|
خاطب ومحتار اكمل او اطلق ؟؟
السلام عليكم ورحمة الله :
موضوعي طويل جدا بحاول اختصره ممكن القى حل عندكم . في البداية انا خاطب وحده وعقدت عليها من سنة وكم شهر , ومن بداية الخطبة ام البنت كانت تتسبب وتتشرط وتحاول تفرض رايها على الكل . انا والبنت كنا مقتنعين ببعضنا وواجهنا كل شي لغاية ماتمت الخطبة وعقد القران . لكن المشكلة ان امها الى اليوم تحاول تتسبب وتفتعل مشكلة لاي سبب وتحاول تفرض رايها وتمشيه علينا وعلى الكل والمشكلة انها ماتقدر تواجهني , هي تضغط على بنتها وبنتها موقفة بصفي لكن بدأت تهددها اذا ماقالت لي الي تبيه بتخرب الزواج او بتعطله , الين وصلت لدرجة بدأت تكسر كلامي وتسمع كلام امها . مع العلم اني من اول ما عقدت عليها وانا متحمل مصروفها وتكاليف دراستها في كلية خاصة وسكن خاص وسواق وغيره لدرجة اني اقصر على نفسي وانا طالب بس عشان اوفر لها المصروف . طبعا شرطت شقة خاصة واجرت لها شقة جديدة ماحد سكنها من قبل ودفعت ايجار اغلى من معدل المنطقة الي نسكنها , تعذرت ان الصبغ مو عاجبها وقلت بغيره . قالت تبي اغلى صالة افراح وحجزتها لها . قالت تبي كوشة وتجهيزات تكلف اقل شي 30 الف وقلت لها بسويها . قالت الاثاث تبي تختاره بنفسها وقلت لها مومشكلة . كل ماطلبت شي اقول لها بسويه , وكل ماسويت شي تزيد طلباتها وكل مرة تقول انت ماسويت لنا شي . احسها بس متسببة تبي تخرب الزواج , لدرجة وصلت تقول تبي يوم الزواج تكون اهي المسؤولة عن القاعة , وماتبي ادخل عيال اخواني وخواتي الزواج , هنا انا رفضت لانه شي مو عدل اني اطرد اهلي من زواجي . وبالنسبة للضيوف تقول ماتبي اهلي يدعون اي احد الا الي تبيه اهي . وهنا بعد رفضت المهم ان كل ماسويت شي تطلع بشي جديد بس تبي تخرب الزواج , وزواجنا باقي عليه شهر بس والان من قرب الزواج تاخذ بنتها ويسافرون عشان مانلحق نجهز للزواج ولا البيت , وانا اسكت اقول مومشكلة اهم شي يعدي على خير البنت مالها ذنب . لكن في الفترة الاخيرة حتى البنت صارت تراددني في الكلام وتطول صوتها وتغلط بلكلام واخر شي تطاولت حتى على والدتي , وبدأت ترسل حق اهلي كلام مو عدل . هالكلام صار له 5 ايام وانا بطلت ارد عليها اذا اتصلت اخر شي قلت لها خلي اهلك يكلموني ماعندي كلام معاك . اليوم امي واهلي يقولون لي اتركها لانها اذا ما احترمتك ولا حسبت حساب لك الان بعد الزواج راح تزيد اكثر واكثر ,وانا محتار خصوصا اني احبها وشاريها وكنت متاكد انها تحبني وتبيني , بس الان كرهتها بسبب فعال امها وكرهتها اكثر لما بدت تقلل احترامها لي ولاهلي. اتمنى القى عند احد نصيحة تفيدني لاني ابيها وفي نفس الوقت ماابي المشاكل الي تجي منها ومن امها . وللعلم ابوها شخصيته ضعيفة وماله كلمة عليها ولا على امها وهذا الي مخلي المشكلة اكبر . طبعا انا سويت لها شبكة بعد العقد كلفتني مبلغ كبير لدرجة ان الي حاضرين يفكرونه زواج موشبكة , وكل هذا بس لان امها تبي كذا . وصرفت عليها مبالغ كبيرة مصروفها وحق دراستها في كلية خاصة . اليوم انا محتار اكمل على امل انها تتعدل ولا اوقف هنا وكفاية مذلة وخساير خصوصا ان الزواج راح يكلفني مالا يقل عن 200 الف بسبب شروط امها وشروطها . تحياتي لكم |
رد : خاطب ومحتار اكمل او اطلق ؟؟
وعليكم السلام ورحمة الله
مع اني ماحب احط راي يكون فيه انفصال لكن لو انت اخويا وشفت زوجتك وامها يسوون كذا والله ما اقول غير انقذ نفسك من هالعيلة استغلال واضح جدا لاتقدير ولا احترام وفي الاخير يقولوا انت ماسويت شيء ؟؟ لآ حرام الاستغلال و فرض الراي هاذاا وربي في بنات اخلآآآآق ومحترمين هم و امهاتهم ماشاء الله افضل من كذا بمليون .. كل شيء له حدود بس هما بصراحة تعدوها بزيآآآدة لا تتوقع انك لما تتزوج بترتاح دام امها موجودة فمعناتها المشاكل موجودة وشوفها بدت تأثر عالبنت كمان مآ اقولك إلا زي ماقالو اهلك( اتركها لانها اذا ما احترمتك ولا حسبت حساب لك الان بعد الزواج راح تزيد اكثر واكثر) صادقييين و العلم يبان من أوله .. استخير ربك الله يوفقك ويسدد خطاك |
رد : خاطب ومحتار اكمل او اطلق ؟؟
أخي الفاضل/ *شهر مبارك. *أقترح عليك ما يلي: 1) تكتب إيجابيات وسلبيات البنت ثم تبدأ بالمقارنة بينهما بما تمليه عليك نفسك الداخلية. 2) تسأل نفسك هذه الأسئلة: أ- هل لديك القدرة للتعامل مع شخصية أمها؟ ب- هل لديك القدرة للتعامل مع البنت وتأثرها بكلام أمها؟ ج- هل لديك التعامل مع شخصية والدها وقت الأزمات في المستقبل أم لا؟ *حتماً سوف تعرف الإجابة من تلقاء نفسك. *خذ والدك+2 من أخوال الفتاة أو أعمامها أو جدها (والد والدها) بشرط توفر الحكمة والعقل والفهم والرجولة فيهم+2 من أقاربك العقلاء الحكماء.. تتجهون لبيت والدها، وتخبره بالأمر كاملاً.. وتسمع منهم ويسمعوا منك. *إن رغبتم بإكمال الزواج فضع النقاط على الحروف. *إن وجدت الأمر معقداً ولا يريدون إكمال الزواج فأنت بالخيار هنا. ::: أخوك في الله/ حاتم بن أحمد-الرياض |
رد : خاطب ومحتار اكمل او اطلق ؟؟
الله يعينك من جد شيء يقهر اذا اكرمت اللئيم تمردا
انا اقول شف رأي امك مع الاستخارة الله يختار لك اللي فية خير ويوفقك ويعوضك |
رد : خاطب ومحتار اكمل او اطلق ؟؟
الاخوه اعلاه وفوا وكفوا
تحياتي الكم |
رد : خاطب ومحتار اكمل او اطلق ؟؟
تذكرت المثل
اسئل عن امها قبل تضمها اقلب الجرة على فمها تطلع البنت على امها من جد لازم ينسئل عن الام قبل الزواج |
رد : خاطب ومحتار اكمل او اطلق ؟؟
اقتباس:
لكن رأيي هوا الاستخارة لكن اذا كنت غير مرتاح وسعيد الآن اجل كيف في المستقبل ؟ وربي يكتب لك الخير |
رد : خاطب ومحتار اكمل او اطلق ؟؟
اخ جنتل ..
اذا كانت المسالة كلها محصورة بتكاليف الزواج فهذا حله بالاتفاق مع والدها وكبار اعمامها واخوالها كما ذكر البليغ لعلكم تصلون لحل .. مع تاجيل الزواج لست اشهر .. اقل او اكثر حسب ما يناسب ظروفك .. الى ان تستقرون على راي واحد بخصوص كامل التكاليف .. ولكن .. ! اذا كانت البنت تتاثر براي والدتها كثيرا بعد الزواج .. فالامر هنا مرهون بقدرتك على كسبها بعد الزواج بحيث لا تتمكن امها من التاثير عليها بسهولة .. وهنا انصحك ايضا في حال تم الزواج ان تؤجل الحمل لست اشهر على الاقل .. في حال لاقدر الله حصل طلاق فلا يكون هناك من يدفع ثمنه .. اسال الله لك التوفيق . . |
رد : خاطب ومحتار اكمل او اطلق ؟؟
ما ودي اقول شي
لكن الله يعينك |
رد : خاطب ومحتار اكمل او اطلق ؟؟
انا لسا طالع من بيتهم من شوي وتكلمت مع ابوها في امور كثير وفي نص الموضوع دخلت امها وحتى الكلام تغير وبدا يقلب في الكلام , الخلاصة انا قلت لهم الي عندي وصار شد في الكلام وعطيتهم فرصة الى بكرة يفكرون اذا موافقين على كلامي ولا ماني مستعد اكمل معاها , هم الخسرانين انا شريتهم وهم الي ماقدرو هالشي .
الله يكتب الخير . دعواتكم |
رد : خاطب ومحتار اكمل او اطلق ؟؟
مدري ليه الأمهات بعض الأحيان يدورون على خراب بناتهم! !!!!!!!
|
رد : خاطب ومحتار اكمل او اطلق ؟؟
انا مريت بنفس و ضعك
و تم الانفصال و نزلت موضوعي هنا بس مدري وينه مختفي :) لان عالم زي هذه ما تقدر و لا تحشم و لا لها كبير و البنت و امها ما همهم غير هات و هات حقها تتركها و الله يعوضك احسن منها بس حط في بالك انك اذا تركتها خلاص ما ترجع لان اذا رجعت لها بعد ما تتركها صدقني بتعيش عمرك كله في مشاكل من النوع هذا لانها بتتاكد انك ما تقدر تستغني عنها الشي الثاني لا تقبل اي تجاوز يمس اهلك مع مين ما كان و الله يعينك و يسهل امورك المهم انت فكر بعقلك و خلي قلبك علي جنب شويه ترا الموضوع عشرة عمر و البنت اذا ما قدرت تعبك ترا اشك في انها تحبك اساساً الشي الي ودي اسالك عنه كيف ظروف اهلها المادية ؟ |
رد : خاطب ومحتار اكمل او اطلق ؟؟
سنا نجمة : انا بقوة مستغرب من امها تخرب حياة بناتها بس عشان تمشي كلامها , على فكرة اختها الكبيرة كانت مخطوبة لولد عمتها وتركها وراح خطب وحده ثانية بسبب امها والبنات مو صغار يعني راح تفوت عليهم الفرصة , اصغر وحده فيهم عمرها 24 سنة والكبيرة 30 سنة والي انا خاطبها 27 .
rm11 انا حاليا ماراح اسكت عن شي , وحتى الزواج خلاص بسوي كل شي بكيفي اذا يعجبهم اهلا وسهلا واذا مايعجبهم درب السلامة , اصلا انا بديت اكره البنت . اوضاع اهلها المادية عادية ابوها موظف عادي , يعني بالعربي مثل كثير من الناس مايجي نهاية الشهر الا هم مطفرين . انا افكر اتركها بس بعد الي صرفته عليها بطالبهم يرجعون كل شي عشان اقدر اتزوج , مادري ايش الاجراءات ؟؟ |
رد : خاطب ومحتار اكمل او اطلق ؟؟
الله يعينك يارررررررب الصراحة طماااااااعين مررررة انا ماجاني الا اشياء جدا بسيطة وماهي مكلفة ولا طلبت ريال الله يكتبلك كل خير يارب
|
رد : خاطب ومحتار اكمل او اطلق ؟؟
أمك ثم أمك ثم أمك
إذا قلت أدبها على أمك وأنتم لسى على البر.. الله يستر بعد الزواج أيش راح تسوي |
رد : خاطب ومحتار اكمل او اطلق ؟؟
وه وه وه قووووويه الصراحة والله رأيتك بيضا ياأخوي بس وش تسوي لناس لأتقدر ولاترحم بس الحل تمام اللي سويته ترضى بكل شروطك والمساله كمان زادت انها ماتحترم اهلك هذي في كفه وانت بدات تكرهها صعبه الإحساس أحسم الموضوع ولا تستعجل لانه أمها حتتحكم زود في المستقبل000
موفق يارب |
رد : خاطب ومحتار اكمل او اطلق ؟؟
هددها انك بتنفصل عندها وبتقل الشروط قالو هذا ميت علينا ليه مانستغله
|
رد : خاطب ومحتار اكمل او اطلق ؟؟
بقولك شيء واحد .. وبختصر عليك كلام كثير
انقذ نفسك من هذه العائلة لأن أمها لن تتركم بحالكم حتى ولو تم الزواج .... بل ستستمر بالتحريض ووووإلخ العوائل مثل هذه نوعية كريهة جدًا....وقد سبق أن عرفنا من أهلنا عائلة مشابهة ... في كل شيء تقريبا حتى الرسائل على الجوالات ... قمة قلة الأدب أنصحك نصيحة لا أبتغي بها إلا وجه الله ... انفصل عنها من الآن وسيعوضك الله خيرا منها لم نعهد في بنات الناس أنهن يتطاولن على أزواجهن أو على أهل أزواجهن بهذه الطريقة ولهذه الأسباب التافهة سامحني الله .. لكن فعلا الطلاق رحمة بكما أنتما الإثنان....هي تحتاج رجل من نفس معدنها ... جشع وطماع ... |
رد : خاطب ومحتار اكمل او اطلق ؟؟
اقتباس:
وانت خليتهم يتمادون عليك المفروض من اول شئ وقفتهم عند حدهم وبعض الامهات الله يهديهم مايفكرون الا بوناستهم في الزواج ولايفكرون في مستقبل البنت والبنت مسكينه ماتقدر تطلع عن شور اهلها وخاصه امها الله يكتب لك اللي به الخير |
رد : خاطب ومحتار اكمل او اطلق ؟؟
ماادري بس هل عندها اخوات اكبر منها متزوجات
اذا فيه رح لاحد ازواجهم وسولف انت وياه وبعدها افتح الموضوع بطريقه خنفشاريه وخله ينصحك باللي يشوفه موفق |
رد : خاطب ومحتار اكمل او اطلق ؟؟
طلقها و الحق عمرك
الله يرزقك بغيرها و احسن منها و من امها |
رد : خاطب ومحتار اكمل او اطلق ؟؟
أنحش عن ها العقرب أبرك لك :(
|
رد : خاطب ومحتار اكمل او اطلق ؟؟
اقتباس:
أنظر للجزئية هذه من ردك وستجد أن الخطأ منك منذ البداية |
رد : خاطب ومحتار اكمل او اطلق ؟؟
أخي الفاضل لا أعتقد أن البنت و أهلها يستغلونك،*كثر ما أعتقد أنها سوء تصرف.* البنت صغيرة سواء من ناحية العمر أو حتى الخبرة في الحياة و أمها مثل كثير من الأمهات اللاتي يحاولن إسقاط تجاربهن الخاصة وخلاصة استيعابهن للوسط المحيط على فلذات كبدها ، معتقدة بذلك أنها ستجعل منهم نماذج ناجحة بل وباهرة النجاح. النقطة الآخرى* لا تكن لين فتعصر ولا صلب فتكسر.. لا خضوع مبالغ فيه فتسلم الخيط والمخيط ولا قوة وتجبر وتحدي لدرجة منفرة. أعطها حقها بحدددود* في الأخير..... أخي لا تنس أن العفو والصفح من شيم الكرام**(والكاظمين الغيظ والعافين عن الناس والله يحب المحسنين) بالتوفيق،،،، |
رد : خاطب ومحتار اكمل او اطلق ؟؟
الله يبعتلك لي فيه الخير ويعينك عاى حماتك عن جد ما بعرف كيف بتفكر يعن يا ريت لو كان خطيبي عمل ربع لي عملته كان زمانا متزوجين وعندنا ولد بس شو نعمل هاي حكمة الله بس يا أخي خليك على قرارك ولا تتراجع فيه وأكيد هما الخسرانين
الله يكون معك ويهدي سرك أمين |
رد : خاطب ومحتار اكمل او اطلق ؟؟
أخي أنت الان على الشاطئ وتكاد تغرق مع هذه العائلة .... فما بالك لو دخلت هذا البحر الهائج أعتقد لن تستطيع أن تنجوا
أتمنى ان يبارك الله لك في مالك و أهلك ويرزقك من تجعلك أسعد الناس .... دمتم بعز |
رد : خاطب ومحتار اكمل او اطلق ؟؟
السلام عليكم ورحمة الله تعالى وبركاته
انا مايبط جبدي الا بعض الردود المبالغ فيها بالمثالية بس عشان تسجيل الإعجاب!! أخوي جنتل الله ماكشفهم لك على حقيقتهم إلا لحكمة من عندة ، إن أستغليتها صح كانت في صالحك ، وإن أهملتها وماعرفت اتصرف!!بعمرك ماراح تستريح ، وبتكون انت الضحية. لاتسمح لنفسك أنك تصير مهزلة حريم !! يودنك ويجيبنك على كيفهن !! تراك ان صرت كذا لايهابنك ولا يحترمنك وتصير انت اخر همهن ويبدن عاد بالإهانات والتجاوزات !! انت رجال وانت القائد وانت اللي كلمتك الفيصل !! والحرمة اللي تغلط على أمي الله لايبارك بالساعة اللي تجيني فيها ، والحريم واجد. لاتقولي حب وابيها وذا الخرابيط !! خل عقلك براسك لاتخلية بقلبك ، ويا مالك من الحب لما تجيلك اللي تستاهلك. استخير بس خل قلبك محايد ، لاتستخير وانت قلبك يرف لها ، وشوف امر ربك ، وتوكل على الله. موفق. |
| الساعة الآن 06:15 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©