|
احترت في قبول اضافة قريبي على الفيسبوك
السلام عليكم ورحمة الله وبركاته
خاله بيتا كيفك شو اخبارك وان شالله كل عام وانتي بخير وسلامه << صحيح متاخره بس يارب تقبليها مني مابعرف ليه اول ما صار معي هاد المموضوع واحترت بحلو خطرتي عبالي انتي اول وحده بحس ماشالله عندك قدره عجيبه بفهم الافكار حتى من خلف الشاشات لاقوة الا بالله قصتي بدات برمضان تقريبا اول يوم اجاني اتصال دولي <من فلسطين طبعا ع برنامج الفايبر وانا ماكنت عند موبايلي ساعتها وعادي تجاهلت الموضوع بعد كم يوم اجاني فضول اعرف لمين هالرقم وفعلا سويت بحث وطلع الرقم لابن خالتي استغربت كتييير لان بحياتي ماشفتو ولا عرفتو هاد الشخص حكيت مو مهم يمكن بالغلط لانو رقمي مع كل خواتو تقريبا وبرضو مرت الايام :) واخدت جوال ماما استكشفه كنوع من التطفل لا غير :) ولقيت محادثة ع الواتس بين ماما وابن خالت من اول يوم رمضان ومحادثة شو طويييله عريضه ولقيت فيها انو حاكي لماما انو اتصل فايبر بس ماحدا رد " وماحكالها بالضبط ع أي رقم " وطبعا الفايبر مو موجود عند ماما وماما بكل طيب نية حكتلو انو هاد البرنامج مابيشتغل عندها المهم في يوم 13 رمضان تقريبا اجتني اضافه ع الفيس من ابن خالتي مابكزب عليكي حسيت بزحمة مشاعر فرح واستنكار وشوية خوف انو شو المناسبة يطلب صداقتي انا تحديدا حكيت مو مشكله يمكن بالغلط وشوي رح يكنسل الموضوع ومرت ايام ولسه الطلب موجود ليوم فكرت اوافق بس تراجعت لانو ولا وحده من خواتو ضافت اخواني < مع العلم انو اخواني متزوجين فحسيت من الغلط الاكبر اوافق شو رح احكي لماما شو رح احكي لاخواني خواتي قرايبي اللي عندي بالفيس من عمام واخوال ليش هالشب بالتحديد قبلت صداقتو وفي غيرو كتير طلبو صداقتي وكنسلت عليهم خفت كتير وقررت ما اقبل الصداقه ولا الغيها بنفس الوقت طبعا عرفت من خلالا محادثاتو مع ماما انو رح يسافر يكمل دراسه برا لانو طبيب وبتمنى بنت حلال بس ما حكاها هيك بشكل صريح فكرت اليوم ارسلو رساله ع حساب الفيس واحكيلو " اسفه لعدم قبول طلب الصداقه لانو الفيس عندي للمقربين مني فقط " شو رايك ؟؟ او انسى الموضوع والله مابعرف احيانا بحس انو الموضوع جدا سخيف ومافي داعي لكل هي الافكار الغريبه واحيانا بقول انو لا يمكن هاي فرصه ليش ما استغلها ويمكن تتطور وتكون احلى قصه بعرف انو الموضوع بيشبه مواضيع المراهقين تقريبا بس بتمنى منك تساعديني ورح اتقبل منك كل ردات الفعل حتى لو حكيتيلي - برا انتي وموضوعك الطفولي هاد :( - |
رد : محتاره بموضوعي ..... خالة بيتا وينك :(
يسعدلي صباحك يارب
الحمدلله انك موووجوده هلأ انقذيني موبايلي كان مع ابن اختي وانا نايمه ولمن اخدتو منو لقيتو عامل مصيبه مرسل طلاسمه المعتاده لناس عندي بقائمة الواتس اب ومنهم رقم ابن خالتي انا بعرف اني غلطانه اني احتفظت بالرقم وخزنتو عندي شو اساوي كيف اعتذر شو احكي انا خايفه يطلع كل شي براسي وهم ويكون هو مابعرف رقمي ويبعت لماما ويستفسر منها عن الرقم اللي بعتلو ع الواتس حاسه رح يغمى علي من الخووووف والله |
رد : محتاره بموضوعي ..... خالة بيتا وينك :(
هاي فرصتك أجت من رب العالمين :) احكي لماما عن رسالته لك عالواتس ... وهي بتستعمل الواتس وبتقدر تشوف وتعرف انك ما رديتي عليه واحكيلها شو عمل الصغير .. عادي حبيبيتي بتصير مع كتثير ناس لما يكون في صغار بالبيت أمك هي راح تمسك الموضوع وتقدر تعرف لك ... مو ضروري تقولي بحبه ولا أي شي ..بس بحترمه وشخص كويس وما أتوقع قصده شي .. بعت لي عالواتس الظاهر بالغلط ولما الولد لعب بالجهاز بعت للكل لكن والدتك وبحس الأم راح تبدأ تفكر أنه الولد عنده شي وعم يحاول يحكي .. وانتي محترمه الولد وما بتكرهيه فطبيعي راح تفكر بزواجكم الفيسبوك لا تقبلي صداقته ... ترى ممكن عم يختبرك وما دام هو عم يحوس حواليكي :) فاكيد بباله شي ....انتي خلي أمرك لله وخلي الأمور تمشي على طبيعتها الله يوفقك يا امي ويطلع انسان كويس يحفظك ويصونك ... لو صار خطوبه حبيبتي خليكي هادية لأنه شكلك بتحبيه كثير فما تطلعي كل هذا الحي مرة واحده بلا ما يشوف حاله عليكي .. والدعاااااااء :) والاستخاره :) وانا من عندي بدعيلك ربي يوفقك :) |
رد : محتاره بموضوعي ..... خالة بيتا وينك :(
لو سألتك ليش خزنتي الرقم قوليلها عشان أقدر أسأل عنه واعرف لمين
حتى بتقدري تقولي انه أجتك رساله من هالرقم بدون ما تقولي انك عرفتي لمين الرقم وخزنتيه لحتى تسألي عنه وأجا الصغير وعمل اللي عمله |
رد : محتاره بموضوعي ..... خالة بيتا وينك :(
لا ابدا
هو ماارسلي ع الواتس بس رقمو موجود بالقائمه وكان من ضمن الناس اللي وصلتهم رسالة ابن اختي |
رد : محتاره بموضوعي ..... خالة بيتا وينك :(
اقتباس:
نفس الشي حبيبتي.. قوليلها اتصال ولأنه دولي استغربت وحفظت الرقم |
رد : محتاره بموضوعي ..... خالة بيتا وينك :(
خاله بيتا ارسلي علامة استفهام وتعجب
ارد عليه او لا :( |
رد : محتاره بموضوعي ..... خالة بيتا وينك :(
[QUOTE=عبق الزهوور;2953397]خاله بيتا ارسلي علامة استفهام وتعجب
ارد عليه او لا :([/QUOTE ارسلهم عالواتس اب ؟ ردي قولي أنا بنت خالتك فلانه واعتذر منك لأن ابن اختي كان يلعب بتليفوني وارسل بالغلط لسه ما كلمتي ماما ؟؟ كلميها حبيبتي أول ما تصحى ...لازم تعرف منك مو من غيرك |
رد : محتاره بموضوعي ..... خالة بيتا وينك :(
شوفي خاله ... بخصوص طريقة تعاملك مع ابن خالتك.. وبناءا على طبيعة حياته وطبيعة ظروفكم ومجتمعكم ومجتعمه أقول لك انه هو عايش ببلد ومجتمع ينظر للمرأة باحترام ولها شحصيتها ويحب أن تكون زوجته شخصيتها قوية وتقدر تتكلم مع الناس باحترامها وبعقل متفتح .. والعقل المتفتح مو معناه أني أكلم رجل مو محرم لي بالخاص ولحالنا إلا إذا مضكرة جدا وبكلام واضح ورزين مثل جاوبك له على علامة الاستفهام كون موبايلك هو اللي أرسل له فمن حقه تردي على تساؤله لكن مو أكثر من هذا نهائيا .
هيك بتكسبي احترامه لا انتي البنت الهبله اللي ما بتعرف تتصرف وطفله لسه بتتخبا ورا تنوره ماما ولا البنت الوقحة اللي ما صدقت على واحد يبعت لها اضافه .... فمهتي علي؟ وصراحتك مع ماما برضه لها احترامها وتقديرها لأنه ماما أكيد راح تقول له وهو راح يفهم انك انسانه واضحه وبالمستقبل ما راح تقعدي تخبي من وراه مثل ما كنتي صريحه مع ماما حتى لو كنتِ محرجة منها . حتى دعوته لك بالفيسبوك برضه تقدري تردي عليها برساله خاصه أنه أنت ابن خالتي على عيني وراسي لكن ما بقدر أضيفك لأنه هيك سياستي أنا بالفيسبوك مع احترامي الشديد لك ... وأشكر لك اهتمامك وسلامي لخالتي وأخواتك . وصدقيني لو براسه شي راح يكون دخل من حساب أخته وشاف بروفايلك وعرف صداقاتك ومشاركاتك. هو عم يحاول يعرف شخصيتك ...الظاهر لقاءاتكم العائلية قليلة وما قدر يفهم منها شي . |
رد : محتاره بموضوعي ..... خالة بيتا وينك :(
يسعدلي مساكي يا احلى خاله
رديت عليه انو الجهاز مع الاطفال واعتذرت منه بس ماحكيت انا مين رجع وكتبلي بسيطه وسالني انتي فلانه عملت حالي مابعرف الرقم وكتبت عفوا رد حكالي انا ابن خالتك فلان كيفك ورديت الحمدلله واعتذرت مره تانيه عن الازعاج وانهيت المحادثه قبل ما يتمادى فيها << كيفني معك ؛) وكتبلي انتبهي على روحك :) كل شي حكيتي صح العلاقات بينا شبه معدومه غير بالاعياد والمناسبات فقط وهاد الشخص بالتحديد انا بحياتي ماعرفت عنو شي لان طول عمرو برا بحكم دراسته للطب اما بالنسبه لماما هون تكمن المشكله انا انسانه كتومه جدا ماحكيت شي لخواتي صعب جدا صارح ماما واحكيلها كل شي والدتي الله يطول بعمرها شخصيتها صعبة شوي بالتعامل ماراح تتفهمني بسهوله وراح تزعل مني وتتهمني اني خربت سمعتها وان تربايتها فيني غلط واشو رح يحكو علينا الناس وغيرو وغيرو هي بتخاف علينا من الهوا الطاير بس بعمري ما حكيت معها بشكل منفتح او فضفضتلها عن اللي بقلبي بخاف عليها تزعل خصوصا الزعل مابيناسيها مشان السكر والضغط وهلأ شو رايك يا خالتي العزيزه ارجع وارسلو ع الفيس متل ماحكيتيلي او اهدي اللعب شويات ؛) |
رد : محتاره بموضوعي ..... خالة بيتا وينك :(
اقتباس:
بعدين بدون ما تحكي لماما عن اللي صار اليوم راح أزعل منك وما عاد أرد عليكي بدي تخبريها بأنه اتصل بالغلط وووووووو لحد اللي صار اليوم مهما كانت متعصبه وشديدة ما راح تزعل لأنك كنتي صريحه معها ... مو ضروري تقولي لا على الفيس ولا على شعورك .. لكن مو حلوه تخليها هيك على عماها ... مش حلوه بحقك قبل ما يكون بحقها وبكره بتجي وتقوليلي أنا متفاجأة كيف ماما سمعتني وما عصبت |
رد : محتاره بموضوعي ..... خالة بيتا وينك :(
اهدي اللعب :(
لييييييه مبارح كنت عند ماما بالغرفه بدي انام عندها حكيت فرصه لحالتا بلكي تشجعت وحكيت كل مافي جعبتي لسه بدي احكيلها ماما في موضوع........ اعطتني هديك النظره انو شو اكيد وراكي مصيبه وانقلب وجهي ساعتها الف لون وضيعت الموضوع بموضوع تاني مابعرف من وين اخترعتو والله يا خاله مابكزب عليكي صعب جدا احكي لماما ماعندها تفاهم نهائيا ويمكن لو حكيت تسويها مشكله لابن خالتي فكرت كتير الى ان توصلت لحل انو احكي لاختي لانها السر عندها مابيضل دقيقه ومعروفه انها مُخبر ماما الخاص :) مع انها متزوجه وبعيده عنا بس احيانا كل شي بيصير معي بحكيلها اياه فشو رايك احكي ولا خلص خصوصا انو بعد فرحة مبارح اليوم حاسه بكابه لهلأ ماشفتو ع الواتس حاسه انو زعل من اسلوبي الجاف معو اوووف بس |
رد : محتاره بموضوعي ..... خالة بيتا وينك :(
أصبح راح تخرمي الأرض من تقلك ؟؟:d ... طيب يمه :)
كلام البنات صح مليون بالميه ولو هو بدو شي راح يوصل له فانتظري خطوته وان شاء الله ما راح تكون بعيدة المهم انتي تظلي راكزة ومحترمه بعيونه وعيون الكل وأهم شي بعيونك انتي :) قولي لأختك .. فكرة كويسه .. مو كموضوع لأن فعلا ما صار شي كبير لكن كحدث صار معك ..شغلة وصارت وبتقوليها لأختك |
رد : محتاره بموضوعي ..... خالة بيتا وينك :(
يسعد صباحك خاله بيتا
مخنوووقه ومدايقه وحاسه اني لو ماحكيت رح موت مبارح يوم مابعرف كيف مر علي فرحت باولو وزعلت بالاخر مبارح اجت ماما وحكتلي انو خالتي رح تيجي بالشتا انا سمعت هيك مت خوف حكيتلها ليش قال بس تغير جو بعد خوفي من اللي سمعتو من ماما قررت احكي لاختي قبل مايصير شي وماما تدرى من برا وحكيتلها كل القصه صارت تضحك علي وقالت انو الموضوع جدا عادي ومو مستاهل كل هالربكه وحكتلي انو واضحه خالتي بدها تيجي تخطب وحده منا انا وخواتي هي قالتلي هيك حسيت بغصه مابعرف ليش يمكن الانانيه شتغلت عندي ساعتها انو لازم يكون الموضضوع بخصني انا بس والله مابعرف شو كان احساسي بالضبط المهم وحكتلي لازم احكي لماما من باب العلم بالشي بس انا حكيتلها لو ماما سالتني رح احكيلها انو موضوع عادي ومو محتاج اني احكي ووافقتني اختي ع الفكره بعدها قررت شوف المحتدثه اللي صارت بينهم وياريتني ماشفت شي ماما كانت بتسالو عن احوالو ومن سياق الحديث دعتلو. الله يرزقو بينت الحلال قال مو ناوي يتجوز حاليا قهرني والله حسيت نار بدمي مع انو سال ماما عن كل خواتي وعني وعن دراستنا عن جد تحطمت بكل معنى الكلمه معقول يعني كل اللي صار كان مجرد صدف عاديه وانا اللي كبرت القصه بليز خاله احكيلي بلكي اوعى من احلامي واوهامي كل اللي صار معي بيدل انو شي عادي ؟؟ اتصالو رسائلو حكيو معي. اسلوبو وهل فعلا مالي حق اني افكر غير هيك ؟ وانا الغلطانه لاني توقعت اكبر من هيك؟ والله مابعرف شو احكي |
رد : محتاره بموضوعي ..... خالة بيتا وينك :(
او انو زعل من اسلوبي الجاف معو
خصوصا انو مجتمعهم شبه منفتح حكى اني معقده او صعبه بالتعامل |
رد : محتاره بموضوعي ..... خالة بيتا وينك :(
صعب حبيبتي نقدر نعرف شو براسه وايش معنى تصرفاته عالأكيد ... ممكن نخمن ونتحزر لكن مستحيل نكون متأكدين إلا إذا سألناه
حبيبتي هو ممكن مش مستعد حاليا للزواج بسبب ظروف دراسه أو مادة .... الشيء الوحيد الأكيد أنه تصرفك معاه ما كان جاف أبدا وبالعكس كان منفتح نوعا ما كونك رديتي على استغرابه واعتذرتي . وأي تصرف أكتر من هيك كان ممكن يعتبر قلة أدب وهو بيعرف خالته أمك وبيعرف تربيتها فتأكدي أنه حذرك وأدبك مش مأخذ عليكي نهائي انتي وين بدراستك ؟ بأي مرحلة وللا خلصتي ؟ |
رد : محتاره بموضوعي ..... خالة بيتا وينك :(
انا اخر سنه بالجامعه
صحيح مابعرفوا كتير بس من خلال حكيو مع ماما حسيت هاد الانسان جدا غامض وغير مبادر ابدا |
رد : محتاره بموضوعي ..... خالة بيتا وينك :(
خاله بيتا يا خاله بيتا
يسعدلي صباحك ومساك وكل اوقاتك بعرف غبت غيبة مرتبه وخلال هالغيبه صارت احداث وتطورات بحياتي ولا بالافلام :( ابن خالتي صرح لي بحبو اخيرا لكن للاسف بالوقت الضايع متل مابيقولو بالفتره اللي كشفلي فيها عن مشاعروا كان متقدملي شب مواصفاتوا كل بنت بتتمناها وانا صرت بين نارين حكيت مافي حل قدامي الا اني احكيلو عن هالشب وحكيتلو انصعق كتيير وزعل وعصب انا استغربت من ردة فعلو حكالي انو ماصبر كل هالسنين عشان بالاخ يجي واحد تاني ع البارد المستريح قلتلو شو قصدك كل هالسنسن انا ماصرلي بعرفك الا من شهرين بس قال لا قبل سنتين اجا خالي هون عالسعودية وحكالي انو في شب طبيب بدو ياكي انا وقتها رفضت انو مستحيل اعيش برا الممكله ابدا ووين بفلسطين كمان الموضوع جدا كان صعب ولا يحتمل النقاش فيه نهائيا وحتى بتزكر اني كتبت وضوع هون عن هاد الشب يلي طلع بالاخير هو نفسو ابن خالتي :( انا صابتني حالة ذهول رهيبه وبلشت افقد اعصابي انو صح النوم الك سنين ومافكرت تبادر الا هلأ حكالي لو تقدمتلك الان ممكن توافقي حكيتلو انا ما الي أي اعتراض عليك كل مشكلتي معك مكان السكن مستحيل اتحمل اعيش بعيده عن اهلي وببلد مابحبها وصعب اتعايش واتاقلم فيها نهائيا حكالي ممكن اطلع برا بس ما بوعدك بشي قلتلو ممكن اتانزل عن شهر شهرين سنه بالكتير بس انا عندي قدرة تحمل مافيني اعيش اكتر من هيك قالوانا مابقدر اوعدك بشي مو متاكد منو كل الناس تكذب عليكي الا انا حكيتلو بالعربي انا مستعده اضحي بس لازم اشوف منك مبادرة ع الاقل حكالي انا قلت لماما عن الموضوع وقالتلي لا تعشمها انو ممكن تطلع انا سمعت هيك صابتني ازمه قلبيه انو خالتي تحكي هيكيعني حتى لو في امل واحد بالميه بعد حكيها هاد لازم انسى هالامل عصبت وحكيتلو خلص انا رح اشوف الشب واللي كاتبو الله رح يصير وانهيت المحادثة قلي بس هيك ما حليتي الموضوع قال انا بتمنالك كل خير وبعرف انو عمرك مو صغير وانك عايشه بضغط حاليا بس انا بدي ياك بكل حواسي وكل شي بقدر عليه بوعدك رح احققلك ياه واوفرلك ياه بس شي مو بايدي ما رح اكذب عليك واحكيلك رح يصير اللي بدك ياه ولو وافقتي ع هاد الشب رح اتمنى لك كل خير ورح ازعل كتير ولو رفضتي رح اكون اسعد انسان بالدنيا احنا محتاجين وقت لحتى نفهم بعض وتحبيني بجد لانو لو حبيتيني بصدق رح تقبلي تتعيشي معي باي مكان بالعالم شو رايك بالقصه :( :( :( موشي بيرفع الضغط انا هلأ شو اساوي مااما عرفت بالموضوع من خواتي وسالتني سؤال محدد بتوافقي تعيشي برا قلتلها صعبه قالت خلص وقررت اشوف الشب التاني الاسبوع الجاي ان شالله شورايك بهاد الموضوع مين اختار كيف اقرر كيف احسبها والله تفكيري مشوش ووقف مخي عن التفكير كليا محتاجة مساعدتك انا استخرت كتير ع ابن خالتي وع هاد الشب وحسب تيسير الله مابعرف بكره شو ممكن يصير :( |
رد : محتاره بموضوعي ..... خالة بيتا وينك :(
رح استنى ردك ع احر من الجمر
:( |
رد : محتاره بموضوعي ..... خالة بيتا وينك :(
والله يا خاله صدمتيني انتي :) كنت مفكره انك بتحبي ابن خالك وبتموتي فيه ...
طيب ... ما دام مشاعرك محايدة شوفي الشاب الجديد وامسكي ورقة وقلم واكتبي خانتين واحده حسنات وواحده سيئات وقارني بين الاتنين .. انا هيك عملت بس جيت على راسي غز لأني حطيت قلبي على جنب :d ورأي من رأي ابن خالك لو كنتي بتحبيه كنتي سكنتي معاه بأي مكان بالدنيا استخيري وربنا يجيب اللي فيه الخير بس بدي أقول لك قصتين بعرف اللي صارت معهم وقريبين عليي كتير واحده طبيبة ووحيدة أهلها فما بدهم يغربوها وظلوا كل ما اجا واحد يطلبها بيشتغل برا المارات محل سكنهم يرفضوه .. بالاخر أجا ابن الحلال ووافقوا عليه على أساس شغله بالامارات ... ما مر كم شهر إلا وصارت ظروف انجبروا أهلها نفسهم يطلعوا وتظل لحالها .. التانية بنتي خطبت على أساس خطيبها بيشتغل بأبوظبي وما جهزوا شقة ولا أثاث وقبل العرس بشهر بلغته الشركة أنه وبسبب الأزمة المالية العالمية وقتها يستغنوا عن خدماته ... ما في وقت يجهزوا شي فاستأجروا شقة مفروشه سكنوا فيها بعد ما رجعوا من شهر العسل لغاية ما استأجروا ضقة وأثثوها .. والحمد لله ربنا يسرها بوجهه وأول ما رجع من شهر العسل كان عنده مقابله عمل ووافقوا عليه واشتغل عندنا .. وهللا اشتروا شقة وعايشين بعيد عننا مسافة 10 دقايق مشي .. يعني يا حبيبتي مافي شي مضمون بمكان السكن ... المهم اللي جوا السكن عايش معك مين وكيف بيعاملك . فكري كويس واستخيري وارجعي شاوري الماما وخواتك .. قوليلهم لو أنتو مكاني شو بتختاروا .. الماما بدها تبعد حالها عن الموضوع لأنه ابن اخوها وما بدها تجي بعدين تقوليلها أنتي السبب لا سمح الله . |
رد : محتاره بموضوعي ..... خالة بيتا وينك :(
يالله
ياخاله مو هيك والله موهيك لما كنا بنحكي سوا كنت استناه ع نار ويالله شو انبسط لما اشوفو متصل ولما يصبح كل يوم علي ويمسي كنت اطير من الفرحة مابعرف ازا كانت هاي مشاعر حب او لا بس اخر مكالمه حكيتها معو حسيت انو انسان بس بدو يعيش قصة حب مو فارقه سنه سنتين عادي هو عمرو 28 وانا كملت 25 لو مشيت ع هوا وبدات اعيش معو قصة حب شو بضمنلي بكره شو ممكن يصير ممكن من سبب تافه نتخانق ويخرب كل شي هو شب لسه العمر قدامو بس انا شو ؟؟؟ رح تتدمر حياتي كليا اكتر من مره يحكيلي لسه ماحبينا بعض ممكن يجي الحب مع الوقت احنا بدنا وقت وقت وقت وقت شو ماضل عندي وقت وحكالي بالعربي لو تقدمتلكك حاليا ممكن تحبيني بيوم وهل انا رح احبك بيوم انا مابنكر انو انشديتلك بس لازمنا وقت عن جد شي بيرفع الضغط كرهني بكلمة وقت والله :( وانا بصراحه ساويت مقارنة وحكيتلو عنها الشب المتقدملي من ناحية السكن الوظيفة المكان مواصفاتو رائعه مواصفاتو الشكلية مقبولة لكن نسبة استلطافي الو تقريبا 5% ابن خالتي من ناحية العمل والوظيفة والحالة المادية مرتاح تماما ماشاء الله لكن السكن مو مناسب نهائيا خالة انتي بتعرفي الوضع بغزه كتير صعب كتيييييييير كتييييير وانا طول عمري هون بخاف بكره حياتنا تقلب جحيم لهاد السبب انا بسرعه بنهار وبفقد اعصابي لو تحملت عشانو سنتين بعدها مستحيييييييل وربي حتى لو تغاضيت عن بعدي عن اهلي ومااما ممكن اسافر أي مكان بس مو غزه هو ممكن يطلع المانيا يكمل رداسة الطب بس لهلأ مابيعرف متى انا الشي اللي ماعجبني فيه انو غير مبادر بالو طوييييييل ماعندو استعداد يضحي يعني طالما انا مبسوط ومرتاخ خلص شو بدي احسن من هييك وبعد ماحكيتلو هي المقارنة عصب وقلي انا على عقليتك بختار ابو 5% :( انا اللي ريحني بالموضوع الاستخارة استخرت ع ابن خالتي في بداية الموضوع وشفت انو كتير تعقد حتى خواتي حكولي هاد باين انو بياع كلام وكتير مغرور وبدو كل شي ع مزاجو وحكولي ماما لما كانت تصير احداث بغزه كانت كتير تتعب من خوفها ع اهلها كيف بكره لما تروحي انتي شو ممكن يصير فيها وماما متل ماحكيتي مو راضية تتدخل بس قبل ماتعرف بابن خالتي كانت متحمسه للشب التاني رح استخير ربي ع الشب التاني وازا الله كاتبو من نصيبي رح تتيسر اموري معو والله يكتب اللي فيه الخير |
رد : محتاره بموضوعي ..... خالة بيتا وينك :(
الله يجيب لك اللي فيه الخير ... ردك الأخير خفف حماسي لابن خالك ...
استخيري حبيبتي وطمنيني شو بيصير معك :) |
| الساعة الآن 04:11 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©