الحقوني يالجماعه خطيبي يبي يفسخ خطوبتنا
 

السلام عليكم
أنا فتاة سعوديه طبعا . صار لي تقريبا 6 أشهر مخطوبه والحمد لله زوجي صالح وعفيف وحبيته حب صافي أو يمكن عشقته موبس حبيته وهو كمان حبني وماتصورنا في يوم من الأيام ان أحنا نفترق أو انفكر نترك بعض حتى في اصعب الظروف الي مرت علينا.
لاكن الن صار لي تقريبا خمسة ايام ماشفته ويادوب يكلمني بالتلفون والمشكله ابوي الله يسامحه .
خطيبي على قد حاله وأنا عارفه وابوي عارف هذا الشي من الأول مع هذا أنا قبلت وهو قبل لأن أنا ياجماعه ادور على الرجل الصالح الي ألقى معه السعاده والحب والإحترام والحمد لله هذا الشي لقيته فيهوأنا ماادور على المركز وعلى الفلوس لأ ابدا لن السعاده ماتجي بالفلوس .
والمشكله أن خطيبي أبوه كبير ومايشتغل وخطيبي هو الي يصرف على بيتهم وهذا الشي أنا ماانزعجت منه ابدا وانا شجعته على هالشي وهذا الي زاد حبي له ووافقت أني أسكن معاه في بيتهم لأن راتبه على قده وتقريبا راتبه يروح على الجمعيات مع ذالك قدرت ظروفه وقلت ماعليه كل الشباب كذا مساكين .لاكن ماتصور أن عمه وخاله ينكبون به بعد ماالحو عليه يخطب وقالو له اخطب وكلنا راح نوقف معاك ونساعدك لين رضا وتقدم لي لاكن بعد ماكتبنا الكتاب بأسبوع الكل ابتعد عنه ولحد الآن مالقى منهم اي مساعده حتى أنه راح حق عمه يطلب منه يكفله عشان ياخذ سلفيه من بنك التسليف تعدذر منه وقال له مااقدر اكفلك لأني كافل واحد ونفس الشي خاله قال له نفس الكلام .
ولحد الن موعارف وش يسوي وكيف يكمل مصاريف الزواج وهو لوحده وماحد وقف معاه وأحنا صار لنا (6أشهر) من كتبنا الكتاب ولاسوينا شي لحد الآن ولااحنا قادرين نحدد زواجنا .وفي الأخير أنا قمت وساعدته بمبلغ (سبعه آلاف ريال) وفي الأول مارضا يقبلها مني لاكن مع الإلحاح عليه رضا وأحسه قام يحبني ويحترمني أكثر لأني على قولته كبرت بعينه وانشالله يرد لي الجميل بدال المره مرتين . لاكن أبوي درا أني ساعدته بهالمبلغ وزعل مني وهاوشني وسوا لي مشكله ليش أني عطيته هالمبلغ على قولته خايف انه يقص علي وينكر بعدين أني عطيته هالمبلغ بعد مادخل حسابه ويفسخ الخطوبه. والكلام وصل لخطيبي وزعل من كلام ابوي لأنه اعتبره إهانه له وان ابوي موواثق فيه وطلعه مثل الحرامي بالضبط.
وصارت بينا مشكله بسبب (وصخ دنيا) ومع الكلام والإتصالات في الأخير قرر أنه يفسخ الخطوبه لأنه مايبي ينحرج مع اهلي لأنه مايقدر يتزوج ومافيه احد وقف معاه وأكيد بيطول في فترة الخطوبه.
وأنا ليلحين ماعلمت أي أحد من اهلي بموضوع فسخ الخطبه على امل انه يغير رايه ويلقاله حد يساعده عشان يقدر يتزوج.

والآن يااخوان أبي منكم حد يساعدني في مشكلتي لإنقاذي وإنقاذ الحب الي بينا لأني موقادره اتخيل أني أتركه في يوم من الأيام من أجل وسخ دنيا.

والله يجزاكم خير.

مااقدر اقولك يااختي غير الله يعينك ويعينه وان شاء الله تتعدل اموركم وتتيسر انتي اصبري واكثري من الدعاء فصلاتك والله يخفف عليك واش يدريك امكن ربي يعدلها من عنده .......

ايوه صح لقيتها انا سمعت ان فيه جمعيات خيريه تتكفل بمصاريف اللي يبون يتزوجون ومو قادرين بسبب ظروف ماديه واعتقد صارت السنه الماضيه عندنا فجده وصار زواج جماعي مره حلوانتي اسألي عنها وانتي قولي لخطيبك لا يستعجل اذا هو بالفعل شاريك يتحمل والحياه فيها مشاكل كثير وكل مشكله لها حل صدقيني فحكاية الجمعيات اللي تساعد الراغبين بالزواج هي الحل وانتي اتصلي عليهم او هو يتصل اي واحد منكم اهم شي ماتستسلمون للمشاكل وانتو لسى ماشفتوا شي اذا هذه اول مشكله تواجهكم كانكم يأستو واستسلمتو واجهوا المشاكل بقلب جامد وراااح تتعدل صدقيني بس لنتي فكري فالحل اللي قلته ورااااح تتعدل من عند الكريم سبحانه ولك خالص دعواتي وشكرا

الله يصبرك علىمشكلتك ويعينك عليها ترى الفرج من رب العالمين ادعيه
وبالنسبه لاهلك عليهم ان يصبروا على الشاب او يتم عمل الزواج باقل تكلفه ممكنه
اخبري اي شخص من اهلك يستطيع ان يؤثر على والدك لتسهيل الزواج
والله يعينك يااختي مشاكل الاهل والزواج اصعب المشاكل

الله يعينج الغالية
 

السلام عليكم ورحمه الله

لا استطيع القول الا الله الموفق

واسئل الله ان يرزق خطيبك من حيث لا يحتسب

واتم الزواج بالخير

والله الموفق

الله يعينكم و ييسرلكم طريق الحلال و يجمعكم عن قريب.........
الصبر مفتاح الفرج يا أختي..........

اسال الله العلي القدير ان ييسر لكم اموركم
اكثري من الدعاء
واصبري
ان بعد العسر يسر

وارى ان فكرة الجمعيات الخيرية معقولة جدا
وايضا محاولة التقليل من تكاليف الزواج شي مهم طالما تم كتب الكتاب
و له بيت وانتي موافقة علي السكن مع اهله

زاهده .. اول شي خطيبك قرر يفسخ الخطبة بدون ما يلمح انها رح يرجع لك المبلغ ؟ والا لا ؟

ترى يمكن نظرة ابوك ما خابت ..

ويمكن تتزوجيه ويستغلك وتجلس تتنازلي ..

انا احييك انك ما نظرت الى الحياة المادية .. ولكن الرجل اللي يفرط في بنت مثلك ما يستاهل تزعلي نفسك عليه ..

استخيري الله ..

واذا كان هالولد شاريكي رح يصبر على المر مو على ابوكي بس

يا اختي ابوكي يخاف على مصلحتك .. والله ييسر لك الخير

شكورين أخواني واخواتي على ردودكم ومثل ماقلتو الصبر مفتاح الفرج وأحنا الي علينا بنسويه والباقي على الله سبحانه .
وأحب اقول لكم أن أحنا فكرنا نروح للجمعيات الخيريه وراح لهم خطيبي قالو له أحنا نقدر نعطيك الأجهزه الكهربائيه أو غرفة النوم وأنت أختار.

أما بالنسبه لطيبيبة القلوب أحب أشكرك على تحليلك للموضوع وتنبيهي .
بس حبيت أقول لك أن خطيبي من يوم سمع أن ابوي موراضي بالي أنا سويته جا من شغله مسكين بالليل ولاحتى استأذن من الشغل جا عطاني فلوسي وفوقهم زود بعد من عنده . ساعه وحده بس ورجع مره ثانيه لشغله .

ومشكورين اخواني وماقصرتوا.

طيب كويس ان زوجك راح للجمعيات الخيريه وبكذا انحل جزء من المشكله الباقي هو انك ماتهتمين فتكاليف الزواج وزي ماقالوا الاخوات والاخوان مو مهم بعض الاشياء مالها لزمه واصبروا والله بيسرها من عنده اذا ربي كاتب ان يجمعكم بالحلال راح تنحل مشاكلكم واقل الزواج تكلفه اكثره بركه والله يبارك لكم ان شاء الله وصدقيني من اول ماقريت مشكلتك اليوم الصباح وانا اقلبها يمين يسار واقول الله يعينهم ويرزقهم وتحياتي اختي....

أسأل الله العظيم رب العرش العظيم الحى القيوم الواحد الاحد الصمد الذى لم يلد ولم يولد ولم يكن له كفوا احد ان ييسر لكما امركما وان يجمع بينكم فى الخير دائما وان يبارك لكما ويتم زواجكم على خير وجه وان ييسره لكما وان يرزقكم ذرية طيبة صالحة.
فإنتى اخيتى انسانة اكثر من رائعة فوقوفك معة يدل على ذلك ومافعله والدك انما من باب حرصه وخوفه عليكى جزاه الله خيرا وكذلك خطيبك اكثر من رائع برده المبلغ عند علمه وادعوا الله ان يؤلف بين قلوبكم على محبته وطاعته .

ياااااحبيبتي يازاهده

وربي اني حاسه فيك لان حالتنا انا وزوجي مثل

حالتك ماتصدقين اذا قلت لك اننا اوقات نبكي سوى

ودنا نعيش مع بعض لكن للاسف الماده هي السبب وانا لي

متملكه 8 اشهر ومااتمنى تطول المده

بس اختي حبيت اساعدك بشي انا سمعت عن مشروع الشيخ

بن باز وانه يعطي كل شاب بيتزوج عشرين الف

خلي زوجك يروح لهم

وبالنسبه لابوكي حاولي تتفاهمين معاه بهدوء

وخبريه ان زوجك جاب الفلوس وزياده

وادعو ربي اللي مايصعب عليه شي انه يسهل عليكم

وعلينا وعلى كل متزوجين ويجمعنا مع ازواجنا ياااااااارب

زاهده .. والله فرحتي قلبي يوم قلتي انها رجع المبلغ .. يعني انا كنت خايفة عليكي مثل ابوكي ..

اول شي خطوة رائعة جدا انه يروح للمؤسسات الخيرية ..

وحاولوا انكم توفروا الضروريات .. والباقي يجي بعدين ..

بالنسبة للوالد صلي ركعتين وادعي الله وروحي كلميه وقوليله يحمد ربه ان ربي رزقه ببنت تدور على الرجل الصالح في زمن اتغيروا فيه الناس .. واشرحي له الوضع .. وقولي له اني صليت الاستخارة .. كلميه بنت لأبوها .. قولي له ان سعادتك وراحتك مع هذا الانسان اذكري له حديث الرسول اللهم صلي وسلم عليه (( الارواح جنود مجندة ما تعارف منها ائتلف وما تناكر منها اختلف )) ..

ولا تنسي الدعااااااااااااااااااااء والله للدعاء فضائل اكثرنا يغفل عنها ..

والله يتمم لك ولكل منهم مثلكم بخير يارب العالمين .. ان شا الله بعد كذا ترسلي رسالة تقولي اني تزوجت
آمييـــــــــــــــــــــــــــــــــــن

الأخت زاهده ...

هل يستطيع التقديم على بطاقة Master Card ؟؟؟

حيث أنها تسمح بشراء ما قيمته راتبين من راتبه ومن ثم يسددها البنك كل شهر من حسابه ...

وأكرر ... شراء وليس سحب نقود ... نعم يستطيع سحب النقود ولكن السحب النقدي سيدخل في مسألة الربا ...


AM7

ما أقدر أنصحك بشي مثل الإستغفار , والدليل قوله تعالى :
(فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّاراً (10)يُرْسِلِ السَّمَاءَ عَلَيْكُمْ مِدْرَاراً (11) وَيُمْدِدْكُمْ بِأَمْوَالٍ وَبَنِينَ وَيَجْعَلْ لَكُمْ جَنَّاتٍ وَيَجْعَلْ لَكُمْ أَنْهَاراً (12) )

مشكورين أخواني وأخواتي على وقفتكم معاي وبصراحه لو ماآرائكم وتشجيعكم لي كان ليلحين ماانحلت المشكله.

الحمد لله سويت الي قلتولي عليه وكلمت أبوي ، والحمد لله قدرت أقنعه والحمد لله أقتنع بكلامي واتصل بخطيبي وكلمه واستسمح منه والحمد لله رجعت المياه لمجاريها.
أما بالنسبه للمصاريف ابوي راح يساعده باللي يقدر عليه .

بس بغيت اسأل الأخت life_ roseعن مشروع الشيخ بن باز اشلون نوصل له ؟؟؟


تحياتي: زاهده

بسم الله الرحمن الرحيم

السلام عليكم اخواني الاعزاء

زاهده عيوني والله انك فرحتيني بهالخبر وبصراحه كم تمنيت ان تتيسر الامور معك والحمد لله تيسرت والله يجعلها في ميزان حسنات ابوك واحنا فزمن صعب والله يعين الاخت اللي متملكه من ثمان شهور وزي ماقالت بسبب الماده الله يعينكم ويعين كل مسلم والله يفرج همكم وهم كل مسلم ومسلمه والله يجمعكم بازواجكم تحت سقف واحد في ظل الحي الذي لا ينام سبحانه جل شأنه ....

بصراحه انتي قدوه صالحه في اعانة الزوجه لزوجها على مصاعب الحياه ...

دعوادي لكن بالسعاده ولقاء الاحبه.....

تسلمين أخت مبتدئه والله يجزاك ألف خير أكيد بدعائكم لي تيسرت الأمور وانتو يأختي ماقصرتو نصحتوني وشجعتوني وأنا كل ماأقرأ رد اتشجع أكثر واكثر .

والبناتياأختي لو يسوون مثلي ومثل الأخت life_ rose انكان يمكن انحلت مشكلة العنوسه على الأقل .
والي أطلبه من البنات أنهم يراعون الشباب وخاصه الي ظروفهم صعبه وانشالله راح تلاقي السعاده من رب العالمين لأنها رئفت بحال فقير والكثر من كذا أنه زوجها والله سبحانه وتعالى راح يعوضها صبرها أكيد.

تحياتي: زاهده

يارب يسعدكم

الصبر والدعاء والعزيمة تصنع المعجزات

تحياتي