهره الغالية
مهره
شوفي الفرق كيف ينظر كلا الفريقين للأشكال والمكان [img]http://im50.***********/ER46vY.jpg[/img] أنا اللي تحت بس بعثري المكعبات حبتين :D |
رد : كيف أصبح منظمة ؟! .. مهره الغالية
اقتباس:
ما أعتقد .. لأن حتى أنا أدائي من الناحية الجمالية مب ذاك الزود .. ومعظم البيوت اللي أدخلها أحس تنسيقاتها وديكوراتها فيها ذوق وإبداع ومزاج ما قدرت أجاريه لين الحين. يمكن مثل ما قلتي الاطلاع ومتابعة النماذج الحلوة يفيد .. لكني بصراحة أعتقد إن المسالة موهبة في المقام الأول. أختي ما تتابع هالأمور ومب داخلة كثير ضمن اهتماماتها أو هوايتها .. لكن تنسيق بيتها وديكوراتها أفضل مني بكثير. |
رد : كيف أصبح منظمة ؟! .. مهره الغالية
اقتباس:
طيب تصدقين إني حبيت الشكل الثاني أكثر ;) حسيت إن الشكلين منظمين .. لكن الشكل الأول جامد وتقليدي .. أما الشكل الثاني فيه فن ويفتح النفس gggh |
رد : كيف أصبح منظمة ؟! .. مهره الغالية
حبيت أفرد رد خاص عن خدامتي الحبيبة.
طشّونة وراجعة :d |
رد : كيف أصبح منظمة ؟! .. مهره الغالية
اقتباس:
بدايةً أحب أقول إني ما كان عندي خدامة أبداً طول سنوات زواجي. السبب طبعاً إني كنت ساكنة مع أهل زوجي .. وهم عندهم خدامتين .. وأنا لي غرفة فقط .. وكنت أنا دايماً المسؤولة عن عيالي بشكل كامل .. فما كنت أشوف إني محتاجة خدامة خاصة .. بالرغم من الناصحات اللي حاولن إقناعي بعكس هذا ;) عشان جذي ما أقدر أقول إن خبرتي مع الخدامات كبيرة .... استقدمت أول وحدة قبل ما أنتقل بيتي بشوي .. ولما خلصت عقدها راحت .. وتميت فترة مأساوية بدون خدامة cgg .. وبعدين وصلت خدامتي الحالية ولها عندي كم شهر. خداماتي دايماً فلبينيات .. ونظامي مع الخدامة يبدأ من لحظة اختيارها في المكتب .. أول شي أسويه بعد الاختيار إني أستخير. بعدين آخذ رقمها من المكتب وأًكلمها .. أعطيها نبذة شاملة عن الأسرة والبيت .. كم طفل عندي .. حجم البيت وعدد الغرف .. المهام اللي راح أكلفها فيها بالضبط .. والمهارات اللي أتوقعها منها خاصة النشاط والذكاء وعدم النسيان. عندي قناعة إن من حقها تكون عندها فكرة شاملة عن المكان اللي بتشتغل فيه .. وتكون عارفة هي مقبلة على شو بالضبط .. وفي نفس الوقت ما عندي استعداد أتحمل صدمتها لو اكتشفت بعد ما توصل إن البيت كبير عليها مثلاً .. أو إن البيت فيه أطفال وهي مب من النوع اللي يقدر يتعامل معاهم أو يتحملهم .... فالأمور تكون واضحة من البداية عشان محد فينا يكون له حجة على الثاني. وفي شي بعد أسويه لضمان جديتها واستمرارها في العمل .... وهو إني أقتطع مبلغ معين من راتبها كل شهر .. وأحتفظ به عندي. وبصراحة كانت نيتي من البداية هي اقتطاع مبلغ معين بشكل دائم طول السنتين .. وكنت ناوية أقتطع 300 درهم .. لكن أول خدامة كلمتها رفضت .. ولما قلت لزوجي شاف إن الـ 300 وايد .. واقترح علي إني أخفض المبلغ وأجمع من راتبها قيمة التذكرة بس .. وفي حال حبّت تقطع العقد وترجع لبلادها لأي سبب فتكون تذكرتها من فلوسها .... فصرت أقتطع مبلغ 200 درهم شهرياً بحيث أجمع في النهاية 1200 درهم. طبعاً هالجزئية أوضحها لها بشكل تفصيلي .. وأتأكد إنها فهمتها تماماً لما أكلمها. إذا وافقت على كل شي .. أتوكل على الله ونبدأ في إجراءات الاستقدام. لما توصل بالسلامة وقبل ما تطلع من المكتب أقول لها جملة وحدة جدام صاحب المكتب: أنا ما أحب أكرر الكلام .. ولا أحب أسمع كلمة نسيت. في البيت أخليها أول يوم ما أطلب منها أي شي طبعاً .. أعطيها شي تاكله وعصير .. وأخليها ترتاح وتنام. ونبدأ من ثاني يوم ..... آخذها جولة في البيت وأراويها أماكن الأشياء الضرورية لشغلها مثل أدوات التنظيف .. أعلمها كيفية استخدام بعض الأجهزة مثل الغسالة والنشافة ومكواة البخار ..... طبعاً مب كل شي من أول يوم .. لكن خلال الفترة الأولى تتم الأمور بشكل تدريجي وشوي شوي. بشكل عام أنا ما أحب أصرخ أو أهاوش الخدامة .. لكن في نفس الوقت وبصراحة ربي كان موفقني في الخدامتين .. وكل وحدة منهن كانت تعرف شغلها من نفسها .. كفاءتها عالية وأخطاءها بسيطة .. فمب معقول أمسك عليها الغلطة وكأنها ارتكبت جريمة .... عشان جذي قلت لج إني طوفت لها سالفة إنها حطت علب الفول في غير مكانها المعتاد .. وبشكل عام أنا عادةً أطوف الغلطة الأولى في معظم الأشياء .. لكن لو كررت الغلط فلازم طبعاً أنبهها. الغلطة الأولى من وجهة نظري احتمال كبير تكون من غير قصد أو عن جهل بكيفية الأداء الصحيح .. لكن التكرار هو اللي معناه الإهمال والكسل. الشي الثاني إني في الفترة اللي ما كانت عندي خدامة عرفت شكثر الخدامات يتعبون في البيت .. عرفت كيف إن تكرار نفس التفاصيل ـ اللي أطلبها منها كصاحبة البيت واللي قمت أسويها بنفسي في هالفترة ـ في النهاية بتكون مملة ومتعبة .. عشان جذي صرت أحس فيهن أكثر. ولأنها تشتغل بضمير .. فهي تستحق بعض اللفتات اللي تفرحها .. على الأقل من باب مكافأتها على حسن أداءها .. عشان جذي استغليت مناسبة رأس السنة وأهديتها هدية .... وخدامتي السابقة اشترينا لها بلاك بيري .. ولما يت تسافر اشترينا لها تلفزيون. بخصوص مهامها وشغلها .. فمثل ما قلت لج أوضحها من البداية .. لكن بالتدريج مب مرة وحدة .. لكن بشكل عام شغلها يبدأ الصبح بالحوي .. طبعاً تنظف القسم الخاص ببيتي لأن خدامات ماما ينظفون القسم الخاص بهم .. وعقب ما نقوم يبدأ شغلها داخل البيت .. تنظف الغرف وتمسح الأرضيات والحمامات الله يعزج يومياً .. استخدام الفاكيوم أو المكنسة وغسل الحمامات مرتين في الأسبوع .. تلم الثياب اللي محتاجة للغسيل وقت المغرب بحيث تغسلهم ثاني يوم الصبح بدري .. وبعد ما أطبخ وأغدي اليهال أناديها عشان تتغدا وعقب تنظف المطبخ .. وعقب تكوي الثياب وتربعهم وتيبهم عندي. ونظراً لأن معظم مشاويري أقضيها خلال الفترة الصباحية .. فالعادة أنيّم شما وأطلع .. والخدامة تكون مسؤولة عنها في حال إني تأخرت وشما قامت من نومها قبل ما أرجع. هذا بشكل عام .. غير بعض التفاصيل الصغيرة أو المتفرقات اللي ما تعتبر من الأمور الروتينية اليومية. طبعاً في أمور كنت أشوفها تصير عند ماما والله يهديها ما تنتبه لها فصرت أتجنبها مع خداماتي .. مثلاً بالعادة الغدا يكون جاهز الساعة 3 .. ونخلص قريب الـ 4 .. وعقب هي تدخل تتغدا .... لو حصل إني تأخرت وتغدينا متأخر فأناديها حتى قبل ما نخلص عشان تتغدا وما تتم بيوعها عقب موعدها المعتاد. إذا كان دوري في العزيمة العائلية فهي تخلص شغل المطبخ كله قبل ما تنام .. وبالتالي ترقد متأخر .. فأقول لها: نامي باجر وماله داعي تقومين بدري .. لأنها بالعادة تقوم من الفجر. بالنسبة للحدود ففي أمور بصراحة ما أحب أتكلم فيها بدون مناسبة أو موقف محدد يستدعيها .. لأني أصلاً ما أعرف هل الخدامة بتتصرف هالتصرف اللي يزعجني أو لا .. يعني مثلاً أنا ما أحب الخدامة تفتح الكبت .. وفي نفس الوقت ما أقدر أييها بدون مناسبة وأقول لها: لا تفتحين الكبت .... خدامتي السابقة في بداية شغلها قامت لما تشوف كريم مثلاً أو عطر فوق التسريحة تفتح الدرج أو خزانة الحمام وتحطه داخله .. فقلت لها: لما تشوفين غرض من أغراضي فوق التسريحة أو في الحمام خليه مكانه ولا تشيلينه. مع خدامتي الحالية حصل موقف ثاني .. طلبت منها شي .. ويابته لي الغرفة .. واللي حصل إنها دخلت مباشرة بدون ما تدق الباب أو تستأذن .... فكلمتها وقلت لها: لما تيين عندي الغرفة لا تدخلين مرة وحدة .. اصبري شوي لين أقول لج ادخلي. وفعلاً من يومها أبداً ما تدخل غرفتي بدون استئذان .. حتى لو كنت أنا في غرفة حد من عيالي مثلاً وهي بتحط شي في غرفتي تستأذن مني الأول وعقب تدخل تحطه. مهم جداً تعاملين الخدامة بإنسانية واحترام .. حتى لو غلطت عاتبيها ولوميها بإنسانية واحترام. خداماتي يقدرون هالشي جداً مني .. ودايما يقولون لي هالشي. عقب حوالي شهر من وصولها يتني خدامتي الحالية تقول لي إن أهلها يسلمون علي ويشكروني وايد لأني زينة معاها .. وحتى لما استخدمت الخدامة اللي بنظام الساعة كانت تبا تيي تنقل كفالتها وتيي تشتغل عندي وتقول: madam you are very good fdh |
رد : كيف أصبح منظمة ؟! .. مهره الغالية
اقتباس:
حبيبتي مهره نبدأ من حيث انتهيتي الانسانية والاحترام أنا حقيقة أعاملها بانسانية واحترام من نواحي كثيرة مثلا اشرتي يا مهره لنقطة الغدا انا عادتي أغرف لاسرتي وأترك لها نصيبها - غداها يكون براحتها وبالوقت اللي هي تحبه ومن القدر للصحن مباشرة - رواتبها تاخذها اول بأول - اطلب لها معانا من المطعم لو طلبنا حسب طلبها وذوقها - طبعا المطبخ بين ايديها تقدر تطبخ على راحتها مامنعها - وسالفة الاستقطاع حاولت وما عجبتها فتراجعت عنها وتوكلت على الله سبحانه .. ولكن عيبي الاكبر اعلم مرة وحدة وماحب اتابع بشكل دوري اتوقع منها تفهم عن طريق ثقتي فيها واعتمادي عليها بالتالي اكتشف اشياء ماتعجبني وتحصل المشادة هنا في بعض الاحيان ومع الاسف اكتشفت يا مهره انهن يحبن اللي يتم وراهن علشان يمشن عدل ومضبوط ماتحب تمشي عدل من نفسها ... اللي عندي بتكمل سنيتن قريب وتبي ترجع عندي ولكن كثر ما شفت من اخطاءها ومعرفتها هي لنقاط ضعفي في التعامل معاها ، يخليني استبعد هالشي هي من النوع يتمادى مش يستحي ويخجل .. يعني مثلا : اشتريت لها ملابس لعيدنا من فلوسي ، وقلت لها بكرة تروحين مع اختي تشترون النعل ورغم انها في عيدنا تضرب بوز وما تبا تلبس الا بالغصب تبا توفر الملابس لبعدين لما ترجع بلادها ( يعني ما تعرفين لهن .. تشترين لهن ما يبن يلبسن .. ما تشترين يغارن منج ومن الخدامات اللي لابسات ) المهم صار اني كنسلت الطلعة مالة اختي لظرف طارئ ضربت بوز وماعجبها ليش اخلفت كلمتي ( يعني شين وقواة عين .. فوق اني مب ملزومة اشتريلها ... واشتريت لها من محل حلو .. ومع هذا مش عاجبها) صدق اللي اختشوا ماتو - أطوف لها وايد تخريبها وتكسيرها وبينت لها أي خراب تسويه بتدفع من راتبها بالذات لو متعمد ولما صار خراب بسبب اهمالها ماقدرت استقطع راتبها رحمة بها والله لانه يالله يكفيها .. ومع هذا تتمادى فهمتي علي عينها جاحدة ما تشكر ! بنفس الوقت هي حنونة على ولدي بالنسبة لي ميزتها الوحيدة بها لأحمد ولدي وهذا اللي خلاني اتمسك فيها لحاجتي لها لاني اطلع للجامعة ! . . آلية الاستقدام أسويها يا مهره بس مش دائما تضبط عملتها مرة واكتشفت ان اللي جاية تبيني جسر لوصولها لبلد خليجي ثاني ! رغم براعتها في الشغل والتنظيف ! أبغيج تنتقدين اسلوبي معاها لاني مفكرة اتوجه لمكاتب الخدم قريب وشي ثاني مهره هل تؤيدين سالفة الجدول المكتوب لمهام الخادمة ؟ ولا تحسينه تزمت يصعب تطبيقه .. |
رد : كيف أصبح منظمة ؟! .. مهره الغالية
الفكرة من انج تمشين وراها مب بس إنها تتأكدين إنها تشتغل عدل.
مهم بعد إنها هي تحس إنج راعية بيت مهتمة ومسؤولة وتراقبين .. يعني لازم إحساس وقيمة إنج انتي البوس أو المدام يتم صاحي في ذهنها طول الوقت. في منهن تختلط عليها الأمور .. فلو شافتج حبيبة ومتسامحة كثير ممكن تهتز في ذهنها صورتج كصحابة البيت أو المدام .. وتبدأ تطيّح الميانة .... مب شرط تكون شريرة أو ما فيها خير .. لكن سبحان الله النفس البشرية جذي أحياناً. عشان جذي التوازن مطلوب .. كوني طيبة معاها مثل ما تبين .. وفي نفس الوقت مارسي دورج كراعية البيت المسؤولة اللي تتابع الشغل وتشوف إذا كل شي ماشي تمام والا لا. الخدامة مثلها مثلي لما أنا كنت موظفة .. ومثل أي موظف آخر .. مهما بلغت كفاءته لابد إن رئيسه أو مديره يتابع أداءه. ولأنها مثل أي موظف .. فطبيعي تتحمل المسؤولية إذا تسببت في إتلاف أو تخريب شي في البيت .. تحديداً إذا نبهتيها وطوّفتي لها كذا مرة. من كم سنة امي كان عندها خدامة اندونيسية .. امي كانت تقول لي إنها كذا مرة تحرق عبايات البنات وهي تكوي .. وكم مرة امي تكلمها وتقول لها انتبهي وديري بالج ولا تخلين حرارة الكواية عالية لأن خامة العبايات ما تتحمل الحرارة الزايدة ..... لين ذاك اليوم اللي عطيتها عباة يديدة عشان تكويها .. وحرقتها!!! ويتني تصيح وتعتذر!!! .... قلت لها: العباة بـ 350 .. بتدفعين هالشهر 150 والشهر الياي 200. وما قدرت تقول شي! ما دامها ما تسمع الكلام وتطنش التحذيرات اللي امي كانت تقولها فلازم تتحمل النتيجة وتدفع من جيبها حق اللي تخربه بإهمالها وطناشها. صح هي راتبها على قدها .. لكن احنا بعد الفلوس ما تطيح علينا من السما .. ومب من حقها تستهين بالفلوس اللي احنا ندفعها في أغراضنا حتى لو كانت بدرهم واحد. ويوم نقلت بيتي وبديت أعلم خدامتي على استخدام الأجهزة قلت لها بوضوح: أنا يايبة هالأجهزة عشان تشتغلين وانتي مرتاحة .. فديري بالج عليها لأنها لو اختربت فانتي بعد بتشتغلين لكنج ما راح تكونين مرتاحة وبتكرفين زيادة. . . . بخصوص أغراضها وملابسها .. أول ما يبت خدامتي الأولى خذتها معاي عشان تختار ثيابها بنفسها .. لكن في المرة اللي عقبها لما اشتريت لها ما عجبها .. وطلبت إني أبدل لها القطعة اللي اشتريتها. ورغم إني حاولت أكون في قمة التفهم والتسامح وأقول لنفسي: من حقها تلبس شي عاجبها .... لكن تمت في قلبي غصة وقهر من تصرفها! مع خدامتي الثانية لا أوديها ولا هم يحزنون .... أروح بروحي اشتري لها كل شي .. حتى نعال البيت والجوتي وانتي بكرامة. ومع دخول الشتا رحت اشتريت لها ملابس ثقيلة ودلاغات .. وعقبها بشوي يتني تقول لي إنها تبا بنطلونين زيادة .. وللأمانة يابت لي فلوس على أساس هي اللي تدفع .. بس أنا ما رضيت واعتبرت البنطولين تكملة ثياب الشتا اللي اشتريتهم لها ..... لكنها يتني مرة ثانية تبا تي شيرتات زيادة .. وبعد يابت معاها فلوس .. وهالمرة خذتهم منها. مهم عندي إنها تفهم إن الأمور الكمالية أو الإضافية المفروض هي اللي تدفع حقها من فلوسها. . . . جدول المهام بصراحة ما جربته .. لكن أتصور إنه ممكن يكون مفيد خاصةً في البداية لحين ما تتعلم الخدامة كل شي وتتعود على روتين الشغل. |
| الساعة الآن 03:11 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©