تصرفات أخوات زوجي تجاهي
 

السلام عليكم ورحمة الله وبركاته
أخوات زوجي وامه لما تصير حفله او عزومة او شي جديد ما ياخذوني معاهم بالرغم من اني حاولت اتقرب منهم لكن دون جدوى، حتى لو صار شي ما يخبروني عنه ما ادري ليش كذا معاملتهم معي، صرت انا اعاملهم بالمثل وايضا صرت ما اجلس معاهم، هل تصرفي صحيح؟
وزوجي يطلعني انا مقصره وما اجلس واشاركهم طيب كيف الواحد يشارك ناس ما يريدوا يشاركوه باي شي؟ كيف تصير هذي ولما اكلمه بان هذا الي حصل دائماً يبرر افعالهم واني افهم غلط! بالرغم من انه يعرف تصرفات اهله لكنه يستر عليهم كثير.

رد : تصرفات أخوات زوجي تجاهي
 

استغلي بحياتك عنهم وخليك رسميه معاهم
مو لازم تروحين معاهم او تاخذينهم معاك
انتي لك حياتك وهم لهم حياتهم
لاتنقلين مشاكل اهله لهم راح يطلعك غلطانه مهما كان يصيرون اهله اكيد راح يبرر لهم

رد : تصرفات أخوات زوجي تجاهي
 

لادخلي مشاكلهم حياتك لو زوجك موراضي عن الوضع لاتزعلي وخليك ذكيه نادهم بعجض العزايم عندك ولو مانادوكي طنشي وقول لعيونك اطنش يختي ادلعي وطنشي والله لاتخربي بيتك بيدك ممكن هم يعملوا كدا ودهم تخرب حياتك لاتوصليي احد يفرح فيكي دا بيتك ودي مملكتك وحبيبك معاكي لاتهتمي بتوافه والحياه مابتمشي لو بندقق ربي يسعدكم ويهنيكم

رد : تصرفات أخوات زوجي تجاهي
 

الحمولة تعب

حطي هذي قاعدة بحياتك

رد : تصرفات أخوات زوجي تجاهي
 

والله صدق ان الحموله تعب.. ولما اكون بعيد عنهم هو يتضايق مني، يريدني غصب اجلس معاهم مدري ليش هالانسان ما يفهم شعور لما اشخاص ما يريدوه يجلس معاهم او يشاركهم بالرغم من محاولاتي. حتى انه مستعد يطلقني بسببهم هو ما صار هذا الشي بس انا حاسه انه ممكن توصل بسبب اهله.
حتى عيالي يتصرفو معاهم تصرف ولا كانهن عماتهم. لما يكون زوجي فسفره عمل وانتقل بيت اهلي حتى ما يسالن عن العيال لا اخواته ولا امه وهو يعرف هذا الشي وبعد يستر عليهم.
واذا غلطت امه او اخته علي عادي معاه بالعكس يفرح ويضحك معاهم ولا كانه شي صار يبين لهم كانه راضي اذا آذونا. الحين لو انا الي غلطانه عليهم مثلا كان بيقلب علي.
والشي الثاني انه مو راضي يطلع من بيت اهله ونستقل فبيت لوحدنا بالرغم من محاولاتي والتعب الي اعانيه فغرفه واحده انا وعيالي. مع انه لديه بيت لكنه اعطاه لوالدته من شده حبه لها أعطاها لها البيت وهي الطماعه تاخذ اجار البيت وما فكرت انه ينتقل ولدها ويرتاح فبيت مستقل هو وعياله.ما ادري ........... بشو تحتاج لكل هالمال من اجارات وجمعيات له كله تجمع مال ومال. ويعورها قلبها لو خسرت فلس احمر على شي. وطبعا الجلسه مع اهله فنفس البيت وايد تصير فيه تدخلات ووساوس من اهله ويتغير علي. سبحان الله. واذا صار معه ضغط ف العمل ايضا يتغير علي اما مع اهله سمن على عسل ابدا ما يتضايق منهم مهما يسو الي يسوه كانه ما شايفهم من زمان.نحن اخوانا تعاملنا عادي مع بعض. صحيح نحب بعض لكن عادي. اما زوجي يقهر الصراحه اول مرة اشوف حد كذي مثله يذوووووب على اهله وضعيييييف الشخصيه معهم.

رد : تصرفات أخوات زوجي تجاهي
 

الله يصبرك
فعلا شئ يقهر. .انتي وعيالك بغرفة وحدة وهم معاهم بيت ماجرين له
الله يعينك وصديقيني لابد ان تفرج يوما ما

رد : تصرفات أخوات زوجي تجاهي
 

عسى يارب تفرج. دعواتكم لنا.

رد : تصرفات أخوات زوجي تجاهي
 

شوفي الغلط علي زوجك لو هو انكر عليهن وقالهن ليه تسووون كذا

مع زوجتي يحرجهن ويتخذ منهن موقف

آكيد راح يتعدلون ويتغيوا معك لان كرامتك من كرامته

وهن مايرضون يزعلونك لانه زعلك من زعل زوجك

رد : تصرفات أخوات زوجي تجاهي
 

زوجي ههههههه زوجي بيكلمهن وبيحرجهن ههههه والله ياليت
اصلا زوجي ضعيف الشخصيه مع امه و اخواته.
لدرجه مرة اخته كانت تريد تمد ايدها علي من شده قهرها مني وغيرتها
وزوجي عادي معاه بدل عن يزعل منهم
وهو عادي بلعكس يضحك ويسولف لانه طيب مع اهله وضعيف الشخصيه
كم مرة امه تعصب عليه وتكلمه كانه اصغر عيالها وهو يخاف منها ونفس الشي اخته الصغيره كثير تحبه وهو يموت عليها لكن لو تكلم ودافع عني هي بتضايق منه وبتنازعه وهو عادي بيسكت
كله هذا بسبب خوفه من امه وحبه الشديد لها
انا اهلي قالو نفس كلامك الغلط من زوجي
لكن زوجي للاسف ضعيف ضعيف جداً جداً امام امه واخواته
مدري شو الحل مع هالنوعيه الله يكون فعوني ربي بلاني به
كنت متوقعه زوجي يكون قوي ومايرضي احد يتكلم علي ويغار علي ويدافع عني ويحبني وما يشوف بنات الشارع ونجلس ونسولف ونضحك ونسافر في كل اجازه لكن والله هذا زوجي حتى شهر العسل ما سافرنا مكان وابدا ما ياخذ اجازه ونغير جو. الناس كلها تطلع وتغير جو وانا الوحيده جالسه فبيته وفغرفه واحده انا وعيالي من بيته لي بيت اهلي والدوام ماشي تغيير نفس الروتين من تزوجته ما في جديد غير الاشياء السلبيه مثل كلامه مع النساء وتصير مشاكل او نظرته وابتساماته لبنات الشارع وتصير مشاكل ولما اكلمه يقول انا ما انظر لهن بالنظره الشهوانيه هذي حجته وان انا شكاكه بس الحبيب روميو يريد يسكتني.

رد : تصرفات أخوات زوجي تجاهي
 

ماقريت كل القصه
بس ترى بعد ماهم ملزومين ياخذونك كل مكان يروحون له
ولا حتى يعزمون اذا فيه شي خاص
اختي كلن له حدوده وخصوصيته

رد : تصرفات أخوات زوجي تجاهي
 

صحيح مو مجبورين ياخذوني كل مكان
لكن في فعاليات مب خصوصيه وبعد ما يخبروني
عالاقل عشان العيال يتعرفو علي اهلهم اذا صار معاهم عيد ميلاد مثلا ما يخبرونا عشان اشل عيالي يتونسون شوي
دام هذي العايله كل شي يسوونه مع بعض وبالسر
اذا شو الفايده اسلم عليهم واجلس معهم ع حسب ما يريده زوجي لان ما بيتغير شي

رد : تصرفات أخوات زوجي تجاهي
 

طنشي
ليه معوره راسك

رد : تصرفات أخوات زوجي تجاهي
 

هنا المشكله بعد لما اطنش ما يعحبهم يقولو هذي ما تريد تجلس معنا وبالتالي بدل ما يطنشوني مثل ما اطنشهم يطنشو عيالي اطفال مساكين
في ناس كذا يكبوا الحره كلها على العيال الابرياء
وهذي اخته صراحه شريره انا عشان كذا اكرهها وبعد تسويلي مشاكل ولما كلمتها احتراما الشهر الفضيل بدل عن تتوب زادت وصارت تحقرتي وبعد تتامر علي دام هذي اولها ينعاف تاليها والله ما راح ارتاح منها الا اذا هي انتقلت مكان بعيد او انا انتقل مكان بعيد وحسبي الله ونعم الوكيل
هي شكلها برئ الي يشوفها يقول مسكينه لكنها هي قلبها اسود.

رد : تصرفات أخوات زوجي تجاهي
 

أختي هم مو مضطرين يآخذونك معهم
يروحون الله يسعدهم ويستر عليهم
أنت بس مفروض تزورينهم وتحترمينهم وتقدرينهم
طلعاتك مع أهلك وصديقاتك وناسك
لا تربطين نفسك فيهم > بصراحة استغرب من الي تربط نفسها في أهل زوجها اذا كانوا ناس اجتماعيه وكسروا الحواجز بينكم وقعداتهم ماتنمل هذا شي ثاني بس غير كذا لا كل ما استقليتي بنفسك كان احسن لك
وبعدين ليش تتشكين لزوجك وتقولين اهلك ما يآخذوني معهم ! طيب بسألك هل أخوانك واهلك اذا طلعوا اتصلوا ع زوجك وقالوا يلا تعال ؟!
يا اختي أنت مشكلتك انك حساسه
تزعلين اذا قللوا من احترامك اذا آذوك غير كذا وش يزعلك ما يبون ينادونك كيفهم يكونون خسروا قعده حلوة معك ❤️
وربي يوفقك

رد : تصرفات أخوات زوجي تجاهي
 

ههههههههههههههههههه احسك تتكلمين عني مع زوجي واهله اول زواجنا عانيت كثييير وانظلمت منهم كثير لدرجة كان زوجي بيطلقني وانا وحام بااول طفل لنا بسببهم الله يعين


الحمدلله صبرت كثير وربي ماينسى عباده الحين احسن بكثير طبعا بس هالقصص تحزني افتكر نفسي على طول وكيف افتروا فيني وانا صغيره عمري عشرين ربي يعينك الافضل تسوي نفسك قدام زوجك انك تحبيهم ومبسوطه منهم وحتى قدامهم وربي بينصرك قريب

رد : تصرفات أخوات زوجي تجاهي
 

امين يارب
لكن خلاص زوجي عرف اني ما ارتاح لأهله ما اقدر امثل اني احبهم
وانا ما احب امثل عليه احب اقول الصدق اذا ضايقوني اخبره واذا عملو شي زين اخبره
لكن اشيائهم المب زينه اكثر
انا اخبره لانه هو يريدني اخالطهم كثير مدري ليش

رد : تصرفات أخوات زوجي تجاهي
 

الله يكون بعونك
غربه هذي فوق انك معاهم ببيت واحد
يعاملونك كانك دخيله

اسمحيلي زوجك ما يعرف يتصرف
و لا كان يرضي الطرفين

اذا حابه تطلعين خذي موقف حازم
و اصري على رايك