|
اهلي يقولون لي فصلي وروحي معه
السلام عليكم
بقول لكم مشكلتي وياليت ألقى عندكم النصح انا متزوجه من 6 سنوات وعندي ولد 5 سنوات لما جا خطبني كانت شروطي واضحه ...سكن مستقل ..وظيفتي مااتركها ووافق على شروطي طيب تزوجنا وحملت ولا فتح لي سكن صرت اسكن عند اهلي لان هو يشتغل بمدينه غير مدينتي واروح لمدينة اهله بالقطار بداية الويكند وارجع لمدينتي نهاية الويكند برضه بالقطار ...لنا غرفه عندهم..والا نظل ببيت اهلي الويكند ( يعني انا بمدينه واهله بمدينه وشغله بمدينه ) كنت بالبدايه استحي واهو قص علي ...مايعطيني مصروف ابددددد وانا استحي اقول له ..والله العظيم يجي بيت اهلي نظل الويكند نتغدى ونتعشى عندهم وننام عندهم وهو مايكلف نفسه يجيب شي بيده وامي تقول لي قولي له يعطيج مصروف وانا اقول استحي ...ادري غلطتي بس كنت استحي اطلب فلوس منه اقول عندي راتبي ...وصرت اصرف على نفسي وولدي بعدين صارت مشكله كبييييره عشان السكن وكذا لاني زهقت ببيت اهلي كني متزوجه مسيار وامي قامت تدق بالحكي ..المهم انه اختفى شهرين ونص ماااادري عنه شي وادق ومااايرد واهلي ماكانو في كانو برا علاج وانا بس ابكي بروحي ومسؤله عن بيت وخواتي واخواني وولدي ..وبعد شهرين ونص تذكرنا جا يبي ياخذ ولده ويكند ومارضيت اعطيه لان عمره 10 شهور ومو متعود عليه والولد بس يمسكه ابوه يبكي ...واحتد الكلام معه ومع امه وقام يسب ويتطاول علي ببيت اهلي وقال لامه لا ترد علي لاني زباله وانا يوم سمعت هالكلمه عصبت وقلت الزياره انتهت وسبيته ولحقني جوا البيت ضربني قدام خواتي وهم مو متسترات وامه واقفه تناظر وانا صرت احمي ولدي بجسمي فاكلت الضرب عدل بعدها امي وابوي جاو ورجعوني له غصصب وانا رجعت عشان ولدي وحتى لما جا كان اسلوبه خايس مع اهلي وامي تقوله شلون تتطاول عليها ببيتنا وتدخل على البنات وهو يرد ( وأكسر راسها بعد ) ويقول لامي الفلوس اللي تعطيك اياها بنتك انا اولى فيها ..وقحححح ..امي تفشلت مسكينه قالت لي خلص مابي مشاكل مابي شي منك بس رجعي له ورجعت.. طبعا عاملني خدامه ..رحت معه بيت اهله اجازه ومعامله زففففت ..وكان قبلها قايل لاهلي اذا تبوني أرضى وأرجعها خل تفصل من وظيفتها وتجي معاي مكان عملي و اجربها وأشوف ..ورحت معه اجازه بيت اهله والله العظيم كان يرمي الملابس بوجهي يقول غسليهم ..ويلبس ويكشخ بيطلع ويلتفت علي الحمام وسخ قومي نظفيه ..يعني احتقااااااااااار المهم انا كنت كل ليله ابكي بروحي واقول يعني أفصل ؟؟ واروح معه ..هذا الحل ؟؟ ومدري وش جابني عند لابتوبه وافتحه واشوف المصاااااااااايب ..بنات ..وضحك ...وخرابيط ..ويعرضون له ...ويوصف لهم كل شي عني ...حتى ليلة الدخله قايل لهم بالتفصيل ...متخيلين ؟؟ واللي قهرني بنت خالته اللي كان يسولف معاها ويضحكون سوا علي وهي تقوله بجنن زوجتك بلبسي وحركاتي وهو يضحك وانا اللي كنت اسلم عليها واسولف معاها ومادري عن شي...ماانسى ذيك الليله وربي...كانت ليلة عيد والناس معيده وانا اكتشفت انه خوان المهم نزلت علي قوه من السما واخذت المحادثات بفلاش وخلصت هالكم يوم ورجعت بيت اهلي ..وبعدين واجهته وانكر وقلت له ترى كلشي محفوووظ وجيب اهلك ونتفاهم ...مات خوووف لان بنت خالته يعني فضيحه وقلت لامي ...امي طبعا من النوع اللي ماتبي فضايح ويهمها كلام الناس ... وقالت غلطه ورجعي له وعديها وكل الرجال كذا وانا مابي مطلقات ...وسامحته ...ورجعت له علشان ولدي بس قلت له فصل من الوظيفه ماااافي اصبر الى ان يجي النقل..وعطني مصروف انا من بعد ذا اليوم ماقمت احس بالامان ابد ...انكسر فيني شي ماعمره يتصلح ..يمكن اسامح بس صعب انسى محادثاته قدام عيني ..والمشكله كاتب مخططاته كلها وحياته كلها بهالمحادثات يعني دريت عن اشياء ماكنت ادري عنها كاتب ( انا بخليها تفصل غصب و اجيبها عندي خداامه اذلها واهينها وبعد مااخلص منها بطلقها وباخذ الولد وبرميها بيت اهلها لا زوج ولا وظيفه ولا ولد ) كاتب( انا اكرهها ومااحبها بس اقص عليها بكلمتين حب اذا ابغى ........ ) عذرا على الكلام كاتب ( انا بدور المشاكل وافتعلها علشان تقول لي احنا مانصلح لبعض ) بالاضافه الى كرمه على البنات بتحويل الفلوس وكلام الحب اللي عمري ماسمعته و وسبه لاهلي و..و.. بعد ماقريت هذا كله تمسكت بوظيفتي اكثر وضاع الامان والحب والثقه وكل شي رضى بشرطي اني اظل بوظيفتي وفرحت وقام يعطيني مصروف لولدي وظل يعاملني كم شهر عدل ويقول لي مسحي المحادثات وكذا وانا قلت له مسحتهم خلاص وانا محتفظه فيهم بعدين قام يفتعل المشاكل ...والله العظيم بس يشوفني فرحاانه لااااااااااازم ينغص علي فرحتي ولو على سبب تاااااااااااافه مايحب يشوفني فرحانه ...مع اني والله العظيم ماقد حرمته من اخوياه اللي يسهر معهم كل ويكند ولا قد حرمته من السفر معهم ولا قد قلت لا ..دايم اقول مابي مشاكل ..علشان ولدي...وعلشان ماارجع بيت اهلي لان اهلي كلامهم لي جااااااااااااااارح والله على اقل شي قامو يقولون لي اطلعي من بيتنا وفكينا منك وروحي معه حتى لو تفصلين و بيتنا صغير ماعاد يتحملك ...ولو ولدي خرب شي وهو طفل قامت الدنيا وولدك وولدك وغثنا ومعرف ايش والله العظيم حتى اني حطيت له تلفزيون ودي في دي بغرفتنا علشان مااايطلع منها نهائي وانا جايبه شغاله علشانه واصلا مااستفيد منها لانها تخدم البيت اكثر ...يعني احيان بس اجي من الشغل اخذ ولدي ونروح غرفتنا مانطلع علشان مايسوي لهم ازعاج الى ان ينامون انزل تحت ناكل شي وارجع مره ثانيه يعني عيشه تجريح في تجريح يعني 6 سنوات انا الام والاب لولدي ..6 سنوات وانا بدون سكن ..6 سنوات وانا بس يارايحه بالقطار ياجايه بالقطار ..6 سنوات وانا اذا رحت بيت اهله اصير شغاله لهم وهم جالسين والله مايسوون شي ..فوق الخيانه والضرب ..وامه طبعا حكايه ثاااااااااااااااانيه من الدق بالحكي ومسكين ولدي ماعنده احد يغسل ملابسه مسكين ولدي ماعنده احد يطبخ له وينظف وراه وتقول لي فصلي من عملك ... طبعا انا ماقلت لهم عن محادثات ولدها ابد قلت يالله بكرم زوجي و مابفشله عند اهله قبل كم يوم ..سوا لي مشكله ليه ؟؟؟ ماخذه اجازه ورحت معه عند بيت اهله وكانت امه مو في ولا الاب بس اخوانه ..طبعا محد قال لي انصدمت يوم وصلت البيت قال لي .. وكان زواج هذيك الليله مارجعنا الا الفجر ..قال لي بكره اصحي بدري نظفي وكذا وطبخي الغدا قلت له طيب شالمشكله جيب غدا من برا ..انا امك ماوصتني على شي قبل تروح ..وشوف الساعه كم ومتى بصحى جيب بكره غدا من برا وبعدين يصير خير وانت تدري باخوك مايعجبه أي شي ودايم يذم قام يصاااارخ الااااااا تسوين الغدا ...انا انفعلت وقلت مو مسويه انا ماني مسؤله عنهم ومحد وصاني شي طبعا هو بكل هوشه يهدد يا بالزواج الثاني او يقول لي ننفصل احسن وانا اقول له لا ماله داعي نهدم بيتنا علشان توافه مانمت الا 6 الصباح بعد ماغثني بالحكي وقام يطلع اشياء قديمه يعني زي انتي يوم كنتي حامل كنتي نفسيه وانتي كنتي ماتسألين وانتي وانتي ... طيب كنت حاااامل يعني مثلا اتعب وانام وماانتبه على مكالمته وكذا وهو الحين والله العظيم نهاية الويكند ارجع بيت اهلي بالقطار مايدق حتى يقول لي وصلتي؟؟في احد بيجي ياخذك ؟؟؟ المهم يوم ثاني صحيت متأخره ..وماسويت غدا طبعا لاني منقهره.. طبعا مايكلمني واكلمه مايرد علي 3 ايام باليوم الثالث خلص تعععبت جاني توحد ماتكلم مع احد وهو يطلع مع اخوياه ويجي مبسووط جيت قلت له حرام عليك ماخذت اجازه علشان اجلس ساكته اذا كذا رجعني بيت اهلي قال فككككه قومي خوذي خلاقينك ارجعك وعلى فكره ماااااااااااابيك خلص شبعت منك رجعت بيت اهلي و امي سسسوت لي سااااااااااااااااااااالفه لييييييييييييييييييه ترجعين ويلا رجعي من مكان ماجيتي مانبيك اقولها يمه مايبيني تععععععععععبت انا اصلح بهالعلاقه تعععبت تقووول اذا تطلقتي ماني امك ولا انتي بنتي ولا ابي اشوفك بالبيت ...حتى لو طلقك خلك معه ماااانبيك ...لاتجيني ابد ولا تسلمين علي قلت طيب خل يتزوج و يتركني بحححالي انا راضيه ....قالت والله اذا قلتي له هالحل ماني امممممك ويلا خذي شنطتك ورجعي ...وانتي فاشله وانتي غاثتني انتي وولدك ومن هالكلام اللي يسم وانا ماقدرت اقول شي لاني محتاجتهم معاي و مانمت هذيك الليله من التفكير و اتذكر كلام امي اقول لها يعني اذا طلق وين اروح؟؟؟؟قالت مو شغلي تصرفي لاتخلينه يطلق...يلا روحي بكره قدمي استقاله واختي الكبيره كانت واقفه معي وتقول لا لاتفصلييين وبعدين امي مدري شقالت لها قامت تقول لي فصلي فصلي بس لاتتطلقين انا نفسيتي زفففففففففتتتتتتتتتتتت وبنجن ومادري وش اسوي .... ادري طولت عليكم وكلامي مخربط بس من القهر ابي افضفض وادري يمكن في ناس يعرفوني بس ماهمني انا من همي صرت افكر انتحر |
رد : اهلي يقولون لي فصلي وروحي معه
طبعا نسيت اقول لكم بطريق الرجعه قلت له طيب ماتبي تعيد التفكير بكلامك ؟؟؟انا ابيك للحين
قال انا مصمممم اني مااابيك خلص وخلص اخذ موعد بالمحكمه |
رد : اهلي يقولون لي فصلي وروحي معه
نصيحة من أخت
لا تفرطين في وظيفتك أبدا |
رد : اهلي يقولون لي فصلي وروحي معه
الله يكون بعونك يا رب و يفرج عنك ..
حياتك صعبة جدا .. افضل حل بما انك موظفة .. استاجري بيت و لو كان صغير و عيشي انتي و ابنك بسلام اياكي تتخلي عن وظيفتك .. هي سندك الوحيد بهالدنيا .. تمسكي فيها قد ما في اهلك ما فيهم خير و لا حتى زوجك .. بعدي عنهم و عيشي بسلام و ربي طفلك بجو هادئ بعيد عن هالعقد |
رد : اهلي يقولون لي فصلي وروحي معه
لاحول ولاقوة الا بالله مشكلتك تقطع القلب
بدل اهلك ما يكونون لك سند ويوقفون هذا الريال عند حدو قاعدين يضغطون عليك بالرجعة وترك الوظيفة ابدا ما انصحك تتركين وظيفتك واذا تبين الطلاق واهلك مو جنبك فيك تستاجري بيت لحالك وتعيشين انت وابنك قبل ما تجيك شي جلطة واذا في احد ثاني من اهلك حكيم وناضج استشيريه وخلليه يكلم امك الله يهديها ويحننها عليك |
رد : اهلي يقولون لي فصلي وروحي معه
طيب يصير أستأجر بروحي ؟؟؟يعني ماتوقع امي بتررضى!!!!
انا مااحس باستقرار ابد يارايحه ياجايه ابغى اسسسستقررررر مع ولددددي مسكين مو مستقر |
رد : اهلي يقولون لي فصلي وروحي معه
قليلها انا ما عاد بدي كفي بهالزواج بدي اتطلق .. لا اما بقعد عندك بكرامتي لا اما بستاجر بيت لحالي و الك كامل الخيار .. خطيها تحت الامر الواقع .. يعني بطلاقك مافي شي تخسريه لا رح تخسري بيتك و لا رح تخسري الامان و لا رح تخسري الاستقرار .. الطلاق هو افضل حل مافي حل آخر مع هيك رجال ما بخاف الله .. و الله يخليلك ابنك و يعوضك فيه يارب
|
رد : اهلي يقولون لي فصلي وروحي معه
يعني رايكم وظيفتي اهم ؟؟
امي تقول لي اساسا خانك انتي السبب في خيانته مااااااينلااااااااااام !!!! كل خطأ يسويه انتي السبب فيه لانك مو معاه طيب يوم يبون وحده تروح معه ليه خطبو وحده موظفه وهم يدروون اني متمسكه بوظيفتي ليه وافقو على شرط الوظيفه ؟؟صح والا لاا وربي خلاص النوم صار يجافيني و ماصرت اكل ابد ... ومزيد علي ولدي موعندي مخليه عنده يقول بخليه اسبوع ....احس موعارفه استقر مفتقدته كثيييرررررررررررر ماينام الا على يدي بعد مااقول له قصه يحب قصة الحصان اللي يفرش اسنانه انا مألفتها له علشان يفرش اسنانه ..يوم شفت ملابسه على السرير جلست ابكي ..جالسه اطالع التلفزيون وفي فلم الولد يقول لامه انا احبك ياماما ..تذكرت ولدي قبل النوم لااازم يقول لي ماما انا احبك ويبتسم ابتسامته اللي تنسيني عمري ويضمني ..تخيلت انه يقول لي احبك ماما وقمت لاشعوري ارد عليه وانا احبك اكثر ياماما ..انا اللي اعرف وش يحب ياكل ووش يحب افلام كارتون واي لبس اللي يحبه ..هو مايدري عنه شي بس قلت مابحرمه من ولده بإجازته يحب أملي له المغطس واحط له رغوه ويلعب فيها مع سياراته وألعابه ..واذا طلع يحب ياكل كورن فليكس مع حليب علشان يصير سوبرمان مثل ماهو يقول لي..يحب يمشط لي شعري ويقول لي ليه ياماما شعرك اطول من شعري ويسوي روحه ياخذ من شعري ويحطه على راسه ونجلس نضحك ...اذا صحيت الصباح وصحى معاي وجهه الصغير اللي فيه النوم واقول له صباح الخير ويرد وصوته نعساان وناعم صباح النور ماما ويضمني ..اتذكر صوته لا جيت من الدوام يركض لي بوجهه الطفولي يقول لي ماما جبتي لي هديه ؟؟ قربت استخف ..ضغط اهلي وضغطه هو وولدي بعيد عني اسأله عنه مايرد سامحوني غصب عني افضفض |
رد : اهلي يقولون لي فصلي وروحي معه
يا حبيبتي والله ضاق صدري عليك مشكلتك نفسي تقريبا انا عندي نصيحه لك بما انك موظفه ماشاءالله عليك ومعاك راتب اول شي وكلي محامي وخليه يبهذل زوجك انتي شارطه عليه انك تبقين في وظيفتك وهو اخلا الشرط هذا ثاني شي حاولي تتقربين من امك وقولي لها انا عندي استعداد استاجر بيت واصرف على نفسي وامك تكون معاك وحاولي قد ماتقدرين تالفين قلب ولدك عليك وتخلينه حنون عليك عشان اذا كبر يكون سند لك واذا انتي عايفه زوجك صدقيني المحامي راح يشرشحه بس دوري لك على واحد كويس لانه هو رفض شرط من شروط الزواج وعليك بالاستغفار اختي والله يفرج همك وهمي مابعد الضيق الا الفرج وربي ارحم علينا من عباده يعني ماكتب شي الا فيه خير لك باذن الله
|
رد : اهلي يقولون لي فصلي وروحي معه
انتبهي تحملين نفسك مسئولية اخطاءة وسوء خلقه
الحين خذي ولدك منه اول شي امك لازم تفهمينها وضعه وسوء خلقه هي أم واكيد بتحن عليك اجلسي معها بهدوء وحاوريها النوعيه اللي نفس زوجك تدور عذر عشان تخونك أو تتزوج عليك توني سامعه بقصه وحدة مقاربه لك من توظفت تركها في بيت أهلها وبعد أسبوعين بس إلا خبر ملكته منتشر الله يكتب لك الخير يا اختي |
رد : اهلي يقولون لي فصلي وروحي معه
والله بكيت قهر
هدديه وارسلي له نسخه من اللي محتفظه فيهم صوره لمحادثته مع ابنة خاله ناس تخاف وما تختشي وظيفتك اياكي تتركيها امك وافقت ام لم توافق خذي سكن لوحدك قولي لها وقت استاجر رح ياتي ويسكن معي وين الدين واين الاسلام الظلم ظلمات يوم القيامه |
رد : اهلي يقولون لي فصلي وروحي معه
حبيبتي عورتي قلبي ،، خليتني اتذكر بنتي الشيطونة ..
حبيبتي ،، الزوج مخطط مثل ماذكرتي للطلاق واكو الحين صرح بها ووالدتك الله يهديها ماتدري بالموضوع بتفاصيلله وتفكيرها مثل تفكير كثير من مجتمعنا .. خلي زوجك يخون ، يقتل ، يسوي اللي يسوي لو يحطك بالقبر بس ما تتطلقين ،! اذن الحل الوحيد ،، استأجري لك مكاان انتي وابنك واستقلي عن الجميع والدتك بكل الاحوال ماراح ترضى فهالشي عليك الحين لازم تتخذين خطووة جدية تجاهه الموضوع لك ولطفلك .. زوجك يظنك ضعيفة فبيني له العكس انك قادرة على تربية ابنك وقادرة على تحمل مسؤوليتك وانتي الحمدلله عندك وظيفة وتعتبر سلاح قووي وابنك تقدؤين تودسنه روضة او حضانة منها يتعلم ومنها تكونين ممشية امورك من غير اعتماد على الغير .. اهم شي الزمي زوجك بالنفقة ، حضانة ابنك لازم يتنازل عنها وماراح يتنازل الا اذا شاف محادثاته المحفووظة عند المحامي ! يعني تغذي فيه قبل مايتعشى فيك وخليك جاهزة لحركاته .. اهم ماعندك هو طفلك وهالشي راح يضمن بقائه عندك ان شاء الله ... بالبداية بتتعبين لكن ان شاء الله اذا استقريتي راح ترتااحين وخصوصا لما تشووفي عيووون ابنك .. امك ،، ابدا لا تتركينها ولا تزعلي منها رغم كل شي هي والدتك ،، بعد استقرارك تسامحي منها راضيها ترى الام بسرعه ترضى حتى لو عصبت وقست بقلبهل شي ثاني صدقيني وانما هاذي تقاليد مجتمعنا العربي ككل .. وربي ينولك مراادك ويبعد عنك وعن طفلك كل شر ويجمعكم ولايفرقكم ولا يحرق قلبك عليه ياااارب ويفرج لك كربتك انتي وكل محتاج دعاء ياااارب |
رد : اهلي يقولون لي فصلي وروحي معه
ي حياااتي الله يكون بعونك
حاولي تستغفري كل يوم 100 مره وربي يفرجها عليكك شوفي لك سكن خاص .. عشان راحتك وراحت ولدك |
رد : اهلي يقولون لي فصلي وروحي معه
وري اهلك فضايحه ومخططاته انه يذلك وو
عشان يرحموك شوي انسي انه تترجيه مايطلق او تروحي عنده خدامه اهلك احد اﻷسباب ﻷنهم ماوقفوا معاك من البدايه المهم الوظيفة ابدا ﻻتتركيها ابنك ﻻتوافقي ياخذه دقيقه اﻹستغفار والصلاة على النبي وقول حسبي الله ونعم الوكيل امسكي سبحة وباليوم اكثر من الف مرة والسجووود في جوف الليل واﻹحاح بالدعاء رب اني مسني الضر وانت ارحم الراحمين اختي الله اقوى وارحم واكرم فرج الله همك واصلح حالك |
رد : اهلي يقولون لي فصلي وروحي معه
الي مش فاهمته ليش بياخذ موعد من المحكمه ؟؟؟؟؟؟؟؟؟؟؟؟؟؟؟
كان طلق ليش يهدد !!!!! هو حاب يذلش ويخوفش لكن طلاق ما اظن كان طلق في المشكله الاولى يريدش تتنازلين عن وظيفتش لكن زوج مثل زوجش ما انصحش تتركين شغلش لانه هذيكي الساعه بالفعل بيوصل لمراده وبيطلقش ، واهلش طنشي كلامهم كله بس تهديد ومناوشات عشان تتراجعين لكن لو شافوش ثابته وقويه وما بتتراجعين عن قراراتش بيوقفون معاش، يا اختي للأسف الكل يراكض على مصالحه حتى الاهل ما صاروا أهل خليش ذكيه ولا تشوفين غير مصلحتش الله يوفقش |
رد : اهلي يقولون لي فصلي وروحي معه
حبيبتي إذا معاشك بيروح لأهلك ولأمك مثل ما قلتي فانتي جالسة عندهم بفلوسك.. إطلعي واستأجري وعيشي بحرية ةاستقلال.. ما ينفع كذا عشانك وعشان ابنك.. لو تاخذي غرفة.. أو تاخذي قرض على معاشك وتشتري بيت.. وأطبخي زوجك على نار هادية.. إنسيه.. بما إنك شفتي مخادثاتإ يبغاك تطلعي من الةككيفة.. ويطلقك بعدها.. فما تتركي وظيفتك مهما كان. لأن مخططه صار عندك.. اطبعي محادثاته.. وإبعتيها له. وابعتي نسخة لبنت خالته.. وهدديهم..
أمك تعاملها غلط معاكي.. وإنتي ما تسكتين لحد.. بكرة إذا تركتي وظيفتك وطلقك بترجعين ليهم مكسورة.. فخذي بيت وقوي شخصيتك.. ما بقلك اتطلقي.. لا.. اتركيه ياكل بحاله. هو شايفك ضعيفة. ونا تترحخيه يخليكي |
رد : اهلي يقولون لي فصلي وروحي معه
لاتهيني عمرك ولاتتركي وظيفتك ابداااااااا والله ينتقم منه وينصرك ويعوضك خير يارب
|
رد : اهلي يقولون لي فصلي وروحي معه
مع راي العضوات الكريمات ..
|
رد : اهلي يقولون لي فصلي وروحي معه
السلام عليكم ورحمة الله وبركاته
اختي في الله ... زوجك من النوع اللا مبالي لا يحمل مسؤليه انه متزوج الى الان ولقد اخل شرط من شروط النكاح واذا اخل اي شرط يعتبر النكاح باطل فلذا نصيحتي لك ك اخ ا لاتتركي وظيفتك فهي الامل لك بعد الله سبحانه وتعالى اهلك يخافون من كلام الناس ولكن ليس عيباً ان تكون الواحده مطلقه فان قبلوا بهذا الوضع او استاجري بيت وعزي نفسك عن الكلام لانه لو تركتني الوظيفه راح يذلك ويهينك وتكرهي اليوم اللي تزوجت في فيه وماراح احد ينفعك والا يوقف معاك من اهلك .... انتي تملكين ثمرهـ عظيمه وهي ابنك حفظه الله فاغتنمي هذه الثمره وحافظي عليه .... اسال الله العظيم ان ييسر امورك ويوفقك لما يحبه ورضاه واكثري من الاستغفار ... |
رد : اهلي يقولون لي فصلي وروحي معه
زوجك يريد أن يُطلقك، وأخذه الطفل الآن ليتعود على أهله ولايبكي عليك بعد طلاقك فتحي عينيك تغدي به قبل مايتعشى بك
وضيفتك+ولدك =السعادة ومافيها الله يرد كيده في نحره ويسعدك يارب |
رد : اهلي يقولون لي فصلي وروحي معه
زواج في غياب الاستقرار لمدة 6سنوات
مو شايفة انها مدة طويلة اذا انت تعبت من الوضع فكيف بزوجك اكيد تعبان اكثر ما ابرر له و لكن فعلا الوضع صعب حتي لو وافق في البداية اكيد علي امل يلتم الشمل و تحصلي نقل تكلمتي عن علاقة بابنك , انا بكيت و انا اقرأ تخيلي فقط ان ياخده لا اظن انك ام تستطيع العيش بعيدا عن ابنها , الان او بعد حين ليه ما جربتي حلول اخري مثل تاخدي اجازة بدون مرتب و تروحي معه مكان عمله , يتحمل مسؤوليتك انت و ابنك و يصرف عليكم و تختبريه عن قرب مش يمكن يتغير ساعتها مددي الاجازات حتي تحصلي نقل اذ ا ما ينفع هذا الحل جربي حلول اخري قال انه اخد موعد للمحكمة يمكن يكون غير جاد بس يخوفك ما دام مستعدة تستاجري ليه ما تاجري و هو يتكفل بالصرف لما يكون لكم بيت خاص بيكم بعيد عن اهله و اهلك يمكن حياتكم تتغير للافضل و حتي لو ما تغيرت , اسمك متزوجة و مستقلة في بيتك علي الاقل تتخلصي من تسلط اهلك |
رد : اهلي يقولون لي فصلي وروحي معه
اهلين
كلامكم خلاني قويه وانا فعلا محتاجه استقل انا وولدي لكن اللي انا خايفه منه اهله وش بيسوون فيني اذا تطلقت ؟؟امي تعاملها معاي جاااااااااااف اليوم صحتني من النوم علشان تتكلم بالموضوع ونرررجع لنفس النقطه فصلي وروحي وارجع واقول لها يااااااااايمه لاتخيريني يهالخيار ابدد انا مو متنازله عن وظيفتي تقول لي انتي غشيتيه قلتي له بتنقلين ومانقلتي ...وهذا غش ياماما والله العظيم لما طلع لي النقل قال خلص مايحتاج تنقلين وكنت حامل وكنسلته لان هو طلب ...والحين انا مقدمه نقل اكثر من مليون مره وللحين الطلب واسمي موجود بالقائمه وش اسوي اكثر من كذا ؟؟؟ غير انه يدري ان السالفه بتطول من ايام الملكه ...وفوق هذا انا ششششارطه بالعقد اجل ليه وافق تقول لي مايكفي بنناديه اليوم وابيك تقولين له انك خلص وافقتي تفصلين يايمه ليه مرخصيني لهدرجه ؟؟ اقول لها طيب كلميه عاتبيه ليه خان ؟؟؟لان هو مايدري اني قلت لكم من قبل ..ويحسب انكم مابعد تدرون فمو حلوه بحقي اني اقول له اني بعلم اهلي بخياناتك ويدري اني قلت لكم الحين وبعدين ماتعاتبونه ولا تقولون له شي بيقول وش هالاهل الفله اللي ماحاسبوني يعني مابيخاف لو سواها مره ثانيه طيب لاتعاتبينه على البنات عالاقل بنت خالته حارتني ...عالاقل قولي له ..خوفيه ..قولي لو اقول لخوالها مابيسكتون ..أي ششششي ..حسسوني انكم اهلي وخايفين علي ...اما انه يطلع منها بلوشي ولا حتى عتاب ؟؟؟ لا طبعا امي تقول اخاف يعاند يا يمه ياحبيبتي لو قلتو له بتفصل وبتروح معك بيكون موقفه قوووووي ..بيكبر راسه ويتشرط .. بيقول خاينها ومع ذلك اهلها قاطينها علي !!!اجل أي شي اسويه بالمستقبل عااااادي لان اهلها ماعندهم مانع اهم شي بنتهم لاتتطلق امي تقول بنناديه العصر وتصالحينه وتوافقين على شروطه وترجعين معاه ...وانا احس اني تعبت والله حتى اني افكر اني اهرب من البيت مادري وين بروح بس أي مكان تقول اييي شششششششي يبيه اذا جا قولي له حاضر وان شالله ...وتنازلي شوي وقدمي تضحيات مادري اكثر من هالتنازل طول هالسنوات شنو يبوني اسوي .. اخر شي قلت لها اوكي بفصل وبروح معه مو تبين افصل بفصل وسكتت وراحت وانا مدري وش بيصير |
رد : اهلي يقولون لي فصلي وروحي معه
حبيبتي تفكير الامهات بجيل امي وامك غير تفكيرنا نحنا بنات هالزمن , امهاتنا يخافون من كلام ناس حتى لو البنت معها الحق والغلط من الرجال نفسو يعني زوجك بخيل ويسمعك كلام موحلو ويهينك ومضيق عليك عيشتك ومشرشحك بالروحه والجيه اش يصبرك عليه !! وخاين كمانا !!
معليش سته سنين وماتغير بتتوقعي راح يتغير طبعا لا .. راحتك ي قلبي اهم من كلام ناس اذا سرت مطلقة , اذا هو مايفهم ان الحياة الزوجية امساك بمعروف او تسريح باحسان , هو حتى شروط عقد زواجكم مانفذه هذا الانسان مايحترمك وللاسف امك وابوك ماكانوا صارمين معو وحتى ماحسسوه انك غالية عليهم ومو حلو بحقك يشحططك بهالطريقة , انا مع اختك لانها تفهم انو صح وظيفتك اهم واهم من زوجك وصدقيني تقدري توقفيه عند حده ومعليش فهم امك وصارحيها انو لوكان فيه خير هو يجي راضيك ويقدرك هذا رجل مايمشي معه غير الزوجة القوية , اذا انت الام والاب ولدك بعد الطلاق مراح يفتقده بلعكس حايعيش مرتاح لكن تفصلي من وظيفتك عشان رجل يحتقرك ويهينك وخاين وبخيل وغير مستقر فانت خسرتي حتى كرامتك ! |
رد : اهلي يقولون لي فصلي وروحي معه
الاخ / الاخت اللي قالت اجري
والله العظيم وربي شااهد علي اني قلت له اكثر من مره ..شرايك نأجر بمنطقتي وانا اللي بدفع اذا ماتبي تدفع بس الواحد يشتري الاستقرار وحتى ان في شقه ملاااصقه لبيت اهلي يعني نافذة غرفتي ببيت اهلي تطل على الشقه وفرحت قلت له السالفه وقلت له اصحاب الملك رضو نفتح باب بينا وبينهم ...انا بدفع الايجار وانا بسدد الفواتير وانا بأثث ماعندي مشكله واذا ماتبي تعلم اهلك علشان مايسوون لك سالفه مو شرط بسكت ..انت ماعليك الا انك تجي ك ملك وقسم برب البيت قلتها له كذا ..ك ملك تعال لقصرك وانا بدللك واهتم بكل شي وبعد كذا مابي شي حتى لو ماتبي تجي هالشقه عادي موافقه كل ويكند اروح لك بالقطار واذا تبي اخوي اللي بثانوي بيسكن معي بس انت وافق .. طالع فيني قال يعني انتي تبينها ؟؟؟....قلت ايه قال ...لا ...ولا تناقشيني ليه طيب ؟؟؟ بس...مو مقتنع وقسم بربي ان هذا اللي صار وبالنسبه للي يقول 6 سنوات كثر طيب ؟؟؟ يعني الحل بعد هاللي شفته اني افصل ؟؟ وافرض فصلت وطلقني وين اروح بعدها ؟؟ اهلي علشان يجرحوني كل يوم ؟؟ والا اظل عنده وانا مطلقه ؟؟ وبعدين ببداية حملي لما جاني النقل هو اللي قال لااا انتي حامل ولا اعرف لك يمكن يصير فيك شي وانا بالدوام خلك عند اهلك وقلت له ترى يمكن مايطلع مره ثانيه ....قال مو مشكله اصلا انا ابي انقل مدينتكم يعني هو اللي قال ...بعدين غير رايه بعدين قال لي شرايج تبتعثين عن طريق عملك واروح معك ...قلت له أكيد انك موافق ؟؟ قال ايه مو تغير رايك ؟؟؟قال لا والله العظيم جهزت اوراقي وترجمتها واختبرت توفل وروحات وجيات كله سويته بروحي بنص الحمل واختبرت التوفل بنص التاسع وجبت درجه ممتازه وولدت وانا اكمل بهالاوراق وجبت القبول وراحت اوراقي للوزاره هاللفه خذت 9 شهور وانا اركض ورا الاوراق وقبل كل خطوووووه كنت اسأله ..أكيد ؟؟؟ماتتراجع ؟؟؟؟والله اذكر كلامه زين يقول لي لااااامابتراجع مستحيل ويوم وصلت اوراقي للرياض وجا الفرز ... قال هونت مابروح ومافي دراسه طيب ليييييييييييييييييييييييه ؟؟؟ ليه تخليني احوس هالحوسه ؟؟ قال بس فكرت بالموضوع وشفت انه ماله داعي اجل ليييييييييييييييه تقترح علي هالاقتراح السخيف وتخليني ارركض ورا اوراقي بس كذا وخلص لاتناقشيني هو كذا عنيييييييييييييييييييييييد ومتردد وعنده كلام اخوياه واهله فوق كل شي |
رد : اهلي يقولون لي فصلي وروحي معه
طيب هو لو ما يبيك شو الي غاصبه كان طلق من زمان ؟
|
رد : اهلي يقولون لي فصلي وروحي معه
هو كان خايف من اني انشر المحادثات علشان كذا ماطلق
قبل فتره بسيطه شرى له بيت بمنطقة عمله وأجر قسم وخلى قسم وانا الخبله اقول له اذا نقلت منطقتك بنسوي كذا وبعدل كذا وهو يقول لي مو شرط نسكن فيه مافهمت الحين عنده مكان سكن جاهز هناك + فلوس الايجار+ امه اللي واقفه معه 100% اتوقع ان هو قال لها ومهد لها وماشاف منها ردة فعل علشان كذا موخايف لانه يوم يجيبني لعند اهلي قلت له ترى بضطر اقول لامك قال قوووولي |
رد : اهلي يقولون لي فصلي وروحي معه
عجبي من أهلك أكثر من عجبي من زوجك..
انتي بين خيارين الأول..تخسري وظيفتك وزوجك.. الثاني..تخسري زوجك وتكسبي الوظيفة وتكفي نفسك.. في الحالين ستخسري زوجك..واسميها خسارة تجوزا..والا ففراق شخص بهذه المواصفات مكسب لا خسارة.. تبقى لك الوظيفة.. |
رد : اهلي يقولون لي فصلي وروحي معه
استخيري
الله يهدي بالك ويفرجها عليكي ويختارلك الي فيه الخير |
رد : اهلي يقولون لي فصلي وروحي معه
حاولي مع أمك ما تكلمه
قوليلها انك راح تفكري بالموضوع ... ومحتاجةوقت ترتاحي عندهم وبعدها ان شاء الله تخليه يجي وتكلميه وبخلال هالوقت فكري بهدووء ودوري بيت ملك او ايجار .. و فيه اقتراح وحده من الخوات . انج تطبعين محادثاته وترسلين نسخه له ونسخه لبنت خالته هالخطوة ممكن تفيدك في انه ماياخذ ولدك .. مااعرف كثير بهالامور لو حد ينفعك هني .. فالأمور اللي تضمني فيها حضانه الولد .. و ما يزعجك وانتي بعيده عنه ممكن تلجأين للخلع بعد .. شوفي شو المناس لك الله يفرج همك يااارب |
رد : اهلي يقولون لي فصلي وروحي معه
اقتباس:
..................... عندي لك اقتراح مثلي انك بتتركين وظيفتك قدام زوجك واهلك و طبعاً قدمي اجازة سنة<<<< ناسيه اش يسموها بس اختي اخذتها و روحي مع زوجك و جربي الوضع تدرين ليه قلت سوي كنك فصلتي عشان كمان ينفق عليك بعدها اتخذي القرار |
رد : اهلي يقولون لي فصلي وروحي معه
لاحول ولا قوه الا بالله
خلاص اهلك مايبغوا يوقفوا معاكي انتي معاكِ سلاااااح لاتفرطي فيه ابدآ استأجري لكِ ولولدك وعيشي حياتك وشوي شوي امك راح تحن عليكِ استغفري كثيييير قلبي وقولي حسبي الله ونعم الوكيل انتي شفتي مخططاته لحياتك انتبهي تنفذيها انتبهي الله ييسر امرك وعليكِ بدعاء الهم والكرب والصلاه على الحبيب |
رد : اهلي يقولون لي فصلي وروحي معه
لا تجادلي في وظيفتك ابدا
خذي الشقة المجاورة لاهلك واسكنيها .. وان استطعت ايجاد بيت قريب لعملك امر جيد وابحثي عن مدرسة قريبة منه لابنك لا تفرطي في المحادثات احفظيها في الاميل او على dropbox تتفعك في امر الحضانة وهذي الاشكال ما تمشي بدون تخويف لا تصدقي من يقول انتي السبب .. |
رد : اهلي يقولون لي فصلي وروحي معه
انا المحادثات يدري انها عندي قلت له اصلا ماحذفتها وهو باااااااايع يقول بالطقاااااااق
وبنت خالته تزوجت قبل 3 شهور وسافرت مع زوجها يدرسون اقول لامي طيب خلينا هالاسبوع نهدا شوي تقول لاااااااااااا لازم حار بحار والا بيتصررررررررررررف اتمنى ان يجي اليوم ويرمي ورقة الطلاق وخلص افتك وخلص حطيت ببالي ان انا وولدي نعيش برا بيت اهلي ومابي شي من احد بس مادري وش بتعلق على موضوع اني اطلع انا الحين مادري كلمته او لا قالت بروح اكلمه يجي اليوم وانا منطقه بغرفتي مابي اطلع مادري وش التطورات اللي بتصير لاتخلوني بروحي |
رد : اهلي يقولون لي فصلي وروحي معه
تعاليلها بالحيلة
انه شرطك الوحيد للبقاء معه انه تاخذين بيت وهو اللي يجيكم كل اسبوع لحد ما تاجرين بيت وتاثثينه وتستقرين وبعدها يسوي اللي يبي |
رد : اهلي يقولون لي فصلي وروحي معه
يظهر ان امك ما عندها حكمة..
وقراراتها بتوصلك للهاوية.. بعدين لو تطلقتي.. لا زوجك يبيك.. ولا امك تبيك.. ولا وظيفة تكفي نفسك وابنك يعني قرارات امك بترميك بالشارع.. . . ما في عاقل في عايلتكم..اب..اخ كبير..عم..خال.. يسندك ويوقف معاك.. .. |
رد : اهلي يقولون لي فصلي وروحي معه
امي وابوي يدقوون عليه مااااايرد حااااقر
|
رد : اهلي يقولون لي فصلي وروحي معه
اقتباس:
افضل حل معاك , اذا مايرد على اتصالات اهلك اتركيه لحد مايجيك لانه تعود ان اهلك يجرون وراه عشان يراضونه |
رد : اهلي يقولون لي فصلي وروحي معه
اقتباس:
|
رد : اهلي يقولون لي فصلي وروحي معه
انا تاركته
بس امي حارقه جواله ...طبعا هو بيتعزز كذا وامي تقول اذا ظل كذا خوذي القطار وروحي له يعني انتم متخيلين اني اوصل هناك وادق عليه اقوله تعال خذني انا وصلت مايجي او يقول مابجي او مايرد اساسا حزتها وش بسوي ؟؟ بعدين احسها اهانه ..يعني درينا بكل سواياك وبعد مو مشكله خذ البنت حنا راضيين !! تصدقون ... يمكن حكمه ان ولدي مو جنبي حاليا لان نفسيتي زفت ومابي يشوفني كذا انا طرى على بالي شي بس مادري اكلمه واذا اذاااااا رد علي اقول له مهما توسلو فيك اهلي وقالو لك شروطك مجابه لاتوافق ... لاتوافق خلاص ويطلق غيابي وافتك احس خلص ماعاد يهمني كلام الناس وماعاد يهم لو امي صارخت علي والا ضربتني بعد ابي اششششتري راااااااااااحتي النفسيه ابي اكون قويه و اهتم بنفسي وولدي فقط احس نسيت نفسي ....انا وش ابي ؟؟..انا وش احلم فيه ؟؟..انا وش احتاج ؟؟.. كان همي كله هو وش بيقول ...هو مو موافق ...تخليت عن احلام كثيره عشانه حتى بالويكند ماااااااااااااااارتاااااااااااح مشوار الروحه والجيه و مقابل الجدران اذا طلع سهر مع اخوياه اظن يكككككفي شرايكم ؟؟ اكلمه اقول له ماعليك من اهلي ؟؟ انا خلص طاااابت النفس |
رد : اهلي يقولون لي فصلي وروحي معه
طيب ولدك متى بيرجعه لك؟
وكم عمره ولدك؟ |
| الساعة الآن 09:28 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©