|
كيد النساء (تجاارب ناجحه فيدونا واستفيدوا)
السلام عليكم ورحمه الله وبركاته
كيف حاالكم جميعا طبعا اللي متابع مواضيعي راح ينصدم اني انا اللي بكتب هالموضوع انا شخصيتي هاديه وطيوبه واللي يقوله زوجي لي سم وحاضر واللي اطلبه ويرفض ابكي وامسح دموعي ولايتحقق طلبي طبعا مليت من نفسي وصرت احس اني ارجع لوراء والناس قدامي حياتي نكد كل شي اتمناه لي مايصير والاقي زوجي يحققه لغيري اقسمت اني اتغير وبديت بشغل كيد الحريم وقوتهم واول مره احس بالاتصار بقولكم موقفي وابي مواقفكم عشان نستفيد من خبرتكم خرب جوالي ايفون له سنه وزياده معاي وطبعا خرب فجاه مادري وش جاه الا وهو طافي طبعا هالجوال كان زوجي حالف مايشتريه لي ويسب فيه وفي خدماته وبعد ماشريته بشهرين راح وشراه لنفسي طبعا انقهرت انه حسدني وجابه لنفسي مشيت الامور وقلت اهم شي ان معاي ايفون زوجته الاولى كبيره ولاتعرف للجهاز ويوم ولدت بولدي قبل كم شهر زارني بالمستشفى ولاجاب معاه حتى ورد انا قلت عادي هذا بحكم انه كبير وكذا بعد ولادتي بكم يوم اشترى ايفون لزوجته طبعا ماحسدتها بس انصدمت هي كانت تطلبه كم شهر يجيبه وكان رافض وقال لها بعطيك جوالي واشتري انا جديد ومسحت فيه الارض قالت انا ماخذ الفضله المهم هي معاها فلوس قال جيبيه من عندك قالت قسما بالله تجيبه انت لي عشان الحريم يعرفون انك تقدرني طبعا هي اشطر مني خلته يجيبه لها يوم ولدت عشان تثبت للكل انه يحبها ويقدرها اكثر مني وحركات حريم انا عديت الموضوع ولدت وبعد ماطلعت من الاربعين بشهر جاب لي طقم ذهب وبالقوه عقبها خرب جوالي وربي يشهد ان مالي يد في خرابه بس الله عالم بنيتي وانتقم لي المهم راح يصلحه وطلع مايتصلح انا ساكته اسبوعين وانا ماخذه جهاز عنده بدون كاميرا نوكيا قديم واروح واجي فيه وكلا يتطنز علي وماطلبته يشتري جوال قلت اكيد هو بيجيب من نفسه اثرهم مايجوون الا بالقوه وعاد كان فيه حفله عند خالاتي باقي عنها يوم وكنا نتغداء قلت وين جوالي قال خربان ومايتصلح قلت طيب والحل؟ قال مو لازم جوال خلاص معاك جهازي قلت مابي جهازك ابي ايفون تعودت عليه ولااعرف استخدم غيره قام يضحك علي قال اساسا جوالي اللي معاك ابرك منك هنا طلعت كل جنوني بالعاده اذا غلط علي ابكي واطس بلحالي وزي الاطفال نظامي اصيح واسكت هالمره انفجرت واطلع شريحتي من جهازه واحذف جهازه بوجهه قلت خلاص ابرك مني اشبع فيه ويلحقني يضحك امزح معاك واعطيه نظره قلت امزح عند بزرانك مو معاي المهم هو يحسب اني استهبل ويجي قال حطي الشريحه بالجهاز لايجلس جوالك مقفل كيف اتطمن عليكم قلت مو لازم تتطمن وطلع من البيت وادق علي امي واعلمها قلت اذا صار بالليل دقي عليه واسالي عني وقولي ليش جوالها مقفل اذا قال جوالها خربان قولي من زمان خربان ليش ماجبت لها جوال كيف تنام هي وعيالها بدون جوال وكان ولدي تعبان شوي الا وامي دقت عليه والا وهو جاي افتح جوالك قلت ماعندي جهاز قال حطي شريحتك بجهازي قلت انا ماستخدم اجهزه ابرك مني انا استخدم جوال انا ابرك منه وجلست اسبوع كامل اطلع وادخل بدون جوال وكل ماقال افتحيه سفهته واذا احد بغاني يدق عليه وكل شوي وهو رايح جاي علينا اتبهذل ع الاخر واطلع ذاك اليوم لصديقتي وبدون جوال ورجعت متاخر ويهاوش قلت مامعاي جوال عشان اطمنك وفي الاخير رضخ بالقوه وبالكيد وجاب لي ايفون 4s هذي بدايتي وللحين مووفقه والقادم اجمل انتظر مواقفكم مو شرط مع ازواجكم اي موقف فيه كيد وذكاء طبعا مايكون شي حرام او فيه ضرر على احد دعواتكم |
ههههههههههههههههههههههه
تمااام عليك كذا انت 100٪ |
ايه من كيد الحريم والله نسوي الي نسويه مافي امل من التغير والله المستعان
|
ههههههههههههههههههههههههههههه
الله يسامحك يا شيخة كذا الحريم والا بلاش بانتظار البقية |
فعلاً فيه ازواج ما يجون الا بالعين الحمرا.. مثل بعض الزوجات الرفلات..
انا عجبني الموضوع لان معرفة طرق تفكير الطرف الاخر تساعد كثير في تفسير بعض المواقف وبالتالي تعلم كيف تأمن المكر .. سأتابع بصمت.. كي استوعب جيداً |
صدق فيه ناس ماينفع معاهم إلا هالطريقة .
أنا صراحة تعلمت من زوجة أبوي هذا أسلوبها اكتشفتها .<<مع انه مااطيقها صار أبوي يقول صرت اشك أنك بنت فلانه مو أمك الي ربتك:) خواتي واخواني إذا يبون شي يقولون أنتي قولي لأبوي يسمع لك :23: |
الله يسعدكم جميعا
المشكله ماودي يقرأ الموضوع رجال عشان تعم الفائده ونسيطر ع الوضع نبي مواقف وتجارب من الواقع شي بغيتيه واخذتيه بدهاء وحنكه وكيد بدون ضرر بقولكم على كذا موقف بس بعد ماشوف تجاربكم شدو الهمه يابنات |
تذكرت موقف أبوي وعدني انه أول مااتخرج من الجامعه اسوي ليزك لعيوني برا السعودية احسن .
وقال آخر يوم لك بالاختبارات قبل ترجعين لديرتنا أحذك من السكن الجامعي ونطلع واسوي لك العملية ,,وانصدمت انه قال ارجعي وخليها على نهاية الصيف:( وصدقت أول ماجيت إلا زوجة ابوي توها راجعة من سفرتها كانت برا السعودية تقول معاك خبر أنه بنت جيران اهلها سوت ليزك لعيونها وبعد كم سنة انعمت استغفرالله كذبت عشان بس مااسويها مدري وش مصلحتها حسبي الله عليها عرفت انها كاذبة على ابوي وقلت له تراها قالت لي كذا وكذا هو فهمني قال هي مالها دخل ومدري ايش ’’سكتنا إلا كان اخوي بيسافر نفس ماكان وعدني ابوي زعلت عشانه ولد يعني يروح وأنا لا ,وصرت مااكلمهم إذا ناموا صحيت وإذا صحوا نمت بعد كم يوم أبوي حس بتأنيب الضمير وإلا جاء بالليل قال جهزي روحك بكره نسافر :17: والحمدلله سويتها وارتحت من النظارة <<<يوم طلعنا من المشفى إلا ابوي يقول خلاص ارتحتي ماينلام من كثر مالحيت عليه .. |
مواقفكم جميله اما انا ما اعرف كيف اتصرف بكيد او يمكن تصرفت بس من غير تفكير بأني راح اكيد في هذا الموضوع يعني كيد عفوي علشان كده ما اتذكر مواقف تصرفت فيها بكيد......
بس يلا يا حريم نبي نتعلم علشان نظبط مواضيعنا ... موفقين ان شاء الله |
وعليكم السلام ورحمة الله وبركاته
إنتي كذا صح عفية عليك تذكرين يوم اقولك بواحد من مواضيعك غيري أسلوبك هذا الزعل والتبكبك اللي عالفاضي والمليان شفتي لما سفهتيه وشافك زعلتي كيف قام يراكض وراك (زوجك يحب المرأة صاحبة شخصية قوية وتعرف تاخذ حقها) حلوووووو زوجك ينفع معاه كذا بس هاااا عاد مو كل يوم والثاني تسوين نفس الحركة آخرتها بيطفش خليك كذا وكذا يعني مرة تنازلي ومرة لأ فهمتي علي موفقة |
يااحبيلكم يابنات نبي نساعد بعض ضد هالفئه اللي غثونا
ترئ مو كل الرجال يستاهلون كيد بعضهم يستاهلون حريم يوقفون جنبهم ويحنون عليهم ويصيرون هم مقدرين هالشي لكن الفئه اللي اتكلم عنها لها مواصفات معينه يعني مثلا تلقينه يرفض شي تبينه وينفذه لا اخته او زوجته الثانيه او زوجه اخوه وانتي ماشيه لكن الام لااحد يقارن نفسه فيها ولاتفكرون تقارنون معها لانه لها مكانه غير شدو الهمه |
هههههههههههههههه .. ماشاء الله عليكِ أخيراً موضوع برّد قلبي.. :22: الي سويتيه ردة فعل طبيعية بس الحلو في الموضوع انك صبرتي ومارضختيله يعني ليش تعتبروه كيد نساء؟ مو هو زعلك؟؟ وانتِ اتضايقتي وهادي الرضوة جاتك . . . :14: |
ما شاء الله عليك والله صبرتي كم يوم على ما طلع هالجوال بس الحمد لله بالأخير النتيجة مرضية ،، وانا معك قلبا وقالبا الدموع هالزمن ما عاد تجيب شيء ارفعي راسك وحطي عينك بعينه وقولي اللي تبينه ،،، فيه كلمه للحريم الكبار دائماً يرددونها وكنت مو مقتنعة فيها بس الحياة كشفت لي صحتها وهي ( لا تاوين للرجال ) بمعنى لا ترحمينه وتقولين مسكين من وين له ووشلون بيدبرها ما عليك منه هو في النهاية رجل يعرف من وين يدخل ومن وين يطلع واهم شيء عنده مصلحته فوق كل شيء فما راح يضر نفسه علشان سواد عيونك ،،، وانا لا ادعو هنا المرأة ان تسرف وتبذخ و تجعل زوجها يتدين لأجلها ولكن تطلب منه بالمعقول وعلى حسب ميزانيته بس ما تضغط على نفسها وفي الاخير يحط الفلوس في استراحات وغيره ،،،،*
|
لا احد يختلف ان لكل زوجه اسلحه خفيه من الذكاء ان الزوج لايعرفها ..
ولي مواقف لكن اسدلت الستار عليها .. احسنت ِ انك ِ اوقفت ِ البكاء واتخذت ِ اسلوب مغاير .. ولكن لي عليك مأخذ - رميتها بوجهه - غثونا - لاداعي لها .. موفقه ... |
ايه كفوو والله هذي الحرمة السنعةة
|
لا يرضيني الا ما كان طيباً وبنفسٍ طيبه .. اما اذا كان بالزعل و الغصب و الكيد ،، تعافه نفسي ... لست مختلفه ،، لكن لدي قناعاتي .. فالكلمه الطيبه يمكن تملك بها اكثر مما تظن ان تملكه بكيد او خديعه او خذوهم بالصوت ... (ان الله طيبٌ لا يقبل إلا طيباً) |
قسم بالله
لو زوجتي ترمي الجوال بوجهي لأفصل جوالها وافصل تلفون البيت واخليها تعيش سنة بدون جوال او تلفون بيت واطلع لها شريحة سوا واشتري نوكيا كشاف ابو 80 ريال واقولها هذا للطوارئ القصوى بس |
اقتباس:
ومن وين يطلع عاد مايطلع الا اذا سددوا عنه ديونه والاكيد ماراح تكون زوجته المسدده لأنها بالأساس المسببه |
انا كرجل احب اجيب الشئ بإقتناع وبرغبة مني
اسلوب الضغط والزعل يا تجيبه يا ما اكلمك يا تجيب اللي ابيه يا ماراح اسوي اذكر زوجتي كانت تبي غسالة اتوماتيك ونشافة قلت : وش فيها الغسالة القديمة قالت : قديمة وغير كذا متعبه و و و و و قلت : ماله داعي قايمة بالواجب وتطلع الملابس نظيفة قالت : انت ما تبي راحتي انت تبيني اتعب وانت تبي وتبي قلت : مو كل ما نبيه نشتريه سوت اضراب عن غسيل الملابس <<< شوفوا الكيد ولي الذراع مافيه ثوب اطلع فيه والملابس الداخليه صارت قمة افرست ولدي صار يركض ويقفز فوق الملابس واحياننا يتخبى جوا سلة الغسيل وساعة ندورة ما نحصله صرت اشيل ملابسي اوديها لأمي تغسلها واخذها والعذر الغسالة خاربانه وكل واحد يغسل ملابسه عند اهله الى ما رضخت المدام ورجعت تغسل الملابس بعد شهر اشتريت لها غسالة افضل من الغسالة اللي كانت تبيها 100 مرة بس لوي الذراع ما احبة |
اقتباس:
لذلك مو كل رجال ينفع معاهم كذا والبعض يااخوي والله مايجون الا بالتطنيش وبعضهم بالقوه .. وبعضهم مرات ومرات .. |
يا حظك قدرتي تطلعي منه شي
استمري يا وخيتي .. يمكن كذا يحبك ويحقق مطالبيك عموما جمله دايم أسمعها اذا جاني عريس معدد اللي بتاخذ معدد لازم تكون شخصيتها قويه وما تتنازل .. دليل ان الرجال يتعلق باللي تتشرط واللي تقدره وتقدر ظروفه .. سيفون كبير سبحان الله عالم فاهمة التعدد غلط استمري .. الله يقويك متابعه و اكيد بتعلم واستفيد |
| الساعة الآن 07:06 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©