|
ودي اتزوج لكن عندي مشاكل ("فضفضه")
السلام عليكم ورحمة الله وبركاته
بسم الله الرحمن الرحيم والصلاه والسلام على نبينا محمد وعلى اله وصحبه الطيبين اجمعين في الحقيقه انا مثل اي شاب وده يتزوج ويكون اسره ويعيش مستقر ويصون نفسه بأذن الله تعالى لكن في الحقيقه قدامي عقبات نوعا ما كثيره وصعبه شوي في موضوعي هذا انا كاتبه صراحه فضفضه وان شاء الله القى من الله ثم منكم حلول انا قبل فتره نزلت موضوع يشابه الموضوع هذا بس ربما صارت معي تطورات بسيطه جدا انا شاب عمري 23سنه اعمل من 7شهور وادرس اول ثانوي الان ليلي راتبي من العمل 2775ريال عندي مشكله اعتبرها غلطت عمري واحس انها واقفه في وجهي الي هي اني علي دين ثنين وثلاثين الف ريال لكن الي متسلف منه ماقد قالي رجع فلوسي وقد قلت له اول ماشتغلت اني بقسطك المبلغ قال لا مو الان بعد سنه يعني انا متعلق مدري هو في النهايه بيقول مسامحك او يبي حالي يتضبط برضو الرجال هذا من اقاربنا والموضوع هذا الي هو الدين مايعلم فيه الا الله ثم انا والرجال الي مديني فقط يعني صعب اني اقول لاحد يسعادني فيه احس بتصير مشكله فرضيا لو جمعت من راتبي ومن الاقارب وقلت بتزوج وش راح يقول الرجال الي مسلفني تعرس بفلوسي !طيب لو قلت له مثلا بسدده من الي جمعته بيسألوني وين الفلوس الي عطيناك ونا ابي اتزوج بأقرب وقت مابي اجلس وقت طويل اجمع<يمكن مو كلام منطقي فمادري وش بسوي فكرت اني اخذ قرض اعطي الرجال كاش كل البنوك رفضو يعطوني قرض لان راتبي تحت الحد المسموح للقروض وان شاء الله خيره قبل كم يوم اتصل علي اعز صديق عندي قال فيه بنت ناس محترمه واهلها يبون الستر مايهمهم الفلوس وش رايك قلت كم عمرها قال 25 اكبر مني بسنتين يوم فكرت في الموضوع حسيت ان ماينفع اخذ اكبر مني يعني الان عمري 23 هي 25 بعد سنه يصير عمري 24 هي 26 كنسلت الموضوع اليوم بعد صراع طويل مع نفسي وتردد وكل شوي ادخل عند الوالد الله يحفضه واطلع متردد اخر شي قلت له ابوي وش رايك اخطب الين الله يرزقني ونا الموضوع هذا قد كلمته فيه من زمان ونا ماكنت اشتغل فقال انت ماعدك دخل ثابت كيف تبي تتزوج وتصرف انا ودي انك تتزوج الان لكن اجمع لك مبلغ وبيساعدون خوالك وعمانك واليوم برضو قالي نفس الكلام قال لازم تكون نفسك شوي تجمع لك مبلغ بعد بحيث تقول انا والله ان شاء الله بكون جاهز بعد 5 او 6شهور مو تعلق نفسك وتعلق بنت الناس معك على مده مهيب معروفه ثم قال وبقولك عن ثم سكت قلت سم قال فكر انت ونشوف بس اشوف وضعك الان مايسمح ثم قال اااا طيب بقولك عن وسكت ثانيه يعني كنه بيقول شي ومتردد يعني حاس بيقول شي ايجابي او بيقول موافق بس متردد اخر شي قال فكر فكر ونشوف برد لك وراح وتقفل الموضوع على كذا طيب لو قال موافق وبنجمع لك وش بسوي بدين الي علي معذره الموضوع متشتت لان اكتبه وفيني نوم طبعا مسوي حسبه بسيطه ان تزوجت ان شاء الله على راتبي هذا قولو وش رايكم راتبي 2775 مصروف معيشه شهري 1000 ريال يصير باقي 1775 ننقص منها 500ريال على جنب للحالات الطارئه الله يستر يصير باقي 1275 نضرب 1275على ست شهور الي هي القسط الاول لاجار الشقه يصير المبلغ 7650 نضرب 7650ريال على 2 الي هي سنه ست شهور وست شهور يصير لازم تكون الشقه بـ15000ريال اصير وفرت بسنه 300 احطها مع الخمس ميه الي كل شهر اخصمها للحالات الطارئه طبعا انا اعرف شخص ساكن ماشاء الله الله يوفقه ويتمم عليه شقه بـ15000 الف عشان كذا بنيت ذا المثال اختصار للموضوع ابي حل مشكتي مع الدين ابي حلول وارشادات لموضوعي موضوعي يمكن يكون صعب شوي ابي منكم الدعا والارشادات الله يرشدكم لطريق الصح لكن مو صعب على الله سبحانه وكلنا نعرف حديث الرسول صلى الله عليه وسلم الي يقول حق على الله ثلاثه وذكر منهم صلى الله عليه وسلم والمتزوج يريد العفاف وبعد اتوقع فيه حديث عن الرسول صلى الله عليه وسلم بما معناه ان الي ناوي يسدد دين الله يساعده وسلامتكم عفوا الموضوع ملخبط لان زي ماقلت كاتبه ونا فيني نوم والله ولي التوفيق والسلام عليكم ورحمة الله وبركاته |
رد : ودي اتزوج لكن عندي مشاكل ("فضفضه")
مصروف معيشي ألف ريال
يشمل ماذا تذكر عندك فاتورة جوال و كهرباء و جوال زوجتك و مصروفها و مؤؤنة البيت .. يعني شيء مستحيل أنها تكفي و ستغرق بالديون هذا الواقع , لا أصدمك و لكن حسبتك غير صحيحة تريث كثيرا و سدد دينك أولا و أنت عزوبي , قبل تتزوج و يكثر مصاريفك و حرام تطنش الرجال هذا دين الآن انت بمنزل والدك و لا عندك صرف كثير تقدر تعطي الرجل شهريا 1500 , تسدد دينك في أقل من سنتين و ما تدري ربما يتحسن وضعك الوظيفي و تجمع أيضا للزواج مبلغ 500 في سنتين , 12 ألف تقريبا+مساعدة والديك و أقربائك |
رد : ودي اتزوج لكن عندي مشاكل ("فضفضه")
شلونك ياطيب
انا بنظري يتسدد الدين اول بعدين تزوج يعني الحين انت تقدرتسدد الدين 2000 شهريا لان صراحه اثنين وثلاثين الف اشوفها قليله والباقي مشيه بنفسك احرم نفسك الين ماتسدد ترا الشهور تجري وثاني شي البنت الى تخطبها لازم تعرف براتب وتقدر وضعك المالي مهما كانت ضروف وخذ مدرسه ابرك لك ع الاقل تشيل نفسها اهم شي الدين بعدين زوواج وفالك المليون ان شاء الله |
رد : ودي اتزوج لكن عندي مشاكل ("فضفضه")
ما حبيت اخرج من موضوع من غير ما ادعيلك ..
الله يفرج همك وييسر لك جميع امورك ويزيح كربتك يآآرب .,~ الله يتمم لك على خير أخي الكريم |
رد : ودي اتزوج لكن عندي مشاكل ("فضفضه")
الله يعينك و يفرج همك
الشباب مشكلة الله يفرج همومكم يا ابن الحلال تصدق خل ربي يبارك في قروشك طلع شهريا من راتبك مبلغ للصدقة والتزم فيه و حاول تسدد لو نصف دينك و ربي بيفرجها ما راح تنفرج وانت ما ارضيت الله تصدق واستغفر الله سبحانه وتعالى يقول في سورة نوح ( فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا يُرْسِلِ السَّمَاء عَلَيْكُم مِّدْرَارًا وَيُمْدِدْكُمْ بِأَمْوَالٍ وَبَنِين َ وَيَجْعَل لَّكُمْ جَنَّاتٍ وَيَجْعَل لَّكُمْ أَنْهَارًا)).. وبتشوف شلون بتتيسر أمورك بإذن الله موضوع الزواج أجله سنتين بالكثير تكون خففت شوي من ديونك و يبقالك شي بسيط ما تدري يمكن ربي يرزقك بوظيفة تغير وضعك تماما ما ابي احطمك لكن انا اشوف ان راتبك الحالي ما يسمح بالزواج في ظروفك ذي يارب يا كريم أن تفرج همك ويوسع رزقك ويبارك لك فيه ويرزقك بنت الحلال اللي تعينك على الدنيا |
رد : ودي اتزوج لكن عندي مشاكل ("فضفضه")
الله يعينك ويفرج همك يارب بس نصيحه من اخت موضوع الزواج شيله نهائيا من بالك صعب تدخل على حياه جديده وانت عندك هم وهو الدين فعلا صعبه ولسى انت صغير في عمرك قسم بالله الحياه الزوجيه مسؤليه والله موبلعب ومصاريف ووالخ و1000 ريال للاسف ماتحرك شي هاليومين الحياه يبيلها متطلبات وزوجتك ومصاريفها شي مايخلص ماهما كان بتقدر بس في النهايه حتطفش من الوضع هذي شغله في يوم اكيد زوجتك بتحمل بيدخل شي جديد لحياتكم وشلون بتوفق بين هذا وذا وهذاك يعني في نظري شغله معقده حاليا بما انك مديون وراتبك يادوب يساعدك00
خذ بنصيحتي كيف تسدد دينك مالك الا الجمعيات ب1000ريال تطلعلك 10,000 ريال مره حلووو وهكذا الين تخلص دينك على خير وتصدق لو بريال فعلا الصدقه شي عجيييييييييييييب في تفريج الهموم والكربات الله يعينك ويوفقك00 |
رد : ودي اتزوج لكن عندي مشاكل ("فضفضه")
أخوي
زوجي تزوجني و عنده ديون فوق الـ 20 ألف و ما كنت أدري عنها .. و دحين بيسدد فيها .. بس المهم ، إنك تختار زوجة تعون ( عون لك ) مو ( عليك ) .. أنا اللي جالسة كل شوي أزن عليه ، و أقول له سدد ديونك .. . . ما أنصحك بتأجيل الزواج .. ( لإنه مشكلتك هنا ، و زبدة سؤالك هي هنا ) فإنت تبحث عن حلول لمشكلتك هذه ،، لو بسهولة تشيل فكرة الزواج .. ما كنت جيت و سألت ؟ مو صحيح ؟ بأعطيك حلول بإذن الله تساعدك و لو شوي .. |
رد : ودي اتزوج لكن عندي مشاكل ("فضفضه")
الله يفرج همك ويسدد دينك على يسر
قدم على اعانة ابن باز للزواج والاهم اختيار المرأة الصالحة التي تفهم وضعك |
رد : ودي اتزوج لكن عندي مشاكل ("فضفضه")
حبيبي اذا انت سعودي فيه جمعيات للاعانة على الزواج وعندك جمعية ابن باز
جب ورقه منهم وارسلي رقم حسابك وانا مني خمس ميه عانيه " تراي جاد " وبالنسبه للدين لاتأخذ قرض عشان تسدده وبما ان الرجال صابر عليك اشرح له الوضع وانك تدور الستر ومااتوقع انه راح يقول سدد الان بما انه صبر عليك الفتره هاذي كلها واذا جبت لي نسخه من الورقه واكدتها من الجمعيه راح اقدر اعاونك انشالله بس شد حيلك (اذا من سكان الرياض) وانا من رايي ماتستعجل على الزواج لانك لسا صغير وراتبك مايساعد ولاتنسى ان كل واحد يجي ورزقه معه يعني زوجتك ان شاء لله بتجي ورزقها بيجي معها الله يوفقك ياابو البنادر واشتر كنادر |
رد : ودي اتزوج لكن عندي مشاكل ("فضفضه")
أخي الكريم
لا تتزوج وعليك ديون ماراح تحس بفرحه الزواج صدقني لسه انت عريس وتبي تروح وتجي انت وزوجتك وتسافر مو معقول من اول شهر في الزواج بتجلس تجمع في الفلوس عشان الدين نفسيتك بتتعب حتى لو زوجتك كانت صابره وماقالت شي !! اول شئ أجل موضوع الزواج لمدة سنه .. خلال هذه السنه أعطي للرجال كل شهر 1700 ريـال من الراتب خلال 12 شهر بتكون سددت 20 ألف و400 ريال بعدها أخطب بنت تكون في حدود 16 أو 17 سنه خلي الخطوبه سنه في هذه الفتره أعطي للرجال كل شهر 1500 ريال خلال 8 شهور بتكون سديت دينك كامل مكمل ,, بعدها أعقد قرانك عليها 6 أو 7 شهور أجمع من العائله ومن الإعانه اللي قالو عليها الأعضاء وان شاء الله بيصيرلك أحلى زواج وبتروح وتجي وانت حر لا عليك دين ولا شايل هم ولا أحد يقدر يجي في يوم من الأيام يقولك انت اتزوجت بفلوسي ,, ولاتنسى خلال هذه السنتين - بتسد الدين الا عليك - بتخلص الثانويه ان شاء الله - واحتمال تترقى في عملك ويزيد راتبك - وممكن تشوف عمل غيرهـ براتب أعلى لأن الحد الأدنى للرواتب في القطاع الخاص 3 الاف ريال على حسب علمي ,, - كمان زوجتك بتكون خلصت دراستها يعني كل الأمور في صالحك ,, فكر أكثر من مره وأستخير ولا تستعجل على الزواج أبدا لان احلى ايام الزواج هي في بدايته تبغاها تروح في ديون وتفكير وتحرم نفسك وزوجتك من كل شئ عشان تسد دينك ماينفع !!! الله يفرج همك ويسد دينك ويرزقك من حيث لاتحتسب عاجلا غير اجل ,, |
رد : ودي اتزوج لكن عندي مشاكل ("فضفضه")
الله ييسر امرك ويسهل دربك
|
رد : ودي اتزوج لكن عندي مشاكل ("فضفضه")
الله يرزقك ويغنيك بحلالة عن حرامة وبفضلة عمن سواه
انا اشوف انك تأجل الفكرة لمين يفرجها ربي تسدد ديونك ويزيد راتبك لو تدور وظيفة ثانية او تشتغل بالفترة المسائية بوظيفة ثانية منها تملا وقت فراغك ومنها تجمع لك لزواج انت توك صغير رواتبهم 9الاف وعشرة وصلوا 29ماتزوجو الكلام تراه سهل تظمن تلقى شقه اجارها 150000 وش تسوي 1000ريال كمصروف شهري مع غلا الاسعار وكثرة المتطلبات *الله يوفقك ويسهل امرك ويرزقك من حيث لاتحتسب |
رد : ودي اتزوج لكن عندي مشاكل ("فضفضه")
أسأل الله العظيم رب العرش العظيم أن يرزقك و يفرج همك و يوسع برزقك يارب
|
رد : ودي اتزوج لكن عندي مشاكل ("فضفضه")
فكرة الجمعية مرررة كويسة افضل من القروض بمليون مرة
لانه مافيها زيادة زي القرض مثلا لو اشتركت مع خمسة اشخاص من اصحابك كل واحد يدفع الف ريـال شهريا يصير تجمعون خمسة الآف ياخذها واحد الشهر هاذا و الشهر اللي بعده ياخذ الخمسة الاف شخص ثاني وهكذا... يعني كل خمسة اشهر بيجيك خمسة الآف منها سدد ومنها جمع واسال الله يرزقك من حيث لاتحتسب .,, وعليك بالصدقة يتضاعف فيها رزقك بشكل ماتتخيله |
رد : ودي اتزوج لكن عندي مشاكل ("فضفضه")
أخوي قدم على الجمعية الخيرية للزواج .. اسمها ( أسرتي ) ..
يساعدوك ممكن بـ 15 ألف ، بشرط إنه المهر ما يكون أقل من 35 ألف ريال في عقد النكاح .. و هذه ما ترجعها لهم .. و فيه قرض الزواج من بنك التسليف ، بس هذه تسددها لهم .. و دور لك على موظفة ( مو عشان تاخد راتبها ؟ ) .. بس عشانها هي كمان ما تحس إنك مقصر معاها بالكماليات .. و ادعي دايما اللهم اكفني بحلالك عن حرام و اغنني بفضلك عن من سواك |
رد : ودي اتزوج لكن عندي مشاكل ("فضفضه")
مسز داني
جزاك الله خير على النصيحه وعسى الله ييسر الامور ونا منزل ذا الموضوع اطلع الي في قلبي والحمدلله الله يوفقك وييسر امرك ويرزقك دفــئ ونا اخوك مدري حاس ان 2000 ريال بتصير شويه في نضر الرجال الي متسلف منه حاس انها راح تاخذ وقت طويل عشان اسدد باقي المبلغ ونا ودي اتزوج اقرب وقت بعدين من 2000 راح يبقى معي 775 ماتكفيني الله يوفقك وييسر امرك ويصلح حالك في دنياك واخرتك زهرة الزمان امين ونا اخوك وياك وكل مسلم جزاك الله خير الفردوس غايتي كلامك صحيح ونا الحمدلله اتصدق والله ييسر الحال والحمد لله وجزاك الله خير على النصيحه جعلها في موازين حسناتك سماري برازيلي كلامك منطقي والله يجزاك خير ويوفقك والله يسهل الامور روح الطير بس المهم ، إنك تختار زوجة تعون ( عون لك ) مو ( عليك ) .. الله ييسر الين اصل ذي المرحله ما أنصحك بتأجيل الزواج .. ( لإنه مشكلتك هنا ، و زبدة سؤالك هي هنا ) فإنت تبحث عن حلول لمشكلتك هذه ،، لو بسهولة تشيل فكرة الزواج .. ما كنت جيت و سألت ؟ مو صحيح ؟ بأعطيك حلول بإذن الله تساعدك و لو شوي .. صدقتي والله ييسر علينا وعليكم وعلى المسلمين وبأنتضارك الله يوفقك جزاك الله خير الدانه امين ان شاء الله وكل مسلم وجزاك الله خير على الدعوه والنصيحه الله يوفقك L0o0Ve \ هلا اخوي الله يوفقك ايه انا سعودي ومن سكان الرياض وجمعية ابن باز الله يرحمه اسمع فيهم بس مادري وش نضامهم الي اخبره انهم لازم اعقد عقد نكاح ثم اقدم عليهم انا ماقدر اخطب عشان اعقد نكاح لان مامعي فلوس للمهر +الدين الي علي مقفلين على الموضوع وعانيتك مقبوله ان شاء الله اول مااوصل للمرحله الي اكون قدمت على جمعية ابن باز الله يرحمه بتواصل معك وبالنسبه للدين لاتأخذ قرض عشان تسدده وبما ان الرجال صابر عليك اشرح له الوضع وانك تدور الستر ومااتوقع انه راح يقول سدد الان بما انه صبر عليك الفتره هاذي كلها صراحه ودي اقوله بس مستحي منه الله ييسر واذا جبت لي نسخه من الورقه واكدتها من الجمعيه راح اقدر اعاونك ان شاء الله بس شد حيلك (اذا من سكان الرياض) الله يجزاك خير ويكثر خيرك ويرزقك الزوجه والذريه الصالحه والجنه نعم انا من سكان الرياض خلاص ان شاء الله اول ماصل ذي المرحله راح اتواصل معك وانا من رايي ماتستعجل على الزواج لانك لسا صغير وراتبك مايساعد ولاتنسى ان كل واحد يجي ورزقه معه والله ياخوك وش اقولك بس ودي اعرس مبكر انبسط في شبابي والواحد يبي يعف نفسه برضو عندي طموح اني ان شاء الله اشوف عيالي شباب ونا توني في عمر الـ40 واللهم امين الله يجيبيها ويجيب معها الرزق الله يوفقك ياابو البنادر واشتر كنادر هههههه اشتري كنادر اشتري اي شي بس هي تجي الله يوفقك اخوي والله يجعل نصيحتك في موازين حسناتك كلامك لايمل لاتخليني من نصايحك وتوجيهاتك ,,,,,,,,,,,,,,,,,,,,,,,,, بأنتضار نصائحكم وتوجيهاتكم ودعواتكم ومشكورين جميعا على النصائح |
| الساعة الآن 04:24 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©