|
انا تعبت من حياتي و انا صغيره
كنت متفاءلة بكل شي.
اشوف ان كل شي سيء رآح يتغير للأجمل. كنت اشوف الحيآه حلوة.. كنت ادرس قرآن و ادرس بالمدرسة و طول يومي كفآح و رضا عن نفسي صحيح كنت اواجة اشياء توجعني و لا بد من ذلك بس كنت اطنش و لا كان فيه شي يأثر علي مره و كان اهم ماعندي دراستي الصبح و العصر.. كنت عباره عن البنت الوسطى المدلله و كل مسؤليتي نفسي.. لكن من سنة حياتي تغيرت!! اشيآء كثيره يرهقني ذكرهآ اخوآتي الاكبر مني تزوجوا و صرت لحالي بالبيت مع خواتي الصغار و امي و ابوي و صار طول الوقت لحالي و لا صرت ادرس بدور التحفيظ لأهمية و جودي بالبيت عند اخواتي بغياب امي الي تذهب لعملها كل عصر. امي كنت اتمنى اكون مثلها لكن الان!! ابدا صرت اشوف الحياه ذابلة بسبب تصرفاتها معي علاقتي معها صارت سطيحة تماما و حتى سوىلفنا محدوده عن اشياء تهمها فيها مصلحتها بس و لو يصير اي غلط صغير مني لو مثلا بالقهوه تصرخ و تقول كلام قوي جارح .. انا بعد المشاكل و المعاناه الي مرت علي هالسنة و كانت معاناه لكل اهلي و اولهم امي و كان يتقطع قلبي عليها كنت اتألم و احترق بداخلي و كل ليلة ابكي لحالي و كان عندي امل ان الامور بتغير وان هذي الدنيا ما تدوم.. كان شي ممكن يدمر و يقهر كل بنت بعمري قضت كل حياتها ببيت دآفي بدون مشاكل بدون حقد بدون خيانة!! كان باقي فيني من نفسي القديمة و كنت اتفاءل خير.. لكن بعدها جت خيبه دمرتني م بقت فيني ذرة امل بهالحياه.. و بعدها تعبت نفسيا و مليت وصرت بليدة ظاهريا و صاروا امي و ابوي يشوفون اني م احس مثل الجماد تحطها بمكان تبقى فيه و هي ساكته م كانوا يعرفون اني كنت اموت بداخلي الف مره.. كنت اكتم و لا افضفض عن الياشوفة و كنتماسكة نفسي عشان مااضايق خواتي الي بالتو بدت حياتهم الزوجية.. و كنت احس ان هذا شي كبير وكل بيت له اسراره و لو تكلمت لاحد اليوم بندم بكره و من الالم الي كنت اتالمه لوحدي جآني قولون عصبي حاد فجاه .. و لا عشت العيد مثل ماتعودته و كنت ذبلانه بكل ماتعني الكلمة لاني تعبت نفسيا وجسديا حاليا انا انسانة بليدة ظاهريا عباره عن جليد و من داخلي احترق و امي صارت تشغل نفسها بعملها و انا كنت أأيدها بهذا الشي لكنها تمادت و صارت تنساني.. او تنسانا! و صار كل الي بيننا انها توبخني و الشي الودي الي بيننا بس لما اجي اسمع لها حفظها. تعبت و الله تعبت من كلامها السم على اتفه المواقف و تعتب من مشاعري اتجاه ابوي ابوي كان اججمل ما بحياتي و كان مايشوف من بناته مثلي و لا اشوف مثله لكن الان! قلبي يتقطع لما اشوفة.. انقهر من المشاعر الجديده الي انولدت بداخلي اتجاهه انقهر من شعور حبة الي احسة صار بارد بداخلي اكثر شي يتبعني لما اوبخ نفسي اني حقيره بعد كم موقف يصير بيننا!! و هو مره قالي وين فلانه القديمة؟! اوجعني سؤاله.. اوجعني خنقني فوق خنقتي الي فيني كان ودي اصرخ لحظتها و اقوله يبه انا بعد ادور عليها ! مشتاقه لها بس كلة منك!!.. انت سبب كل شي لما اعاتبه بداخلي اتعب اكثر.. انا تعبت من كل شي تعبت من الوحده الي اعيشها ببيتنا اعترف اني اغنيت نفسي و روضتها انها ماتحتاج لاحد و كم مره اختي تضغط علي تسألني وش فيني بس ارفض اتكلم اعترف اني خايفة على نفسي اي خايفة على نفسي خايفة ادور الي نقصني هذا عند شخص ثاني!! و من شدة تبلدي الي صابني و روضت نفسي عليه صار ماعندي مشكلة بأي شي و لاتهمني نفسي و احس وجودي بالحياه مثل عدمة اذا امي و ابوي و صرت احس اتجاههم هالمشاعر و صرت اعيش معهم هالمعاناه ليش اعيش؟! احس بخنقه ياناس بداخلي احس اني احترق. بعمري ماتصورت حياتي بتنقلب كذا.. اني بحس بهالمشاعر و بحس بهالظلام و بكرة صوت الناس و انا اكثر شخصيه اجتماعية.. صار عالمي هو غرفتي.. احسها اكثر شي يحن علي مدري وش اكتب بس انا تعبت و خايفة على نفسي و من نفسي و احس بقهر كل ما اشوف حالي الى وين تدهور و صرت احس بالهمشاعر اتجاه امي و ابوي و كيف شخصيتي تغيرت و كيف صرت اشوف الحياه بسوداوية و اتألم لوحدي مادري العتب علي او على امي او على الدنيا!! مادري غلط اني اكتب هنا او صح ؟ مادري اذا انا ابغا افضفض او ابغاكم تساعدوني |
رد : انا تعبت من حياتي و انا صغيره
كم عمرك ؟!
|
رد : انا تعبت من حياتي و انا صغيره
عمري 17
..... |
رد : انا تعبت من حياتي و انا صغيره
كلامك كله دا بدون فائده الحين نبي نعرف وش قلب حياتك وش السبب
|
رد : انا تعبت من حياتي و انا صغيره
صدقيني كل اللي تحسين فيه شي طبيعي بعمرك
و هذي هي فورة المراهقة يا أبيض يا أسود انتي في طريقك لعالم اﻹستقﻻليه و ابشري بإذن الله بشخصية حديديه و انتبهي من الوحده و من ان يقنطك الشيطان من رحمة الله مرحلة و تعدي اصبري على نفسك |
رد : انا تعبت من حياتي و انا صغيره
وش سوا ابوك ؟
|
رد : انا تعبت من حياتي و انا صغيره
م احب اتكلم عن الي سوآه ابوي
.. مشكلة ابوي هذي خلصنا منها و بقاا اثرها و لا ابغا اقلب المواجع بس مرآت افكر اعيش لوحدي اكثر و لا احاول اتقرب من امي و لا افكر فيها مثل ما احسها مطنشتني |
رد : انا تعبت من حياتي و انا صغيره
ما فعله أبوك أساء به لك أم أساء لامك
|
رد : انا تعبت من حياتي و انا صغيره
امي م كانت كذا ابدا.
امي كانت و نعم الأُم و كانت ام مثاليه . لكن بعد جرح ابوي تعبت . و لما رجعت لحياتها الطبيعيه زي اول الحمدلله تصالحت هي و ابوي لكنها تغيرت معااي كثير !! و يمكن معنا كلنا!! لكنها تجرحني تجرررحني كثير |
رد : انا تعبت من حياتي و انا صغيره
اقتباس:
و جررررحني و خلاني اشوفة شخص ثاني |
رد : انا تعبت من حياتي و انا صغيره
اخواتك المتزوجات يعرفوا الي سواه أبوك؟
ليش ما اخدوا منه موقف مثلك هدا لأنهم فاهمين انه الزوج و زوجته يصير بينهم مشاكل و يغلطواعلي بعض و يرجعوا يتصالحوا و انت مضخمة الأمر في عقلك كأنك مسؤولة عن خلافهم |
رد : انا تعبت من حياتي و انا صغيره
ايه يعرفوا
كلامك صح بس بحالتي غير لان حتى هم مجرووحين منه و ما استبعد يكون اكثر مني لكن بعدين لما صار فيه تفاصيل و خلافات انا م صرت اقولهم اتعب نفسيا لما اقعد انقل اخبار توجعني او اشرح موقف كذا |
رد : انا تعبت من حياتي و انا صغيره
الحين الامور الحمدلله هديت
و كل شي تمام .. لكن امي تغيرت معآي و حتى مع اخواتي الصغار صرت انا اتحمل مسؤليتهم و مرات هي تحن ع اخواتي الصغار و تتقرب منهم شوي بس انا!! ع الهاااااامش و ابوي عجززت ارجع احبه مثل قبل ياناس هذا ابوي!! |
رد : انا تعبت من حياتي و انا صغيره
امك تشوفك كبرت و مش محتاجة رعاية و تشوفك تساعديها في تربية اخوانك فتظن انه أمورك طيبة
و لو تعرف معاناتك اكيد ماةتهوني عليها انت ما تدرسي؟ |
رد : انا تعبت من حياتي و انا صغيره
إختناق تبين نصيحه من مجربه امي وابوي من عرفتهم هواش وكنت ادخل نفسي بينهم واوقات هما يدخلوني بمشاكلهم مرات اوقف بصف امي ومرات ابوي وكنت اكثر شي مع امي واللحين مات ابوي وندمانه قدددددددد الدنيا اني تدخلت بينهم في يوم او كنت بصف امي عليه حتى لو كانت على حق تو اللحين استوعب انو كان مفروض افصل بين علاقتي فيهم ك ام واب وبين علاقتهم هم كزوجين وما كان لازم أتدخل بأي شي هم كبار بما فيه الكفاية ويعرفون يتصرفون ويحلون امورهم وحدهم من غير تعاطفنا مع احد فيهم انتي مالك ومال اللي يصير بينهم عليك بإنك بنتهم ولهم عليك حق البر فقط لا غير ومن ناحية امك هي بشر واكيد كانت صدمه لها وان شاء الله الموضوع مو محتاج غير وقت تهدى فيه النفوس ويبرى الجرح اصبري عليها هالفتره وبترجع مثل قبل ان شاء الله اهم شي افصلي مشاعرك تجاههم من اللي يصير بينهم وعيشي كللللل ثانيه معهم الايام تمررر بسرعه وما نحس |
رد : انا تعبت من حياتي و انا صغيره
اقتباس:
اقتباس:
اي ادرس ثآنوية الله يجزآك خير.. |
رد : انا تعبت من حياتي و انا صغيره
تعوذي من الشيطان الرجيم واذكري الله
علاقتك بأمك وأبوك مالك فيها هم زوجين ينجازوا مع بعض أمك وأبوك لهم عليك الاحترام والبر بهم غير ذلك خليه على الله الموقف اللي مر عليك أي نعم صعب بس ان الله غفور رحيم فكيف بعباده غيري طريقة تفكيرك تتغير حياتك كنتي طفله همها نفسها اللحين كبرتي وصرتي مسؤوله بس ماتوصل لك لهذه الدرجه النقله الكبيرة اللي صارت لك هي اللي خلتك كدا أمك اللحين تشوفك أنتي الكبيرة وسندها بهالحياة وأنتي افتقدتي حنانها بالنسبه لحفظ القرآن مايمنع وجودك في البيت عن حفظه كل ماتسمعي لأمك حفظها أنتي اختبري نفسك معاها ومن باب تجربة أني من كنت في ثاني ابتدائي أمي كانت تعتمد عليي في العناية باأخوتي لأني البنت الكبيرة كنت أحس بمتعة وياهم يمكن لأني أحب الأطفال فكنت أستغل بوجودي وياهم فكنا نلعب ونستانس واللي في خاطرنا نسويه اللعب ماله عمر محدد انظري إلى الشيء الإيجابي من عناية باخوانك إذا تزوجتي مابيصير عندك صعوبة في العناية بأطفالك لأنك اكتسبتي خبره بعكس البنات اللي في عمرك مايعرفوا يدبروا روحهم وإذا صرخة عليك حطي لها عذر أكيد متضايقة من شيء حبي رأسها وقولي لها إن شاء الله يالغالية من كلامك أحس أنتي شمعة البيت إذا انطفت انطفى روح البيت فحافظي على شمعتك خلي الضربة اللي ماتموتك ( بسم الله عليك ) تقويك غيري نظرتك إلى حياتك وشوفي الأمور الإيجابية فيها ودائماً شمعتك خلها مشتعلة مسوؤليتك اتجاه أخوانك أبداً ماهي عائقك لاحلامك وطموحك لاتكبتي روحك الكبت والبكاء طول الليل مايفيد ولا ينفع بالعكس يضر ويجب الأمراض استمتعي بحياتك بما يرضي الله حسيتي روحك ماتضايقة سوي أي شيء يريحك ممكن حتى تصرخي بأقوى ماعندك سدي فمك بأقرب منشفة وطلعي كل الكبت اللي في نفسك أو بالرسم أو بالكتابة أو الطبخ أو التنظيف أي شيء تحسي يخفف عنك خططي لحياتك احنا مابنعيش إلا مره وحده ولا حد يعرف يومه لاتفكري كثير في بكره فقط تفائلي وتفاآآآآآآآئلي وتفاآئلي وعيشي يومك وكلي أمرك لرب العالمين ابدأي يومك بالصدقة والقرآن حتى لو آية والأستغفار واختميه بالتسبيحات والتهليلات والحوقلة |
رد : انا تعبت من حياتي و انا صغيره
أقولك
عندي لك سحر يخلي أمورك كلها تتغير صدقيني ومن باب تجربة بعد السحرهو سورة البقرة أي نعم سورة البقرة هي السحر الحلال لكل المشاكل من أقراها كذا الأمور تنفك والنفوس تهدى والعلاقات تقوى ومنها فرصة تحفظي سورة البقرة وتردديها على طول تحياتي / أختك أمل الأيام |
رد : انا تعبت من حياتي و انا صغيره
السلام عليكم ورحمة الله وبركاته ..
صغيرتي انبثاق وليس اختناق : ) تتحدثي عن الجميع وتنسين نفسك .. أخبريني ماهي أهدافك ؟! كيف علاقتك مع الوالد والوالدة ؟! ماهي مرتبتك بين أخوتك ؟! كيف أثرت مشاكلهما معك ؟! أوصفي لي مشاعرك ؟! ماهو أكثر شيء يضغط عليك الآن وجعلك بمثل هذه الصورة ؟! فضفضي بكل ما بداخلك تحتاجين أحد يسمعك .. فرج الله همك .. |
رد : انا تعبت من حياتي و انا صغيره
الله يجزاكم خير ..
بعد م كتبت الموضوع بفتره تقريبا اممي تغيييييرت و انا اخذت من كلامكم نفعني كثييير الحمدلله حتى لو م جاوبت على الاسئله حاولت اكون انسانة ايجابيه و حطيت لامي الاف الاعذار و تغاضيت عن مشاعري السلبيه اتجاه ابوي اعترف اني تعبت و انا احاول مع نفسي لكن الحمدلله ما ادري ايش غيّر امي.. لكن احس انه وفاة ابن صديقتها.. لاحظتها صارت تتأملنا انا و خواتي و صارحتني انها ندمت بانشغالها خلف زوجها و نست * بناتها اغلى ما عندها بهالدنيا * لما قالته انا م وضحت لها شي اني كنت محتاجتها او اني عتبانه عليها لكن فعلا الحمدلله كانت هالجملة طعمها عذب تسللت للمراره الي بداخلي لكن برضو اعترف ان تغييرها جا في الوقت المناسب الي كنت فيه على شرفة الانهياار التااام و حاولت م ادخل هنا مره ثانيه و اقرا كلامي عشان م ترجع فيني المشاعر السلبيه او اتذكر مشاعري الي اتناسها الان.. و الحمدلله على كل حال و الله يجزاكم خير و يسعدك كل من وضع حرفة هنا ل يساعدني |
رد : انا تعبت من حياتي و انا صغيره
الله يسعدك ويدخل الفرحة في قلبك ويجمعكم دوما
تقربي انتي لها وافتحي قلبك لها وسوف تجدين قلب امك كبير |
رد : انا تعبت من حياتي و انا صغيره
والله مافيه أحد يحبك كثر أمك وأبوك، مهما حصل بينهم إنتِ لا تدخلي نفسك في المنتصف، خليك محايدة وابعدي نفسك عن مشاكلهم لا توقفي مع أحد ضد الثاني تراهم عينين في راس ما أغلى من هذا إلا هذا والله لا يبين غلاتهم لك ..
غيير كذا مامتك يمكن مضغوطة ونفسيتها صفر هالفترة راعيها وداريها وباريها وشيلي عنها والتمسي لها مليون عذر، ولا يجي في بالك إنها ماتحبك صدقيني لو قلتي آه أول من يسمي ويسهر عليك هي . عندي لك فكرة/ خذي مذكرة صغيرة وكل ما زعلتي من أمك ولا أبوك أكتبي فيها الموقف اللي زعلك .. كل فترة ارجعي اقري في مذكرتك راااح تزعلي من نفسك كيف أخذتي على خاطرك منهم عشان كم موقف بسيط لأنك راح تلاقي قدام كل موقف ضايقك عشرين موقف حلووو منهم ! وأخيييرا / انتبهي من نقطة إنك تدوري اللي ناقصك عند شخص ثاني !! إنتِ كذا تعاقبي نفسك و ترميها بالنار ولا تحطي ظروفك مبرر إنتِ عاقلة ماشاءالله عليك وعارفة إن الواحد ما يمشي في هالطريق خوفا من الله مو خوفا من أم ولا أب وصدقيني اللي ما يشبع من بيته ما يشبع برا البيت .. لا تدوري اللي ناقصك برا بيتكم ياقلبي طالما الغالين عايشين اتهني بقربهم واتدللي ع أبوك أكيد مشتاق لضحكتك . . |
رد : انا تعبت من حياتي و انا صغيره
امي والله احبها و اعشقها موت و كل كم يوم لازم ازورها و ابوسها ع خدها مو بوسة سلام
لا هذي تجي بعد السلام \ و احضنها بعد هي استغربت مني بس هي وحليلها محتاجة هالشي لانها واااعليي من الطراز الاولي و ابوي لما حضنته وهو جاي من السفر اول مرة احضنه بحياتي والله مسكني و حضنه ريحني سبحان الله بيتنا كان كله رسميات علاقتنا ف بعض كلها رسمية بس اللحين بدا يتغير الوضع الحمد لله ثم الحمد لله ثم الحمد لله |
رد : انا تعبت من حياتي و انا صغيره
اقتباس:
انبثاق الحبيبة سعيدة جداً لهذه التطورات ، الوالدين قسوتهم مهما كانت فهي رحمة فوجودهم نعمة حافظي عليها دوماً ، وادعي لهما .. وفقكِ الله .. |
| الساعة الآن 07:24 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©