|
اهتمام زوجي بأهله جعلني أشعر بإهماله لي
السلام عليكم ورحمة الله وبركاته
انا مضايقني شي وابغى اعرف انا صوااب و لا اهل زوجي عايشين بمنطقه بعيده عن ديرتنا بعد ماتوفى ابوهم اخذهم اخوه الكبير يجون لديره اوقات الاجازات زوجي يشتغل في منطقه قريبه من ديرتنا شوي يجلس اسبوع ونهاية الاسبوع يجي ياخذني يوم او يومين او ثلاث من تزوجنا وحنا ع هالحاله لاني كنت ادرس بالديرة و ثانيا لان ماعندنا بيت والان تونا بادين في البنا نجي للمشكله ... زوجي لما يجون اهله ينساني احس اني مااجي في باله الا نارد ويقضي كل وقته مع اهله ياخذ اجازة شهر كامل ويقضيه كله مع اهله وخاصة في رمضان خلاص الشهر كله عند اهله مايتذكرني الا نادر او انا انفجر واعاتبه يحز بخاطري هالشي لما قلتله قال امي لها حق علي اكثر منك ومن ولدك وابغى اجلس معها ... طيب حلو اهتمامه في اهله وحبه لهم وبره في امه لكن انا يعني مالي حق انحرم من زوجي شهر او بالاصح المده اللي اهله موجودين فيها خلاص انا اكون في الهامش لين يسافرون وعاد يرجع يتذكرني وبس ااجلس معه يومين انا لي ثلاث سنوات ماني فاهمته مااحنا عارفين بعض كل واحد في حاله مره سافر وقالي بمر منطقه اهلي قلت اوكي بس لماتوصل طمني عليك جلست سهرانه الليل كله انتظر لو مسج منه يطمني عليه ولا حياة لمن تنادي رسلت مايرد وبعدين طنشته ثلاث ايام ماادري عنه ولا حتى سال ولان كان عندي موعد مع الدكتورة ارسلت له اذكره عشان يجي قبله بيوم يوديني احس اني عاد ذكرته فيني ولا هو مو مفكر المهم انا ابغى اشوف رايكم في هالشي وعتابي له كل سنه يصير هالشي حلو ولا بالغت في الموضوع وفي نفس الوقت ماابغى اكون لزقة تم تعديل العنوان ليتناسب مع مضمون الموضوع |
رد : فضفضتي!!
هل انتي تكونين متواجده مع زوجك خلال اجازته في شهر رمضان ؟
|
رد : فضفضتي!!
اقتباس:
المفروض ماتطرقين لموضوع اهله نهائي وخاصه هو مايشوف اهله غير شهر من السنه وانتي لازم تفرحي وتشجعيه على هذا الشي وتحسسيه بأنك مبسوطه فيهم ، حاولي مره اذا كان عندك شقه مستقله اعزميهم فيها ، اسهري وانبسطي مع اهل زوجك ايش المانع انك ماتفرحي فيهم وتفرحي زوجك هي مره بالسنه استقبليهم ببشاشه الوجه والرضى التام وشوفي ماشاء الله على اخوه الكبير ايش عمل لأهله اخذهم عنده بعد وفاة ابوهم الله يرحمه وبر الوالدين واجب وبعدين ايش فايدة الولد اذا قطع اهله ونساهم !! انتي ترضينها على نفسك ! ترضينها على امك ! |
رد : فضفضتي!!
ايوة انا اكون موجودة بس عند اهلي ..
ماعندي بيت .... لو عندي كان سويت مثل ماقلتي اعزمهم انا عادي عندي وبالعكس فرحانه في اهله وببره فيهم بس انا مالي حق يعني !! |
رد : فضفضتي!!
اي لك حقوق عليه وحقك ان تتركين بيت اهلك وتكونين مع زوجك وين مايكون
واطلبي على الاقل في فتره الاجازة ان تسكنين في شقة مفروشه قريبه من عند اهله . وحتى لوكان ساكن عند اهله اسكني معه ومن حقك هذا زوجك . |
رد : فضفضتي!!
مايرضى اننا نستأجر شهر وقت اجازته ..
يقول كيف استأجر واخلي اهلي ابغى اجلس معهم هو يحب يصوم اول يوم مع امه قلت حلو خلاص اسبوع تقضيه مع اهلك واسبوع معنا مارضى يقول امي احق يعني بختصار انا مالي نصيب من اجازته وعاد الاجازة الجايه شهرين كامله واذا لي نصيب الشي القليل بس يمكن تسكيته بس وانا مليت كل رمضان في قهر وعتاب . . الله يبلغنا لافاقدين ولا مفقودين |
رد : فضفضتي!!
وهو مو وحيد أهله
في خمسة اولاد غيرة 3متزوجين اكبر منه و2اصغر منه موظفين |
رد : فضفضتي!!
خلاص هو شهر ليه تضيقين خلقك عشانه
شلونه هو معاك باقي الاشهر |
رد : فضفضتي!!
ايه بس هو عمره ماجلس معاي شهر
باقي الاشهر تمام بس سنة كامله ماشوفه الا نهايه كل اسبوع . . واذا جو اهله ياخذ شهر اجازة ومااشوفه فيه الا لما اطلب غرض او سوق يوديني ورجعني لاهلي |
رد : فضفضتي!!
اقتباس:
|
رد : فضفضتي!!
يجلس في منطقة عمله اسيوع ويجي الخميس والجمعه والسبت يرجع مكان عمله
نروح نجلس بشقق اجار . .. تونا الايام ذي بدينا في بناء بيتنا |
رد : فضفضتي!!
اقتباس:
بهالحاله يحق لك تتضايقين بس أتمنى ماتكبرين الموضوع ومايصير هاجس بالنسبه لك .. لاتعاتبينه على إهتمامه بأهله لأن من حقه يهتم فيهم بس بدون لايهملك ! |
رد : فضفضتي!!
اكيد في بيت اهله غرفة فاضية
خليه يجهزها لك الله لا يهينه و اجلسي معهم هالشهر شو رأيك؟ لانه فعلا من حقك تتضايقين و تحسين بالاهمال |
رد : اهتمام زوجي بأهله جعلني أشعر بإهماله لي
صعبة اجلس في بيت اهله ومعهم .. احنا عندنا هالشي مرفوض
وانا مااحب هالشي يااسكن ببيتي ولا يستاجر لي شقة اتمنى تجي من نفسه ويهتم فيني وقت اهله موجودين .... بس مااظن |
رد : اهتمام زوجي بأهله جعلني أشعر بإهماله لي
التمني لن يفيد شيئا...
طيب ليه مرفوض عندك السكن مؤقت لشهر واحد مع اهله عيب؟؟ |
رد : اهتمام زوجي بأهله جعلني أشعر بإهماله لي
اولا ماباخذ راحتي
وثانيا اخوانه موجودين وثالثا خواته وعيالهم بعد موجودين يعني البيت مليان ووصعب هالشي بالمره وانا اعارضه بقوة مكان خاص فينا افضل بكثير زوجي مايحب ازعاج عيال خواته وخاصه بالليل لماتجي اخته عند امي تقولنا كذا فلان بالمرة اتعبنا مايبغى يسمع صوت ومدري ايش انا اقول في نفسي طيب ليش مايجي ونستأجر ويرتاح وارتاح .... |
رد : اهتمام زوجي بأهله جعلني أشعر بإهماله لي
بيتكم بيتبني و مسيركم تستقروا مع بعض و التعب يصير ذكريات
في الوقت الحاضر ما دام متعودين تستاجروا لما تلتقوا خلاص هو في رمضان يفطر مع اهله و انتي مع اهلك و استاجروا مكان للنوم ليلا اشوفه حل مناسب لوضعكم هو يرتاح من دوشة العيال و في نفس الوقت يكون لكم وقت مع بعضكم |
رد : اهتمام زوجي بأهله جعلني أشعر بإهماله لي
خطرت ببالي هالفكرة وبقوله واشوف
لما قلت له احنا مالنا حق قال امي ماشوفها طول السنه مااجلس معها الا هالشهر وبعد شهر مايكفيني ... على اساس اننا جالسين مع بعض احنا شهر كلها يومين نهايه الاسبوع في السنه تصرفاته تقهرني وكل ماتغاضيت وسكت ومشيتها احس انها تتراكم في قلبي ومدري وش النتيجه بانفجرر حتى اهله مالهم ذنب بس صرت اكره اجيهم لما يجون من سفر اجي اسلم عليهم مع امي واروح ع طول |
رد : اهتمام زوجي بأهله جعلني أشعر بإهماله لي
اقتباس:
أختي الكريمة شهر لاتستطيعي أن تتحملي !! تخيلي لو زوجكِ سافر سفرة عمل لمدة ستة شهور : ) هداكِ الله هؤلاء أهله وتحملي قليلاً ، ولا تكرهي أهلهم بما أنهم لايأذوكِ ، وأمه عليها حق ياأختي الكريمة ، سنة كاملة لايراها فلا تحرميه ، ورمضان الأغلب يكون مشغولاً بالعبادة وحتى أوقات العمل تختلف فيكون الوقت ضيقاً جداً .. إيّاكِ أن تُعاتبيه وتضعين أهله بأنه هو سبب الإهمال لأنه سينزعج جداً وخاصة بأنه شهر في السنة .. صارحيه بالإهمال وإنه هذا الأمر يزعجكِ وبالكلام الدافىء لكن لاتضعين ذكر أهله هو السبب .. وفقكِ الله .. |
رد : اهتمام زوجي بأهله جعلني أشعر بإهماله لي
أختي انا عندي اقتراح وان شاء الله يكون مرضي للطرفين .. ان زوجك يستأجر شقة وياخذك انتي وولدك ويجيب أمه تجلس معكم .. منها تجتمعون انتي وزوجك ومنها يظل بجنب امه ويبر فيها...
|
رد : اهتمام زوجي بأهله جعلني أشعر بإهماله لي
اقتباس:
'وعليكم السلام ورحمة الله وبركاته لا اقدر اصبر شهر بس اذا كان صدق بعيد عني في مدينه ثانية واكثر من شهر بعد لكن لما يكون في نفس المنطقة ونفس الحي وعنده اجازة يقضي الشهر كامل ولا يعطيني جزء من وقته واجازته مااقصد اني احرمه بس انا بعد لي حق احس انه يظلمني من تزوجت وانا ساكنه عند اهلي مااطلع معه الا يومين وانا اعرف كثير ناس يشتغلون بمناطق بعيده ومايشوفون اهلهم الا شهرين او شهر ومع هذا مايهملون زوجاتهم يعني وش الفرق احس اني شايلهه عليه ولو تكلمت معه اخاف اغلط من القهرر |
رد : اهتمام زوجي بأهله جعلني أشعر بإهماله لي
اقتباس:
انا بس ابيه يتذكرنا يدق علي يقولي باجي اطلعكك تغيرين جو نتمشى انا وانتي شوي نقضي وقت بسيط مع بعض ويردني بيت اهلي ولا نجلس ليله بس مع بعض هو بالمررره مايتذكرني الا اذا ناقصنا شي جابه لي وبس والمشكله انه مايحس انه غلطان اقصد في هالشهر اللي اهله مو جودين فيه |
| الساعة الآن 06:20 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©