|
خلاااااص تعبت ابغى افضفض
السلام عليكم جميعآ
تعبت أسكــت ... دآيم أقول في ناس كثير أعرفهم يدخلون هنآ ومابي أحد يعرفني بس خلآآآص تعبت أسكت حتى لو مافي حل ... تعبت أخلي كل شي داخلي بقول لكم قصتي .. أنا متزوجه من 4 سنوات زواج تقليدي .. شفنا بعض نظرهـ شرعيه وكل شي تم بسلام وكلمنا بعض بعد الملكه وطلعنا مع بعض وكل شي تمام أنا موظفه بالمدينه اللي انا فيها ووظيفتي حلوه وأحبهآآآ ودرست علشان أتوظف وتميزت بشغلي ومرتآآحه فيه الحمد لله رب العالمين وانا بطبعي ماحب أجلس بالبيت اكون ربة منزل وكل واحد له رايه الخاص هو موظف بمدينه ثانيه وموظف براتب زين و شغله عاجبه وحلو ومرتآح أهله بمدينه ثالثه غير مدينتي ومدينته اللي يشتغل فيها ... يووووهـ فهمتو ؟ :25: بين المدينه اللي انا فيها واللي هو فيها 400 كيلو وبين المدينه اللي انا فيها واهله فيها تقريبا 150 كيلو لما ملكنا .. كان عندي شروط ... منزل مستقل استمر بوظيفتي ووافق عليها وثبتناها بالعقد تزوجنا وطبعا عندي خبر اني بطلب نقل او ندب او اي شي علشان اكون معه ... وفعلا قدمت وانا مقتنعه تمام الاقتناع...يعني تزوجنا واحنا مابعد عندنا شقه على ما انقل ...انا حملت على طول بعد الزواج وكنت ابغى انقل لاني تعبت من المشاوير ....يعني يجي الربوع اركب معه واروح لعند اهله ويرجعني الجمعه وكذا فكنت اتعب وهو يتعب ...او يجي ونظل ببيت اهلي ويروح الجمعه .. قدمت عالانتداب ووافقو عليه ويوم وافقو عليه رفض ...لا وصعبه وانتي حامل وبتولدين ومعرف ايش ظلي ببيت اهلك وخلص انا بقدم على نقل ...قلت له ترى صعبه يوافقون مره ثانيه الحين علشان ظروفي وافقو ...قال لا خلاص ماراح تنقلين ابد ولا بطلب منك ...قلت له وعد ماتطلب مني قال وعد وطبعا صدقته لانه وعدني وانبسطت لاني بظل هنا وهو بيجي ... وانا بالمستشفى يوم ولدت وكنا متفقين على اسم ....قال لا اخوياي يقولون مو حلو ...قلت اجل؟؟قال ابي اسم (...) المهم بعدين وافقت ...بس بشرط مو تنكب بوعدك وتقول لي نقلي ...قال وعععععععععععد افا عليج وشي ثاني تهتم فيني تعاملني احسن شوي خلص صرت ابو انت ولازم تصير مسؤؤل ...قال بشري بس طلعت من المستشفى قال يلا نقلي ...يوم ذكرته بالوعد قال ابد ماذكر ...طبعا زعلت وكل شي وبعدها سكت وقلت لما ألقى بديل سالفتي طويله بس طولو بالكم تكفون .. المهم في هالفتره انا ببيت اهلي ساكنه مع ولدي ...أهلي مايقصرون بس والله استحي لاني متزوجه وعندي زوج وجالسه عندهم ...يعني مايعطيني مصروف ابد حتى لو 50 ريال ..واذا جا نتغدى نتعشى عندهم وننام بعد ...طول فترة حملي امي تقول لي قول له يشتري فواكه او عصيرات علشان البيبي يتغذى وهو بس يجي يمش يده بالطوفه ويروح ...حتى لما ولدت ...مايجيب لي احتياجات الطفل او يصرف عليه وانا كله من عندي واستحي اطلبه اي شي ..وحتى بالاعياد يشتري لي فستان رخييييص وخلص نطلع من السوق اضطر انا احط الباقي من عندي واصرف علي وعلى البيبي وعادي ساكته واذا امي قالت لي مايصير والله اتفششششل مقدر ارد اقولها عادي انا قابله .... المهم بعد ماولدت صارحته ان على مايصير عندي بديل او انقل او تنقل انت او ابتعث او اي حل عالاقل ابغى شقه استحيت من اهلي والله.... دورنا على شقه وفي هالاثناء درت امه وسوت سالفه ان ليه ومصارف وخساير وكذا ...بس سكتنا عنها وحطينا شقه ومررره فرحححت وحبيتهااااا شقتي مكاني المستقل لي بروحي احس الحين توي تزوجت صحيح اهلي احبهم بس لازم يكون عندي مكان خاص فيني احس اني ملكه فيه ....هو أجرها وانا اثثتها كاااامل وعلشان ما يتحرج قلت له المبلغ من اهلي هدية الزواج مجمعتهم انا .... في اثناء الحمل كان قايل لي شرايج تقدمين بعثه ...وانا احب الدراسه وتحمست بفكرته ...قلت له ترى خطوات واوراق وسالفه وتوفل اخاف تغير رايك قال ابببببببببد صاااااااامل روحي بس كملي اوراقج وانا بروح معاج وكل شي تمام ونكمل سوا ...كنت حامل واروح اترجم واخلص اوراقي بالوزارات والادارات وهو بس اعطيه المستجدات واختبرت التوفل بشهري التاسع وجبت درجه زينه وتعبببت على ما جهزت كل اوراقي وخلصت اموري... انزين حطينا الشقه وامورنا زينه وللحين يبفى يروح معاي ودرت امه بالسالفه وهاوشتني كيف يترك شغله ويروح معاج وانتي ماتحسين وانتي وانتي وانا اقولها فكرته وعلشان نكون سوا وهي تسوس براسه...هو تأثر بس ماقتنع احد الويكندات رحنا لاهله زشاف اخوياه وشكلهم زنو براسه جا قال لي خلص ماعاد ابغى اروح وبتنقلين معاي وبنقفل الشقه....طيب اجل ليه تقترح من البدايه ؟؟؟قال كيف اترك شغلي؟؟؟طيب انا قلت لك من اول ان بيصير كذا وكذا وانت قلت عادي انا ابروح وادرس اجل ليه مافكرت بهالخطوه من قبل ؟؟الحين يوم تعبت على اوراقي واراسل الجامعات وخسؤت وقت وفلوس وانت ماساعدتني حتى تقول بطلت؟؟ المهم زعل وانا بعد صراحه زعلت ووداني بيت اهلي وكانو حزتها مسافرين امي وابوي علاج برا ... ادق عليه...مايرد ارسل ..مايرد قال لي اخر شي اذا جا ابوج بتفاهم معاه قلت خلص اللي يريحك... ظليت شهرين ونص ما يسأل ولايتصل ولا يشوف ولده وش يحتاج وهو اصلا من اول كذا ..ويدري ان امي وابوي مسافرين علاج عالاقل يحس بالمسؤليه...وانا بعد ماحسيت ببعد لانه من اول بعيد وبعالم ثاني ... بعد شهرين ونص وكان عمر البيبي 10 شهور كلم اخوي وقال بجي اخذ الولد كم يوم..طبعا رفضت توه صغير ومتعلم علي وانا اعرف متى ينام متى يصحى انا صرت امه وابوه وكل شي ..اعرف من صيحته وش يبغى وانا اللي اوديه المستشفى لا مرض واكمل له علاجه الحين حسيت بولدك ؟؟ جا البيت يبغى ياخذه قلت يدخلون هو وامه معززين مكرمين يشوفونه او يطلعون معه بس ماياخذونه كم يوم حسيت بغيت انجن كم يوم يكون بعيد عني ...المهم جاو وبدو يتلفظون علي وصار يتهجم وانا ساكته اخر شي قال انقلعي داخل مو مشتهي اشوفج ...انا ببيت ابوي ويقول لي كذا ؟؟ قلت بأدب الزياره انتهت حتى مارفعت صوتي قال باخذه قلت والله ماتاخذه انا امه وانا ابوه ..جت امه بتتكلم قال سكتي عن هالشاكل الزباله... انا عصبت قلت اجل معلش مالكم مكان يلا مع السلامه وهو يمشي رايح الباب وانا عالباب داخل وماسكه ولدي وهو قام يسب جيت بصراحه سبيته سبه وحده طبعا رجع هجم علي وانا هربت داخل عند خواتي دخل علينا عند خواتي وهم مو متحجبات وضربني ورفسسسني رفس مو طبيعي وانا خفت على ولدي قمت احميه بجسمي واكل الضرب وهو يضرب بكل قوته وانا مقدر ادافع لاني خايفه على ولدي وامه تناظر مبسوطه وخواتي جاو مفجوعين بدون حجاب تخيلو يقولون له حرام عليك بعد عنها وكذا ... المهم جا اخوي الاصغر مني وبعده عني واخوي بطبعه مسالم وهداه وطلعه انا قمت ارجع دم خلاص حسيت اني بموت الشغاله قامت تبكي علي... طبعا مارحت المستشفى ماكنت ابغى اسأله وسالفه يوم ثاني كلم اخوي خذ عفش اختك بقفل الشقه ...خذت ملابسي وهم خذو الباقي حسبي الله عليهم حتى الهدايا خذوها طبعا سكت وانا بطبعي كتومه ....صرت اروح الدوام ساكته واجي ساكته ...وبس يجي الليل احط راسي عالمخده واصييييح ...وعلشان ماازعج خواتي احط فمي عالمخده واصيح علشان مايطلع صوت...جاني اكتئاب وصرت اروح الدوام وانا يدي على قلبي ...اخاف ارجع وما اشوف ولدي ياخذونه مني جاني اكتئاب...بيت دوام دوام بيت ...اجلس معاهم وانا مو معاهم وصديقاتي بالدوام كل سبت يسألوني ...وين رحتي مع الحبيب هالويكند ...كل مره أألف قصه وانسج روايه من مخي ... انا بطبعي خياليه ...يعني في الخطوبه وبداية الزواج كنت اسوي له مفاجآت واحجز له فنادق برا السعوديه و اكلم محلات ورد بمنطقته يرسلون له الورد الى عمله او اسوي له حفلات ببيت اهلي ...والله أحسن لبس ودلع واتسنع وفواحات وبخور ...بس حسافه ماقدر هالشي ظليت بفترة اكتئاب حتى امي لما تدق توصل لي الغصه لحلقي ودي اصرخ بس اسكت ...اقولها لها كل شي تمام رجعو اهلي بعد 6 شهور طول فترة علاجهم .. انا حزتها مهدود حيلي و حتى لما اسوي تحليل دمي كله نازل درو ونادوه.... وطبعا ماظل كلمه ماقالها عني اني واني ....والله قال اشيا تضحك ... يعني يقول لامي( تخيلي هذاك اليوم طلعنا من الشقه وظل صحن بالمغسله ما انغسل !!!) تقول له امي طيب ؟؟ يقول ماتستاهل احط لها شقه ... مره لبست الولد بيجامه كمها طويل ...تخيلو ؟؟؟ لا وسالفة الصحن ...طبعا يوم حطينا شقه صارت كنها منتجع لاهله ... يعني فلان يجي منطقتنا ماعنده سكن مايحتاج يأجر يجي شقتنا ... خواته ..خواله ...اخوانه ...اهله ...لا مره كنت فيها وكان عندي اجازه تخيلو قال لي روحي بيت اهلك لان اختي بتجي تتمشى وبتجلس كم يوم وبتاخذ الشقه ...!!!! سلامات المهم ماظلت كلمه ماقالها عني وبيوم جاو ياخذون ولدي كم يوم ...ورضيت ...وكنت اصيح جالسه اشمه واحضنه بيروح عني...خذوه وقام يبككككي بالسياره طبعا عزة نفسهم منعتهم يرجعوه كلمو ابوي خل بنتك تجي معانا تهتم بالولد ...طرت طيران مافكرت بكرامتي بس ولدي لا يجيه شي ورحت وعاملني والله العظيم مثل الخدامه ... يرمي الملابس بوجهي غسليهم ...انا بطلع انتي قومي غسلي الحمامات ...وانا ساكته ساكته علشان ولدي اخر شي قال لي اذا تبين ارجعج فصلي من وظيفتج وتعالي معاي ... كيف افصل ؟؟؟انا تعبت علشان اوصا لهالمستوى ...طيب وشرط العقد ؟؟ قال بليه وشربي مويته قلت عطني فرصه افكر صرت بعدها اروح كل ربوع بيت اهله واجي الجمعه ...بروحي مو هو يجي ياخذني ...مشكلتي مو مشكلته على قولته...150 كيلو انا لازم اتصرف بالاضافه للمعامله الزفت ...بالاضافه الى بطاقة الصراف اللي يبيها عنده ...هذا غير النفسيه الخايسه والصراخ احد الايام كان يسولف بزياده عن بنت خالته ... فلانه فلانه فلانه ...المهم نزل جلس مع اهله ونسى جواله وانا ادري انه ضايفها بالبيبي ...علاقة اخوه مثل مايسميها المهم كلمني قال لي جيبي جوالي ...نغزني قلبي قلت خل اشوف هالجوال اللي مايفارقه وبنت خالته فتحت المحادثه ... كانت تلومه انها البارحه كانت متضايقه وتدق عليه وهو مايرد وهو يقول لها كانت جنبي ........... وهي تضحك ههههههه الحين انا صرت نقط فاضيه حتى ماقال زوجتي طبعا محادثتهم الساعه 1 ونص بالليل المهم نزلت وبعيني دمعه وواجهته قال عادي احنا فري وهذي بنت خالتي ...مثل اختي لا والله؟؟؟الساعه 1 ونص بالليل ؟؟؟ اعتذر وقال اطقطق عليها ولاتاخذين بخاطرك بالليل ماعرفت انام بنت خالته اللي كنت اسلم عليها واضحك بوجهها بحسن نيه مت قهر قلت اكيد في زود وقمت وفتحت لابتوبه ولقيت المصايب ...لا مو وحده ولا ثنتين ..بالاضافه لبنت خالته وحده تعرض له ووحده واعدها بالزواج ويقول لها اخباري اول بأول حتى يوم جا وضربني قدام خواتي قال لها وهي تصفق له ويتواعدون كيف الطريقه علشان يتزوجون وقايل لها كلللل شي عني ..وش ألبس وش اكل ....قسم بالله تخيلو تقول له كلمني وش سويتو ليلة الدخله قال لها كل شي سويناه ...يعني شي خاااااااااااااااااااص فينا ليه ليه بس؟؟ وبنت خالته طبعا .... يفضفض لها عني وهي تمسح عليه ياحبيبي ياعمري ويقول لها عن احلامه فيها وهي مبسوطه وحتى يوم رجعت له اذا شفتها تقول لها اني شفت زوجتك وقطيت عليها نظرات بس هي غبيه وهو يضحك لها ...تقول لها بوريك فيها ماتاخذك مني وهو مبسووووووط يقول وريني فيها المهم من ضمن الكلام قال لحبيبته ان هو عنده خطه يقول بقول لها فصلي عن العمل والا نتطلق ....طبعا هي ماتبي نتطلق فبتفصل وباخذها معاي لمنطقة عملي...بخليها تخدمني وبعاملها مثل الخدامه واذا بردت حرتي فيها بطلقها وارجعها بيت اهلها لا وظيفه ولازوج ولا ولد... انا يوم قريت خطته عرفت السالفه ليه يبغاني افصل محادثه ثانيه يقول لها ...انا اكرههها وما اطيقها بس أقص عليها بكلمتين حب اذا بغيت الـ .... وغير وغير والله العظيم كلام يشيب الراس المهم ....اخذت كل المحادثات على فلاش ونمت بغصه كان ليلة عيد ....ماقصر عطاني العيديه يوم ثاني عادي لبست واضحك وانا فيني غصه ويوم خلص العيد رجعت لاهلي ارسلت له ايميل عتاب والله مو تهديد أنكر وكنت متوقعه وحلف بكتاب الله انه مستحيل تطلع منه العيبه ويخون قلت خلص ...مصدقتك بس تعال انت واهلك الخميس الجاي ونشوف من الصادق ومنو الكذاب وارسلت له محادثه وحده فقط طبعا خااااااااااااااااف وقام يتبلعم ويدق وما ارد ويعتذر وتكفين لا تفضحيني وكذا طبعا مو خايف من البنات خايف لان وحده منهم بنت خالته واخوانها اخوياه يعني فضييييييييييحه ارسلت ايميل للي واعدها بالزواج ...مو تهزئ ...انو ياحرام خوذيه وفكيني منه بس ترى بخيل و يارب تكونين جميله لانه اختارني من 5 و انو يضرب وقلت لها لك هديه بالمرفقات ياحياتي ...وكانت الهديه محادثه له مع وحده ثانيه تعرض له ...يعني ترى يكذب عليج طبعا الزفته هذي كان يرسل لها فلوس وانا كان يقول ماعندي ومايحتاج .... واذا تمرضت يخاف عليها ويقول لها اجي اوديج المستشفى؟؟؟وبنفس الوقت يوم حرارتي 39 يقول لي صبري انتي من الصباح مريضه خل اغسل الحديقه بعدين بعد ساعه ونص بوديج وارسلت ايميل لبنت خالته ... انو ترى ماهتزيت وعادي حلال عليك بس ياترى اخوانك لو درو وش بيقولون وترضين انتي احد ياخذ ابوك وبنت الحمايل ماتسوي كذا ....وبرضه ارسلت لها محادثه بس لها وله<<ماقلت لها انه يكلم غيرك مهما كان زوجي مابي افضحه عند اهله بعد اسبوعين رضيت ارد عليه وجا واعتذر وسامحته ...لأني غبيه ...أو لأني ماكنت ابغى اهدم بيتي طبعا راضاني بخاتم رخيص ومطعم...وشرطت عليه مايطلب مني افصل ويعطيني وقت على ما اتقبله مره ثانيه لاني اشمئز منه بعد اللي قريته قال اوك بس لاتقولين لاحد ومسحي المحادثات قلت طيب .....بس مامسحتهم حفظتهم عندي مرت الايام بس عجزت انسى عجز ينقل وعجزت القى بديل وبعدني ببيت اهلي صرت ماافتش وراه مو ثقه ...بس مابي انجرح مره ثانيه صرت مااهتم ... كلم...ما كلم ...جا ...راح .... أكره شي عندي الويكند واللي أكره وأكره اذا قرب مني ..خلص أكره روحي اتذكر كلامه غصبا عني بس يقول لي كلام حلو اتذكر كلامه لانه مايقول الا هالحزه تمر أيام ودي أنتحر ... أو يموت صار يعطيني 500 ريال شهريا بس يحسبها علي ...يعني مره احتججت مررره قال خلص بعطيك مبلغ قلت كريم غريبه...بعدها 3 شهور مايعطي مصروف لانه عطاني الــ 1500 صارت على السالفه قريب سنتين ...بس للحين مادري ليه مو قادره انسى احيان يمر اسبوع كامل مايدق ...ولما ادق ...يقول تو الناس ليه ماتدقين ؟؟ صارت مشكله قبل 5 شهور رجع يقول لي الا فصلي ....بعدين قال اوديك عند شيخ يعلمك واجيات الزوج رحنا جلست اقول للشيخ ...مايعطيني مصروف ...ماعندي سكن مع انه شرط ...يقول لي فصلي من عملج...اذا عطيت امي فلوس يعصب لدرجة انه مره كلم امي يقول لها ليه تعطيكم انا أولى بالفلوس ويضربني اكثر من مره...ودايم ربعه بالمقدمه بعدين اهله بعديه انا وولدي الشيخ قاله مالك حق تقول لها فصلي مدامه شرط ولازم تحط لها شقه لانه شرط ... تخيلو قال بحط شقه بمنطقة عملي وتجي هي خميس وجمعه ...سلامااااااااات !!!! طبعا ماعجبه كلام الشيخ وهو من اول قايل لي اذا ماعجبني كلام الشيخ مو شرط اطبقه ...اجل ليه رايحين؟؟!! هالاسبوع طلب مني مره ثانيه افصل وانا مارضيت وحسيته زعل .. امي وابوي عندهم قاعده بحياتهم ....الرجال مايغلط الا اذا كانت الحرمه السبب يعني اذا خان او ضرب او سوا اي شي ...هذا لانج سويتي شي غلط فتستاهلين ..والله العظيم قالوها لي كذا امي تقول لي فصلي من عملج عادي وروحي معاه ...وابوي يقول لي عادي تحملي طق واهانات بس لاتتطلقين ترى بتبرى منج انا عايشه ببيت اهلي واحبهم صح ... بس والله احيان احصل اهانات يعني امي اقل شي تقول لاتنسين ان احنا ضافينج لاتنسين ان انتي عندنا لاتنسين ان انتي هنا وابوي اقل شي قال خذي ولدج وطلعي من البيت والا روحي لزوجج على اني اعطيهم مبلغ كل شهر ولدي بس يسوي شي امي تعصب وتسوي سالفه ..وتقول ليه ماتروحين معاه ؟؟ وابوي والله العظيم حتى لو عصب من سالفه غير مادري ليه يقول مو كفايه انج عندنا؟؟ تخيلو مره ناداني ابوي والله العظيم يقول لي عندج مهله اسبوع فضي فيها غرفتج ...قلت وين اروح يقول مشكلتج روحي أجري لج شقه والا سكني بأي مكان والا روحي لزوجج طيب انا ماحصلت نقل ولاندب ولا بديل ...والله العظيم اخرها قبل شهر رجعو اوراقي قلت لامي مره تعبت والله رحموني شوي انتو من جهه وهو من جهه قالت لاتجلسين تسوين نفسك مظلومه دبري عمرج ... على اني كارهه اروح معه بس شسوي تعبت من حجيهم .... بس ماابغى افصل ....اخاف افصل وانا ماصرت اثق فيه ابد ...كل شوي يغير رايه ...اخاف افصل ويرجعني بيت اهلي واهلي يقطون علي كلام مااتحمله ...حزتها وين اروح ؟؟ مره قلت لامي انا بنفصل عنه واعيش بروحي بشقه لحالي مع ولدي وشغاله قالت بتبرا منج وماعرفج وتحملي والحرمه عادي تنطق وتنهان تحملي هو معذور ...معذور؟؟؟في ايش؟؟؟ السالفه انا تعبت ومدري شسوي والا وين اروح ؟؟ نقل وندب ماطلع لي وماابغى افصل مستحييييييييييييل حتى لو يتبرى مني ابوي وتعبت من كلام امي والله العظيم يجرح يجررررررررررح كله تذكرني اني جالسه عندهم وحتى اذا خواتي مثلا يطالعون فلم ...تقوم تصارخ اي اكيد انتي خربتيهم ..وانا شدخلني؟؟ اذا ماذاكرو ..اي اكيد انتي ألهيتيهم اذا مثلا قالو نبغى نطلع ...اكيد حرضتيهم تخيلو حطيت ولدي بحضانه والله علشان بس ماتعلق عليه ..هو عمره 3 سنوات يعني يركض ويعفس بس مو بزياده وعندنا شغاله ...حطيته بحضانه ما اجيبه الا 4 ونص العصر واذا جا على طول غرفتنا اشغل له افلام كارتون مااخليه ينزل علشان مايعفس ....ومع ذلك اذا انكب شي قالت اكيد فلان تقصد ولدي ...والله حرام طفل مابربطه تعبتكم وانتو تقرون وجتني الغبنه وانا اكتب شورو علي حددددي ضايعه وكارهته وكارهه روحي |
رد : خلاااااص تعبت ابغى افضفض
عندي ملاحظات:
-1 400 كلم , مو متر للتنبيه المهم,, انا مدري ايش تفكيرك او مصبرك عليه او انها من نسج خيالك القصه, بس حشاك مابشك فيكي واشكك بمصداقيتك بس من هول ماقرء حسيت كاني اقرء روايه هذا مو زوج هذا مدري ليه متزوجك اصلا وراه هدف وراه مصلحه شخصيه ,, لاذمة ولاضمير ولا انسانية ولا حتى مسلم يمارس الي يمارسه كلنا نغلط وفي من الي يزل ويخطئ ,, بس هذا مو يخطئ هذا بايعك من اساسه ومكلم اكثر من وحده وكل وحده لها اسلوبها الخاص الي يحكيها عن جبورته عليكي والي فعله فيكي ارضاء لها, والي يحكيها عن العلاقه الخاصه , وغير الي تعرض انتي جمعتي اسوء القصص الي صايره للفتيات بالمنتدى وكانك حطيتيه بموضوع واحد الي هي قصتك,,,. ضرب , خيانه, استغلال, تفشي اسراركم الزوجيه , حرمان من الامومه, مو باقي الا يدفنك بيده....؟ اي حل بينفع مع هالجبروت كله ....!!! لاعاد تشوفي خلقته وخلك ببيت اهلك معززه مكرمه واطلبي الطلاق لو رفض ذكريه بالادله الي عندك وخله ماعليه حسوفه وخلي حيلهم بينهم كل وحده ارسليلها نسخه من المحادثه لعل وعسى كل وحده تكيدله مكيده الي تستغله بالفلوس الخ... طبعا جميعهم في الوحل وخلهم يذوقو الكاس الي شربتي منه بسبتهم , |
رد : خلاااااص تعبت ابغى افضفض
مشكلتك معقدة و لا املك لك اخيه الا الدعاء ،،
اسأل الله ان يجعل لك من كل هم فرجا و من كل ضيق مخرجا و ان ييسر ما تعسر من جميع امورك و ان يكفيك شر كل ذي شر |
رد : خلاااااص تعبت ابغى افضفض
اهلا
بالنسبه للغلط سوري كلم اما اني اتكلم بغير لهجتي والله العظيم هذي لهجتنا وحتى لو غيرتها هنا مو علشان اموهك ...يعني تركت الموضوع ودققت عاللهجه ؟؟ وعساني اموت وانحرم من ولدي اذا اني كذابه ...ليه بألف قصه من نسج الخيال على قولتك تدري....انا هالمعرف بيني وبين صديقتي من زمان على اساس كل وحده تنزل مشكلتها ودايم اتهرب وكنت من زمان ابغى استشيركم بس خايفه ألقى ردود تكذبني أو تطلعني انا الغلطانه ... يعطيك العافيه |
رد : خلاااااص تعبت ابغى افضفض
اقتباس:
المهم الحين تطلقي باقرب وقت لايجي يوم وتلقيه ناشر صورك للمغفلات الي معه ,, هذا ماينفع حل معاه , الا ان ربي هداه بيوم وليله واحد بايعك خير شر ايش منتظره منه , منتظره تعاتبيه ويقص عليك بكم كلمه ولا منتظره يجردك من وظيفتك ومستقبلك ويخليك بالبيت وينتقم ويذلك مثل ماذكر برسالته الا اذا كنتي انتي ساذجه وراضيه بها المعامله وماتفرقي بين حجم المشاكل وعلى بالك نزوة وخطا ويتعدل.. لو انا اخوك وقلتيلي هالمشكله عادي اولع قاز واشب فيه , مابقى شي ماسواه |
رد : خلاااااص تعبت ابغى افضفض
مشكور
فكرت فيها والله كثير الطلاق ومو متحمله لاني راضيه بالاهانه والا الذل بس بعد الطلاق ؟؟؟ ارجع بيت اهلي؟؟وهم اللي الحين كل شوي انتي عندنا وانتي عندنا واللي كااااااااااااااااااااااااااسر ظهرررررررررررري ...ولدي ...بعدين بياخذهـ ... انا اصلا قلت لو تطلقت بعيش بس اربيه مابي ولا رجال بحياتي بعيش بروحي حتى اهلي مابعيش معاهم بس ...اذا كبر وخذهـ !! هو صاير السنه الاخيره طيب مع ولده وتعلق فيه الولد ... صدق مو دايم بس يحبه .. احيان اقول لنفسي ليتني اصير ارمله ولا مطلقه عالاقل اهلي بيسكتون انا بين نارين ... اروح معاه ومدري وش بيسوي فيني والا وش مخططه ...بالاضافه لإني افصل من وظيفتي والا اظل واتحمل كلام اهلي ...بس اذا ظليت مارحت معاه الى متتتتتى بظل هنا متزوجه ومو متزوجه ؟؟ ودي يكون عندي مملكتي الخاصه ...لي انا مو غرفتي اللي ببيت اهلي والله مادري وش اسوي |
رد : خلاااااص تعبت ابغى افضفض
حبيبتي الوحدة من تتزوج المفروض زوجها يكون اهم شخص بحياتها بعد نفسها
جاتك فرصة انتداب تكونين بشغلك اللي تحبينه وبجانب زوجك تعفينه وتقومين بواجباتك اتجاهه وتخلينه يقوم بواجبك اتجاهه لكن انتي تخليتي عن هالفرصه لان اهو طلب وهذي اول غلطه ارتكبتيها اذا هو تعود على حياه العزوبية واللا مسؤوليه اني المفروض تصرين على الروحه معاه لكن انتي جا طلبه على هواك لانك مو حابه تغيرين مقر عملك وهذا غلط ومثل ماشفتي تاثير بعدك عن زوجك علاقات وسخافة انتي الان تبين تفتحين صفحة جديدة خليه يستاجر لك شقه بمقر عملك علشان تحسين نفس الاحساس اللي حسيتيه لما اجر لك شقه بمدينك تحسين انك زوجه مسؤو |
رد : خلاااااص تعبت ابغى افضفض
حياكِ الله أختي الفاضله ..
الله يكون بعونك يارب .. ليس لدي حاليا ما أقوله سوى أن لا تتركي وظيفتكِ مهما كان ويكون ..! لعل لي عودة مرة أخرى ،، |
رد : خلاااااص تعبت ابغى افضفض
تحسين انك زوجه مسؤوله من رجل وتحسسينه بقيمته في حياتك
الرجال يحب يحس ان زوجته تعتمد عليه ببعض الشغلات ومحتاجه له تقولين مدينة شغله بعيدة عن شغلك 400 كلم لا حبيبتي مو بعيدة انا مدينه شغلي تبعد 700 كلم ومع ذلك انزل لزوجي اسبوعيا اذا قدرتي تاخذين اجازة بدون راتب اخذي واقضيها مع زوجك فحياتك الزوجية غير مرتبه وتحتاج اى جهد منك علشان تترتب طبعا تقضينها مع زوجك بمقر عمله مثل مانتي شايفه اهلك يضغطون عليك علشان تروحين له وهذا الصح انك تعيشين معه في بيت هو يكون مسؤول عنه اذا قررتي تروحين معاه واقنعتيه ياجر شقه خليه يصرف عليك وعلى ابنكم وهذا الشي ضروري لاجل يحس انكم عائلته ولاجل مايصرف فلوسه على صديقاته وبقيه المشاكل حليها بالتدريج اهم شي الحين مشكلة سكنك ببيت اهلك |
رد : خلاااااص تعبت ابغى افضفض
مشكلتك وقصتك متفرعه من كل جهه ,,,
راضيه بالذل لان بمعنى اصح مثقله على اهلك.... بس حلها ببيت اهلك معززه ومكرمه ولو مثقله عليهم واصلا مين الي مايرضى ببنته وولده ,,, بس فرضا لو مثقله عليهم اهون من انك عايشه تحت ظل هالشخص مابقي شي ماسواه فيك كسر قلبك من الوريد للوريد وهذا الشي راجع لك وعلى كيانك شايفه انه تعيشي تحت ظله وهذي سواته اهون من انك تطلقي وتعيشي ببيت اهلك ,, شي راجعلك ومالك شي تسويه اصلا لاتتعبي تفكيرك عالفاضي ,, بس والله ثم والله لو تناجي ربك كل ليله وتلتزمي بدينك بتلقين الراحه بشكل مو طبيعي ينزل على قلبك السكينه وانتي وسط هالمشاكل كلها تخيلي..!! جربيها اسبوع اعزلي على نفسك والجئي الى الله فكري بالاخره وجزاة الصابرين ونعيم الجنه ماتدرين يمكن هالمصايب الي انتي فيها تكفير ذنوب على حياتك السابقه |
رد : خلاااااص تعبت ابغى افضفض
عفوا اقصد شقه بمقر عمل زوجك
|
رد : خلاااااص تعبت ابغى افضفض
الاجازه الاستثنائيه معناها ولا هلله ...وانا عندي التزامات
بس فكره معقوله مع ان والله عملنا مايعطون يرفعون الضغط بالاستثنائي...بس نو وي أفصل والله الرجال مالهم أمان برد لكم بعدين لاتخلوني بروح الدوام بعد شوي |
رد : خلاااااص تعبت ابغى افضفض
لاحول ولاقوة الابالله ليس هناك اصعب من الوقوع بين سندان اهل لايعرفون الحق ومطرقة زوج ظالم اختي الفاضلة من رايي عدم ترك وظيفتك ففي وجود مثل هذه الام وهذا الاب وذلك الزوج هي امانك بعد الله اذا جار عليك الزمان فطلب زوجك المتكرر بالفصل وراءه مخطط لاذلالك فهو قد بدأ أول خطوات مخططه بطلب مسح المحادثات ثم الفصل من الوظيفة فلاتسمحي له بذلك ويبدو لي ان اباك ضعيف شخصية والدليل دخول زوجك بيتكم وضربه لك امام اخواتك الغير متحجبات وكل هذا لم يحرك فيه ساكنا سبحان اين الغيرة على المحارم ومن يكون هذا الصهر ليكشف على محارم اقربائه بدون وجه حق وفجاة ابوك يهددك بعدم الطلاق اي خوف هذا :::اختي الفاضلة لاتتركي الوظيفة واذا اكثر عليك في الالحاح اطلبي منه بهدوء عدم مناقشة الامر معك مرة اخرى والا هدديه بفضح امره ففي يدك دليل يجعله يمشي كالالف فهذا الزوج خائن بمعنى الكلمة واذا لم يتب توبة نصوحا فهو لايستحق ان يكون زوجا لمسلمة لسبب بسيط من يدري فقد يكون قد زنى والكل يعلم حد الزنا في الرجل المحصن :::اختي الفاضلة لاتكترثي فانت قوية بالله اولا وبوظيفتك ثانيا وبمالديك من ادلة تدين زوجك ثالثا فاحسبيها ببساطة لو تركتي وظيفتك مالذي يضمن طلاقه لك في اليوم الثاني وهذا مؤكد كانتقام منك وتاكيد على محادثاته الماجنة وعندها ستجدين الطرد والاهانة من اهلك فالحل هو استئجار شقة لك ولولدك وافهام زوجك بعدم رضوخك لطلبات ترك الوظيفة والتاكيد عليه بترك ماهو فيه والا ستقومين بفضح امره وعندها تاكدي بانه سياتيك راضخا فتلك المحادثات استخدميها كسلاح ضغط عليه حتى يتوب وان لم يتب فالطلاق خير الحلول اقولها بصراحة فمثل هذا الزوج لايستحق الزواج وتحمل المسؤولية::نسال الله ان يفرج كربتك
|
رد : خلاااااص تعبت ابغى افضفض
احس سبب كل هالمشاكل الشقه
استاجري شقه ملاصقه لاهلك وتنحل امورك الى ان يتم نقلك باذن الله ولو كانت خيانه كتابيه فقط تهون الا من رحم ربي فلا تدققي وتبحثي خلفه افضل لك اما البخل فلااجد حل له لاني اعاني من نفس المشكله بس كونك موظفه فالحمد لله امره هين بعض الشيء فتخيلي انك غير موظفه مع زوج بخيل اما الضرب حاولي ان تكوني هادئه عند حصول مشكله فلا تستفزيه *لو كان صادقا مع بنت خالته لخطبها وتزوجها من زمان وظيفتك لاتتركينها ابدا ابدا فرايتي بعينك وسمعتي باذنك ماقالته امك وابوك وزوجك لاامان لك بدونها |
رد : خلاااااص تعبت ابغى افضفض
اما ضربه لك في بيت اهلك ودخوله على اخواتك غير متحجبات وضربك ورفسك امامهم وامه مبسوطه من المنظر فلاتعليق على ذلك
فصراحه اللوم لايقع الا على ابوك واخوانك فلو كان رجل حقيقي كان كسر يدينه ورجلينه وفقع عينه وطرده هو وأمه |
رد : خلاااااص تعبت ابغى افضفض
اقتباس:
|
رد : خلاااااص تعبت ابغى افضفض
صدقيني يااختي امك وابوك ارحم الناس فيك , وكل كلامهم هذا يبون بس يطفشونك عشان ترجعين لبيتك وتعيشين مع زوجك وابنك فبيت واحد .
حقيقه زوجك ملئ بالاشياء اللي حيرتني كيف اصنفه او من اي فصيلة حيوانيه ينتمي هل ينتمي للانسان و اصولية الفكره كحيوان منوي او ينمتي لفصيلة الكائن الحي الغير عاقل مدري؟ المهم ووووووووووووظيفتك لا تتخلين عنها مهما كان ومهما حصل اذا لك اخو كبير اكبر منك او اصغر منك لكن رجل يعتمد عليه , خبريه بكل حاجه وخليه يشوف المحادثات وخليه يساعدك في الطلاق وبكل الاحوال المحكمة راح توقف معك ان شالله , لكن لاتتخلين عن وظيفتك مهما كان , وامك و ابوك حتى لو طلقك مستحيل يخلونك لو ايش ماصار وكلامهم لاتردي عليه يظلون اهلك . اسأل الله لكي التوفيق والهدى و العفاف و التقى |
رد : خلاااااص تعبت ابغى افضفض
اختى هونى على نفسك والحمد لله ان الله موجود ومطلع بإذن الله سينصرك اختى ما مدى تدين زوجك هل يصلى بالمسجد هل يفعل الحرام وما مدى تدينك انت وصلتك بالله عز وجل ارجوا بعض التفاصيل بارك الله فيك ولى عودة بعون الله |
رد : خلاااااص تعبت ابغى افضفض
الله يمحي كل الخونه وويخلص حقنا من كل بنت حرام اخذت زوج من زوجته امين
نصيحتي لك لا تتركي وظيفتك اتمسكي فيها باسنانك وابنك يا شاطرة من حقك قانونا وشرعا حتى يصير عمر ابنك 15 يخير بينك وبين ابوه اهم شي الحين اوعي تحملي منه انتبهي خذي مانع او ركبي لولب لا تحملي الا بعد ما يستقر وضعك معاه زوجك غير متحمل للمسوؤلية الله يخلص حقك يا عظيم وينصرك عليه قولي امين ومن راي تستشيري اخصائية او استشارية اسرية وهي راح تساعدك بما انك موظفة يعني تقدري تدفعي لها وتساعدك بخطه تمشي عليها استخيري الله واستشيري استشارية اسرية شاطرة ولا تنسى تستشيري محامي في حال لا سمح الله صار طلاق علشان تحفظي حقوقك الحين ارتاحي شهر وريحي نفسيتك وانتبهي على ابنك ووظيفتك واهلك مهما تكلموا وضايقوكي وازعجوكي بتضلي في النهاية انت بنتهم ما بيقدروا يعملوا لك شي واذا عندك اخوال او اعمام حنونين يقدروا يتكلموا مع ابوكي وامك علشان يخفوا عليكي شوي استعيني بالله انت قوية بالله الله يمحي كل الخونة امين |
رد : خلاااااص تعبت ابغى افضفض
:* |
رد : خلاااااص تعبت ابغى افضفض
اقتباس:
كأنكم حافظينها عن ظهر قلب! أغلب المشاكل هنا من متدينين ودعاة، وكلنا جربنا وشفنا... الأخلاق شيء والدين شيء آخر ثنتين من أخواتي مع أئمة مساجد وخطباء، ومذوقينهن الويل والثالثة مع إنسان ما يصلي الا في البيت لكنه قمة في التعامل معها ومعنا كلنا |
رد : خلاااااص تعبت ابغى افضفض
لا يأخوان لاتنصحونها بالطلاق او الهجر
هي كاتبه ان الخيانه والضرب كانت قبل سنتين الان الرجال يعطيها مصروف حتى لو قليل المهم يعطيها وهي ان شاء الله تقدر بحكمتها يزيده وصار زوجها متعلق بابنه وهذا شي ايجابي هي مسالة البعد عنه هي اللي مسببه مشاكل وانهم اذا تلاقو نهايه الاسبوع يتلاقون عند اهله فمن وين تقدر تاخذ راحتها معاه افضل حل تاخذ استثنائي وتسكن معاه بمقر عمله والالتزامات حاولي اذا تقدرين تدبرينها وخليه يساعدك اذا في مجال واذا ماقدرتي كل نهايه اسبوع روحي انتي لشقتك عنده بمدينه شغله او شقه خاصه لك بعيد عن منزل اهله في مدينتهم جربي حياة الاستقرار وان شاء الله يكون فيه خير صرافتك مؤكد لاتعطينها اياه شغلك مؤكد لاتتركينه طلاق لاتطلبينه المطلقه وضعها صعب الفلاش والبلاوي اللي فيه لاتمسحينهم ولاحد يدري عنه وحاولي انتي بعد ماتفتحينه علشان ماتتاثر نفسيتك خلاص شي له سنتين مصروف لك ولابنك ملزوم يدفع لك ومن هاللحظة وخلي مصروفكم على قد راتبه لاترضين بالقليل وهو عنده كثير تطلبي عليه بقدر راتبه لاجل مايحصل فرصه يصرف هالراتب على صديقاته ولان الرجال يحب زوجته تتطلب ولكن بادب وبدلالE="4"][/SIZE] |
رد : خلاااااص تعبت ابغى افضفض
شوفي يا أختي
امشي مع الكذاب لعتبة الباب قدمي على اجازه استثنائية لمدة 6 شهور وقوليله انك فصلتي عشان خاطره وخليه يستاجر لك شقة، وحاولي تصلحي حاله معك... اذا صدق وتحمل المسؤولية والنفقة ممكن تمددي 6 شهور ثانية واذا بانت نواياه الخبيثة ارجعي واقطعي الاجازة ولو بعد شهر عادي تقدري ترجعي وهدديه بالادلة اللي معك، ووقتها رايح يرضخلك ... |
رد : خلاااااص تعبت ابغى افضفض
اقتباس:
قليل من يفهمون هذا الشيء مع الاسف , اصبح رجل الدين بالشكل الخارجي ( ديكور ) هو السيد الصادق وهو من الاولياء الصالحين وهم الموعودون بالفردوس وغيرهم فلا , والمفارقة الرهيبه هي انهم في بيوتهم وحوش شياطين ليس الجميع منهم ولكن فئة ليست بالقليله منهم هكذا , بلا شك يوجد الكثيررررر مِن مَن تخجل من الاخلاقه ودينه ومن تواصله مع الاخرين ومن طيبته مع اهله . لكن الحديث يدور حول المتزندقين الفئة التي غيرت الكثير من افكار الناس تجاه المتدينين وهذه الفئه اعتبرهم اشد خطر من اهل الكتاب , لانهم يجعلون الناس ينفرون من الدين واصولية الدين . مع الاسف الشديد هذه الفئة التي لا يستهان من انتشارها ترى المرأة لاشيء ترى الحقوق العاطفيه و المشاعر تراه شي من الترف وتحوله الى جريمة لانهم بتصورهم يعتقدون انها من الشيطان وانها من افعاله , وكأن الله لم يهب المشاعر و الحب و العاطفه ؟ هذه الفئة مع الاسف ترى الحب الطاهر فجور وينظرون للاشياء بكل سلبيه لا يأخذون حسن النية عند الناس !! يرون انا من يعيش ضد تيارهم هو عدو ومنغمس بالذنوب وموالي لإبليس وينظرون انفسهم تقاة والمخلصين من عذاب القبر ؟ النبي صلوات الله عليه وسلم كان ومات وهو يعشق عائشه ولا يوجد اي خجل في حبة العفيف كانت تعاتبه لانها لم يزورها وكان يعاتبها على غيرتها احيانا . هذا قدوتنا واحترم مشاعر المرأه ومؤمن بمشاعر المرأة ولم يجحف في حقها . اذا انتم ايها المتصمعين للتقوى لقد ملئتوا الوطن بترهاتكم وملئت الشبكة العنكبوتيه بعريكم , كفاكم اما حان وقت راحتكم كفى دعوا الناس تعيش بسلام وتحترم دينا و لاتنفر منه كفاكم سرقه للاراضي واموال المسلمين كفاكم بيع للفتاوي التي تتماشى مع مصالحكم كفى . اختي رددت على موضوعك واكرر لابد من تدخل رجل لكي ( اخ , عم , خال ) لابد من حسم القضيه مع هذا الانسان القبيح والمشوه داخليا لاتعذبي نفسكي كفاك عذاب نفسي لو أن الموضوع كان خيانه نزوه مرة وحلف لكي بأن لا يكررها وانها لم تصل حدود الصور و الكلام القبيح فهنا اقول لكي فكري بالمسامحه , لكن للاسف هذا الارعن تعدى كل صبيانية المراهقين المغفلين وخيانته قبيحه فيها صور وكلام فاحش وحرمان حد الضياع , لاتتخلي عن وظيفتك هي مصدر دخلك الوحيد . اسأل لله لكي و لي وللمسلمين التوفيق والهدايه وجنة الفردوس اللهم امين يارب العالمين |
رد : خلاااااص تعبت ابغى افضفض
يرفسك ؟؟ ورجعتي دم ؟؟ وداخل على خواتك وقدام أمه ؟
يا أختي لا خاف ربي ولا حشمك ولا حشم بيتكم ولا خواتك ولا البيت ولا فكر إنك حرمة ضعيفة هاجرها فترة مب هينة أنتِ متوظفة والحمد لله، فري منه فرارك من المجذوم الحياة مع شخص مثله لا أمان ولا احترام فما بالك بعشرة حسنة وحب وتربية سنعة ؟ ليه مرخصه نفسك لهالدرجة ؟ حتى المستشفى ما رحتي تجيبين تقرير عشان يكون معك دليل على سوء المعاملة تطلقي منه والله رزقك إياه يرزقك غيره ، والحمد لله إن طفلك ولد مب بنت..فما له أمل فيه ولا يقدر ياخذه حسبي الله ونعم الوكيل وكفى |
رد : خلاااااص تعبت ابغى افضفض
نأمل من الجميع عدم الخروج عن صلب الموضوع
ويمنع ؛؛ النقد غير الموضوعي الذي يوجه لذوات الأعضاء, أو التعرض لهم بالتجريح أو الجمل الاستفزازية والتهكمية. ؛؛ الإشراف |
رد : خلاااااص تعبت ابغى افضفض
مدري شقول بس اول بسال صاحبه الموضوع هو ليه غير راسه عن البعثه والدراسه
|
رد : خلاااااص تعبت ابغى افضفض
السلام عليكم
اختي بالنسبة لمشكلتك مع زوجك اللي هي الخيانة اعتقد انك خلاص حليتيه خلاص خاصة انو عدى عليه سنتين باقي مشكلة استقرارك اياني واياك تسيبي وظيفتك الا وظيفتك لاتسيبيهاابدااااااا والحل من وجهة نظري اشوف انك يا اما تقدمي على نقل لمنطقة عمله وتروحي عنده وقتها عاد تلزميه ببيت وياثثه لكم وتعيشي انتي وزوجك وولدك وتستقروا بدل الشحططة هادي او انك اذا مرة مافي امل انك تنقلي عنده انا اشوف انك تبني لك في بيت اهلك في الحوش او فوق السطح اذا ممكن غرفتين وصالة ومطبخ وحمام الله يكرمك وتعيشي فيه وزوجك يصير يجي عندكم لا اهله ولا اهلك واذا كنتي في السعودية قدمي عالبنك العقاري واشتريلك بيت استقري حبيبتي في الزمن هاذا كل يقول نفسي ماحد يفيد احد لازوج ولا اهل واذا فكرتي تاخدي بيت خذي عمارة تكون اكثر من شقة انتي تسكني وتاجري الباقي وتستفيدي الله يقدملك اللي فيه الخير لك ولولدك |
رد : خلاااااص تعبت ابغى افضفض
وكمان مع الرد 23 من حياتي اليمة الله يبعد عنك وعنها الالم يارب
|
رد : خلاااااص تعبت ابغى افضفض
هلا حبايبي
ردودكم اغلبها اني اخليه واهلي بيتحملون ويسكتون والله العظيم هذا اللي فكرت فيه وقلته لامي ..قالت ضحي علشان ولدك ..قلت لها توي صغيره ليه اضحي بحياه ماتجي الا مره انا باختصار اكرهه وكل ماقرب مني اتذكر كل شي واتذكر انه يصرف عليهم واتذكر يوم يعلق على الملابس الداخليه للبنت اللي تعرض له ....تصدقون ..والله العظيم يوم رحنا للشيخ هو قال للشيخ انا كنت اعرف بنات تعرفت عليهم وكذا بس معرفه عاديه ...قلت له وبنت خالتك ...؟؟؟ قال للشيخ ...ياشيخ احنا علاقتنا اخويه ببنات خالتنا ونسولف عادي سوالف اخويه .... صرخت انا ...لما تقول لها حلمان فيج للمره الثانيه البارحه ....هذي علاقه اخويه ؟؟ لما تقول لك تغطى حبيبي زين اذا جيت تنام ....هذي علاقه اخويه؟؟ لما تقول لك ..الله يعين هالاسبوع بشوف زوجتك الويع وانت تضحك ...هذي علاقه اخويه ؟؟ لما تتصل فيه 1 ونص بالليل تبي تفضفض الحبيبيه ...هذي اخويه ؟؟ احنا عشنا وعندنا اولاد خاله واللله العظيم من الحيا حتى السلام عليكم نستحي نقولها وهذا وهم اصغر مني وهم اذا جاو يمرون بالصاله وحتى لو كنا متحجبات والله العظيم يغمضون عيونهم والصغار يقودونهم مثل العميان لما قلت هالكلام ...هو سكت ...وقال الشيخ شلون اخويه وتقول لك حبيبي ...طبعا تبلعم وتفشل بالنسبه للشقه.. ملاصق لبيت اهلي مافي شقق او غاليه مررره .. بس شقتنا اللي سكنا فيها قبل وكنسلها بنفس الحي ...وبجهه حلوه من الحي والباب اصلا عليه قفلين علشان الحذر و حاطين جهاز انذار .... والله العظيم كل ما امر على العماره يذوب قلبي ... يعني بالسياره لبيت اهلي 3 دقايق و نقدر ناخذها لان اللي ساكن فيها صديق اخوي وهو مبتعث واخوي قال له يمكن نبيها بعدين قال عادي وقت تبون بخليها ... والله العظيم قلت له انا بدفع اجار الشقه وانت بس عليك تجي خميس وجمعه تنام فيها لاتسوي شي... قال يعني انتي تبينها ؟؟؟...قلت والله حابتها ....قال اجل مابيها ...يعني نحاسه بس ...ليه بس هالنحاسه حتى الشيخ قال له مو عدله ماعندها سكن ...بعد لو مو شارطه يمكن بس البنت شارطه اذا شايف انك ماتقدر توفر اجل ليه وافقت عالشروط ...؟؟؟والله العظيم بكل وقاحه قال للشيخ مابحط لها شقه وسوو اللي تبون ..قال له الشيخ طيب تخلي اخوها الصغير يعيش معاها .....قال لااااااا يعني لاااااا الموضوع منتهي واللي تقول روحي له خميس وجمعه مكان عمله...يعني حلوه ان كل ويكند انا الحرمه اخذ ولدي واروح لمنطقه مو منطقتنا ماعرف فيها احد و اهلنا كلهم هنا وهناك مالنا احد ...؟؟وهو اجل ليه اسمه رجال؟؟بس زينه ؟؟ اصلا انا وش استفدت من هالزواج ؟؟اللي يهون علي شي واحد فقط ...كل ماشوف ولدي انكسر..اصير ضعيفه..اقول لولاه وش اسوي ؟؟ طبعا اطفال مافكر اجيب حاليا زي ماقلتو حاطه ببالي هالفكره اصلا وفي حبوبه قالت خوذي استثنائي وقولي فصلتي ....يووووه لو درى شفتو عفش الشقه اللي قلت هديه من اهلي علشان ماحرجه ؟؟....يوم صارت المشكله و امه جلست تردد ولدي حاط لك ولدي مسوي لك ...من كثر ماتردد انا مو منه بس اوضح لها ..قلت ترى العفش من عندي .. قالت مو منك ...هديه من اهلك ...قلت لا مني وانا قلت هديه علشان مااحرجه ويقول اصرف عليه ... طبعا انقلبت السالفه ضدي ... طلعت كذابه لاني مره اقول مني ومره من اهلي وللحين يعايرني فيها انتي كذبتي علي وانتي كذبتي علي بالنسبه للدراسه.. اللي يسأل ليه غير رايه ... والله العظيم علمي علمك المشكله ان هو اللي فتح سالفة الابتعاث وهو اللي قال لي قدمي وانا ورب البيت قبل كل خطوه اسأله ..للحين تبي؟؟ ترى اذا سويت هالخطوه صعب اتراجع ....وهو يقول لي ( قو اهيد ) يعني روحي كملي لعبه انا مره اي ومره لا ؟؟...وبرضه طلعت انا الغلطانه اللي ماتفكر بمصلحة زوجها اللي ابغى افصله من عمله يعني حتى ابوه وامه بعدين يقولون لي ....شلون تبينه يفصصصصصصصصصصل يمكن مايحصل عمل بعدين؟؟ انا مو مشكلتي ان مادرست ...يعني بالاضافه الى مشكلتي ان الفكره فكرته..وانا اللي تعبت ورحت وجيت وراسبت وهو مرتاح ....طيب انت تدري انك بتفصل من عملك تو الناس انك تفكر انك بتفصل ....وانا قلت لك ترى بيصير كذا وكذا قلت ايه ....اجل ليه تقترح من اول ... الرجال عند كلمته مو مره اي مره لا...خصوصا سالفه مثل هذي يعني فيها حوسه واوراق وروحه وجيه الحين صرت ما اثق فيه اذا قال لي شي لاني ادري انه بيغيره والله العظيم صرت اخذ حبوب القلق والتفكير ... يعني هو مرتاح لاخر درجه ...اسمه متزوج وراتبه عنده ومافي شقه يصرف عليها ولا مصاريف المتطلبات الشهريه للشقه ..ولا صرف على حرمه ...وكل اسبوع ماخذ حقه ...وعنده ولد ....يعني بالله عليكم وش احسن من كذا انا اللي اعاني مع ولدي واتعب معاه واتبهدل ماعرف انام ...والله احيان اروح مواصله واجي اجلس مع ولدي ..اتعب موووت استحي والله استحي من اهلي حتى اخواني استحي اطلب منهم يودوني مكان انا بصراحه ودي انفصل عنه بس خايفه خااااايفه على ولدي ...وامي تقول لي اذا انفصلتي مابيبقى لج احد انا وابوج بيجي يوم ونروح بس العيال والزوج هم اللي يبقون .... اخااااف مادري شفيني مو شجاعه ... واللي قال عمامج ...علاقتنا باهل ابوي بااااارده ....وخوالي اصلا علبالهم اني عايشه سعيده واللي قال موقف ابوج يوم جا البيت وطقج ..... ابوي كبير ومايشوف ويوم سافر يبون علاج لعيونه ومايبيني اتطلق طبعا انا كلمت محامي حزتها ...وقال لي بوقف معاج وكل شي وخليه يولي بس بعدين يوم رديت له خلص ماكلمت المحامي وليلة اللي جا ضربني والله العظيم من القهر والألم كلمت الشرطه مادري ليه المهم الشرطي جلس يتمطق وقال اذا جا مره ثانيه وضربج كلمينا .... احيان ... افكر اخذ ولدي وانحاش فيه .. واحيان .. افكر انحاش بروحي .. واحيان اقول ...بجلس معه نتفاهم ان يكون الطلاق بتفاهم وحضاري اكثر من الخلافات يعني نتفق على الزيارات وكل شي ماله داعي نسب في بعض ونشهر بببعض كل واحد يحترم الثاني بس ...أتردد ...انا متردده والا خايفه والا ماعندي ثقه بروحي ...مادري |
رد : خلاااااص تعبت ابغى افضفض
الحبوبه اللي قالت اشتري لك عماره او بيت
والله هذا اللي جالسه اسويه الحين ادور على شي قريب من اهلي وزين بس غلا غلاااا مو طبيعي يعني اقل شي بمليون ونص اللي حولنا وانا مايمولني البنك هالمبلغ ,,,واللي اسعارهم معقوله بعيد عنا بس بظل ادور ...يارب ألقى |
رد : خلاااااص تعبت ابغى افضفض
غالييييتي اسأل الله الحي القيوم ان يفرج همك وأن يسخرلك اهلك وزوجك ويصلح حالك
ويحفظ لك إبنك انا لا الومك في أتخاذ اي قرار بحياتك زوجك ومدى تعامله السيء لك وخياناته واللامبلاه بك وبابنه واهلك وتجريحهم لك وتعاملهم الصعب اخيتي سأنصحك نصيحة اخت لاختها ويشهد الله اني لا اريد لك الا الخير اولآ وكلي امرك كله لله سبحانه توكلي بمعنى التوكل وتيقني بان الله سيفرج همك و سيصلح حالك ثانيآ الزمي الاستغفار في كل وقتك ثالثآ صلي قيام اللي وإدعي با يسخر لك زوجك وأهلك ادعي في سجودك ألحي على الله كل ما تذكرتي جرحك وهمك ابكي وادعي ربك وانصحك نصيحه لا تتركين الوظيفه فزوجك ليس له أمان واهلك ليس لهم أمان افعلي ما قلت لك واساله سبحانه ان يفرج همك |
رد : خلاااااص تعبت ابغى افضفض
لو اسم الله عليه ولدك موموجود كنتي بتطلبين الطلاق
|
رد : خلاااااص تعبت ابغى افضفض
غاليتي مالك غير الدعااااااااء الله بيده كل شي وهو اعلم بحالك الجئي اليه ومارح يخيبك
وش الهدف من الزواج غير الاستقرار والراحه والشعور بالموده والرحمة والامان وأنتي فاقده كل هذا الغاية من الزواج ماتحققت ربي حلل الطلاق لمثل هالحالات وانتي بعدك صغيره والحياة باذن الله قدامك ليه تدفني نفسك مع واحد مايستاهل اهلك لو رفضوا مصيرهم بيتقبلوا الواقع نارهم ولا رجل مثل هالانسان والله اني خايفه على مستقبلك لو استمريتي بالعيش بهالطريقة خذي بكلام الغالية سيدة الموقف عين العقل خليه ببالك الله يرزقك من كل هم مخرجا وفرجا لاتنسي الدعاء والاستخاره |
رد : خلاااااص تعبت ابغى افضفض
انتي اول شي اشتري بيت او استاجري اذا ماتقدرين
بعدها شوفي تعامل زوجك طبعا المشاكل اكيد اكيد راح تخف باذن الله وبعدها شوفي تعامله واخلاقه وبخله اذا تحسن الخير واهله واذاماتحسن هذاك الوقت استخيري الله وشوفي لايش تميلين الانفصال او التعايش معه ومحاولة تغييره الله يصلح بينكم انتبهي خبي الفلاش في مكان آمن لايشوفه ويتلفه ولو تسوين نسختين من باب الاحتياط وتخبين كل نسخه في مكان آمن افضل لانها وسيلتك في الضغط عليه والرضوخ عن اي تهديد من جهته باخذ الولد او ارجاع المهر في حال الانفصال وحاولي تكلمينه بهدوء ووقت روقانه بضرورة ارسال مصروف شهري ولو يسير لك ولولدك ومقاضيكم وانا ماني عارفه انتي ليش تروحين لمنطقته كل خميس وجمعه هو الرجل هو اللي يجي الله لايهينه لاتروحين وتعرضين نفسك وولدك للخطر المشكله ليته يستاهل * |
رد : خلاااااص تعبت ابغى افضفض
كل واحد منكما أخطأ بحق نفسه قبل أن يخطيء بحق الآخر
كيف تقبلين الزواج برجل لا تستطيعين أن تقدمي له أبسط حقوقه كزوج؟! كيف تجازفين حتى بذريتك وتظنين بأن هكذا أمور سهلة والأمور ستتوقف عند ما كتب في العقد من شروط ولنن يكون هناك أي مشكلة من قبل زوج استهتر هو كذلك بالأمر ورضي القبول بك وبشروطك التي ليست في مصلحته وأعني بهذا البقاء عنه بعيدة .. لم نسمع يا أختي بحياة زوجية سليمة وخالية من العلل وكل زوج في بلد ومنذ بداية حياتهما الزوجية ؟؟!! بل والمسافة بينهما ما ما يقارب 400 كيلاً ولا أعلم كيف يقطعها الزوج ثم يضيف إليها 150 كيلاً أخرى مضروبة في اثنين أي أنه يقطع ما يقارب 1100 كم أسبوعياً!!!! ما هذا العذاب؟! لقد قتلتما حياتكما الزوجية وهي في المهد وأضيفي إليها خمسة أيام يقضيها في كل أسبوع دونما زوجة يسكن إليها + لا يوجد من يهتم بطعامه + ولا لباسه ونظافة هندامه + ... الخ ثم عليه أن يأتي منشرح الصدر مبتسماً سعيداً محتفياً بلقاء زوجته المصون وعليه أن يكون أكثر اهتماماً رومانسياً وسخياً في العطاء المادي والمعنوي !! لا أعلم أشعر بأن هذه صفات آلة وليس بشراً بل وستتعطل إلى الأبد من أول شهر إن لم يكن من أول أسبوع للإستخدام والمصيبة الأخرى أتتك فرصة مواتية بالإنتداب والسكن مع زوجك وإحصانه ففرطتي فيها لجهلك وجهله الرجل بطبيعته حاجته للمرأة ماسة بعكس المرأة تستطيع أن تعيش لفترة بلا رجل وهذا ما حدث لكما خصوصاً حينما يتزوج الرجل ويرتبط بامرأة ويحصل بينهما ما أحله الله ثم تفارقه أو يفارقها لظروف ما فلن يستطيع الرجل الصبر فالنساء فتنة عظيمة وخصوصاً أنه مازال شاباً فأين يذهب بطاقاته في ظل انشغال الزوجة بالوظيفة التي ترى أهميتها أكبر منه؟؟!! حتى بعد أن دخل حياتها وتعرفت إليه لم يغير شيئاً من الأمر فمازالت الوظيفة مهمة ولم تعد النظر في أمر الإنتداب في حينه فكيف بعد هذه التجربة ينظر إليك وكيف تريدينه أن يعاملك؟؟!! الزوجة شرعاً تلحق بزوجها أينما كان وليس العكس وليس في بعدهما عن بعضهما مصلحة أو فائدة مطلقاً ولو استشعرتي عظم حق الزوج وعرفتي مالك وما عليك لما قبلتي به زوجاً منذ البداية طالما أن وظيفتك أهم منه ولو كان يعرف هو أيضاً ماله وما عليه لما أتم مشروع الزواج هذا ولكن هذه حكمة الله وإرادته.. أهلك لا ألومهم مطلقاً فهم بشر ولديهم مشاعر ويرون بأن هذا البعد عن الزوج هو سبب مشاكلك والحقيقة أتفق معهم فلو تم تفادي هذا الأمر منذ البداية لكان وضعك أفضل فالرجل سيعتاد على وجودك وستحتلين مساحة أكبر في قلبه وسيعتاد على القيام بدوره كزوج وأب لذلك هم يضغطون عليك الآن خوفاً عليك من الغد فالطلاق ليس أمراً هيناً على الإطلاق بالإضافة لتبعات هذا الأمر من مشاكل لن تنتهي وتتوقف إلا حينما ترضخين وتتنازلين عن ابنك.. ووالداك لم يعد في عمرهما متسع لقضائه ما بين دموعك ومجالس الفصل وحل النزاع ما أراه لك .. أن تعجلي في طلب إجازة بدون مرتب.. واللحاق بزوجك والسكن معه ليشعر بأهميتك في حياته ويشعر بابنه فلذة كبده ويشعر بك كزوجة حقيقية يهمها شأن زوجها وتسعد بالقيام على شؤونه وراحته واكسبي وده فهذه حياتك ولك الإختيار في أن تنتصري لنفسك أو تعودي خائبة وتزداد رقعة المشاكل أكثر ثم حاولي معه إن كانتت أمور نقله متيسرة أكثر وكان الله في عونكما.. |
| الساعة الآن 11:28 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©