|
تهديد زوجي
السلام عليكم
عمري 23 ام لطفلين في بدايه زواجي كان سيئ معي جداا بعد مرور سنتين ونصف رحت لبيت اهلي وعدني انه راح يبدى معي صفحه جديده والحمد الله لاكن مارد اعتباري بعد مرور ها السنوات تنازلت عن الكثير كنت اشتري راحتي بفلوسي وأسكت اذا قالي كلمه مو زينه وكنت مسويه كل الي اقدر عليه في البيت بس كنت اخطط للمستقبل وعايشه جو راح اكمل دراستي وراح انجح ورا ينجح مشروعي وأساعد زوجي في بيت العمر وراح أحط أفخم أثاث ورح نسافر أوربا ووووو الخ المهم من سبوع مسوي عمليه اللوز وكنت مبعده عنه لانه يوجعه وكان عصبي حتى قبل لا يسوي متغير نوعا ما بس يسبني بكلام وسخ حتى اني ساعدته في شي كان فاقد الامل فيه وكافئني باسلوب شين المهم كنت مجهزه أوراق الانتساب عشان يدخلها البريد راح ألمكتبيه كلمني قام يصارخ الأوراق ناقصه مادري ايش وصراخ قلت له ليش تصارخ خلاص مابيك توديها وسكرت جاني معصب قلت انت تصارخ بدون سبب خلاص مابي منك شي شكرًا الحين اخلي اخوي يسويهها لي عاد قال انا واقف في الشمس ومادري ايش قلت مصار لك 5 دقايق وثاني شي انت بسيارتك المهم يتلفظ علي وانا اروح أخذ أغراض بنتي واتصل ع اخوي وانتظرت بعدها قلت لخوي لا عاد تجي خلاص وروح لبيت خالتي أخت امي وجلست عندهم نص ساعه بعدها رجعت البيت قالي من وين جايه قلت من عند خالتي قال وانا طرطور قلت احمد ربك جت ع كذا ولا بالله ودني لبيت اهلي انا طفشت قال يالله انا كنت أبيه يتأسف لاكن للأسف واضح جدا انه ماصدق اني أزعل رحت لأهلي وقلت ابي مصروف وعشاء قال لا مامعي شي ع انه يوم نزول الراتب كنت مقهوره مره فسكرت باب السياره بقوه بس مو مره مره عاد انا رسلت له ع الواتس وضحت فيها ان مو ناقصني شي لا أخلاق ولا جمال ومقدره الحياه معك ومساعتدك ولا اطلب شي تعجيزي وأهلي مو متبرين مني وعندنا خير يغطي الشمس الواحد لما يخطئ ع شخص يعتذر وانت طحت من عيني تشوفني ساكته تزيد ومن هالكلام والنتيجه مارد المهم جلست عند اهلي اول يوم بعدها ولدي تعب وديته المستشفى وتكلفه العنايه ممكن 250 وجاء اليوم الثاني اتصل ولا يرد وبعدها اليوم الثالث اتصلت قال نعم قلت وينك ابي بطاقتك الهويه قال وش تبين قلت ابيها وأبي أغراض من البيت قال انا والله طالع السهر وباتخر بس بفتح لك الباب وأخذي أغراضك صرفاتك وتوكلي ع الله صراحه انصدمت ارسلت له قلت جيب أغراض عيالك رد قال الباب مفتوح قلت سكر بابك الأغراض بنجيب انت غصبن عنك ولا تعال أخذهم مره وحده هاذي أخرتها تطردني قال ماطردتك انتي الي بتروحين وحظرني بعدها باليوم الي بعده اتصل ع امي وجلس يهدد اني انا مو مقصر معها وأنها هي مقصره ومن الكلام ويحط ألوم فيني وهو ملاااك وانه مارح يصبر بيتزوج ويشوف حياته اتصل عليه مايرد ومر اليوم وبعدها اتصلت عليه ولا رد أخذت جوال امي اتصلت عليه رد قلت وش السالفه ماتبي ترد علي قال اي مابي أرد عليك قلت ليش قال تسئليني المهم ضربني وبكى سبقني واشتكى هذا الي فهمته ويقول اني قصرت معه قلت متى قصرت معك قال 3 ايام وقوله انت شايف أسلوبك كيف معي قال منك انتي بإجماعه الخير مايبي يقول انه غلط سكر علي من كل الجهات يمكن قصرت معه لاكن مو تقصير مادري وش يبي انا إنسانه أحب اقراء وأشوف أحب اطلع هو كل شي عنده لا اطلع وسط أسبوع يعتبره تقصير تعبانه ماقدر اسوي عشاء تقصير يعني بالعربي أصير خدامه ولا انا مقصره والله يظغط علي بقووووه قبل لا يسوي عمليه أغسل الحوش طحت ع ظهري قال أحسن تستاهلين ً بعدها قال آكلي بنادول صار لي سبوع وشوي ظهري ألا الان يوجعني المهم بعدها قلت وش تهديدك لامي بتتزوح مادري ايش قال لا مو تهديد هذا صحيح انا مارح انتظرك ترضين علي انا خلاص صبرت ماقدر أتحمل قلت خلاص انت ماتبي تصلح لاكن طلقني قال مو مشكله تنازلي عن المؤخر قلت والله ماتنازل قال ايه خلاص اصبري لين أخطب بتجين لي برجلينك وببتتنازلين غصبن عنك وسكر والله لي يومين ضايقه الدنيا فيني احس حطم كل شي كلل شي والله جالسه أتخيل لو فعلا بيتزوج بيطلق مي والله أموت بعد كل ها لسنين يوم زانت حياتي معه الحين يتخلاى عني جرحني بقوه انا اكبر اخواني صح اني كنت متنازلة عن أشياء كثيره بس حبيته حبيت الحياه معه كنت اثق فيه بس افكر هو وش فيه وش الي غسل مخه حذفت الواتس وقفلت جوالي وكنت ابي أتنازل عن المؤخر مابي منه شي بس عاد اتصل ع امي مرتين كأن جوال امي مقفل العصر والمغرب اتصل علي مرتين مارديت عليه حذفت رقمه قلت مابي اسمع منه شي مابعد الكلام الي قاله لي شي المهم ارسلي رساله الساعه 9 وربع امس قال تكفين تعالي البيت انا تعبان خلاص انا أسف معاد اقدر أقوم. قلت في نفسي تآخرت ! وإذا جيت البيت واعتنيت فيك وتحسنت وش مصيري بعد شهر ولا شهرين تطردني مارسلت له بس سئلت نفسي صراحه مادري وش اسوي أتمنى ألاقي ردود حكيمه |
رد : تهديد زوجي
مدام قال انا اسف وتعبان ارجعيله واخمدوا الموضوع وهو صغير
وتفاهموا في الموضوع بهدوء كل واحد يعرف خطاءه ويعتذر الله ييسر اموركما .. |
رد : تهديد زوجي
شكرًا لك البحتري
انتظر باقي الآراء |
رد : تهديد زوجي
هو طرد ابليس واعتذر انت كمان ا
خزي الشيطان وروحي بيتك واتفاهمي معاه |
رد : تهديد زوجي
وش راي امك.؟
|
رد : تهديد زوجي
امي تقول اخلاقه شينه ومايقدرك فارقيه
وابوي مئيدها ارجعو لمواضيعي السابقه بس انا متعلقه فيه لا كن بعد كلامه لي تغيرت أمور ماني راخصه نفسي له ماني لعبه انقلعي بعدها تعالي وش مصيري بعد مارح أقول سنه 3 شهور ماعد اثق فيه |
رد : تهديد زوجي
و الله انا اللي بشوفو انكم محتاجين تنضجوا شوي لانكم يمكن متقاربين بالعمر
لا تفارقيه لان عندك مسؤوليه طفلين بالاضافة الى نفسك حاولي ما امكن انه ما يحصل زعل بينكم، لانه حتى بطريقة اعتذاره ما هو رقيق انتي من معرفك، بيبين انك محتاجة منه اعتراف بدورك في حياته و بين لك مشاعره و يعاملك بحنان هذا الشئ هو ما يقدر يعطيك اياه حاليا لانه اصلا ما بيشوف انه مقصر ناحيتك، حاولي تصبري و ادعي ربك يغيره ليك و ان شاء الله يصلح حالكم |
رد : تهديد زوجي
مشاكلكم ما تستأهل الطلاق و لا الخروج من البيت
احتويي زوجك و لا تكوني ( ند ) له .. و لا تذليه و لا تحسسيه بالدونية و لا تتمنني عليه و لا تردي على كل كلمة .. جربي كذا شهر واحد |
رد : تهديد زوجي
انتو اﻻثنين يبغالكم طولة بال وحسن تعامل مع الطرف اﻻخر
لكن بما انك انتي موجودة فأقول لك انتي قادرة تحتوية وتغيريه بس تفهمي تفكيرة وشخصيته عصبيته قابليها ببرود شديد مثﻻ موقف لما نسيتي اﻻوراق هو لو كان مو مهتم كان سحب عليك وقال اﻻوراق ناقصه وريح راسه وانتي ﻻتقولي خﻻص مابي منك شي تفاعلي معته ايش اللي ناقص انا اسفه مانتبهت واذا رجع البيت استقبليه عادي مو وانتي مكشرة ومبوزة صدقيني هو بيستحي من نفسه وبيتغير مع الوقت اسلوب النديه ماينفع ابدا مع الرجال مدام ارسل وتأسف لك ارجعي له خﻻص وحاولي تفهميه مشاكلكم صغيرة بس راح تتعبي لو ماتصرفتي بطريقه افضل اقرأي عن الشخصيه الشماليه اعتقد راح تفهمي زوجك اكثر |
رد : تهديد زوجي
أكلمه ؟؟؟
ولا انتظر اتصال منه ؟ وترى عمره 33 |
رد : تهديد زوجي
رايي ارسلي له رسالة لطيفة تسالي عن احواله
و اذا طلبك للرجعة قولي له يمر ياخذك و ان شاء الله تظبط |
رد : تهديد زوجي
اقتباس:
واللي صبرك كل اللي فات يصبرك عمر جاي .. انت خلفتي بدل الواحد اثنين.. وخروجك من البيت بالشكل ذا غلط من الاخر انت بخيرك وهو بخيره ومو على اي شي تلمي اغراضك وعلى بيت اهلك وبعدين تكسري جواله اتصالات.. دامك في حاجته حتى لو عشان عيالك كني في بيتك وعالجي امورك بحكمه اكثر.. |
رد : تهديد زوجي
كلمني اخوه مارديت بعدها كلمتني زوجته الي هي خالتي قالت فلان كلم يبكي تعبان
وش فيكم قلت مابي اتكلم بالموضوع كلمته قلت وش فيك قال ليش تتركيني انا تعبان ورحت المستشفى تعالي قلت خلاص بسوي شوربه واجي وللمره المليون طلع اللوم علي ماعندي خيار غير اني ارجع يوم كانت صحته كويسه قالي تعالي اخذي جميع أغراضك وتوكلي ع الله طردني والمشكله بسسسسيطه جدا بس ابي منه اعتذار ع كلام وسخ انا مستحقه والله العظيم اني عايشه معه ببساطه جدا ولا أكلف عليه انا عندي فلوس وأشتري الي خاطري فيه بس ماضايقه ع ان حالته الماديه ممتازه بس انا ابي أعيش بسلام مابي مشاكل وكثره كلام عشان فلوس وش كافئني فيه ؟؟ مو بصلح تهديد طلاق واتنازل عن المؤخر صراحه صدمه والله ماتوقعت هذا الشي لا وبعد يقول اصبري بس سبوع سبوعين وأخطب وتجين غصبن عنك صراحه فكري مشغول جدا ماني عارفه مصيري معه انا مادري وش يدور برأسه اخاف شهر شهرين ويطرد نئ معد اثق فيه |
رد : تهديد زوجي
انت ليه متوقعة البلاء قبل وقوعه
قدمي حسن النية و احتسبي الاجر و روحي اطمئني عليه مادام طلبك و قالك مريض و اهله اتصلوا بك الي يبي يتزوج ما يهدد هذا الظاهر جهده في لسانه الله يهديه و يسخره لك |
رد : تهديد زوجي
اقتباس:
و هو المسكين تعبان، روحي سوي شوربة حلوة و روحي له للمستشفى نقطة اخيرة، لا بثى تتعاملي معه على انه هذاك بيته وحده، وقت ما يبي يطلعك و وقت ما يبي يخليك روحي و افهمي ليش هو تعبان و من ايش يشكي، و خلي الاولاد عند امك لين يطيب، بس نصيحة اذا اخطأ لا تردي عليه بخطأ اقوى منه، علميه انه كلامه بيجرحك و بيبعدك عنه و ان شاء الله ما عليه شر |
رد : تهديد زوجي
شكرًا لكم ماقصرتو
سويت الشوربه وجاء اخذني ورحنا البيت وجالس يحط اللوم علي ملتزمه الصمت ماباليد حيله اي كلمه بتحاسب عليها هو الحين صحته كويسه وطلع للمقهى ولا حتى قالي انا أخطئت بحقك انا خايفه ان رايه يتغير بعدين ويستغني عني بعدها أموت فعلا لا حد يقولي انتي تظنين ظن مو كويس مابي احد يعلمني انا لي سنتين تقريبا وانا ابني للمستقبل حياه جممميله بعيده عن المشاكل وكنت اتغاضى عن كل شي بس سؤال لو ماجته الحمى والتعب وش مصيري رح يكابر ويهدد وراح اتطلق ع انه قالي الحمد الله تعبي خيوه وانا ماقدر اتخلاى عنك مرضه هذا خيييييره مقهوره مارد اعتباري ولا شي أقوله لازم أغير المفرش عشانك مرضت فيها قال مامعي فلوس ولا تطلبين شي رجاء هههههههه الله المستعان |
رد : تهديد زوجي
يا حبيبتي خليكي لطيفه شوي مع زوجك
ايش هاذا يا قلبي تردي الكلمه عليه بعشششره ومحسسته انك مستغنيه عنه تعرفي ايش مفتاح كل رجل ( الطاعه ) غير الطاعه فيه امور ثانيه بعيده عن سالفة كرامتي واعتباري ومدري ايش كرامتك من كرامة زوجك ولو قالك كلام وسخ وقت الزعل دخلي من اذن وطلعي من الثانيه واذا تبي تردي بكلمه وحده بس الله يسامحك بس يهدا كوب ليمون بارد وبوسه ع الراس واليد والله بيحط لك الشمس بيد والقمر بيد نري الرجال يقدر الي تتنازل وتتغاضي وتمشي الامور حتي لو مابين هالشي بس يقدره بينه وبين نفسه لا تجبري زوجك يعاملك بهالاسلوب الي ماتحبيه وين الاحترام بينكم ،،، ابدائي انتي بالاحترام له وهو بيرد عليكي بنفس الاسلوب مو لازم توضحي زعلك له بالكلام والروحه لااهلك ورسايل الواتس ووووالخ يقدر هو يستشعر هالشي من نفسه من مسامحتك له بيقول كسرت خاطرها وهي مشت السالفه والله ماتستاهل وبيزيد رصيدك من الغلا عند زوجك احتاجك وقت المرض ارمي كل شي وراء ضهرك مشاكلك وزعلك واعتبارك واركضي له وراضيه وحطيه عكفوف الراحه اكرامآ للعشره واكرامآ انه ابو بنتك مو محتاجه تشاوري احد اروح ولا لا لا تطيحي من عينه يا حبيبتي حتي لما قالك انا مريض المفروض من صوتك يحس بخوفك عليه مو تستني يتصل اخوه الله يهدي بالكم يارب ويسخر لكم الخير اتمني تقرائي انماط الشخصيات عشان تتعاملي مع زوجك صح |
رد : تهديد زوجي
انا الا الان محترمته ومستحيل أرد الكلمه بعشر
الكلام الي كتبته لكم كله فضفضة أنتم بعد حطيتو اللوم علي ترا مايهمني فلوس ولا شي بس ابيه يتأسف ابيه يوعدني انه مايخليني عايشه معه 5 سنين يوم عرف اني تضايقت قالي توكلي ع الله زوجي عارفته اذا غلط وسكت ييييزيد والله يزيد لا زم أوقفه عن حده ووممكن هذا الامر خيره زعلي عليه بس يالله الحمد الله ع كل والله يجزاكم خير |
رد : تهديد زوجي
دام مافيها ( خيانة ) أمر هين
والباقي من المرأة هي تفرض احترامها وعزة نفسها مو تجبره على ذلك . |
رد : تهديد زوجي
ياعمري عليك
نفس مشكلتي حالياً ونفس عدد السنوات بعد كلما احاول افكر ارجع له اتذكر كلامه وتهديده واقول لو انه يبيني ارجع على الاقل يحاول يسال عني وعن اولاده بس يرسل لي ابي اكلم بنتي ومابي اندم انا بعدين اني رجعتله بنفسي الا اذا رد اعتباري قدام اهلي وبشروطي ارجع له غير كذا مستحيل اتنازل حتى لو كنت احبه والله يكتب اللي فيه الخير لي ولك ان شاالله مافيه ام بتهدم بيتها بنفسها الا اذا اساس الحياه الزوجيه انعدم مثل الاحترام والثقه بين الطرفين |
رد : تهديد زوجي
واضح انه يحبك ويبيك لكن يحاول يبين لك انه شره عليك بهالطريقه
ابسهر ابتاخر ابنام بتزوج الخ اختي عندي سؤالين جاوبي عليهم الله يسعدك 1 زوجك بيتوتي او يجلس بالبيت غالبا ؟ والسؤال موجه لك انتي ايضا .. 2 زوجك عاطفي او حساس او يحب الاحتضان والالتصاق ؟ والسؤال موجه لك انتي ايضا .. |
رد : تهديد زوجي
^^ يوم قريت مواضيعك غيرت رايي
ما اقول الا الله يعينك عليهه .. واضح انه يعاني من نقص من اصدقاءه او المجتمع اللي حوله وحط الحره والقوه فيك .. حاولي تقرين نمط شخصيته عن طريق البوصله رح تفيدك كثير بعد الله والدعاء لله ورح تعرفين من خلالها نقاط ضعفه .. موفقهه ♡ |
رد : تهديد زوجي
رحتي لبيت اهلك
واتخذتي موقف المفررض ماتتصلين عليه نهائيا حتى لو شي ضروري ولا تردين لكن للاسف انتي تتصلين من رقمك ومن رقم امك وترسلين وتعاتبين وهذا الشي قواه وراح يتمادى اكثر واكثر نصيحه لك لاتتصلين نهائياً حتى لو شي ضروري ولاترسلين ولا تردين عليه لفتره لاتقل عن اسبوع خليه يدق على اهلك ويطلب التفاهم معك اسلوبك في اتخاذ الموقف غلط تطلعين وثماً ترجعين تتصلين بحجة الاغراض والاولاد الرجال مو بغبي عارف انك تتلككين وراح يزيد عليك لذلك اضغطي على مشاعرك واسحبي عليه الرجال العاقل مايتلفظ على زوجته الفاظ وصخه او يسيء لها وهذا الشي لازم تفهمينه له بعد مايرجع يتصل وكثري استغفار ودعاء وانسيه هاليومين ريحي مخك وعيشي اجازه منه خليه يحس بعدم وجودك |
| الساعة الآن 07:53 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©