أشك في خيانة زوجتي لي .(حلت _الرد 53)
 

السلام عليكم و رحمة الله

لا حول و لا قوة الا بالله،، و الحمد لله الذي لا يحمد على مكروه سواه.

أخوي أنا متزوج منذ حوالي 6 أشهر و حياتي مع زوجتي سمن على عسل لا مشاكل و لا اي شي أبدا غير انها بعض المرات تشكو من عظم مسؤلية الزواج عليها و هي بهذا السن الصغير نوعاً ما (19 سنة).

تعاملي معها قمة قمة قمة بالروعة و هذا هو اعترافها لي اني اعملها احسن معاملة و كل بين فترة و فترة تأكد علي تكفى يا فلان لا يتغير أسلوبك معاي خليك مثل كذا طول العمر و ارد عليها بابتسامة و أقول لا الى الان اعتبر نفسي مقصر معاك و راح اتغير و أعاملك احسن.

و الشهادة لله البنت قمة قمة بالأدب و الأخلاق و من بيت كريم و خواتها المتزوجات قبلها مضرب للمثل بالطاعة و الاحترام و محافظة على صلاتها و تحترم و تضع والدتي فوق رأسها و اذا شكرتها على حسن تعاملها مع والدتي تسكتني و تقول هذه امي الثانية و البنت غصب عليها تعامل أمها كذا وووو

زوجتي قمة قمة من جميع النواحي و جتني زكام عادي قبل فترة كانت راح تموت من البكاء طوال ثلاث ليالي و اذا سألتها ليش تبكين تقول يتقطع قلبي عليك و انت تتألم و خايف عليك وووو

يا بشر مو ناقصنا شي كل شي حلو و ممتاز و نموت ببعض.

و دايم تحلف لي بالله بمقدار حبها لي و تعلقها فيني من يوم كانت صغيرة (انا خطبتها وعمرها 15 سنة) و انها متعلق فيني لدرجة الجنون و لو صار فيني شي راح تموت وراي.

و أنا رجل ناجح بحياتي الاجتماعية و العملية و كل اللي يعرفوني يمدحون فيني و باخلاقي و يحترموني. مو ناقصني شي أبدا و لله الحمد.



الطامة الكبرى و المصيبة صارت قبل ثلاث أسابيع :

جتني الصباح قالت شوف فيه رقم اتصل علي البارحة بوقت متاخر بالليل 4 مرات تقريباً قلت عادي اتصلي على الرقم شوفي مين ؟

قالت لا خلاص ممكن يكون غلطان و لو كان شخص يعرفني او شي ضروري راح يتصل مرة ثانية.

أنا استغربت انه ما كان عندها فضول تعرف من اللي اتصل عليها ؟!!

بعد اسبوع أخذت جوالها العب بالألعاب و كذا (بينا عادي جوالي بيدها و جوالها بيدي) تذكرت قصة هذاك الرقم اللي اتصل عليها قلت خلني امر اشوف السجل ؟ حصلت فيه مكالمة بعد هذيك الليلة ب4 ايام لمدة 12 دقيقة و وقت المكالمة انا كنت بالبيت موجود بس ما اتذكر كانت تتكلم قدامي ؟ و الى الان ما حفظت الرقم بجوالها !!

المهم بعد هذه المكالمة ب5 ايام شيكت جوالها حصلت فيه مكالمة ملغاه من جوال زوجتي لهذا الرقم يعني أما دقت و سكرت او ألغت المكالمة قبل لا تتم ؟!!

بصراحة وقتها بديت اشك بالوضع و أخذت الرقم و استخدمت النمبر بوك علشان اعرف اسم صاحب الجوال ؟ طلع رجال !!!! قلت ممكن تغير صاحب الجوال و صار بنت و لاكن اتصلت عليه و فعلاً طلع رجال !!!



يا ناس انا عندي دليل قاطع الان انها خانتني !! ممكن يكون فيه مكالمات اكثر و مسحتهم الله العالم و نست تمسح هالمكالمتين ؟!



بس مستحيل يا بشر اصدق انا مو أنسان غبي ينضحك علي لاكن جد

البنت قمة بالبراءة و العفوية و قلبها طيب يا ناس امي العجوز قالت مرة رجولي توجعني بسبب البرد حصلتها راحت للمطبخ و جابت سطل مويا دافئ و جلست تدلك و تغسل رجولها و الوالدة طبعاً حاولت ترفض لاكن هي حلفت بالله انها تسوي هذا الشي !!!

و أساساً ليش من البداية قالت لي شوف هذا الرقم اتصل اربع مرات بالليل ؟

و ليش تحبني و تحط صوري عندها بالواتسب تفتخر فيني قدام الناس ؟

و ليش لو اطلب منها اي شي تنفذه لي بدون نقاش ؟

يا ناس البنت لو كانت راعية مكالمات كان تصير راعية سهر ؟!! هي لو تنطبق السماء على الارض ما تتعدى 9 و نص بالليل ؟!! سألتها غريبة ما تسهرين قالت هذه عادة خواتي كلهم امي ما تسمح لنا نسهر أبدا غصب ننام و خلاص تعودنا ؟!! أمها انسانة فاضلة و تهتم ببناتها كثير و مستحيل تسمح لهم يسوون شي خطأ ؟


زعلان معصب مقهور طار عني النوم ودي ادخل الغرف و اضربها من الحقد اللي في قلبي عليها بعد كل هذا الأحسان تجازيني بالخيانة بس بعد للحين مو قادر اصدق ؟!!

عموماً عندنا ضيوف (نساء و رجال) بالبيت حتى يوم السبت راح أتحمل و امسك أعصابي حتى نهاية يوم السبت و عندها المواجهة ؟


الود ودي أطلقها و استر عليها اذا فعلاً كانت خاينة لانه راح اكون متاكد انه كان لها ماضي اسود قبل زواجي فيها.

لاكن المصيبة انها بنت عمي و هو معتبرني مثل ولده و أمها اعز صديقات الوالدة و عندها خوات صغار راح ينقطع عنهم نصيبهم لو تطلقت أختهم لانه الناس اكيد راح يتوقعون ان سبب الطلاق خيانة لانه ما فيه سبب ثاني غيره ؟؟

انصحوني وجهوني وش اسوي لو طلعت فعلاً خاينة (90٪) ؟

اضربها ؟ عمري ما فكرت بالضرب و ما راح اسويها.

احذفها ببيت اهلها كم شهر ؟ الناس راح تشك و تشوه سمعتنا و يروح عليها مستقبلها بالجامعة ؟

صعب علي اتقبلها لو تأكدت انها فعلاً خاينة ؟! و مستحيل أثق فيها أبدا أبدا و ارتاح انها ببيتي راح اشك بكل شي ما راح ارتاح بدوامي و هي بالبيت ؟ مستحيل أثق فيها انها تربي بناتي لو الله رزقني ؟ و هذا أساسا اذا رضيت اجيب منها عيال.

بالنسبة للستر لا احد ينصحني فيه هذا شي اكيد و مسلم فيه و ناوي عليه.


لا حول و لا قوة الا بالله، اللهم أجرني بمصيبتي.

رد : زوجتي 90٪ خانتني (انقذوني قبل انفلات الأ
 

ا خوي استهدي بالله انا متأكده انه وحده من صاحباتها مكلمتها من جوال ابوها اخوها اي شيء والدليل انها مكالمه وحده و12 دقيقه يعني اش بتكون مغازل وخيانه مستحييل... فكر شوي بعقلك لايعميك الشيطان..

رد : زوجتي 90٪ خانتني (انقذوني قبل انفلات الأ
 

طيب و المكالمة الثانية الملغية ؟؟ و طيب ممكن فيه مكالمات اكثر و مسحتهم و نست هالمكالمتين ؟؟

ممكن كان لها ماضي مع هذا الشخص و ممكن و ممكن ...

آه يالقهر بس والله الى الان مو مصدق مستحيل هلا آدمية اللي نايمة جنبي تكون خاينة....

رد : زوجتي 90٪ خانتني (انقذوني قبل انفلات الأ
 

اهلا وسهلا فيك أخي

لا تطلق مفهوم الخيانة وهي قد تكون بريئة, أحسن الظن لا يكن تفكيرك دائما أنها خانتني وأنها تكلم رجال !!

لك حل بسيط جدا وهو استعذ بالله من الشيطان الرجيم واجلس معها جلسة محترمة صارحها بكل ما رأيت في جوالها
واسمع منها وهدفك الوصول لحل.

أخيرا زوجتك وضعت أنت ثقتك فيها , فتأكد أنها وضعت كل شيْ لها لك حتى لو تفتدي بروحها لترضيك .
ثق تماما أنها لن تخونك بهذه السهولة فأنت زوجها وقبل ذلك ابن عمها فكر بعمق ولا تستعجل وتحكم وفقك الله يا أخي ..

رد : زوجتي 90٪ خانتني (انقذوني قبل انفلات الأ
 

اخي اهدأ
واذكر الله
ولا تجعل للشيطان مدخل بينكم
ومعروف اللي ورآه شي دايما يكون حريص انه يحذفه
صدقني سوء فهم لاتخلي الشيطان يخرب حياتكم
ياما صحباتي كلموووني من جوالات اخوانهم او بوهم
لا تستعجل أبدا
وخليها على ربك
وكثير انا كلمت من جوال اخوي او زوجي للضروره
لاتخسر راحتك معاها
ولا تهدم شي
أتفاهم معاها وافهم منها وأحسن الظن فيها
وصدقيني ربي بيعطيك على قد نيتك
اسأل الله لك بالفرج وأن يكفيكم الشر ويبعد الشيطان عنكم أستودعكم الله من كل شر

رد : زوجتي 90٪ خانتني (انقذوني قبل انفلات الأ
 

طيب اسألها بس لاتبين انك شاك بتطيح من عينها بعدين هو سؤال واحد قول الرقم اللي خبرتيني عنه عاد اتصل عليك شيء وهيا اذا عندها شي بترتبك مع انه اكيد ماعندها الا كل خير... اما تجلس تضرب اخماس اسداس من راسك مايصير

رد : زوجتي 90٪ خانتني (انقذوني قبل انفلات الأ
 

اعوذ بالله من الشيطان يارجل والله ان حالتي حالة و وجهي تغير حتى هي ملاحظة تغير وجهي و تسال وش فيني و انا متحمل و ساكت علشان لا تصير فضيحة قدام الضيوف اللي عندنا بالبيت. المشكلة انها بنت عمي و مو اي عم أطيب و افضل اعمامي مستحيل انزل رأسه بين الرجال هو ما قصر معاي أبدا و البنت ما فيه احسن منها و لو مو شايف بعيني كان ما فكرت حتى التفكير و بعد وقت المكالمة انا كنت بالبيت مستحيل تغازل و انا موجود اقل شي تنتظر الى ان انام او وقت ما اكون بالعمل انا للان مو مصدق بس اخاف اني زودت الثقة فيها شوي و استغلت الموضوع او كان لها ماضي اسود ؟؟

رد : زوجتي 90٪ خانتني (انقذوني قبل انفلات الأ
 

هذه المشكلة اكيد لو طلعت انا مخطئ راح تزعل مني جداً و علشان كذا ودي ما اسألها أساسا علشان أحافظ على الحياة الحلوة اللي إحنا فيها لاكن ما اتوقع اني اقدر اسكت لازم أواجه شكوكي علشان اقطع دابر الشك،،،

المشكلة اني اعرف طبعها زين زين زين لو اقول لها تذكرين هذاك الرقم رجع اتصل عليك مرة ثانية ؟ راح تقول لا هي كذا طبعها تبغى تريح و ترتاح تختصر الموضوع و تقول لا،،،

رد : زوجتي 90٪ خانتني (انقذوني قبل انفلات الأ
 

يارب يكون كلامك صح يارب،،،

والله صعب اصدق اللي صاير و التفكير اللي برأسي

رد : زوجتي 90٪ خانتني (انقذوني قبل انفلات الأ
 

فرضا قالت لا اخوي قول شفت مكالمك ليكي تبع الرقم بالصدفه يعني ببرود قولها من طلع زميله لك ولا ايش؟؟
عادي كأنك تسولف معها مو كأنك تحقق..

رد : زوجتي 90٪ خانتني (انقذوني قبل انفلات الأ
 

قد يكون رقم مزعجها وخايفة تقولك وعارفتك وخابزتك انك ماراح تصدق و على ادناة الدون ترمي بشكوكك عليها بدون ادنى دليل مثل ما انت قاعد تسوي الحين!

وقد وقد وقد.. بعدين مافي اوصاف تنطبق عاللي يخونون ويخربطون وغيرهم لا!

اجل اذا تسهر معناته تكلم؟

اتق الله يارجل! واذا انت شكاك اطلقها لوجه الله للي يقدرها!

توها صغيرة.. هالبنت جوهرة! شوي وتشيلك من الارض وقايمة بامك وحاشمة بيتك!

المشكلة بديت تتخذ الاجراءات وتفكر وكان شكوكك صحيحة ومؤكدة ولا بعد وصلت فيك تفكر لما بعدها واللي بعدها!

ماضيها مالك دخل فيه مثل ماهي مالها علاقة بماضيك

ويقولون لنا ليش تخافون من الزواج وتامنون ومستقبلكم واعماركم على فلوس وبيت ولا تامنون ازواجكم.. الله يصلح الحال!

رد : زوجتي 90٪ خانتني (انقذوني قبل انفلات الأ
 

ربي بيفرجها لك
ماهي خاينتك وانت عندها بالبيت
لا تخلي الشيطان يخرب فرحتك ياعريس
الله يستر عليكم دنيا واخره

ومن ناحية السهر انا أمراءه متزوجه وباذن الله اخاف ربي وصالحه وللحين ما نمت
وتحب السهر مِن زمان
لاتربط الأمور ببعض

زوجتك نادره ماشاءالله

رد : زوجتي 90٪ خانتني (انقذوني قبل انفلات الأ
 

بنظري راجع نفسك انت وشوف تسرعك وشكوك
هذا رقم بالجوال شوف ايشً سوويت بحالك
وشكيت في بنت الناس
اذا استمريت بهالشخصيه حياتك ماراح تستمر والله يعينها عليك
لا تزعل مني هنا احنا اخوه
ولازم نوضح لبعض

رد : زوجتي 90٪ خانتني (انقذوني قبل انفلات الأ
 

مع الأسف الشديد أخواتي قد تكوني ما فهمتي المقصود ؟

وين قلت ان اللي تسهر تكون صاحبة مكالمات ؟
أنا قلت العكس

من صفات صاحبات المكالمات أنها تكون تسهر

بس ما قلت انه اذا بنت تسهر تكون صاحبة مكالمات أبدا و انا اقولك خواتي يسهرون و عادي أفهمو كلامي الله يجزاكم خير،،،

بالنسبة تروح لواحد يقدرها ما فيه احد راح يعاملها بنفس الطريقة اللي اعاملها فيها و هذا هو السبب اللي يخليني جداً مقهور و مو مصدق

رد : زوجتي 90٪ خانتني (انقذوني قبل انفلات الأ
 

.........

طاحت ولا أحد سمى عليها...


ياخي ترانا نسهر والجوالات بيدينا ونرد ع ارقام غريبه ونقول لازواجنا ازعجني رقم وسويت له بلوك ولا قد شكو فينا .............




عارف ليه لانه الي زي زوجتك ماينشك فيها وعندي احساس انه المكالما الي شفتها 12 ثانيه لكن من ........ شايفها 12 دقيقه......


دعواتي لها ان يصلح لها زوجها ولا يفكها منه لانه حياتها معاك ماهي سنه ولاستين عشان تتحملك ...

ياخي اوكي رجل وتغار لكن لا تسمح لشكوكك توصلك لبعيد....

بالله وحده خاينه ولها ماضي اسود بتعطي زوجهز جوالها يفتش ويلعب بدون خوف ع الاقل اذا نامت ماتخليه مرمي بتشيله لا تجيها رساله من ماضيها الاسود ع قولك ....

الحمدلله الذي عافانا مما ابتلاك به....

رد : زوجتي 90٪ خانتني (انقذوني قبل انفلات الأ
 

لا والمصيبه كاتب خانتني 90 بالمئه ....


ياخي إتق الله توقعت انك ماسك عليها مكالمه غزليه ماسك عليها رسائل ماسكها وهي تقابل ....



استغفر الله العظيم حزنت ع الملاك الي معاك ....

رد : زوجتي 90٪ خانتني (انقذوني قبل انفلات الأ
 

ايه هنا المشكلة.. انك اذا شفت شي سخيف بتصير تشك حتى ليه وقت نومها كذا مو كذا..

ليش طلعت بهالوقت.. ليش ما اكلت.. وتربطها بموضوع الخيانة :)

وتسوي سالفة بخيالك على احداث يومية عادية!!!

ومعاملتك اللي تتكلم فيها.. المفروض عرفان لها على كل شي تسويه لك! المفروض والطبيعي انها تكون بالمعروف والغير طبيعي انها تكون غير كذا! مالك فضل يعني :)

واذا اللي سويته عظيم وفظيع ورائع ومحد بيسويه وشكيت فيها وحطيت النون ومايعلمون عند اول مفترق طرق فاسمح لي.. "قط افضالك عليها بالزبالة"!!!!

المراة تريد الامان قبل اي ماديات واب كلام حلو لان مالهم معنى بدون امان.. واذا عرفت هالشي اقل ردة فعل انها ماراح تنساه لك حتى لو توضح العكس.. هذا اذا ماتغيرت عليك معاملتها ومشاعرها بكبرها ومحد يلومها وقتها

لاتستسهل اتهاماتك ابدا!

رد : زوجتي 90٪ خانتني (انقذوني قبل انفلات الأ
 

صباح الخير

والله ياخوي انا اشوفك مشحوون جدا ومندفع بشكوكك وعايش دور المظلوم

ترى الموضوع مايستاهل

كل اللي تسويه تعالي يافلانه بهداوه وانتم تتقهوون واسألها عن الرقم

لاتخلي الشيطان يكبرها في راسك

ان بعض الظن اثم

اجل لو كانت تكلم زوجتك واذا دخلت قفلت الجوال زي اغلب الحريم لاكنا نكلم خواتنا ولا امهاتنا في مواضيعنا

الحريميه 😆 وش بتسوي بتقول خانتني 2000%

اقطع الشك باليقين واسألها

واضح ان زوجتك على نياتها

رد : زوجتي 90٪ خانتني (انقذوني قبل انفلات الأ
 

بعدين ليه التفتيش والتنبيش
دامها تحبك كل الحب هذا وانت بعد
تبغى نكد وبس



ولاتجسسوا

رد : زوجتي 90٪ خانتني (انقذوني قبل انفلات الأ
 

-





والله البلاء مهوب في زوجتك البلاء فيك وانا اختك
اجل في وحدة ..... تكلم وتغازل وتفضح نفسها
وتخلي الجوال في يدك ان كان حطت رمز والا ماخلتك تمسكه من الاساس
وبعدين .. ليش ... تفتش جوالها منت بواثق في نفسك
عندك مشكلة مع نفسك
يارجل حامت تسبدي الله يعين زوجتك

.........
الماضي يبقى ماضي
لاتخلط ماضيها بحاضرها مع مستقبلها

اتعوذ من الشيطان بس
........

معلييش على اسلوبي بس تحمست شوي

رد : زوجتي 90٪ خانتني (انقذوني قبل انفلات الأ
 

استهدي بالله
وان شاء الله خير
واضح وضوح الشمس انها بريئة حسب كﻻمك عنها..

ممكن زميلتها كلمتها من جوال زوجها وتصير لي كثير يكون شحنها خلص وتتصل من رقم ثاني
وانا صارت لي وصل زوجي للحد الائتماني وصار يتصل من جوالي على2من اصدقائه المقربين..
ومرة جاني اتصال ويوم سمع صوتي قطعه
شفت بالنمبربوك طلعت وحدة من زوجاتهم
رحت للواتس اب وحطيت حالتي ام فلان)كنيتي( علشان تعرف السالفة المسكينة وﻻ تحرق حياتها

رد : زوجتي 90٪ خانتني (انقذوني قبل انفلات الأ
 

أتقي الله فإن بعض الظن إثم وأنت أدنتها بنسبة 90% وشككت فيها وفي إخلاصها لك بدليل تافه جداً
والمشكلة أنها اثبتت براءتها وحسن سريرتها بأن أعطتك الجوال وأخبرتك عن الرقم الذي أزعجها وتلفونها
على طول بين يديك وتلعب فيه

بالله عليك وحدة ماشيه مشي مو مضبوط بتكون واضحة كل هالوضوح..؟!
وتنام من تسع وطول اليوم مراعيتك وقايمة فيك وفي والدتك متى بتلقى
وقت لهذه الأمور..!!؟؟

أنت بطريقك لتدمير بيتك الآمن بيديك وظنونك وشكك

السؤال هنا يطرح نفسه
هل أنت ممن ينطبق عليهم المثل (كلن يرى الناس بعين طبعه)..؟!

رد : زوجتي 90٪ خانتني (انقذوني قبل انفلات الأ
 

اتق الله وش ذا ... وش كل هالوساوس ... الله يعينها ... هي متى بتلقى الوثت حتى تخون خطبتها 15 وتزوجتها 19 وكنت تتواصل معها في الخطبة ومابينك وبين دراستها ومسئوليه تنظيف البيت متى تلقى الوقت تخون ... انت شخصية وسواسية ويمكن عشان كذا اخذتها صغيرة حتى تربيها على يدك مثل مايقولون ...يا اخي اخذتها من بيت طيب واهل طيببن وهي اخلاق وكويسة تقوم عند اول اتصال من رقم غريب تشك وتقول ليه هي ماترد ... والله كثير بنات مايردون اﻻ على الارقام اللي يعرفونها .. يمكن طلعت صاحبتها ويمكن ويمكن .. شاك بس عشان كذاااا

رد : زوجتي 90٪ خانتني (انقذوني قبل انفلات الأ
 

اسمع
انا مرة جاني ازعاج من رقم و ما رديت

و كان الجوال في شنطتي .. و لانه يتاثر باللمس
دقيت عالرقم من غير ما ادري .. و جلس الخط مفتوح دقيقة

يمكن هو دق عليها و بالغلط هي رفعت الخط ؟

رد : زوجتي 90٪ خانتني (انقذوني قبل انفلات الأ
 

على فكرة

انت شخص شكاك

هل كانت لك علاقات من قبل ؟
و على اساسها أصبحت تبني كل التخيلات هذه ؟

و الله لو اني اموت .. و انا بنت ناس محترمة و متربية
لكن ما اغسل رجول احد غير امي الي جابتني

قول الحمدلله على زوجتك
ماشاءالله عليها

رد : زوجتي 90٪ خانتني (انقذوني قبل انفلات الأ
 

الحين هاذي بتسميها خيانة ؟ والله من العنوان قلت الحين بدخل بحصل مرتك مسوية بلوي .. الله يعينها عليك ..
هذا الواحد اللي مبسوط في حياته قال لا مايصير لازم انكد على عمري ..

رد : زوجتي 90٪ خانتني (انقذوني قبل انفلات الأ
 

لا تتسرع وتشك وتطلع خطأ ثم تندم ندماً شديداً لأنك ظلمتها.

هناك احتمالات عدييييييييييييدة جداً، لايروح تفكيرك للي المفروض يكون آخر فكرة يمكن تحدث

بالمناسبة جوالي لو أستقبل مكالمة لمدة خمس ثواني ألقى مكتوب عدد دقائق المكالمة مثلاً 10 دقائق.

لذلك لازم تبتعد هالفكرة عن بالك، وصراحها عن اللي حصل.

رد : زوجتي 90٪ خانتني (انقذوني قبل انفلات الأ
 

اذا صارحها بشكه بطريقة مباشرة هو الوحيد الخسران.. لا أنصح

رد : زوجتي 90٪ خانتني (انقذوني قبل انفلات الأ
 

سلام عليكم وصباح الخير اخوي
وراح احاول اكون منصف معك ..
اولا .. انت عريس ولازلت في مرحلة انت وزوجتك تتعرفون فيها على بعض الي هي اول سنوات الزواج
لاتقول لي انك خاطبها وتعرفها قبل الزواج .. بعد الزواج تنكشف شخصيات الزوجين امام بعضهما البعض ومع مرور الوقت يذوب جبل الجليد وكثير من ما كان قبل الزواج يضمحل تدريجيا وتظهر الشخصيات الحقيقيه ..
بالتالي اقدر جدا غيرتك على زوجتك ووالله لو لم تكن تحبها ولو لم تكن رجل غيور كان عادي عندك الموضوع واي رجل مكانك راح يكون هذا هو موقفه ولكن الفرق يعتمد على الشخص نفسه .. انت اول مرة تمر امامك مثل هالمشكلة ويبدو انك متأثر بمايدور حولك بالمجتمع من كثير من مشاكل الخيانة والتعارف وغيرها .. ولكن لو رجل اخر مكانك تعرف وش كان المفروض يسوي ؟ المفروض يعمل مثل مايقول المصريين .. اقطع العرق وسيح دمه ولاتخلي ابليس ابدا يلعب براسك ..
بكل بساطه المفروض تاخذ الرقم وتتصل على المتصل وتشوف من هو وزوجتك بجنبك وتتصل من جوالها بعد وامامها وتقول له انك زوجها وتبي تعرف ليش الاتصال .. وقتها راح يبان اذا في شيء سواء من المتصل ام من زوجتك !
ثانيا ..لاتخلي الغيرة والتفكير تاكلك وانت صامت كذا ؟ صارح زوجتك بمافي داخلك وقلها على الي صار بطريقه غير مباشرة حتى تستطيع تعرف الحقيقه ..!
معك حق تغار على زوجتك ولكن الغيرة اذا تحولت الى شك تتحول الى سكين قاطع قد يقتلك ويقتل زوجتك معك !
انت واياها لازلتم تستكشفون انفسكم وصدقني لاتحاول ابدا تفتح هالباب على نفسك وترجع للماضي سواء لك او لزوجتك لانك راح تفتح لابليس باب كبير يوسوس لك بافكار ماتخطر على بال احد !
زوجتك ماخانتك ولا حتى (0٪) كل مافي الموضوع انك لازلت عريس ومشاعرك متوقدة وابليس شاطر !

رد : زوجتي 90٪ خانتني (انقذوني قبل انفلات الأ
 

مو للدرجة ذي، يمسكها بالطاولة ويقول تعالي أنا شاك فيك اعترفي، لا! فيه طرق كثير يقدر يوصلها بأسلوب مايحسسها أنه شاك فيها.

رد : زوجتي 90٪ خانتني (انقذوني قبل انفلات الأ
 

يقدر يقول لها وين الرقم اللي اتصل عليك 4 مرات ذيك الليلة؟ عطيني جوالك نتصل ونشوف مين وشيبي؟

رد : زوجتي 90٪ خانتني (انقذوني قبل انفلات الأ
 

أتذكر موضوعك الأخير الذي كان ينضح بالكلام عن بساطة زوجتك وعفويتها
وأقول لك تأكد تأكد تأكد قبل اتهام زوجتك بأي شيء , وعني أنا ومن خلال كلامك عنها
مستحيل أصدق أنها تخونك .

رد : زوجتي 90٪ خانتني (انقذوني قبل انفلات الأ
 

اخوي لا تجرد المفاهيم من مضامينها..

الخيانة شيء.. والغيرة شيء ..والشك شيء آخر تماما..

رد : زوجتي 90٪ خانتني (انقذوني قبل انفلات الأ
 

زيها زي لما يسالها عن الرقم 10 مرات.. مين كلمتي ومين كلمتي ولمين هالرقم.. وهاتي جوالك بدق اشوف مين!!!

رد : زوجتي 90٪ خانتني (انقذوني قبل انفلات الأ
 

خاف ربك الظلم ظلمات ..

واذا دقت على الرقم معناته تغازل ؟!!!
مايكفي انها قالت لك هالرقم مزعجني ..لو بتغازل ماراح تعلمك

دايم تصير لي ياخي اصير داقه على الرقم وبالغلط ومن غير قصد..
وانت عارف اغلب اجهزتنا على اللمس
مرات اصير فاتحه على سجل المكالمات ويصير شغل طارئ وادخله بالشنطة وبالغلط يدق على الرقم
مثل مره من المرات وانا طالعه لابسه عباتي وفاتحه على سجل المكالمات وبدق على زوجي وشفت زوله جاي علطول استعديت ودخلت الجوال بالشنطة من غير ماقفل الجهاز وركبت السياره واسمع جوال زوجي يدقدق وهو مايرد واقوله وش فيك ماترد قال ناظري المتصل
صار رقمي هو المتصل ..

انت شكاك جدا ..واذا انت مان عليها بمعاملتك ترا ياكثر الرجال اللي معاملتهم توب.. موب بس انت اللي تتعامل بمثاليه

رد : زوجتي 90٪ خانتني (انقذوني قبل انفلات الأ
 

هذه هي زوجتك ، اللي ( ابليس ) جالس يوسوس مخك
عشان يخرب بيتكم

هذه هي زوجتك ، اللي ناوي تقوم تقتلها ضرب ..

.
.

رد : زوجتي 90٪ خانتني (انقذوني قبل انفلات الأ
 

ممكن اعرف هالمضامين طيب من وجهة نظرك ؟
ان الغيرة شعور طبيعي ومعروف عن البشر والازواج بشكل خاص ..
الانسان الغيور جدا او الغيورة جدا قد تتحول الغيرة الى شك احيانا والشك مع الوقت يتحول الى وساوس واوهام مثل التفكير بالخيانة وغيرها

رد : زوجتي 90٪ خانتني (انقذوني قبل انفلات الأ
 

لا تستطيع ان تغار من شخص غير موجود او شيء لم يحدث!!! هنا يسمى شك..

كونه شكاك "وليس غيور" تلك ليست مشكلتها اخي الكريم.. لان الشك بالتاكيد مبني على تراكمات سابقة او ماشابه.. اذا كانت لديه مشكلة فعليه ان يعالجها بنفسه وليس عن طريقها بان يتاكد بممارسته دور الجلاد ويراقب تحركاتها بشكل مرضي حتى يتاكد بانها عفيفة! حتى الساذجة تعرف ان ذلك شك وليس غيرة

الخيانة تكون مع سبق الاصرار والترصد ويكون بها طرف ثالث باي شكل من الاشكال :)

اتمنى اكون وصلت لك اللي اقصده

رد : زوجتي 90٪ خانتني (انقذوني قبل انفلات الأ
 

وصلت فكرتك واخالفك فيها ..
الغيرة في نظري مو شرط يكون فيها شخص او حدث موجود وماثل ..
الغيرة شعور طبيعي عند البشر وهو نوع من انواع الحب وقد يغار الرجل على زوجته اذا كان يحبها من قلبه فعلا او الزوجة تغار على زوجها اذا كانت تحبه حتى لو لم يكن هناك سبب للغيرة ..
بمعنى الرجل قد يغار على زوجته ويجد سبب لذلك في نظره وهو بالواقع سبب واهي او غير موجود اساسا
ولكن الخوف الداخلي من تدخل احد في العلاقه يجعل الغيرة بشكل اوضح واسرع ..
الغيرة قد تتحول الى غيرة مرضية وتتحول الى شك والشك يتطور الى اوهام منها الخيانة !

رد : زوجتي 90٪ خانتني (انقذوني قبل انفلات الأ
 

لاحول ولاقوة الا بالله اخي اتقي الظلم فان الظلم ظلمات يوم القيامة مستحيل تكون خاينه باذن الله