|
عزوبي على حسابنا .. الى متى نتشحطط
السلام عليكم ورحمة الله
شهر مبارك .. الله يتقبل منا ومنكم ويحعلنا فيه من المعتوقين من النار لي فترة ببيت اهلي .. ما فيه اي خلاف مع زوجي.. بس فيه مشكلة ما ادري كيف اتعامل معها اول شي انفجر الغاز بالشقة اللي فوقنا فجت من الله رحنا لاهلي وصار زوجي يتعلث وحجة ورا حجة مرة الغاز المركزي مفصول مرة بيصلح مكيف المطبخ مرة بيركب لمبات المجلس اذا سالته متى بتخلص قال بكرة اوبعد بكرة وراح رمضان على هالحال طبعا هو ماعنده مشكلة ملابسه يوديها المغسلة وفطوره اي شي من الثلاجة يجي كل يومين يفطر عند اهلي والعيال يكلمهم بالجوال والا ياخذلهم شي من البقالة.. وانا يقوم بالواجب بمكالمة والا ثنتين كل يوم .. حتى لبس العيد ما قال كم تبين صرفت من عندي واحتجت زيادة 1000 تسلفتها منه و يعرف انها عشان العيال و الحين يستناني ارجعها مدري ناسي انه مسؤول والا ليه انا تعايشت مع وضعي وانه يتركنا كل ويكند ببيت اهلي اللي بنفس الحارة غير نوم وسط الاسبوع لاي سبب . وصار عادي نزاحم امي والا خواتي وننام عالارض بغرفهم انا وعيالي كأنه ماعندنا بيت يلمنا بس كلام الناس يوجع عمتي تقول انتي متزوجة مسيار واختي تعلق على بيتي تقول كأنه جديد لانكم ساكنين ببيت اهلي وتجونه زيارة حتى اخواني الصغار ما اسلم من كلامهم متى تروحون متى نرتاح من الازعاج هذا اللي من اهلي واعرفه غير اللي من اهله وما اعرفه طبعا ما راح يجي ببالهم الا اني مهملة ومافيني خير وبس رايحة جاية لاهلي وتاركة زوجي ما اهتم فيه.. ما راح يقول احد منهم يا فشيلتنا عند انسابنا بولدنا اللي رامي بنتهم عشان سهر ومباريات واللي الله اعلم فيه .. انا هالمرة سايرته وسكت بس طالت الجلسة بدل اليوم لنا اسبوعين و اللي يسالني وش عندكم اتحجج بكذب وما اقول اسباب زوجي لانها تفشل كان ممكن اقول له جب برميل للمطبخ، وسكر علينا الباب لين يطلعون العمال من المجلس .. بس شي بديهي ما يحتاج ينقال .. هو ماخذ مشاكل البيت عذر والسبب الحقيقي انه يبي القعدة لحاله كنت اقول ماعليه مسكين مضغوط من الشغل انام عند اهلي عشان يقدر يسهر مع اصحابه ويرتاخ .. بس اللي يصير انه ماعاد يسهر عندهم .. واليوم اللي نكون فيه مو بالبيت يرجع بدري ويجلس اغلب الوقت لحاله هذا الحال مو عاجبني ولا ابيه يستمر وانا متضايقة من الكلام اللي يجيني احس بانفجر امي اليوم قالت لي عالفطور اشوف طالت زوجك عاجبته العزوبية قلت معليش قالت لا تخلينه على كيفه. انا مو مخليته على كيفه بس اذا ما جا الشي على كيفي ما ابيه افكر اجلس ببيت اهلي لنهاية رمضان وهو يشبع باللي هو فيه |
رد : عزوبي على حسابنا .. الى متى نتشحطط
البيت بيتك .. لولا الله ثم زواجه منك ما اثث بيت وسكن ..
لا تتركين بيتك وارجعي وش بيسوي يعني بيطردك !!؟؟ هو اللي خفيف ومو شايل هم عيال يطلع من البيت اما انت عزي نفسك عن كلام الناس حتى لو كانوا اهلك .. ارجعي بيتك ولا عاد تطلعين منه لاي سبب لا تنتظرين منه يقول بجي اخذكم .. |
رد : عزوبي على حسابنا .. الى متى نتشحطط
حبيبتي لا تجلسين ببيت اهلك ولا هم يحزنون ،، انتي متضايقة اهلك متضايقين لان مهما يكون موقعك الصحيح ببيت زوجك خصوصا ان عندك اطفال وانتي نفسك محتاجة ترتاحين بمكانك تنامين تقعدين تلبسين تاكلين لو شنو ربك ساتر عليك بمكانك ومنها الاهل يشتاقون لك ويتطمنون ان فعلا مافي شي بينكم!
اطلبي من والدك او احد اخوانك انهم يودونك لبيتك وانتي شوفي الوضع اذا ممكن تقعدين ببيتك يكون عملية التعديل ما تتعدى شي بسيط وتقدرين تقعدين بالبيت بوجودها اذن نزلي اغراضك واقعدي ببيتك! ويرجع ويشوفك و اكيد ماراح يعترض على رجوعك هذا المفترض وان اعترض قولي الصدق وهو اني انا مليت وابغي ارتاح بمكاني واهلي بعد محتاجين يرتاحون ببقية الشهر الفضيل! .. وان طلب مرة ثانية تنامي عند اهلك ارفضي وتحجحي بتعبك مع اطفالك ببيت اهلك ، او انك متعبة حاليا او مزاجك ما يسمح وتحتاجين ترتاحين بمكانك ،، حتى وان حدث امر طارئ مو من الضروري تروحين لبيت اهلك وظلي بالبيت ... اذا زوجم ظل مصر فاسئليه عن السبب؟ هل فيه شي مضايقه يخليه بكل يوم والثاني يطلب ذهابك لبيت والدك؟ |
رد : عزوبي على حسابنا .. الى متى نتشحطط
روحي على بيتك ياختي
واهلك بس زياره ساعه ولا ساعتين وارجعي لا تتركي بيتك ابدا وزوجك شدي شوي عليه علشان يصلح الاشياء اللي متعطله عندك حمليه المسؤوليه من الحين بكره بيتعود انتبهي الله يفرجها عليك امين |
رد : عزوبي على حسابنا .. الى متى نتشحطط
يوم امي كانت عايشة الله يرحمها
كان كذا زوجي يعمل؛ عشان يرتاح من المسئوليات و يرميها على اهلي كان وضعي مثل وضعك .. نوعا ما |
رد : عزوبي على حسابنا .. الى متى نتشحطط
انا ازعل اذا حسيته يدور الفكه مني
ولا يقولي روحي عند امك اليوم .. احسني ثقيله على قلبه 😧 ما احب احس كذا |
رد : عزوبي على حسابنا .. الى متى نتشحطط
اختي الغلط منك ليش تروحي
مثلا الغاز فيه مشكله عادي يجيب اكل من برا او يجيب غاز كهربائي او حتي دافور المكيف بيصلحه مو ضروري تطلعي من البيت تجلسي باي غرفه وحتي لو رحتي بيت اهلك اذا خرج العامل يجي ياخذك مو عذر حتي لو قال روحي لاهلك جيبي اي عذر مرة تعبانه مرة عندك شغل مالك نفس تروحي اهلك خارجين وحتي ايام تكون عنده اجازة وبيسهر مع اصحابه لاتنامي عند اهلك زوريهم وخلي واحد من اهلك يرجعك بيتك ماتنامي في بيت اهلك الا وقت فيه شي خطر عليكم تجلسوا في البيت واذا يحب يجلس لوحده يقفل ع نفسه في اي غرفه وانتهي الموضوع |
رد : عزوبي على حسابنا .. الى متى نتشحطط
ما ادري انا زوجي يتجسس علي او يقرا افكاري
اليوم موديني مشوار وقال وش رايك ترجعون اليوم ونجيب فطور من برا والا ودك مرة وحدة اذا خلصنا انا لاني شايلة عليه مرة مالي نفس بالرجعة كذا قلت ايه مرة وحدة وطبعا يسالني ويسولف عن بيت اهلي وانا مرتاحة والا اشتقت لبيتي ما جا من خاطري اقول له تعبت وابي بيتي .. هو عارف بس بيفهمني اني انا اللي حابة القعدة بمزاجي .. شاطر بهذي الشغلة .. يعرف يحط الكلام على لساني |
رد : عزوبي على حسابنا .. الى متى نتشحطط
حبيبتي الحساسية والعواطف ماتنفعك مع رجل بصفات زوجك
كل الرجال يحبون الاتكالية لكن انت زوجة وأم افرضي وجودك وخذي حقك وحق ابنائك منه ارجعي بيتك وعزي نفسك وعيالك وتعايشي مع طباع زوجك، الله يسخره لك يارب. |
رد : عزوبي على حسابنا .. الى متى نتشحطط
أنت من جدك متسلفة من زوجك عشان تشترين لعيالك !!! هذي وين صارت ...ياأختي غصب يسير كذا مادام انت بالشخصية السلبية هذي ولما قالك اليوم ارجعي ليه مارجعت خصوصا انه اهلك متضايقين من هذا الوضع ... الله يهديكم كلكم .
|
رد : عزوبي على حسابنا .. الى متى نتشحطط
املي في الله
هو يمكن مو شايف هالشي في موضوع بخاطري عليه من سنين .. ما يسمح لي اعدل شي بالبيت ولما نختلف على شي يقول هذا بيتي ! مرة قلت له بيتك خلاص ما لي شغل فيه اذا تبي احد يجيك انت استقبله .. مرة اخته زارتنا وصارت تعلق هذي الطاولة مكسورة وهذا الدولاب متى بيتسكر .. تفشلت منها مع انه بيت اخوها .. بس بوجهي ام مريمي ابوي من اول زواجي كان يتضايق من هذي الحركة .. اخذني مرة ورجعني وكلم زوجي قال زوجتك بالبيت واحد مكانه المفروض ينحرج لنفسه وللموقف اللي حطني فيه .. بس عادي هان عليه بعدها باسبوع ينزلني انام عشان يطلع يسهر سالته وناقشته مليون مرة بالموضوع قلت له اسهر على راحتك البيت امان .. اللي يسويه انه يخلي الطلعة عشان يحسسني بالذنب او يقعد لي عالوحدة متفائلة تعود وخلص .. الاشياء المتعطلة ما تستاهل ستارة ركبها بيده اليوم مع انه كان قايل لي قبل اسبوع باجيب عامل .. انا ما ابيه يتحمل مسؤولية ولا ابي منه شي زيادة.. وبكيفه يطلع ويتركني ماعندي مشكلة .. بس ما اصير نص دولابي هنا ونصه ببيت اهلي روح الله يرحمها .. ما نطلع من جزا الامهات الله يخليلي اياها والله شايلتنا وشايلة عنا كثير كان الحين مضطر خدامة وسواق وحضانة ومصاريف وحياتنا صعبة.. بس بدال ما يراعيها ويخفف عنها يتركنا لها نغثها بحوستنا وصجتنا بالويكند والاجازات هذا جزاها .. يا ما قلت له يفهم بس ما يحس.. او يحس بس يطنش.. اهم شي نفسه الله يعوض صبرك ويفرج همك يارب حلم الايام نفس الاحساس يجيني .. لهالدرجة ثقيلين عليه .. والله اني ازعل على حال عيالي المفروض الويكند يستغله يتقرب منهم .. ما يكفي وسط الاسبوع كل اليوم مشغول عنهم ولا يشوفونه الا النص ساعة حزت الغدا هو عشان يريح ضميره ياخذهم بالشهر مشوار ومع ان المشوار لهم ما يقدر يتجمل ويتحمل شقاوتهم ويرجعهم يبكون بعدين يزعل عشان بنتي ترمي حالها على اعمامها واخوالها وتجلس باحضانهم .. ولا يفهم انه ناقصها حنان الاب اما انا فاسمع بليلة الخميس واتمنى اقضي معه سهرات حلوة ورايقة بالبيت بس ما يعطيني فرصة.. قبل ما يطلع من الدوام يسالني بيجي احد ياخذك والا تستنيني اوديك.. واذا قلت له ابي اجلس فتح تحقيق ليش وش صاير وغريبة والا يقول كلمي اختك تجيك . للحياة امل اعرف الغلط مني .. لاني استسلمت له من البداية ولا اخذت موقف .. ومع السنين تعبت من المشاكل وكنت اشتري دماغي وامشي على هواه واللي قلتيه اقدر اسويه.. بس ما ابي خلاص .. عشر سنين على هذي الحال مو شوية .. متى باستقر ويصير بيتي هو مكاني من غير ما احتاج حلول وحيل واعذار ونقاشات ابي هذا الشي خلاص يتغير يصير نظام وقانون |
رد : عزوبي على حسابنا .. الى متى نتشحطط
مكلومة
تعز علي نفسي .. انا تعايشت مع اطباعه من زمان .. ابيه هو يتعايش معي بدون ما اذل نفسي بنت طيبة الله يسامحك .. والله مو مني .. تعودت لاني تزوجته فقير كان راتبه 3500 وكنت اخاف اطلب منه ولايصير معه واحرجه او يضطر يتدين عشاني و الحمد لله الحين عندي راتبي يكفيني صح ودي انه يحس بالمسؤولية ويعطينا مصروفنا من نفسه بس ما اقدر اطلبه لانه في نواحي ثانية ما يقصر توه مغير غرفة العيال ومجدد المجلس |
رد : عزوبي على حسابنا .. الى متى نتشحطط
عطر حبيبتي سامحيني انت ماقلت إنك موظفة ولا قلت إنه راتبه قليل الامر يهون بهذي الطريقة لكن اللي عليك الآن هو موقف جاد عشان تستقرين انت وعيالك ببيتك .. على فكرة مادام دايما يقولك هذا بيتي ليه ماتشتري بيت لنفسك مادام انت موظفة يمكن لوشاف هذا الشيء بيحس شوية إنك ممكن تستغنين عنه وعن البهذله هذي .
|
رد : عزوبي على حسابنا .. الى متى نتشحطط
ارجعي غصب عنه حتى لو تطبين عليه فجأه..بعدين خير ياطير تسلفين منه لاغراض العيد؟؟؟؟ ترا كل الرجال يعطون حريمهم بلا مقابل موب تسليف!!!
|
رد : عزوبي على حسابنا .. الى متى نتشحطط
انا كنت كذا
بداية الزواج كان يتهرب من مسئولياته المادية ويفرح اذا قلت ابي اهلي احياناً كان يجي ويقول لي ماشتقتي لهم ؟! وكنت ع نياتي افكر انه يبغاني اروح عشان يتأخر بالسهر برى البيت واكتشفت بالاخير انه كان يقلب البيت في غيابي لاستقبال نساء قذرات بعدين قريت مواضيع ناعمه الهاشمي في بوصله الشخصيات واستفدت صار يصرف وبالاخير صار كريم جداً انت قولي له ابي مصروف ولا تطلعين من بيتك ابد ، فهميه انك المسئول عنهم وانك ماراح تدفعين عليهم ريال واحد شوفي الرجل اذا ماتحمل مسئوليتك بيروح يدور له وحده تحمله مسئوليتها هم يحسون برجولتهم وهم يدفعون لك |
رد : عزوبي على حسابنا .. الى متى نتشحطط
والله ياختي انا زوجي نفس الشي دائما يحاول يصرفني واذا رحت عند اهلي مايجي الا الصبح طلعت الشمس واذا قام ابوي يصلي الفجر يوديني بيتي ومع ذالك مايخجل تعبت معاه ومع السهر مايجلس بالبيت نهائيا .. تخيلي ابي اطلع نفاس ويقولي مو لازم لاتطلعين ارتاحي توك وبعده راح وسافر مع اصحابة...
والله ماينفع معهم مدمنين سهر وكوره وبلاستيشن وسفر .. المسؤليات اخر همهم.. كثر الدق يفك الحام انصحيييية لين يفهم ويخجل. |
رد : عزوبي على حسابنا .. الى متى نتشحطط
اقتباس:
الموضوع يبي لها تدورين وين راحتك وتروحين لها لا تراعينه على حساب نفسك وعيالك يبي الفكه منكم هو اللي يطلع مو انت وعيالك اقعدي على قلبه تفهمين هالجملة لا عاد تنومين ببيت اهلك ابد ابد ابد بينهبل وينفجر بوجهك ما عليك منه وش قلنا ؟! اهم شي راحتك لغاية ما يتعود على وجودكم في حياته نوعية رجلك من اللي تنتزع الحقوق منه والا ينسى الثانين ويفكر بنفسه بس انت كذا تدقين وتد ثابت في حياتكم الزوجية والا بتظلين تعانين طول عمرك |
رد : عزوبي على حسابنا .. الى متى نتشحطط
عطر تدرين وش اتمنى
؟؟ قسم بالله اتمنى خيزرانه منقوعه بماءوملح شهر كامل عشان تكون قاسيه وادخل عليك بيت اهلك واجلدك واجلدك واجلدك واجلدك لين تنسين اسمك لعنبو ابليسك ذا منطق؟؟؟؟؟ تاركه بيتك وجالسه عند اهلك وكل هالدق بالحكي والنفسيه ولا ستوعبتي ياقلبي انتي البيت بيتك مو بيته وبعدين تلاقينه يقول بنفسه دامها مرتاحه عند اهلها بكيفها مابي ازعجها تجي للبيت طبعاً بيقول كذا وش يدريه انك متضايقه وانتي ساكته ماتعلمينه تبينه يحس من نفسه هو لا يعلم الغيب ولا يحس باحساس المراءه العاطفي عطر ياقلبي البيت اذا فقد الاستقرار معاد هو سكن والاستقرار مايجي بكثرة الروحه لهلهك بتقولين هو السبب طيب بنفرض انه هو السبب انتي ليه سلبيه؟؟؟ لاتزعلين مني ياقلبي اي انتي السبب تاركته ع كيفه تبين الشي يجي بنفسومتحمله كل هالحكي يابنت الحلال شغلي عقلك العاطفي شغلي ذكائك النسائي شوفي دوامه متى ينتهي وروحي بدري لبيتك وجهزي فطور معتبر سوا بيت اهلك او اطلبي من هالحريم الي يسووون جاهز وارجعي قبله للبيت نضفيه وعدليه وعدلي عيالك واستقبليه وافطرو وجهزي له ليله حلوه وقولي له ماهن علي تكمل رمضان لحالك ومالنا غناه عنك ومن هالحكي خليه يحس بقيمتكم بالبيت بالحكي وبالفعل واذا قال ابي لين تكمل الشغله الفلانيه قولي له الي ناقص نكمله سوا وبالمهاداه والحليله البسيطه تقدرين عليه بس اتركي الحساسيه عنك ونختك |
رد : عزوبي على حسابنا .. الى متى نتشحطط
بنت طيبة
بسيطة ما صار شي حبيبتي.. هو مو فقير ربي اكرمنا الحمد لله .. بس ماعنده ادارة مالية ولايقدم الاولويات .. البيت من اهدافي الله يقدرني عليه. زهرة ما اعرف غصب وفجاة مو اسلوبي ووضعنا ما يستدعي لو قلت له تعال خذنا موب قايل لا.. بس انا ابيه هو يتغير ويستحي يرمينا على اهلي كل يوم والثاني.. اما المصروف اعرف وادري انه من حقوقي ولو طلبت ما يقصر بس تعودت صعب اتغير .. وفي سبب ثاني بصراحة اخاف من المنة لو بينه وبين نفسه وحتى لو جاه خاطر انه عطاني شي ما استاهلة .. هذا الشي عندي زي الكابوس. جروح انا سكرت هالباب عشان ارتاح ما ابي افكر فيه وارجع افتحه على نفسي لو عنده اللي عنده بسلامته بس بعيد عن بيتي مو يعيشني البهذلة عشان نزواته. وماعندي استعداد ادرسه واحلله.. ما ابي آخذ منه شي اذا ما جا من نفسه مجروحة الله يعيني ويعينك.. شوك ان شا الله هذا اللي بيصير بس حاليا مستثقلة الروحة وعازة علي نفسي بعد هالرمية .. افكر بعد العيد وباتحجج زيه باعذار تافهة خل يشبع عزوبية البيت اصلا يسد النفس عافس الدنيا والمطبخ مغبر ما لي خلق للشغل والتنظيف ذاتي من قالك هو ما يعرف .. يعرف احساسي دايما اقول له مو بعلم الغيب .. بس ما همه هو مو فاقد الاستقرار .. مستقر ومرتاح برنامجه ثابت وروتيني وماعمره نام برا البيت حتى والبيت في اسوا حالاته .. انا اللي افتقده واحتاجه وكلامك على راسي بس اسمحي لي ما اقدر ارجع بهالطريقة |
رد : عزوبي على حسابنا .. الى متى نتشحطط
عطر ياقلبي دامه عارف وفاهم ومش فاقد الاستقرار ضاغطه ع نفسك وفاقده الاستقرار ومتعبه نفسك وعيالك عشان مين؟؟؟؟
حبيبتي نصيحة اخت ارجعي بيتك ولاعاد تطلعين الا اذا انتي لك مزاج طلعه لك مزاج طلعه تروحين بيت اهلك روحي مالك مزاج قولي مالي نفس خلك صريحه بمشاعرك لاتسمحين لاحد يحبرك ع شي ماتبينه البيت بيتك ومملكتك اذا ماحفظتي عليه بقوة شخصيتك ماراح احد يسعى للمحافضه عليه فهميزوجك باسلوبك مو بالكلام اللام ماينفع مع الرجال لان تفكيرهم غير تفكيرنا فهميه اني في بيتي ومملكتى لي مزاج اطلع ابطلع لي مزاج اقعد بيتي بقعد اجلسي بيتك واذا قال روحي لاهلك او اهلي زياره قولي لا مالي نفس هالاسبوع بجلس بالبيت عندي شغل بهدو واحترام مره مرتين ثلاث لحد مايتعود |
رد : عزوبي على حسابنا .. الى متى نتشحطط
والله ماعرفنالك .. فاتحة الموضوع تتشكي انه تارككم .. ولما خيرك في الرجعة قلتي مابي ..
|
رد : عزوبي على حسابنا .. الى متى نتشحطط
اقتباس:
اقتباس:
مشكلتي معه مو هالمرة ومو حلها ارجع اليوم والا بكرة.. مشكلتي معه مزمنة اسلوب حياة ابيه يتغير هو لما خيرني ما كان جد كانت سواليف .. هذي طريقته ولو قلت ايه بارجع .. كان قال بس تدرين خلك اليوم باحاول اخلص كل شي عشان تجون بكرة .. ويجي بكرة يماطل ويقول نفس الكلام |
رد : عزوبي على حسابنا .. الى متى نتشحطط
كلمني امس الفجر يقول لقيت تهريب بسقف دورة المياه من عند اللمبة بكرة باجيب شركة تكشف ..
واليوم اساله يقول جا مسؤول العمارة وقال لي اقطع الكهرب عشان ما يصير التماس وبكرة بتجي الشركة. ما راح نخلص ! |
رد : عزوبي على حسابنا .. الى متى نتشحطط
يمكن فعلا فيه خراب بابشقه
بس ثاني مره لا تطلعي من شقتك |
رد : عزوبي على حسابنا .. الى متى نتشحطط
حسسني زوجك كانكم عايشين بعمارة عمرها قررون من كثر خرباتها!
عندك حل عجيب ،، بما ان والدتك هي اللي تعتني باطفالك وهي وهي ،، خليها هي اللي تكلمه وتقوله عن تعبها وانها خلاص ماعاد تتحمل .. بعض الاحيان كلام الام يكون هو الاقوى حتى لو قالت له انا ماراح امسك الاطفال وانت تدبر نفسك ولا عاد تجيب بنتي البيت ! ماعليه كلام شوي قاسي ولكن مرة مرتين حتى وان اعادها توقف له امك عند الباب وترفض دخولكم هالشي مو عشان تمنعك من بيت امك وابوك لاهالشي مثل مانقول ( اضرب القط يتأدب الاسد ) .. تصدقي اختي ،، عندي اخت مقاربة لحالتك و الاهل استنفذوا كل الطرق مافاد .. الاا بكلمتين من الوالدة سبحان الله طيبة لابعد الحدود لكن اذا تكلمت فالصميم وتعدلت الامور ،، حاسين فيك وبمعاناتك ،، انتي ماتبغي حل مؤقت تبغيه دائم .. هالشي لازم تتعبين فيه الحين عشان ترتاحين بعد شهر شهرين ثلاثة يعني مافي حل جاهز وسريع المفعول ولكن مع الاعادة خلاص بيتغير الوضع وراح ينجبر على تقبل حياته كانسان متزوج واطفال ةاسرة محتاجة للاستقرار .. اهم اشخاص لحل الموضوع هو انتي ، والدك ووالدتك فاتفقي معاهم على اسلوب يخليه غصب يرضخ ويتعود مع الوقت ان مايتكل على الغير ويعرف ان راحة الانسان ببيته فعلا .. |
رد : عزوبي على حسابنا .. الى متى نتشحطط
ايه فيه له شهور قد نبهته .. بس توه يذكر ويقول لي كانه هو اللي مكتشفه ولا كاني معطيته خبر
|
رد : عزوبي على حسابنا .. الى متى نتشحطط
اختي ربما بيتك في اعطال وربما لا لما لا تزورين البيت وتتفقديه وترين الوضع ما معقول هذه الخرابات تحصل ورا بعض ولكن لا نريد ان نظلم زوجك اذهبي وتفقدي بنفسك الاستقرار انت من يصنعه لا تنتظري من زوجك ان يقدمه لكم
وعلى ما اذكر بيتك قريب من اهلك واختي خلي لك شخصية لا تجعلينه يعاملك مثل لعبة الشطرنج يضعك اينما كان ان اردتي زيارة اهلك بمزاجك وليس بمزاجه واهللك من حقك ان يستقبلوكي وبنفس الوقت من حقهم الراحة اسأل الله ان يسخر لك زوجك ويرزقك الاستقرار وراحة البال |
رد : عزوبي على حسابنا .. الى متى نتشحطط
ام مريمي
الحمد لله احد فهمني .. ايوه بالضبط كل الخرابات تجمعت الحين عشان مافي دوام والا مناسبات ولا اعذار ثانية عشان اخلي البيت فكرت اخلي ابوي ينغزه بالكلام بس اخاف تكبر .. وبكرة اضطر ويمسكها علي ذلة وامي وصلت معها وكلامها فعلا في الصميم تقدر تحرجه بس ما تبي تتصادم معه .. تشد علي انا كأني مبسوطة ومرتاحة بهالوضع |
رد : عزوبي على حسابنا .. الى متى نتشحطط
السلام عليكم ,,
زوجكِ يحتاج لتنظيم الوقت , ترتيب الأوليات , والأهم فهم الإنعكاسات النفسية والاجتماعية على كثرة ترددكم الكثير على أهلك .. وأنتِ تحتاجين لأن تخرجي من دائرة تفكير زوجكِ التي نجح في وضعكِ فيها , فأصبح تأثيره عليك سهلا , ولذلك تجدينه دائما ما يستطيع أن يقرأ جل أفكارك , أو يسهُل عليه إقناعكِ , لأنه يعرف جيدا كل ردات فعلك :) حاليا إذا رجعتي تناقشي معه في / الإنعكاسات النفسية والاجتماعية على كثرة ترددكم الكثير على أهلك انتهى |
رد : عزوبي على حسابنا .. الى متى نتشحطط
اقتباس:
وبالنسبة للبيت رحت له كم مرة اجيب اغراضي.. مو خربان بس مكركب وحالته حاله.. ولو كان صادق قدر يخلص كل الشغل بليلة |
رد : عزوبي على حسابنا .. الى متى نتشحطط
اقتباس:
يااااااساتر خيزرانه ومنقوعه في مويه وملح الله لا يسلطك علينا nhg |
رد : عزوبي على حسابنا .. الى متى نتشحطط
[QUOTE=عطر الفجر;3087107]ان شا الله هذا اللي بيصير .. مع اني اعرف المشاكل والزعل والاستقعاد اللي باشوفه بغرض التطفيش
حبيبتي ربي يوفقك روحي واقعدي بيتك ماعليك من احد حتى لو شي خربان ويبي تصليح الله لايهينه يجيب عمال وانتي بالبيت لاتعطينه مجال مالك مزاج لاتروحين مكان ابد مره بيلمح مره بيصرح طننننشي واقعدي بيتك |
رد : عزوبي على حسابنا .. الى متى نتشحطط
اقتباس:
ترتيب الاولويات وتنظيم الوقت والتخطيط والجدية هذي خارج قاموسه وعيب اكلمه فيها .. اصير قارية كلمتين بالكتب وجاية اتفلسف على راسه .. الحياة ماشية معاه عالبركة الحل اللي قدمته الرجوع ثم منافشته وتبيين تضررنا وتشتتنا جربته ولا جاب نتيجة هو مو ناقصه يفهم يقرا افكاري .. يفهم نفسيتي .. بارع جدا .. لكن يقنعني لا .. انا اسوي نفسي اقتنعت عشان لو ما سويت كذا اطلع العنيدة المتحكمة اللي تبي الدنيا على مزاجها جزء من المشكلة انا باستسلامي .. اعرف وابي اتغلب عليه |
رد : عزوبي على حسابنا .. الى متى نتشحطط
اقتباس:
|
رد : عزوبي على حسابنا .. الى متى نتشحطط
عاميت مثلك وأكثر
ولم تنصلح حياتي إلا عندما انتزعت حقوقي منه واصبحت أذهب لبيت أهلي زيارة فقط ام أنم منذ سنتين :) كان يتركني بالأسابيع قبل إنجابنا وبعد إنجابي يتركني شهرا كاملا!! ولولا أنهما توأم لتركته لكن منذ سنتين أجبرتن على تحمل مسؤوليتنا :) وتحسنت حياتي اصبحت اكثر استقرار من تاحية نفسية.. معنوية.. مادية ولله الحمد رللعلم لي عشر سنوات متزوجة :) يعني ثماني سنوات ضياع وتشتت!! |
رد : عزوبي على حسابنا .. الى متى نتشحطط
الحمد لله حلينا الموضوع
امي وابوي زاد ضغطهم علي انتقاد وتعليقات على تربيتي لاولادي واني ماني حمل مسؤولية وما اعرف اتعامل مع زوجي انخنقت وطلعت برا ابكي .. حسيت مو عدل اللي امر فيه وهو نايم ومرتاح ولا على باله وارسلت له عالفجر انه وضعي كذا وقلت له انت هاين عليك تتركنا بهالعيشة بدال ما تعزنا قال لي انا كل اللي اسويه بالبيت عشانكم وانه هدفه سعادتي وراحتي ببيتي وكان بيجي ياخذني بس انا رفضت وطلبت نروح للمزرعة مع خالتي كم يوم لما يخلص البيت ووعدني ما عاد يطلب مني اروح لاهلي اذا ما ودي ولا انام برا البيت..وزعل لاني ساكتة كل هالوقت الحمد لله المحادثة ارضتني .. هو كان يعرف اني ما ارتاح بس فرقت معه لما حكيت له التفاصيل وصورت له مكان نومنا وقلت له الكلام اللي اسمعه من الناس. شاكرة لكم كلكم اللي نصحني واللي انتقدني جعله الله في موازين حسناتكم وجزاكم عني كل خير |
رد : عزوبي على حسابنا .. الى متى نتشحطط
الحمدلله ربي يديم عليكم ان شاء الله ،، خلاص عرفتي المفتاح وهو الفضفضة والصراحة التامة وتخليها بالصورة تمام لكل صغيرة وكبيرة لحتى يوصله الاحساس صح ...
الله يوفقكم و يرزقكم و لا يفرقكم ان شاء الله ،، الحمدلله ومبروك حبيبتي تستاهلين كل خير |
| الساعة الآن 08:36 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©