شنو الحل؟؟ وعدني زوجي إن يحضر لي خادمة ولكنه غير رأيه ...
 

السلام عليكم ورحمة الله وبركاته

تقبل طاعتكم ورزقكم المغفرة والرضوان
أنا اتفقت مع زوجي إن أحضر خادمة تساعدني عند ولادتي إن شاء الله..
وخاصة إن ولادتي تصادف وقت دراستي الجامعية..لكن اللي صار إنه غير رايه وقال لي إنه
ماراح يقدر بسبب ظروفه المادية..واللي أعرفه إن معاشه قوي وزين..مادري أي ظروف يتكلم
مرة يقول علي ديون كثيرة..وشركة الأسهم حقته خسرت واضطر يسحب فلوسه بخسارة
وقال إن ظروفه ر اح تتعدل بعد سنة بالتمام..علشان قسط السيارة يتخلص منه

قلت له راح أوقف قيدي هالسنة وما أدرس علشان البيبي..قال لي لاتوقفينه والبيبي راح نوديه لأمج
بس أمي رفضت لأنها مالها قدرة على العناية فيه..

آخر شي اتفقنا على أنه يكون بالحضانة..بس أنا مو مرتاحه لفكرة الحضانة وقلبي يؤلمني
قلت له خلاص مابي الحضانه إذا ماتقدر تجيب لي خادمة راح أوقف قيدي..وراح تعطيني مصرف خاص
لن مكافأة الجامعة بتتوقف..قال لي ما أقدر أعطيج مصروف وأنا مديوووون ومن هالكلاااام

شسوي..تعبت
هو يبيني أدرس..وأنا خايفه على البيبي..شلون أتركه بالحضانه..خصوصاً إنه حديث ولادة
شنو أسوي؟؟؟
علاقتي مع زوجي جداً رسمية ومالي خلق له حتى
أحس إنه كذاب وبخيل ومخادع..ليش مايبي يجيب لي ويوفي بوعده لي
وسالفة الدين أبداً مو داخله راسي..
هو متغير علي مو نفس قبل..ماعاد يداريني ويراضيني إذا زعلت
أحس إني مجروحه منه..وبينت له إني مو مصدقته ومضايقه حيل

أحتااااج نصايحكم..أريد حل ربي يأجركم

رد : شنو الحل؟؟
 

دخليه الحضانه مافي الا هالحل

رد : شنو الحل؟؟
 

مرحبا
لماذا موضوع الدين غير مقتنعة به أختي, ربما لا يكذب و فعلا مضغوط
ثانيا أختي أجد فكرة الحضانة أكثر أمنا من الخادمة , فالخادمة تأتي للكنس و الترتيب و لا خبرة لها بالعناية بالطفل الرضيع
إلا إذا استقدمتي (مربية) , أما في الحضانة , فهي مخصصة للعناية به
تعرفين أختي مشاكل الخادمة و ضيقهم من العناية بالأطفال , فما بالك بطفل رضيع
,,اقترح أن تقبلي بحل الحضانة , و قومي بزيارة الحضانة قبل أن تسجلي طفلك
لتطمئني للمكان واسئلي عن أفضل الحضانات ممن جرب من معارفك
وفي النهاية هو سيدفع للحضانة و الحضانة مكلفة شهريا ’ لذا لا أعتقد أنه
يبخل عليك , والله أعلم

رد : شنو الحل؟؟
 

لاء..حضانه لاء
طفل حديث الولادة..قلبي مايطاوعني أدخله الحضانه
أخاف عليه..واللي أعرفه إن الحضانه من أربع شهور وأكثر
طفلي صغير..ربي يحفظه ويقر عيني بشوفته ياااارب

الخادمة راح أخليها تكون عند أمي في بيتها مو بروحها معاه
مو مقتنعة بسالفة الدين لأني من تزوجته وهو يقول لي هالكلام
وأتوقع بعد سنة يمكن يطلع لي بسالفة جديدة..:18:

رد : شنو الحل؟؟
 

خلاص وقفي قيدج بدون لا يدري
ولا تتكلمين عن الفلوس

واساسا هو ملزوم يصرف على ولده حتى لو كنتي تاخذين مكافأة من الجامعة


سوي كل شي باسكات ولا تخبرينه كلش

واذا سال قولي الدكتور معتذر

يوم يومين وبعدين قوليله انج وقفتي قيدج


هو ما يبيج توقفين قيدج عشان الفلوس

فانتي لا تطلبين الفلوس


والله يوفقج يارب

رد : شنو الحل؟؟
 

انزين موهبه من وين لي فلوس إذا هو ما صرف علي!!

رد : شنو الحل؟؟
 

من رأيي لاتستعجلين بمسألة القيد

لايضيع عليك الوقت ... وحطيه قدام الامر الواقع ..
الفعل غير عن الكلام.
اقصد كلامك اني تعبانه وما اقدر اوفق بين الدراسه وبين الطفل وكيف بتركه بالبيت لوحده .... ممكن مايهتم
لكن اذا شاف الوضع وحس وعاين وضعك
لعل الله ان يهديه ويرأف بحالك ويتفاعل بمسألة الشغاله
وتستفيدين

خصوصا الدراسه الفصل الاول قليله ... كذا اسبوع وبعدها عطلة الحج ..
بعد الحج ربك يسهلها ..

أسأل الله أن يثيبك على صبرك ويجعل لكي مخرجا من حيث لاتحتسبي .. تهنأ به حياتك ويستقر به أمرك .. واصلح الله ولدك .

رد : شنو الحل؟؟
 

شكراً لك أخ أبو مهند..كلامك ودعائك ريحني حقيقة
ولك بالمثل أخي..وعسى ربي يرضى عليك ويرضيك من فضله

اللهم فرج همي ويسر أمري..واجعل لي مخرجاً

رد : شنو الحل؟؟
 

لا ارحب بوضع الطفل حديث الولادة بالحضانة سوف ياتيك مريض بين فتره واخرى من جراء العدوى لكون جسمه مازال ضعيفا واساسا الطفل تحت 3 شهور يعاني من الغازات والمغص المتكرر ويتعب امه بالسهر وتستحمله فما بالك بغيرها
ستتركه للإهمال والصياح ولن تعتني به جيدا
ارجح ان تأجلي ترم ليشتد عود ابنك قليل...... وزوجك ضعيه امام الامر الواقع
فحق الابناء من رعاية واهتمام خصوصا في هذه الفترة اشد من أي مساله اخرى
وفقك الله

رد : شنو الحل؟؟
 

الله هو الرزاق مو زوجج

انتي لو تتوكلين على الله حق التوكل راح يسخر لج طوايف زوجج كلهم

انا لو منج راح اسوي اللي قلت لج عليه


والله يفرج همج يارب

رد : شنو الحل؟؟
 

أنا مع موهبة طفلك أهم من اي حاجة

اجلي ولاتعلمينه الا بعد ماتاخذين وقف

وهو مارح يقصر اكيد رايح يصرف عليك بالمعقول

وفعلا الطفل حديث الولادة يبكي كثير وماتتحمله غير امه لا شغالة ولاحضانة
عطيه حقه فيك الله يرضى عليك هذا أمانة عندك

رد : شنو الحل؟؟
 

جزاكم الله خير
بكلمه عن وقف القيد هالكورس..وبقوله بعد لازم يعطيني مصروف خاص
دعواتكم لي..ربي يفرجها

رد : شنو الحل؟؟
 

لا يا بنت الناس لا تكلمينه ولاشي


هو ما يبيج توقفين قيدج عشان الفلوس وانتي تروحين تطلبين منه اللي هو رافضه



صدقيني اذا سويتي جذي بتفاحين على نفسج باب شقا ماله نهاية

اقضوا حوائجكم بالكتمان

ربي يسهل دربج

رد : شنو الحل؟؟ وعدني زوجي إن يحضر لي خادمة ولكنه غير رأيه ...
 

حبيبتي من كم شهر كنت بموقفج
واحترت وين اودي ولدي
وكثير نصحوني ما اوقف الفصل
ولكني وقفت وما ندمت ابدا
ابدا ما ندمت
ينام ولدي بحضني ويصحى بحضني مطمنة عليه ومرتاحة لين يشتد عوده شوي
وبكمل شهر 9الفادم
موضوع توقيف فصل شي ما يعنيه ابدا ولا هو من اختصاصه علشان يمنعج من التوقيف
وشي ثاني هو ملزم بنفقتج انت وولدج

رد : شنو الحل؟؟ وعدني زوجي إن يحضر لي خادمة ولكنه غير رأيه ...
 

الحضانه افضل و اكثر امان لولدك من الخدامه

اذا في حضانه الجامعه تقديرين تطلين عليه وقت فراغك

لكن الخدامه بيجلس عندها طوال اليوم ما تدرين وش تسوي فيه

رد : شنو الحل؟؟ وعدني زوجي إن يحضر لي خادمة ولكنه غير رأيه ...
 

الاخوه والاخوان ما قصرو

لكن بقولك شي

عند اختيار اي حل في حياتك الزوجيه احرصي على امرين

الاول ان يكون الحل مريح لك

الثاني ان يكون الاسهل والايسر

يعني

شوفي ماهو الحل المريح لك هل هو وضع الابن في الحضانه او

عدم تعليق ترم في الجامعه

شوفي الحل الايسر والاسهل لك ولزوجك

ليه

لان الرسول عليه السلام ما خير بين امرين الا أختار ايسرهما مالم يكن اثما رواه مسلم

بوركت

رد : شنو الحل؟؟ وعدني زوجي إن يحضر لي خادمة ولكنه غير رأيه ...
 

أخ عمران جزاك الله خير ع النصيحة

رد : شنو الحل؟؟ وعدني زوجي إن يحضر لي خادمة ولكنه غير رأيه ...
 

قلت له راح أوقف قيدي..قال لي بكيفج
قلت له: ابي مصروف 100 دينار..قال انتي تضغطين علي
وبالحسره ووافق..وبعدها بفتره كلمته ووضحت له اني مابي اترك الجامعه وراح اخفف ايام الدوام
قال لي ان عنده حل..اني اروح اطلب من أبوي سلف استقدام المربية..وانه راح يقاسط ابوي شهريا
كلمت ابوي وبعد جهد..وافق يعطيني

المشكله..اني احس ان زوجي كذاب..وصرت اكره
استغفرالله..غصبن علي
احاول ارجع مثل اول..بس احس اني مجروحه منه..
كلهم يقدمون لزوجاتهم اشمعنى هو طلع لي امية عذر..وخلاني أتسلف

أحس إن ثقتي فيه معدومه..كل ماطلبت شي قال بعدين
اهوا صج ينفذه بعدين وبعد إلحاح ومطالب..ما كان جذي تغير علي

شسوي زعل وزعلت..ماباقي إلا أطمح وأشوف شنو يسوي يراضيني وإلا طااااف

رد : شنو الحل؟؟ وعدني زوجي إن يحضر لي خادمة ولكنه غير رأيه ...
 

الله ييسر امورج الحمدلله ان وافق انج توقفين قيدج

ما ادري اختي احسج على نياتج وما تعرفين تتميلحين

اطلبي بتمسكن الريال ما يفيد معاه الا التمسكن قوليله يزاك الله خير انك وافقت والله ماراح انساها لك عساك ذخر لنا

ومن هالكلام المعسول

والحين لا اتييبين طاري السلف والفلوس كلش اذا يات من نفسه الحمدلله واذا ما يات قوليله ابوي يسال عن الفلوس

احمدي ربج يا اختي ان يسويها بعضهم لو تمشي المرة على راسها ما حرك فيه شي


وانصحج نصيحة اختي دايما دايما احمدي ربج بالسراء والضراء احمدي ربج

لا تقولين اشمعنه انا والا اشمعنه علنتانه هذي تدابير وحكمة الله وكلها خير


الله يسخر زوجج يا رب

رد : شنو الحل؟؟ وعدني زوجي إن يحضر لي خادمة ولكنه غير رأيه ...
 

اييييه أنا شنو اللي قاهرني غير المقارنات بفلانه وعلناته
الله كريم..وربي يسخره لي ويلين قلبه علي ويكرهه بالكذب وأنواعه لو بالغشمرة

مشكورة حبيبتي موهبه..وفي ميزان أعمالج يارب