|
المطالبة بالحقوق
السلام عليكم
منتداي الغالي بادخل في الموضوع مباشرة الحين صحيح اني استقليت بشقة بروحي ولكن زوجي ما يبات عندي الا مرتين بالاسبوع فقط والصراحة هالشي مضايقني جدا جدا حاولت اتفاهم بيني وبينه مو راضي والحمدلله لقيت منه المعاملة الطيبة من بعد الظلم والقهر ولكن يوم الثلاثا كان بينام عندي وكنت طول اليوم مو شايفته وما يه الا 10 بالليل وحضرته قعد يسولف معاها جدامي لا محترم نفسه ولا محترم مشاعري طبعا سكت اول شي بس من صار الصبح دزيتله مسج طويل عريض ووعدني ان ما يكلمها جدامي ابدا وامس سالته بتتغدى عندنا والا عند بناتك قالي كلام ما ينقال انتي ما يبين بعينج وانتي قليلة ادب وانتي وانتي صكرت الموضوع ومشيته وبالليل كنت رايحة بيت صديقتي وخليت بنتي مع خواتها وبطريق الرجعة ضيعت دق علي قلتله ضيعت قالي بطريقة كلها استهزاء وسخرية عن الاستعباط 10 دقايق انتي عندي دقيت على ابوي حبيبي ودلاني طبعا عقبها كرهته كره وشلت اغراضي وييت بيت اهلي على ابو ان باخذ اجازة وابي ارتاح منه كلمت امي وقلت لها يما اذا ما طالبت بحق المبيت محد راح يتبرع بحقي وابي ابعد معاه جلسة تفاهم انا وانتي وامه وهو امي قالت اي استشيركم اللي ابيه هل اقعد معاه هالجلسة؟؟؟ وانا الصراحة ابيها هاليومين مدام اني عند اهلي احس بتمصخ اذا رديت بيتي وشلون افتح الموضوع جزاكم الله خير |
رد : المطالبة بالحقوق
يابنت الحلال ليش طلعتي من بيتك؟
أختي صبرتي ونلتي بيت اصبري أكثر وتلقين زوجك يتغير للأحسن أكثر ،، مع الدعاء والصبر تلقينه يعدل بينكم. طولي بااك ياموهبة. |
رد : المطالبة بالحقوق
اخر شي أعرفه أنا أنه أم بناته مو عايشه مع البنات ...صح؟
يعني هو قاسم أيام الأسبوع بين 3 أماكن ؟ كيف قسمته بالضبط ؟ |
رد : المطالبة بالحقوق
طلعت وبارجع يعني بس جذي اني ابي ارتاح جم يوم
قسمته بيني وبين بناته بالمبيت يومين بالاسبوع لي والباجي لهم اما زوجته عايشة عند اهلها ويروح لها يستمتع معاها ويطلع |
رد : المطالبة بالحقوق
سؤالي اناديه نتفاهم مع امه وامي
والا اشرايكم |
رد : المطالبة بالحقوق
موهبه انتي ابخص بزوجك الي خايفه منه هل هو شاريك وا بس بينتظر الشاره و يطلق
اخاف هذا يعطيه سبب يطلقك او يعلقك يقول طلعت من بيتي ما ابيها غريب نظامه معقوله يروح يبات عند زوجته عندواهلها وحتى يزورها ليه مابردها على ذمته ويلم شملهم مع بناتها الي مرمبين عند اهله ماسمعت بكذا من قبل استخيري موهبه اذا شايفه انه شاريك اقعدي معاه واملي شروطك خاصه اذا مضايقك عدم عدله المشكله بزوجك مش حق المبيت اسلوبه وعدم اهتمامه اجل زوجته ضايعه يستهزئ الله يهديه |
رد : المطالبة بالحقوق
زوجته ما تبي ترجع
وهو ما يبات عندها بس اذا بغى خذا منها حقه وبس وزوجي مدلل زوجته عالاخر يداريها حتى من نسمة الهوا وانا عادي عنده وهو اتوقع شاريني وسالفة الطلعة من البيت عندي سبب قوي ان صاحب العمارة قاعد يصبغها والريحة تأثر على تنفس البنت وصدرها السالفة مو طلعتي من البيت السالفة هل اناديه والا لا |
رد : المطالبة بالحقوق
اقتباس:
لكن كل هذا مو شرط نناقشه هنا ... تقدروا تناقشوه انتي ووالدتك ووالدته وانت وهو جوابي ..نعم ناديه ناقشوا الموضوع واسمعي ... أسمعي بإنصات وحطي نفسك مكانه ... بعدين اشرحي نفسك وشعورك بهدوء وأعطي مجال لوالدتك تتكلم لأن هي بتكون أقل انفعال منك ليتك قدرتي تحتوي بناته ويعيشوا معاك بشقتك .. إحتمال وقتها ما كان راح يحتاج يتودد لأمهم الله يهديه ويسخره لك ويوفق ما بينكم جميع |
رد : المطالبة بالحقوق
خالتو بيتا بناته اهم طلعوني من بيتهم بسببهم
مهما كانت مرة الابو طيبة وزينة بتظل ثومة مأكولة ومذمومة باب بناته صكرته من زمان وهو بعد صكره وانا ما عندي مانع ان امهم ترجع حق بناته وابي هالشي بس هم بعد ابي حقوقي الله يكتب كل خير |
رد : المطالبة بالحقوق
السلام عليكم موهبه
استخيري ان كان في جمعتكم خير اكيد ربي ييسرها وان لا ربي يصرفها عنك والمهم دعاء الاستخارة في السجود الله يسهلك ان شاء الله |
رد : المطالبة بالحقوق
الله يفرج همك حبيبتي ويسخره لك
تفاهمي مع زوجك بكل هدوء دامه تغير معك في التعامل وصار افضل من اول ان شالله يتغير ويبات معك اصبري حبيبتي وعليك بالدعاء الله يسخره لك يارب ويخليك لبنتك قلبي معك |
رد : المطالبة بالحقوق
امي كلمت امه وعلى طول كلمته ودزلي رسايل ليش مشتكية حق امج انتي قاعدة تحديني على الشر
قلت له مو مشكتية وامي تبي تشوفكم انتوا ما تبون تشوفونا؟؟ وقلت له ليش تسيء الظن فيني؟؟ قالي تعوذي من ابليس وردي البيت قلت له اجازتي ما خلصت اذا خلصت رجعت حبيت نطرح الموضوع والقلوب متصافية والجو يكون حلو ما حبيت اييون جنه متهاوشين انا وزوجي الله يكتب كل خير |
رد : المطالبة بالحقوق
الله مدري الوضع معقد وغير واضح
غريب نظامه وغريب تفكير زوجته الاولى لا هي مطلق ولا هي على ذمته يدلعها وياخذ حقه ويروح صارت زواج مسيار وانتي ياموهبه انسانه طبيعيه تبين حياه عاديه مثل الناس يازوجه ثانيه بعدل يا زوجه وحيده وهذيك مطلقه بس كذا وضعه مو راسي على بر ناديه دامه شاريك وتفاهمي معاه ماراح تخسرين شي |
رد : المطالبة بالحقوق
اي والله اختي مبتعثة عمري ما سمعت بهالشي
وضعه غريب جدا الله يكتب لي كل خير دعواتكم |
رد : المطالبة بالحقوق
خطوة جيدة أختي الكريمة و بطريقتك و اسلوبك اجعلي من الجلسة ودية بعيدة عن توتر زوجك
و ببداية حديثك امدحي في زوجك تغيره للأفضل في علاقتكم و أشكري له محاولاته و كل خطوة قام بها لإنجاح زواجه بك ,,,, و نقطة العدل طالبي فيها من باب ان بنتك تتربى في جو من الاستقرار وحتى لا تشعر بأن أبوها يميل لبناته من الأولى و يفضللهن عليها ،،، ركزي على هذه النقطة فوجود طفلة بينكما تحتم عليه أن يتعامل مع الوضع بشكل عادل |
رد : المطالبة بالحقوق
مرحبا موهبة .. نصيحتي لك إنسي الاجتماع وانتي في بيت اهلك .. إذا رجعتي بيتك حاولي معاه واطلبي أمك وأمه إذا لزم الأمر واجتمعوا في بيتك.. زوجك عصب من قبل ما يعرف إنتي شو ناوية ،، شو تتوقعي ردة فعله إذا طلبتوهم لبيت اهلك عشان هالموضوع .. ؟ |
رد : المطالبة بالحقوق
اختي بديع المعاني خوش فكرة نبدا فيها الموضوع
يزاج الله كل خيًر اختي داماس مو حلوة انا اللي اعزمهم ووزرجي موجود المفروض هو يعزمهم هو بثانية يقلب من اقصى العصبية الى اقصى الهدوء الله ينطقنا بالحق ويفتح علينا يارب |
رد : المطالبة بالحقوق
دعواتكم لي
بعد المغرب بييون الله يكتب كل خير |
رد : المطالبة بالحقوق
امه اعتذرت من الحضور
هل نكلمه انا وامي؟؟ |
رد : المطالبة بالحقوق
ياموهبه..لاتتنازلين أبداً عن حقج في المبيت
كيف يومين يبات بس..والباجي يكون عند بناته انتي بعد أم بنته..ولج ولبنتج بعد حق موهبه يا أختي أنا مابي أسوي شوشره بينج وبين ريلج ,بس الشي اللي يسويه حرام هذا إذا ماكان متفق معاج فيه من قبل العقد الله يصلح أحوالكم ويسخركم حق بعض |
رد : المطالبة بالحقوق
عيزت وانا اطلب مو راضي يقول البنات مسئوليتي امام الله ومحد محاسب عليهم الا انا وكثر الله خير امي تجابلهم
بس الحين من بعد اهانته لي وان كلمها جدامي قلت ليش اصبر على انسان ما يستاهل الصبر حسبي الله ونعم الوكيل |
رد : المطالبة بالحقوق
موهبه هذا نصيبج ليه تحرمين بنتج من بيتها
خليه يجي لو يومين ويصرف على بنته وبكره باذن الله مع الصبر بتنحل الامور بتحملين وتجيبين اطفال وبيكبرون بناته ويعتمدون على انفسهم ومرده لك |
رد : المطالبة بالحقوق
امي تقولي نفس كلامج اختي مبتعثة
وتقولي تخيلي عمره 45-50 وين بيروح اكيد بيرجع لج بس انتي صبري دعواتكم |
رد : المطالبة بالحقوق
امه اعتذرت عن اللقاء
توقعت هو ايي عشان يشوف بنته ولكن ما يا الخيرة فيما اختاره الله احنا استخرنا والظاهر ان المطالبة مو بصالحنا الحمدلله على كل حال |
رد : المطالبة بالحقوق
فكري بطريقة أخرى و بإيجابية أكثر و اعتبري عدم حضور أمه و اعتذارها خيرة من ربي و بأن المواجهة ليست لصالحك بهذا الوقت ,,,, و ما دام في تقدم للأفضل بعلاقتكم فيستحق أن تستمري و ما تضيعي صبرك و تنسحبي بهذه السهولة و أتصور بنتك من تكبر و تبدأ تفهم و تدرك فسيبدأ زوجك يساوي بينها و بين بناته من ناحية الاهتمام و التواجد ،،،
و بصراحة زوجته مع طول هجرها لبناتها ما أتصور يستمر حاله بهذه الصورة معاها للأبد سيأتي يوم ليحسم أمره معاها استمري في الدعاء والله وحده قادر على تغيير حالك لأفضل حال و ما بعد الصبر إلا الفرج و راحة البال |
رد : المطالبة بالحقوق
موهبة
بعد الصبر واللي نلتيه الحين ياية تستسلمين اصبري حبيبتي وحاولي تتفهمين ريلج وتفهمين موقفه هو بالنهاية قاعد عند بناته مو عند زوجة غيرج احتويه واذا بيتج ايجار وبعيد عن بناته حاولي تقربين لهم كثر ما تقدرين الروحة والردة متعبة ومافيها استقرار |
رد : المطالبة بالحقوق
بديع المعاني حبيبتي يزاج الله خيرنفس كلام رفيجتي تقول زوجج بيكبر ويبي يستقر مو فاضي حق المراهقة
الله يسخره لي يارب فاكهة الشتاء البيت قريب ولله الحمد وانا ادفع جزء من الاجار بطلب منه انا اصبر ما عندي مانع بس ان يكلمها في بيتي والعكس مو صحيح ما ارضاها الصراحة ولا وحدة بالدنيا ترضى هذا اللي خلاني اتساءل ليش اصبر وهو مو مقدر صبري يدلعها ويدللها ويخاف على مشاعر جنابها وانا لا هذا اللي خلاني اكرهه وابطل اصبر الله يسخره لي |
رد : المطالبة بالحقوق
موهبه ليه تدفعين جزء من الايجار دام البنات عند اهله والمره عند اهلها انتي البيت الوحيد المستاجره غريبه مو ينزل له بدل ايجار
|
رد : المطالبة بالحقوق
والله يا مبتعثة ما ادري شنو اقولج
لما ولدت مرته شنت علي حرب مو طبيعية ولما كنت في فترة النفاس كل يوم والثاني يقولي لازم ننفصل يمشي ورى كلامها فجاة بدون سابق انذار لا انا ابيج وماراح الفى مثلج ومن هالكلام وما خلاني ارجع بيتي الا بعد شهرين بحجة ان يبي بناته يتأقلمون مع الدراسة اول شي بعدين مع الوضع اليديد وبعد ما رجعت بناته زادت غيرتهم مني ومن اختهم شلون اختهم مع امها وابوها واهم لا وصارت وايد مشاكل فقالي انا ما اقدر افتح بيتين لازم ننفصل بدون اي سبب - حسبي الله ونعم الوكيل- بعد مناورات ومناقشات واخذ ورد قرر ان ادفع جزء من الايجار وبعدها بشهرين قالي حتى معاش الخادمة عليج امه كانت تقولي اذا طلب منج طلب لا ترفضينه على طول اول شي وافقي بعدين شوي شوي اطرحي اللي تبينه فانا قلت لان البيت قريب من بيت البنات فاشتري القرب واشتري زوجي لان ادري فيه كسول والحمدلله ان الله رزقني بهالشقة حلوة وواسعة ومكانها عالبحر شي جميل جدا |
رد : المطالبة بالحقوق
الله يعينك
مشكله الي يتزوج وهو مو مستعد طيب بنتك مو زي بناته مالها حق مثلهم وهو مراعي بناته ونفسيتهم ومراعي امهم الي راميتهم سبحان الله الي خايفه على بيتها وعيالعا مالها قدر العموم لا تطالبين بحقوق ولا شي اصبري واسكتي لفتره من الزمن والتاليه لك باذن الله واهتمي بنفسك وبنتك وجيبي لها اخوان صدقيني مافي احلى من الضنى وهو خليه يعابل ببناته ومرته الي عند اهلها وانتي خلج ببيتك معززه مكرمه لا تنتظري منه شي وخلي امه تربي بناته عائله غريبه عندي نصيحه موهبه ليه ماتكملين دراسه دام ماشاءالله عندك متسع وقت استغلي هالشي |
رد : المطالبة بالحقوق
انا عندي ماستر والصراحة مالي نية اكمل باخلي حهدي حق بنتي ابرك
هو فقير ما يعرف خباثة الحريم امه تجره من صوب ومرته من صوب وهو صاير كرة بينهم لا حول ولاقوة الا بالله رايكم اني اسكت وما اطالب بحقي الله المستعان |
رد : المطالبة بالحقوق
أختي موهبة
دائماً كرري عليه انك منتظرة تغيير للأفضل قبل ما تكبر بنتككم و تبدأ تعي انه يميل لإخواتها و يفضلهن عليها طالبي بحقك ولكن بلطف و بحكمة و أنت موفرة له جو مستقر وحياة دافئة امدحي له اهتمامه بك و بابنته و أتبعي ذلك بقولك أنا واثقة بأنك مستقبلا ستصل بنا لحياة عادلة أكثر ترضي بها الله و ترسخ بها الاستقرار في بيتنا الزوج إذا بينتي له راحتك على النظام الحالي قد لا يسعى لتعديل وضعك لذا كرري بلطف و بحكمة كل فترة بأنك على ثقة بأنه سيصل بكم لحياة أكثر استقرارا و أمانا و مثل ما قلت لك مستحيل يستمر للأبد هو و زوجته بهذه الحالة الغريبة سيأتي يوم و يحسم وضعه معها فقط تحلي بالصبر و تسلحي بالدعاء و الهدوء ربي يوفقك و يلهمك السداد و الرشاد في قولك و عملك |
رد : المطالبة بالحقوق
بصراحه اقول اسكتي
الي يطالب بحقوقه يكون ضامن شي يعني يا زوجها ميت عليها او يصدقها او يخاف على عياله لا حصل شي لكن زوجك عارف انتي وش كثر مهتمه بالبنت وانك ام صالحه فما عنده شي يخسره انا اقول سكتي ليمن يجي الفرج والله كريم ادعيه وبالدعاء والاستغفار تحقق الامنيات والمعجزات بعد الحين الواحد يقيس اموره بذكاء ويدرس الوضع الواقعي وعلى اساسه يقرر اي حركه وش نسوي الزواجات بعضها صارت زي الحروب يبغى لها تكتيك والله المستعان ارجعي لبيتك واكثري استغفار وحطي جهدك بهاالكتكوته ربي يحفظها وزوجك اتركيه لا كثر الطلايب ولا الكلام بتطيح الي براسه وعل فكره هو معتبرك الحين سبب الصداع اسمحي لي اتركيه واسكتي عنه خليه يعرف من سبب الصداع الحقيق بحياته الله يعزك وينصرك يالغاليه وان طعتيني حلو معاك ماستر كملي دكتوراه بكره عيالك يفتخروا فيك |
رد : المطالبة بالحقوق
بديع المعاني كلامج صح هو مرة قالها انا الحين مو حريص مثل قبل احسج مستقرة
الله يكون بالعون اختي مبتعثة انا على قدم وساق في الدعاء واحس ما غير حياتي لللافضل الا الدعاء بس لي متى اصبر واسكت هو شكله عاجبه الوضع جذي وطبعا مرته تبي هالشي من زمان لا مسئولية ولا عوار راس بس مجرد عشيقة بالحلال الله المستعان |
| الساعة الآن 05:04 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©