منتدى عالم الأسرة والمجتمع - ماذا فعلت لصديقتي لتعاملني هذه الطريقة؟؟

منتدى عالم الأسرة والمجتمع (http://www.66n.com/forums/index.php)

- العلاقات الأسرية والإجتماعية (http://www.66n.com/forums/forumdisplay.php?f=91)

- - ماذا فعلت لصديقتي لتعاملني هذه الطريقة؟؟ (http://www.66n.com/forums/showthread.php?t=246299)

ماذا فعلت لصديقتي لتعاملني هذه الطريقة؟؟

السلام عليكم ورحمة الله وبركاته
قبل سنتين وفي بداية العام فاجأتنا في مقر اجتماعنا في العمل بعد ما دخلت من بعد المديرة كانت بيضاء ولها جاذبية في عيونها وابتسامتها إضافة إلى اناقتها الملفتة الكل وقتها كان بس ينظر لها والمديرة تعرفنا بيها هذي فلانة الفلاني وحيكون عملها ..... كان عندنا عجز في احدى الاقسام في العمل وما بقى فيه غيري انا واخت وصارت هيا ثالثتنا ما اعرف ليه شعرت بالغيرة منها خصوصا بعد الاجتماع وانا اشوف الالتفاف الجميع حولها هل لانها اجمل مني والحقيقة انا شديدة السمرة وما املك اي مقومات الجمال ودايما اسمع من اهلي يتريقوا عليا

بدت العمل معنا وخلال اسبوع انتجت عمل وبافكار ابداعية ما سبق لها عندنا كانت تحب تعمل لوحدها ونحن بصراحة ما كنا نسألها كثير لكن لاحظت ان صديقتي في القسم بدت تستلطفها وتميل لها خاصة لما عرفت انها شاعرة !!!!!! وما كملنا شهر الا واكتشفنا انها ما زالت في الجامعة ؟؟؟ انا ا بس عرفت انها ما كملت دراستها حسيت بقهر كيف تتوظف معنا وهيا مو مكملة وصرت بس اسأل وادور حولها ونفسي بأي طريقة تطلع وكثير كنت اعمل معها حركات اغيضها بامنية انها تمل وتترك القسم وعرفت ان عندها دبلوم وانه اختبروها قبل قبولها وحصلت على درجة عالية وانها في المقابلة افضل من مر على مديرتنا بكلامها الكل يثني الخادمات معنا في مقر العمل و المتدربات والمسؤولات . تسلم على الخالات عىل روسهم واياديهم حتى صاروا يستقبلوها ويسلموا على راسها لا ويحضنوها كمان واذا غابت او ما شافوها يدوروا عليها ويسالوا عن حالها والموظفات نفس الشي صاروا يفتقدوها ويدوروا عليها واذا ما كانت معنا في اجتماع او حفل او قالوا ماله طعم مع ان الكل موجود وبدت تظهر شخصيتها لنا اكثر بعد 3 شهور في العمل كل الموظفات معانا كانوا ما يقدروا يتناقشوا مع المديرة في قرار بس كثيركنا نعارضها من وراها ونشتم فيها لانها شديدة كمان وشايفة نفسها دايما لكن هيا كانت بكل ثقة تعارض في الاجتماعات وبدأت افكارها ومعارضتها تنتج وصار واختلفت مع مديرتنا حول مشروع خاص بقسمنا كنت ضدها في ورأي من راي المديرة وقالت لنا لكم اكثر من سبع سنوات تنفذوا نفس الفكرة وعندكم نفس الخلل ما اتفاديتوا الخلل ولا جددتوا انتوا طبقوا مخططكم وانا حنفذ مخططي واتحمل النتيجة وبعد 5 شهور نتفاجأ بنتيجة عملها الي حطمني صراحة وخلاني اكرهها اكثر لكن مديرتنا صارت تحبها وتقربها منها

دايما مميزة وافكار ابداعية ومتجددة في كل شي واي شغل تعمله بس تشوفيه تقولي عمل فلانة كل يوم تثبت وجودها يزيد كرهي لها ولما عرفت انها تصغرني بتسع سنوات انصدمت وكرهتها اكثر صغيرة وشايفة نفسها على ايه بس قلت اكيد لو طفشتها بتترك الوظيفة كنت اسلم على الموظفات واعدي من جنبها وكاني ما شفتها اول الايام كنت اشوف وجهها يتلون لكن تسوي نفسها عادي ولا تسألني اذا مرت من جنبي تلقي السلام وتسال عن حالي وتمشي وصرت بعدها احاول احرض المديرة عليها او افشلها امام الموظفات ما كانت ضعيفة تسكت صراحة مرات كثيرة ترد علي مع ان الي يشوفها ما يضن ان عندها هاللسان قبل الاجازة بفترة كان عندنا حفل وطلبتها المديرة تكتب لها قصيدة بالمناسبة وصار وكتبت والقت وصار الكل من الحضور يمدح مع انها مجرد قصيدة بس مدري على ايه يمدحوا يومتها حضرت الحفل مديرة فرع تابع لنا ودايم اتمنى انقل له لانه افضل من جميع النواحي وياما قدمت طلب وو ما يصير جات يوم الحفل وطلبتها تنتقل لعندهم ويا كرهي لها ذاك اليوم مع اني سمعتها ترفض انها تنتقل لكن الحاحهم بالطلب وانهم يحتاجوها وافقت انها تعمل عندهم ليومين وتكمل معنا باقي ايام الاسبوع لكني رحت ووقتها لمديرتنا في الفرع وصرت اتحايل عليها ان لو راحت بنعجز نكمل اعمالنا وصرت امدح فيها وف نفسي اسبها كله عشان اخرب عليها وقدرت اخرب وما انتقلت ولما حبيت احرجها قدام الموظفات قلت لها الظاهر استغنوا عن خدماتك ردت علي ممكن يحتاجوك إذا حبيت اكلم المديرة لك قهررررررررررررررتني مرررررة يومتها حسيتها فهمت اني ابغا انتقل بس مو قادرة

بعدها بفترة اخذت اجازة لأسبوع ولما رجعت صدمتنا ان طلبها للاجازة تبا تتفرغ تنجز عمل وانجزته صديقتي في القسم اثنت على العمل كثير وانا طلعت فيه كثير عيوب لكن المسؤولة اثنت عليه وحبيت اخرب عليها فاتفقت مع ادارية كانت تكرهها انه عملها ذا يرجع لها لانه عملته لوحدها وما استئارت احد وطلعنا ستمية عيب وامرتها المديرة بوقف تنفيذ العمل اتذكر يومتها وجهها تلون من القهر وراحت للغرفة لحقتها وسمعتها تكلم جوال تقول انها تعبانة وتبا السواق يرجعها البيت خرجت يومتها وما استأذنت ولا وقعت وغابت لأسبوع بعدها وجوالها فيها كان مغلق صراحة ما اتصلت بس كانوا البقية يتصلوا ويقولوا لي وقتها حسيت زعلت عليها بس قلت تستاهل ليش تبا تتميز لوحدها رجعت بعد الاسبوع للعمل وما كمل الاسبوع الا وشغلها بامر من المديرة صار للاسف وما كملنا شهر الا والادارية صارت بصفها وتثني عليها وتستشيرها باعمالها وصار وخففوا عنها من العمل معنا وحملوها امور ادارية

مع كل اذية لها اشوف ابتسامتها دايما وتقهرني احس كانها تبا تقولي انا احسن منك كرهتها وكرهة كل شي منها وصرت ارمي عليها كلمات قاسية مرة جت تاخذ ملف من مكتبي طلبتني هو لعمل قلت لها تاخده ولما جت تاخده بصوت عالي صرخت فيها استاذنتي طالعت فيا مستغربة ورجعت محلها فرحت فشلتها قدام الموظفات ومرة اعطتني المديرة ملف اسلمه لها حطيته على مكتبها وما قلت لها الا متأخر عشان تتاخر في انجازاه وجت يومتها المديرة وقالت لها كنت احتاجه قبل ساعة اذا ما انجزتيه خلاص واخدته منها وفرحت لانها تفشلت وما عرفت كيف تعتذر كثيررر اشياء سويتها لها

في ليلة العيد وصل صندوق لبيت اخويا باسمي ولما فتحته كان فيه لبس كامل مع الشنطة و... مرة حلو وفي اخر الصندوق ظرف فتحته ولقيت فيه هادي الرسالة

[ أنتِ لا تحبين نفسكِ وتجعلين من وفاة والديك شمّاعة لتعلقي تعاستك عليها, تنظرين لوجهك ببؤس وتحسبين أنّك الوحيدة التي تمتلك عددًا مهولًا من الخيبات ويحق لها الحزن! إهمالك مظهرك, أذيتك لصديقاتك, وغيرها من أفعال أنت أعلم بها مني لن تغير من حقيقة أنّكِ لم تتقدمي خطوة مذ فقدت والديك! ... أريد أن أخبرك أني فقدت والدي مثلك بل في وقتٍ أبكر من الوقت الذي فقدتهما أنتِ فيه وأنني أعيش وحيدة في الوقت الذي يلتف حولك فيه إخوتك وأخواتك! ومع ذا أؤمن أنّ في الحياة ما يستحق أن نعيش لأجله ومن أجله عيشي لأجل حلمك ولنفسك. ففي داخلكِ الكثير من الأشياء الجميلة لكنها ذابلة فليكن العيد غيثًا ينهمر على قلبك ويحيي أفراحك. يا صديقة أحبي نفسكِ لأنها تستحق وكوني بخير لأجلك ومن أحبك ثم اقبلي هديتي وعيشي سعيدة وفاجئيني إن التقينا مستقبلًا ببسمة جديدة . صديقتك ]

انا ماتوا امي وابويا وانا صغيرة وعشت مع زوجة اخ قاسية واخوات ما اهتموا فيا ابدا وهذا اول عيد احصل على لبس متكامل بذوق جميل فرحت بالهدية بس من تحسب نفسها عشان ترسلها ليا وتكتب لي دي الرسالة ااوقات افكر اني ما غلط بالي سويته معاها بس هيا ليش تعاملني كذا ليش تبا تسوي نفسها دايما احسن مني ؟؟ من يوم رسلت الهدية والرسالة وانا افكر ليش تسوي كذا واليوم فاجأتني مديرتنا باتصال تبلغني بنقلي للمكان الي دايما اتمنى اتنقل له وصراحة استغربت لاني من زمن واطلب وما يصير ولما تكلمت مع الادارية قالت لي الي تكرهيها وصت فيك اتصلت واتصلت فيها بعدها وما ادري ليش تسوي معايا كذا ابا اسألها او اخاصمها عشان ما تتدخل في خصوصياتي او اشكرها بس على طول مغلق وعرفت انها مسافرة هيا ليش تعاملني كدا ؟ ليش تهديني وانا دايما ااذيها ؟ ليش حتى في رسالتها شايفة نفسها عليا ؟