|
زعل زوجي المطول
اا السلام عليكم مشكلتي الحمدلله انتهت لكن قولوا كيف تصرفي فيها صح والا غلط وكيف المره الجايه اتعامل لو انعادت انا حامل زوجي كان بالدوام مادريت.الا دخل علي وانا نايمه وانا ماسويت الغداء قمت مفجوعه واعتذرت قلت معليش راحت نومه طيب انتظر نص ساعه ويصير جاهز.. قال لا جهزيه والعصر اتغدا قمت وجهزته يوم اذن صحيته وتغدينا عادي الرجال مافيه شي.. طلع ويوم جاء المغرب تخيل مايكلمني واتكلم مايرد بالعربي سااااافهني.. انا ضاق صدري وش سويت معقوله الغداء بس اعتذرت واول مره تبدر مني من يوم تزوجنا.. المهم قلت وش فيك وترجيته يقول مررره مارضى يتكلم يلعب مع ولده وانا حاطني مثل الجدار حتى مايناظر فيني.. تقهوى وطلع ارسلت له رساله قلت مايجيني نوم وانت زعلان اهدأ وقلي وش فيك ولك اللي تراضيك ومن هالكلام.. سففففهني تخيلوا ومارد.. اتصل عقب ساعتين وسلم وكان جامد نوعا ما وقال تبون شي قلت سلامتك وكان صوتي واضح اني كنت ابكي.. المهم جاء من بكرا تجاهله اخف ولكن لازال متجااااهل زاروني اهلي وسوا نفسه قدامهم اوكي وانا للحين ماني داريه اشفيه.. سافرت مع اهلي يومين ورجعت عادي كان يكلمني ولما رجعت بين لي انه مشتاق وانا مستغربه وين الزعل .. انا عديت الموضوع وبادرت وسولفت وكل شي مني تمام المهم بعد اياااام لما هدأت الامور سالته بيوم كان رايق قلت بالله وش زعلك ذاك اليوم زعلت وهجرت ورضيت من نفسك قال هذي المصيبه انك ماانتي عارفه خطاك قلت سالتك وماتجاوبني كيف اعرف خطاي المهم قال عشان النومه اللي نمتيها!!! تخيلوااا هذا سبب!!!! قلت انا بلحظتها اعتذرت واصلا انا تعبانه وحمل ممكن يصدر مني هذا الخطا وارسلت ومطنش كمان.. وزياده اول مره تصير مني.. تخيلوا سكتتتتتت وبدا يلعب ولده ولا عطاني رد.. ياناس قسم خاطري عتبان عليه مع اني مسويه نفسي عادي لان الموضوع له وقت اصلا بس قاهرني يعني واضح حريصه عليه ليش تطول الزعل المفروض يحمد ربه اني اتحاشا زعله (((((لذلك انا استشيركم مثل هذي الشخصيه كيف اتصرف مع زعله المبهم مره ثانيه))) ؟؟؟ ع فكرةلما نكون رايقين يحكي عن نفسه يقول انا لما ازعل عادي اصكها شهر زعلان ولا ابالي بس الحمدلله ماقد صارت معاي لان اصلا انا اتحاشا زعله. احاول اكبر عقلي دايم |
رد : زعل زوجي المطول
بصراحه دامك اعتذرتي المره الاولى يكفي....
تكرار الاعتذار في شي عادي او فوق طاقتك يجعل الاخر يتمادى ويكون في راسه انه الخطأ كبير ويستحق اكثر..... للامانه هذي نصيحه أبويه حبيبي قبل زواجي( قالي لاتكثري من الاعتذار في كل شي لانه يجعله مايتقبل منك شي فكيف لو حصل شي كبير رح يستمتع بذلك ) ... |
رد : زعل زوجي المطول
مرحباً أختي
بعض الأحيان النفس تكون قافلة والإنسان يزعل من أبسط شئ ولو كان مايستحق... بل وربما يكبرها ويعظمها في نفسه... ولكن إذا هدء... رجع كل شئ كما كان. والإعتذار بين الزوجين ترى عادي ومافيه إنتقاص... ولا يحتاج أن نحلل ونسأل عن كل مسألة... ولكن الذكي واللماح... من يفهم أن هذا الفعل يضايق الطرف الآخر... فلا يفعله مرة أخرى وهذا يكفي لإنجاح الحياة الزوجية. بارك الله فيك |
رد : زعل زوجي المطول
اقتباس:
مشكورة متفائله والله يخلي لك ابوك كلامه حكمه فعلا.. بس انا اللي خلاني اكرر اني ماني عارفه وش فيه وانا ببالي اني بسافر من بكرا مع اهلي يعني مو وقت الزعل .. الله يصلح حاله ويلين قلبه يرايك مره ثانيه اساله اشفيك اتلطف مره وحده اذا مارد وسفهني خلاص استنى يرجع من حاله ؟ |
رد : زعل زوجي المطول
اقتباس:
بس انا خاطري يزعل منه افكر اقول عشان اتحاشا زعله يضطر يزعل بدون سبب والله حيرني ذاك المره واللي قاهرني الحين مسوي انه عشان هجرني انا اتادبت طيب من الاساس انا ماخطيت يعني انا لو مكانه بشوفها نايمه واول مره يصدر منها الخطا بخاف عليها واول شي بسالها ليش نمتي عسى مافيك شي |
رد : زعل زوجي المطول
سأضيف لكلام متفائلة لموافقتي له
سؤالي هل يتأثر زوجك بالجانب الديني لو كنتوا رائعين و بجلسة هادئة ان العفو من شيم الكرام ، و كيف لو كان الخطأ سهل وأنت كريم و احنا نستاهل ، و هذا الأمر يخلق فجوة بينكما يعني تكلمي بالعموم ، لا تأتي بطاري احد المواقف و تحلليها فقد يضيق الحوار، فهو عارف ان الزعل مطول و مكابر و يتحدى نفسه بالعندليب،،فخليت أعقل منه |
رد : زعل زوجي المطول
مااقول تسفهييه قومي بحقوقه بدون زياده ...
زي ماتقدمي القهوه كل يوم مثلاً بعد العصر قدميها له تعودتي تسوي له مساج سوي له ... تكلمي معاه بكلام عادي خارج المشكله اذا رفض خليه براحته لاتتضايقي اضحكي مع ولدك واهتمي ببيتك ارجعي بعد ساعات تحدثي معاه بدون ماتجيبي طاري الموضوع الي مزعله شوي شوي بيهدأ بعد ماياخذ وقته ... دام اعتذرتي في البدايه وتقبل منك خلاص انتهى قفلي عليه لو هو حامل لسى في قلبه خليه ياخذ جوه ولا تضغطي ع نفسيتك مرده يرضى اهم شي لاتكشري ابتسمي له اذا تلاقت نظراتكم ولا تضعفي وترجعي تعتذري لو فتح الموضوع هونيه قولي لو سويت معاي كذا ترضى ازعل الفتره هذي كلها ... |
رد : زعل زوجي المطول
اقتباس:
والله كلامك جميل وفكرة اني اجيبها من بعيد مش على موقف معين هذي بياخذ ويعطي معي.. ماجت على بالي .. جزاك الله خير والله لايحرمك اجر ماكتبتيه |
رد : زعل زوجي المطول
اقتباس:
بااذن الله راح اسويها.. وعسى الله يبردني اتحمل تجاهله تجاهله قاسي الله يهديه.. لكن لازم اقوي قلبي.. ويارب ماينعاد الزعل جزاك الله خير متفائله والله لايحرمك الاجر |
رد : زعل زوجي المطول
اقتباس:
الله يهدي بالك حبيبتي |
رد : زعل زوجي المطول
اختي ساعات الرجال يكون راضي من الداخل بعد الاعتذار طبعا لكن يحاول انه يبين انه الى الحين زعلان ومايرضى بسرعه
عشان الزوجه تتأدب وماتاخذ الموضوع على انه سهالات يعني مو مشكله انام واذا جا وسأل وين الغدا اقول اسفه وراح يرضى هو هذا اللي يخاف منه فـ عشان كذا تحصلينه حسسك بانه زعلان وماينفع معه الاعتذار عشان تنتبهي ولاتعيديها |
رد : زعل زوجي المطول
عشان يوم واحد نمتي وماسويتي غداء وانت حامل وتعبانه زعل كل هذه الزعلة الا مثله عند أي مرض لا سمح الله يتخلى لانه يبغى زوجة لاتمرض ولاتتعب .... وانت بصراحه بإعتذارك كنتي راقيه كثير .... مره ثانيه اعتذار سريع ومشي الموضوع عادي ولا تخليه يحس انك عارفه بزعله طنشيه ومشي يومك معه عادي سوالف وضحك ولو شفتيه باقي زعلان سوي نفسك انك ما انتي عارفه ليش زعلان واسأليه ايش فيك لو قلك عشان ذاك الموقف اقلبي الطاوله عليه قوليله انا بشر امرض واتعب وماراح تموت لو ماتغديت يوم واحد في نفس الوقت المحدد ....
بصراحه لو كنت مكانك راح اعتذر زيك اول شي وبعدين لو استمر في زعله زي زوجك راح تطلع جنوني عليه وبأسمعه احلى موشح في الرحمة ... عشان مره ثانية يقدر تعبي انسانه انا زيه عندي احساس .... |
رد : زعل زوجي المطول
ياعمري عليكي انتي سكر
بالنسبة لي ماراح اعتذر النوم سلطان وزوجي تعود علي لدرجة يتصل يصحيني من النوم عشان اسوي الغداء ولاتعتذرين عن التعب والارهاق من حقك انتي بشر هو لو تعبان ونايم ماراح يعتذر بيقولك انا مو مكينة خلي الاعتذار للأشياء الصعبه |
رد : زعل زوجي المطول
اقتباس:
احس اني هدأت اكثر الله يعطيك العافيه ماقصرتي اختي الله لايحرمك اجر ماكتبتي يالغاليه ويجعله في موازين حسناتك. |
رد : زعل زوجي المطول
اقتباس:
بس انا احس بيبدا يتمادى مره ثانيه ولو مثلا كان الخطا مشترك وبادرت اعتذرت بااي طريقه اكيد بيسوي نفس هالمره بيطولها وبيقول ماتقدر ع زعلي. واكيد وقتها لو مقهوره بزياده مارح ارجع اعتذر عاد ازيد الطين بله اتوقع يصكني شهر.. مشكور اخوي وعسى الله يسخر لنا ولك يارب ويحقق لك ماتمنيت.. |
رد : زعل زوجي المطول
اقتباس:
عادي يصكها شهر لو زعل بدون مايكلمني.. لكن بجرب الحلول المطروحه وبشوف وش اللي يضبط معاه.. جزاك الله خير خواطر الله لا يحرمك اجر ماكتبتيه ويجعله في موازين حسناتك.. |
رد : زعل زوجي المطول
اقتباس:
لا ابدا مايحس ان الحمل من التعب دايم ع لسانه امي وامك كانوا يحملون ويولدون ويسوون اشياءاكبر من اللي تسووها.. بس ربك كريم.. والله بشوف جاني كذا حل بااجرب كل مره طريقه ونشوف وش اللي يضبط معاه الله يصلح حاله جزاك الله خير مرام على المشاركه الله يجعل لك من هم فرجا ومن كل ضيق مخرجا.. |
رد : زعل زوجي المطول
أختي الكريمة .. انتي طيبة وتريدين الناس كلهم مثلكِ .. والناس يختلفون بطبيعة الحال ..
زوجك أعجبني حين حضور أهلك جعل الأمور عادية ولم يبين شيئ هذا شعور طيب .. في حياتكِ حاولي الإبتعاد قدر المستطاع عن مايثير زوجكِ ويغضبه ..وأنتِ مأجورة على فعلكِ هذا..! بارك الله فيكِ ووفقكِ. |
رد : زعل زوجي المطول
اقتباس:
الله يجزاك خير اخوي ولا يحرمك اجر ردك ع موضوعي والله انها نعمه وانا شفته جميل سواه انه ماخلى امي تحس بشي.. والله هذا اللي احاول فيه اني من الاساس ماازعله وعسى الله يهدي قلبه ويصلح حاله ويسخره لنا |
| الساعة الآن 06:54 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©