|
وش باقي من الآلاااام والتجريح....
بكتب الى بكرة كل اللي بصدري منيب مبقية ولا حرف
إن فهمتوا علي وبيدكم شي والا إسم إني أكتب وأحد يشاركني ولو بجزء بسيط... بداية بقول كان لي صولات وجولات هنا سابقة بس ممعرفي نسيته.. واللي سبق وتعامل معي ممكن يذكرني... أنا يانااس أحس أنهارت حياتي بالضبط مثل اللي واقف على قمة جبل ويشوف سيارته تهوي وتتحطم قدام عينه كنت أحسب بيجي يوم أنتصر على مشاكلي وهمومي وأقول كنت وكنت.. جاء اليوم اللي أقول كنت وكنت ومازلت صحبة ويا همومي... بداية بوضح نقاط .. متزوجة لي تقريبا 22 سنة في نهاية الثلاثين وعندي أطفال وحياتي تمام.. إلا من زوجي أبد مو تمام!! كنت هادية ودود عاطفيه مووت كنت عصبيه بس للشي اللي يستاهل.. الحين صايرة متوترة متبلدة حساسة حاقدة على الدنيا ومن فيها... زوجي من خذته مايجوز لي طبعه ولا فكرة الفاهمين بالشخصيات نمطه ((شمالي شرقي)) أنا نمطي ماعدت أعرفه ـحس الزمن غيرني.. قسم بالله مادري أحس تقلبت حياتي وغيرت فيني أشياء كثيرة.. كان طبع زوجي مايعجبني بس كان ماشي حاله كان يراضيني يناقشني يتحاور معي يحسسني أوقات إنه راغب فيني وشاريني الحين فوق 8 سنين أو أكثر أو أقل زوجي مو هو زوجي تغير ياناس تبدل حاله معي حاولت أعرف مشكلتنا وشي وأحلها كل شي توقعته سبب حاولت أحله بأي طريقة حتى اللي أشوفه خلل منه ومن شخصيته كنت أحاول أسدد واقارب والله لو أقول وش سويت كان لبكرة ماراح أخلص يعني حلول ماهي بسيطة مو مثل حلول بعض الناس سوي نيو لوك جديد وأصبغي البسي وتشخلعي وتلوني وتزحلقي! وش لاحظت في البداية؟؟ إنه ماعاد يقدر ينام معي..ومهما حاول مايقدر.. ومن عشر محاولات كان مره يقدر ..وقدرته غير المعتاد! قلنا ضغوط وتوتر أو شي نفسي أو أو .....الخ السالفة طالت وشمخت.. قلنا تحسس من فشله...دارينا السالفة وحاولت أكون معالجة نفسية..بشتى الطرق بس ماش ماضبطت معي... بدأ الفار يلعب وينطنط في عبي عادي..كل الحريم كذا تفكيرهم.. قلت شايف غيري..والا مسحور أو محسود أو متزوج... وكنت أعالج كل فكرة تطري على بالي..قسم بالله أحس عمري ضاع معه... صرت أفتش جواله وأراقب تصرفاته..صراحه كان مدعاه للشك... نفس الوقت هذا بدأ الرجال يجيب لي أعذار..الشباب رايحين للمزرعه...بغير جو معهم...كان بالفعل عنده ضغوط قوية في عمله.. فكنت أعذره لو ماله عذر.. أعذره أوقات والف فكرة تطري ببالي وأتعوذ من ابليس وماأخفيكم..في البداية كنت أتوتر من الفكرة ووش وراها.. وبنفس الوقت غيابه كان حرية وراحة لي... أستمر الوضع وشكي ماوقف مرات أصارحه وكان وش حليله يقنعني إني أتعوذ من ابليس.. ومرات أسكت وأبلعها... بدأ في نقدي بكثرة... ينصرف حتى عن النوم بنفس السرير! ماعاد يحارشني أبد بلمس أو إيحاء برغبه! بدا يصير عصبي بدأ يفتعل المشاكل!! في كل مره يزيد ويزيد ويزيد لحد ماصار شخص مختلف تماماَ حمقي ولا يقبل بكلمه ولا حرف ولا زعل ولا عتب ولا نقاش ولا أي شي صار يطلع عيوبي لو مافيه عيوب وأولادي أكبر دليل إذا شكيت بنفسي يقولون وش فيه كذا! قلت يمكن أنا أرد عليه دفاع عني وهالشي يعصب به ويمكن أنا... قالوا لا.البلا فيه تصرفاتك طبيعيه! كل فعل وله ردة فعل! المهم ويجي ذاك اليوم الأغبر... أشوف فاتورته في النت اللي عمرها مادخلت بيتي واعرف إن فيه كم رقم لحريم... صدمتي كانت متوقعه بس كبيرة... ليش طيب إذا له جو ثاني مايروق ليش مايعوره قلبه علي ويحن لي أعرف اللي يخون أو يتزوج ثانية يدهن السير مع زوجته الأولى فليش أنا عكس السير.. طبعاً هو عرف بالصدفه وصارت سالفه ومن بعدها والعلاقة متوترة ومشدودة... وأنا لحظتها بس كنت أبي أعرف هل أنا سبب مشاكلي زي مايقول أو وحده دخيله لأني تعبت أحل الوضع بس كني أنفخ في قربه مشقوقه فلمن عرفت خفيت ضغط نفسي إني أثابر .. عرفت الأمر مو بيدي... المهم.. من وقتها وحياتي في إنحدار مستمر والرجال يبين حقده علي كل يوم أكثر من قبل ماصار فيه مصارحه واضحه مني ولا تناقشنا بشكل ودي كان نقاشنا كن كل واحد ماسك سيف ويطعن الثاني ويقول أناالأقوى.. والحق إنا عندي إستعداد بس لمن كنت أتكلم معه كان يهاجمني ... وهذا حالي.. هجر الفراش يمتد لأشهر... تعامل مافيه ود إلا ماندر... إنتقاد وعصبيه وحمقيه وغطرسه إلى مالا نهاية... حكيت لكم كثير هنا قلتوا يمكن متزوج يمكن ويمكن كنت أكذبكم أقول مافيه دليل... بالفعل زوجي محير... كان ينام برا..بس ماقدرت أمسك عليه شي ثاني... الآن له سنتين نظام عمله ورديات فبطل ينام برا لأنه ينام بالعمل..وبصراحه أوقات أشك فيه إنه مو شرط عمل! يطلع يومياً برا بس العشاء لازم في البيت رغم إني الفترة الأخيرة متكاسلة ومايلقى الأكل الواو أو مايلقى أحد يأكل معه بس مستحيل يجي يوم يقول شبعان! المضحك هذا دليلي الوحيد غنه مو متزوج لأنه لازم يأكل معها لو مره مرتين! الحاصل..أني المقروده كنت حافظه أرقام اللي يكلمهم وكلهم 3 أرقام... فبالصدفه قبل كم يوم طحت بمرنامج فضيحة ومقرود مثلي حطيت رقمي وطلعت أسامي لي مالها نهاية عرفت من دلعني ومن حاقد علي ..اسامي ماتخطر على بال وكلها بالفعل تخصني... وحطيت أرقام مني ومناك عبث وبالفعل عرفت حتى ناس حاطين اسم زوجي وأسم الإدارة اللي هو فيها مابقى الا الكروكي:d فعقب كم يوم..قلت يابنت جربي ذيك الأرقام وأنقردت جربتها... والفجعه اللي كلمها يمكن مرتين ومره يمكن عشريت دقيقة ووسائط مرة ((رغم إن عندي فقدان ذاكرة بس هالسوالف ماتنسي)):26: أكتشفت إن هالرقم.... لخطابة...! وآآآه ياقلبي لاتحزن! أنا ياما حلمت حلوم قالوا متزوج ومطلق وياما توقعت هالشي بس أكذبه قامت ذاكرتي تترابط ببعض أربط أحداث باحداث أربط مواقف ببعض كل شي يذكرني بشي... تعرفون الأعمى اللي يسمع أصوات ويجهل أصحابها! بالضبط كنت كذا كنت بوسط الحدث بس ماأبي أصدق ولا أبي أقتنع رغم إني أسمع صوت داخلي يقول صدقي كل شي يثبت هالشي والثانية تبع مركز مادري وش تصير لاتكون هي المتنيلة بعد على عينها... أنا ماصدمني اللي صار زوجي كارهته من أعماقي وعايفته نفسي من شدة ماهو قاعد لي من شدة ماينتقدني باللي أشوفه فيه من كثر ماهو قالب حياتنا هم ومشاكل من كثر ماضيع شبابي بغموضه ومشاكله أنا مو زعلانه إنه ممكن صدق مسويها أنا زعلانة إنه وش ماصار ولف ودار ولعب بذيله مايحس برحمة لي ويعوره ضميره أنا أعرف قريب لي إذا تزوج رجع لزوجته كنه قيس بن الملوح مع إنه مواصيله في الرومانسيه إنه يقو لزوجته يافلانه جيبي مويه إنه بس كلمها وطلب منها كنه قايل ياعمري يابعد روحي تراني ماأستغني فليش حظي معوكس كنه يعطيني بوكس ويرجع يتفل علي ماأشوف ألا الشر بعيونه حتى إني قلت لا بالله مسحور وإن مو جني واحد اللي فيه إلا عشره ربطوه عني وخلوه غضوب وهات يارقيه وياقرايه ويازيوت ويابخور سنين عمري كلها أشوفها تنصب قدامي بلا حول مني ولا قوة أسوا شي لمن تكون عايش توقعات وظنون وحياة غامضة... إذا بتقولون صلي وادعي ربك.. أنا مالي إلا ربي عساه يتقبل مني كل مادعيت ... إذا بتقولون حسد ومادري ايش كل شي جربته مالاحظت شي.. إذا تقولون شخصيتك.. عدلتها ماأرد عليه وطولة لسانه وعشان أختصر والله وبالله إني نعم الزوجة في التعامل كل إنسان يعرف وش يتميز فيه ووش سلبيته بس إنا كنت كني في إختبار وحاولت جاهده أرضيـــــــــــــــــــه بحدود طبعاً لأن شخصيتي فيها كبرياء بزيادة بس كثير كنت أتنازل وأغير أسلوبي يمكن أوصل للشخصية اللي يبيها... أصلا أحصله يعيب شي ماينتعيب زي اللي يبي يسقط علي أي شي وبأي طريقة.. حالي الآن حال وحده تنتظر شي مجهول أحس بقلق وتوتر صعب على وحده متزوجة عقب هالسنين بدال ماتلاقي الزوج الحنون اللي إبتسامته تحسسك بدنيا ثانية من الولفه والمحبه اللي سوالف كنها أحد يطبطب عليك.. تلاقين زوج زجور مكتئب ناقد مافي صوته نبرة حنيه عيالالنا صاروا يتباشرون لو دروا عنه مناوبة حتى اللي مواصل ماينام في غيابه يحسون جو البيت رايق أنا عاد أبي شي منه قسم بالله طابت النفس بس أبي هدوء ماأبي أحس إني غير مرغوبه ماأبي قلة إحترام في الكلام خلاص هو مايكلمني ولا عنده طولة بال لحوار ولا يتقبل مزحي أبيه نفس الشي يتركني بحالي لايذم ولا يسب قسم بالله يدور بالبيت من يدخل ليش هذا وليش هذا وشيلوا هذا وحطوا هذا وأنتم ماتفهمون أو تتحدوني ليش هالفيش مغبر! ليش الباب مسكر! شي لايقبله عقل ولا نفس رغم إني كنت أحب تراب الأرض اللي يمشي عليها الآن أطالعه وهو نايم أحس بنفور وأسبه في داخلي .............. حتى الإنتحار فكرت فيه لولا خوفي من الله أبي أتخلص منه وماني قادره أبي أعدله وماني قادره أبي أفرمت مخي وماني قادره كنت أعشق الحب صرت اشوفه كذب وخداع ومصالح وكلام في كلام ماعدت أثق في الناس صايره ماأتقبل أي تصرف خطأ تثور أعصابي صايرة حادة في طبعي بزيادة لاتقولون عيشي حياتك وأتركيه يتسلط علي ويدور علي عشان يختلق أي إنتقاد لاتقولون أتركيه والله لو بيدي ماقعدت لحظة معه مشاعري الفترة الأخيرة نقيض مابين التبلد والكره للمجتمع والناس والغيره من أي رجال أشوفه سمح ويضحك ويسولف لو في الشارع ومابين رغبة إني يكون لي رجل أحبه بحياتي واعشقه وأعيش جوي وهبالي معه... ببالي كلام كثير ماخلص برجع وبرجع وبرجع هالصفحة مدونة لي برمي فيها حمولي.. وبمشي... السلام عليكم.. |
رد : وش باقي من الآلاااام والتجريح....
مؤلم جداً أن تشعري بنفسكِ مكبلةً بقيودٍ لا تستطيعين الفكاك منها. قلبي معكِ يا عزيزتي وكفاكِ الله شر من أراد بكِ سوءاً. |
رد : وش باقي من الآلاااام والتجريح....
لاحول ولاقوة الابالله
الله يعينج وقسم كسرتي خاطري يوم تقولين ماابي حس اني غير مرغوبه والله ياختي من كثر ماشوف من المشاكل راسي يبي ينفجر توي ارد على وحدها فى الواتس اب ريلها يخونه المشكله الرياييل اغبياء حتى خيانتهم مكشوفه عند زوجاتهم يكشفونهم بسرعه انا بس ابي اسال ليش الخيانه دامه متزوج وعنده الحلال ليش يدور الحرام تبين نصيحتي اهتمي بعيالج وبيتج وخليه صفر على الشمال اهم شئ لاتبينيله انج ميته عليه الله يعينج ويصبرج ياارب شي يضاايق ويقهر |
رد : وش باقي من الآلاااام والتجريح....
حبيبتي صحتك بالدنيا ايش عندك خايفة تخسريه عيالك يبغونك ولا هو شبه منتهي من حياتك اطلبي أنك تنفصلين عنه انفصال داخل البيت مو طلاق لا إنفصال تام غرفتك لوحدك ماتحتكي نهائي فيه ولا تجلسي معاه ولاشيء يجي يطل على عياله ويخرج حتى تهدا نفسك انت محتاجة تقوية لشخصيتك عشان تقدري تواجهيه قولي له انا تعبت ماعاد لي قدرة اتحمل عواصف تقلباتك المزاجية خلينا نعيش في هدنة انت في مكان وأنا في مكان بس كلنا داخل البيت أجل ليش الفيش مغبر وليش الباب مقفول لا بالله ماهو صاحي الله يكون في عونك حاسة فيك ياقلبي لما الوحدة توصل لدرجة إنها تكلم نفسها من كثر ماغربل حالها زوجها ... خليه يتزوج ويبعد عنك لأنه راح توصلين لمرحلة صدقيني جدا خطيرة
ذكرتيني بأخت زميلتي كانت عايشة مع زوج في حياة اشبه ماتكون معتقل جوانتانامو قعدت معاه 22 سنة وعندها اربعة ابناء آخر شيء وصلت لمرحلة وهو نايم أنها تشاور نفسها أنها تجيب سكين وتذبحه من كثر الغل اللي مسبب لها وكلمت شيخ في المحكمة وقالت له قالها اتركيه فورا وفعلا من مدرستها خرجت لاهلها هي معلمة ومامعاها إلا شنطة يدها ورفضت ترجع له بتاتا وطلقها وعيالها انحرمت منهم شهور بعدين حكمت لها المحكمة تشوفهم كل اسبوعين والاآن تزوجت ومبسوطة الحمدلله بعد ماخرجت من تجربة رهيبة . أنا قاعدة اذكر لك هذي القصة عشان لاتيأسي وكمان لاتوصلي لمرحلة تفقدين فيها دنياك وآخرتك .. والآن احنا في العشر ياغالية كثفي الدعاء أن ربي يفرجها لك من واسع فضله ماتدرين بين غمضة عين وانتباهتها يغير الله من حال لحال . |
رد : وش باقي من الآلاااام والتجريح....
والله ماعندي شي أخسره...
وش بخسر! بس المصيبه مهما حاولت أصد.. تتوتر العلاقة أكثر وتكبر الفجوة والوضع السيئ على ماهو عليه.. اي شي بالبيت أنا مسؤولة عنه أي خراب أي تلف أي لمبة منسية تتسكر من أي أحد أو أحد ولعها ونساها أنا اللي يزعل ويكلمني كل شي أنا يحملني اياه ودايم قدامي يذم الحريم فيهم وفيهم وراعيات مشاكل وإن كيدهن عظيم ومهما صلت وقامت لربها فيها وفيها... تبعت نفسيتي اقسم برب العزة والجلال إني كرهته فوق ماتتخيلون مافيه ذرة إحترام لي رغم إن شخصيتي قوية ولو رديت عليه ليش كذا أو أحترمني قال بعد! تراديني ياملسونة! مافيك أنوثة! أحسه أوقات يكذب الكذبة ويصدقها يتقول علي اللي ماقلته والمصيبة في لحظة هدوء لمن يجي نقاش عابر يطلب مني حسن الظن بالناس! وأنا ليه ماتحسن الظن فيني! وكيف أعيش حياتي بدونه وأخليه صفر إذا كان صفر كبر قريح متربع قدام وجهي!! هو مو شباك واسكره ولا باب وأقفله هذا آ\مي ذكر ربي في كتابه عنه وجعل بينكم موده ورحمه هن لباس لكم وانتم لباس لهن! الفطرة الإالهيه وينها؟؟؟ ماقال حب وعشق ولا حتى جنس قال مودة ورحمه وينها؟؟؟؟ ليش الرجل يستحل زوجته ويستبيح نزع الحياء قدامها ويتكلم عنها بما يسيئ لها! ليه يستغل صعوبة الإبتعاد عن حياة زوجية ويهينها! هي مو بياعه بمحل تقول لك مع السلامة وتدور شغل ثاني هذي حياة إذا تركتها يترتب لك فيها اشياء كثيرة خاصة لمن يكون فيه أطفال.. تطلب منك التهيئ لحياة ثانية فليش دايم يتعبطون وياخذونها سالفة الزوجة بدالها زوجة! وبدال الوحدة أربع! وأنا أقدر واقدر حيطة يارب على جثة من نفخ ريشة يارب أكره الرجال وحقدت عليهم صرت أشوفهم كذابين خوانين إذا يقولوا للحرمة ناكرة عشرة فهم يتنكرون لربي ماعرفوا حقوقهم ولا أدري وش درسوا وتثقفوا! رأسي أحسه بينفجر أبي جلسة يوقا والا أحد يخبط رأسي أفقد الذاكرة كرهت إني أعيش عشان مشاكلي كأني أنخلقت عشانها وياليتها مشكلة واضحة كان تهون يمكن الواحد يفهم وضعه أقل شي أنا كأني وحده لفت ولفت ولفت ولفت ولفت لين داااخت ووقفت فجأة لاهي عارفه وين هي والا وش قدامهاوماتدري إلا وهي لاصقة بأقرب جدار! وضع محير وخذ وقت مو هين من عمري وتي تي مثل مارحتي جيتي بس يفرق العمر اللي راح وياليت يرجع! |
رد : وش باقي من الآلاااام والتجريح....
أختي الكريمة صبرك الله بالفعل ما تمرين به صعب مع زوجك وما أحد يلومك على ما انعكس على نفسيتك بعد هذه السنوات
بس أريد ألفت انتباهك لشي قد يكون عجز زوجك الجنسي هو ما قد يدفعه يجرب يتزوج ليثبت لنفسه أن العجز مرتبط بك و ليس به و قد تكون مجرد محاولات وليست علاقات غرامية أو زواج فعلي ،،،،فأنا أرجح أنه فعلا يعاني من مشكلة ما وصلت به للعجز قد تكون نفسية أو عضوية أو روحية بالاضافة أن العجز الذي يعاني منه ينعكس على تصرفاته الغاضبة و انتقاداته الغير عادية و زعله المستمر فهو داخليا يعاني أضعاف ما تعانين و يداري عجزه بانتقادك و تشويه كل جميل تقومين به ،،،، إذا افترضي انه مريض و يعاني و كل تصرفاته ماهي إلا نتيجة لمعاناته قد يكون الوضع أخف وطأة عليك و سيكون تأثير كلماته أخف ،،، هل جربت مسبقا أن تتعايشي معه كمريض لا يؤاخذ على تصرفاته كطفل لا يعي مقدار القسوة التي يوجهها لكم و أن تخليق لك عالما بعيدا عنه تتعايشين فيه بسلام مع نفسك و أولادك و علاقاتك الاجتماعية و اهتماماتك الأخرى ،،، الله يفرج همك و يجازيك خيرا على صبرك بالدنيا و الآخرة و يقر عينك بزوجك و ذريتك |
رد : وش باقي من الآلاااام والتجريح....
على فكرة
هو من النوع اللي إذا زعلت يزعل إذا أبتعدت يبعد يعني مستحيل يحس على دمه! فكرة إني أنام بغرفة بروحي مرة جاية ببالي وأتمناها بس قاعده أفكر ليش أمشي بأسلوبه المعكوس إذا أنا ماطولت بالي وصبرت فهو مستحيل يطلع منه شي حلو أو بادرة بالندم إذا رحت ونمت بعيد بيلاقيها حجه علي ولا راح يحن ويدور وأخاف فطرتي ترجعني وأطلع عنده بااايخة! طبعاً مو حب فيه ولا توقع شي جميل منه بس تبقى الفطرة الأنثوية شي مالنا يد فيها! وهوأشك إنه مولود بقلب مع إنه حساس موووت بس فيه قسوة مو طبيعية إذا زعل عاد دايم زعلان الله يعين بس فمن جد لو ببعد أكثر وش تتوقعون حياتي فوق ماهي متفككة!!! أنا مادري وش يدور بباله ولا نظرته بينه وبين نفسه لي ولا حبه وخرابيطه أنا لي بالظاهر الظاهر شي غير مرضي لي إطلاقاً ولا أي حرمة بوضعي بتكون أطول بال مني الظاهر وضع مزري جداً ماترضاه أي زوجه.. والنهاية ياذبح باأنتحار أو واحد فينا يموت الله يستر |
رد : وش باقي من الآلاااام والتجريح....
اللهم فرج همها واجبر كسرها وارحم ضعفها
أختي اكتبي كل اللي بقلبك فضفضي حنا نسمعك. |
رد : وش باقي من الآلاااام والتجريح....
بديع
هالفكرة ماطرت ببالي ربما تكون سبب لو قلنا فعلاَ هالشي صار بس والله هالشي يجرح يعني لو فرضنا أقل شي وعرف إنه عنده مشكلة المفروض يخف علي شوي مو يدخل حرب معي بكل لحظة وثانية! بعدين إذا هذا أسلوب الحل عنده فهذي أنانيه كيف اللي أجرب أعالج بزواج ثاني! أضعف الإيمان إذا متأكد إن وضعه عادي يلطف الجو لا لي ولا علي مو لازم أششبع زوجتي من هالناحية ومو بالضروري اتأكد بزواج ثاني كم مره قلت يهمني علاقتنا بالدرجة الأولى الرغبة حتى القطاوة و ترغب ببعض بس لمن شخص يحبك ويغليك ويقدرك هذي تعوض أي شي وبخصوص اتعامل معه كطفل بالله عليك.. أنت كرجل سوي وعندك طفل مزعج شقي لحوح بتصبر عليه؟؟؟ لو صبرت مرة ومرتين وعشر وجاك يوم بوقت أنت مجهد أو عندك شغله مهمه تحتاج تركيز صدقني أقل شي بتكون في جهاد ماتعطيه كف يطلعه برا البيت بكبره! هذا وضعي صبرت وتحملت ورحمت وتغاضيت بس خلاص ستووووووب الى متى يعني! |
رد : وش باقي من الآلاااام والتجريح....
بقول نقطة تكررت كثير منه بس عشان تعرفون قد أيش هو متعب
هو من النوع اللي مستحيل يمسك جوالي أو يتابعني من هالناحية وكنت أقول مو شكاك! الحاصل أنا صايرة أهتم بنفسي وجسمي وكان هذا آخر شي من محاولاتي للتغيير صدقوني نحفت مايقارب عشرين كيلو واكثر كل هذا أولا برغبة مني إني أنحف وأوصل لوزن مثالي.. ولأني قلت أبشبع عينه يمكن اجذبه! وبقول شي تراني ماكنت دبا لأن طولي شايلني بس صايرة الآن كيوت فوش يقول ببداية مانحفت! وش عندك! ليش ناحفة! خلاص وقفي! مو حلو النحف! قلت ليش أوقف وش يهمك أنا أبي أوصل شي عشاني أبيه ولمحت إنو أنت ماأنت داري عني ولا تلمسني فوش تفرق! المهم قعدت فترة حسيته متضايق من إهتمامي! نفس الوقت سويت ليزر لجسمي هالكلم من ثلاث سنين للحين لييش مسوية ليزر عشان مين! بزعمه إذا ماينام معي ليش أهتم بنعومته! لمن أروح لمشغل أضبط حواجبي وألونها وش عندك! مادري عنك ليزر وصبغ حواجب!! كل اللي سويته الف مليون وحده تسويه بس ماظنتي وحده منهم قالها زوجها نفس مايقول زوجي! ولمن أدخل البيت الاحظه يحرص يلبس نظارته يطالعني أدري نظراته مو اعجاب,يبي يشوف وش لابسه أو متكحله قدام رجال ولو جاء يوم من برا وأنا بالبيت وشافني لابسه عدسات وحاطة ميك آب وين كنتي اليوم! رايحة لسوق أو احد! ولو جيت من سوق ولبست وقعدت وشاف كحل وعدسات كنتي رايحة فيها للسوق؟؟ والله مو راكبة عليه الغيره أبد مع إني والله بطبعي ألبس واكشخ في البيت إلا ماندر وطبعي اللبس الجديد ماأوفره أول ماالبسه بالبيت يعني مو تصرفي مستنكر! طعنه بقلبي منه إذا تخاف إني أخونك مثلاً ليش ماتشبعني لو بكلام!! |
رد : وش باقي من الآلاااام والتجريح....
حبيبتي أنتي.. وربي يفرج همك في البال داااااااااااااايم وما نسيتك .. وحاولت أتواصل معك في مكاننا السابق بس بريدك مليان "ببلغك وين سرينا جميعا" بقول لك كلمة واسمعيها زييين ولا تدورين وراها أسباب ثانية وتفتحين جروح على نفسك وليه ؟؟ وليه ؟؟ كل مشاكلك مع زوجك سببها ضعفه الجنسي ** التذمر الدائم والإنتقاد , لأجل يشغلك بنفسك ويطلعك غلطانه ومقرفه وما تستحقين أي شئ جميل منه ** الإبتعاد الجسمي والعاطفي ,, لأن ماعنده شئ يقدمه ** السعي في الزواج , يريد تجريب نفسه مع غيرك زوجك تاااااائه وحزين على نفسه وتصرفاته خارجة عن إرادته بسبب الضغط النفسي اللي يشعر فيه أنصحك بعد متابعتي معك من بدايات المشكلة تقريبا بحلين اختاري الأنسب منهم لك : 1- الإنفصال عنه دون طلاق يسقط حقوقه عليك فقط , وتكون غرفته مستقله عنك , وإن حصل يسكن خارج المنزل وأنتي تبقين لأجل أولادك "ولأجل سبب ثاني لا تصرحين فيه له وهو أنه لامكان لك لو تطلقتي" 2- الطلاق ويذهب ليتزوج غيرك ويترك البيت لكم وللأولاد هذا الإبتعاد الكامل عن زوجك من مصلحتكم جميعا ؛ لك أنتي ترتاح نفسيتك وتنسين شئ اسمه زوج ومشاكل ؛ لأنك لو استمريتي بهذا الحال ستنتهين نفسيا وجسميا ولأنك بذلتي كل ما يمكن بذله -ورايتك بيضاء- وله هو لعل أموره تصلح بالإبتعاد , ولعله إن كانت بينكم عين تزول "خصوصا لو طلق ؛ فالطلاق حسب وقائع كثيرة يرفع أثر العين" أو يجرب نفسه مع زوجة جديدة فإن استمر الحال كما هو , قد يلوم نفسه على ما فعل بك , وسيحن لزوجته وأم أولاده وحبه الأول خصوصا أن زوجك يحبك ومقتنع بك قبل المشاكل إذا استقريتي على أحد الرأيين , شوفي يوم يكون رايق إلى حد ما , واذا دخل غرفة النوم تعالي عنده وكلميه كلمات مختصرة جدا ورتبي أفكارك في نقاط 1- 2- 3- لا يكون في كلماتك لوم أو اتهامات فقط قولي حياتنا غير طبيعية والإستمرار فيها بهذا الشكل بيدفعنا للجنون احنا الإثنين , يمكن فينا عين أو حسد وأنا حابه ننفصل . أو قريب من هذي العبارات اسئل ربي الكريم ذو العرش العظيم أن يجعل لك من كل هم فرجا ومن كل ضيق مخرجا |
رد : وش باقي من الآلاااام والتجريح....
اقتباس:
اللهم آمين جزاك الله خير... عطيني بس نكك وأنا أجيك ياقلبي..الف شكر لإهتمامك.. ياختي النت أطيب قلوب من الواقع فيه ناس تنحط ع الجرح يبرى... شوفي أنا ماقطع قلبي إلا أني طول هالسنين أعيش حياتي وأحلها وأتعايش مع تخمين وتوقعات...شي يبكي الحجر قسم بالله! مثل ماقلت أنا محطوطة بوضع مالي فيه ولا أدري وش السالفه انظلمت وربي بحياتي معه وتضررت نفسيا وضاعت حياتي على كدر الوضع مو عادي فمو مسألة تعوذي من أبليس يابنت واركدي وأحمدي ربك.. ياناس أنا أطلب سكينة فقط وبقريح هو وسواياه براالبيت أبي بس تقدير..إحساس بأمان.. ماطالبت حتى بمشاعر يمكن مايقدر يوفرها أو يجامل.. أبي فقط بيت تعمه السكينه البارح آخرتها دخل ونسيت وش ملاحظته قلت يارجل أرحمنا شوي ماكملت خمس دقايق داخل! قال وش قلت بس أعلمكم..قلت مايخالف بس أصبر شوي! مشكلته مايشوف عيب في أي تصرف منه! وأحنا دايم ينصحون ويوجهون لاتطلبين شي من الزوج وهو توه راجع من عمل أو لسى داخل أو فيه النوم أو معصب مابقى إلا ويقولون وهو هادي وهو ساكت وهو مبتسم وهو متنحنط! يعني قدري الزوج وبس وبقريح أنتي وحاجتك من يفهم عاد هذا الأدب وأنو مو كل شي ينقال وباي وقت! من يعلمه البرستيج والأصول وحسن التعامل! من الآخر بقول أصلاً ماعاد اتقبل منه شي لو خمني وضمني خلاص عرفت طبعه وعرفت مسار حياتي ولو شفت شي زين منه أتحرى وش وراه نفسي طااابت مايهمني إذا تعبان ووش سبب سواياه أو سبب زواجه اللي صرت متأكدة منه يهمني أنانيته وطريقة معايشته ونظرته للحياة يهمني السنين الطويلة اللي كان باذل جهده يصغرني ويحقرني ويخليني أنشغل بنفسي وهو يشطح وينطح من يصدق إني ماكنت أنام وهو زعلان مني لو هو المخطي! من يصدق لو نام قبلي ماأتهنى بنومي أبي أنام وياه من يصدق إني أتحرى دخلته علي مشتاقة من يصدق كنت أعشق صوته وريحته ولمست يده من يصدق إني ماأمر من عنده إلا أداعبه وأضمه وأتدلع عليه لمن أتذكر أحس أتذكر شي مايخصني موقف شفته قدامي لناس غيري كنت على نياتي..ومهما قسى أحبه مهما غلط راضيه فيه كنت كثير أتضايق من شخصيته أبد مو فارس أحلامي بس حبيته وعشقته الحين..سبحان اللي يغير ولا يتغير حتى لو سولف معي وهجد بداخلي نفوور عجيب خلاص ماعاد أتقبل حياتي ومو راضيه عنها كنت إنسانة متفائلة جدا الحين لو سويت شي أسويه محبطة غسلت يدي من كل شي ماقدرت أعدل شي ماالله كتب لي غير اللي أنا فيه ربي كتب لي حياتي كذا قسمتي ونصيبي كذا الحمدلله على كل حال الحمدلله على ماقد سر القلب أو ضر... ومسألة أتكلم معه يالغالية وش ينحكى معه! هذا ماينقال له شي بتجي سالفة ثانية وصواريخ أرض جو علمني اتعامل وأتصرف بصمت مسألة فلم مصري .. وبص حضرتك الوضع كدا مش طبيعي وعاوزة أنفصل ومن هالكلام بيقلبها ححرمك من الميراث! من نفسي ممكن أنام بعيد عنه وأتصرف بشكل مغاير بالصد والبعد لكن... وش بجني؟؟؟؟ وش فايدة كلامي معه إذا أصلا حنا متفقين بلا كلام ومنفصلين فعلاَ!! مشكلتي لسانه!! كلامه الجارح.. هذي ماراح تنفصل عني!! أنا قايلته بفضفض وبس وضعي ماله حل......... |
رد : وش باقي من الآلاااام والتجريح....
الا بذكر الله تطمىن القلوب
قومي الليل وادعي ان الله يهدي سرك ولايضيعك ولاتخلي اغلاط زوجك تنكد حياتك وحياة اولادك اللي اعرفه الشمالي الشرقي ينتقد كثير زوجي لما يبالغ في انتقاداته اعرف اني فعينه كاملة مكملة ويبغى يحسسني بالتقصير عشان اكون اتعادلت معه في تقصيره ادرسي وضعك حسنات وايجابيات حددي ماذا تريدين الان لك ولاولادك كي تعيشوا بسلام بعيد عن الحروب النفسية كان الله في عونك |
رد : وش باقي من الآلاااام والتجريح....
صدقتي
وش مالفيت ودرت وشكيت مالي غير ربي... مهما فهمت وجهلت مالي إلا رحمة ربي الله لايحرمني كرمه ورحمته وعفوه عني.. الله يرحم حالي ولا يجعلني شماتة لخلقه... أبي أنسى كل شي.. وأفتح صفحة جدية مع نفسي وأتقبل واقعي وأتجاهل اللي مايناسبني ومايعجبني.. ودي أعيش راضية قانعه فعلاً .. ودي أحس بهدوء داخلي ودي توتري يختفي من مخي ومن قلبي وجسدي أتمنى هالشي بيدي مو كلام..لا..أبيه يكون واقع شي ينصب في عروقي يزيل كل سلبية مرت بجسمي وكل ذكرى سيئة.. يازين هالشعور ,يارب لاتحرمني الإحساس فيه.. يارب.. |
رد : وش باقي من الآلاااام والتجريح....
ما اقول الا ربنا ينتقم من كل ظالم رجل او امراه الشخص الذي لا يستطيع ان يسعد الاخر اتمنى ما يكون سبب في تعاسته وكل شخص ظالم له يوم |
رد : وش باقي من الآلاااام والتجريح....
طيب ياقلبي ماني فاهمة أنت رافضة الحلول اللي قلنا لك وماتبغي تطبقي شيء يعني تبغي تقعدي في الدائرة المغلقة اللي عايشة فيها وتقعدي طول وقتك عايشة دور الضحية واللي تشتكي ماينفع كذا اسمحي لي انت ذكرتيني باختي نفس الطريقة دائمة الشكوى وكل ماجبنا لها حل رفضت والشكوى مستمرة والوضع في تردي ...ليه ؟؟ بأفهم ؟؟ مافي شيء يستعصي على رب العالمين لكن كذا تقعدي تحبطي نفسك وتقولي مافي حل مافي أحد بيخرجك من مآسآتك إلا نفسك قوي عزيمتك وقولي لنفسك أنا استحق حياة افضل لاتجلسي تكرري مشكلتي مالها حل فيه مشاكل أكبر من مشكلتك بمية مرة ومع ذلك حلت وربي فرجها ... لكن طول ماأنت باليأس هذا عمرك ماراح تتقدمي خطوة .
اعذريني على قسوتي بس والله من خوفي إنك تدمري نفسك بنفسك . |
رد : وش باقي من الآلاااام والتجريح....
يعني شسوي بالله!
الحلول اهجره وانصرف عنه واطنشه كل كلامكم سليم بس مشكلتي بعد لسانه ونقده وتذمره وتصغيره وتحقيره لي ع الطالعه والنازلة.. هذي حلها اقول اني انام بغرفة بروحي؟ أو أقول معليش انصرف تزوج وخليني أو أتركني مع عيالي!! بيقول ليش فاتحها سبيل! تتوقعين بيترك بيته لي! او لمن انام بروحي واتركه هل بيوقف خلافاته عني!! أو وضعي بيبقى على ماهو عليه مع إضافة تفكك أسري يهز بيتي وعيالي؟ عطيتوني حلول ماقصرتوا بس أنتم تعطوني كتابة وأنا أقدر الوضع والشخص اللي أتعامل معه اللي بينفع بطبقه بلا تردد بدون تأخير لأني جادة وتعبت لو المسألة شكوى كان ماتعديت القسم وكل ماضيعه مني أنا افضفض وأطرح وضع لو شي شفته صح ومناسب أو ماراح يأكلها غيري.. |
رد : وش باقي من الآلاااام والتجريح....
طيب انا اقولك لما تبغي تطبقي هذي الأمور تحتاجي فقط قوة شخصية ثبات نبرات الصوت وعدم اهتزازها حتى لايشعر بخوفك عينك في عينيه ماتنزلينها صدقيني ستهزه هذه القوة وان صرخ وقلب الدنيا في النهاية هذا تصرف لايفرق عما قبله لكن يشعر انك لست فتاته السابقة فقط الخوف هو مايدمرك إذا عززت ثقتك بنفسك سترين شخصية أخرى لزوجك .
|
رد : وش باقي من الآلاااام والتجريح....
استمري على سورة البقرة يوميا
|
رد : وش باقي من الآلاااام والتجريح....
دام لج صولات وجولات هنا
ياريت تعرفينا على نفسك او تحطين روابط مواضيعك القديمه!! اهنيك على خفة دمك برغم الالم اللي يحتويك!! انتي الـפــيْنَّ عايفته خلاص ... واللي تبينه انه يفكج مٍْْـٍْْ♡̷̴̬̩̃̊ـٍْْنٍْْ شر لسانه وانتقاداته اللي مالها داعي!! دايما الشخص النقاد عنده نقص ونقص زوجج واضح وكبير بالنسبه له وجارح فيحاول يداري عجزه بانتقاص الاخرين !! اعتبريه مريض مثل ماقالت وحده مٍْْـٍْْ♡̷̴̬̩̃̊ـٍْْنٍْْ الخوات واحتسبي الاجر !! قوليله بالفم المليان ي فلان ما كفاك انك حارمني مٍْْـٍْْ♡̷̴̬̩̃̊ـٍْْنٍْْ اشيا كثيره !! ياخي مسموح بس اتركني بحالي خلني اعيش براحه مع عياالي .. انت تشوف اني ناقصه !! خلاص انا ناقصه وبشعه ومتينه ومو حلـِۈۋوھّ وماني سنعه بسسس خف علي .. ضاعت سنيني بالمشاكل والامور التافهه !! بالله عليك عيالك مايكسرون خاطرك !! مٍْْـٍْْ♡̷̴̬̩̃̊ـٍْْنٍْْ هالجو المشحون عالفاضي!! تبي تتزوج روح الباب ياسع جمل بس فكني مٍْْـٍْْ♡̷̴̬̩̃̊ـٍْْنٍْْ حنتك انا بشتري راحتي!! الله يصلح حالج يارب |
رد : وش باقي من الآلاااام والتجريح....
اقتباس:
لا عاد تكلمني بشي يخص البيت , أنا هنا عشان الأولاد وبس ارحمني وريحني إلا لو خايفة كلامك هذا يطلب فيه منك تطلعين برا البيت وتروحين لأخوك أنتي أدرى هل مصلحة أولاده أهم وبيرضى بجلوسك مع انفصال جزئي أو لا إذا أبدا ما ينفع الحل فاشتري راحة دماغك بنفسك ؛ واعتبريه انسان مريض , ويتكلم من غير وعي مهما حكا لا تشيلين عليه ولا تلومينه وفي نفس الوقت لا تعطين كلامه أي اهتمام , سوي لعباراته حذف تلقائي علطول وممكن تجربين وهو يتكلم اسرحي في موضوع ثاني , لأن انتقاداته كلام مكرر وغير مهم والدعااااااااااااااااااااااء الدعااااااااااااااااااااااااء لا تتركينه ولا تستعجلين الإجابة ما تدرين يمكن ربي جعل هذا الإبتلاء سبب لتكفير ذنوبك الأكيد يا غالية أن لا شئ يدوم , الأمور تتصاعد حتى تطلع القمة ثم تنزل إما تدريجيا "يعني تتحسن أوضاعك تدريجي" أو تنزل بقوة "بحيث يرزقك ربي صلاح حال من حيث تحتسبين ومن حيث لا تحتسبين " ويمكن النزول بقوة : انتهاء كل شي !! وفي كل قضاء خير اقتباس:
|
رد : وش باقي من الآلاااام والتجريح....
إحم
يمنع منعا باتا تبادل الإيميلات الشخصية أو نيكات مواقع التواصل الإجتماعي أسأل الله أن يفرج همك عاجلا غير آجل |
رد : وش باقي من الآلاااام والتجريح....
الله المستعان تذكرت معرفك القديم....وقبل فترة جيتي على بالي اقول كيف صارت احوالها وحياتها....الله يفرج همك ويكتب اجرك ويجعله رفعة لك في الدنيا والاخره...
|
رد : وش باقي من الآلاااام والتجريح....
مشكورين أخواتي الله يجزاكم الجنة وكل عام وأنتم بخير صار لازم بعد مواقف كثيرة بعد آخر رد أتخذ قراري وأطبق كلام روح المسا خلاص الرجال مامنه رجاء تأكدت أنه محتقرني وعايفني عاد الله واعلم بالسبب علاقتنا خلاص كذا واضحة إن ماسائت أكثر مازانت يعني لاعاد أتوقع الأفضل ولدي بالجامعه بعد موثق حقير من ابوه اليوم وقت الذبح وعيد سألته قلت بذمتك...قلها بوجهي..هل تصرفت بشي خطأ أو حتى ملامحي أوحت بشي نقول سبب للي سواه ابوه(رمي صحن اللحم عالأرضض لين توسخ!) قال بالحرف الواحد أبوي همجي قلت اسألك بالله ملاحظ معاملته لي سيئة أو أنا حساسة قال معاملته سيئة لك.. قلت ملاحظ هالشي دايم أو أحياناً قال دايماً وأنا ماسالته إني مادري بس قلت يمكن أنا مبالغة يمكن أنا حساسة حبيت بس أسمع راي شخص ثاني يمكن أتوهم يارب عوضني بما هو خير لي أمنيتي أعرف وش المنفذ اللي بيوصلني لقلبه وعقله وينهي خلافنا أو تتضح الصورة لي وأعرف وش فيه هالرجال!!! |
رد : وش باقي من الآلاااام والتجريح....
فكرت أقول الموقف ورد الفعل اللي صار.. يعني الرجال ذبح وخلص وجاي لصحن اللحم قال وش بتسوين وكيف توزعين قلت مادري ومشيت عطيته ظهري طيران بجيب الأكياس عشان أوزع مباشرة في الأكياس.. اللي بوضحه عمره هالآدمي ماطلب مني طلب وقلت لا أو تعبانة أو تعذرت والله أفز لو أني تعبانه ولا عمري طلب شي وسفهته وش ماكان بقلبي أرد عليه.. بس هو دايم يظن إني أحتقره وأني أسفهه وأني أطنشه وهكذا الحاصل لمن رحت عصب قال وين رحتي.. صوت قلت بجيب أكياس وأنا أردوأقبلت عليه إلا أشوفه قلب الصحن باللي فيه! وعصب ليش تعطيني ظهرك وتمشين وقام يسب وأنا الأكياس بيدي وطايرة عيوني قلت كيف سفهتك أنا رحت أجيب الأكياس وقام يسب قال كل عيد نكد! وهذا تراه معروف مني اللي أسويه قلت كلنا اللي نسويه معروف وقام يعيد ويزيد مادري وش يقول دخت منه بس سكت ماعاد رديت والشغالة خذت من يدي اللحم وقعدت تغسل فيه وكان بيذبح خروفي..قال للولد ماتعرف قصاب يعني مايبي يذبح لي أنا تميت ساكتة وأصد عنه وكمل شغله ونفسه خايسه معي تراه من يوم قام ونفسه خايسة بس هالموقف انفجار منه! اللي قهرني وبط كبدي أنه مزحه مع أخته وهي مقتدرة تحدته يعطيها نص الذبيحة وهو عطاها كلمه ويقول أنا قد كلمتي.. طارت عيوني وش هالتحدي.. أخته لها هالتقدير والإحترام ولا يثني كلمته وأنا لي التعامل السيئ! طبعاً هالموقف وترني ولا علقت وصار بعده موقفنا أجل لو قايله مالك حق وأحنا أولا فيه خاصة أختارت أفضل مناطق الذبيحة كان بيذبحني ويسلخني كل كلمه تصدقون أقولها يلحقها بتسائل وذهول منه! مثلاً قبل يروح يعيد عند أخته قلت أحط فطورك كنت مسويه كبده قال أنا طالب كبده! قلت لا بس سويتها زي عادة كل سنة قال محد ياكلها غيري وماقلت أبيها أنا طلبت شي!! ولو سألت وش أطبخ دايم يرد الله يلعن الأكل كرهته! وأن سويت بكيفي قال أنا طالب!! يعني قبل كم يوم لمن سألت وش تبون غداكم لعن الاكل.. وأمس عرفه قلت منيب سائله واسوي فطاير أعرف أنه يحبها وأقعد ساعه أسويها فطاير صغطوطه مرتبه تأخذ العقل من الظهر بالمطبخ لين قريب من أذان المغرب أقسم بربي صحن يشهي منوع بحشوات مختلفه سأل وشو هذي وعلمته.. قسم بالله مامد يده ولا لمسها وهالفطاير مايتقبلونها عيالي قليلي اللي يرغبها بالجبن بالأخير قعدت بالثلاجة! يعني أمنيتي أسأل ويقول لا ماأبي أو لا شبعان دايم ردوده فيها إستغراب سؤال! إندهاش كلامي الطويل توضيح عشان تكونون بالصورة |
رد : وش باقي من الآلاااام والتجريح....
أتخذت قراري إني أطبق الآتي/ ماعاد أقعد بالمكان اللي هو فيه.. يعني يدخل بمكان أنا فيه ويجلس.. أعطيه دقيقتين وأطلع أقعد بمكان ثاني.. أنا تقريباً طبقت هالحركه بس على خفيف جهزت جلسه في الدور الثاني موقع استراتيجي يعني البيت كله تحت عيني تقريبا... وكنت أجلس إذا صار نفسية وإذا هجد قعدت عنده بس هالمره لو يضحك ويدق علي عود منيب قاعده عنده... فمادري إلى متى أطبقها.. الشي الثاني نقطة إني أكلمه.. بخليها بوقت مناسب بعد التطبيق أعلاه لو لاحظ وتكلم وقال ليش صاده ممكن أقول كلام روح المساء كلامها جميل ويحكي حالي بس عشاني عارفة نتيجته مع زوجي عكسية فمادري إذا أقوله أو لا.. يعني مابيوصلني للنتيجة اللي أبي... سالفة ثانية صعبه علي لأني أحب غرفتي وفراشي فودي أترك الغرفه له بس زي ماقلت وغير إني ماعاد تمشي بعلاقتنا هالطريقة يعني ماتنفع تأديب أو كأداة تنبيه بتصير نقمه علي بيصير نفسية أكثر بيشوف حركتي حقيرة ومالها داعي ولا سبب وإني نفسية يعني هو أبد مو متصور إنه هم وغم على قلبي وإنه ظالمني هو بنظره إنه شي عظيم! فمادري إذا تأيدون أو عندكم إقتراح! الحين أنا راكبني أبليس ومدهره فيذا والناس تعيد ولاهيه:d |
رد : وش باقي من الآلاااام والتجريح....
كل عام وانت بخير يالحبيبه
الله يفرج همك تفاصيل حياتك مؤلمه كنت أعيشها قبل سنوات مع شخص من نفس طينة زوجك كنت له قمه في الآخلاق والرقي والاهتمام والاحترام وكان لي قمة في الانانيه والدناءه والاستحقار وهو مع غيري شوفي التصنع والمثاليه تناقض بحد ذاته إلى جاء فرج ربي علي بالانفصال اللهم لك الحمد والشكر عليك بالدعاء الله يهديه ويسخره لكم |
رد : وش باقي من الآلاااام والتجريح....
مهوب العاده ارد من سنين طويله..
موضوعك متابعه من زمن معرفك القديم يجي في بالي ارد احيان بس احس نفسيتك ما تتقبل ماعندي حلول لكن جديده بس هذا الي الله قدرني فيه: حاولي تخلي عيالك يسالونه عن غداه ولا عشاه وش يبي.. بالعربي تجنبي الكلام معه لا تجلسين بمكان هو بالعاده يجلس فيه.. خلي جلستك بمكان غير.. والي اعنيه هنا لاتبينين انك حاقرته لا جلس بمكان وقمتي منه الشي الثالث غيري شوي من سلوكك .. يعني سلوكك الحالي بمقياس الناس الطبيعيين هو طبيعي بس يمكن بمقياس رجلك مستفز او اظهار انك احسن منه او ...او ... او ... واعملي الاتي: حاولي ماتكشخين لدرجه كبيره .. معلوم للخلق ان الزوجه والانثى بشكل عام تحب التزين والتجمل.. لكن حاليا انتي في مرحله حرجه مع رجلك وخلينا ندرس حالته النفسيه .. يمكن هالشي يستفزه.. خلك نظيفه بس من غير تجمل وتزين الشي الثاني.. انشغلي بعيالك ومذاكرتهم وذا خلص وقت الذاكره سولفي وياهم والعبي معهم.. لا تشغلين عمرك بقراءه مثلا لو انتي هاويه للقراءه او لا تنشغلي بالجوال وخاصه لين يكون متواجد بالبيت.. اما لا قده برا البيت خذي راحتك اذا عندك شغاله خليها تهتم اكثر شي بالنظافه.. وين يترسب الغبار حتى لو خفيف خليها تمسحه.. بعض الاماكن ما تخطر لك رجلك بشوفها خلي الشغاله تمر عليها وتنظفها بالاضافه للاماكن الواضحه للعين عشان لا يتلكك انا ما ادري يمكن تسوين هالامور.. بس اذا ماتسوينها حاولي تسوينها وشوفي سلوكه معك يمكن يتغير والله يهون عليك امين |
رد : وش باقي من الآلاااام والتجريح....
الله يعينج يوخيتي!!
بس احترت شنو معرفج القديم !! |
رد : وش باقي من الآلاااام والتجريح....
مريض نفسي
هو حاسس انه ماله هيبه بعد ما صار موضوع الضعف الجنسي بعض الرجال وبعض الحريم خصوصا (حريم الدقة القديمة) يقيسو الرجولة بمقدار الفحولة فكرك من هذا النوع فيخوفك منه ويعمل لنفسه بريستيح وهيبه بالسلوك هذا معاك مثل الشياب اسألي كل عجوز هذا الشايب بسلوكياته وتصرفاته هو نفسه حق اول ؟بتقولك لا تغير كثير بعد ما انقطع الجماع كذلك المتقاعد عن العمل يربش أهل بيته ويعمل رعب ويراقب هذا وذاك ويتدخل في شئون غيره ليش برأيك ؟ الجواب ردة فعل غير اراديه من المتقاعد ليثبت للكل (انا هنا ولازلت مهم والكل لازم يعملي حساب) ضاع الوقت وضاع سنوات شبابك وانتي تدورين حل للمشكله ومالقيتي وان لقيتي للأسف الثاني ما بيتجاوب الين استفحلت وانعقدت انا برايي بما انك حاولتي ورأيتك بيضا فالحل الآن هو (التكيف) تكيفي مع وضعك مش استسلام ولا انهزام ولكن ضيعتي من عمرك ثمان سنوات لحل المشكله وما انحلت لذلك اعتبري نفسك مبتلاة بعاهه وتكيفي معها إلى أن يقضي الله أمرا كان مفعولا اسأل الله أن يرده لك ردا جميلا |
رد : وش باقي من الآلاااام والتجريح....
ياختي لو التعدد حلال للحريم بقولك عددي.. احس جتني كتمة من هالرجل :(
زوجك يحبك مرة .. احسك بتقولين ليتنا بلا هالحب! جد .. اذكر قصصك في السابق لكن نسيت معرفك.. وصدقيني استشفيت انه يحبك .. فيه نوع من الرجال خصوصا اللي عندهم كبرياء اذا حب مرة وزوجته فيها مواصفات يظهر العكس علشان تظل طول عمرها قريبة منه وتحاول ترضيه. المهم اشوف لا تبالغين في رضاه ولا تزعلينه .. عيشي حياتك بعيد عنه لان يبدو لي انه هالرجل ماله حل .. واتفق مع اللي يقول ادعي الله كثير |
رد : وش باقي من الآلاااام والتجريح....
والله يا اختي مشكلتك واضحة مثل عين الشمس
واضح ان زوجك متحسس من وضعه و انت ما شاء الله زدتي من اهتمامك بنفسك مما يزيد شعوره بالنقص اكثر انت الان مخيرة بين ان تصبري و تحتسبي الاجر و تحاولي ان تنزلي من كبريائك و عامليه معاملة المريض او تستمري في هذا المسلسل من الغموض و المنغصات لا انصحك بالطلاق ابدا |
رد : وش باقي من الآلاااام والتجريح....
اقتباس:
عرفت أنه بيسويها سالفة قبل لا أكمل كلامك زوجك معيار الحساسية عنده واصل آآآآآآخر حد له وكل موقف منك , نظرة , كلمة , أسلوب , رد فعل: يفسره بحساسية شديدة الله يعينك بجد !! أما انه ما يحبك أو يحتقرك فغير صحيح هو يحبك , لكنه مغلوب على أمره وأنتي اصغر منه ومازلتي أنثى جميلة وفاتنة بشكل يحسسه بضعفه أكثر وأكثر معاملته السيئه كلها كلها يوصل لك رسايل , ويظهر انك أنثى لا تطاق !! ولا فيها خير !! يصرف نظرك عن مشكلته بالقوة لكن لك رب السماء لا تملين الدعاء والإستغفار , وبتفرج يوم يا جميلة بإذن الله |
رد : وش باقي من الآلاااام والتجريح....
والله لو مشكلتي واضحة كان الحل يتبعها مباشرة سماء أنتِ أكثر وحده عارفتني ماأعتقد أن هذا سبب رئيسي.. هاليومين صاير لبق يفور بس يحاول يهجد... يحاول يكون لطيف نوعاً ما.. بس هالشي ماعاد يعنيني 1+1= 2 علاقتنا تحتاج وضوح وضوح محبة وضوح تعامل وضوح حتى لو إنفصال أما التذبذب هالشي وين ينصرف فيه! ماعندي جديد بس مثل ماشكيت لكم حبيت أوضح وش قاعد يصير أنا قاعدة أطبق قانون الجذب دورة التعامل مع النفس إذا تذكرينها ياسما كان فكري يدور بالدائرة هذي وقريتها ذاك اليوم عطتني دفعه ذاك اليوم أمشي كعادتي خذت نفس وقاعدة أحاول أشوف الدنيا حلوة.. أنا أحتاج الآن لشي من هذا القبيل مو أفكر بزوجي ومشاكلة خلاص ماعاد فيه جديد أبي شي يروق أعصابي يخفف توتري يعطيني طاقة إيجابيه أبي أكون غير نفسي أبي أنا أتغير وأعيش حياة أقل تعقيد وماعاد أعطي أمور حياتي أكبر من حجمها.. |
رد : وش باقي من الآلاااام والتجريح....
شكراً جزيلاً لكل اللي ردوا يازينكم وزين قلوبكم الله يجزاكم الجنة على وقتكم وسعة صدركم يارب.. |
رد : وش باقي من الآلاااام والتجريح....
تمام يا حلوة
الحين أنتي صح . وانتبهي من الأمور العارضه لا ترجعك لأول المشوار الدورة جميلة والحمدلله اللي ربي هداك لها في وقت حاجتك أما قانون الجذب فكثر الكلام فيه وعليه !! لكن خلينا نقول : الفأل الحسن وحسن التوكل على الله وبشكل عام المعنويات بتنفعك اكثر من الماديات !! بمعنى ؛ مفاهيم مثل : التوكل - حسن الظن بالله - الرجاء - الخشية - الدعاء أنفع لك من : استقلبيه - افهميه - أعطيه - وافعلي ولا تفعلي عندما تستغلق الأمور يبقى باب الرب سبحانه مفتوح وميسر لكل عسير عسى يا رب أمورك تباشير وفرح وسعادة وعسى يارب يغسل عنك كل هم ويبدله لك بخيرات وخيرات |
رد : وش باقي من الآلاااام والتجريح....
ماأدري ليه لما قريت كلامك ذكرني أسلوبك بوحده أعرفها
لها نفس التفاصيل وكانت تراسلني بانتظام وانقطعنا عن بعض ... معقوله تكوني هي؟؟؟؟؟؟؟؟؟؟؟!!!!!!! عموماً لا أملك سوى أن أدعو لك بالفرج والصبر .. |
رد : وش باقي من الآلاااام والتجريح....
ممكن تعطيني فصيلة دم زوجك؟؟...اعتقد انه شرقي شمالي متطرف. ..والشخص المتطرف يحتاج لتعامل خاص..
كل مافعلتيه وتفعلينه من اساليب للتقرب له وارضائه تنفع للزوج السوي الطبيعي وليس لشخص متطرف ينزع للتسلط ..هذا لايعني ان العيش مع امثاله مستحيل. .ولكن كما قلت لاتجدي الاساليب العاديه والرضوخ والولاء معه كثيرا.. الله يفرج همك...ويسخره لك. . |
رد : وش باقي من الآلاااام والتجريح....
ونعم بالله..
أنا أحسنت الظن بربي وأعزم على الصبر والتغيير.. بس أتعب من التفكير ومن واقعي... الرقم اللي حصلته بالبرنامج لخاطبة هز الباقي من حيلي بعثرني بشدة من يومها وأنا كل ماحاولت أتجلد أرجع أنهار صح السالفة لها أعتقد 8 سنين بس والله مو هينة علي خطابه! تعرفون لمن الشخص يكتشف شي يبدأ مسلسل قدامك يعيد نفسه تحاولي تستنبطي من كل موقف مر عليك قد أيش كنتي غبية صادق لمن كان يقول عني غبيه ومسويه نفسك فاهمه وأنتي مو فاهمه كنتوا تقولون وش عرفك يمكن متزوج! وأقول لا وللحين مستغربة منه الشي اللي يدينه نومه برا ذيك الفترة الرقم اللي كان بأسمه وشكله شقه مستاجرها للزواج! بس كان الشي اللي يخليني أكذب إني أبوهم نفسي بأي عذر عشان ماأصدق كنت أقول رمضان مايغيب عن البيت وينام برا فطوره يوميا معنا وسحوره وش هالزواج اللي ماأستقر فيه! كان صح يروح أسبوعيا بس أوقات يروح بس يوم! وش هالزواج! والله آدمي غريب مافهمت له مهما تكشفت أمور تبقى غامقه اللي صار قبل كم سنة أشعل الشك في قلبي الحين ينحرق قلبي من طلعاته صرت أشك فيه بالله كيف رجال متزوج وعاف الجنس معي ليش مابين إنه مرتاح مع غيري! ليش ماصار يتغيب غير الويك اند ويتعذر بسفر بكثرة زي أي رجال متزوج بالسر! إّذا عايف الفراش معناها لقى اللي ترضيه مرتاح معها أكثر ليش ماأعلنها عشان يبقى معها أكثر! إذا عايفني بسببها ليش طيب مابين مرتاح وصار هادي ومتغاضي عني وعن أي شي غلط مني عشان فيه شي حلو بحياته عشان هالآدميه أنا تزوجت عليها بهدي اللعب معها حرام! طبعاً بوضح شي إني سبحان الله محلمة حلم فسره لي شخصين أو ثلاثة أنه متزوج ومطلق! وولدي محلم حلم نفس حلمي وفسرته قالوا نفس الكلام وسبحان الله حلمنا بسيارة صغيرة رخيصة رمادية نفس الوصف! بس أنا حلمت إن كرسي الراكب فيه حرق شوي ويد زوجي تأثرت منها وإنه قال الحمدلله ربي فكني! يعني من وين ماطقيتها كان الوضع يشكك وأنا الهبلة أقول لا مو مبين وجع وش أحتري شكلي ماأقتنع إلا أشوفه قدامي معها فأنا الآن هذا وضعي لاني قادرة أتكلم معه وأرتاح ولاني قادره أتجاهل السالفة وأحس إني فوق كرهي كرهته ونفرت منه تفكيري غصب عني عجزت أمشيها يعني وضعي له دور فلو هو الآن يحاول يخلينا متقاربين ويبين إنه شاريني ولي غلى عنده ولو يغير روتينه ويحاول يتواصل معي أكثر وأحسه مطمئن ويدور رضاي وتهمه علاقتنا يمكن كل اللي فوق يتلاشى أو يخف أو يمكن أنسى لأني بكون مطمئنة نوعاً ما.. |
رد : وش باقي من الآلاااام والتجريح....
اقتباس:
كان لي تواصل كبير في السابق مع أخوات كثيرات بالهبل بس للأسف أنشغلنا بالحياة وكل شي تغير! زوجي شمالي شرقي متطرف جداً أذكر فصيلته a+ وانا b+ |
| الساعة الآن 09:15 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©